الحلقه الحادية عشره
: ــ توو الناس .. توه مخلصنها ,, تدري يا فطوم تراه خلص علي قبل.. بس الحين روحي رجعت يوم جابها ...واني نسيت اخوش ومحلل ومبري من زمان هو فطريق واني فطريق..
ــ اااه يا سجى .. ادري والله ادري .. بس ما باليد حيله ..
وفتحت سجى الدرج .. طلعت صندوق كبير مجمعه فيه الرسايل والهدايا وعلى القفل معلقه السلسال..
ــ من اول ما تركني واني ناويه اتخلص منهم .. قلت ابرجعهم له .. بس انتي كنتي ما تقدري تزوريني .. قلت ابرميهم.. بس قلبي ما طاوعني.. الله جابش يافطوم.. اخذيهم .. ورجعيهم له .. وقولي له .. محلل ومبري الذمه والله يبارك له ويهنيه بحياته..
فطوم حز في نفسها هالموقف .. خصوصا انها كانت الواسطه قبل الخطوبه واغلب هالهدايا هي بيدها اللي جابتهم لسجى .. والحين انعكس الحال.. وهي على حالها الأولي .. سابقا مرسول غرام,, والحين مرسول الآم...
ــ طيب يا غناتي ما يصير خاطرش الا طيب.. وسامحيني اني بعد والله اني مقصره وياش بس غصبن علي.. انتي ادرى بالحال.. بس ان شالله باحاول قد ما اقدر كلما احصل فرصه اجي لش .. واصبري يالغاليه ...
ــ ان شالله تسلمي لي يالغلا .. لا تخافي علي .. الا فطوم ما قلتي لي اخبارش .. وين سجلتي ويش تدرسي الحين..
ــ اني ... ويييي .. لا تذكريني بالقرف.. ادرس حاسب ..
ــ قرف .. وليش ..؟؟ صعب..!!
ــ يعني هو مو صعب بالمره.. بس يبغى له شغل وتعب.. من صوب.. ومن صوب ثاني الدكاتره وعععع وما يرحموا..
ــ اها.. الله يعين .. على فكره.. يمكن اسجل السنه الجايه وياش اذا ما حصلت شي
ــ يووه الله وترجع ايامنا الحلوه .. كان زين ياسجوي .. والله اكشنات الحاسب وحلو
ــ هههه ..هاااا.. من شوي قرف .. يوم بسجل فيه .. صار حلو
ــ ايه .. افا.. مو انت الغاليه وانتي الحركتات .. راح تحليه
ــ خخخ بس اسف ما بصير وياش بسنه وحده.. هذا الحين السمستر الثاني.. السنه الجايه انتين طايفتني على خير
ـــ خخخخ ... ههههه ... أي أي .. اقوول .. خلي الطابق مستور...
ــ يوه لويه... ويش صاير
ــ مو السمستر الأولي الله يخلف علي وعلى حظي .. حملت 3 مواد.. باقي بس ماده وابقى لأعادة السنه.. واني بهالسمستر مو شاكه بماده الا بأربع مواد خخخ يعني باقيه باقيه .. وادق صبع بعد.. فوياااكم ...
ـــ ههههههه حسبي الله على شرش يالبطيخه.. هااا وين ايام المدارس وايام الصياح على النص علامه ..والمراكض ورا الأبلات على كل ربع يطير .. هااا ..ويش حل عليش
ــ خخخ... خيرتش تسجلي على خير بالزريبه.. ااااقصد الكليه وتشوفي .. وصدقيني بتشووفي الفرق.. وان شالله تجربي وتتوفقي ...يارب
ــ يارب .. على خير ان شالله
ــ والله يا سجوي القعده وياش ما تنمل .. وواحشتني مووت بس ويش اسوي مضطره امشي.. انتبهي لروحش غناتي .. وبينا اتصال ها.. واني باحاول بين كل فتره وفتره كلما سمحت لي الظروف اني ازورش زين يالغاليه
ــ تسلمي لي فطوم الله لا يحرمنا من بعضنا
ــ يالله ياكريم...
وودعوا بعضهم وداع مو مثل كل مره .. وداع راح يطول اللقا من بعده.. >>> قاسيه يا دنيا .. وما ودوعنا غير الحبايب..
جلست سجى تتأمل اللوحه.. كان راسمنها بالمائي..ودقيقه بالمره.. هذا يدل على انه فنان .. لأن الرسم بالمائي صعب.. ويبغى له خفة يد... من جد مبدع وفنان راسمنها زين وطالعه اللوحه بالمره فظيعه.. جرت دموعها على خدودها وصارت تكلم نفسها:
ــ ايييييه .. والله وقت ياقاسم قعدته وانت ترسمني. اااه كل هالوقت عشان ترسمني عدل... ياليتك عرفت كيف تحافظ علي عدل..
وشوي قامت واخذت اللوحه..
ــ اعذرني ياقاسم.. لوحتك هذي بتجدد لي الذكريات.. واني ابنساك.. اعذرني
وراحت تحرقها .. وتحرق معاها كل الذكريات...
اما قاسم .. يوم وصل له الصندوق انفجع قبل لا يفتحه يوم شاف السلسال معلق بالقفل.. فتحه وبقلبه حسره .. وصار يقلب في الهدايا والمراسيل .. ويتذكر موقف كل وحده فيهم.. والمناسبه..
ــ افا ياسجى.. ترديهم لي.. بالمره نهيتي اللي بينا.. لكن انا ممكن اتنازل عن كل شي وارد لش كل شي .. الا صندوقش الغالي .. هذا بسيارتي راح يظل لين اموت..
..و اعتلت حياته غمامة الهم.. وزود عليه الضيق.. كثر مقارناته بين ريم وسجى.. كانت ريم انسانه تهتم بالسطحيات بعيده كل البعد عن التعمق .. فهمها بطئ.. عمرها ما فهمت قاسم ويش يبغى دون ما يطلب.. كانت تعجبه فطانة سجى وذكائها وسرعة بديهتها .. كانت تعجبه شدة ملاحظتها وكيف تفهمه من نظرة عيونه..
وهو مع ريم اذا ذبل الحزن عيونه.. قالت له.... رووووح نااااااام...!!!
ريم ما كانت تهتم بنفسها كثر سجى.. صحيح ما تاخذ الا من الغالي بس .. على قولة قااسم لفطووم: ورا ما تعلموا سحيله ام الخلاقين كيف تلبس...
كانت تعجبه بساطة ونعومه سجى..
ودوم هالمقارنات في باله.. هلكته.. وقلقت راحته .. .. ومن كثر الهم رجع يدخن .. بعد ما سجى خلته يبطل... من خوفها عليه ,,
لكن الحين سجى راحت.. وراح الخوف والإهتمام... ولا يحق له يعتب .. لأنه هو السبب... فهو اللي قلب حياته بيده لجحيم...
وبيوم.. وصل لسجى مسج....
"لا تحسب ان اللي بقلبي لك شوي...ولاتحسب انك انسان مر ونسيته,,, انت لي جنه ولعيوني الضي..وانت لقلبي مسكنه والراحه وبيته..حلفت لك ..ما انساك ما دامني حي..
وشلون انسى اصدق قلب في عمري حبيته..."
وكان المرسل .. قاسم...
سالت دموع سجى..
ــ حرام عليه اللي يسويه فيني.. ليش يعذبني.. انتهينا يا قاسم.. انا وانت انتهينا..
ردت عليه بهالمسج
" انا ما عدت مثل لول وين مارحت انا اروح
لا تقصر لا تطول صرت لي شوية جروح
تركت حبك للأبد بعد ما كان لي بلد .. واكتشفت ان مالي بك مكان.. لأني ماكنت لك .. اية ...احد... قاسم انساني ... واتمنى تمسحرقمي.. وتمسحني من حياتك اتمنى لك حياة سعيده يا اخوي."
ــ اااه.. ياسجى.. صرت لك اخو..خلاص ضعنا.. والله انا الي استاهل.. انا اللي ضيعتش... اااااه على حب ضيعته بيدي.. صحيح ما استاهلش انا.. الله يسهل لش ياغناتي...
قال هالكلام بعد ما قرى مسج سجى .. قاله وبقلبه الغصه والحسره..
ومسح الرقم...
وبعصرية الإثنين... بين ما كانت سجى تطلع تلفزيون
دق جوال ابوها.. قامت توصله لبوها.. طالعت الا المتصل ماجد
ــ خير اللهم اجعله خير... يبـــه... يا يبـــه.. جوالك يرن.. ماجد
جا ابوها
ــ خير ان شالله عساه خير >>> مو طاري هالماجد حق المشاكل.. خخ مسكين
ــ الو مرحبا .. ياهلا ماجد
ــ ياهلا عمي ..مراحب
ابو صادق فباله ..؟؟؟ عمي ..؟"؟
ــ هلا يا ولدي .. اخبارك وعلومك ويش مسوي
ــ الحمد لله يا عمي .. بس ابغاك بسالفه اذا ما عليك امر
ــ تفضل يا ولدي عزيز وغالي .. خير امرني بس
ــ ما يامر عليك ظالم.. الليله ان شالله اذا ما وراك مشوار بمرك البيت انا واخوي يعقوب..
ــ حياكم الله البيت بيتكم..
يعقوب.. اخو ماجد.. ارمل وله بنت جنان بالثالث متوسط بنت هاديه .. وطفوليه بالمره وصايره انطوائيه من توفت امها..
.. وولد واحد يوسف بالجامعه السنه قبل الأخيره .. ويدرس بالبحرين.. هروبا من عمه ماجد..×× كانوا دوم على خلاف..
ــ خير يابه ويش عنده ماجد..
الأبو شاك بالسالفه..
ــ لا خير ان شالله الليله بيجينا هو واخوه الكبير ما ادري ويش عندهم .. عساه خير ان شالله...
وودع النهار .. وشرف الليل ... وجوا على موعدهم
ــ يا هلا حياكم الله تفضلوا والله زراتنا البركه
ــ الله يحييك يا ابو صادق البركه فيك ,, يا اخوي الله يشرف ويعز مقدارك
ــ الله يسلمك يا بو يوسف .. اخباركم واخبار الأهل
ــ الحمد لله على كل حال .. نحمده ونشكره
ــ الحمد لله .. حياكم الله ..
ــ ااا.. والله يابو صادق خلنا ندش في الموضوع على طول.. وبدون مقدمات.. والله ياطويل العمر جايين طالبين القرب منك . نبغى بنتك المصون لأخوي ماجد... ولا بنلقى احسن من اصلك وفصلك يا اخوي
ــ والله على عيني وراسي .. وماجد عزيز وغالي بس اسأل البنت ونرد ليكم الخبر بعد كم يوم.
ــ ايه اسألها حقها والله .. واحنا اللي تأمروا عليه ..
ــ الله يسلمك يا اخوي .. ان شالله خير والله حتى بنتي ما بتلاقي احسن من ماجد رجال والنعم فيه..
بس اسألها..
ــ ان شالله .. يللا ننتظر منك اتصال ويارب يفرحنا
ــ ان شالله على خير
وجلسوا يسولفوا شوي ... وبعدين طلعوا .. وابو صاادق طيااااااري لسجى
ــ سجى يا غناتي .. والله انا اتمنى افرح فيش قبل لا اموت
ــ بعيد الشر عنك يا يبه.. اسم الله على عمرك.. لويش تقول كذا
ــ ايه والله يبنيتي خاطري اشيل اولادش وافرح بهم..
ــ ان شالله تشيلهم وتفرح بهم .. والله لأخليهم معسكرين 24 ساعه عندك لين يفقعوا راسك بعد ويش تبغى اثر من كذا ...<<< كانت شاكه بهالزياره وعارفه زين ما زين ويش عنده ابوها .... بس ما تقول لي بلا هاللف والدوران .. هااا ويش صــــــــاايــــــــر..!!!
ــ ههههههه..ابصم بالعشره.. الا ابصم باصابيع ارجولي بعد وياهم .. اذا ما كنتي فاهمه السالفه
تلون وجه سجى خجل.. ايه فاهمتنها...
ــ وويش رايش
ــ ما ادري اني الحين موافقه.. منا لبعد كم يوم.. نشوف .. ابفكر .. مدة تسأل عن ماجد.. وان شالله خير
ــ ان شالله .. بس يابنتي فكري عدل,, ماجد اكبر منش بـ 10 سنين.. انتين بعدش توش بنيه ..وهو رجال ناضج...فكري زين
ــ ان شالله يا يبه... ومروا اليومين ..
ــ هلا ابو يوسف
ــ يا هلا ابو صادق .. ها بشرر
ــ البنت موافقه ومبروك عليكم
ــ الله يبارك فيك.. ويسعد ايامك مبروك عليك انت بعد يا اخوي
ــ الله يبارك فيك ويخليك..
ــ يللا اجل انتظرونا هالخميس راح نعقد .. ونحدد متى الحفله
ويجي لأبو يوسف فلصه من ماجد .. وماجد مكشر ويأشر .. لالالا.. <<< يوم طروا الحفله... الرجال ما يفهم في هالسوالف ولا يعرف لهالشكليات.. بالمختصر فيه شوية جفاف و رزة اكثر من اللزوم...
ــ لا يا اخوي تسلموا البنت ما تبغى حفله .. بس جمعه عائليه ويعقد عليهم وخلاص..
ــ ما تبغى حفله.. على كيفها براحتها يا اخوي...
ماجد على جنب تنهد مرتاح .. يوم جت منها....
وجا يوم الخميس .. وجا لبيت ابو صادق . ماجد وابويوسف وجنان .. وكم واحد من اهلهم وجيرانهم ...
وعقد الشيخ عليهم..
ويوم جا ماجد لسجى...
جاها ايده خااليه يصفق <<< وين الباقه يا اخي .. توك تشوفها شوي جامل خليك حركتات... بللل عليك.. بعد رحمت بحالك ما سووت حفله !!
سجى استغربت من هالحركه.. وطنشتها..قالت فبالها الرجال عاقل وما تهمه الشكليات.. بس اللي حز في نفسها طراطيش كلام من بعض الجيران >> ناس فاضيه ما يهما الا القرقر..
ــ يووه طلعي جاي ليها وايده خاليه.. والله عجيب
ــ ايه تذكري خطيبها لولي قاسم.. جاها مو قادر يشيل الباقه من كبرها وحلاوتها.. شكله هذا بخيل .. الله يعينها عليه
كلمات اثرت في نفسية سجى بالمره...
وطبعا.. لاننسى قاسم .. اللي وصل له الخبر مثل الصاعقه.. كانت ريم تترجاه اسبوع يطلع وياها.. ويوم حدد ليها ما حدد الا ليلة الجمعه.. ليلة عقد حبيبته الأولى والأخيره.. كان متعلق بوهم.. يظن انه فيوم ممكن راح يرجع ليها .. بس هالليله طيرتها من بين ايده.. قفل على روحه الباب ..ويوم دقت ريم تحجج ليها انه تعبان.. وقفل الجوال .. وقفل كل ذكرياته .. على سجى .. وصار يقلب شريط حياته معاها والحره والحزن ماكلين قلبه....
والى الملتقى ..
رد مع اقتباس
المفضلات