الفصل الخامس عشر .........
الساعه 8 الليل .. جعفر مارجع للبيت..
و اهله بدوا يتهوسوا.. خصوصا ان الساعه 7 خلاص يسكر البقاله
مريم بخوف :
ــ قوموا روحوا شوفوا اخوكم... اني قايله ما جى الظهر مو على شان حرارة الشمس اكيد صايره له شي ..
حسن : ــ هدي يامرأه ماعليه الا الخير ،، الحين بيروحوا اخوانه يشوفوه...
طلعوا علي و محمد ... متوجهين الى الديره اللي يشتغل فيها جعفر..
فتح جعفر عيونه لقى روحه في غرفه ظلمه ، مسدوح و مغطى و يحس جسمه كله مترضرض.. يتذكر انه تلطخ بس مو عارف هو وين و مين اللي اسعفه... ويسمع صوت خياط مكينه على خفيف..
مامداه قام بيستكشف المكان وبيدور على الباب في هالظلمه الا ينفتح الباب ويلاقي قدامه واحد ماهو عارفنه من الظلمه للضوا عيونه مو قادر يشوف حامل تبسي فيه اكل..
ــ هااا اخوك.؟ صحيت؟ الحمدلله عالسلامه..
جعفر اختلع وقعد عالمنام:
ــ الله .. يسس.. لمك.. وين انا .؟
شغل الرجال الليتات والتفت له:
ــ ماعرفتني؟
جعفر يتأمل فيه..:
ــ وجهك مألوف.. ايييه.. سيد رضا...
ــ ههههه اشوى تشوف .. انا قلت الله يستر من هالتبكس اللي حصلته شان ما تعمى..
قعد السيد بالتبسي وصار ياكل مع جعفر اللي كان ميت جوع و مو قادر يحرك فيه أي شي..
جعفر بتساؤل:
ــ كيف دريت فيني اني عالساحل ؟
ــ كنت راجع من الحداق و الا اشوف ديك العماره هايمه على واحد تلطيخ وبكوس قلت لااا .. بيروح فيها.. ويوم تأملت عدل وعرفتك بعد .. شلخت راسه بمربوع وطب وغم.. وشلتك الى هنا..
جعفر كان يشرب ماي..شرق:
ــ هااا.. لا يكون مات..
السيد صار يضحك:
ــ لا .. لا تخاف دا قطو ابو سبعة ارواح.. انا صرت اروح واجي عالساحل من بعيد لبعيد وشفته قام بعد فتره ..
ــ عسى ماعرف انك اللي ضربته؟
ــ لا ما انتبه..
تنهد جعفر ..
ــ اشوى عليك..
ــ ههههه من ناحية اشوى.. فمو اشوى علي بس.. يعني هو هاللعين لو شافني اذا ما لقاني مو بعيده يتعيلف في اهلي و ياذيهم..
ــ يادافع البلا.. الله يعينكم.. مشكوور اخوك ماقصرت ..
جعفر يتلفت حواليه:
ــ الساعه كم الحين لكن؟
ــ تقريبا 9
جعفر فتح عيونه:
ــ بل انا قلت يمكن 7 .. ماقصرت اخوك سامحني كلفت عليكم بقوم اهلي الحين اكيد يحاتوني
ــ انا صرت اروح واجي عالبقاله كان يجي احد ظليت هناك للساعه 8 ونص وتوي راجع ..
قام جعفر وهو مو قادر يتحرك.. ورجع طاح من الألم يحس روحه مكسر تكسير..
السيد:
ــ هااا.. يبغى لك مستشفى..عفر! وبعدين لا تروح لأهلك بهالدراعه كلها دم بعدين يخافوا.. خذ البس دراعه من دراعاتي..خوب نفس قياسي شكلك..
ــ لالا.. مايحتاج لا تكلف على عمرك ..
ــ لا اكلف ولا شي خذ بس ولا تدل عانت ضيفنا ومع الأسف آذاك واحد من ديرتنا..
ــ في كل ديره الشين والزين.. رحم الله والديك..
اخذ جعفر الثوب حس انه جديد:
ــ ياخوك جديده ماودي يصير فيها دم لو شي..
ــ حلالك شدعوه.. ماعليك خذها انت بس..
اخذها جعفر وفي باله:
ــ بااين عليهم ناس على قد حالهم ومع هذا كريمين مره.. والله لو ما اسعفني شان قضى علي ..
ــ اسمع انت لازم تبلغ على هالنحيس اللي ضربك وانا بشهد وياك عليه لو بغوا شهود .. مايصير تخليه لا يتمادى وياك و ويا غيرك..
ــ ان شالله بكره من الصبح بروح ابلغ عنه..
ــ ايه لا تجي البقاله انا باكلم راعيها و بعلمه باللي صار..
ــ رحم الله والديك ماقصرت والله مانى عارف شلون اجازيك..
ــ لا تجازيني ولا شي.. انتبه لروحك.. والا تدري قوم بوصلك بيتكم مافيك شده على عمرك وخوفه يطلع بعد هالعله و يتقصد لك مره فانيه.. ولو اني ما اظن فيه شدة ..
ما مداه جعفر طلع من عند السيد الا يلاقي قدامه على باب البقاله اخوانه واقفين ويحاولو يفتحو الباب و يطلوا من نافذتها يدوروه..
ناداهم من بعيد:
ــ علي .. محمد..
هم من شافوه طالع من داك البيت ومتكي على السيد يساعده على المشي راحوا له ركض وهم خايفين:
ــ ويش تسوي هنا ؟ ويش فيك؟؟
جعفر يضحك:
ــ سلموا اول عاد...
السيد: ــ ماينلاموا .. لا تخافوا ماعليه الا العافيه ان شالله ...
خذوه من عند السيد و تشكروه وصار يحكي ليهم اللي صار فيه طول الطريق الى ان وصلوا البيت ... ومن دخلوا وشافته امه تصروعت وجعفر في عالم ثاني يفكر باللي صار فيه وويش بيسوي..
...>>>
المفضلات