عمر قعد شوي مع اخوه وبعدها خلاه وراح عنـه ..
دخل خالد لداخل البيت متوقع غلا بتسأله وين كنت ؟ او من عندك ؟
لكن كل شي كان عكس توقعاته ..
غلا لاسألته ولا عبرته بكلمـه حتى ...
خالد قعد على الكرسي وهو يشوفها رايحه وراده على الدار .. ويفكر
خالد ( أكيد بتكرهني بعد عقب هالحركه الخايسه اللي سويتها وعفست ولدي شبتسوي فيني؟ والله وحده ثانيه تنحرني )

يوم الخميس عمر كان فداره قبل لايوصلون اهلهم للبيت العود وتبدى اليـــمعه =) ..
عمر فتح فايلاته يدور على رسمه يوريها المها او أي شي مالقى ولاشي عدل او شي يقدر يوريه لحد ، كل رسماته تقريباً تتعلق بغلا والباقي راسم ربعه او اشيا جذي ومايقدر يوريها مثل هالرسمات
فتح الكبت وطلع العود ..
عمر : ههههههه هاللي براويج اياه
طلع عمر وراح للصاله اللي بيقعدون فيها مع اليهال وحط العود فوق الطاوله . ورجع يتكشخ تسبح وطلع لبس ثوب بني غــامق وغتره حمره كشخ فيـها
لما وصلوا الناس بيت خاله احمد و عمر وخالاته و غلا و خالد وعيالهم وعيال عيالهم وبدت السلامات والتهلي والترحب فالناس
عمر كان يسلم وينسحب شوي شوي ،، انتبه لغـلا كانت لابسه سلسال ذهب يشبه واحد شراه لها لما مره طلعوا مع بعض او ماجات بيتهم مع امه واخوهوهي رفضت تاخذها
عمر قعد يفكر ويتذكر هي ماخذتها بس هذي نفسها ، انا متأكد هي ماخذتها ، ورجع لداره يدور العلبه ويفتش انقص ظهره وهو يدور العلبه وتذكر انه كان مخليها فداره اللي فبيتهم القديم ، بس بعد متأكد ان ولاشي له فبيتهم القديم ..
فتش لآخر مره لكن تذكر في اشيا يحطهم بصناديق تحت سريره ، وتذكر انه خاش الهديه فبوكس حاط فيه ذكريات لغلا .. لما فتحه لقى العلبه ولين الحين على لفتها ..
عوره قلبه تذكر ذيج اللحظه وبسرعه حط الهديه فالعلبه وسكر البوكس ودزه تحت السرير ..
طلع وشاف غلا وهي تبتسم له وقابلها بابتسامه ارووووع ، طلع شكله فظيييع خصوصآ بالثوب الغامق اللي عكس لون عيوونه العسليه
شافها شوي شوي تلهى عنه ، أكيد بتلهى عنه ،، المهم عمر خلاها وراح لداخل الصاله وهو شكله متظايق حيييل حتى المها عورها قلبها عليه
المها : شفييك عمر؟؟
عمر يتنهد : متظاايق
المها : من شنو؟ اقدر اعرف
عمر : لو مهما قلت هالظيقه يالمها مو منطبعه فقلبي منحفره وكل يوم تكبر
المها كانت حساسه وبسرعه قلبها عورها : ليش تقول جذي؟ من شنو متظايق؟ يمكن اقدر اخفف عنك ! ترا ساعات الواحد اذا تكلم وهو متظايق تخف عنه ..
عمر يبتسم : ساعات مو دايمآ
المها يأست ماتعرف شتسوي؟ اول مره تتعامل مع حد جذي
المها : ماخلصت الرسمه؟
عمر : شقيتها
المها انصدمت : ليش؟
عمر : عندي غيرها
المها : ماشفتها
عمر : بتسمعينها
المها رفعت حاجب بس عرفت انه بيغني لها

اليهال يوم شافوه ماسك العود استانسوا انه يعني حركه وجذي لووول

عمر :

عمر حس في شي يخنقه ومايقدر يكمل للمها سكت ونزل العود والمها عيونها تعكس الضي من كثر الدموع

عمر وهو متظايق : ترا انا مثل اخوي ، الدموع تحرنا ههه
المها ماردت عليه ودرت ان السالفه عن غلا
عمر خلاهم وطلع للحديقه وتم يتمشى فيها وهو يمشى شاف طوفه مغطيها الشجر
تم يطالعها ويفكر ويفكر ويفكر
( انا لورسمت امي مب منتبهه الشجر مغطيها كلش
كانت في مسافه بين الطوفه والشجر بس مب وسيعه وايد
عمر دخل للمطبخ وجاب له قطع فحم و فصخ غترته وراح للطوفه ،، شمر ثوبه و قعد يرسم عليها
وهو يغني

غلا اللي كانت توها تدخل للحديقه سمعت كلمات عمر وهي مب مصدقه
غلا : مانسيتني ياعمر؟
عمر لف عليها : غلا؟؟
غلا : مارديت علي
عمر : انساج؟
غلا : مو انا خليتك ورحت عنك؟ شجابرك على انك تحبني
عمر : الغلا مايقضي عمر ويروح ياغلا
غلا : احبك ياعمر وكاني رجعت لك
عمر : وانا احبـج ياغلا وربي احببج
عمر وعى للي قاعد يتخيله و انقهر من قلب وضرب الطوفه بريله وقعد يحك الفحم على الطوفه لين ماصارت اظافره تحتك بالطوفه وتجرحت اصابعه وطلع الدم منهم
وصرخ من الحرااره اللي صارت فيييده
لف ورفس الطاوله وطيرها لنص المكان

عمر طاح على الارض وهو حاط راسه فيدينه
عمر : راحت منييي راااحت ، ياناس احبهااا

خالد كان طالع من البيت ورايح للمجلس بره وسمع صراخ بالحديقه بس هو كان بعيد عنها
خالد من بعيد : منو؟ شهالصراخ ؟
عمر من سمعه قام وركض
خالد يحاول يلحقه بس ماقدر
خالد يزعق : من انت؟؟
عمر كان يركض لين وصل لباب البيت بس اللي من ورا طلع منه وطلع على الشارع وهو يمشي مايبي يرد للبيت الا لما تعدي ساعه على السالفه على الاقل
عمر كان يتصل على موبايله رقم غريب بس مارد وقعد شوي وشاف نفسه يرد للبيت دون مايدري ، دخل للحمام وخالاته ميتين خرعه يده كلها دم واللون الاسود من الفحم معلم على وجهه هم فكروا سوى حادث او شي
عمر مارد على ولا حد منهم حتى المها ..
خلوه بعد ماقال لامه طلعو عني ، خلته بروحه وهو يغسل الدم تحت الماي ، والدم مب راضي يوقف
دخل عمر للدار اللي كانت فيها مريم الصغيره قاعده مع ولد غاده الصغير ..
تفاجىء بوجود غلا فيها بدون أي حد ، عمر فكر انه يتخيل بس لا صج واقع

غلا : لو انا سألتك بترد علي ولا؟
عمر انهبل: على شنو؟
غلا : شمسوي فيك جذي؟
عمر : ولاشي
غلا جابت قطنه فيها مطهر لاصابعه اللي حالتهم تقطع القلب ..
عمر : لاتجيسيني ، حرام عليج
غلا : اكيد حرام جايستك بس حطه انت ..
عمر مايقدر يقول لها لا : تامرين
مسك القطنه وحطها وبسرعه شالها وهو مغمض عينه
عمر يهف على صبعه : اححح غلا قسم بالله يحرق
غلا : ههه لازم محد قالك تسوي بروحك جذي
غلا شافته مارد على سؤالها واستغربت ، عمر وهو يداوي صبعه ..
عمر : كنت اشخبط على طوفه فالحديقه بس لاتدري امي ،، ( يقولها وهو حزين ) وانقهرت .. ! جان اجّرح اصابعي وانا مادري
غلا : على شنو انقهرت؟
عمر : اشيا وايد ياغـلا ، انتي تشوفين عيشتي عيشه !!
غلا ماردت عليه
عمر وهو قايم : الله كريم ..

عمر اللي تم ملازم هالدار والاخ شكله مايبي يطلع غلا شالت بنتها وطلعت من الدار ..
عمر فز على حيله و كلمها ..
عمر : خلاص انتي رجعي انا بطلع
غلا ترفع له حاجب وشكلها بدت تعصب : يعني انت قاعد عشاني؟
عمر يجذب : لا (ينزل راسه) أي؟
غلا : حرام عليك ياعمر ، حرام اللي تسويه فروحك والله حرام ، خاف الله فنفسك
عمر : انا آسف غلا ، ماقصدت ازعجج
غلا : انت ماتزعجني انت تزعج نفسك
عمر : خلاص غـلا انا اوعدج
غلا : بشنو؟
عمر : اطلع من حياتج
غلا كانت تبي تقوله كلامه يهزه بعد عشان خلاص مو بس يطلع لا ينسى بس مسكت نفسها لان مهما كان هاللي جدامها لـه مشاعـر ، و واحد مثل عمـر ملياان مشاعر حساسه ..
المهم ..
غلا طلعت وبعدها بشوي عمـر راح يقعد مع خالاته .. دورهم قالوا له قاعدين فالحديقه .. عمر تغير مزاجه بسرعه وراح لهم وهو يتظحك مع ولد خاله وهو يستعبط عليه على الآخر ..

عمر : ها الخوات فكشته؟
تغريد : تقدر تقول
عمر + تغريد : هههههههههههههههههههههههههههه
عمر : تعجبيني يالعممممه
صخ عمر وتغريد وانسمع صوت غلا وهي تكلم ولدها .. عمر تلفت يعرف هالصووت .. وشاف غلا وهي مدنعه تكلم ولدها ومشت عنه ، رفعت عينها وشافت عمر ، لفت عنه وعدلت شيلتها ورجعت قعدت تسولف مع غااده..
عمر مشى شوي بعيد عنهم وتم يغني بصوت واطي مع نفسه ..

اغسلي بالبرد
قلبي صبٍ تشهّد
بعد عقل يدله
ضاع منه الدليل
ساهر ما رقد
لين جفنه تجمد
يسهر الليل كل
ه في نحيب طويل
جمر شوقي توقد
في ضميري وعوّد
بالعنا والكلافة والبكا والعويل
له نصيب الأسد
في فؤادي مؤكد
وناظري مستحله ..
وما لحبه بديل ..


المها : مع اني ماعرف انك تحب كاظم الساهر؟
عمر التفت عليها ( ماشالله عليج فكل مكان موجوده) .. ابتسم لها
المها : ماجاوبتني
عمر : كنت اسمعه لان غلا تحبه
المها : اهااا ، الصراحه انت اول واحد اشوفه يحب بهالشكل الجنوني
عمر يأشر لها (لا لا) وهو يطلع صوت : عندج خالد اخوي اكبر مثال هههههههه
المها : بس حبك لها مايعادل حبه هو لها
عمر : المها ، بنت خالتي على عيني وراسي ، بس ماسمح لج ، غلا متزوجه وهالكلام يأذيها ، اناا وان كنت احبها ماحب أي حد يتكلم او يفتح هالسيره ، حبها لي انا مابي حد يتدخل
المها : اوكي اوكي ماقلنا شي ..
ولفت قعدت مع النسوان وهي متنرفزه ..

شوي الا جايهم وسيم العااايله وهو طالع جنه البخت << ..
خالد : هاا الغلا هنـي !!
غلا وجهها احمر لانهم كلهم التفتوا عليها ..
غلا بصوت واطي : أي
خالد : ها ماشبعتي؟
تغريد : شدعوى ياخالد تو الناس تجون آخر الناس و تطلعون اول الناس .. ماتبونا.؟
خالد يتغشمر : لا عمتي الصراحه انا انسان مايتحمل ، لاعت جبودي منكم بس بس يلا يلا
غلا قامت ووقفت جدامه بس على جنبه اليمين وماعطتهم ظهرها ..
خالد رفع لها حاجب وعمته تكلمه .. خالد كان يتحداها بالنظرات وهي ماتقدر لوول ..
خالد : يلا يباا ، يلا يالحلوو نبي نرجع
غلا : انشالله
خالد : لاتحاتين انا ملقط عيالي
غلا : هههههه
راحت عشان تلبس عباتها و خالد يغني بصوت واطي : شحلوو طولك من تمشي وانا اراااااك
اللي كانوا قاعدين كلهم يظحكون عليه
خالد اونه عصب عليهم : منكت لكم انا؟؟؟

غلا لبست عباتها وخذت اغراضها و طلعت شافت عمر و المها فالصاله قاعدين
ابتسمت لهم و قالت : يلا تصبحوون علـى خيـر ..
عمر : وانتي من اهله
المها ماردت عليها ، عمر لاحظ بس غلا مانتبهت ..

يـوم الجمعـه ..:..

خالد دخل البيت من بعد صلاة الجمعه وغلا قاعده فالصاله ..
خالد قعد حذاها .. : مرحبا
غلا تبي تظحك بس سوت روحها انها مب مهتمه : مرحبتين
خالد : بونسوار
غلا : ههههه
خالد : ظحكج؟
غلا : حييل
خالد : تدرين اموت عليج وانتي تظحكين؟
غلا : أي ادري
خالد يقلدها :أي ادري
غلا : خاااااالد
خالد : ههههه غلاااااا
غلا : نعممممم!!!
خالد : عيالي وين
غلا : فوق شتبي فيهم؟
خالد : احسن ، بنشرد انا وانتي ..
غلا : وين ؟
خالد : عازمج
غلا : يصير اعرف وين؟
خالد : لا انا طول عمري احب المفاجئات ياغلا ماقدر اقول
غلا تترجى : عشااني ، قول حبيبي وين
خالد على طول : على الغدا
غلا ابتسمت له و طرى عليها شي : وامك؟ وغدا الجمعه؟
خالد : يييييييييييييااه شعليييي انا منهمم ، كيفي يبا ، بقط عيالي ويتصرفون بهم
غلا : صـج
خالد : أي صج..فاهمه؟
غلا : فاهمه

خالد راح يرتاح له شوي على ما غلا تجهز و تجهز عيالها ..
غلا لبست تنوره سودا وبلوزه عنابية ، طلع شكلهم روعه ولبست سعد و فيصل و مريم وخلصوا
راحت قعدت حذا خالد وهي تهزه شوي شوي
غلا تشيل ذراعه اللي مغطي فيها عيونه، خالد مسك يدها ..
غلا : يلا خالد
خالد يسوي روحه نايم
غلا : يلا حبيبــــي
خالد يفتح عين : ماتشوفيني نايم
غلا : نايم؟ خلاص حبيبي خلك نايم
خالد : لالا اتغشمر معاج يامره ، يلا يلا
غلا ضحكت له وسبقوه تحت ..
بعد مانزل وركبوا السيارة ووصلوا عيالهم وصلوا للمطعم ونزلوا ..
خالد يطالع غلا جنه اول مره يشوفها ..
غلا : خالد لاتسوي جذي تشوف المكان مليان ناس
خالد بالعماله يشهق بس بدون صوت =}
غلا : هههه خالد لاتسوي جذي ، الناس تطالعنا
خالد : اكيييد يحسدوني اللي مايخافون الله ..
جاهم الويتر وعطاهم المنيو
خالد : لا بس عطنا شي نشربه الحين بعدين الغدا
الويتر : أكييد
خالد : شتشربين غلا؟
غلا : اممم ، على ذوقك
خالد : اكييد؟
الويتر : أكييد زوأك حلوو
خالد : هههه الله يخليك (خالد ماستوعب ) ..
وطلب له هو و لغلا ..
خالد كان طالب العصير فكاس مثل الـ Mug كبيير وايد ..
خالد : شفتي كلٍ وحجمه


غلا : ههههههههههههههه
خالد : شلون سّعود بعد اللي صار؟
غلا : لا حمدلله أحسن
خالد شرب العصير
غلا : ماعرفت متى بتسافر؟
خالد : لاوالله ، لسى
غلا : لسى ، ههههههههه

بعد ماتغدوا وتموا شوية سوالف و ظحك وبعدها تمشوا فالسياره وراحوا للبيت العود ..
خالد ماعطى امه مجال تقول له أي شي على طول سلم وحب راسها وكلها بالاسئله لين ماانطمت
غلا قعدت حذا عمها سعود وهو جنه يعد عليها سالفه قديمـه ..
خالد امه مسكته وراحت معاه لدار بعيده عنهم
خالد مارضى يدخل ودخلته بالغصب
خالد : يمه عندج أي كلام بره ، جدام غلا
لطيفه :اسمعني هالكلام بيوصلها ان كان يصير من جدامها ولا وراها
خالد : لا يمه انتي خايفه ، لو مب خايفه مادخلتيني وسط هالدار المسكره وبعيد عنها
لطيفه : لا ترفع صوتك علي وانطرني اكمل كلامي
خالد : مابي اسمع شي يمه مابي
لطيفه : بتسمع
خالد : خير يمه؟ شنو بعد ؟ آمري؟
لطيفه : العنود
خالد : ولعنتين ، شبلاها؟
لطيفه : ماله داعي تلعن ، اسمعني انا عطيتك فرصه تفكر ، شقلت؟
خالد : يوهوووووو ، يلا يمه سلام عليكم
لطيفه تجره من ثوبه وهي تصرخ : لما اكلمك تسمعني لين الآخر
خالد يعلى صوته من غير قصد : مابي يمه هالخربطه مابي اسمعها
سعود و غلا سمعومهم وخافوا من الصراخ
غلا : شفيهم عمي؟ شصاير؟
سعود : مادري؟
ماعلقوا لما الصراخ خف ، بس اللي صار خالد طلع من الدار وصرخ صرخه وحده
خالد : يبـا تعال !(وهو معصب)
سعود : شبلاك؟ شهالصريخ؟
خالد : يبا شوف لاتحدني احلف ماطب هالبيت ، ماتشوف لي دبره مع امي ؟
سعود : خير ياصبي شفيك؟ شمسويه امك؟
لطيفه : ماسويت له شي؟
غلا قربت من خالد وهي ماسكه جتفه بتهديه ..
سعود : لطيفه شعندج معاه؟ من ماطلعتي لنا بعجبه؟ شناويه عليه؟
خالد يزعق : يلا يمه قولي، ولا الحين الكلام مانعرف نقوله ، مب صار لج ساعه تهاوشيني وتصرخين ومابقت كلمه ماقلتيها ، الحين ماعندج شي تقولينه؟ خفتي لانه جدامها؟
غلا مستغربه ماتفهم ولاشي من اللي يقولونه؟
سعود صرخ على خالد : انت هيه ماتفهمني شصاير؟
خالد : قولي يمه ، تحجي ، مو مساعه تحنين علي تبيني اعرس وآخذ االعنود وماتبين غلا تعرف؟ لكن انا ماني خاش عنها وكاهي جدامج وعرفت والي بيصير انا راضي فيه ..
سعود : يعني سويتيها يالطيفه؟
لطيفه : والله انا وحده تبي لولدها الفرحه ابي اشوف عياله تارسين هالبيت
خالد : مابيج تفرحيني ، انا فرحان جذي ، شلون افرح مع غير غلا؟ يمه حراام عليج ، بسج من هالسوايا
غلا اللي كانت طول الوقت ساكته ولما خلص الصراخ
خالد : غـلا؟
غلا بكل هدوء : رجعني البيت
خالد يطالع امه بنظرات مانقدر نقول كراهيه ، تشبه الكراهيه .. او نوع من اللوم ..
غلا مشت عنهم و دموعها تمشي على خدها ..
لما وصلوا للبيت غلا على طول قفلت على روحها الدار ولا خلت أي حد يدخل ، وكالعاده تمت تصيح ، خلاص غلا تقريبآ بدت تكره حياتها اللي كل يوم تتلون لها بلون ، مره تفرحها ومره تنكدها ومره تصيحها ومره تغمرها بفرح و مشاعر لاول مره تحسها ومره تعوضها عن كل ثانيه فرح بشهور من اللوعه والحززن ..
خذها النوح لين ماغفت على المخده ولما قامت لقت محد فالبيت وخالد كاتب لها ورقه وحاطها على طاولة الصاله

كاتب ( نوم العوافـي ، راجع لج .. )
غلا استغربت ماكتب وين بيروح ولا أي شي وموبايله مسكر ..
نزلت تسأل الخدامات مايدرون رجعت للدار وهي ماسكه كوب فيه قهوه بس مو مره مثل خالد ..
لما فتحت غلا الدريشه


تدرون شنو شافت؟