الفصل التاسع .................
في احد المزارع... هيثم وفي حاله عنيفه من السكر.. ماسك شنطه و قدامه باسم ..
ــ تووقع.. ويش داخل هالشنطه ؟؟؟
باسم مرتبك:
ــ ويش يعني ؟ شي يخص نذير؟
ــ لالا.. ايييه... يعني تقدر تقول .. نص نذير .. ونص نذير ...
باسم عارف ان هيثم مو صاحي فيحاول يجاريه:
ــ اجل ويش..
ويرمي هيثم الشنطه على باسم...
اللي من فتحها .. شاف داخلها خلقه فيها دم .. و ملوت داخل الخلقه ....... سكين !
باسم ماسكنها بيده وهو مختلع:
ــ ووويش دي ؟؟
هيثم يضحك عليه:
ــ هذي ... هذي عودة اسنان...ههااااي.. حلوه صح..... سكين دي بعد ويش؟
ــ سسسكين ويه.. ودم مين اللي بالخلللقه...؟؟
ــ ايييه.. هذي الله يسلم عمرك.. السكين اللي انقتل فيها اخوك...
ــ هااا.. شلون..؟؟ ويش جيبها عندك...
ــ ههههههه .. شوف .. انا رجال ماحب اللي يتنازلو بكلامهم ولا احب الوعود الخرطي... واخوك نذير وعدني وعد و لما ما وفاه انقتل..
ــ يعني انت اللي قتلته؟
ــ لا..انا.. اعوووود بالله... مو انا...
ــ بشير اخوي يقول هو اللي قتله... مين الحين انت لو بشير .. ولويه بشير قال هو ..؟ ولويه حليمه بالسجن..
ــ هههههه ايوااا يعني صدق كان بشيررر... امممممممم... و اساسا صرت الحين انت القاتل بعد...
باسم فتح عيونه:
ــ هااا.. ويش دخلني..
هيثم بدى يدخن سيجاره:
ــ شدخلك.؟؟!! . ماسك السكينه بيدك وويش دخلك.!!! بففففففف خخخخخخخخ . غشيم. لو تتغيشم . الحين بصماتك عليها..يا اثول..
رمى باسم السكينه وهو ميت من الرعب..:
ــ مادخلني انا.. ويش دراني.. مين اللي قتل نذير ؟؟ شداب انت .. من وين جبت هالسكين..
هيثم يمد السيجاره على باسم:
ــ هونك علي شوي شوي.. خذ لك نفس وروق بالك.. و انا اعلمك..
ــ ما ادخن..
هيثم يمسك خلقه كانت جنبه ويشيل السكين ويرجعها في الخلقه اللي فيها دم ويلوتها ويرجعها الشنطه:
ــ لا تطلع لينا فيها الحين خوش واحد لا اصكك كف اهرهر ضروسك..والعب فيهم تيل .... ما بتسمع كلامي .. هع .. انت الخسران... هالسكين بكره عند الشرطه باوديها و اقول ليهم انت قاتل متسترين عليه من دي عفر 9 لو 10 شهور لويه بعد من دي سنه نقول احسن ..
باسم خلاص مات من الرعب:
ــ ويش تبغاني اسوووي .. بسوووي اللي تبغاه... ارجوك بس لا تبلشني مالي دخل... ما ابغى اروح السجن..ليش تبلشني انا ؟؟
ــ مو شغلي... اخوك وعدني وعد.. واخذ مني فلوس على شانه.. وبعدين انقتل وانخلف الوعد.. اموت انا؟ مايصير ... ابتلش انا.. رووح بس يللا طير ..ههااااي .. والله وطلعت شاعر وانا مادررري ...عجيب هااا...
هيثم يرجع يمد السيجاره:
ــ زين خذ لك نفس اول من هالحليوه بعدين اعلمك ويش تسوي..
باسم اخذ اول نفس وصار يكح كح مو صاحي وهيثم يحده عالثانيه والثالثه.. شوي باسم يحس نفسه صار في عالم ثاني ماكنه بالدنيا..
هيثم يطالع فيه وبنشوة المنتصر وفي باله:
ــ اييه يا نذير .. ماحد قال لك ماتصير قد كلامك .. خلهم يدفعو ثمن خيانتك...
وسأل باسم:
ــ عندك خوات؟
باسم بلا شعور ماهو موتعي على روحه:
ــ خوات.. بس وووحده...
ــ لااااع.. لا تقول المسجونه... مرت اخوك.. ياعيلة العُقد
ــ ايييه..
ــ ههههههه امحق زي شربكة عايلتكم دي ماشفت ولا باشوف... زين عندك فلووس؟
ــ لا من وين لي .. ما اشتغل ...
وينهب هيثم السيجاره من ايد باسم:
ــ ماعندك فلوس ولا خوات.. ويش اسوي بك.. قوم اطلع برى...
باسم وهو شوي موتعي للي صاير :
ــ لالا.. اول شي الشنطه ابغاها... تكفى.. لا توديني بداهيه...
ــ اطلع حمار اذا عطيتك اياها.. روح بس قوم اطلع برى.. اذا جبت لي فلوس عطيتك اياها...
طلع باسم من المزرعه وهو خايف من اللي صار ويحس جسمه متخدر...
في حين هيثم كان مررره مستانس يطالع في السيجاره في ايده وفي باله..
ــ بترجع.. اذا مو عشان الشنطه .. عشان هالحلوه.. انا وراكم والزمن طويل يا ولاد سيفوو...
دخل باسم البيت... لقى ابوه في الحوش قاعد....
سلم وهو ميت من الرعب .. الا يفاجأه ابوه بسؤال:
ــ وين امك؟؟
باسم بخوف:
ــ هااا..
ــ اغيب كم يوم وارجع الاقي البيت فاضي .. وين طست هي واخوك وانت من وين راجع؟
ــ انا .. انا كنت في زريبه .. من صدقاني... امي .. امي يمكن راحت الخردور ويا بشير عنده مواعيد..
ــ ها .. ويش تهربد علي ... و يش تقول ؟؟ مين طاقنك على راسك..
استوعب باسم ان عقله صاير مو وياه.. صار يحاول يركز في كلامه اكثر:
ــ ها.. لا الدختور ..
ــ والله وصارت تطلع بدون شوري وبدون علمي.. هين يا امينووه... لويه...؟؟ ويش طلع وياه بعد .. هالعله...
ــ مادري .. يقولو مرض نفسي .. اعصام .. مدري ويش .. >>> اعصام = امساك..
سيف فتح عيونه مو مستوعب كلام باسم موليه:
ــ اعصام.. خبري به في البطن.. ويش نفسي ومانفسي بتتكلم عدل لو ارنك كف يفقع صماخك؟
ــ لالا.. انفصاام.. مادري مادري..
ــ ومن متى راحو..
ــ مادري..
ــ اذلف اذلللف لابوك لابو امك لابوكم كلكم .. ماينوخذ منك لا حق ولا باطل.. اهبل .. طالع على امك..
دخل باسم غرفتهم يركض وهو مره ميت خوف من ابوه اولا ومن الحاله العجيبه اللي صابته ...
يحس مو حاس بروحه بنفس الوقت عاجبنه الوضع ...
يحس نفسه بيطير وبراحه في جسمه ونفسيته... !!
انسدح على منامه وهو يضحك شوي ويهلوس ويا روحه خايف من السكين شويات.. لين ما غفت عيونه..
في السجن....
ــ نقول لك يا اختي اللي تبينها الحين عندها عملية ولاده .. مانقدر ندخلك عليها..
وتصير امينه تصيح وتترجاهم:
ــ تكفو بتي ماشفتها من 9 شهور.. ارجوكم خلوني اشوفها ...
ــ ماقلنا لك مابتشوفيها بس ممنوع الحين .. اصبري وبتشوفينها... وبعدين هذا اللي معاكي يا اختي مايصير يدخل لهنا.. يبي يزورها معليش يتفضل في انتظار الرجال وراح نستدعيه لعندها بعدين
ــ .اويلي عليش يابتي ياللي انسجنتي وانتين حامل ولا درينا بش.. انتقم الله منك ياسيفووه يوم ماتخلينا نزورها.. الله لا يردك ولا يراوينا وجهك.. اترجاش ارحمي بحالي اني أُم .. لا راعش الله على ولادش.. ولا كدرش عليش لخاطرهم بحال سوء .. ماشفتها من دي 9 شهور .. ماكنت ادري بها حتى انها حامل يوم تدخل.. داخله عليش بالله .. دخلوني الغرفه وياها..
ــ مايصير يا اختي مايصير... يااا محمد.. تعال وصل هالولد لأنتظار الرجال
التفتت امينه لبشير ومسكت وجهه بكفينها وعيونها بعيونه وصارت توصيه:
ــ امي .. روح هناك ولا تخاف.. مابروح محل اني هنا لين تطلع اختك وبس تطلع بجي اخذك ونشوفها زين.. روح امي وياه.. روح..
ومشى بشير مع العسكري لأنتظار الرجال.. دخل ديك الغرفه الفاضيه الا من مجموعة كراسي مابين صاحي ومتهالك.. ونافذه مفتوحه ضوا الشمس داخل منها بشكل كبير و مضوي الغرفه ... بحيث الجالس يعطي ظهره للنافذه ووجهه للباب ..
جلس بشير على احد الكراسي .. المقابله لضوا الشمس مباشره . وصار يفكر .. ويسترجع اللي صار ديك الليله...
يسمع صراخ حليمه... واستنجادها ... وطلبها من نذير انه مايخلي شخص كان ثالث معاهم انه يلمسها...
ويدخل عليهم بشير البيت وركض للحوش ليلقى نذير ماسك حليمه من شعرها وشادنها من ورى يسحبها لغرفه وهي تحاول تفلت منه تبغى تطلع وهو يصرخ فيها:
ــ الفلوووس صرفتها.. وماعندي ارجعهم له... وان مارجعتهم بيشتكي علي وبنسجن. بتسمعي الكلام لو ويش .. وبعدين احمدي ربش تسوي هالكثر والله ماتوقعتش تسوي حتى ريال .. تعااااالي..
وهي تصيح صياح وتستنجد وما ان شافت اخوها بشير قدامها على باب الغرفه صارت تمد اياديها وتصارخ:
ــ بشيررر.. يا اخووووي الحقني ... الحقنييي ...
بشير بأندفاع صار يحاول يدافع عن اخته ويباعد نذير عنها لكنه ابد مو راضي ...صار يضرب فيه بس ابد مو متنازل عن شدها لدرجة قبع شعر من راسها في ايده ويرجع يمسك جزء ثاني منه وهي تصارخ وتقاوم.. :
ــ ولوو بمليووون .. ما يلمسني .. اني ماني بضاعه تنشرى وتنباع على هواااك.. خليينييي
ولا من مجيب... في داك البيت المعزول اخر الفريق قريب المزارع... غير بشير اللي الله جابه وبدل لا يروح يستانس مع اصحابه في المزرعه .. صار مجرم في هالصراع...
خصوصا بعدما استوعب سبب هالشبقه.. ووصلت فيه العصبيه والغيره على اخته من عديم الغيره اخوه حدها.... لا مجال للمقارنه بينهم في داك الوقت ،، طلع السكين من مخباه بعد نزاع طويل مع نذير .. وبسرعه خاطفه طعن نذير 3 طعنات في بطنه .. مع الطعنه الثالثه افلت شعر حليمه وطاح بالحوش غرقان بدمه...
حليمه صارت تزحف من الخوف والرعب ومن الم الطق .. في حين بشير واقف يرتجف بالسكين وعيونه شابحه مو مصدق اللي يشوفه...
ولا يشوفو من هالصريخ الا واحد شاخط من الغرفه منحاش كان متلثم بغتره فما عرفوه وفوق هذا ماهم في وعيهم من صدمة اللي صار...
بشير رمى السكين من ايده وصار يطالع في كفوفه ويطالع في حليمه و خلاص يحس نفسه بيموت من الرعب... وحليمه ماهي احسن حال منه صارت تضحك وتصيح :
ــ ويش سويت.. بشير ...؟ ويش سويت؟؟ قتلته؟؟ بشير .. نذير قتلته...
زحفت ناحية نذير وصارت تهزه وماكان الهز يسوي شي غير انه يزيد الدم اللي كان مثل النوافير ..
حطت اذونها على صدره بلا شعور تبغى تسمع نبضات قلبه ويوم ماسمعته ينبض صارت تهز نذير الميت وتصارخ فيه :
ــ.. قووووم.. قوووووم .. لا تورط اخوووي قووووم
صدى امر .. قوووم.. وكلمة اخوي .. صارت تتردد في مسامع بشير .. اللي رفع ايده وغطى اذاينه مايبغى يسمع شي .. وبين ماهو بهالوضعيه و ظله منعكس على الأرض بفعل الشمس انتبه وراه كأن احد رافع سكين وبيطعنه في ظهره .. استدار وصررررخ
......>>>>>>>>>>
المفضلات