هلا فيك اخي حمد حسن

ورجعت مرة ثانية واحب اعلق على الي قلته


ولكن أذا كان الزوج كثير الأشغال بحيث أنه لايأتي البيت الا في ساعات متأخره من الليل بضروف عمله الا يكون من الجميل ان تعيش الزوجة بين اهله

كلامك صحيح

وفي اكثر من فائدة في العيش في البيت الكبير مثل ما نقول

منها انه كل واحد يعرف عن الثاني ولو يصير اي شي لاحد بيكون في اكثر من واحد في البيت يقدر يلحق عليه ويساعده

غير لين يكون بروحه في شقة محد له ويتوهق في عمره

وبعد مثلا بدل ما البنت لين تكون في حالة ولادة ما يحتاج تروح بيت اهلها دام انها في بيت زوجها ووسط اهله وبيتحملوا مسئوليتها في تلك الفترة

وهذا غير الترابط الاسري الي يقوى بين افراد الاسرة


وفوائد كثيرة وما تحضرني في هذا الوقت ذكرها

ولكن في بعض الاحيان يكون هناك شواذ

مثلا يكون اهل الزوج كلش اخلاق ما عندهم وزوجة الولد عندهم لازم تكون عبدة وما تفتح فمها بكلمة

وغير التدخلات الي تصير في حياة الزوجين


وفي حالات تكون الزوجة هي الشواذ

ما يكون عندها اخلاق مع اهل زوجها ودائما تنظر اليهم من طرف عيونها

وابد حتى ثقافة التعامل مع الناس ما معاها تشوفها برة البيت مع الناس شحلاتها لكن مع اهل زوجها عدم وكانها طالعة من غابة

وغيرها وغيرها الحياة مليئة بالاحداث


يصلح العيش مع اهل الزوج اذا كانت البنت مثقفة بحال هالدنيا وتعرف شلون تمشي امورها مع الناس وتعامل كل واحد على قد تفكيره

وما تاخذ الامور بالعصبية وطنش وطنش وبعد الطنش اشياء واجد بصير امامها عشان تقدر تعيش براحة مع زوجها من غير ما تعكر على نفسها وعلى زوجها الحياة وتصعبها عليهم هم الاثنين اكثر


بحكم تجربتي وعن طبيعتي وطبيعة اهل زوجي احب اعيش معاهم بس حاليا قاعد تصير مشاكل لان مو بس انا الي عايشه معاهم عنده اخوان اثنين متزوجين

وكل منا عنده عيال

والمشاكل بدت تكثر من هالسالفة لان مو كل واحد يعرف شلون يتصرف مع المواقف الي تصيده

والمشكلة بعد ان الكل يعرف انه لا تدخل نفسك يالكبير في امور اليهال لا تصير يهال مثله

لكن من يسمع ومن يتعض

عمك اصمخ خيو

ادعوا الله يسر الينا ونطلع في بيت لحالنا عشان نرتاح اكثر


تحياتي لك اخي الكريم

اختك ام محمد