في بيت عم عيسى..
ابو سلمان مو راضي ينام .. كان طول الليل ينادي :
ــ علي... علي...
ام سلمان خلاص زهقت و صارت تهمس لولدها :
ــ أي علي..! فيه احد ينادي على روحه... خرف ابوك خرف
سلمان:
ــ اماه ابوي شكله مريض ... يعني قالوا الدكاتره العمليه اثرت بس على اطرافه مو على دماغه..
ترد تهمس:
ــ خرف اقول لك..
ابو سلمان يلتفت الى مرته وبعصبيه مفاجأه خوفتهم :
ــ وين السيده؟ ابسألها ليش سوت كذا مستحيل تكون مرت اخوي ,, ووين عيسى ولد اخوي.. ليش مو هنا..؟
ام سلمان خلاص حست قلبها طاح في الأرض.. وصارت تتعلثم ماهي عارفه ويش تقول...رجع ابو سلمان يستفسر عن حادثه صارت من اكثر من 20 سنه وكأنها صارت من كم يوم !
سلمان يطالع في امه وابوه...ومستغرب الا بصرخه ابوه مره ثانيه:
ــ روحوووووو نادوا لي عليها... لو ودوني ليها...
سلمان بأستغراب :
ــ يبه.. لكن مرت عمي توفت..!!
ــ هااااا.. ويش تقول؟
ــ ايه.. توفت من تقريبا 23 سنه ..وولدها توك شايفنه رجعتنا هو اللي حملك معاي...
ام سلمان قاطعت ولدها لا يزيد بالكلام :
ــ الحين لويه هالهدره.. نام وارتاح وريحنا.. روح بس ياولدي غرفتك ابوك اليوم مادري ويش فيه..
مامداه سلمان بيقوم عن سرير ابوه الا يمسكه ابوه بقوه ويسأله:
ــ ولد عمك هو اللي حملني وياك؟
سلمان : ــ ايه..
ام سلمان منقهره و خايفه :
ــ ويش فيك على هالأسئله خلي الولد ينام تعبان..
ابو سلمان يصرخ ومو طايق مرته :
ــ اطلعي برااا انتين ولا عليش .. روحي نامي بغير هالدار ... برااا..
ام سلمان طلعت وهي ميته من الخوف سكرت الباب وراها وظلت متسنده عليه تسمع كلام ابو سلمان ويش يقول لولده..
ماسمعت الا ابو سلمان يصيح مثل الأطفال وينحب وولده مو عارف كيف يتصرف وياه.. اخرتها قال له:
ــ عيسى.. عيسى ياولدي وينهو.. ابغى اشوفه...
ام سلمان و اليقين خلاص اخذ محله في قلبها :
ــ الرجال مو صاحي.. هذا السحر.. اكيد السحر انفك.. ويش فيه على طاري اخوه ومرته وولده ؟؟
صارت ام سلمان تنتظر ولدها يدخل ينام... وفي نيتها تطلع وتكشف على الدرج...
عيسى بعد ما فضفض لخالته وعرفت السالفه .. طلبت منه ما يروح يواجه عمه الا بعد جية اهلهم البحرانيين.. خوفا من مرت عمه وعمه جايز يرجع لحالته.. ولو انها فهمت بما انه ناداه بأسم ابوه فأكيد السحر انفك ..
طلع عيسى بهالليله يتمشى بعد مانامت خالته.. ووصل وهو يفكر الى بيت عمه .. دخل الزراعه وصار يتمشى فيها وبقايا الذكريات اللي عاشها مع امه تاخذه و توديه.. الى ان وصل الى البيت ووقف قدامه يتأمله..
في هاللحظه انتبه الى شخص طلع من البيت وقعد عالدرج.. كانت مرت عمه طالعه بعبايتها.. وتحاول بسكين تفتح الدرج من الجهه اللي تذكر انها دخلت فيها السحر .. بس ماكان قادره لأنه عيسى جدد الدرج و عدله...
وبعد ضربه ضربتين... قعدت عالدرج وهي منقهره..
عيسى متخبي ورى وحده من اشجار الزراعه... فجأه حس روحه يبغى يجننها ..
اخذ حجر صغير ورماه صوبها...
وقفت وهي خايفه.. صارت تتلفت يمين وشمال.. ماشافت احد...
مامداها بتدخل البيت وهي خايفه.. الا تسمع وراها :
ــ لا تخافي ترى الدرج سويتها عدل...
شهقت من الخلعه شهقه ودارت وراها لقته واقف يطالع فيها ... تعلثمت :
ــ وويش .. تقول؟ ووويش مجيبنك هالحزززه.؟
عيسى يتقرب من الدرج وهي تتراجع من الخوف لين خلاص صارت عند الباب وعيسى عند الدرجه اللي كانت مكسوره..
قعد ومسك حجره وضرب فيها الدرج وصار يضحك بسخريه:
ــ هه.. شفتي.. قويه مايكسرها شي.. هي كانت مكسوره... وفيها اشياء.. عجيبه.. طلعتها ونظفتها و رجعت رممتها..
ام سلمان حزتها حست كأن احد كب ماي بارد عليها..
ــ ووويش تقووول؟طلعت ويش...؟؟؟
عيسى بأبتسامه:
ــ وصخ... ويش فيش مختلعه... ؟؟
ــ لا.. ولا شي .. اطلع الحين لا اقعد لك سلمان.. اطلع..
قام عيسى من على الدرج ونفض الغبار وهو يلعب في اعصابها:
ــ انا بطلع.. بس تأكدي لي جيه...
مشى خطوتين عنها ورد التفت ليها:
ــ وترى الوصخ اللي شفته فيه ناس شافوه غيري وعرفوا نوعه...
دخلت ام سلمان تركض وسكرت الباب وراها وطاحت على ركبها ماسكه قلبها وهي تنافخ من الخوف...
وفي ذاك الوقت سلمان سمع الكلام اللي دار بينهم.. انتبه لأمه وهي طالعه ولحقها بهدوء وصار يراقبها من نافذة الغرفه المطلة على برى... ولما دخلت ماحب يطلع من الغرفه وهي بهالحاله..
ظل يفكر..
ــ ويش اللي بين امي وعيسى.؟ وليش امي كانت تكسر الدرج ؟ وويش اللي خوفها من كلام عيسى ؟وويش فيه ابوي فجأه يحبه ويبغى يشوفه وهو اللي من اوتعيت بهالدنيا مايشتهي طاري ابوه ولا امه ولا يطريه.. لازم اروح لعيسى واسأله بنفسي .. اذا امي وابوي ثنينهم مو راضيين يعلموني...!
في بيت عباس..
عباس منسدح في غرفته جاينه ارق مو قادر ينام.. يكفر بكلام بشير ... ويحاول يربطه باللي شافه..
ــ على قولة بشير انه بعد ماقتلوا نذير طلعوا هو و اخته ودفنوا الشنطه تحت وحده من النخيل...بس انا ماشفته هو واخته في ديك الليله و شفت واحد ملثم يحفر تحت النخيل ومادريت به هل كان يدفن لو يطلع شي مدفون... بس بما انه نفس المكان فأكيد انه كان يطلع شي مدفون..
ويفرك في راسه:
ــ اففففف..هذا مايدل الا على انه اللي كان وياهم رابع بالغرفه هو نفسه اللي حفر وراهم وطلع الشنطه...
شوي الا يسمع برى في الحوش بشير يصرخ:
ــ حرررريقه.. حرررررررريقه
قام عباس طفر من محله وطلع يركض له..
لقاه في نهاية الحوش يحاول يحمي روحه من شيء غير موجود..
عباس مايشم ريحة حريق ولا شاف شي يحترق...
مامداه بيجي صوب بشير الا بشير يصرخ فيه:
ــ لاااااااااا تقرب بتدوس الناااااااار..
عباس انصرع زياده....
ــ أي نار ويش فيك..
ــ النار قدامك.. ماتشوفها.؟؟ كبيره.. دخان... ريحة الحريق طالعه... تبااااعد
قعد باسم من النوم وعلى طول طلع وياهم :
ــ ويش صاير؟
لقى بشير متيبس في صوب وعباس متيبس هو الآخر في صوب ثاني ..
عباس وبصوت خافت يكلم باسم:
ــ بشير؟ فيه شي ؟
باسم بحزن:
ــ قلت لك مريض ... بس من طاحت امي اهملنا علاجه المفروض يروح المستشفى من بعد ماتوفى ابوي..
عباس بخوف:
ــ لا .. ضروري نوديه... هذا مو بس خطر على اللي حواليه لو ماتعالج.. خطر على روحه....
وصار ينادي بشير ويطلب منه يقوم ومافيه حريق وبشير مصر ان النار موجوده وانه يشوفها ويشم ريحتها وخايف يتقرب منها...
ماشاف عباس الا باسم يكب سطل ماي قدامه في المكان اللي يدعي فيه بشير النار..
شوي بشير صار يضحك ودموعه تطيح بلا شعور:
ــ طفيتها... انطفت... انطفت..
عباس خلاص نشف دمه من بشير وصار يعاتب باسم منقهر فيه:
ــ لا تسوي له هالحركات حق يسكت.. انت بكذا تزيده وسواس وجنون..!
وصارت الأفكار تاخذه وتوديه:
ــ مجنون! ويش فيه.! تلاقيه حتى قصة قتل نذير من خياله! ياساتر لازم اوديه يشوفوه يتعالج...!!!
>>>
المفضلات