في بيت حسن وحسين...
فهيمه جايه زياره لأمها .. بتتغدى وياهم .. من الصباح وهي وياهم حابسه فيصل في الغرفه معاهم مايتحرك ولا يلعب ولا يطلع للحوش...
فيصل كان ساكت ومستسلم طول الوقت.... فجأه ماسمعوه وهم يصلوا الا يرمي على امه وخالته وجدته كلام .. شوي التفت لبشرى اللي كانت منسدحه على بطنها جنب سجادة امها وهي تصلي.. قعد جنبها وشال التربه من على سجادة امها بيفلع راس بشرى فيها...
بشرى كانت واقفه قطعت صلاتها من الخلعه وخطفت التربه من ايد فيصل .. اللي مستمر في قول الكلام اللي مو زين ..
هو ماسكت من كلامه الا امه هاجمه عليه بعد ما خلصت صلاتها و طيحي فيه ضرب بدون وعي.. وكلما مسكوها وقالو ليها هدي وهو يصارخ.. وهي تضرب .. وتصيح:
ــ لمتى يعني.. وشنو الحل معاك ها..؟ الله ياخذ روحك.. ما ابي عيال ﭽذيه ما ابي ...
ام عبدالله:
ــ اعوووذ بالله بسم الله عليه ويش هالكلام ..
فاطمه تبعد فيصل عنها:
ــ مايصير ﭽـذيه خيه تدعين على ولدﭺ بالموت حرام عليـﭻ...
فهيمه قعدت على ركبها وصارت تضرب على خدودها:
ــ انتوا ماتدرون.. ماتدرووووون..
ام عبدالله تمسك في اياديها..
ــ ويش ماندري.. خلاص لا تدقي في روحش .. خلاص ..
خذت فاطمه فيصل برى الحوش شافت في وجهها علي قاعد يدولب عطته وياه وطلبت منه ياخذه البقاله لو أي مكان لين ما تهدى امه..
وجابت ليها كاس ماي...وصارت ام عبدالله تشرب فهيمه وترشح وجهها وتسمي بالرحمن.. وتهدي فيها وبنفس الوقت تهزأها على الدعاوي اللي صارت ترميها على ولدها:
ــ ويش اللي ماندري به.. وويش فيه..؟
فهيمه صارت تصيح صياح مو صاحي خوف امها واختها... اول مره بالحياه يشوفو فهيمه القويه اللي ما احد يغلبها بهالضعف وبهالأنكسار...
ــ يمه.شسوي.. قولي لي شسوي.... ولدي مو صاحي... فيه مرض نادر... يمه هذي مو تربيتنا انا وابوه اللي تخليه يقول هالحـﭽـي ,, المرض يخليه يقوله غصبن عليه.. وغصبن عليه كل الحركات الشينه اللي كان يسويها.. يمه .. آنا ما دعيت عليه بالموت لأني ماحبه والا مابيه.. انا مابي هالمرض وهالمرض متعبنه هو... اكثر من ما متعبني انا وابوه.. والله احسه بيستخف منه بيستخف.......
وبين ماهي تتكلم وتتشكي وتصيح وهم متفاعلين وياها و متأزمين .. ماشافوها الا قامت تركض وتركتهم وعلى طول الحمام وهم وراها مختلعين ويش فيها فجأه..!!
ام عبدالله وهي منذهله ودموعها على خدها من اللي صاير تهمس لفاطمه..وهم على باب الحمام من قاموا ورى فهيمه..
ــ ياعلي .. ويش هالحاله.. الله يفرج عنك ياولدي .. مو بكيفه يعني اللي كان يسويه...الله يكون بالعون .. يتعالج ان شالله ويصير زين.. ماعلى الله بعسير.
شوي يسمعوا صوت فهيمه بالحمام.. ترجع..
فاطمه صارت تطالع امها... وام عبدالله فهمت نظرات فاطمه وبهدوء:
ــ فهيمه.. ماتجيها هالحالات الا اذا....
فاطمه بهمس: ــ حملت....
ام عبدالله رفعت ايدها وبعالي الصوت خصوصا ان فهيمه تأخرت في الحمل على فيصل .. :
ــ يالله ياكريم تعوض عليش يابتي بالخلف الصالح و تفرحش و تبرد حزنش ..
فهيمه داخل الحمام تصيح وفي قلبها تكرر:
ــ لا ان شالله ياربي.. ما ابي .. ما ابي...
وفي بيت الشيخ محسن...
ــ ياولدي تقول شفت هالتميمه دي مدفونه تحت درج بيت ناس.؟
ــ ايه...
ــ وويش يخليك تطلعها ويش دراك انها داخل..
صار يحكي للشيخ انه عامل و يرمم وكذا..
الشيخ:
ــ ايييه.. جزاك الله خير .. خلاص انا الحين بافك السحر وانت توكل على الله
عيسى :
ــ زين مايصير اعرف ويش فيه السحر.. ومين المسحور؟
ــ لويه يعني وانت عامل ؟
ــ لا .. مو بس عامل.. نسبااي هالبيت ووكلوني افكه ليهم..
ــ آآآه.. ايه خلنا نشوف بسم الله الرحمن الرحيم..
ويفك الشيخ الجلده بهدوء وهو يقرأ آيات وينفخ فيه ويصلي على محمد وآل محمد..و يكرر آية الكرسي مرات عديده و آيات وسور ثانيه . وتطلع بداخله ورقه... مكتوب فيها بأحرف مفرقه. و اوامر للجن ..ويلتفت لعيسى ويسأله..
ــ علي حسين و حورية كاظم ... ديلا انسباك؟
عيسى فتح عيونه... اسم ابوه واسم امه... وبذهول:
ــ ايه.. ويش فيهم...
ــ انا لله ياولدي.. دا سحر تفريق .. غالبا يسووه ضعاف النفوس يفرقوا بين الناس وخصوصا بين المرأه وزوجها... الله يعدل الأحوال بقدرته ويرجعوا لبعض
عيسى يحاول يتمالك نفسه.. ويفكر بشكل سليم.. بس ابوه وامه ماتوا يعني ماله فايده هالسحر.. وفوق هذا ابوه مات قبل امه بسنين .. ترك عيسى الشيخ يكمل فك السحر وطلع عنه بدون مايقول له ان المسحورين توفوا..
وفي بيت ام علوي العصر.. يبدي الدرس عادة..
ام علوي قاعده بالحوش ماسكه الخيزرانه وقدامها مجموعة بنات ومجموعة اولاد.. البعض يكون يروح المدرسه الصبح والعصر يجي يتعلم عندها والبعض الآخر زي بدر و جاسم وبعض البنات على طول وياها وما يروحوا مدارس امثال بدور ..بعكس جنه اللي كانت تروح المدرسه والمعلمه..
كانت تراجع ليهم ماسبقت دراسته ^^...
ــ بدر شهاب..
ــ نعم...
ــ ينعم بحالك ياعيني .. بدي لي النصبه من حرف السين ..
ــ ساسوسي.. شاشوشي.. طاطوطي ,, ظاظوظي ..
ــ بس يكفي عفيه عليك.. الله ينور عليك ياولدي شاطر انت مايحتاج..نشوف جاسم عبدالحميد.. كمل
جاسم كان سرحان ومو في الدنيا..
ام علوي تعيد السؤال...
ــ جاسم عبدالحميد مو هنا له؟
جنه ترد بداله:
ــ هنا..
وتضرب ام علوي الخيرزانه عالأرض..
ــ وينهو مايجاوب..
جاسم استوعب الموضوع ويصير يسأل جنه ويش السالفه وتهمس له جنه .. عين عين,, وهو ابدا داقنه الصمخ ..
كتبت له على الأرض حرف العين بصبعها.. الا جاسم مسوي روحه فهلوي بعد ما فهم رسمة جنه ع = 4 وبصوت عالي:
ــ 4 , 5 , 6 , 7
ام علوي ردت وضربت عالأرض بالخيرزانه:
ــ ويه ويه.. الا قاعد تعد لي؟ اني قايله منت ويانا..غربال يغربلك.. الأرقام دي من سنين خلصناها ماشبعت منها بالمدارس.. !!
وتلوح الأرض بضربه تطلع الغبار وتخلي جاسم ينتفض من الخلعه.. وتصرخ فيه..
ــ عين.. النصبه اقول لك النصبه...
جاسم من الربكه:
ــ عاااا.. عاااااا.. عاااا
ــ يوه.. ويش ماكل..؟
ويصيروا الجهال يضحكوا عليه وام علوي جتها الضحكه بس تحاول تصير شديده حق يتعلمو.. وماشغلتها الا ضرب في هالأرض بهالخيزرانه:
ــ اخلص.. وويش آخرة هالعاااا...؟
ــ عوووو .. عووووو
ــ انقلب ديب.. لا تعاوي ياولدي وقولها عدله ..
ــ عااا عووو ...
وبهدوء متردد كسر اخر النصبه
ــ ..... عي!؟
ــ عدل .. ويش فيك.. هذا وانتا ولد استاد المفروض اشطر واحد.. اني الا باشوف جنه تكمل عدل لو لا.. كملي ياعيني عن اخوش مفهي اليوم..
جنه بأبتسامه عريضه:
ــ غاغوغي.. فافوفي..
ــ زين يابتي روحي للنون وكملي خلي اخوش يستحي على وجهه ويتعلم..
ــ نانوني.. هاهوهي
ــ ولو رجعنا للبدايه من الراء.. ؟ سمعيهم وتعلموا منها...
ــ راروري....
وسكتت جنه.. ارتبكت..
ام علوي.:
ــ ويش فيش يابتي ادري بش تعرفي شاطره كملي ..
جنه بأرتباك واستحياء وصوتها الحماسي انخفض:
ــ ذاذوذي...ثاثوثي .. شاشوشي.. ثاثوثي
ولا تسمع الا اللي وياها الجهال انفقعوا ضحك ...
ام علوي استوعبت الموضوع وتذكرت ان جنه غلطه..في ز ، س ، ص
جنه تفشلت وشوي وتصيح...
ام علوي عورت قلبها فصارت تداري الموقف بشلخه.. :
ــ على ويه تضحكو.. اني يوم اني قدها ماعرف اقول خ اقوله ح ولا اعرف اقول ر اقولها ل .. فلو باقول خياره كنت اقول حياله..كبرت وصرت اقولها عدل ..
وصاروا الجهال يضحكو زياده.. وجنه شوي تعدلت نفسيتها وابتسمت...
وطلعتهم من المعلمه..
بدر كان يرفض ان بدور تمسكه في الطريق لا يتعثر من رجوله كان يفضل انه يمشي عند الجدران اريح له ولنفسيته من يمسكه احد... وكانت بدور تلبي له هالرغبه وما تضغط عليه.. فمتقدمه عنه تمشي مع جنه اللي كان جاسم يجاكرها على حروفها وهي تصرخ عليه وتتوعده بتشتكي عند ابوها...
شوي الا يسمعوا صوت هدره وراهم طالعه من احد البيوت وشوي مرأه تطلع بالسرعه وهي تصيح شكلها مطروده وداير راسها وتصقع في بدر و يطيح و تصير تهدر عليه و هي تصيح :
ــ ويش فيك تمشي عند الطوفه كنك قطو..؟
التفتوا له لقوه طايح والمرأه كلما حاولت تشيله هو يباعدها مو راضي.. آخرتها رمته وهي معصبه ماكانت تدري برجوله...
ــ اهوووو ناقصتنك الحيين اني...
هي مامشت عنه خطوتين الا تسمع جاسم يصرخ فيها:
ــ حجيه... مو لنش كبيره تعاملي الصغار هاللون.. الدين التعامل .. الدين النصيحه
بدور تطالع جنه ماهي فاهمه ويش يقول اخوها.. وجنه جتها الضحكه وتهمس لبدور:
ــ هذا كلام ابوي له اذا هذأه على اخلاقه الخايثه و شافه ما يتقبل نثيحة احد...
المرأه بحرقة قلب ومبين عليها مغلوبه على امرها ومو قصدها تعامله كذا.:
ــ اني الاقيها من وينا لو من وينا.. سبوس اني مابقى احد مالعب فيي ..لا ولد ولا جيران والحين حتى الجهال.. ويش اسوي اني بعمري ويش اسووووي...
بدور تسأل جنه:
ــ منهي دي؟
جنه تهز كتوفها بمعنى مادري..:
ــ بث كأن ثوتها مر علي.. كأنه ثوت وحده مرأه جت من ذمان بيتنا .. و قالت لأمي اذا تبغاها تشتغل في بيتنا بث امي مارضت...
وتمشي المرأه عنهم ويروح جاسم يحاول يساعد بدر .. مد ايده اله يقومه..
بدر اللي كان يحاول يقوم صار يطالع ايده الممدوده... ومتردد..
ابتسم جاسم وبتصرف مايبغى يخلي بدر ينحرج منه :
ــ امسك ايدي وقوم بس.. لا تخاف مابمشي وياك .. اصلا فقيل انت... افقل مني ..
ابتسم بدر وضحك ضحكه خفيفه وهاديه.. ومسك ايد جاسم شد عليها وسحبه للارض..
طاح جاسم و صار يطالع في بدر بنظره مندهشه...
بدر يضحك عليه:
ــ شفت .. فقيل انا صحيح..
صاروا يضحكو على بعضهم وقام جاسم بعدها وقوم بدر.. وصاروا يسولفوا طول الطريق...
الليل وبين ما عيسى يتعشى مع خالته.. والأفكار تروح وتجي في باله..سألها بهدوء:
ــ اماه..
ــ امي..
ــ تتوقعي امي وابوي الله يرحمهم فيه احد يكرههم..
ــ ويش هالسؤال الغرييب رحمة الله عليهم ماشوف.. ابوك بياض عليه لآخر لحظه بحياته والكل يشهد بأسمه
ــ حتى امي؟
ــ يوو ويش فيك ياولدي .. ويش فيها امك؟
ــ يعني حتى امي ماعمرها اشتكت لش منه ولا صار بينهم خلاف..
ــ لا .. حتى امك رحمة الله عليها .. ماشوف احد كرهها لو آذاها غير عمك.. عمك الله يهديه.. لدرجة زي ماقلت لك تهمها بالبوق ووصلت فيه يتهمها بالسحر بعد..
عيسى استوعب الموضوع... ترك اللقمه من ايده وبالموت بلع اللقمه اللي كانت في فمه.. وفي باله..
ــ عمي.. علي حسين.. عمي.. صح... الأسم الحقيقي لعمي.. علي حسين...واسمه الفاني المعروف به سلمان..
وسأل خالته بريبه وشك:
ــ قلتي لي فجأه هو انقلب عليها ماتدري هي من ويش ,, وطردها و اهانها .. اماااه اباقول لش شي انا شاك فيه كنت والحين تأكدت...
وصار يحكي لأم علوي سالفة السحر..
ام علوي طقت على صدرها:
ــ يعني افتهم ان فيه احد سوى لأمك وعمك سحر.. سحر عمك وخلاه يسوي كل اللي سواه لليوم ..
ــ ايييييه ووديت السحر توي اليوم العصر للشيخ اللي قلتي به..
ام علوي تحط ايدها على راسها :
ــ علي ياعلي ياعلي.. عليييييك ياعلي... مين هاليهودي عديم القلب والضمير اللي سوى هالفعله.. اني حاسني قلبي ماتوصل نكران المعروف والجمايل في عمك لهالدرجه.. حسبي الله على من فعل هالعمله عسى الله لا يربحه ولا يوفقه ولا يهنيه..
ورفعت مشمرها وصارت تصيح وتشتكي:
ــ غربل امك وحرمك منها وظلمك و يتمك وضيع حقوقك.. عسى الله ينتقم منهم ويعجل عليهم ياكريم...
على باب بيت سيف رجع عباس.. يدق فيه وابدا مايفتح..
عباس يفكر:
ــ وين راح هالمجنون .؟ وين مختفي..؟
وبعد 3 ايام..الى الملتقى..
المفضلات