في السجن... صحت حليمه على صوت سناء تهلوس :
ــ ماكان قصدي.. والله ماكان قصدي.. يبه سامحني.. اماااه .. اماااه...
حليمه عرفت ان سناء تحلم بكابوس .. فصارت تصحي فيها:
ــ سناء.. سناااء... سناااء
سناء فزعت من نومها برجفه قويه وشهقه..
حليمه :
ــ بسم الله على عمرش..
وقعدت على السرير والتفتت ناحيتها:
ــ ويش فيش؟ ويش صاير؟
الا تسمع صوت اللي يحرسوهم في الغرفه
ــ بس انتي وياها.. نامي .. اللي صاحيه فيكم راح ترجع العنبر ..
سناء ماتبغى ترجع خايفه .. مع انها خيرتها بترجع .. وكذلك حليمه بغت متنفس مع انه مو افضل حال.. وهي اساسا مقررين ليها ترتاح في العياده فتره..
انسدحو يتأملو السقف وكل وحده شارده الذهن في وادي.. الا ان همست سناء بسؤال:
ــ ويش قضيتش انتين؟؟
حليمه ابتسمت وتنهدت:
ــ قضيتي صعبه... ومعقده..
سناء بتساؤل مخنوق ودموعها تتناثر:
ــ شكلش زيي..؟؟
حليمه بأبتسامه ساخره:
ــ لا دفاع عن شرف ..
سناء بألم :
ــ ويش سويتي يعني .. قتلتي اللي اعتدى عليش لو ضربتيه؟
حليمه تهمس بأبتسامه متألمه:
ــ قتلت زوجي ... وابو طفلي ...
سناء منصرعه:
ــ هااا.. كيف زوجش ودفاع عن شرف..
ــ قصه ماحب اذكرها .. اسمحي لي..
سناء:
ــ آسفه.. بس قلت يمكن اسمع سالفتش.. وتهون علي مصيبتي..
وصارت تصيح صياح .وبصوت مبحوح..
ــ والله العظيم اني ماكنت اقصد.. كنت هبله وهو قص علي..
حليمه ما سألتها مين .. وويش قصتها.. تركتها على راحتها تتكلم...
سناء بهمسات متقطعه:
ــ سالفتي مثل سالفة الحامل بالسجن... الفرق ان الفاعل كان استاذ اخوي من ابوي ... مصري كان يجي بيتنا يعلم اخوي دروس خصوصيه...
سكتت شوي وبعد تنهيده و صوت يخنقه العبرات:
ــ اني صراحه... ماكانت أتغطى .. وكنت اول بنت جامعيه في ديرتي..والكل حاسدنا على مستوانا المادي و التعليمي.. وابوي متحضر في مسأله الأختلاط مايمانع فيه..
حليمه بأستنكار وفي بالها:
ــ قصدش متحرر....
سناء فاجئتها وكأنها تقرى افكارها :
ــ الناس وقتها كانت تقول عنه متحرر.. بس حنا اهله نشوفه متحضر لكن بقيود.. اهمها لا ننجرف بالمشاكل.. يعني كون ان رجل اجنبي في بيتنا ويعلمني هذا شي طبيعي للغايه بأسم التحضر و التمدن و التعليم.... ووعدني ابوي بس اخلص الجامعه هنا ماعنده مانع يخليني اسافر وين ما ابغى اكمل دراسه ...
ردت سكتت شوي .. متوقعه تفاعل من حليمه.. الا ان حليمه كانت مكتفيه بالأنصات فقط.. وسناء مخنوقه تبغى تفضفض وتتكلم فكملت :
على عكس امي.. تطلقت واني عمري 4 سنوات،، لأن ما عجبها حال ابوي و تحرره الزايد في نظرها.. .. وظليت مع ابوي ..كنت اكتفي بزيارات ليها متقطعه اسمع منها النصايح و الكلام و اطلع من عندها ولا كأني سمعته... امي كانت عايشه مع خوالي ماكانو يحبو ابوي ولا يحبوني ويتضايقوا اذا جيت لأمي ...
شوي صارت تسرع في الكلام بشكل متقطع و مع صياح:
وفي يوم طلبت من ابوي يجيب ليي مُدرسة انجليزي خصوصيه .. اخويي مو احسن مني بشي .. واني ابغى اقوي لغتي خصوصا ان المناهج الجامعيه صعبه عليي و حاطه في بالي باسافر امريكا بعدين .. ماتوقعته ببساطه يقول ليي تحجبي وخل مدرس اخوش يعلمش .. وهو صدق شاطر و مابقدر احصل ليي مدرسه بهالسهوله
في البدايه كان مؤدب ويايي ما يرفع عيونه عن الكتاب وهو يشرح اليي .. لكن بعدين... و شوي شوي بدى يفلها... خصوصا لما يتعب اخويي من الدروس ويتركنا يلعب او ينام او يسوي أي شي .....
وترتفع همسات سناء وبحسره :
كان يتحرش فيي واني كنت ما ادري .. مأملتنه بالغلط .. واثقه فيه وفي نفسي مابسوي شي معاه..
اكذب عليش اذا قلت الش اني ما تعلقت فيه .. كان شكله حليو.. و خفيف دم وسوالفه تضحكني... وكنت زي الهبله اضحك واسولف وياه و اشكي له همومي.. لحد ماجى داك اليوم...وكان آخر يوم لهالحيوان معانا .. كنت على نياتي وهو استعطفني وكان خلاص بيرجع بلده بس قبل لا يرجع قال يبغى يطلعني خصوصا اني كنت مكتأبه على شان بيتركنا !
حليمه تهمس اخيرا :
ــ في كل خلوه بين اثنين .. الثالث شيطان... والشيطان يزين القبيح و يميت الضمير...فصار اللي صار صح.. ؟؟؟
سناء انفعلت من كلام حليمه.. اللي كانت ساكته طول الوقت ولما تكلمت نثرت على جرحها ملح.. وبقهر وصياح:
ــ اني صدقته ببراءه وغباء.. طلعت وياه . موعلشان اسوي شي شين.. ابدا ماكنت متوقعه... و ابويي كان مايدري .. حجتي اني بروح ازور امي..وصار اللي صار .. غصب عني غصب عننننني...
شوي ارتفع صوت سناء وصارت تضرب في خدودها وهي تصارخ وتصيح:
ــ في مكااااااااان ماحد حولي فيه.. مهما صرخت مهما استنجدت ما احد بيسمعني...
المشرفات صارو يصرخو على سناء ويأمروها تسكت فيه مريضات ثانينات واذا هي خلاص مافيها شي بيرجعوها للعنبر .. ونادو على الممرضات يشوفوها ويشوفوا امرها.. و سناء مستمره في الصراخ وضرب روحها:
ــ ما اوتعيت الا اني في مستشفى و الصيحه قايمه وحالتي حاله ..لقتني الشرطه بعد مابلغ ابويي .. اني اختفيت اكتشف اني كذبت عليه وماني عند امي.....والشرطه يوم لقوني استلموني تحقيق.. ومن المستشفى للمحكمه.. بتهمه
ويزيد الضرب لدرجة تورمت خدودها:
خلوة غير شرعيه..... و ابويي تبرى مني..و خوالي كان ودهم يذبحوني ..
وتصير تشد في شعرها و تنشره .:
ــ ياليتهم ذبحوووني واسترحت.. يااااليتهم ذبحوني
حليمه مذهوله مره من سناء و من موقفها وسالفتها...
والممرضات صارو يربطو سناء في السرير من اياديها ورجولها .. لأنها قلبت الدنيا فوق تحت.. وضربوها ابراه مسكن.. هدأت على اثرها ونامت...
وفي المستشفى اللي يتواجد فيه شهاب ومرته وولده..
شهاب نايم في غرفة الأنتظار سند راسه عالجدار .. صحى على صوت اناس يعرف اصواتهم..
فتح عيونه والتفت لقاهم حسين وعباس .. و ممرضات وممرضين شايلين بشير على سرير متحرك و امينه ماسكينها تزحف للطوارئ ..
قام ليهم منذهل:
ــ بسم الله الرحمن.. خير ان شالله.. ويش صاير
عباس منفعل :
ــ ولد الذين سيفوو ماقصر كسر عافيتهم....
وجلسو مع شهاب في الأنتظار .. يونسوه شوي مدة وصلو المستشفى...و يسولفو...
وفي صباح اليوم التالي ....
عيسى مع عمال وايد واقفين قدام بيته اللي هو بيت عمه حاليا .. ينتظروا اوامر رئيسهم في البدء بالترميم والأصلاحات...
يتأمل البيت من برى .. وفي قلبه خوف..
خوف من الماضي..
خوف من الحاضر..
وخوف من المستقبل ...
طلب منهم رئيس العمال بداية ينقلو رمل موجود في بداية المزرعه الى جهة البيت ليباشرو العمل..
مسك عيسى العربه و صار يمشي مع العمال في انحاء المزرعه.. الى ان وصل الى بدايتها.. وهناك كان اثر لصندقه قديمه مابقى منها الا جدارين خشب متهالكين...
وقف بالعربه و الذكريات تاخذه وتوديه.. يحس يسمع انشودة امه قبل لا ينام...مع ان ذاكرته مشوشه في هالمكان اللي ما يذكر فيه غير البرد والتعب و الجوع والمطر
يذكر كل لحظه تعيسه في حياته وهو ابو 5 سنوات اول ما اوتعى للحياه وفهم معنى انك تكون مظلوم...ومع هذا مايذكر تفاصيل وجه امه ... كل هذا من شدة التعاسه اللي صايبتنهم في ذاك الوقت.. حرمته يتأملها ويذكر أي شيء عدا انشودتها الدافيه..
وتتردد في مسامع عيسى كمالة حكاية خالته ام علوي..:
ــ بعد فتره مرض عمك ابو سلمان مرض ﭽايد ظل بفراشه لمدة شهر .. مافاد فيه لا مستشفى ولا طب شعبي ... لحد ما طلبت منه مرته يروحو لمشعوذ وهالمشعوذ اكد ليهم وجود سحر في بيتهم و اتهم امك انها عملته لجل تبغى تتحكم في عمك وبعدها تفرقه عن زوجته وتاخذه هي اضافه للحلال الكبير اللي تركه ابوك ليكم .. نبشو البيت ولقو فيه سحر... ..فطردكم عمك و عشتوا بصندقه بالمزرعه ,, ما تجزيكم لا عن حر ولا برد ..ترجيت امك تجي تسكن وياي من قبل لا يتوفى ابو علوي لبعد وفاته وهي معانده تبغى تثبت انها بريه من كل تهمه تهموها اياها وتبغى ترجع حقكم... لكن ايييه ياولدي.. الله اخذها قبل لا تحقق مرادها....
نسمات هواء حاره تطير رملات المزرعه حوالين عيسى اللي ظل يتأمل الصندقه .. ويحس بالوجع من الم الذكريات...
ومن هالتهمه القويه الملفقه لأمه وهي سيده بنت رسول الله..مغلوبه على امرها.... ليش اتهموها.. وعلى أي اساس ؟؟
وهالمشعوذ من وين جاب هالكلام..؟؟؟ كل شكوكه تتمحور حول مرت عمه.. الا ان ويش الدليل اللي يثبت هالشكووك؟؟؟
الى الملتقى
المفضلات