عيسى: يمه ... يمه .... ميييثة سيري ويبي ماي
ميثة : ان شاء الله ... وسارت تربع للمطبخ ويابت الماي وشربت ام خلف ... نشت ام خلف وقالت: عيسى ودني المستشفى الحين
عيسى: يمه انتي تعبان الحين ... ارتاحي اشوي
ام خلف: قلتلك الحين تفهم
عيسى: ان شاء الله ... ميثة سيري ييبي عبات امي وعباتج
ميثة: اوكي ..
عيسى: خليفة انت تم هني مع عمك محمد
خليفة: انزين
وساروا كلهم المستشفى عند خلف ... دشت ام خلف الحجرة عند ولدها وجافت بوخلف يالس وياه في الحجرة ... قربت من ولدها ومسحت على راسه وكانت الدموع اطيح من عينها على يبهته
خلف: يمه ؟؟
ام خلف: الحمد لله على سلامتك
خلف: الله يسلمج
ام خلف: شحالك الحين ؟؟
خلف: بخير
وتمت ام خلف تصيح وما قدرت تسكت ...
بوخلف: بسج عاد خلاص ...
ام خلف : انا بسير الحين يا اولدي تامرني بشي؟؟
خلف: سلامتج يمه
وطلعت ام خلف وهي تصيح
عيسى: ميثة سيري عند امي اشوي تمي وياها
ميثة: ما يحتاي انك تقولي يا عيسى
عيسى: الله يخليج
ودش عيسى عند اخوه وتم يطالع فيه وكان يحاول انه يمسك دموعه بس ما قدر سار عند اخوه وحضناه وتم يصيح
خلف: عيسى... ابعد عني ... واستح ع ويهك انت ريال
عيسى: انت لين متى بتم جذي
خلف: تباني اكون شراتك ... اصيح ... هالإلي قاصر
عيسى: انا ما اقصد الصياح ... اقصد خليفة
خلف: ما ابي اسمع اسمه ... انتهت السالفة
عيسى: لا ما انتهت
خلف: انا ما عندي غير عبد الله
عيسى: ما عندك غير عبد الله ؟؟ ... وينه ؟؟ ما ياك ولا تطمن عليك .. ولا حرمتك .. وينهم؟؟ اما خليفة اول ما سمع بالخبر تم يصيح إلا يبا ايي ويجوفك
خلف: الحين بيون
عيسى: بنجوف
وطلع عيسى من عنده و رد هو وحرمته وامه البيت
في المستشفى .. كان بوخلف راقد وخلف كان يتأمل في ابوه ... ويوقل في خاطره: ابوي ليش يسوي جذي ؟؟ ليش يتعب عمره ؟؟ الحين اذا عبد الله مرض انا بسوي شراته ؟؟ انا ما تحملت ابتسامت خليفة ... لا انا غير عن ابوي وما بكون شراته انا نسخه عن عمي عبد الله .. عمي عبد الله صاحب الشخصية القوية بكون شراته وما بغير طبعي .. شو يعني اذا تشللت ... عادي بكمل حياتي وبكون اصلب واقوى
بعد اسبوع طلع خلف من المستشفى ورد بيته كان كل ما يطلب شي من حرمته ترد عليه بتأفف .. ملت منه تحملته شهرين كاملين وعقبهم خلاص ما رامت تستحمل اكثر
واذا زقرها ما ترد عليه و اتم تتهاوش وياه وفي يوم ..
ام خليفة: خلف اسمعني ...
خلف: قولي شعندج
ام خليفة: تراني والله مليت منك ... لاعت جبدي ... انا مب شغاله عندك
خلف: والمعنى ؟؟
ام خليفة: انا ما اقدر استحمل ... طلقني
خلف: شوو ؟؟
ام خليفة: إلي سمعته ... انا ما اقدر اعيش مع شخص معاق
خلف: بطلقج ... بس لا تحلمين انج تجوفين عبد الله ومهره مرة ثانية
ام خليفة: الحمد لله يات منك ... انا اصلا ما كنت اعرف شقايل افتك منهم
خلف: انتي طالق .. طالق طالق ... سيري بيت اهلج
ام خليفة: والله هذي الساعة المباركة فكيتني وريحتني
خلف: طلعي بسرعة
وطلعت ام خليفة من بيت وكانت مستانسه ... وبعد ما انتهت عدتها تزوجت واحد ثاني
خلف ... صار انسان بائس ... لكنه ما فقد قوته وتسلطته ... كان يغرس صفاته في ولده عبد الله ... سوى عبد الله نسخة طبق الاصل عنه ... في الصفات والحركات ... وصار اخس عن ابوه في قساوة القلب ..
مرت السنوات والسنوات والسنوات .... وكبروا العيال ... وعيسى صار عنده بنتين و ولدين
كبروا خليفة وعبد الله ومهره ... وكل العيال ... وتزوجت مهره وسارت بيت ريلها وتم خلف بروحه في البيت مع ولده عبد الله ... فقد خلف الحنان إلي كان يلاقيه من بنته ... وتفاجأ من تصرف ولده إلي انقلب من انسان لوحش عديم الاحساس قساي القلب ... متسلط ما يضحك ولا يبتسم ولا شي ... ما يعطف على احد حتى ابوه ...
في بيت بوخلف....
ام خلف: هلا هلا والله بحفيدي الغالي
خليفة: هلا يدتي شحالج ؟
ام خلف: الحمد لله ... وانت شحالك؟
خليفة: بخير دامج بخير ..
ام خلف: الله يخليك ... اقول خليفة
خليفة: هلا يدتي
ام خلف: متى ناوي تعرس ؟؟
خليفة: مممم ... ما ادري
ام خلف: شو ما تدري ؟؟
خليفة: ما ادري ... ما ابي اصلا
ام خلف: مب ع كيفك ...
خليفة: ههههه ... ليش ؟؟
ام خلف: بس .. لازم تعرس ... مب تسوي لي شرات عمك
خليفة: هههههههه ... حرام عليج يدتي لا تدفنين زهرة شبابي
ام خلف: سبحان الله نفس الكلام إلي كنت اسمعه من عيسى اسمعه منك
خليفة: هههههه ... طبعا مب هو عمي
ام خلف: هيه عمك بس مب يعني تقدله في كل شي
خليفة: لا يدتي حرام عليج ما ابي اعرس الحين
ام خلف: حرام في الدرام ... بتعرس غصبا عنك
خليفة: يدتي ... لا تقولين جذي
ام خلف: اسكت ولا كلمة
خليفة: انزين ... منو العروس ... اعرفج مزهبه كل شي
ام خلف: هيه صح العروس هي بنت عمك عيسى
خليفة: والله ؟؟ ... انا موافق
ام خلف: مالت عليك وعلى ويهك ... جان قلت لي من زمان
خليفة: شسوي انا شاب خجول
ام خلف: واضح .. الخجل يقطر منك ..
خليفة: ههههههههه ... متى بتخطبونها لي ؟؟
ام خلف: مسرع ... توك ما تبا الحين غيرت رايك
خليفة: هههههه ... بس عاد يدتي انا استحي
يدش عيسى ويقول: منو هذا إلي يستحي ؟؟
ام خلف: يت في وقتك ...
عيسى: انا دومي ايي في الوقت المناسب ... خير شو السالفة؟؟
ام خلف: قررنا اننا نخطب حق خليفة
عيسى: والله ؟؟ بالمبارك ... ومنو العروس ؟؟
ام خلف: بنقولك بس نخاف انك ترفض
عيسى: وليش ارفض انا شو يخصني ؟؟
ام خلف: لأنها بنتك
عيسى: شووو ؟؟ ... والله ؟؟ ... انا موافق اصلا ما بلاقي احسن عن خليفة
ام خلف: بارك الله فيك
عيسى: بالمبارك يالمعرس ... وحضن خليفة
خليفة والبسمه شاقه حلجه : الله يبارك فيك يا عمي
عيسى: انا موافق والحين لازم ناخذ راي العروس
خليفة: هيه لازم
عيسى: انا بسير وبسألها هي وامها وبنرد لك خبر ..
خليفة: بترياك هني
عيسى: ليش مستعل ؟؟
خليفة: ههههههه ... خلاص خذ راحتك
ورد عيسى البيت وقال لحرمته
عيسى: ميثة انا عندي خبر لج
ميثة: شو هو ؟؟
عيسى: اليوم يوم سرت بيت ابوي ... امي قالت لي انها تبا تخطب بنتي العنود لخليفة
ميثة: والله هذي الساعة المباركة
عيسى: لازم تكون الساعة لامباركة تراه ولد اخوي الغالي
ميثة: ههههههههه .. لازم نعرف شو هو راي البنية
عيسى: هيه اكيد
سارت ميثة وسألت بنتها ... و وافقت العنود ... وبعد شهرين عرسوا وسافروا ...
في بيت خلف...
عبد الله : يبه ابي اقولك شي
خلف: خير ؟؟
عبد الله : انا ما اعرف كيف أبدأ
خلف: ابدأ من اي مكان
عبد الله: يبه بصراحة انا مليت منك ... لين متى بتم اعتني واهتم فيك ... خلاص يعني انا صبرت عليك واايد وللصبر حدود
تنهد خلف وتم ساكت وبعدين قال: والمعنى ؟؟
عبد الله : انا بوديك دار العجزة ... هناك بيهتمون فيك اكثر عني
خلف: هذي نهايتي ؟؟
عبد الله : للأسف
خلف: خلاص سوي إلي يريحك
عبد الله : عيل بخلي الصبي يزهب اغراضك واليوم بوديك
سكت خلف وزقر الصبي وخلاه يدز الكرسي ماله ويوديه الحجرة وبعدين قاله: حط اغراضي داخل شنطتي
راجو: ليس ؟؟ ... انت وين بيسير ؟؟
خلف: بسير مكان بعيد ..
راجو: لا بابا .. انا في يروح معاك
خلف: لا انا بسير بروحي .. قال خلف في نفسه : الصبي حن علي و ولدي مل مني ... هذا جزائي انا استاهل كل شي
اخذ عبد الله ابوه ووداه دار العجزة وتركاه هناك وطلع ... وبعدها ما جافه خلف ابدا ما جاف ولده مرة ثانية
رد خليفة من السفر وفي يوم سار عند عمه وقاله
خليفى: عمي بسألك
عيسى: اسأل
خليفة: شحاله ابوي ؟؟ ... تعرف انه ما حضر عرسي ولا شي
عيسى: والله ما اعرف ... عقب الحادث إلي استوى له وهو ما يبا يقابل اي واحد وانت تعرف هالشي
خليفة: هيه ... انا بسير الحين بيتنا الجديم وبجوف عبد الله
عيسى: هيه صح انا نسيته
خليفة: هههه ... بسير وبسأله
وسار خليفة عند اخوه ... وطبعا عبد الله ما عرف خليفة ... تم خليفة ساعة كاملة يحاول انه يذكره لين ما تذكر
خليفة: عبد الله وينه ابوي ؟؟
عبد الله : اي اب ؟؟
خليفة: عبد الله ... .ابوي ... وينه ؟
عبد الله : هيه ذاك الشايب المشلول ؟؟
خليفة: عبد الله احترم الفاظك
عبد الله : خلاص ... قطيته في دار العجزة سير هناك وبتلاقيه
خليفة: شووو ؟؟ ... متى ؟؟
عبد الله : من زمااااااان
خليفة: ليش ؟؟
عبد الله : طفرني ... وبعدين انا ابي اعرس وحرمتي ما بترضى به
خليفة: مالت عليك وعليها ... انا بسير الحين
عبد الله : لا ترد مرة ثانية
خليفة: ومنو قالك إني برد
وطلع خليفة بسرعة سار يدور على ابوه في كل دور العجزة لين ما لقاه
كان خلف يالس بروحه حزين والدمعة ما تفارق خده ... كل الدكاتره إلي هناك احتاروا وما عرفوا شو السبب سار خليفة ودق باب الحجرة ودش
جاف ابوه يالس ع الكرسي كان منزل راسه وحزييييين ومتضايج
خليفة: يبه ..
لف خلف بسرعه ... ما كان مصدق إلي يسمعه
خليفة: يبه ... انا خليفة
خلف: ولدي ... وتم يصيح
خليفة: يبه ... لا تصيح ما احب اجوفك جذي
خلف: خلوف ... تعال عندي ... تعال ابي احضنك .. كنت خايف اني اموت قبل لا احضنك واستسمح منك
خليفة: يبه لا تقول جذي .. أنا إلي لازم اعتذر لأني تأخرت
خلف: انت اولدي ... وانا غلطت في حقك واايد
خليفة: انت ابوي ... انا راضي
خلف يحضن ولده بقوووو .... ويقول: انا اعتذر مرة ثانية
خليفة: يبه لا تقول جذي
خلف: بسألك شحاله عبد الله ؟؟
خليفة: عرس
خلف: خذ بنت منو ؟؟
خليفة: بنت خالته
خلف: عيل ... هالله هالله بعياله ... اعتني فيهم مثل ما اعتنى عمك فيك
خليفة: ان شاء الله يبه ... يالله يبه ... بوديك وياي البيت
خلف: لا ما بي بتم هني
خليفة: يبه ارجوك محد بيتضايج منك ... بتكون في بيتك ... كلنا ساكنين في بيت يدي وهو بيتك
خلف: ما عليه ... انت شخبارك ...
خليفة: يب ه لا تغير السالفة بتيي وياي وبتعيش ويانا ...
خلف: ان شاء الله ...
خليفة: يبه عندي امنية ثانية ... من زمان وانا اتمناها
خلف: شو هي ؟؟
خليفة: يبه ... ابتسم لو سمحت ..
ضحك خلف ... وبعدين ابتسم ... وحضن ولده
THE END
يمكن البعض يتسآل شو صار في ام خليفة ... ام خليفة تزوجت مرة ثانية ويابت بنتين والبيتين فيهم اعاقه ... وهذا جزائها لأنها كانت تعاير خلف
رد مع اقتباس
المفضلات