الفصل الحادي عشر .....
ويجي علي مستغرب من محمد:
ــ ويش فيك ؟ ويش صاير ؟ مين المتصل؟؟
محمد وهو يصفق:
ــ الكليه .. الكليه متصلين فيك يقولو بكره تروح ليهم تعبي اوراقك للبعثه..
علي طار من الفرحه وبصرخه قويه:
ــ بذذذذذذذذذذذمتك !! احللللللللللف
ويصير يناقز هو وياه ويصفقو ...
وام عبدالله ماهي فاهمه ويش فيهم بس تضحك... وتنزل مريم مع حسن ... وهي مختلعه:
ــ ويش صاير ؟ ويش فيكم.؟
حسن :
ــ على ويه هالصريخ دا؟
محمد : ــ باركو لعلي.. رشحوه للأبتعاث..
وجه حسن تهلل فرح :
ــ لاااا... مبرووووك ياولدي .. مارشحوك الا لأنك تستاهل... معدلك عالي يوم تتخرج.. . بيضتها .. اشهد انك بيضتهااا..
وصار يطبطب على كتف علي اللي كان مو مصدق اللي سمعه...
مريم بين على وجهها انها تضايقت وماعجبها الكلام :
ــ ابتعاث ويه ؟
علي بفرح:
ــ اكمل دراستي الماجستير في امريكا ,, بعدين ارجع واتوظف في ارامكو برتبه عاليه..
ام عبدالله فهمت الموضوع نسبيا ورفعت ايدها:
ــ روح يا عسى ربي يكتب لك وين ماتروح السعاده والتوفيق والهدايه من رب العالمين...
مريم وفيها غبنه تداريها بقهر:
ــ يعني ماتقدر تكمل هنا..؟
علي حس على امه انها ماعجبها سالفة ابتعاث وسفر.. مسك راسها وباسه:
ــ لا .. لازم اسافر اذا ابغى الأحسن لي..
حسن : ــ ايه انا موافق ياولدي روح هذي فرصه ماتتعوض ..
علي وهو لسا ماسك راس امه يطالع في عيونها اللي كانت تداري الدموع.. وبهدوء:
ــ اماه.. لا تخافي علي.. الله ما اختار لي الا اللي فيه الخير لي هي 5 سنين .. وبزوركم خلالها اكيد كم مره.. مابظل هناك العمر كله..
مريم ماتحملت صارت دموعها تنزل وبحزن :
ــ اني ياولدي وانت بالظهران واني احاتيك.. مو بعد امريكا برى البلد موليه.. ناس اجانب .. وحياه فانيه.. ماتبغاني احاتيك...؟
حسن:
ــ لازم يشوف مستقبله ويواجه الحياه.. لما تتوفر له الفرصه
الا بدخلة حسين راجع من عند سيف...
ويستقبله محمد بالتصفيق و البشاير...
حسين : ــ اوووه.. مبرووووك يابو حسين الف مبروووك...
علي : ــ يبارك فيك عمي...
ــ ومتى السفر؟
ــ مادري بس بكره ان شالله بروح الكليه بعبي اوراقي وبشوف متى..
ــ الله يوفقك ...رفعت راسنا..
مريم تنحاش المطبخ .. بدون ماينتبهوا ليها وهم في سوالفهم...
وتصير تصيح ...
ويدخل الحوش جعفر راجع من البقاله..و ماسك في ايده قوطي بيبسي ومن سمع الخبر عن اخوه.. من الفرحه :
ــ هاك.. برد قلبك.. ياسلااااام على اخوي ياسلام ...
وفي المطبخ
ام عبدالله تواسي مريم :
ــ يابتي هذي الدنيا .. الولاد كبروا خلاص وكل واحد بشوف مستقبله..
ــ بس يا ام عبدالله ماتحمل مايصيروا قدام عيوني..
ــ يابتي ومين اللي تتحمل؟ شوفي اني ولدي فوين واني فوين.. والله معوض علي ببناتي اشوفهم ويسلوني.. وانتين عندش محمد وجعفر اكم.. الله يخليهم ويبلغش فيهم جميع.. خلي الولد يشوف مستقبله ولا تحسسيه الا برضاش لا يقعد يحاتيش بالغربه....
ــ خايفه عليه من كل شي... ديلا اجانب .. ويش بياكل وويش بيشرب ومين بيعاشر ..
ــ يوو .. تحاتي كل دا....ترى بيتكفلو به اللي بيودوه .. شيه مأملتنهم بيودوه وبيفلتوه بصحرا.. اكيد وياه جماعه وناس... ومكان عدل..
ــ الدنيا مو دنيا و ديلاك نسوانهم سفور .. خايفه عليه من كل شي
ام عبدالله جتها ضحكه.. عرفت القسم الأكبر من محاتاة مريم ورفضها ويش هو...
ــ شان على هالسالفه... عرسيه قبل لا يسافر..
ــ صدق ! ومين بترضى تروح وياه بهالغربه..
ــ بنات الحلال وايد .. و..
ماكملت ام عبدالله كلامها لأن مريم انحاشت طيران من المطبخ للحوش بتقول ليهم هالشرط..
ولا تسمعها الا تقول لحسن:
ــ بخليه.. يروح.. بس بشرط...
حسن : ــ خير ان شالله؟
ــ يعرس..
علي كان يشرب البيبسي و من سمع قول امه بلا شعور :
ــ بففففففففففففففففف
وفي وجه جعفر اللي صرخ وصار يمسح روحه بكم ثوبه وهو يهزأ:
ــ لكن الشرهه مو عليك.. الشرهه علي اللي عاطنك اياه غربلتنا غربال...
حسن:
ــ ويش تقولي يامرأه.. ويش يعرسه ؟
ــ ايه ولدي مو صغير 25 سنه عمره وبيسافر بعثه خله يسافر وياه ونيس..
ــ ونيس؟؟ ونيس لو خايفه عليه من اللي هناك.. شان عالوني سوياه ناس اكيد ضمن المبتعثين..
مريم بتردد وقهر:
ــ احسن له بعد... احسن له..
علي فاتح عيونه ويطالع في امه .. ومستغرب من كلامها المفاجئ..
حسن:
ــ مأمله فاضيين يصرفو عليه وعلى مرته.. بياخذوه هو لدراسه وفي سكن طلاب.. وانا مافيني شده ادفع على حسابي.. لا تخربي على الولد يا مرأه...وبعدين من وين تضمنيها اللي تتحمل الغربه وياه.. فجأه تبغيها تطلع من بيت اهلها لأمريكا؟؟؟
ويلتفت لعلي اللي كان مفهي حده:
ــ تبغى تعرس انت؟
علي فهى زياده من سؤال ابوه:
ــ ها... لا.. ويش اعرس مو الحين .. لاحق عالعرس..اذا صار عندي وظيفه استرزق بها..
ويلتفت حسن لمريم:
ــ الولد تربيتنا و يخاف ربه المفروض يعني يكون قد الثقه اللي بنعطيها اياه.. خلي عنش هالخرابيط تروحي تدبسيه بمرأه في الغربه .. فرضا طلعت هم وغم لو لهته عن الدراسه ... روحي بس خليه يتوكل..
ام عبدالله واقفه على باب المطبخ وفي بالها:
ــ بل ... حشا الحين بتاكلني مريمو على هالأقتراح..
وانحاشت الغرفه مع فاطمه ...
ام عبدالله :
ــ ايييه.. اكو حسين جى ومايندرى ويش صار مع سالفة سيف ومرته.... لهينا بسالفة علي..
ــ مسكينه خالتي امينه من شي لشي في حياتها ما ارتاحت كلش ...
ام عبدالله وبلهجه يبين عليها انها مو مرتاحه للوضع:
ــ الله يعينها عاد مايندرى بترجع لريلها لو لا...
فاطمه فهمت على امها .. تنهدت:
ــ يمه ... فرضا اني زوجي مثل سيف .. او خلينا نقول نذير .. وانتين مكان امينه واني مكان حليمه.. تقدرين توصفين لي شعورﭺ شلون ؟ واني بالسجن وريلي قتلته .. ؟؟ وانتي متعذبه من ريلش ومو عارفه لمنو تروحين؟
ام عبدالله حست بالذنب .. وفهمت كلام بنتها:
ــ يادافع البلا .. مو قصدي شي والله.. بس الدنيا مو دنيا والزمن مو زمن.. باﭽـر خوفي يجي ريلها ويسوي مع ريلش مشاكل..
ــ الله كريم يمه ,, وهالناس هذا قدرهم بهالدنيا مو ذنبهم يكون هذا نصيبهم وهذا حالهم.. فما لنا الا نوقف وياهم ونساعدهم.. نكسب فيهم اجر وثواب عالأقل..
حسين كان واقف على باب الغرفه يسمع السوالف مبتسم من كلام فاطمه وفي باله:
ــ الحمدلله اللي عطاني هالمرأه اللي تعينني على فعل الخير ...
و دخل ليهم يعلمهم ويش صار مع سيف...
عيسى منسدح.. مو جاينه نوم.. ومعتوق ضيفهم في سابع نومه...
طلع الحوش يتنفس و يفكر باللي سمعه وفي باله:
ــ مافيه غير هالتوقع.. عمي قابل اعمامه على انه ابوي وهم ماعرفوه... خبرهم فيه وهو صغير وجدتي تناديه بأسم سلمان مايدروا انه اسمه علي مثل اسم ابوي... وعلى قول امي ام علوي ان جدي توفى وهم صغار فأنقطعت علاقتهم بالبحرين لحد ماكبروا... آآآآه راسي مانى قادر افكر في شي نهائيا... ليش عاد عمي وصلت فيه لهالدرجه ... ليش..
وبين ماهو يتمشى بالحوش رايح وجاي .. سمع من غرفة ام علوي صوتها ,, كانت نافذة غرفتها مفتوحه ومطله على الحوش ... وهي تدعي الله وتناجيه بأنكسار قلب وخشوع وتصيح من قلب :
ــ ياربي ياحبيبي تخلي لي هالولد وتبرد قلبه وتسر خاطره وترجع له حقه من كل من ظلمه ,, يالله اسألك ياكريم تنصره وتعينه على كل عدو وتحفظه من كل شر ,, يالله مالي غيره بهالدنيا...
وينقطع صوت ام علوي مع الصياح والأنفاس .. ويرجع مع بحه و ألم:
ــ مالي غيره بهالدنيا فلا تحرمني منه...وبلغني فيه ..
عيسى سند راسه على نافذة الغرفه ..
بعيون سارحه لأبعد حد .. ودموع تتناثر على الخد...
>>>>>>>>>>>>>
المفضلات