بنات ثانوية..مع رشة ملح وبهار

[مصفوعة بطابوقة]

السلام عليكم
اولا..مرحبا بكم في اول رواية لنا
تعريف بسيط عنا
احنا ثلاث شابات نكتب في هالرواية
كل يوم خميس نجتمع مع استكانات شاي في يادنا ونكتب لكم بارت

تفضلوا البارت الاول

المنبه يرن الساعة خمسة الفجر..هدى تقوم من السرير بكل ملل..تروح الحمام و تبدأ برنامجها اليومي..تفرش اسنانها و تغسل وجها بغسول..تخلص تلبس المريول و ترفع خصلها..طبعا شعرها كان مستشور من البارحة..تمسك اللمعة الحمراء وترسم شفايفها بكل خفة..وتمسك الكحلة وترسم عيونها الواسعة..تجمع كتبها و دفاترها..وتحطهم داخل الشنطة..تحمل البي بي في يدها..وتنزل عصوت الهرن..وهي طالعة تنادي عالشغالة..

"ماري..ماري..ماري يالعلة..وينك..؟!"

تجي الشغالة المسكينة وهي حاملة البيض..وبدون ما تعطيها فرصة ترد

"انا اليوم ما بتغدا هنا..اذا مدام سألت قولي لها في بيت سارة"

تركب السيارة و الشيلة تكشف اكثر مما تغطي..وتروح المدرسة..تنزل من البوابة الرئيسية و تدور عــسارة و جميلة و باقي الشلة..شافت سارة و دخلوا مع بعض..دخلوا الحمام يعدلوا الشعر و يزبطوا الميك اب..وهم مشغولات بالسوالف تجي بنت و تضم هدى من ورى..هدى..تلف لها و تشوف رزان..الكل يسميها رمزي..

هدى :" خرعتيني..!"

رزان: "اسم الله عليكِ قلبي..وحشتيني..!"

هدى بابتسامة دلع:"من جد..وانتي اكثر..!"

سارة:"ما كأنكم البارحة للساعة ثلاث تكلموا بعض..!"

رزان:"شو سارة..غيرانة..؟"

هدى..تطالع فيهم ثنتينهم و بكل دلع تمشي..وهم طوالي وراها..!

يدخلوا الحصة الاولى..كلهم جالسين ورى..هدى جنب سارة..و جميلة قدامهم و جنبها نورة..رزان ما كانت معاهم بالفصل..المفروض انها في ثالث لكن رسبت سنة..فظلت في ثاني في فصل ثاني لانها ادبي..

دخلت الابلة..وبدأت تفتش عالواجب..وقفت البنات الي ما حلوا..نورة كانت اول وحدة..

الابلة:"ها يا نورة..ما حليتيه..؟!"

نورة:"لا..يعني بالذمة ليه بوقف لو كنت حالته..؟!

الابلة:"صدق ان لسانك اطول منك"

نورة:"على الاقل اضعف منك"

قاموا البنات ضحك و استهبال..الابلة عصبت..وتطالع نورة بنظرات..كالعادة..

الابلة:"نورة..برى..!!!"

نورة قامت من مكانها و الابتسامة شاقة الوجه..و تناقز لين طلعت من الفصل..سارة و هدى يناظرون بعض وهم يضحكوا..جميلة جالسة تبتسم بهدوء لان الابلة جنبها..

نورة..بنوتة قصيرة سمراوية..شعرها قصير و ناعم لكن اندومي ولونه بني غامق..هبلة لاخر حد..!

طلعت برى تفرفر في المدرسة..والابلة بعد التهزئ المحترم الي اكلته من نورة بدت في الدرس من دون لا واجب ولا مراجعة..جميلة تسمع بانتباه..سارة تفكر في الطلعة الي بيطلعوها الظهر..وهدى..جالسة في عالم ثاني..سارة بعد ما جاعت وهي تفكر أي مطعم بيروحوا..داست على رجل هدى..هدى نقزت من مكانها..الكل قام يناظر فيها..

الابلة :"هدى..خير في شي..؟!"

هدى:"خير بويهش..لا مافي!"

سارة تقاطعهم:"ابلة عادي اروح الحمام..؟!"

الابلة:"لا سارة..هدى جلسي"

سارة"يا ابلة..بعملها في ملابسي..!"

هدى بعد ما فهمت قصد سارة.."ابلة انا تعبانة..خلها تجي معاي توصلني بعدين تروح الحمام"

استسلمت لهم الابلة..وخلت سبيلهم..طلعوا..والتمثيل مية مية..اول ما طلعوا من الباب..ركيض في الممرات..

سارة"وين نورة..الله ياخذ ابليسها"

هدى:"مدري عنها"

طلعوا الساحة وهناك شافوا الهبلة..تاكل شبس الله اعلم من وين بايقته..وقاموا يلعبوا طوال النهار..ولا حضروا ولا حصة..طبعا من مسكتهم ابلة..وشافت هدى معاهم..ابتسمت وتركتهم..لانها تعرف ان ابو هدى يجزل في العطاء..

خلص الدوام..اجتمعت الشلة عند الباب..ركبوا سيارة هدى..عدا جميلة..اليوم اخوها جاي ياخدها..

وقفوا برى ينتظروا اخو جميلة..و نورة فاتحة العيون كشاف عن العريس المستقبلي..وطبيعي هي اول وحدة بتشوف السيارة..

وصل محمد..ونزل من السيارة يفتح لاخته الباب..يسوي نفسه اخلاق قدام البنات..

نورة من كثر الحب الي ينقط..شوي و تركب معاهم..طبعا مستحيل انه ما حس لها..لان النظارة صحيح شمسية لكن شفافة شوي..و كل ما جاها تطيح شوي..

مشت جميلة..وركبوا البنات سيارة هدى..ونورة سحبوها سحاب لانها لسا تتخيل الامير واقف هناك..و الوجه احمر كمان..

راحوا مجمع الظهران و انواع الهبل والعباطة..لا حسيب ولا رقيب..اول مادخلوا المجمع على طول رزان مسكت هدى من خصرها وقالت الى نورة وسارة يروحوا يطلبوا الغداء وهم على طول توجهوا الى الحمام.....عشان هدى تعدل حجابها..

هدى " :اوف الدنيا حر واحنا لازم نتحجب وش هالعيشة؟؟؟

رزان":لاتضايقي ياقلبي ...

هدى تفتح لفتها وتطلع نص شعرها طبعا شعرها ناعم مصبوغ وفيه خصل صفراء تناسب لون بشرتها البيضاء ....وتلمع شفايفها بملمع وردي روعة يناسبها بقوة....

هي تتعدل ورزان أنواع التصفير والغزل طبعا هذا اللي يرضي غرور هدى..

سارة و نورة جمعوا الطلبيات من الف مطعم..وثلاثة ارباع الطلبات لسارة..ومين الي بيدفع..هدى طبعا..المهم جلسوا عطاولة..ينتظروا ست الحسن والجمال و خويتها

جلسوا هدى و رزان معاهم و سارة رمت محفضة هدى عليها..رزان اوفكورس لازم تجلس جنب هدى..وحطت يدها على كتفها..سارة ابداً ما كان عاجبنها الوضع..سارة بنوتة دبدوبة شويتين..بس جميلة بيضاء و شعرها اسود شفايفها حمراء..تقولوا فلة والاقزام السبعة بس متنت شوي..حطت مزازة البيبسي في فمها..البيبسي الي يجي في كاس يعبوه اكبر حجم..تذكرت ان في طلبية نسوها..فقامت من مكانها و حملت معاها ببسيها..و وقفت قدام الكاونتر حق المحل..شافها الهندي واشر لها ا ن شوي و تخلص الطلبية..وهي واقفة جا لها واحد مملوح وشق الابتسامة.."ادفع عنك"

سارة وهي معصبة"نو..دفعت و خلصت"

الولد:"ليه معصبه..مو لايق عليك"

سارة"هو انت تعرفني عشان تعرف اذا كان لايق علي!"

الولد:"طب عرفيني عليكِ..انا خالد..وانتي؟!"

سارة:"انا الي بتخليك وتمشي..!"

الولد:"عطينا وجه يا حلوة"

سارة:"اشطح بعيد لا يجيك كف يشطحك"

رجعت للبنات وهو وراها..جلس عالطاولة الي جنبهم..وبينما هم جالسين جات ورقة طايرة عالطاولة..البنات عاد كلهم مدوا يدهم في نفس الوقت..بس طاحت الورقة في يد هدى..فتحتها و ابتسمت..ورمتها عسارة..رزان انقهرت من جد..لان هدى ما ورتها الورقة و عطتها سارة قبل ما يمديها تشوف..سارة اخذت الورقة ومن دون ما تفتحها حطتها جنبها و طالعت هدى وابتسامات تتوزع..خلصوا غداهم و اخذوا لهم كم لفة في المجمع ورجعوا بيتهم..هدى رجعت البيت..فتحت الباب شافت خالتها جالسة في الصالة مع امها..سلمت على خالتها و وامها..وركبت فوق تبدل ملابسها..خلصت وطلعت للصالة الي فوق..الصالة الي فوق تطل علي الي تحت وقفت تسمع..

ام هدى:"والله..مدري بكلم ابوها في الموضوع و بشوف..بس اوصيك ما اراح تكون الملكة السنة..!"

الخالة:"أي اكيد..احنا بس نبي نضمن ان بنتك بتكون لحسام"

ام هدى:"وعلي وعلي على حسام..توني ادري انه اكثر من حب طفولة..!"

هدى فتحت شعرها..ونزلت تحت وهي لابسة سكني احمر و بلوزة سوداء..راحت المطبخ و اخذت كاس ماي بارد وهي طالعة سمعت صوت جاي من المطبخ الخارجي..راحت و فتحت الباب..الا واحد واقف قدامها..كان يكلم فما انتبه لها..دار و هو جمد مكانه..هي واقفة مكانها..كل واحد يطالع الثاني بصدمة..نزل عيونه يطالع ملابسها الا هي تصرخ صرخة قويييية..انرعش هو و ارتبك..وجات امها و خالتها و شافوها وهي راكضة..طلعت غرفتها و سكرت الباب..وهي تنافخ..اما تحت انواع الضحك من امها وخالتها..اما الولد "حسام" مترتبك على فرحان..اهم شي كحل عينه بشوفة حبيبة القلب..وبدون عباية كمان..

هدى بعد ما هدت فتحت اللاب و فتحت المسن..رزان شابكة..و سارة شابكة..جميلة مشغول..و نورة شابكة..كانت بتسوي محادثة جماعية بس غيرت رايها..قررت انها تقول لسارة بس..

حبيبي راكب الددسن وانا ببرقعي جنبه (نك هدى):"هلا سارونة..!"

أنـــ ضايق ــــا و قلبــــ ضايق ـــي (نك سارة):"هلا والله.."

حبيبي راكب الددسن وانا ببرقعي جنبه:"تخيلي شصار..!"

أنـــ ضايق ــــا و قلبــــ ضايق ـــي:"شنو..؟!!"

حبيبي راكب الددسن وانا ببرقعي جنبه:"خلنا نطلع لازم اقول لك وجها لوجه"

لبست العباية و الشيلة و طلعت..وبدل ما تعبر عجهة الصالة راحت من جهة الشغالات..ركبت السيارة و مرت على سارة..ركبوا وراحوا كوفي وقالت هدى لسارة السالفة كاملة..رن جوال هدى..هدى طنشت..وطبعا سارة عرفت انها رزان..

وهم طالعين ركبوا السيارة..بس كان في واحد ساد عليهم الطريق..انتظروا خمس دقايق ما احد جا..طلعت هدى من السيارة بتشوف منو راعي السيارة..وبالصدفة كان جاي..

هدى:"انت راعي السيارة..؟!"

الشاب:"أي..ليه..؟!"

هدى:"بس سيارتك سادة الطريق!"

الشاب:"طيب ..سوري"

هدى استغربت من طريقته في الكلام..بالرغم من جماله و باين عليه ولد خير ما حاول يغازل ولا شي..والاهم انه ما همه جمالها..

ركبت السيارة وهم في السيارة كان الطريق زحمة..دق جوال سارة..رقم غريب..تبادلوا النظرات..ورفعت سارة وحطته عالسبيكر..

سارة:"الو.."

الطرف الثاني:"هلا والله..شلونكِ..؟!"

سارة:"منو معاي..؟!"

الطرف الثاني:"معقولة ما عرفتيني..انا خالد"

سارة:"خالد منو..؟!"

خالد:"الي قلت لك بدفع عنك..! شدعوه نسيتيني..اساسا رقمي عندك..!"

سارة تذكرته..سارة وهي معصبة:"من وين لك الرقم..؟!"

خالد:"انا عرفت ان اسمك سارة من كلامكم اليوم..لكن الرقم..اليوم وحدة دقت علي وعطتني اياه.."

سارة اتذكرت انها ما اخذت الرقم معاها..تركته عالطاولة..يعني في وحدة اخذت الرقم من الطاولة و عطته اياه..سارة:"طيب ما قالت لك من هي..؟!"

خالد:"لا ما قالت..!"

هدى اخذت التلفون من عند سارة..ولانه سبيكر فهي سامعة كل شي..سكرت التلفون و حطته سايلنت..!

والثنتين ظل بالهم مشغول..مين الي عطته الرقم..؟!

لا تفشلونا..نبي ردود حلوة تفتح النفس..!