ديوان حامد زيد

[زمان]

(من تحت لتحت)

لو تعرف الخطايا كيف كنـت محـروم

كان سود الليالي يوم طحـت سمحـت

لو هموم المفـارق مثـل كـل الهمـوم

ماتشوفون عينـي بالدمـوع سبحـت

ولو تحن المشاكل عقب حب الخشـوم

كان حبيت خشـم المشكلـه واستحـت

بين صـدة عزيـز وكبريـاء مهـزوم

عين شحت علـى وعيـنٍ استسمحـت

بس مالله خلقني مـن بكـاي معصـوم

وادري انه المحاجر لو تفيض افضحت

والله اني على جرحي صبـور وكتـوم

لكن ان الدمـوع ان روحـت روحـت

اعذلتنـي ظروفـي وانهكتنـي عـزوم

والوجيه احزنت لي والقلـوب افرحـت

اشهـد ان الليالـي ماتعـرف السلـوم

قلب جافي لقاه ووجـه صافـي بحـت

راهنتنـي تبلـل بالـدمـوع الكـمـوم

ويشهد الله عليهـا راهنـت واربحـت

احرمت نور عيني من غلا ريـم قـوم

بذرةٍ وارتوتنـي واثمـرت واطرحـت

جـادلٍ دوم ماهـي مثلهـا كـل يـوم

استضاحت غموض وبالغموض اوضحت

دورت بين قلبـي والهـدب درب نـوم

وامرحت وين مـدري المهـم امرحـت

تنحت اسمي بقلبٍ جيت فيـه معـزوم

واسمها بين جلـدي والعظـام انحـت

مثل جفنـي لعينـي بالنعـاس محكـوم

كل مانمت نامت كل ماصحـى صحـت

ماتعارض كلامي غيـر عنـد اللـزوم

بس لا قمت اسولف واندمجت سرحـت

دايم ازعل عليها بـس قلبـي رحـوم

وهي تموت بعذابي من تحت لي تحـت

مثل وجه العلاقه فـي ثيـاب الخصـوم

ان تطيبت طابت وان جرحت اجرحـت

خصها الله بوصفٍ من خيـال معـدوم

لا اذان اسمعتبـه ولاعيـون المحـت

كن ربي خلقهـا مـن بيـاض الغيـوم

ومن كفوف السحابـه بالـورد القحـت

عن سواها فرقهـا بالقمـر والنجـوم

وكل عذرى تباهـا بالجمـال انزحـت

بالحلا هي كـوم وباقـي النـاس كـوم

كفـتٍ عادلوهـا بالبشـر وارجـحـت

حسبي الله على اللـي مابغاهـا تـدوم

من بعد كيف كانت شوف كيف اصبحت

لاتحقـق وصـال ولا فـراق محتـوم

خطـةٍ قربتنـي للفـشـل وانجـحـت

لعنة العشق تبقى مثل ضرب السهـوم

لو محى الوقت جرحه صورته ما انمحت

كيف ابنسى وانا اللي من جفاف لسموم

ماحشمت العيـون ولا الدمـوع فلحـت

كانهـا بالحميـا كـل ربعـي قــروم

لو يلدون لاصعاب الظـروف صلحـت

اجزم ان كنت ياقلبي شجـاع وجـزوم

لـد لعيـون بنـتٍ لا التفـت الفحـت

ماتهيـن البخيـل الا يديـن الـخـدوم

دام كـف الخطايـا بالجـفـا لـوحـت

نطح الباس باس ونطـح اللـوم لـوم

وان تهدت تهـد وصيـح ان صيحـت

ياتعيـش بمعـزه ياتمـوت محـشـوم

ودك ان الليالـي لافعـلـت امـدحـت

عمر ضعـف الاراده مايسـر الرخـوم

ضربت السيف لوبيدين الشجاع ذبحـت

[زمان]

(ثامن السبع العجايب)

اسمعي والكـل منـا لـه هـواه ولـه ميولـه

لاتمسين بكلامـك شعـره بـروس القرايـب

ان حكيتي مـا وفيـت وان تحديتـي عجولـه

تحسبين ان كل فعـل ٍ تفعلـه يمنـاك صايـب

تحسبين انك خذيتي بالحـش صولـة وجولـة

تحسبين اني ذكرتك مـع نسانيـس الهبايـب

والله انك لو ذبحتـي خافقـي لألقـاك حولـه

عاشقة تشقي بقلب من طريق العشـق هايـب

كم رضيت اسكت عليك من القهر وانتي زعوله

خايف اضحك وستفزك واهجرك واعيش ذايب

ادعيت انك خجولة وادري ان ما انتي خجولـة

وادري انك تخجلين الشمس من فوق السحايب

مايحببنـي بقلبـك ياالهـنـوف الا فضـولـه

ولا ينسيني غرامك غيـر تكـرار المصايـب

عاشقة جيتـي ورحتـي يالحبيبـه يالعذولـه

لابنيتـي لـي طمـوح ولا تركتيهـا خرايـب

تستبيحيـن القلـوب وتستحقيـن البطـولـة

واستحق اعيش بعدك تايـب وامـوت تايـب

ياكثر ماشال قلبـي شـي اكبـر مـن حمولـه

ولا عفيتي عن غلاه ولابخـل لـك بالوهايـب

كنه ارحم من همـال المـزن للزهـر بذبولـه

وانتي اقسى من هجير القيظ وسموم اللهايـب

وانتي ادرى في غلاك بداخلي ش اللي يزولـه

وادخلي علـى الله واحفظـي ذيـك السبايـب

ماخبرت اللحظة اللـي حللـت قربـك تحولـه

ولا هقيت اني بشـدد للجفـا قلـب وركايـب

ولاهقيت انك تحبيـن الزلـل وانتـي جفولـه

ولاهقيتـك تكرهينـي كثـر حبـك للطلايـب

كن قلبي فـي وصالـك وابـل ٍلحظـة نزولـه

وفي فراقك مثل دمعة تنحدر من عيـن شايـب

كنت ابي وقفت حبيبه تنهض القلـب بخمولـه

طامح بالعشق وانتـي عايبـه والحـظ عايـب

كنت ابيع الكون واشتري خافقك وظلال زولـه

كنت اثور اليا وطيتي بالقدم شهـب الترايـب

كنت قصن كـل كفـي غيـر كفـك مايطولـه

كنت قلب ودمعتيـن ودرب وجـروح عطايـب

كنت ابيع العمر كله ورخصه عرضـه وطولـه

للعيون الـي هدبهـا ثامـن السبـع العجايـب

بس ابرضي لك غرورك واكسر القلب بذهولـه

وقتها ماكنت افكـر صايـب او كنـت خايـب

والرجـل لـو ماتحلـى بالشهامـه والرجولـة

صدقيني صعب يقدر يملـك قلـوب الحبايـب

صدقينـي مايوالـف خافـق البنـت بسهولـه

بالهوى يابنت حواء غيـر طـلاب النشايـب

والسهر والعشق الاول والهوى واللـي ينولـه

شي اقسى من همومك والعنه حاضر وغايـب

والهموم اللي دعتني من بعـد سـن الطفولـة

كلها ( من تحت راس العشق ) ملعون الصلايب

[زمان]

(رد السؤال)

انتبهت لدمعها بالهـدب والكحـل سـال

لين جفت عينها دمـع والقـاع ارتـوى

وابتدت لحضة جفا ونتهت لحضة وصال

وأنطفى نور السعادة واحسب انه ضوى

ما اكتفيت من الهوى والغرام أربع ليـال

واقفت أيام التلاقي وجـا وقـت النـوى

كنت ابلسى وابتسم والتفت عنها شمـال

لا قويت الصد عنهـا ولا قلبـي قـوى

ما هقيت ان الهوى عذب قلوب الرجـال

لين ضاع القلب مني وتفكيـري سـوى

رحت أدور دفوة الشمس ضيعت الضلال

جيت اطفي شعلة النار والقلـب انكـوى

ماهقيت ان السعادة خيـال فـي خيـال

تروى قلوب الحبايب وقلبـي مـا روى

كنت ابشتال الهوى والهوى ثقل الجبـال

وان تحملت الجبل مـا تحملـت الهـوى

كنت ابسلى بالهوى والهوى صعب المنال

ما رضا لي حظي اللي طواني وانطـوى

قلت لا فراحي تعالـي ولا قالـت تعـال

والخفوق ان قلت ابقبل على صدي نوى

الله أكبر لا شرقت شمس يتلاهـا زوال

كيف ابفرح في صباح مع الليال استوى؟

لاحصل بالحب قسمة ولا جا لـي مجـال

غير اشوف معاند الجرح وعناد الـدوى

شبت النيران واقفت وجاء رد السـؤال

ما تشب النار يا كـود يوصلهـا هـوى

[زمان]

(هموم بهموم)

من يوم فرقانا الى يومنا اليوم

مافات يوم الا وهي مشغلتنـي

إليا غفيت اشوفها في حلا النوم

واليا صحيت بكل الافكار جتني

عشقتها من قلب ميس ومحروم

وتركتها يـوم انهـا عاندتنـي

نار تشب بداخل القلب بسمـوم

حاولت اطفي ضوها واحرقتني

دنيا ثقيلة كلها همـوم بهمـوم

كني حملت جبالها فوق متنـي

[زمان]

(وش اللي يجبر الشاعر)

انا والليل والعبـرة وجـرح وخاطـر ٍمكسـور

ونفس من هجيـر البعـد والحرمـان مقهـورة

وقلب ظامي لشوفـك ولايـروى ظمـاه بحـور

وعين تحتري لحظة غيـاب الطيـف وحظـوره

ونـار تنطفـي مـره ومـره تشتعـل وتثـور

واقول النار مقدورة وهـي مـا هيـب مقـدورة

حسبـت الليـل بغيابـك يمـرن الليـال دهـور

وكني شايـل بقلبـي ليـال الوقـت وشهـوره

تصبرت وتقدرت وبنيت مـن الخيـال قصـور

إلين ان الجفـا شـد الركايـب وانتهـى دوره

تحريتك على درب القصيد مـن ثـلاث شهـور

وحشا ما مات لك غصن يشف المـاي بجـذوره

تخيرت الغرام وجيـت لا راضـي ولا مجبـور

وجيتـي تسبقيـن خطـاك مرضيـه ومجبـوره

وانا ما كان لي رغبه أبين واكشـف المستـور

ولكن الجمـال أكبـر مـن الخفـاق وشعـوره

جمـال وود وعيـون ودلال وكبريـاء شعـور

وفتنة تخـذل عيـون النهـار وينطفـي نـوره

ولك في خافقي صوره تلاشت بين ضـي ونـور

وأخاف اسكت من الفرحة وتنطق باسمك الصورة

عرفتك وانتهت رحلة قسـاوة دربـي المهجـور

والا يا جملـة أيـام الجفـا والصـد مشكـورة

خذتني للجفـا عـزه واخذنـي للعنـاد غـرور

واخاف اكون بعنـادى حبيـب ومـات بغـروره

وإذا كانـت مسافـات الخيانـة للغـرام قبـور

وش اللي يجبر العاشق يخون ويحفـر قبـوره؟

وش اللي يجبر الشاعر يدور للشعـر جمهـور؟

مـدام انتـي محبينـه وعشاقـه وجمـهـوره

[زمان]

(يجيني يوم وعطيها)

انا ما اخطيت في حقك ولكـن الكـلام عتـاب

أعاتـب والعتـب كلمـة تفسرهـا معانيـهـا

اعاتب واحسب بهرجي الا مني حكيت حسـاب

وكلمه يستحـي منهـا لسانـي يبتـدى فيهـا

واذا انت من العتب تزعل علينا وابتصك الباب

ترى ما نيب قاصدهـا ولانـي فيـك ناويهـا

ولا ودى على الفرقا وقلبـي داخلـي مرتـاب

اشوف ان الهوى خدعة واشوف القلب راضيها

واشوف ان الهوى فرقا مواليف وعناد احبـاب

واشوف ان الجفا خطوة ولاني قـادر اخطيهـا

وقلبي لو عشق يخلص ولو طالت عليه رقـاب

وتشهد له دروب الحـب حاضرهـا وماضيهـا

عشقنا والهوى حسرة،مشينـا ولاأمـل كـذاب

بدينـا نانبنـي منهـا قليـل مـن بلاويـهـا

عرفت الحب من عمري صغير بالغرام وشـاب

وقلبي للحبيب اكبـر مـن الدنيـا ومـا فيهـا

صحيح انى نويت ابعد ولكـن الهـوى غـلاب

وهي رحلة بديت بها ولا ادري كيـف بنهيهـا

تحريتك شروق الشمس وشفتك للشروق غياب

ولا اضنك تبيع العشره اللـي كنـت شاريهـا

بقى لي بالهوى نظرة وتغريبة ودمـع اهـداب

وقصة بترك لسانـك علـى العـذال يرويهـا

واناجي باقي حروفي وبألـف للفـراق كتـاب

قصايـد تملـي اوراقـي ارددهـا واغنيـهـا

واذا مرتني الذكرى وجرحي بالحشا مـا طـاب

بتبعدنـي وتدنيـنـي وببعـدهـا وابدنيـهـا

وانا عيب علي اشكي من الدنيا بدون اسبـاب

مدامي ما خذ منهـا يجينـي يـوم واعطيهـا

[زمان]

(قالها حامد)

تماديتي وأنا مثلـك تماديـت بهجـر وبعـاد

وكـلٍ مثّـل عنـاده خفـوقٍ ثابـتٍ صامـد

وإذا عندك بعادي عيد ترى عندي جفاك أعياد

وعسى طول الجفا مني يليّـن قلبـك الجامـد

أبضحك وأظهر البسمة ولو إن الجروح اجداد

وترى قلب الحريقة ضو ولو وجه الحطب رامد

بكون أكبر من الغلطـة وبعلـن للهوا ميـلاد

إذا كان الخطـا منـك مجـرّد ثـورة الخامـد

وإذا كان الجفا منّك مسافـات وغـلا وعنـاد

تراي أكبر من عنادك وقولـي قالهـا حامـد

[زمان]

(حد علمي)

حد علمي بالغلا يوم كنت أسـوى كثيـر

يوم كانت ضحكتي طبع وعنـادي سمـه

وحد علمي بالغلا يـوم خفاقـي ضريـر

قبل أهدم العشق وأبنيه وأرجـع وهدمـه

وحد علمي بالبكاء يوم لي قلب وضميـر

قبل أشوف المسلم يموت بيـد المسلمـه

إيه عدّت من يدي بـس ماعـدّت بخيـر

ليلـةٍ عيّـت تجينـي وجتنـي مظلمـه

من عرفت إحساسها كن في قلبـي نذيـر

والنهار المكتئـب بايـن ٍ مـن مقدمـه

ليلـةٍ حسيتـهـا لاتـجـور ولاتجـيـر

مثل طفـل ٍ ماحقرتـه وعيّـت إحشمـه

وأصبحت مثل شعره وأقصمت ظهر البعير

وأبتدى في موته الجرح من حيث إختمـه

صارلي بالعشق مالا هقيت أنـه يصيـر

أنظلمت بعشرت أنسـان ماكنـت إظلمـه

العشير اللي تبرى من ضلـوع العشيـر

الحـلا عـزّز خطايـاه والحـظ إخدمـه

لاتبسّم يكسـر النـور بعيـون البصيـر

وكن شمس المغربيـه تبـات إبمبسمـه

معتدل فـي قامتـه لاطويـل ولا قصيـر

ممتلي بالزين من معصمه لـي معصمـه

فيه بلوان الهدب لون غير ولـون غيـر

مثل ما للرمـش بالعيـن قصـه مبهمـه

كنها نكس البيارق علـى شـط وغديـر

ومثل لملمت الشتـات بشتـات اللملمـه

مـع سـواد مجـدّل ٍ مايثـور إلا يثيـر

كنـه اللـي ينهـم الريـح ثـم ٍ تنهمـه

ماتجمع لين قيّـد حريـر ٍ مـع حريـر

في ضـلام ٍ علّـم الليـل مالـم يعلمـه

ماهقيت إن الهدب صلف وأجفانه تغيـر

لين سلهم لعنبـوا جـد ذيـك السلّهمـه

ماعتقني ليـن سـاق البشايـر للبشيـر

يوم صد وجـاه قلبـي بشحمـه ولحمـه

والله إنه حط قلبي تحت رحمـت شطيـر

في يديـه وكـل مـاراد يقسمـه قسمـه

ياعساني ماعدم إرضاه في برد وهجيـر

ولوعدمـت مروّتـه ياعسانـي معدمـه

إن طلب عيني رضا قلت ماغيره نظيـر

وأنشرب دمي غضب قلت يستاهـل فمـه

واهنيّـه يرقـد الليـل مرقـاد الغريـر

كن نومه لابغى يهـزم الجفـن إهزمـه

وإلنا من صفرة عصير الى صفرة عصير

والسّهـر يايلـزم العيـن وإلا تلـزمـه

لو صحيح إن الحبيبين يجمعـه مصيـر

كان نفس اللي حرمني من النوم إحرمـه

والله إن مروّتـي ولّعـت فينـي سعيـر

يوم شفتـه تـل قلبـي وداسـه بقدمـه

مارحم زهرة شبابي وأنا تـوّي صغيـر

لين ضيّق خاطـري ضيّـق الله إنسمـه

إيه عدّت من يدي بـس ماعـدّت بخيـر

ليلةٍ عيّت تجـي بـس جتنـي مضلمـه

حد علمي في عناهـا عـذاب وزمهريـر

يوم قمت أوحي بالاضلاع صوت وهمهمه

وحد علمي بالرجا من نصير اليا نصيـر

يوم شفت النّفس تذبح وهـي مستسلمـه

وحد علمي بالبكا يوم لي قلـب وضميـر

قبل أشوف المسلم يموت بيـد المسلمـه

[زمان]

(الليال السرمديه)

من عرفت العلم وانتـي يالليالـي سرمديـه

والوصول أغلى طموحات الفتى بأول شبابـه

والمهابـه ماتهـادت غيـر لنفـوسٍ رديـه

ليت في قلب الليالـي للفتـى قـدر ومهابـه

دنيةٍ تجمـع صفاتيـن الخجـل والعنجهيـه

كنها بنـت يـزود بحسنهـا ثقـل وذرابـه

يوم جتنـي تمتحنـي فـي زمـان الجاهليـه

جيتها رجـلٍ تحلـى فـي تقاليـد الصحابـه

بالعطا تبخل علـي وبالعـذاب تمـوت فيـه

عشتها قلب شجـاع يكـره الضيـم ويهابـه

بس ابدري وش نهاية وصلها وأخـر هديـه

وهو صحيح ان القصايد للجريح أول عذابـه

ومن عرف لك يالليالي وانتي اكثر من هويـه

ومن تلحف في ترابك مقتنع باللي جـرا بـه

مـن قـدر طموحـه فـي زمـان المعمعيـه

مَن مِن الناس يتجرا يتركـك وانتـي ترابـه

السـؤال يعيـد نفسـه والاٍ جابـه مبدئيـه

والقلوب اللي تخالف ودهـا صـارت تشابـه

والخلايق ماتسـوي طيبهـا جـود وحميـه

كلنا نضحـك بوجـهِ مبتسـم للغـدر نابـه

لو يصير الموت راعي .. كلبونا لـه رعيـه

لو زعل نزعل ونرضى لا رضى حضرة جنابه

والله اني مانويت اكشـف ملفـات القضيـه

لكن اني شفت شـيٍ يفقـد العاقـل صوابـه

ياالحياه انتـي غديتـي بالغرابيـل اجوديـه

كنك اللـي مايميـز بالخطـا غيـر ارتكابـه

ماعطيتي غير جرح ولعنبوهـا مـن عطيـه

والله انك ما عطيتي خيـر للقلـب وصوابـه

خاينه .. ما انتي عزيزة خافقـي ياالأجنبيـه

جنبي عني وأجنـب مـن مداخيـل الغرابـه

وأخذ بـدربٍ يـدرك للقـى روحـه وجيـه

يايموت الـدرب ولا بدفـن القلـب بضبابـه

وان ذبحتني تمنـي رجعتـي وابكـي عليـه

لين تملين المحاجر بالبكـا حـزن وكـآ بـه

وادفنيني بيـن ظلـك والخيـوط العسجديـه

لو لقيتي بعد موتي واحـد بنفـس الصلابـه

شاعرٍ قدم قصيـده لاغلـب أيامـك ضحيـه

بيـن نـاسٍ مايطيقـون القرايـه والكتابـه

يازماني لو بقى للشعر فـي صـدري بقيـه

بكتبه وارسم خيالي بالـورق وأروي سرابـه

وكـان ردت للعنـاد وعــودت للمقـدريـه

والله أني ما اتنـازل ليـن اعديـه السحابـه

يازمـانٍ مبتلـي بـه وابتلـى فينـي بليـه

لاتلوم اللي يخونك كـان لـه عقـل ولبابـه

بقفل القلب المشقـى عـن هبايبـك العتيـه

ودق بابه من بعدها لـو قـدرت تـدق بابـه

الحياه اللـي تسمـي لعبـة الشاطـر خطيـه

ماتساوت في عيوني مـع جناحيـن الذبابـه

أذكر أنـي كنـت عايـش بالليـال الاوليـه

وأذكر أني كنت عايش وقتها باحضان غابـه

ماعرفت إلا عبـارة مثلهـا مثـل الوصيـه

عيش عمرك ذيب تسلم من مخاليب الذيابـه

[زمان]

(الأم)

قصيدتـي زاد بعيونـي جمالـهـا

واخذت أنقـي بالمعانـي جزالهـا

واكتب معانيها من الشوق والغـلا

لأمي وأنا اصغر شاعر ٍمن عيالهـا

كتبتها في غربتـي يـوم رحلتـي

لمـا طرالـي بالسفـر ماطرالهـا

امي وانا بوصف لهـا زود حبهـا

وان ماحكيت لها قصيـدي حكالهـا

امي لها بالقلب والجـوف منزلـه

مكانـة ماكـل محـبـوب نالـهـا

اقرب من ظلالي وانا وسط غربتي

وانا تراي اقرب لها مـن ظلالهـا

ماشافت اعيوني من الناس غيرهـا

ولا خلـق رب الخلايـق مثالـهـا

اغلا بشر في جملة النـاس كلهـم

واكرم من ايدين المزون وهمالهـا

اتبع رضاها ورتجـي زود قربهـا

واللي طلبته من حياتـي وصالهـا

الصدق مرساها والاشواق بحرهـا

والعطف واحساس الغلا راس مالها

اهيم فيهـا وابتسـم يـوم قلبهـا

يسأل وانا قلبي يجـاوب سؤالهـا

وان اطلبتني شـي فزيـت مندفـع

اموت أنا واحمـل تعبهـا بدالهـا

واصبر على الدنيا والاحزان والتعب

واحمل على متني فطاحـل جبالهـا

واسهر اعذب راحة القلب بالشقـا

واعيش اعاني بس يرتـاح بالهـا

تربية ابوي اللي على الطيب بذكرة

اللـي وهبنـي الحيـاه ومجالهـا

نور لي ادروبي وانا طفل مبتـدي

حتى تركني واحـد مـن رجالهـا

الوالدين اولـى بالاحسـان لجلهـم

وأولى بتكريـم النفـوس وعدلهـا

اقولهـا وانـا علـى الله متـكـل

والله عليـم بقدرتـي واحتمالـهـا

ياكلمة اغلـى مـن النـاس كلهـم

ياشمـس بقلبـي بعيـد زوالـهـا

يافرحة تملي لـي الكـون باكملـه

ياشجـرة تكبـر ويكبـر ظلالهـا

تضحك لي الدنيا ليا شفـت زولهـا

مثل السمـا تزهـا بطلـة هلالهـا

والبعد عنها ياهل العـرف ماقـدره

لاشـك نـاري زايـدة بشتعالهـا

ماعيش ببلاد ولاهيـب بأرضاهـا

ولابي عيوني كـان ماهـي قبالهـا

أرض ٍ تدوس امي بالاقدام رملهـا

اموت فيها واندفـن فـي رمالهـا

[زمان]

(القدس)

تخيلـوا لـو يفـزع الجـار للـجـار

في مجتمع غاضـب وحاقـد ومشحـون

وتخيلـوا لـو تلتفـت كـل الانـظـار

للمشهـد اللـي وقفـت دونـه عيـون

وتخيلـوا لمـا رحـل الحـرب تنـدار

مابيـن حكـام العروبـه وصهـيـون

اليـا متـى نستقبـل ذنـوب بأعـذار

واليا متى نستنـزف جـروح بطعـون

نتبـع خطـأ تـيـار ونـصـد تـيـار

نبعـد وعـدوان المسلميـن يـدنـون

لوكان بقلوب العـرب صبـر واصـرار

ماكـان سـووا فيكـم اللـي يسـوون

بهمالـكـم بدلـتـم الـثـار بالـعـار

بعتم تـراب القـدس وانتـم تشوفـون

حنـا كـذا بمعـارض الـراي شطـار

لين أستوى بالمجـد عالـي ومطمـون

مـن كثـر مـا كنـا نجامـل ونحتـار

صرنا نخاف نعـارض اللـي يقولـون

لقدس تصرخ والسمـا تحصـد أعمـار

والـدم ينـزف والارامـل يمـوتـون

وارواح تسلب سلب واعصـاب تنهـار

واطفال تعـدم والبشـر مـا يحسـون

خمسين عام نحـارب الشـرك بأحجـار

وبسكوتنـا نبنـي عمـارات وحصـون

ننسى وكن اللي حصـل شـي ماصـار

نسكت وكن مابيننـا شخـص مغبـون

لين أشربـوا مـن دم الاسـلام كفـار

وبعروقنا صـاروا يروحـون ويجـون

استضعفوا لين اضعفـوا كـل الاقطـار

ساقـوا غضبـهـم والاوادم يصـلـون

يستدرجـون العـزل للسمـح الابـرار

يستمتعـون بقـل الاطفـال بالـهـون

ماكنـه الاشـعـب مخـلـوق غــدار

في قلـب لا ساكـن ولاهـو بمسكـون

بالـذل ماتلقـى علـى صيتـه غبـار

كبارهـم واطـيـن وصغـارهـم دون

لابـارك الله فيهـم صـغـار وكـبـار

ولاجمـع الله شملهـم ويـن يسعـون

وماتنطفي شمس الحقيقـه ولـو جـار

فينا زمـان الـذل والضعـف والهـون

ودام الفشل والضعف ثلثيـن الاضـرار

لابـد مـا نضحـك ولا بـد يبـكـون

وأنكانت قلـوب العـرب تنـذر انـذار

ليـش انتجاهلهـم واهـم يستـبـدون

النـاس قالـت حـارب النـار بالنـار

ومالله خلـق للادمـي عمـر مضمـون

وان كانت الفزعه من أحـرار لأحـرار

حنا البروق اللي غدت سحـب ومـزون

وحنا السكون اللي سبق عصف واعصار

وحنا سباع الكـون يـا لعنـة الكـون

وحنا عـرب والعـرب ماتتـرك الثـار

بافعالنـا مـاهـي بقـولـة يقـولـون

نزعـل ولكـن بالزعـل دمنـا حــار

نفزع اليا شفنـا العـذارى يصيحـون

عقالنـا معهـم مـن العـلـم مـقـدار

ومجنوننـا ينطـح ثمانيـن مجـنـون

ياشعـب يـا ثايـر وياشعـب مغـوار

هون مـن اسبـاب المعانـاه وتهـون

أصرخ على كل البشر وأجهـر أجهـار

وخل اليهود إن مادروا عنـك يـدرون

وأجمع شتـات الوقـت تذكـار تذكـار

وأذكر مواقـف كـل طاعـن ومطعـون

حارب بديـن الخالـق النافـع الضـار

واستذكـر الرحمـن وابليـس ملعـون

واطرد من ارض الله عدويـن الاذكـار

وان جـوك ولا جعلـهـم مـايـردون

ورح قلهـم حنـا علـى كـل مشـوار

وذوقوا مرارة نصـف مـا تستحقـون

واذا رضيتـم قـولـوا الـوقـت دوار

واذا زعلتـم سـووا الـلـي تـسـون

[زمان]

(قصة حياة)

جتني ظـروف للكـدر مستعـده

قامت تحدد لي الاحـزان ميعـاد

مرة مع حظـي ومـرات ضـده

واليا تكدر خاطـر القلـب تـزداد

في دنية خلقت على النـاس نـده

مردودها للخير تجـرح واجهـاد

إتجي على المظلوم وتبيـح سـده

واتجي على الظالم تساهيل وامداد

والصدق فيها ما لقى مـن يعـده

والكذب يلقى له مع الناس شهـاد

واللي فقد حـق عجـز يستـرده

يصبح على تسديدة الدين معتـاد

ومسكين من راد الزمن يستبـده

عيت عليه اقـدار الايـام تنقـاد

تطرح به الدنيا على القـاع مـده

مثل الفريسة والمقاديـر صيـاد

ضاعت حياته في لحاف ومخـده

عدت عليه ايـام بغفـول ورقـاد

وماله عن دروب الوعر من يصده

ولا هو عن دروب السلامات نشاد

تلطمه مو جات القدر فوق خـده

وتخطي به الخطوة من بلاد لبلاد

حبله قريـب وعاجـز لا يشـده

يحسب جميع الناس قاصين وبعاد

عاند حياتـه لـو حياتـه تحـده

وادى سنينه كلهـا عنـاد بعنـاد

إصحى من الغفلة ترى العمر حده

للوقت سجاتـه وللمـوت ميعـاد

وهذي هي الدنيا تجـي مستجـده

تلقا بها المازح وتلقا بهـا الجـاد

قصـة حيـاة ومننـا مستـمـدة

ويلزمها تنفيذ وإخـراج وإعـداد

عشنا على كف القدر فـوق يـده

الله خلقنا عباد ونفني لـه عبـاد

ولا حاصـل للحـي ماكـان وده

ولا حاصل للي يموتـون ميـلاد

ويكفيني اني من ظلـوه المـوده

ومالي مع الخسران بالدين مقعـاد

وإن جتني الغفلة علي اوقات شدة

اصبح لها صداد والقلـب صـداد

وتقدير ربـي مالنـا فـي مـرده

ومعارض لتقديره إشراك والحـاد

[زمان]

(اقرب الناس)

بمشي على درب له النـاس يسعـون

واصد عـن درب الدجـي والعتامـة

وبقصر اليسرة عن الضيـم والهـون

وطلـق يمينـي للصخـا والكـرامـة

وبحترم نفسي وانا شخـص ممنـون

ومن يحترم نفسة وجـوب احترامـه

ماني من اللي في ذرى الحيط يمشون

ولامـن اللـي معتلـي فـي مقامـه

متواضع وأمشي على الحـق بالهـون

متـوسـط المعـرفـة والشـهـامـة

ولي مجلس دايم لـه النـاس يلفـون

شرعـت بابـه والــدلال العـلامـه

مايفتـح الا فيـه الاجـواد يـدنـون

ويالله عسى اللـي يقـرب للسلامـه

هذا طريقـي وكثـر النـاس يـدرون

صديـت عـن درب حلالـه حرامـه

ميزت ربعـي بيـن عاقـل ومجنـون

واكشف بليـد المنفعـة مـن سلامـه

واهل المصالح لو على يـوم يبنـون

فـي يـوم ثانـي يرغبـون الهدامـه

واهل الحكي لو لك عن الناس يحكون

بيجيك يـوم ويقصـدك فـي كلامـه

لاصار سيفة لاقرب النـاس مسنـون

يضرب رفيقة وان اقوى في عضامـه

ناس مع الكلمـة يروحـون ويجـون

بـس المصيبـة يدعـون الفهـامـه

ولانيـب ديـان ولانـيـب مـديـون

ولا بغيـت مـن الهـروج المـلامـه

ولاطلبـت مـن المخاليـق يبـكـون

ولا بغيـت مـن الحزيـن ابتسامـه

بمشي بدربي واترك النـاس يمشـون

كلن علـى كيفـه رقـى كـل هامـه

ولا صرت انا من راعي الطيب مطعون

ابيستـوي قـرب الرفيـق وعدامـه

وأن خاب ضني بأقرب الناس وشلون

بعطيـك ضنـي يارفـيـق النـدامـه

[زمان]

(الدنيا بخير)

الظلام اليـا تبـرى مـن مـدرات النهـار

يبتدي عمره ضرير وينتهي عمره ضريـر

والعيون اليا عماها حقدهـا تبقـى صغـار

ماتهادي مستواهـا غيـر للعقـل الصغيـر

والدروب اللي نهاية وصلهـا ذاك المسـار

ماتساوت مع طموحـات الفهيـم المستنيـر

من يميز في طريق الشر حسـن الاختيـار

من صرخ في كل قلب مظلم بصوت النذيـر

من قدر ياخذ بحق التايـه الضايـع قـرار

من دفع عمره لحب الناس لو يبقـي فقيـر

من يقيد لكل فزعه للنـدم همسـة شـرار

من يطفي بالقلوب المدمنـة نـار السعيـر

من خلقنا ماعهدنـا غيـر حـب الافتخـار

نملك الصبر الكبير ونعشق الدرب العسيـر

همنا نرفع بلدنـا مـع صفـوف الازدهـار

ونتذكر يوم كان ترابهـا فـرش وحصيـر

وللاسف عشنا وشفنا حرب درب الانحـدار

حرب تشتيت القلوب وحرب تأنيب الضمير

حرب اقسى من حروب النار وحروب الدمار

حرب ابشع من نزيف الدم وبالسيف الشطير

بالسموم اللـي تـروج بالكويـت بكـل دار

السموم اللي تـردوا مـن سبايبهـا كثيـر

والشباب اللي تمادوا فـي دروب الانتحـار

اصبحوا فيها رهينة لعنـة السـم الحقيـر

يستغيثون بعمار النفس من نسـف العمـار

يرتجون وداع ظلما الليـل للصبـح المنيـر

صرخة المدمن تهيم وترتجي رفـع الستـار

رددت عند الهدف كلمة يصير أو مايصيـر

أشعلت بين الضلوع العوج بعد النـور نـار

وأدمعت كل العيون المشفقـة دمـع غزيـر

وامتلت كل الحناجر من صدى الصرخة مرار

وارتوت كل القلوب الضامية مـن زمهريـر

آفـة الإدمـان زادت وابتـدت بالانتشـار

والوجوب إنا نحـدد فـي تلاحمنـا مصيـر

ناخذ اطراف القضية في عيـون الاعتبـار

ونرسم دروب النجاة وخطة الفـوز الكبيـر

ونرسم خطانا وتكفي دمعة المدمـن شعـار

ويكفي إنا من ربوع المجد وأخوان الاسيـر

إن نوينا ما بغينا غيـر حـرب وانتصـار

وان ضمينا ما رضينا غير نروى من غدير

إتحدنـا قلـب واحـد للهدب والاختـيـار

والفضل يرجع لربـي ثـم يرجـع للاميـر

وعلموا من يفقد احساس الامـل بالانتظـار

الهدف لازال حي وتوهـا (الدنيـا بخيـر)

[زمان]

(قدها وقدود)

أنا ربتني الدنيـا علـى جـزل العطـا والجـود

ونفسي للوفا والطيـب وفعـل الخيـر جزامـه

وأعارض منهج الهابط وأوافق للصعود صعـود

وأسيّر نفسـي بعقلـي مـدام النفـس هدامـه

ولا تثّر بي البسمة ولا كحـل العيـون السـود

ولا يقوى على قلبي صغير الحسـد وأجسامـه

أردّ الجود بأمثالـه وأقابـل بالجحـود جحـود

وترى لا خير في رجلٍ يوطّـي للـردى هامـه

وعندي مع أهل العِليا مواثيـق وثـلاث عهـود

أوفـي لـه مطاليبـه وأودّه وأرفـع أعـلامـه

أعايش مركب الدنيا على متـن القـدر مولـود

أبعرف هو صحيح إنّ القدر بالنـاس دوّامـه ؟

ومن وين الزمن مقبل وإلى وين الليـال تقـود

ومن في هالزمن يقـدر يوجّـه خطـوة أقدامـه

ومن له بالزمن غاية ومن عنده هدف منشـود

ومن منّا قـدر يعـرف خفايـا مقبـل أيامـه ؟

عرفت إنّ الشقا باقي ، عرفت إنّ الحسد موجود

عرفت إنّ القدر يفرض علينا بأسـوأ أحكامـه

لقينا بالعرب حاسد وشفنـا بالعـرب محسـود

وبه ناسٍ لنا ضامت ، وبـه بالنـاس منظامـه

وينقص بعضنا خـوّه وينقصنـا وفـاء وعـود

مـدام الحسـد باقـي وبعـض النـاس نمامـه

ولا ترجى بها الدنيا من ربوعك يجيـك اسنـود

ولا تشره على رجـلٍ عيونـه خانـت أقدامـه

وقابل خطوة بخطوة وجازي بالصـدود صـدود

تناسى غلطة الصاحب عليك بلحظـة اخصامـه

ولا تخطي ترى لصبر الحليم اليا سـلاك حـدود

تروّى واعرف بضرب الحديـد تفكـك لحامـه

تجنب كسرة الخاطر ولو حبل الزعـل مشـدود

تراك بكسرة الخاطـر حكمـت القلـب بعدامـه

ولا تزعل على رجلٍ بذل لك ولرضـاك جهـود

ولا تامن من الحاسـد رضـاه ورفعـة ابهامـه

نبي نصبر على الدنيـا قلـوبٍ بالحيـاة زهـود

مدام إنّ البخت عيّـت توّفـق رمعـة سهامـه

وأنا ما قلتها راجي ولا أطلـب بعدهـا مـردود

ولكـن الفتـى ودّه يحقـق جمـلـة أحـلامـه

وبمشي لآخر الدنيـا ولـو كـلّ الأنـام اقعـود

وعن وجه الزمن بكشف حقيقه وأرفـع الثامـه

صحيح إني صغير السن ولكـن قدهـا وقـدود

وأنا عندي مع الدنيـا مواقـف ترفـع الهامـه

طموحي يملـي العالـم ولابـه للطمـوح قيـود

مدام إن الأمل طبعي ( عرين وصرت ضرغامه )

خلقنا الله من ترابه ولأحضـان التـراب نعـود

تحت رمل الثرى نبقى تغطـي جسمنـا خامـه

سلفنا ما لحقناهم تحـت قـاع التـراب رقـود

ولا يبقي من الميـت سـوى ذكـراه وعظامـه

ولو طال العمر فاني وترى عمر الفتى محـدود

وكلٍ يطلـب المولـى يبيحـه يحسـن ختامـه

وأنا بلّغـت بلسانـي وربـي والأنـام شهـود

وصحف البيّنة جفّـت وعنهـا رفعـت أقلامـه