الحلقه الثانيه عشره



في مجلس ابو صادق.. جلست سجى مع الخطيب ماجد... تنتظر انه يحرك ساكن .. كان السكون مخيم عالمكان.. وماجد ما تكلم ولا كلمه .. سجى اعتبرت الوضع عادي .. قالت الرجال مستحي وخجلان ومو عارف ويش يقول.. وجا على بالها قاسم اللي ماسكت هذيك الليله من المدح فيها والبوح عن كل شي بقلبه..
ــ اوووه خلاص ليش افكر في قاسم هذا.. اني الحين على ذمة رجال ثاني وبعده يطري علي .. لا.. لازم انساه .. لازم امحيه من حياتي..
ــ اااا.. احم.. الا ويش تدرسي الحين..؟؟
سجى استغربت ..خخخ اول ما نطق سأل هالسؤال.. يللا مو عارف ويش يسولف ويش يقول .. زين تكلم..
ــ ولا شي .. للسنه الجايه على خير
ــ اها .. احسن.. بعد لو السنه الجايه تبطلي خير شر .. ويش لش بالدراسه..
استغربت سجى بالمره.. الحين ماجد المثقف العاقل .. يقول كذا.. عجيب .. واللي زود العجب .. انه ابدا ما سألها ليش يعني ما تدرسي الحين؟؟ .. عالأقل ويش ناويه السنه الجايه على طوول..طااخ قفل الموضوع .. احسن ...!!!
مرت ساعه وكل عشر دقايق يطالع السيد ماجد بساعته.. سجى ما ارتاحت لهالوضع .. ولا.. لاحظ ماجد عدم ارتياحها فقطع الهدوء وقال:
ــ والله بكره عندي دوام ولازم افتح المكتب عندي كم قضيه مهمين ما يتحملوا التأجيل فمضطر اني امشي الحين ..
ووقف.. يللا فأمان الله ..
سجى وقفت ومره مذهوله...
ــ ح ي ا ك الله .. تقطعت تقطيع يالله طلعت..!!
ورجعت جلست..
جاها ابوها..
ــ خير ويش فيه .. عجيب ما اخذ ساعه على بعضها وطلع
ــ لا بس عنده شغل ضروري بكره
ــ اف .. والله عجيب .. الليله عقده ......اااااااااا..... يللا الله يوفق له...
ماحب ابو صادق يزود على بنته الضيق...
ــ عادي يا بنيتي الرجال هذا شغله وهو ملزوم يتكفل به اول بأول ..
ــ ايه عادي يا يبه .. ما قلت شي اهم شي شغله..
وفبالها .. عالأقل بس سولف شوي وياي جاملني لو ربع ساعه وبعدين راح عشان شغله...<<<<< يللا دا قدرك ونصيبك.. ونصيبك حيصيبك ... صرنا مصاروه..خخخ

ــ بس طالعه يابنيتي ويش حلاتش الليله .. منوره تقولي للقمر فارق بقعد محلك..
ــ هههه تسلم لي يالغالي .........<<< وبالنفس شكوى: ليته ماجد قال لو ربع هالكلام... بس يالله مصير الأيام يا تعودِه ...يا تعودني على طبعه..

مر اسبوع .. والسيد ماجد لا حس ولا خبر ..
ــ يبه سجوي .. ليش ماجد ما جا من هذيك الليله .. ولا دق عليش ابد.. صارحيني
صار شي ..خلاه يطلع بدري ولا يسأل لليوم وانتين خاشه علي..
ــ لا والله يا يبه علمي علمك.. بس ويش اسوي .. اتصل اني غصب اسأل عني..
ــ مممممم .. لا.. اتصلي اعزميه على غدا والا عشا...وشوفي
ــ ان شالله
ــ بلللل .. صكني بزي " قفل بوجهها" ..!!!
ــ الله لويش .. يمكن عنده شغل...
ــ يمكن يللا ما عليه.. بس لو يحطه صامت .. احسن من هالحركه..
ــ يللا نسى الرجال.. <<< يللا ويللا .. ياكثر ما تتعذروا له ورددوا رددوا يــــاليل ما اطولك !!

وبعد ساعه دق سي السيد..
ــ هلا غلاي...
ــ هههه غلاش ... انا دلع هالمراهقين ما يمشي وياي.. ماجد والسلام عليكم خير دقيتي ويش عندش..
سجى فبالها ..بللللللللللل.. ويش هذا العاده يطلبوا من الخطيبه يالله على كلمه وهذا يصفعني مايبغى .. لاااا.. وويش عندش بعد.. ما اقول الا الله يساعدني عليك..
ــ الووو وينش... اقول دقي على رقم المكتب ...
طااااااخ
ــ الله ياااعلي .. ما اخذ دقيقه .. خاايف عالرصيد.. ويش هذا.. انا لله...
وتدق سجى الرقم بالتلفون ومره مقهوره شوي وتدخل حبات الأرقام داخل
ــ الو .. مرحبا .. مكتب المحامي ماجد .. مين معاي
سجى ارتبكت وفبالها.. بللل ياعلي سكرتير يرد علي عادي ولا اعرف اتصرف وويش اقول عادي .. اما يكلف على عمره دقيقتين بالجوال لالا مو عاادي
ــ ها... ااااا.. السلام عليكم اخوي ..ااا ممكن اكلم ماجد..
ــ وعليكم السلام ياهلا .. نقول له مين
ــ اااا.. الأهل..
ــ ان شالله
ويحول المكالمه لماجد
ــ الو نعم
ــ الله ينعم عليك.. ياهلا
ــ مين معاي ؟؟
ــ مين معاك !! اني سجى
ــ ايييه صح .. نسيت اني قلت لش اتصلي عالمكتب .. <<< الله ياساتر ما مداك خخخ
ــ عادي حصل خير
ــ المهم ويش عندش
ــ لا بس كنت ابسأل عليك و..
ــ بذمتش .. بذمتش... الحين وقت سؤال.. عاد ياسجى انا ابلفت نظرش لشي مهم عندي .. انا الوقت اللي اقضيه بالشغل ما احب احد يتصل علي الا للضروره القصوى والطوارئ
سجى اختلعت منه ... يمه منه ويش فيه هذا الفك المفترس ما عنده اسلوب ..
ــ الووو .. وينش
ــ هلا معاك.. اسفه ازعجتك..؟؟
ــ المهم .. عندش شي غير السؤال؟؟..
ــ اااااا.. اذا ما عليك كلافه ممكن تشرفنا يوم تتغدى عندنا ..<<رحم الله ايامك ياقاسم .. يا معسكر بدون عزومه .. يا اذا كنت مشغوول تصرخ سجى تجي تجي تفضي حالك ومو شغلي ....!!!
ــ طيب اشوف حسب جدول اعمالي.. اذا ما عندي شي مهم ارد لش خبر ... غيره..؟؟
ــ ولاشي سلامتك..
ــ يللا فأمان الله
ــ حياك الله..
نزلت سجى سماعه التلفون ببرود .. ممزوج بغصة قهرر.. ليش هذا كذا.. لوح ما يحس.. ما يفهم...وتصير توعي نفسها :
" اصحي ياسجى.. اذا قاسم كان يدلعش فماجد غير عنه 180 درجه.. اصابع كفوفش مو سوا.. اصحي .. لا تقارني بتتعبي كذا"

ــ ها يبه ويش رد عليش بيجي؟؟
ــ لا للحين ما رد خبر يقول على حسب شغله وظروفه
ــ يللا اعذريه يابنيتي مشاغل الحياه والرزق لزوم الواحد يركض وراه .. وفباله يقول: الله يعينش يابنيتي على هالصخر..
ــ هههه << ضحكه مو من قلب...عادي يايبه مقدره وضعه وظروفه..

وبعد ثلاثة ايام قرر السيد ماجد يشرف .. سجى ما صدقت على الله وتكشخ وتعدل .. وسوت الغدا حركتات مرررره ...
ــ مممممم .. والله تسلم ايدش يابنيتي خووش غدا ..
ــ الله يسلمك يايبه.. فيه العافيه ..
ــ الله يعافيش

ابو صادق متعود على طباخ بنيته .. بس يبغى اللوح اللي قاعد قدامه يتلحلح وينطق له كلمة شكر مدح شي ما شياات.. ولكن لا حياة لمن تنادي .. ما يسمعوا منه الا ضرب الملعقه وملاحق النفس .. يا ويلي منه طووفه..

ــ هاا يا النسيب.. ماقلت لي ويش رايك بطباخ سجوي
ــ والله زين لا باس .. ماشي حاله .. زين تعرف تطبخ عن المخاسير ..ههههههه

>>>؟؟؟؟ !!!! ×××× <<< طلعوا فوق رووس سجى وابوها ..خخخ افلام كرتون ..

ــ الحمد لله رب العالمين <<< انسدت نفس ابو صادق تنرفز من هالحطبه...
ــ عوافي يبه
ــ يعااافييييييش بنيتي وتسلم اييييييييييييييدش ...>>>> يبغى بس يحرك هالصنم..
يوم قام ابو صادق .. راح ياخذ له غفوه بعد الغدا
سجوي قالت مدام ابوي قام.. خلني ادلع هالرجال
ــ تفضل حبيبي من ايدي..
مد يده واخذ الملعقه من ايدها وقال:
ــ هالمره باخذها من ايدش .. قالوا لش ياااهل صغير .. تلقميني .. فيني ايادي .. وبطلي هالكلمات المايعه حبيبي وما ادري ويش .. ابوأحمد انا .. ناديني كذا <<<< ياعلي ... صدق جاااف..ومصفع..
سجى تفشلت وجتها غصه وياكثر الغصات اللي جتها بهاليومين
ــ ان شالله يابواحمد...
وضلت تقلب بالملعقه في الصحن والدموع طاغيه في عينها لاهي راضيه تطلع ولا هي راضيه ترجع .. وحالتها بالمره تكسر الخاطر لين شبع قرقوش زمانه..
ــ الحمد لله
ــ عوافي
ــ يعافيش... يللا ما بطول شوي وابطلع
ــ وين بتروح؟
ــ نعم.. ههه حلوه وين بتروح... لا يا بنت الأجواد.. هالسؤال ما تسأليني وياه هااا
تيييييك كيييييير .. اوكيه.. <<< مااالت عليك تيك كير بعد..×× امحق ويا وجهك..
ــ ان شالله
قامت سجى تلم الصحون وهو راح يغسل .. جلس بالصاله شغل التلفزيون على قناة اخبار وصار يطالع برنامج حواري ساخن ....
جت سجى جلست جنبه.. ربع ساعه... نص ساعه... لا حوول ولا كنها موجوده
دق جواله حاط له حضرته ملاحظة تذكير...
ــ اوه من متى انتي هنا
ــ من زمان من اول ما بدت الشبقه بالبرنامج..
ــ ما انتبهت لش .. عموما باروح عندي شغل .. يللا فامان الله
ــ حياك الله
هو طلع من هنا .. سجى مسكت مخدة الكنب من هنا .. ضمتها واشتغلت صياح..
وطلعت كل الحره اللي فيها .. وشوي هدت.. ومسحت دموعها
ــ يارب ساعدني .. دخيلك .. اتمنى تتحسن احوالي ..يارب ..
وبعد اسبوع .. دق ماجد <<< عاد هذا دقاته اسبوعيه..
ــ هلا ابو احمد <<< والله حاله بدل الدلع كبرت البنيه ..
ــ ياهلا .. شعندش بكره..
ــ ولا شي <<< استانست بيطلع وياها يمكن ..
ــ طيب اجهزي .. بكره من الصبح باطرش السواق يجي ياخذش .. اخوي ابو يوسف عنده مزرعه وبكره بيروح هو مع بنته جنان مع يوسف ولده .. وجنان ما تبغى تقعد لحالها .. روحي وياها .. وانا ها.. ها.. اذا مداني جيت ليكم اوكيه
خابت امال سجى
ــ اوكيه
سكرت السماعه..
ــ والله حلوه مزرعه .. وجنان فرصه اتعرف على هالبنوته شكلها كيوت.. بس هذا ليش كذا دوم ما يعبر ولا يهتم .. لاااا وبيطرش لي السواق.. عجيييييييب...
ويوم ثاني .. بالصباح دق السيد ماجد
ــ هلا سجى.. اقول السواق مشغول ابو يوسف راح وياه يشتروا حوايج.. بيمر عليش يوسفوه مع اخته جنان .. عاد انا لو القى غير هاليوسفوه كان طرشته ..بس يالله اسمه بيروح ..
وما اخذ ماجد ربع ساعه من سكر.. الا يوسف وصل
طلعت سجى.. وركبت السياره ..
ــ السلام عليكم
ــ وعليكم السلام والرحمة والإكرام ياهلا بمرت عمووو << هذي جنان
ــ ياهلا مرت عمي .. حياش الله << يوسف..
يوسف كان شخصيه مرحه وحبوبه بالمره .. ورومنسي .. وشخصيه روعه.. ومعلوم خفة الظل والرومنسيه .. تتنافر ××× مع ثقل الطينه والجفاف .. لذلك كان عمه ماجد مو اوكيه ويااه ... فطول الطريق ويوسف سوالف وضحك ..
و .......
بكره اكمل البااقي .. الى الملتقى ياحلوين......