عباس بالحوش حاط العشا ويناديهم :
ــ اذا ما اكلتوا بتمرضو .. امكم فيها اللي مكفيها لا تزيدوها هم على همها..قومو اكلوا وطاوعوني...
بشير بعيون حمرا منسدح بالغرفه ماذاقت النوم الا كم ساعه من كثر الكوابيس و باسم مو احسن منه حال..
شوي الا بطلعة باسم و اللي خلع عباس بأستفسار مفاجئ:
ــ انت قلت... قلت بتساعدنا نطلع اختنا من السجن بس نعلمك كل شي...
عباس مستغرب و بأرتباك:
ــ ايه قلت... ليش ويش عندك غير سالفة الشنطه..؟
باسم بلا وعي :
ــ بشير.. هو اللي قتل ابوي بعد بدون ما يقصد.والله بدون مايقصد..
عباس فتح عيونه:
ــ ويش تقول انت..؟؟
ــ اقول لك بشير مريض سمعت امي تقول فيه انفصام شخصيه.. و سمعت من يومين اول ما مات ابوي انهم بياخذوا بشير يفحصوه لأنه متلبس بسالفة ابوي .. و هو قال لأمي و ابوي من قبل انه قتل نذير لأنه واحد حاول يهجم على حليمه و نذير ما دافع عنها...
ــ ها.. ويش تقول..؟؟ يعني بذيك الليله مو بس نذير و حليمه في البيت كان بشير وياهم !
ــ ايه وزي ماقلت لك واحد بعد رابع...
عباس صار يربط السوالف و الأحداث في مخه... ويتمتم..:
ــ نفس الليله اللي انقتل فيها نذير شفت واحد بالنخل يدفن شي كأنه شنطه.. ماركزت مين هالواحد وتحت أي نخله دفن لو اني شفت وماكنت جبان كنت نبشت وطلعت الشنطه وعرفت الموضوع.. بس الخوف اللي يقطع الجوف قاطعني قطاع ديك الحزه.. قايل انا بحاول اساعدهم بس اساعدهم بويش؟
عباس مرتبك:
ــ ماعرفته... مين اللي كان بيهحم على اختك؟
ــ لا مادري هذا الكلام على قول بشير هو اللي شافه..
ولا يسمعوا الا صوت انفاس بشير تتلاحق على باب الغرفه..
التفتوا له لقوه رامي روحه على ركبه و قاعد يطالع فيهم وحالته ما تتفسر..
عباس وباسم قاموا له يركضوا مسكوه وصاروا يهدوا فيه ....
بشير بلا وعي صار يكرر :
ــ قتلته... كل من الحيوان قتلته...
عباس :
ــ قتلت مين .. ومين الحيوان..!!!؟؟
بشير يزيد جرعة الصريخ ويصير يكافخ في روحه ويصارخ ويضحك ساعه وساعة يصيح ويكرر قتلته وكل مني انا..
وشوي هدأ وصار يرتجف بشكل مو طبيعي .. ارتجاف خلى باسم وعباس اللي ماسكينه يهتزوا معاه..
ثواني وصار ينوح.. نوح يخوف .. عباس من الأرتباك مو عارف ويش يسوي وياه .. وبلا وعي صار يسطر خدوده:
ــ بشير .. اصحى..بشير...
بشير تتسارع احداث ديك الليله في مخيلته.. يذكر ملامح هالشخص الرابع معاهم بالغرفه بس طول هالفتره كان يحس نفسه مو ذاكرنه من شدة الصدمه اللي مر بها... وشوي اتضحت الذاكره وياه.. وعرفه... كان... هيثم !
ومع تسطير عباس ... وصدمة بشير بأستيعابه اللي صار بشكل كامل.. اغمى عليه..
عباس صار يصارخ على باسم:
ــ وقته هالكلام اللي قلته .. ويش نسوي الحين..
باسم ميت خوف و رعب:
ــ هو كل كذا.. مامات صح.. لا تقول لي مات..
عباس منقهر:
ــ مامات.. مغمى عليه شكله...
ويسدحوه ويصير كل واحد منهم في زوايه بالغرفه مسند راسه للجدار ويفكر ... مين الحيوان اللي كان يتكلم عنه بشير..
وويش السالفه بالضبط...
الى ان غفت عيونهم....
قعدت حليمه من نومها مرتعبه... كانت ام احمد سهرانه تفكر في بنتها وفي الحاله اللي وصلت ليها..
ــ بسم الله عليكِ يابنتي.. شفيكي مرعوبه؟
لتتفاجأ من حليمه تقول ليها ودموعها تسيل:
ــ اماه.. احضنيني... لا تخليني ..
ام احمد ما قدرت .. مسكت حليمه وحضنتها وصارت تمسح على راسها وتهدي فيها وهي الأخرى صارت تصيح وياها...
حليمه ترتجف و بلهجة خايفه تسرد على ام احمد حلمها :
ــ شفت امي ماسكنها عمي وابو زوجي من ايدها ويسحبها.. كنت اترجاه يخليها بس هي كانت مطاوعتنه.. وتمشي وياه...
وماكانت غير تبتسم وتقول لي... فرج... واني اترجاها ماتروح وياه وهي تكرر لي فرج.. آخرتها قالت انها بروح بس مو وياه...
ام احمد تبتسم:
ــ خوفتيني يابنتي .. شفيها الحلمه... باين عليها فرج ان شالله..
ــ بس زوج امي يخوف بالحلم ووين بيروحوا؟
ــ للخير والعافيه والفرج... تعوذي من ابليس ونامي ...
انسدحت حليمه تفكر في الحلم ماكانت متطمنه له نهائيا..مع انها ما درت عن موت سيف ولا درت ان امها منومه بالمستشفى منهاره عصبيا... غمضت عيونها لعلها ترجع وتنام...
ــ صباحك الصباحي والورد والتفاحي
صباحك صباحين صباح الكحل في العين ...
صباح يطرد الفقر .. صباح يقضي الدين ..
بشرى تضحك وام عبدالله حاملتنها وتلاعبها في الحوش.:
ــ حبيبتي و اريدش .. والعبدة تغسل أيدش .. حبيبتي واني امش ... اشق شبدي واضمش
الا بنزلة جعفر يدق صبع وياها ويغني:
ــ يا اهل الطاق و الطرطاق ,, يا اهل المقص و المقراض
اعطونا طاقكم طرطاقكم ,, مقصكم مقراضكم
لزين يجينا طاقنا طرطاقنا ,, مقصنا و مقراضنا
و نرد عليكم طاقكم طرطاقكم ,, مقصكم مقراضكم
سكتت ام عبدالله وصارت تطالع فيه وهو يحفط في الحوش ومروق على هالصبحيه .. وصارت تضحك:
ــ ههههههه ويش جيب طاري المقص والمقراض..
جعفر يضحك.. اهو عطيني اياها.. حملها وصار يلاعبها قربها من وجهه وهو يغني ليها .. شوي بسرعه خاطفه تمتد لخشمه و تشمخه بأيدها .. خلته يفرفر بها في الحوش وهو ميت ضحك...
ــ تقولي لي ويش جيب طاري المقص والمقراض .. خشمي قبع من اظافرهاااا..
ــ ههههههههههه ماحد قال له يصير حليو...
ــ ايه.. ماعليه تسخري علي..
ــ ويش فيه..؟ وويش فيك ماعليك الا العافيه قمر متى بس الله يبلغنا فيك..
الا بنزلة علي وهو يضحك :
ــ اذا جعفرو قمر انا ويش اطلع وانا؟
جعفر يطالعه بنص عين.:
ــ انت خسوف..ياملقوف..مصدق روحك على ويهم ادري..
علي يضحك:
ــ انا خسوف يمكن هااا.. يمكن.. اصدق بس ملقووف.. خخخخخخ قالوها .. رمتني بدائها و انسلت..
ــ منهي اللي رمتك و تسلسلت.. اهو بس اهو..يقرا لينا في الكتب ويجيب لينا كلام عجيب غريب..
وياخذ علي بشرى من عند جعفر وام عبدالله تضحك عليهم.. وجعفر يوصي بشرى تشمخ علي في خدوده وخشمه...
ام عبدالله تبتسم:
ــ ايييه ياولدي بكره تسافر و بتوحشنا.. تسالني الحين و انت ويه؟ انت شمعة هالبيت..
جعفر غطى عيونه بأيده وصار يسوي روحه يصيح عن سخريه:
ــ وينا بتروح ياشمعتنا يللا الله كريم يروح الشمع ويظل الكهربا >> ويأشر على روحه...
صاروا يضحكو عليه.. شوي الا بنزلة ابوهم حسن...
واللي فجأه صار يوصي جعفر:
ــ انتبه لروحك بهالديره ...
جعفر مستغرب:
ــ شيه ويش صاير؟
ــ اسمع ابو جابر يقول فيها ناس بطاليه معروفين اذا حطوا احد في بالهم ماخلوه لين ياخذوا حيفهم فيه...
ــ ويش علي منهم..
وفي باله:
ــ والله وطلع ابو جابر خوش آدمي.. خايف علي ها.. خخخخخ.. الا خايف على روحه لا افضحه..
ــ انت راعي بقاله الحين وجايز يجو يتعيلفو فيك وهذانا اقول لك انتبه لروحك اعرفك تنفعل لو تفتعل وياهم شبقه و يكسروا عافيتك..
ــ لا ان شالله مافيه الا الخير.. مع السلامه بروح الحين..
فاطمه في المطبخ تنادي:
ــ لا احد يروح جهز الفطور دقيقه..
حسن بقهر يكلم علي:
ــ روح شوف امك بتخمر في غرفتها لمتى لابوها لابو اخلاقها الخايسه مو لا شغله ولا عمله..
ركب علي يشوفها..
ام عبدالله:
ــ انا لله .. ياولدي يابو علي وسع صدرك وبالك عليها..
ــ موسعنه ياعمه والله موسعنه .. بس هي كلما جى ليها لسانها يطول مأمله بسكت ليها على طول...
طق علي الباب على امه... مره ومرتين وثلاث..
ــ مين..
ــ انا علي..
ــ ويش تبغى..؟
ــ افتحي..
ــ مفتوح الباب اصلا..
علي استغرب بالعاده تتقفل بيبان الغرف بالليل يخافوا يطب حرامي لو شي ويدخل عليهم...
دخل وفي باله:
ــ مخلتنه امي مفتوح شان يرجع ابوي ويدخل ...
ــ ويش عندك.؟
ــ قومي انزلي ويانا افطري
ــ مالي نفس اذا جعت تالي باكل بروحي..
ــ مايصير كذا اماه..تتعبي نفسيتش و تقهري روحش وصايره ويا ابوي تشابقوا على اقل شي كبرنا ترى حنا صرنا رجال..
ماخلص كلامه الا مريم تقعد على سريرها قعود وتصير تصيح وتتشكى:
ــ هذا انت قلتها صرتوا رجال .. الله يرضى يكفخني وولاده طوله...
ــ لا مايرضى.. وانتين مأملتنه كفخش برضاه... غصبن عليه.. قومي بس ويانا و تعوذي من بليس..
حضنت مريم ولدها وصارت تمسح على ظهره:
ــ الله لا يحرمني منكم ولاد.. ياما كنت اتمنى تصير عندي بنيه اخاويها و اسولف وياها... الحمدلله عوض علي بولاد يشرحوا القلب.. لوما ابوهم يبط الشبد
ــ اماه بعد انتين الله يسلمش قهرتيه ,, اجل تكسري كلامه وتطردي مرأه فقيره مسكينه من بيتنا... مايصير
مريم انفعلت.. وفكت الحضن ودفت علي:
ــ اهوو مناك تظل رجال تدافع عن ابوك ها.. توي اقول مافيه منكم.. مالت علي بس مالت.. ماتحسوا فيني .. يعني تبغاني ادري ان واحد منكم خذوه الشرطه بسبة ولدها واسكت؟
علي صار يمازح امه:
ــ ههههه خلاص اماه.. حقش علينا.. ندري تحبينا و من خوفش علينا تفلتي كلام ما تقصديه...
مريم دايره عنه وحمسانه..
ــ خلاص اماه عاد.. ماباقي شي ويخلص الشهر واسافر .. مايصير يخلص وانتين زعلانه وماتشاركينا الحياه...
مريم من قال ليها ولدها كذا عودت دارت عليه و حضنته وصارت تصيح..
شوي الا تهمس له:
ــ تأسفت اصلا اني بعد يوم طردتها.. بس ويش اسوي ابوك ماعطاني مجال صار يشابق ويهزأ و اني ادافع عن روحي وصار اللي صار..
علي يضحك :
ــ ايه والدليل خليتي باب الغرفه بدون قفل .. عل وعسى يرجع الوالد هااا..
فكت مريم الحضن و مسكت اذون ولدها تقرصها له... وهو يتأوه ويضحك عليها..
ــ تأدب يا صبي تأدب...
نزلت معاه وتأسفت من حسن قدام الكل ... وعاد الوضع الى ماهو عليه في بيت حسن و حسين...
الظهر الساعه كان جعفر متعود يسكر البقاله مع اذان الظهر يصلي بالمسجد ويرجع يفتح البقاله للساعه 1 بعدها يسكرها ويروح بيتهم يتغدى و يرد ليها عالساعه 3 العصر الى 7 المغرب..
كان الجو حار و الشمس صاهيه.. كذا مره اقنعوه يظل في البقاله ابرد له وياخذ غداه وياه و هو ابد مايرضى مايشتهي ياكل بروحه...
الساعه 1 سكر البقاله..
الفريق فااضي وهدوء .. الكل في بيوتهم بهالوقت...
وبين ماهو يمشي في احد الزرانيق يحس ان فيه احد وراه يمشي .. وكلما التفت ماشاف احد..
خاف وتذكر كلام ابوه.. صار يسرع مامداه طلع من الزرنوق الا يصفق في واحد طول بعرض ... ويشهق شهقه:
ــ بسم الله ... آسف ما انتبهت لك...
رفع جعفر راسه وعرفه.. كان اللي يتحرش فيه من كم يوم في البقاله على قوطي دخان واللي حذره منه سيد رضا..
مسك جعفر من ثيابه وسد بوزه وصار يسحبه.. وجعفر يحاول يقاوم .. لدرجه تطفر نعاله من رجوله في الزرنوق...
عطى جعفر جمع في بطنه خلاه يدوخ.. وسحبه عن وسط الفريق والزرانيق لا يطلعو الناس من الصريخ .. صوب البحر..
ورماه على الساحل وقعد فوقه وصار يضرب فيه وجعفر يحاول قد مايقدر يقاومه ولا يتحرك من ثقله عليه ويصارخ:
ــ ويش سوويت انا.. ويش سوويت ؟؟
والرجال مستمر في الضرب :
ــ ياحيوان .. تتعرض لبنات الناس ليش.. هاااا.. ليش..؟
ــ أي بناااات .. ما تعرضت لأحد...
ــ الا .. لا تشلخ.. مفكر نفسك من برى الديره مابنسوي فيك شي... الا اجيبك لو من سابع سما لو من قاع سابع ارض.. يا ×××× يا ××× ...
الشمس صايره عموديه عليهم و العرقات تزخ غير الدم اللي صار يطلع من بوز جعفر وخشمه من الضرب وجعفر خلاص مو قادر يقاوم ولا يشوف شي من هالحاله... شوي الا يسمع صوت فلعه و اللي فوقه يصرخ ويرفع ايده فوق راسه:
ــ آآآآآآآآآآآآآآآآآآآه
ويطب على جنب مغمى عليه...
جعفر ساعتها خلاص .. اغمى عليه هو الثاني...
الى الملتقى...
المفضلات