الله يعطيك العافية اخي الفاقدات

موضوع مهم وحساس والمفروض ينشر في جميع المنتديات ويتم مناقشته

لان بالفعل اصبح الامر مأساوي اشوي

وانا مع الاخ الفاقدات كل شي ينحل بموافقة الطرفين والتفاهم بينهم

والي صاير في الوقت الحالي السبب الرئيسي فيه هو الرجل

لان لو كان يبين حالته ويشرحها للزوجة المستقبل من البداية ومد ارجوله على قد لحافه على ما يقولون ما تطور الامر لهدرجة

ولو كل اب فقه بنته وفهمها ان المظاهر ما منها فايدة وهذا كله وسخ دنيا ووقف مع الي جاي ويشرفه ان يقترن ببنته
جان احنا بخير


وقفوا يا شباب كلكم مع بعض وايد وحدة وراح اشوفون شلون راح تنحل المشكلة . بس ما نبي خيانة الكل يصمد ويتمسك برايه

المشكلة ان بعض الشباب يستسلم لهذه الامور ويراكم على نفسه الديون بس عشان ما يعور راسه وما يتعب نفسه ويدور له البنت الي ترضى بوضعه المالي

يتجاهل العواقب الي بتواجه وتواجها في المستقبل ويفضل راحته في الوقت الحاضر

واني مع الاخت الم الفراق في الي قالته في بنات واجد يدورون على الستر والاستقرار وفاهمين للوضع تماما

والبنت ما تنوزن بمهرها او بالصالة الي راح تصير فيها حفلتها

البنت ميزانها عقلها ودينها واخلاقها

خواتي ما يهمكم كلام الناس ترى رضى الناس عسير

اهم شي راحتك انت والي راح يكون زوجك في المستقبل

واذا تواضعتي وعملت بما قال به النبي ( ص) افضل النساء اقلهن مهرا . فكري اولا واخيرا انك تعملي هذا الشي لله سبحانه وتعالى والحصول على رضاه

والله راح يوفقك اكيد دنيا واخرة

وفي شي اخير بعد احب اذكره ان الشاب لين يروح يتقدم الى فتاة وتطلب منه المطالب المذكورة اهل الشاب يستنكرون مطالبها وبعض الاحيان يهونون الشاب عن الاقتران فيها ويقولون لك خلها تنقع في بيت اهلها شايفه حالها علينا

لكن اذا تقدم شاب الى بنتهم يطلبون نفس المطالب ويمكن اكثر واذا الشاب المسكين اعترض وطلب الرحمة اشوي يردون عليه انه بنتهم مو طايحه في جبدهم وفي 100 واحد يتمنى الاقتران فيها وهي عزيزة وغالية وما يقبلون باقل من جدية

تناقض صح

بس هذا الي حاصل


مسامحة طولت عليكم وان شاء الله نشوف اراء البقية ويمكن في رجعه لي مرة اخرى

تحياتي لك خيو

والله يوفقك ويسر اليك يا رب

اختك ام محمد