الجزء السابع . .
=============
مرت الايام والاشهر والسنوات وصار عمر خليفة 10 سنوات وما في شي تغير ... كل شي بعده على نفس الحال ... خليفة في بيت يده وخلف ما يدري عن ولده وعيسى بعده ما عرس وبعدها ام خلف تحن على راسه ليل ونهار وفي يوم ...
خليفة: يدتي ..
ام خلف: عيوني ... خير ؟؟
خليفة: ما بتسافرون هالسنة ؟؟
ام خلف: والله ما ادري اسأل يدك هو إلي يعرف ..
خليفة: هييه خلاص بسأله
ام خلف: انت خاطرك تسير مكان معين؟؟
خليفة: الصراحة هيه
ام خلف: وين ؟؟
خليفة: ابي اسير مكة ..
ام خلف: والله ؟؟ ... زين يا اولدي ...
خليفة: خاطري اجوف الكعبة صج مب في التلفزيون ..
ام خلف: ان شاء الله بقول ليدك ..
خليفة: وبعد ...
ام خلف: شووو ؟؟
خليفة: ابي ادعي لأبوي ... عسى الله يرقق قلبه ويحننه علي ..
ام خلف: حبيبي ... بعد عمري خلوف ولا يهمك ما يصير فالك إلا طيب ..
خليفة: الله يخليج يا يدتي ... ويقوم ويحب راس يدته
ام خلف: ويخليك لي يا
يدخل عيسى ويقول: يا عيسى الله يخليك يا عيسى صح يمه ؟؟
ام خلف: بسم الله الرحمن الرحيم ... انت من وين طلعت ؟؟
عيسى: هههههه ... توني داش
ام خلف: الناس يسلمون .. مب على طول يدشون في السالفة
عيسى: السلاااااااااااااااااام عليكم ... الله يخليني انا صح؟؟... عن شو كنتوا ترمسون؟؟
ام خلف: ما تسأل عن احوالنا واخبارنا ؟؟
عيسى: صح نسيت .... شحالكم وشخباركم وشعلومكم ؟؟ ... صح يمه الله يخليني انا عن شو كنتوا ترمسون؟؟
ام خلف: انت طالع على منو ؟؟
عيسى: عليج ... ههههههه ... احم ... ما ادري .. شو السالفة ؟؟ قوليلي ؟؟
ام خلف: خليفة خاطره يسير العمرة
عيسى: والله ؟؟ وانا بعد
ام خلف: وانا بعد والله .. خاطري اسير هناك وادعي حق واحد من عيالي
عيسى: منو ؟؟؟؟
ام خلف: انت ... ومنو غيرك ؟؟
عيسى: والله ؟؟ شو بتدعين لي ؟؟
ام خلف: بدعي اني افتك من ويهك ... وانك تعرس وارتاح
عيسى: يمه انتي ما تدعين لي انتي تدعين علي
ام خلف: حرام عليك ... عمرك 24 سنة وبعدك مب معرس ... اخوك الاصغر عنك خطبنا له وانت بعدك
عيسى: خلاص يا يمه خلاص ... ما يصير خاطرج إلا طيب إلي تبينه سويه خطبي إلي تبينها .. انتي فصلي وانا بلبس
ام خلف: والله ؟؟ والله ؟؟ ما اصدق ... عيسووه ... انت تعبان ولا شي ؟؟
عيسى: لا ما فيني شي
ام خلف: غريبة وافقت ..
عيسى: ليش؟؟ ... بس عادي جان تبين بغير رايي
ام خلف: لااااااا ... انا ما صدقت متى وافقت
عيسى: ههههههه
ام خلف: انا بسير الحين ..
عيسى: وين ؟؟ ما يلست وياج ..
ام خلف: بسير برمس ام محمد ... وبخطب لك بنتها
عيسى: ما شاء الله مزهبه كل شي
ام خلف: هيه إذا تركت لك كل شي ما بتعرس ابد
عيسى: هههههه ...
خليفة: مبروووووك يا عمي ... منك المال منها العيال
عيسى: خلوف .. بس عاد
خليفة: ليش؟؟ زعلت ؟؟
عيسى: لا ... انا استحي ..
ام خلف: مالت عليك ... انت تستحي ؟؟ جان زيين
عيسى: وليش ما استحي ؟؟ .... اغلب البشر يستحون ... ولا انا مب من البشر
خليفة: ههههههههههههههههههههه
ام خلف: لا من البشر ... بس ما احيد انك استحيت
عيسى: لا خلاص قمنا نستحي
ام خلف: انا بسير الحين احسن لي .. ما فيني اتم وياك وبعدين تغير رايك ... انا ما صدقت متى انت وافقت
عيسى: موافق بس بشرط
ام خلف: شرط ؟؟ ... شو هو ؟؟
عيسى: ما ترمسينهم إلا بعد ما نرد من العمره ..
ام خلف: خلاص عيل المهم عندي انك وافقت على سالفة العرس
عيسى: خلاص ...
اشوي ودش بوخلف ....
بوخلف: اشوفكم مستانسين شو السالفة؟؟
ام خلف: ولدك ... اخييرا وافق
بوخلف: وافق؟؟ على شوو ؟؟
ام خلف: انه يعرس
بوخلف: والله ؟؟ .... عيسوووه انت مسخن اليوم ؟؟
عيسى: ههههه ... لا ما فيني شي
بوخلف: صج والله وافقت ... اخيرا بجوف عيالك
عيسى: ان شاء الله
بوخلف: ان شاء الله ... ان شاء الله
ام خلف: وفي شي ثاني بعد ..
بوخلف: شو هو ؟؟
ام خلف: خليفة خاطره يسير العمره ... يعني شرايك كلنا نسير هالسنة ؟؟
بوخلف: انا كنت حاط في بالي هالشي ... كنت ياي اقولكم شرايكم نسير ... بس ازين والله دامه هذا هو راينا كلنا متى ما تبيون ترى نحن حاضرين
ام خلف: خلاص عيل نسير الاسبوع الياي
بوخلف: ما عليه بنتوكل على الله ..
خليفة: مشكور يدي ... مشكورة يدتي ... ( ويقوم ويحب راس يده ويدته)
عيسى: وانا ؟؟
خليفى: شوو ؟؟
عيسى: ما تحب راسي ؟؟
خليفة: ليش؟؟
عيسى: حبيت راس امي وابوي ... وانا يعني حب راسي بعد مرة وحدة
خليفة: هههههه ... يالله ما عليه بحب راسك
عيسى: امزح وياك ... شو صدقت ؟؟
خليفة: هههههه ... اعرف انك تمزح ... قلت بكمل المزحة ..
عيسى: ههههههههههه ... حليلك يا خلوف
خليفة: هيه والله ... حليلي وفديتني ..
==========
الجزء الثامن ..
========
واخييرا يا اليوم إلي بيسافرون فيه ... يا اليوم إلي كان خليفة يترياه اخييرا بجوف الكعبة حقيقة مب صورة ... كان خاطره يسير هناك ويدعي لأبوه وامه
في ذاك اليوم الكل كان مشغول ومافي احد متفيج للثاني .. كل واحد يبي يخلص شغله ويبي يسير المطار وفي ذيج الربشة سار خليفة عند عمه عيسى وسأله
خليفة: عمي .. انت قلت لأبوي اننا مسافرين ؟؟
عيسى: هيه قلتله
خليفة: والله ؟؟ شو قالك؟؟
عيسى ( ابتسم) : خلوف ... لازم تعرف؟
خليفة: عمي قولي شو قالك ابوي
عيسى: حبيبي خلوف ... انت تحبني صح ؟
خليفة: هيه اكيد .. عمي
عيسى: خلوف انا بتم وياك دووم وما ببتعد عنك ..
خليفة: خلاص فهمت
عيسى: لا تزعل منه ..
خليفة: انا مب زعلان منه ولا بزعل هو ابوي ... وما اقدر ازعل منه
عيسى: لا تحط في بالك انت الحين بمكانة ولدي .. إلي بيي
خليفة: بل عليك .. لهدرجة مستعيل .. احيدك ما تبا تعرس والحين تبا يكون عندك ولد
عيسى: هههههههه ... اجوف لسانك طال
خليفة: ههههههه شسوي
عيسى: خلاص سير ولم اغراضك
خليفة: ان شاااء الله
كانوا كلهم محتشرين و كانوا بعد متأخرين ... ساروا المطار وركبوا الطيارة وبعد ساعتين وصلوا مطار جدة ... خليفة كان طاير من الفرحة لأن امنيته بتتحقق ... وصلوا الحرم واعتمروا وخلصوا وكل شي وخليفة في كل يوم كان يدعي لأبوه عسى الله يحنن قلبه ويرققه... يلسوا هناك مدة اسبوعين وام خلف كانت تتريا اليوم إلي بيردون فيه بس عشان تخطب حق ولدها وتفتك منه ...
بعد اسبوعين ردوا الامارات وعلى طول ثاني يوم دقت ام خلف حق ام محمد وقالت لها عن سالفة الخطبه ... كانت ام خلف يالسه في الصالة واشوي دش عيسى
عيسى: السلاااااااااااام عليكم ( وحب راس امه)
ام خلف: وعليكم السلام ... هلا والله بالمعرس
عيسى: شحالج يمه؟؟
ام خلف: بخير يا المعرس
عيسى: خير شو السالفة ... كل اشوي تقولين لي يالمعرس
ام خلف: لأنك معرس
عيسى: كيف يعني ؟؟
ام خلف: انا رمست ام البنية وهم وافقوا ... وبنسير باجر وبنخطب لك رسمي
عيسى: ماشاء الله عليج يمه ... مسرع
ام خلف: هيه ما بترياك ولا شي
عيسى: يمه ... انا مب مصدق ... لا ما اقدر
ام خلف: شو ؟؟ انك بعد فتره بتعرس وان شا ءالله بتكون اب
عيسى: لا
ام خلف: عيل؟
عيسى: انج ما تحبيني وتبين الفكه مني
ام خلف: اقول... قم من جدامي احسن لك ... هذي يزاتي اني ادور لك احسن البنات
عيسى: امزح وياج يمه ... يا مسرع ما تصدقين
ام خلف: ههههه ... ما عليك اخيرا بستانس وبفرح فيك
عيسى: الله يديم الوناسة والفرح يايمه
ام خلف: ان شاء الله
ثاني يوم ... سارت ام خلف وبوخلف وعيسى عشان يخطبون حق ولدهم ... والحمد لله وافقوا اهل العروس واتفقوا على يوم الملجة ويوم العرس وكل شي
عيسى: يبه ...
بو خلف: خير يا المعرس ؟؟
عيسى: ههههه ... يبه انا اشوف انه الافضل اننا نعزم خلف صح ؟
بو خلف: هيه والله صح
عيسى: تهقى انه بيوافق ؟
بوخلف: ما ادري والله .. بس ان شاء الله يوافق
عيسى: انا بسير اليوم وبكلمه وبعزمه بس يبه
بوخلف: خير
عيسى: لا تقول لخليفة ... عقب ما نعرف شو هو رده بنقوله
بوخلف: ان شاء الله
طلع عيسى وسار بيت خلف عشان يرمسه ويعزمه ع العرس