ديوان الشاعر الاْمير..عبدالرحمن بن مساعد

[زمان]

مردخاي
سمعتوا قصة مردخاي .. ؟!
من زمان قالوا لخوكم مردخاي
" مردخاي هذا زمانك جاي "
شفت هالخوان قاتلهم .. خذ أرضهم .. اهدم منازل بعضهم .. وشردهم
غير معالم ارضهم . .واطمس ملامحهم ..فرقهم وتصير سيدهم !!
وامسك بتلمودك ودينك .. وبعّثر مبادئهم
وبعد ماتزرع بذور الحقد فيما بينهم .. وتحصد مشاعرهم
قد ماتقدر حيد اكبرهم .. رد له كامل حقوقه
واعزف على اوتار فرقتهم
واضرب أغناهم بـ افقرهم
حاربهم بهم .. واشعل معاركهم
وبعد مايستنزفوا قوة بعض ..
خذ مابقى منهم .. وفاوضهم
فاوضهم على الفتات ..
واذا عطوك حق الفتات .. رجع لهم ربعه
وسالمهم
هذي قصة مردخاي سيد الزمان الجاي
عاجبكم ؟!

[زمان]

(اجهلك)أجهلك .. ولي سنين اتخيلك
اتمثلك في كل طيف .. والقاك في قسمات ضيف
كل المشاعر له تقول .. حنا هلك
أجهلك .. ولي سنين اتخيلك
القاك في بعض الوجيه .. ويمرني طيفك واجيه
يا باكر اللي اجهله .. ارقتني الأسئلة
وابطى العمر يستعجلك ..
أجهلك .. ولي سنين اتخيلك
بالعيوب وبالمزايا .. بالألم
لامن هجرتي يجتاحبي ضلوعي وحنايا
اتخيل شكوكك وظنك .. اتخيل التقصير منك
حتى الجفى اتخيله .. وكيف انا باتحمله .. واتحملك
أجهلك .. ولي سنين اتخيلك
وجهك اللي قد حبسته داخلي في غمضة عيوني
واللي ياما قد رسمته .. من عبث طيشي وجنوني
وجهك اللي دوم يظهر لما ألقى نشوة الفكرة الجديدة داهمتني
لما القى انكساراتي قصيدة واكتبتني
وجهك اللي دوم يظهر في اعاصيري وسكوني
في الجبال الشاهقة في أجمل خيالي
في السفوح الخافقة بين نبضي وانفعالي
وجهك اللي قد نحته في عظامي والجوارح
وجهك اللي قد حفظته وبتفاصيل الملاح
بالنهار في بسمته .. بالضيا اللي في ورودة
بالعبوس في غضبته .. بالتضاريس وحدوده
من جنوحه في البها .. لين اقصى نقطة في كاسر جماله
للعذوبة .. من شروق النور في ضيه
للشعر في غروبه
من شطوط الكحل في عيونك لنحرك
من بياض الثلج في خدك لجمرٍ قاد في ثغرك
وجهك اللي ما ابد يوم لمحته .. او عرفته
لي سنين اتخيله .. واتخيلك
ياللي كلي بك معرفة .. واجهلك
ما اصعبك .. كيف الاقيك
ما اسهلك .. لو الاقيك
ياللي دوم اتخيلك
مملكة حسن الزمن
وأنا الملك

[زمان]

أخطيت

أنا مدري وش إحساسك
ومدري وش تظنيني
أنا الصادق في عينك كنت
و صرت الكاذب الخوان
أنا أخطيت ما انكر ولافيه عذر يكفيني
سوء اني احبك حيل واني دايماً انسان
انا ادري بمدى جرحك
وادري الحظ جافيني
يطول الوقت ما أخطي
وإذا أخطيت كل شيٍ بان
انا شفت الزهر مايل
وظنيته يناديني
قطفته يوم ضميته .. لقيته للأسف ذبلان
عرفت انك زهر عمري
عرفت انك بساتيني
وغيرك قيظ مايروى .. سرابٍ يشقي العطشان
انا لو ماحصل ماكان وشهو اللى يدرّيني
بأنك ماسواك انتى .. سكنتى القلب والوجدان
انا اسف على اعذاري
عجزت ألقى عذر فيني
يليق بغلطتي في حقك ويرجع كل شيٍ كان
احبك كثر أخطائي
وادري انك تحبيني
وادري لو تفارقنا فلانقدر على النسيان
اذا تقوي على فراقي وبعدي عنك .. خليني
انا مليت من دور الكرامة
ولعبت الغفران
قليل العمر ياللي انتي دموعك ماتساويني
حرام انه يضيع فراق
هي من قلها الأحزان ؟؟

[زمان]

يا محاكي الصم

يا محاكي الصم .. مجهودك سُدىمُنصت ٍ للبكم إنصات ٍ شديد يا مدور في الظلالات الهُدىمنتظر ابليس عن غيه يحيد منتظر تلقى رفيق ٍ في العِداعاري ٍ تبغى الدفى وسط الجليد باحث ٍ عن عز ابطى ما بتدىباحث ٍ في هالمتاحف عن جديد منتظر منقذ يبادر بالندايهزم الأعدا وحقك يستعيد منتظر منهو يعينك بالفداانتظرت سنين ما جا ماتريد عالي ٍ صوت العرب أحدث صدىشجب وإستنكار تنديد و وعيد حطموا هذا العدو اللي اعتدابالقمم أو بالخطب أو بالقصيد يا مدور عن مثال ٍ يقتدىلا تدور مسك في وسط الصديد انفظ غبار الأماني ما غداللأماني حظ في سوق العبيد كل وقت له نهايات ومدىما يجي أبطال في الوقت البليد ما ينول المجد من يخشى الردىفي قريب الوقت والا في البعيد كل سيف ٍ ما يجرد للصداكل مجد ٍ ما يجدد مايفيد الخبر يصبح خبر بالمبتداوالمعالي دانيه للي يريد وكل يوم يحاك ثوب ويرتدىوكل يوم يكفّن ويقبر فقيد وكل مافي الكون زايل ماعداوجه ربك مالك الملك المجيد يا محاكي الصم صرخاتك سُدىلا تأذن وسط أوثان الحديد

[زمان]

نحس


يوم الاثنين اغتنى .. وصار بين الاغنيا ترتيبه الثالث
يوم الثلاثاء الفجر .. مات في حادث
فريق كورة .. دائما ترتيبه في الدوري الاخير
واذا لعبوا واستبسلوا .. قبل الاخير
وبعد السنين الممحلة .. جاهم رئيس ثروته كثر التراب
عيّن مدير .. عنده من الخبرة كثير
شال الكبار ولعّب شباب
وجاب المدرب اللي له اسمٍ مهاب
واتقدموا .. وصلوا للدور النهائي
ويوم النهائي .. قبل المباراة بدقايق
في البلد حصل انقلاب
مسكين .. شين وفقير
وفي الدراسة حاول انه يستمر .. ومااستطاع
وضعه صعب ..ابوه مات وهو صغير
وماترك له الا الفقر .. وامه واخته .. والهم من فوقه وتحته
ومالقى لجل الهروب من الضياع .. الا انه يدور وظيفة .. أي وظيفة
ولقى من ضيقته مخرج .. وظيفة دخلها معقول .. يمشي الحال لو اعرج
ومرت سنة وسنين ..
والمسكين .. صارت كل آماله زواج
واتزاحمت في داخله الاسئلة ..
منهي اللي بتقبله ؟ .. وليه ؟
وفي يوم مامثله ابد .. شافها .. اجمل من اجمل مارأى
واضحكتله ... مستحيل !! ...اضحكتله
ومشت من اول الحارة .. ولحقها
وادخلت في بيت جاره ..
سأل عنها وعرف ... قنوعة واسمها سارة
تصير اخت لمرة جاره
ارسل لها اخته .. تجس النبض
جت البشاير
راح لمه .. وفرحته كبر السما والارض
وافقت !! .. ابشرك يمه .. لقيتها يمه
سارة اخت حصة مرت منصور ..
ابيها وهي تبيني .. وابغى منك الشور
خلاص يا يمه خلاص .. بقول لهمومي الوداع .. بقول لهمومي الوداع
قالتله امه :
يا ولدي .. بس هذي اختك في الرضاع

[زمان]

يوميات مواطن عربي

السبت ...
ديون ... وأمراض .. وكبت
الأحد ..
منذ اللحظه الأولى ..
وإلى الأبد ..
ينادي .. ولا يسمعه أحد ..
الأثنين ..
القافلة تسير .. لكن الى أين ؟؟
لا جوابٌ يصدح .. ولا كلابٌ تنبح ..
الثلاثاء ..
أصبح ثرياَ .. وازداد عدد الأثرياء
مات خمسة وأربعون مريضا ..
من ندرة الدواء ..
الأربعاء ..
إحتفال .. صاخب .. فاخر .. معطاء
شعر .. وفكر .. وولائم ..
وخطابات وثناءات ..
وجمع من الأدباء ..
هو احتفال مكلف .. ولا يكاد ينتهي ..
لكن ما يأتي به .. من سمعة ..
جدير بالعناء ..
قرية صغيرة هناك ..أهُلكت من وطأة الوباء ..
الخميس ..
كل شيء سعره الى ارتفاع ..
إلا المواطن التعيس ..
قاتل الله .. ابليس
الجمعة ..
إجازة من مجتمع طيب السمعة ..
حكمة السبت
قل لكل من تخشى ... أصبت
حكمة الاحد
اذا طرقت الباب .. وقيل من ؟؟
قل : لا أحد
حكمة الأثنين
انظر بلا عينين .. واسمع بلا اذنين ..
وانطق بلا لسان .. ولا شفتين ..
حكمة الثلاثاء
الثروة تاج على رؤوس الأثرياء ..
لا يراها إلا المرضى والفقراء ..
حكمة الأربعاء
اللهم قني خير الأصدقاء ..
حكمة الخميس
يقول الله سبحانه ..
وأخذنا الذين ظلموا بعذابٍ بئيس
حكمة الجمعة
إلعن الظلام .. لن يجدي أن تشعل شمعة

[زمان]

يا كاعب

يا كاعب الطبع الفريدياللي في صدقك تكذبي يا أقدم الكيد الجديدكيد انسجن منه نبي يا جاريه تملك عبيديا مقيده تسبي سبي القوه في ضعفك تبيدوسلاحك الدمع اسكبي ما يعجزك قاسي عنيدالكهل يصبح بك صبي ينصاد ويظن انه يصيدويصدقك هذا الغبي ويظن انه الفذ الوحيدما يدري انك تلعبي مسكين هالجاهل بليدظنك بوصله ترغبي ان جاك اقفيتي بعيدوان صد عنك تقربي وان شفتي اخلاصه يزيدفي حيرتك تتقلبي وان بان لك فجأة سعيدمن هالسعادة تغضبي وان قلتي عني لا تحيدوطاوعك ....... تستغربي وان قلتي فراقك أريدوغاب عنك تندبي ياطالب الراي السديديا حاير بطبع الظبي أقرب من حبال الوريدوابعد من المجد الأبي وأوضح من أنوارٍ تقيدواخفى من النملة دبي الشك فيها والأكيدوغموضها به تختبي شف فعلها يحكي ويعيدالغدر شيمة مذهبي زادي النكد به استزيدوالمكر صافي مشربي البعض ينصاني مجيدوالبعض يحبيلي حبي ضعفي قوي وذلي عتيديا ليت اعرف مأربي شف فعلها برجلٍ شديدتلقى طلبك ومطلبي تعطيه بعض اللي يريدوتاخذ جميع اللي تبي أستثني من هذا القصيدكل النساء بكوكبي

[زمان]

مذهلة

مُذهلة .. !
ماهي بس قصة حسن ...
رغم ان الحسن فيها بحد ذاته .. مشكلة
مُذهلة ..
كل شي فيها طبيعي .. ومو طبيعي
أجمل من الأخيلة
طيبها .. قسوة جفاها ..
ضحكها .. هيبة بكاها ..
روحها .. حدة ذكاها ..
تملأك بالأسئلة ..
مُذهلة ..
مُذهلة ..
تملأك بالأسئلة ..
هي ممكنة والا محال ..؟!
هي أمر واقع .. أو خيال ؟!
هو سهلها صعب المنال .. ؟
أو صعبها تستسهله !
مُذهلة ..
تملأك بالأسئلة ..
ليه كل معجز مر هذا الكون .. فيها له صلة ؟؟
ليه كل شي فيها تظن انك تعرفه .. تجهله !؟
ليه كل (لا معقول) فيها ورغم هذا تعقله !؟
طيبها .. قسوة جفاها ..
ضحكها .. هيبة بكاها ..
روحها .. حدة ذكاها ..
تملأك بالأسئلة ..
مُذهلة ..
يا بدايات المحبة ..
يا نهايات الوله ..
كيف قلبي ما احبه ؟
وانتي قلبك صار له !
يا أعذب من الأمنيات ..
يا عالم من الأغنيات ..
يا أجمل الشعر البديع ..
من آخره لين أوله ..
ما راودتك الاسئلة ؟!
ليه عمري ما لقى لبرده دفى ..
الا دفاك ِ !
ليه قلبي ما بدقاته عزف لحد ٍ ..
سواك ِ !
ليه أنا عيني تشوف وماتشوف ..
الا بهاك ِ !
يا أجمل من الأخيلة ..
هذا جواب الأسئلة ..
كي تكوني من حنيني ..
وبس فيني .. ومو بدوني مُذهلة

[زمان]

الطابور

لا تقروا ما بين السطور
هذي القصة خيال
وما لها أبدا علاقة
بالذي دار ويدور
تبدأ القصة بناقم
كُلَفّ يأدي مهمة
وكان بايع مايهمه
يموت هو أو يبقى عايش
سهم مُتَعمد وطايش
من بعيد يسدده
ويدمي هذاك الثور
ثور هائج مندفع مجروح
هائل القوة
عدائي غاضب ومغرور
وطابور
كلهم ناطر ويرجي
مايجيه الدور
وفأول الطابور
يوقف ثاني واحد
حيث الأول .. مالقى أحدٍ يساعد
انتظر فترة طويلة
وبعد طول الانتظار
وعلى الملا فوضوح النهار
أجهز عليه الثور
ثاني الطابور أول
فسّر وحلل وأوّل
قال أنا مالي هروب
ودوم تايه في الدروب
وياما قالوا الناس إني
في جنوني مافي منّي
وضعي متدهور ويائس
ببدأ بخلع الملابس
قال أنا يا ثور عاري
وباقتناعي واختياري
بصبح البقرة الحلوب
ويترك الطابور.. ويتجه للثور
ويختفوا خلف التلال
وماحصل صعبه يقال
الرقابة لا تجيزه
يرجع الثور العدائي
يواجه الطابور
طابور .. كلهم ناطر ويرجي
مايجيه الدور
أول الطابور .. يحمل في يدة باقة زهور
بادره لحسن النوايا
يدري هو ماله مزايا
شاءت الأقدارُ أمرا
كانت الأزهار حمرا
وزادت هياج الثور
طابور.. كلهم ناطر ويرجي
مايجيه الدور
باقي الطابور يرجف
كلهم يدري ويعرف
وضعهم حالك وهالك
ضعفهم ينبي بذلك
كلهم غارق في أصناف البلاوي
فقر مدقع .. جهل مفزع .. عقل خاوي
طابور .. خلفه هلاكه والثبور
وأمامه الثور الجسور
طابور .. صمته مثل صمت القبور
ينطر المنقذ يجي
ويكف بطش الثور عنهم
أو ينطر الدنيا تدور
ويصبح الطابور فجأة
قوة عظمى !!
ويطحن عظام الثور
بالدور
أو ربما .. على الأقل .. يصبح الطابور ثور
والثور طابور
لا تقروا ما بين السطور
هذي القصة خيال
وما لها أبدا علاقة
بالذي دار ويدور
آخر القصة .. كهل مجنون
يوقف على تلة قريبة
يصيح بالطابور
يا طابور:
أنت أول وربما آخر أعاديك
يا طابور:
كل مابك منك وحدك من صنع أياديك
يا طابور:
أسمع كلام الأقدمين
لربما يهديك
يا طابور:
أمشي عدل.. يحتار ثورك فيك !!

[زمان]

أحمد محمد سلامة

في زمن وهمي من الأزمان
كان ياما وياما كان ..
سلطنة وسلطان ..
وف يوم من الأيام ..
يتصفح السلطان جريدة ..
موضوع يسترعي اهتمامه .
أحمد محمد سلامة ..
فـرد من أفراد شـعبه ..
يائس وأوضاعه صعبه ..
في الصبح يشتغل بواب ..
في مدرسة أطفال ..
وفي الليل يشتغل شيّال ..
عنده ثلاث عيال
فيهم مرض نادرعضال .
ماله علاج إلا فبلدان بعيدة ..
كلفته ما يحتملها وفاقته أصلاً شديدة .
انسدت الدنيا أمامه ..
وارتأى أن الطريقة الوحيدة ..
لفتح أبواب الأمل ..
انه يوجه ندا .. عبر الجريدة ..
لاهل الكرم .. واهل الشهامة
تبرق . في عين سلطان البلاد غمامة .
ويهطل الدمع من عينه ..
يمسح الدمع بكفوفه ..
ويخلع العمامة ..
ويرفع للسما راسه ..
ويقول .
ياربي الفرد الصمد ..
سترك وعفوك ..
ألهتنا عن الناس ..
أمور الحكم والسياسة .
ينادي سلطان البلد :
يا حاجب .
استدعي معالي وزير السلطنة الأول .. رعد .
يجي رعد . ويبدي ولاَءه واحترامه ..
ـ صاحب المجد والكرامة .
سيدي السلطان أمرك ..
ـ أي كرامة يا رعد .. أي كرامة
والمواطن في البلد .. ضايع مقامه ..
اتركك عن هالحكي .. واسمعني زين
هذي مليونين خذها ..
وصلها لمحمد سلامة
أحمد محمد سلامة
خذ الجريدة .. تلقى التفاصيل في الجريدة
لكن اسمع يا رعد .. ما أبي يدري أحد
أحذرك .. لا صحافه .. ولا جرايد
هذي لوجه الله أبيها .
ويعلم الله .. من وراها .
ما أبي مدح وقصايد ..
أرتجي عفو الكريم ..
في يوم بالأهوال زايد .
ـ سيدي السلطان خيرك .. في القديم وفي الجدايد
ربي يجزيك المثوبة .. ويعينك بوقت الشدايد
ـ يخرج رعد .. ويستدعي وزير المال والأحوال ..
مرسال .
يجي مرسال .. أمرك معالي وزير السلطنه الأول .
تعال يا مرسال .. فوراً وفي الحال
خذ المليون هذا ..
وسلموه .. للمواطن أحمد محمد سلامه .. من سيدي السلطان
خذ الجريدة .. تلقى التفاصيل في الجريدة
مرسال .. لابد هذا يتم الآن .. فوراً وفي الحال
وبأقصى درجات السرية والكتمان .
هذي أوامر سيّدي السلطان ..
يخرج مرسال .. ويستدعي كبير الحراّس
فراس . يجي فراس
أمرك يا وزير المال والأحوال ..
ـ فراس .. تعال
خذ هذي خمسمية ألف ..
سلموها .. للمواطن أحمد محمد سلامه .. من سيدي السلطان
خذ الجريدة ..
تلقى التفاصيل في الجريدة
خذها الآن ..
فوراً وفي الحال سلمها .. وبأقصى درجات السرية والكتمان
هذي أوامر سيدنا السلطان ..
يخرج فراس .. ويستدعي النقيب ..
حبيب .
يجي حبيب .. أمرك ياكبير الحراس
ـ حبيب تعال ..
خذ هذي المية ألف ..
سلموها للمواطن .. أحمد محمد سلامه .. من سيدي السلطان
خذ الجريدة ..
تلقى التفاصيل في الجريدة ..
خذها الآن سلمها .. فوراً وفي الحال .
وبأقصى درجات السرية والكتمان .
هذي أوامر سيدنا السلطان ..
يخرج حبيب ..
ويستدعي مسئول المساكن
مازن .
ـ مازن .. تعال .. خذ الخمسين ألف هذي
سلموها للمواطن .. أحمد محمد سلامة .. من سيدي السلطان
خذ الجريدة .. تلقى التفاصيل في الجريدة
خذها الآن سلمها ..
وفوراً وفي الحال ..
وبأقصى درجات السرية والكتمان .
هذي أوامر سيدنا السلطان ..
يخرج مازن .. ويستدعي رئيس الحي ..
اللي ساكن فيه أحمد ..
عبد الحي ..
يجي عبد الحي ..
ـ عبد الحي تعال
خذ هالعشرين ألف
سلموها .. للمواطن أحمد سلامه
خذ الجريدة .. تلقى التفاصيل في الجريدة
خذها الآن .. وسلمها لأحمد سلامة
عبد الحي ..
أهم شي السرية والكتمان .
هذي أوامر السلطان ..
يخرج عبد الحي ..
ويتوجه لمكتبه في الحي ..
ويستدعي مساعِدُه أمين ..
ـ تعال ياأمين .. تعال .. شوف الجريدة
وخذ الألف هذي ..
سلمها لأحمد سلامه
ساكن هناك .. عمارة في آخر الشارع
جنب مدرسة الكرامة ..
الدور الرابع .. شقة ستة
وديها الآن .. وقل له
هذي من سيدنا السلطان .
واسمع ياأمين ..
احرص على السرية والكتمان .
هذي أوامر السلطان
أمين واقف ورا باب شقة
أحمد محمد سلامة ..
يدق الباب ..
صوت من خلف الباب ..
ـ مين ؟ .
ـ أنا أمين .. مساعد رئيس الحي ..
عبد الحي
يفتح الباب .. أهلين وسهلين ..
ـ هذا بيت أحمد سلامه
ـ نعم أنا أحمد سلامه
ـ أحمد محمد سلامة ؟ ..
ـ أحمد محمد سلامه ..
ـ ممكن إثبات
ـ طبعاً أكيد
ـ فعلاً أحمد محمد سلامة
سيدنا السلطان .. موضوعك استرعى اهتمامه
سيدنا بيسلم عليك
وحب يطمن عليك
وكلفنا ننقل لك رسالة :
سيدنا السلطان .. أدام الله أيامه
يتمنى للأطفال عندك ..
كل الشفا وكل السلامة
مبروك يا أحمد تستاهل .
مع السلامة

[زمان]

بهو فندق
بهو فندق .. بلد غربي .. في فصل الصيف
على ميعاد أو صدفة .. جمع أجناس مختلفة
ولا فيهم أحد وافق .. أحد ثاني على تعريف للمنطق
بهو فندق .. فيه الناس مكتظة
فخامة تكسي الجَنبات
نادل يحمل الطلبات .. على أواني من فضة
هنا تجار .. يحكوا أسهم وسندات
هنا سمسار .. هنا شاعر .. هنا بنيات
هنا فلكي .. هنا لاعب كره بارع
هنا فنان .. هنا متعهد السهرات
هنا يحكوا عن الأوضة .. هنا يحكوا عن الموضة
هنا يحكوا عن السادات
وبركنٍ ماهو للصفوة .. بجنب الباب
كرسيين .. حوار يدور بين اثنين حيل أصحاب
ملامحهم تودي يم شرق أوسط
وهيئتهم وحالتهم .. بسيطة أو بعد أبسط
- شفّ سايح من اليابان .. يداعب آلة التصوير
يغازل آلة التصوير
- سايح هذا يا غلبان ؟
هذا السايح البارح .. كانت صورته تحكي
في صدر الصفحة الأولى
يقولوا خامس أغنى شخص في العالم
وأظن أنه .. وربي وحده العالم
جمع هالمال والثروة .. من استيراد أو تصدير
- نسى الكاميرا على الكرسي
- لا يا شيخ .. مثل هاذولا .. ما ينسوا
- صدّقني نسى الكاميرا على الكرسي
لا والله .. رجع خذها
ظنك وينهو رايح ؟
- أكيد يزور له متحف
سخيف .. وهوايته أسخف
- شفه مستني يمّ الباب
وش ينتظر ؟
- أظنه ينتظر تكسي
أقول عدنان : فاخر حيل هالفنجان
خذ شايك قبل يبرد
أقول أحمد : هذاك هناك .. هو منهو ؟
أي واحد ؟
هذاك اللي معه واجد
تخطرف أنت أو عميان
هذاك فلان
هذاك اللي كلامه منتهى الحكمة
وجوده مثل غيث السحب
هذاك اللي لأجله ترخص أيامك
وتقضي النحب
هذاك اللي يهينك وانت تتلقى
إهاناته بصدر ٍ رحب
هذاك اللي شعورك نحوه مبيّن
مزيج من الولا والحب
هذاك اللي اذا لاقدّر الله راح
يغطي حزنك الدنيا
وتهمس .. راح ابن الـ ...........!!
كذا يا أحمد .. ؟
شايفني أنا منافق .. ؟
انا مسمح ولا أوافق
تظن اني بقلب أسود .. كذا يا أحمد ؟
لا تزعل أنا آسف .. أنا آسف
ترى الدعوة سوالف
شف هذا خفيّف دم .. ويعطونه
يعطونه ..؟
يعطونه
ويرجع باكر لهذا .. يقطع ذاك
ويشرشح أصله وفصله .. بخفّة دم
ويعطونه ؟
يعطونه
ويرجع الأخير .. ضاحك على هذا وعلى هذا
أقول أحمد : ظنك هو رصيده كم ..؟
دقيقة صمت .. فرضها جيّت النادل
يشيل الشاي
ويقول ان العصير اللي يبونه لحظتين وجاي
شفّ الشاعر
هاذيك الحلوه تضحك له
أي واحد ..؟
شفه واقف .. يوقع دفتر لطفله
تخيّل ياخي يقولوا
بإنه يشتري شعره من الشاعر
اللي الشاعر المشهور يكتب له
يا حظه .. وسيم ومشهور
ياليتني أكون مثله
قوم نتصور معه
نقوم نتصور معه ؟
ما باقي سوى هذي
نكبّر راس هالمغرور
خفيّف انت .. وغبي أحمد
ودايم فيك هالعلة
أقول عدنان .. ترى صاير طويل لسان
أحمد ياخي لا تزعل .. ترانا اخوان
تعوّذ بس من الشيطان
وانا آسف .. وترى الدعوة سوالف
فخمه حيل هالكيسان
اشرب .. لا تزوّدها
ترى يبيّن عليك تعبان
شف مو هذي صاحبتك ؟
هلا والله .. إلا والله صاحبتي
تدري ..؟ تموت هي فيني
يا رجال .. خليني
خادعتك .. تراها والله خادعتك
أقول أحمد : عشان انسرقت فلوسك من زبيدة
صرت تشوف كل وحدة .. هي زبيدة
يا عدنان .. خادعتك
أنا قصدي لمصلحتك
شفها تكلم الرجال
أي رجال ! .. اخوها ذاك
يا عدنان .. خادعتك
أقولك ماتبي غيري
يا عدنان .. طع شوري
مشاعرها .. وهم .. كذبة
أحمد .. احترم نفسك
أفا عدنان .. تمد يدك علي
وهذي السبّه
صفعه دوّت بركنٍ
قريبٍ من هل الصفوة
عراك في بهو فندق
جمع أجناس مختلفة
مافيهم أحد وافق أحد ثاني
على تعريف للمنطق
خارج صالة الفندق .. شرطيّين
يقودوا بالحديد اثنين
ملامحهم تودي .. يم شرق أوسط
وهيئتهم .. بسيطة أو بعد أبسط
كانوا أصحاب
في داخل بهو فندق .. بلد غربي
في فصل الصيف

[زمان]

(دخون)



هو فيه مثلك .. ياللي الحسن ظلك
ليه العطر .. وانتي أنفاسك دخون
وليه الكحل .. وانتي ما غيرك عيون
وليه تفكيرك يكون .. انك تكوني دايم أجمل
انتي أجمل من جمالك .. من دلالك .. من خيالك
ياللي كل أفراح قلبي والحزن
في المسافة بين فرقاك ووصالك
وليه يا القلب الحنون تاخذك فيني الظنون
ضيعت عقلك .. هو في مثلك .. انت ما غيرك عيون
وأنا أحبك .. وإنتي أنفاسك دخون

* * *

ياللي أحبك .. ليه احبك
أو ليه ما أحبك وانتي علمتيني ان الحب كله أسئلة ما تنتهي
وليه أحبك وانتي علمتيني ان الحب لا غدا لمثلك أبد ما ينتهي
ياللي علمتك تكوني في ضعف ضعفك أقوى مني
يا انتي ضحكاتك تغني .. وابتساماتك شعر
يا انتي ضحكتك تغني .. وكل ما شفتك أصر
انك أجمل من جمالك .. من خيالك .. من دلالك
وليه يا القلب الحنون تاخذك فيني الظنون
ضيعت عقلك .. هو في مثلك .. انت ما غيرك عيون
وأنا أحبك .. وإنتي أنفاسك دخون

* * *

على حبك أنا باقفل أبوابي
وبطيوفك أنا بأسقي أهدابي
يا انتي يا انتي أحبابي
صدقي .. صدقي .. صدقي
قلبي لك وحدك .. صدقي
ماقوى على بعدك دقائق .. بس دقائق
يا ظلي .. يا داري يا أجمل أفكاري
تظلميني لو تقولي اني عاشق .. بس عاشق
ياللي وحدك تسمعي صمتي وكلامي
ياللي ضيك أتعب همومي وظلامي
صدقي اللي في قلبي لكي اكبر افكار من القصائد والحكي
تصدقي انك أجمل في عيوني من جمالك من خيالك من دلالك
لا يالقلب الحنون .. لا تاخذك فيني الظنون
ضيعت عقلك .. هو في مثلك .. انت ما غيرك عيون
وأنا أحبك .. وإنتي أنفاسك دخون

[زمان]

شبيه الريح
وش باقي من الآلام
والتجريح
وش باقي من الأحلام
وش باقي من الأوهام
غير إني .. ألاقي في هجيرك فيّ
ألاقي في ظلامك ضيّ
وأوقد شمعتي في الريح
شبيه الريح
إذا تسمح بغيب شوي
أبجمع همي الباقي
وادفن صبري الذابل في أوراقي
و برجع لك اذا باقي بنفسك شي

شبية الريح
أنا مقدر أكدر صفوك العاصف
شبية الريح
أنا من لي سوى إحساسك الجارف
بقايا زيف أشواقي
سما أمطار أحداقي
شبيه الريح وش باقي
أبي أعرف
متى تسكن رياحك
وابي أعرف
غرورك هو متى يطلق سراحك
وأبي أعرف
متى تعصف
متى تعطف
متى تنزف جراحك
وأبي أعرف
إذا باقي في بحرك موج أكسر فيه مجدافي
وأبي أعرف
إذا باقي في همك هم ماشالته أكتافي
وأبي أعرف
إذا باقي في هالدنيا حزن مامرني واستوطن أطرافي
وأبي أعرف
إذا باقي من المعجز في هالدنيا
سوى العنقاء
والا الغول
والا خلك الوافي
بقايا زيف أشواقي
سما أمطار أحداقي
شبيه الريح وش باقي ؟!

سنيني يم
وقلبي المركب المتعب وإنت الريح
مجاديفي عذاب وهم
وزادي الوجد والتبريح
وصبري صبر بحّارة
بغوا في اليم محّارة
غشاهم موج كان من الغضب أغضب
وكانوا للهلاك أقرب
لولا كثّروا التسبيح
شبيه الريح
حبيبي الأصدق الأكذب
عجزت أوصل شواطي طبعك الأعذب
تعبت أنطر في وسط العاصفة
قلب وشعور وعاطفة
تعبت أجمع ألم كل الموادع
في المواني وأحضن أطيافك
تعبت السهد في ليل الشوارع
والثواني تنطر انصافك
تعبت الظلم واجحافك
شبيه الريح
أنا ودي أكدر صفوك العاصف
شبيه الريح
أنا كني نسيت إحساسك الجارف
بقايا زيف أشواقي
سما أمطار أحداقي
شبيه الريح
كيف أسألك : وش باقي ؟
وأنا الباقي من إحساسي
ذرته الريح

[زمان]

سألتها ..

ليه البحر ساكن عيونك ؟!
جاوبتني .. للغرق
سألتها ..
ليه السواد اللي في عيونك ؟!
جاوبتني .. للأرق
سألتها ..
ليه الخدود ؟
قالت .. عبق
سألتها ..
هي رقتك مثل النسايم والورود ؟!
قالتلي .. لا .. يمكن أرق
سألتها ..
عن حسنها كنّه يقول : ما للشعر فيني حدود؟!
قالت .. صدق
سألتها ..
يا اغلى الأنام .. وش هو الغرام ؟!
قالتلي .. انك ماتنام .. وأوهام .. وتنتظر شمس اللقا
وماتجي شمس اللقا
مشوار مايعرف وصول .. ولحظة بها كل الفصول
وقلب واحد يحترق .. وبعض الصدق
وقتٍ عصيب يتبعه وقتٍ عصيب
وليل يتعدى الصباح ..
وجراح تدمى لو تطيب
وفي الأخير ..
خل عن خل افترق
في الأخير .. كل النهايات الفراق
مافي فرص ..
مافي نهايات بلقا .. إلا بخيالات القصص
سألتها ..
كيف الوفا ؟!
قالت ... كفى ..
النور من ضيي اختفى
والليل في عيوني غفى
اترك كثير الأسئلة ..
واسأل عن عيوني وكفى
اسألني .. ليه البحر ساكن عيونك ..
ليه السواد اللي في عيونك
سألتها ..
جاوبتني .. للغرق .. للأرق
سألتها عن حسنها كنه يقول : ما للألم فيني حدود ؟!
قالت .. صدق

[العنود]

مشكوووور اخوي (زمان)


يعطيك ربي الف الف الف صحه وعافيه


بانتظار جديدك


مع اعذب تحياتي اختك العنود