`·.¸¸.·´´¯`··._.· (اسف على قلبي .. مو عليك ياحبي) `·.¸¸.·´´¯`··._.·

[فرح]

اميرره
حركااااااااااااات اتجنن

روووووووعه لا تطولي علينا
جاااااااااااااااري الانتظاااااار

[أسيرة الأحلام]

الله الله ويش هالحركاااااااااااااااااااااات

يسلمووووو حبيبتي بس كمليها

خخخخخخخخخخخخخخخخخخخخخخخخخخخخ

[.:روح وريحان:.]

يـــــــــــؤؤؤؤؤؤؤؤؤؤؤؤ
كيف كذا
اني امس فتحت القصة ماشفت الردود ابداااا
توي ترى اقرء السادسة والسابعة والعشرون
؟؟؟؟؟؟؟؟غريبة؟؟؟؟؟؟؟؟؟؟
واني اقوول شلون اميرة ماحطتهم
يسلمو اميرة وانتظر التكمله

[hope]

تسلمي ع الحلقه ...

[Princess]

الحلقه الثامنه والعشرون

ودقيقتين ترجع وتدق جنان على فطوم
ــ الو هلا فطوم
ــ اهلين
ــ يقول لش يوسف ..لايمر قاسم ولا يجيب فلوس ولا شي
ــ لويش .. مو بكيفكم
ــ ههههه .. لا بس يقول انه مره كان متسلف من عند قاسم وعادي الحين هذا هو رجعهم انتين واخوش واحد ..
ــ ما عليه.. يصير خير ...
ــ يللا مع السلامه
ــ الله يسلمش
وسكرت فطوم من عند جنان .. وهي تفكر .. متسلف من عند قاسم ؟؟.. خلني اسأل قاسم بعدين واشوف ويش السالفه...
وصاروا يعدلوا في اغراض سجى ..
وبعد 3 اسابيع ...

قاسم في شقته.. قاعد يطلع تلفزيون.. وصوت الإستشوار .. فااقع راسه.. يبغى يتابع الفلم مو عارف
ــ طفييييييييه.. ويش هالإزعاج...
ــ هااا باقي شوي ...
قاسم يهلوس فباله..
ــ ايه كل هالحووس حق الخويات اللي بيجوها.. امحق .. والا انا تقابلني بكشتها ..الله يصبرني بس ..
وتخلص ريم متكشخه.. ومتعدله..
ــ ياااااربي .. ماحطيت عصير في الفريزر.. حاار.. قوم عاد اشتري عصير...
ــ اوووه تعبان ومالي خلق .. وباقوم انام... سوي ليهم فيمتو
ــ ويشوو فيمتوو.. بيجوني خوياتي اول مره.. اقعد كاسات وفيمتو وحاله.. يللاقووم جيب عصير ..
ــ اقول .. تشوفي رقعتي على خير باروح انام
ــ تعاااااال .. وين بتنام
ــ بسم الله لا تصاارخي انا قريب اسمع .. وين بعد في الشارع .. اكيد .. بالغرفه
ــ لا حبيبي .. بيجوني خوياتي .. وابغى اوريهم شقتي وياخذوا راحتهم.. ما تنامهنا..
ــ عدلللل.. وين اجل يا مدام..
ــ في أي مكان.. عندك جناح تحت ويش كبره
كان قاسم ساكن بشقه في بيت ابوه... وصاار يهلوس فباله : جنااح اللي يطرش وما يعودش قولي امين ...
ـــ طيييب يصير خير ...
وطلع قاسم مره وحده محمق ..
ــ جيب وياك عصير اسمك بتطلع
ــ مانا جايب شي .. شوفي واحد من اخوانش يجيب لش
طاااخ ..كفخ باب الشقه...... وريم عااادي عندها الوضع .. تعودت على قاسموحركاته.. ولا هامنها شي...
قاسم قبل لا يطلع من البيت مر على اهله تحت.. شاف فطوم قاعده.. اللي سألتهعلى طول عن سالفة السلف .. قااسم وهو مااله خللق
ــ سلف.. ما ادري مو متذكر.. انّي سلفته.. و 200 بعد ما اتذكر ابدا.. الصراحه
ــ متأكد..
ــ ما ادري بس الأغلب متأكد.. لويش ..؟؟
علمت فطوم قاسم بالقصه
ــ اهاا .. طيب ابسأله.. ابطلع الحين ويمكن امر عليه ...
ــ لا تنسى ..
ــ لا ما بنسى .. يللا باي
ــ بايات..
فطوم صارت تفكر من شافت اخوها متعكر مزاجه . الله يعينك ياخوي اكيد ريمووه مهببه بلوه ,, ااخ بس ....ورجعت تفكر بالفلوس.. يشلخ يعني يوسف .. يللا ياخبر اليوم بفلوس بكره ببلاش القاه...
قاسم ركب السياره .. متكدر . ..ومو طايق الدنيا .. يدق سلف السياره .. وما يمديه بيمشي .. الا يجيه اللي يزود الحره عنده .. ماجد مار عليه بسيارته .. دق له سلام من بعيد .. وزين قاسم لحلح ايده ورد السلام .. وظل واقف ما مشى ...
وشوي طلعت سجى ..
قاسم من شافها .. صار قلبه يدق بسرعه .. وفيه قهر .. صار يهدي روحه .. يسلي نفسه... ومهو عارف ويش يسوي .. ومره منفجر .. ويمد ايده على المسجل ويشغله وكان فيه شريط اشعار صوتيه لعلي الخوار... على نهاية قصيدة ما تناسيتك :

حبيبي دارت الدنيا

وفارقنا الزمن هذاك

ومدري هل بتذكرني

اذا في يوم لاقيتك؟

أنا محبوبك الأول

أنا اللي ما قدرت أنساك

أنا انسى بس نسيانك

ولا اذكر تناسيتك

زود "علي الخوار " الناار حطب في قلب قاسم .. طفى المسجل وهو مقهور .. وطلع الشريط .. وبقهر زود شلخه .. وفتح النافذه ورماه .. وهو يرميه .. كانت سيارة ماجد مارهعليه .. ونزل قاسم من السياره هوون عن الطلعه .. دخل البيت معصب .. وراح لجناحه ,, قفل البيبان عليه .. ودقها نوووومه ..

ماجد مستغرب من حركه قاسم :ــ بسم الله ويش فيه هذا .. زين ما كفخ سيارتي بهالشريط .. الحمدلله والشكر
ــ هههههه .. ويش دراني .. يمكن خربان وقهره
ــ صدق مهو صاحي .. ليش كذا .. ماعنده اسلوب بهالحركه
ــ ما علينا .. وين بنرووح
ــ مفاااجأه ...
ــ صدق وين .. لا تخليني على اعصابي
ــ قلت لش مفااجأه ...
وشوي يدق جوال ماجد
ــ هلا .. هاا وين .. طلعتوا ؟؟ ........ اهااا..طيب............... هذا احنا قريبين منكم..جايين...
سجى داقنها فضول ويش السالفه .. ومين هاللي يكلمه ماجد وهم قريبين منه
وشوي .. شافت سجى سيارة يوسف .. ومعاه جنان .. .. نزل ماجد ..وصار يسولف ويا يوسف شوي
سجى دقت على جنان
ــ هلا جنان .. اخبارش
ــ هلا سجى .. الحمد لله
ــ ما تدري ويش السالفه
ــ هههه لا كان تدري قولي لي
ــ يالله ما يندرى ويش عندهم .. ضاربني فضوول
ــ ههههه ويش فيش ياخبر الحين بفلوس .. عشر دقايق ببلاش
ــ هههههه ياحليلش يللا باي باي .. اكو ماجد جا
ــ بااي
ماجد
ــ هااا دااقه على جنان تبغي تعرفي السالفه
ــ هااا
ــ هههههه مكشوفه .. ترى حتى هي ما تدري
وصاروا يمشوا ماجد ووراه يوسف ..لين وصلوا طريق .. سجى تعرف لوين راايح
ــ هااف موون..
ــ هههههههه .. لا
ــ اجل .. ااا .. لا عااد .. صدق
ــ ههههه ويش اللي فبالش

[Princess]

ــ مدينه الأمير محمد بن فهد الترفيهيه
ــ ايوووه .. عليش نوور.. ههههههه .. طلعتي تندلي ..
ــ ههههههه .. والله من زمان .. وبتركب وياي
ــ انا .. هههههه ..لالالا.. اكي جنان وياش
سجى تطالع على جنب وبخبث وتحدي .. : بنشوووف..
ــ ههههههه لالا ما اسويها .. تبغي انجلط .. اكي وياش المينونه جنان .. انا ادريبش تحبي تلعبي .. وهي بعد .. حلكم تصافقوا لين تشبعوا ...
ــ واذا يووسف ركب ويانا ..
ــ ااا ... لالا .. ما ظني .. يصير خير
ــ ههههه .. بنشوووف
وصاروا يمشوا .. لين لاحت قباب المدينه
جنان تناقز
ــ وص وص وصلنااااااااااااا...
يوسف يحب ايده وجه وقفا
ــ الحمدلله والشكر .. بثالث ابتدائي مو متوسط .. الله يخلف علي على هالإخت
ــ اقوول .. تراك طول الطريق صاير طيب .. لا تخربها الحين
يوسف يحط ايده على بوزه
ــ هااا .. سكتنا ...
وصلوا .. نزلوا .. قطعوا تذاكر الدخول .. وجنانوه مستخفه .. من زمان ما لعبت .. ومهي داريه تبدي من وين ..

وصاروا يلعبوا جنان مع سجى .. ويوسف حاايم قلبه يبغى يركب بس مهو قادر يخلي عمه لحاله .. وصار يحايل فيه ..
ويوم طفش منه
ــ صدق جباااااااان
ــ انا ... انا مو جباان .. بس ما اشتهي .. حق يهاال
ــ ههههه رقعها رقعها .. لا ياشيخ .. اجل مرتك يااهله
ــ هاا .. لاااا.. بس البنات عادي
ــ اقول ... اسكت بس .. بينت حقيقتك.. جباان وستين جبااان
ــ فكني بس يللا ..
ــ اما انا شوي وبركب وياهم .. بحمس الصباايااا .. وخلك طالع فينا
ماجد قاعد يفكر وهو متردد
ويوم جوا سجى وجنان ..
يوسف :
ــ هلموا بنا الى قطاار الموت
ماجد :
ــ اسم الله على عمركم ... ويش قطار موت ..
ــ نياهاهاااهاهاااا .. انت نفر جبان يسكت .. انا بروح وياهم ... وعلى فكره .. الحين قطار الموت عربه .. بركب انا ويا اختي في سيت عشان نتماسك .. ومرتك لحاالهاا .. خلها تطير مع اللفه خخخخ
ــ فاال الله ولا فالك .. طير الله راسك يا دب. لاتقعد تفاول على مرتي
ــ ههههه اجل اركب ويانا وامسكها
ماجد يطالع في سجى .. اللي كانت عينها بعينه .. ومتأمله انه يركب
ــ يالله .. والله ما حب ..
ــ كيييييييييييييفك .. ان شالله مرتك بس تحصل وحده تركب جنبها ..باااي ياجميل
وركبوا اللعبه .. وشوي قبل لا تمشي
جااهم ماجد يركض .. وركب جنب سجى اللي تشققت من الفرحه
ربطوا الأحزمه .. وماجد يتشهد .. ويهلوس حسبي الله على بليسكم .. حكم القوي أي بالله
واشتغلت اللعبه .. وماجد لازق بسجى ..واعصابه مشدوده
ارتفعت فوووووق .. ويوسف يصفق ويصفر
وشووي
نياااااااااااااااااااا.. نزلت تحت ....
ــ ااااااااااااااااااااااااااااااااااااااااااااااااااااه
جماااعيه .. خخخ
مااجد :
ــ وقفهاااا.. وقفففففففففففف.. هههههه .. انا الغلطان يوووم اطااوعكم
وترتفع ... ويوسف يبغى يزيد رعب مااجد .. يقوم يصرررررخ
ــ نزلللللله قوووووووووويه .. غمضواااااااااااااااااا
مااجد وهي بعدها ما تنزل
ــ اااااااااااااااااااااااه .. صك حلقك ...
والصريخ قايم .. كلهم يصاارخوا .. بس مااجد قلع الدنيا ..خخخ
وقفت اللعبه .. نزل يوسف وسحب جنان سحاب .. نزلت سجى يالله قدرت تتحرك .. ماجد تيبس عليها .. خخخ .. ومسك ايده يوسف وطلعه وهو يترنح ويسب فيهم ..

وقعدوه .. وماي وحاله ... وماجد يهلوس وهو يضحك
ــ يلعن بليسكم .هههه. مفتكريني قدكم .هههه. انا شاايب .. ااه
يوسف وهو يكركر ضحك
ــ شاايب ويش .. ويش حلاتك توم كروز زمانك
ماجد يطالعه على جنب
ــ وخرر عااد .. من زين توم كروز ..
ــ خخخخ .. يللا خيرتك تتعود .. الحين نركبك ثانيه .. وما تقول شي
ــ يصير خير .. شررب بس .. الشره علي يوم اطاوعك
...
ويركبوا الدوامه .. ويحايلوا في ماجد .. ويوسف يخووف ماجد على سجى
ــ هذي اخطر هاا.. هذي مع الدوران الا هي قااطه مرتك في البحر خخخ
ــ بتسكت انت والا بكس على ضروسك
ــ هاا خلاص .. بس لا تقول لي ما قلت لك ..
وسلم ماجد امره لله
وركبوا
وهي تدووور والصريخ فنون
شوي ولا شاف ماجد الا حااجه سودا كافختنه.. مسكها ولا هو داري ويش هي
وشوي يوم بدت اللعبه تخف .. ما سمعوا الا جنانوه تصيح
ــ نقااااااااااابي طااار .. اهي اهي اهيييييي..
ماجد داير راسه ويمد ايده برى الحديد وهو يهلوس
ــ هاادااا وييييييش اللي بيدي ..
يوسف يتفقع من الضحك وينهبه مكن ايد مااجد
ــ خخخ حق اختي جيبه بس .. زين مسكته .. والله رهيب . خووش حااسر مرمى جووي خخخ . شقال قال .. انا ما اقدر .. اكوو مره بكامل قواك .. لدرجه مسكته طول اللعبه .. صدق حيااال ههههه
ماجد وهو يطلع رجل رجل من اللعبه ويقوم وهو يترنح
ــ اسكت بس ..
ويتعثر على الدرجه ويمسكه يوسف :
ــ هههههه شوي شوي لا تتكرفس
ــ خلااااص لا تقولوا بعد
ــ الاااااا بعد وبعد
ــ اااه .. المرجع لله
ــ ما احد قال لك جيبنا هنا .. احنا ناويين عليك بنفلسك وبنجننك
ــ توووبه .. ما اعيدها .. صدق خبلان
كلهم بنفس واحد ضحك على مااجد وشكله ...
ولعبوا لييييين شبعوا .. بعدين تعشوا على البحر .. جنان تعبت دااخت .. فرجع يوسف معاها للبيت
اما ماجد ظل مع سجى على البحر ...
ماجد :
ــ استانستي حبيبتي
ــ ايه واايد الله يخليك لي ياعمري
ــ الحمد لله .. ااا.....
ــ ويش فيك ياحياتي
ــ سجى .. اتمنى اقدر اعوضش عن كل لحظه حرمان وجفا عشتيها وياي.. سجى ...
سجى تحط ايدها على فم ماجد
ــ لا تكمل .. ولا تذكر ماضي فات .. احنا اولاد اليوم .. ويكفيني انك بجنبي .. هذياسعد لحظات حياتي
ــ ياعمري الله لايحرمني منش ولا من حنية قلبش
ــ ولا يحرمني منك يارب
وصاروا قاعدين هالكناري الجميل على البحر لين طلعت الشمس ....

والى اللقاء في الحلقه القادمه
واعذروني حبايبي على تقصيررررري ....

[بوفيصل]

يسلموووووووووووو والله يعطيكي العافيه

ولا تطولين عليناا بالتكمله أوكي

مع خالص تحياتي بوفيصل

[همسات وله]

يلا ياميره الاحساس
صيري احليوه وكملي القصه ولا طولين علينا
وااله يعطيك العافيه
مع تحياتي لك
خيتك همسات وله

[hope]

مشكووورة ع التكلمة

بس لاتطولي ...

[.:روح وريحان:.]

يسلمو خستووو على التكملة واشوا طلعت عندي

[أسيرة الأحلام]

يسلمووووووو أميره على التكمله

تحياتي

[Princess]

يسلموو جميعا على التواصل الجميل
وتفضلوا

الحلقه التاسعه والعشرون

وبعد اسبوع...
فطووم :
ــ هاا قاسم سألت يوسف
ــ ايه سألته .. يقول اني سلفته من ايام الثانويه... وهو متأكد من هالشي ... وانا مو ذاكر .. بكيفه انا مانا خسران ولا ربحان شي... تسلف كان بها هذا هو رجعهم لفستانش حلالش.. والا مافي داعي يخلي واحد يكذب ويقول تسلفت ويخسر روحه.. منا والطريق...
فطووم مهي مصدقه سالفه هالسلف .. بس قامت تقول فبالها يللا صدق مثل ما قال .. مافي داعي يخلي واحد يكذب ويخسر روحه فلوس .. كذا وبس ... ونست فطوم السالفه ..

سجى وفطوم وجنان بالكوافير
جنان : مووو شغلي .. ابغى اسوووي تسريحه
فطوم : شعرش طويل وحليو تسويه بيرم ياعمري .. طيعيني ... التسريحه بتخلي وجهش منتفخ .. والا ويش رايش سجى
سجى سرحاانه بعيد ... الليله ليلتها .. ولا هي في الدنيا .. والكوافيره شغل فيها ..
ــ سجوووي.. سجيووه ... ههههه اللي وااخذ عقلش يتهنى به..
ــ هاا.. هلا .. ويش فيش
جنان : ــ ويي رايحه فيها .. خلاص الليله بتروحي له للأبد يارب.. ونفتك منش ومنه..
ــ هههههه حرام عليش خلي بنت عمي اللي يسمعش قاعدين على قلبش هم
ــ ايه خلهم بيسافروا وبيريحونا من وجههم
ــ هههههه طيب ياجنان.. ان ما وريتش ... بس مو الحين.. الليله اني عروس ولازم اصير حليوه ومروقه وهاديه
ــ ياااعيني على الركلاس
ــ ههههههه ركلاس ويش بعد,, ريلاكس ياحظي
ــ هههههه.. ويش دراني جيت اتفلسف ما مشت وياي خخخ..
ــ والحين بتطاوعيني والا ويش
ــ خلاص بيرم بيرم .. لكن ان ما طلعت حليوه بانتفش
ــ هين بس ان ما من حلاش طيحتي كل اللي بالصاله.. وصااروا الضبعان يسألوا عنش..مين هالحليوه ما اكوون فطوووم
ــ هههههههههه ولويش يسألوا الضبعان عني
ــ احم.. تعرفي حركاتهم.. يبغوا اذا يبغوا يخطبوا لأولادهم
ــ هههههه مالت عليش منتين بالدنيا.. هاليومين يخطبوا في الفواتح والمآتم يادافع الناس فويش وهم فويش ..خخخ
ــ بسم الله لويش بعد هالحركه ..؟؟
ــ خخخ عالطبيعه كل شي احلى
ــ اهاا.. يلعن يوم الخباااثه... صدق ما يطوفش شي انسه جنان
ــ كح.. افا عليش .. خخخ... اجل ويش على بالش
وسجى هدووووء.... رايحه فيها ..خخخ
وخلصوا كشختهم كل وحده تقول الزود عندي .. وطبعا ما يحتاج العروس قمرهم كلهم... وتدق جنان على يوسف
ــ الوو .. خلصنا يللا تعال..
ــ بعد نص ساعه ما يمشي
ــ لا ما يمشي.. نبغى نخلص ...
ــ يـــــــــالله....... تونا مخلصين من ساعه تدعيش " تفريك".. هالمعرس . هلكنا وحنا ننظفه . ابغى اسبح وبعيدن باجيكم
ــ هه اا هه ويش قالوا لك.. عمي ويش ... جلف ..
ــ ههههههه لاااا حاشاه .. انا ما قلت كذا .. افا بس ..خلي معرسنا .. الا لويش تضحكي هاللون ..
ــ خخخ بس لا يخترب مكياجي وتطلع لي خطوط من الضحك
ــ الله .. صدق بناات.. خخ يللا اجل عشر دقايق وانا عندكم

وشوي وصل يوسف .. وركبوا السياره
ــ ها كلكم جيتوا متأكدين..ما نسيتوا شي ؟؟
جنان :
ــ ايه ثنين الــ..... وواحد الـــ....
ــ ههههههههههههه وكثر الصاص لو سمحت ... حسبي الله على بليسش .. طيب .. ابوصلكم وبمشي ..وبس قريب تخلصوا اعطوني خبر...
ــ ههههههه.. اوكيه ..
عااد يوسف اللي بيمووت ويشوف فطووم بذاك الفستان .. اللي حفظ شكله عدللللل .. ورايح فيها الأخ خيالاات .. واحلام...
وصوروا الحلوات .. جنان وسجى صوروا كم صوره ويا بعض...
جنان صارت تحايل فطووم تبغاها تصور وياها... وفوطوم مهي راضيه..
ــ جناان .. ويش فيش .. حلاتي اصور وياش ... خخخ.. طيب وبعدين الصوره عند مين..
ــ عندي
ــ لااااا.. مافيه ... عندي
ــ الحين اني اللي ابغاش تصوري وياي.. عشان تاخذيها انتين..
ــ جنان .. ويش بتسوي فصوره اذا تبغي تشوفيني .. هذاني وقت ما تبغي على الطبيعه
ــ خخخ .. مالت عليش .. ويش فيش .. خلنا كذا كشخات .. يللا عااد فطووموه
وبالدقه وبالمحايل وياااللله رضت فطوم.. وصورت ويا جنان .. وهي تحلفها وتقسم عليها .. انها تحافظ عليها .. وما تطيح فيد احد ..
وجنان تطمنها ان غرفتها لحالها واغراضها مستحيل احد يحوس فيهم ..

وخلصوا تصوير.. ورجع ليهم يوسف .. اللي كان متكشخ ياحلاته معرس .. ثوب وشماغ .. ومره بيطير العأل على قولة اللبنانيين..
جنان :
ـ الله الله .. ويش هالكشخه .. لايكون انت اللي بتعرس .. ياعيني ..
ــ احم ..كح.. افا عليش.. ليش ما يليق علي .. معرس هاا ..
ــ الا يليق ونص .. جعلني اخطب لك ذيك البنيه اللي تسعدك وتهنيك ياالله ياكريم <<< قالت هالجمله بنبرة صووت .. كأنها حاطه عينها على وحده .. وفعلا هي كانت حاطه عينها على فطوم .. فإيااك اعني فإسمعي يااجااره ...
ــ هههههه خذ لك .. هالضبعه.. انتين اللي بتخطبي لي .. لا بالله رحت فيها .. رايح فيها ذوقش انتين..
جنان وهي معصبه وبدت تطلع شرر خخ:
ــ لا والله.. اصلا احمد ربك اذا اللي فبالي رضت تاخذك
ــ صدق .. والله... احلفي.. ليش ملكة جمال الكون.. والا دون البنات.. وليش ما ترضى بيوسف..
ــ اييييييه حليوووه وتهبل .. ياليت والله تصير من نصيبك..
ــ اااااا.. هااا... جنانووه اعترفي .. مين اللي فبالش...
ــ خخ عيب مو الحين .. كل شي بوقته حلو
فطووم كان قلبها حاسها ان السواليف عليها.. بس كانت تتجاهل وتطنش ما تبغى تحط فبالها أي شي وبعدين تنصدم...
ووصلوا لصاله الأفراح .. ونزلوا... وابتدوا الأكشن لزفة العروس سجوويه
طفوا لمبات الصاله.. موسيقى كلاسيك هااديه....
دخلوا بنات مغطيين بعبايات شيفوون. ورديه. حاملين فوانيس منوره.. وفطوم وجنان بعد لابسين عباية شيفون .بيضا.. حاملين كل وحده منهم ورده بيضا عنقها طويل .. البنات اللي حاملين الفوانيس .. حوطوا كوشة العروس.. وفطوم وجنان ... وقفوا قبال بعض عند الكوشه وسووا تقاطع بالورد.. مثل البوابه .. وشوي تداخل مع الموسيقى الكلاسيك.. صوت عربة وخيول ... وتصاعد دخان اكشن وحركتات .. هدت الموسيقى .. وبدى صوت طقطقه نعال بنوته..
دخلت سجى .. والأنوار كلها عليها... باقة وردها كانت رهيبه.. مليانه ريش طااووس . طويل ويزحف ... وكريستال ..ركبت الكوشه.. و ابتدت همسات بالصلاة على محمد وال محمد تتعالى بالصاله .. وصلت سجى لعند فطوم وجنان .. وهم يفتحوا التقاطع شوي شوي .. عبرت بينهم .. وجلست على الكوشه.. البنات اللي محوطينها .. صاروا يدورا عليها .. وهم يقروا ايه الكرسي .. وختموا االأيه بالصلاه على محمد وال محمد .. وصاروا ينسحبوا وحده وحده.. وكل وحده تمشي.. تحط فانوسها على الممر ...
وبدى العرس .. والهيصه .. واستناسوا .. صفقه ما مثلها صفقه..
لين جت حزة ماجد...
حطوا له ابيات شعر كشخه .. مع موسيقى روعه

يوم ماجد يدور على من حلاها الأخلاق والزين
لقى وجه السعد سجى تحليهم
ووفق الله وجمع ما بين قلبين
ودعواتنا بالهنا يارب تخليهم
منه المال ومنها قرة العين
ومن عين الحااسدين يارب تحميهم
جمع الله شمل عايلتين
الـــ ... والـــ... وبارك اليهم
زفوا المعاريس هالليله يالمحبين
ولا تنسوا الساده الكرام صلوا عليهم..

افضل الصـــــــــــــــــلاة والســــــــــــلام عليك ياحبيب الله يامحمد .. محمد وال محمد صلواات صلوا على محمد ..كلوووووووووش...
ووصل ماجد لعند سجى اللي وقفت له ,, باس جبينها .. جلس جنبها يسولف ليها وهو مستنانس شقد كان مستني هالليله.. وسجى الوان تتقلب .. اشارة مرور .. وجنان ياحلاها صفقه .. وفطوم تفلص فيها .. خخ قاعده بعبايتها منقهره..
وجلوهم وزفوهم.. وباركوا ليهم.. وطلعوا متوجهين لشقتهم...
تحفهم السعاده.. والفرحه..


وفي شقة قاسم... كانت ريم تطالع تلفزيون.. ماراحت عرس سجى.. ولا ليها اصلا علاقه فيها ...
شوي دق جوال قاسم... كانت فطوم اللي متصله تبغى قاسم يمر عليها مفتشله من يوسف ...
طبعا قاسم... ما نسى ولا عمره راح ينسى... انسان .. مو راضي يفتح عيونه على الواقع ويتعايش معاه.. عايش على فتات الذكريات..
كان حاضن المخده اللي غرقها دموع الم وندم وحسره.. يوم يفرط بسجى.. وعلى كل لحظه في حياته جمعته بريم عديمه الأحساس..
يسمع جواله يرن .. وماله خلقه.. غرقان في همومه..
ريم اذتها فطوم وهي تدق .. قامت حطت ليها بزي.." قفلت بوجهها"
فطوم اختلعت.. ويش هذا ... قالت فبالها اخوي واعرفه .. تلاقيه الحين غرقان في همومه .. وماله خلقي... <<< خمنت نص اللي صاير...
جنان كانت ويا فطوم ...
فطوم: ــ اوهووو .. قاسم مايرد .. شكله نام
ــ خخخ احسسسسسسسن...
ــ هههههه لويش حسن الله حواجبش.. تبغي تنيميني بالصاله
ــ ههههه لا عشان نوصلش...
ــ ااه.. والله تعبتكم وياي هاليوم
ــ ابدا تعبش راحه.. بالعكس... والله استانس اذا قعدت وياش
ــ هههه تسلمي يالغاليه.. ربي لا يحرمني منش
ــ ولا يحرمني منش,,,
جنان محمقه وهي تكلم يوسف
ــ الوووو وينك.. يللا المعاريس توهم طالعين نبغى نزفهم .. مو شغلي
ــ دقيقه زحمممه.. دقيقه واوصل ..
ووصل يوسف .. وركبوا ..
وصاروا يلاحقوا في المعاريس .. وهرنات .. وحااله ...
يوسف يعدل مراية السياره يبغى يشوف فطوم ورا
فطوم حست عليه ...
فسكرت نقابها وهي منقهره تبغى تشوف العالم
يوسف فباله .. افا.. هذي ما يطوفها شي
ورجع عدل المرايا... شوي فطوم يوم حسته لهى بالسواقه... رجعت تشوف العالم خخخخ...
وجنان تصفق وتغني .. ..ــ يوسف دق صبع علمني
ــ يعني انا اللي اعرف .. اهوو فارقي .. تبغي اصفر باصفر
ــ صفرر .. يلللا
ويصفر يوسف وجنان تصرخ بالسياره.. وفطوم ما شغلتها الا تكركر ضحك عليهم
ويوم وصلت فطوم البيت........
وقفت على باب بيتهم وهي مختلعه... !!!!!!!

والى الملتقى في الحلقه القادمه...

[.:روح وريحان:.]

يالله اميرررروة ذكرتيني بزووواج اختي حسيت روحي في ذاك الوقت الله واني لابسة ذاك الفستان الوردي وعندي سله الريحاان والحلوة ودخلت القاعة <<<<<<بل بل ماصدقت على الله ينفتح لي المجال
هههههههههههههههههههههههه
بس اميررروووووووة مادورتي تحطيها الا الليلة
ههههههههههه
مو كان الليلة وفاة النبي يحي(ع) بس اشوو من ليلة غذا
على العموم ليلة غذا لاتحطي حلقات مانبي تفوتنا وتدري وفاة النبي بكرة ولانبي نضحك
مو كاني طلعت من السالفة
هههههههههههه
اي المهم
عور قلبي قسوووم وريم مي عديمة احساااس
يسلموو على التكملة

[Princess]

ههههههه هلا خيتي بشااير
ادري ياعمري .. بس الحلقه جا السناريو حقها كذا معاي ... وناويه بكره مافيه حلقه
وكنت ناويه اليوم بعد... بس ما ادري يمكن بعد وفاة النبي تصير عندي ظروف واتأخر عليكم... فحطيتها
قلت لا اتأخر مره
هي خلاص راح تنتهي .... فمو حلوه اطول عليكم السالفه
ويعطيش العافيه على هالتواصل الحلو حبيبتي
دمتي بحفظ الرحمن

[لؤلؤة نجفية]

بسم الله الرحمن الرحيم
اللهم صل على محمد وآل محمد وعجل فرجهم

قصة روعة اميرة المرح
انا كل يوم ادخل بس ما اقرأ القصة لاني احب ان اقرأها كاملة
بدون تقطيع او انتظار الاجزاء الاخرى لكن اليوم ما قدرت قلت لازم اقراها
تسلم ايدك وبأنتظار بقية الاجزاء على نار
تحياتي