بعدنا عن بعض شوية .. وبعد الغيبة اتقابلنا وعلى لساني سؤال ..

فاكراني ..؟؟

أنا اللي دايماً نفسي اشوفك
ناسية همِّك .. ناسية خوفك
ناسية كل الدنيا حتى :
ناسية إني
في الاسم منك وانتي منِّي

أنا اللي همُّه هو همِّك
في عنيه تدوووووبي وتنسي همِّك
في إيديه برقة تنااااام إديكي

* * *

فاكراني ..؟؟
أنا اللي نفسه مرة ياخدك
لدنيا تانية تكون في حلمك
عيشي فيها وارمي حزنك
ــ بسمة كوني وكوني ضحكة ــ
انسي مرة هموم ماضيكي


فاكراني ..؟؟
أنا اللي شايفك بنت حلوة
واللي عارفك زي نفسك
واللي نفسه يبقى دايماً
بُكراكي هوَّ وهو أمسك

* * *

فاكراني ..؟؟
أنا اللي سمعك يوم ما كنتي
عايزة قلب يكون لك انتي
عايزة حدّ يقولِّك انه
إنه حس ان انتي منه


* * *

فاكراني ..؟

أنا اللي راسمك ع الحياة
بسمة شاردة وضحك تاااااه
واللي شوقه زي شوقك
شوق بيوصل منتهاه

فاكراني ..؟؟
أنا اللي اسمه حروف في اسمك
واللي شايف ناس في رسمك
واللي حس الشوق في همسك
واللي خايف

والله خايف

ينسى رسمك

* * *

فاكراني ..؟؟

أنا اللي دايماً نفسي اشوفك
واللي اسمه من حروفك
واللي عارفك
واللي فاهمك
واللي حسِّك
لمَّا سمعك وانتي تبكي
واللي قالّّك .. اوعي تبكي

ولاَّ اقولِّك ..

ابكي احسن

تبقي احسن

تبقي احسن منه هوَّ

اللي اسمه حروف في اسمك


زمــــــان