باسم بعد ماطق على باب بيتهم لين ما تعب.. وما احد فتح له بهالليل.. تأكد ان امه مارجعت... ويدري في ابوه نومته ثقيله فما بيفتح...
ظل على باب البيت قاعد و الأفكار تجيبه وتوديه.. لين ما غفت عيونه...
في النخل...
امينه بذهول وهي تصيح:
ــ ايييه.. ويش سوت حليمه بعدين؟؟؟
بشير وهو يصيح و يتأتأ:
ــ خذت السكين... و حطتها في شنطه بعد مالوتتها في خلقه و جينا هنا بهالنخل ودفنا الشنطه ويوم ثاني حليمه اخذوها...
امينه صارت تهز في بشير :
ــ ماتذكر مين اللي كان وياكم.؟؟ ماتعرفه؟؟؟ مين كااااان
بشير يهز راسه بسرعه وبخوف:
ــ كان متلثم بغتره ماعرفته... طلع بسرعه وماعرفته...
ــ وين.. وين الشنطه؟ تندل تحت أي نخله دفنتوها؟؟
ــ ماذكر.. مادري ...
امينه صارت تفرك في راسها وبدنها تحس مو مستوعبه هالقصه .. يعني فعلا بشير سواها.. وصارت تفكر حتى لو تذكر وين دفنوا الشنطه ويش بتسوي فيها لو حصلتها....
وفي الصوب الثاني عباس.. تيبس مكانه من هالقصه العجيبه... ورجع بذاكرته لليله يذكر انه شاف فيها واحد فعلا في هالنخل.. يحفر ويطلع شي وينحاش به... وفوق ان عباس كان مايشوف الا بعيون وحده.. الرجال كان متلثم...ويذكر بيوم ثاني صارت الوقعه ودرت الناس بسالفة القتل وخذوا حليمه
عباس بلا شعور طلع من ورى النخله وتقدم ناحية امينه وبشير..
امينه من سمعت صوت المشي وقفت ومسكت حجره كبيره في ايدها.. وصارت تصرخ:
ــ مين انت؟؟ ويش تمبى ؟؟ مين انت؟؟
عباس بهدوء وادعاء:
ــ ام بشير ؟؟ انا عباس..
امينه اطمأنت يوم شافته ورمت الحجر وردت انهارت على الأرض :
ــ خلعتني ياولدي.. ويش مجيبنك النخل هالحزه >> كانت تعتبره حسبة ولدها.. اكبر من حليمه بشهور و يتيم ماله احد...
ــ انتون اللي ويش مجيبنكم مو انا؟؟ ويش فيكم ؟؟ كنتوا في بيت حسن ويش اللي طلعكم...
امينه حكت لعباس اللي صار:
ــ ومالومهم ياولدي.. مين اللي يبغانا وما ورانا الا المشاكل والبلاوي..
ــ والحين ويش بتسوي ؟
ــ بمهل للصبح وبرجع البيت تشود سيف قعد من النوم .. نومته فقيله هو فما سمعنا ..
عباس في باله:
ــ ماغير دمه الفقيل...
ويسأل امينه :
ــ تعالو وياي البيت الليله.. خبرش ياخاله ماحد عندي وحداني.. ولا القعده بالنخيل
ــ لا ...مايصير ياولدي..
ــ داخله عليش بالله اذا لولادش غلاوه عندش تجي وياي البيت مو أمان تباتوا بهالنخل.. امشي.. امشي والصباح رباح..
ــ عسى ربي يسعدك و ينولك كل مراد..
وراحوا مع عباس...
الصباح.. وفي منزل ابو سلمان...
عيسى رجع يشتغل وياهم بعد غياب كم يوم.. ادعى فيهم انه كان مريض .. وبالتي والذي رضى رئيس العمال يرجعه..
انتهت مرحلة الترميم وجاالسين يشطبوا والرئيس يأمرهم يخلصوا بأسرع مايمكن خصوصا ان راعي البيت بيرجع بعد اسبوع من السفر بعد اجراء عمليته.. فيبغى يسلمه البيت جاهز..
عيسى داخل البيت يشطب مع العمال شوي ناداه رئيسه وطلب منه يرمم درج المدخل فيه كم درجه منشلخه شوي فيعدلهم قبل لا تنكسر اكثر..
وبين ماعيسى يرمم ويعدل انتبه لأحد الدرجات على جنب فيه فتحه مبين انها مفتعله ماكانت موجوده من قبل .. ومغطيه بأسمنت.. وصاير شكلها مشوه للدرج وغير عن لونه..
الدقه في شغله خلته يفكر يصبغ الأسمنت بنفس لون الدرج.. وبين ماهو يصبغ.. الفضول صار يلعب في راسه.
ــ لويه هالدرجه هذي الوحيده اللي فيها اسمنت ومن على جنب.. في مكان مستحيل ينكسر ... او يتعرض لضربه.... لويه مو في مكان ثاني.. و لويه الدرجه الأولى عالأرض بس ..
هالفضول خلاه يقلب الفرشاه اللي كان يصبغ فيها ويصير يطق الأسمنت.. هو ماكسره الا يتفاجأ باللي داخله.. لقى عظام حيوانات .. وشعر ملوت على قطعة جلد مغلفه تغليف محكم ولونها يبين عليها قديمه...
عيسى حس ان الموضوع سحر... عرف وتيقن من شكل هالأشياء ومكانها.. سحر على عتبة هالبيت...
حط الأشياء بسرعه وبدون ماحد يشوفه في كيس وقام واستأذن من رئيس العمال اللي هزأه وقال له ماله كروه بهاليوم...
طلع من عندهم يجر خطاويه .. ومو مصدق اللي شافه ولا مستوعبنه.. رجع البيت يبغى يتأكد سأل خالته ام علوي..
ام علوي دقت على صدرها:
ــ اعووذ بالله دا عمل ياولدي.. وينا شايفنه؟؟
عيسى مايبغى يخلي خالته تحاتيه:
ــ لا .. بس واحد اعرفه شافه على باب بيتهم ,, ومو عارف ويش يسوي..
صارت تمسح على شعرها:
ــ يوووووو.. لمسنا الصوووف والشر عنا مصروووف.. بالصلاة على محمد وآل محمد.. روح ياولدي بسرعه وقول له يروح للشيخ محسن في الديره الفلانيه و يخليه يفكه له.. لا يفكه هوو.. بسرعه الحق عليه..
عيسى طلع وعلى طول راح الى الديره اللي خبرته بها خالته... لقى بقاله بوسط هالديره...دخلها يبغى يسأل راعيها عن بيت الشيخ محسن خصوصا انه مالقى في الطريق ساعتها احد الكل في اعماله والمدارس..مافيه غير نسوان ويستحي يسألهم ..
وتفاجأ بشوفة جعفر في البقاله ..
ــ هلا ياخوك.. انت تشتغل هنا؟؟
ــ هلا فيك.. ايه .. انت بعد تشتغل بهالديره؟
ــ لا بس جاي ادور على واحد..
ــ منهوو؟؟
ــ الشيخ محسن
ــ عفر سمعت به بس ما اندل بيتهم...
برى البقاله كانت نوريه واقفه ومستحيه.. تبغى تشتري اغراض وتقدم خطوه وتأخر خطوه..
اخوها طلع من الصبح النخل بيشوي سمك وقال ليها بيعزم اصحابه على الغدا وهي تكمل الباقي..
وسألها مو ناقصنها شي ... قالت له لا.. لتكتشف بعدين ان ماعندها ملح وهو الأساس... وولد اخوها راح للمعلمه... و تستحي تطلب من الجيران ... والبقاله ماليها جرأه تروح خصوصا بعد الموقف الأخير اللي حطها فيه ولد اخوها..
طلع عيسى من البقاله متوتر ويسرع واختلع من نوريه الواقفه رجع خطوتين على ورى..
ــ يالله يالله..
جعفر طلع وراه بيقول له يدق أي باب في هالفريق ويسألهم الا يشوف نوريه ...
ــ خير اختي بغيتي شي..؟
نوريه بخجل والكلام يتقطع تقطيع:
ــ مل.. ملح..
جعفر استجمع شوية جرأه وسألها:
ــ خيه وين نلاقي بيت الشيخ محسن..
نوريه فاجأها السؤال هي يالله طلبت الملح...
ــ ها.. ايه.. الشيخ محسن.. بيته البيت الفالف في ظهر البقاله..
جعفر بفرحه عطاها كيس الملح وما اخذ الفلوس من ايدها الممدوده.. تركها وراح يركض ورى عيسى:
ــ عيسى... عسيىىى.. تعال لا تروح بعيد ..
نوريه خلاص بتموت من الفشله والحيا.. حطت الفلوس على طاولته وانحاشت بيتهم...
رجع جعفر شاف الفلوس .. وضرب جبهته:
ــ اوووووو.. صحيح اني قليل حيا.. ولا قلت ليها رحم الله والديش... وبعدين قوطي الملح مو بهالكثر.. انحاشت ولا اخذت الباقي...!
عباس راح بيت سيف .. لقى باسم على الباب متسندر... ومسند راسه عليه...
ــ ويش فيك قاعد برى؟ وين ابوك؟
ــ ما يفتح الباب من البارحه للحين وانا اطق عليه...
ــ اووف.. بعده نايم يعني..؟
ــ مادري بس يجوز لأن نومته فقيله..
طق عباس الباب مره ومرتين وعشر وشلخه.. مافتح له... اخذ باسم وياه...
وفي الطريق :
ــ روح بيتي هناك امك تحاتيك.. مادرت بك طلعت.. وبعدين ويش اللي مودنك لهيثموو بنصاص الليالي...
باسم مو عارف ويش يجاوب :
ــ ها.. ولا شي..
ــ تأمل مابقدر اروح مركز الشرطه واسأل...
ــ شنطه.. فيها حوايج لنذير.. قال لي اجي اخذها..
ــ ها.. شنطه؟ و حوايج ويه اللي فيها ...؟؟
باسم يرتجف وهو ميت من الخوف .. ماشافه عباس الا قعد على ركبه وسط الطريق..
عباس منصرع منه...
ــ ويش فيك؟؟؟ قوم... بسم الله عليك...
مسكه لقى بدنه باااارد مع ان الجو صيف.. ويرتجف..
صار يفرك فيه واخذ هوياه البقاله وسكر عليهم بابها حزة اذان الظهر ... وبهدوء..
ــ ترى انا ادري بسالفة بشير.. فعلمني ويش سالفة هالشنطه.. وصدقني بساعدكم باللي اقدر عليه..
باسم حس نفسه لقى الأمان عند عباس.. وصار يعلمه....
.>>>>>>>>>>>
المفضلات