وفي البقاله...
جعفر قاعد في امان الله... الا بجية وحده مو غريبه عليه .. هي من دخلت حس روحه عرفها وفتح عواينه..
غض النظر وصار قلبه يصفق:
ــ هذي ويش مجيبنها يالله تعدي هاليوم على خير ...
البنت اول مادخلت ماشكلها انتبهت لجعفر .. ويوم خذت غرضها ودارت لجعفر بتسلمه الفلوس ..
هي ماشافت وجهه اختلعت في بداية الأمر ولكنها بعدين تشجعت وقوت عينها...
ــ انت جعفر صح.؟
جعفر مختلع وفي باله :
ــ ويش عرفها بأسمي بعد.. افففففف اكيد من هالشايب...من شبقة داك اليوم..
ــ يووووو.. ويش مجيبنك من محل الأقمشه الى البقاله .. اكيد ابو جابر طردك .. صح؟
ــ خير اختي ويش بغيتي؟
ــ ايه.. بغيت هالصابون.. و عسل لو عندكم ..
ــ مانبيع عسل...
ــ هههههه.. لا عاد ... عسل وماتبيعوا عسل.. انتون من هالديره كلكم عسل.. عاد ابو جابر عسل العسلات.. خساره بس ماشكله بيرجع.. شكله شافك وخاف تروح تفتن عليه...
جعفر خلاص لاعت شبده منها...حاقرنها وما يطالعها ولا يرد عليها..
انقهرت يوم ماعطاها وجه.. وللمره الثانيه يصفطها ويحقرها...
ــ ترى اعرف كل شي.. انتون يالرجال ماتجيب راسكم الا الحريم.. .. لا تسوي روحك تستحي..
ــ استغفر الله بسسس .. اقول يابت الحلال مالي خلق للكلام مع السلامه اذا مالش غرض..وبعدين انا مو ابو جابر
رمت البنت الصابون وبقهر :
ــ اسسسمع... لا تفكر حالك احسن واحد بهالدنيا.. وباقي الناس كخه.. مالت عليك وعلى وجهك يا ...××× يا ×××× ... مو اني اللي تتكلم عني بهالكلام.. وبعدين اني كنت زوجته على سنة الله ورسوله..
جعفر فوق لقافته عفوي جدا.. اذا دخل في جدال دخل .. بغض النظر عن الطرف المتجادل معاه.. غصب يبرد شبده ويطلع حرته وصار يضحك ويتمسخر فيها :
ــ قووووووويه.. اول مره ادري الشرع يحلل 5 .. ويش فيش انتين.. اطلعي بس مالي خلق مشاكل وياش..
ــ يحلل 10 بعد اذا زواج مو دائم ..
جعفر حس روحه احد كب عليه ماي باااارد من قوة جراءه البنيه والأحراج... واستوعب ابو جابر شلون صار وياها... واللي قاهرنه انها تتكلم عن الشرع والحلال والحرام وهي من اسلوبها وحده ماتعرف الحلال من الحرام...!!
شالت الصابون وهدأت اعصابها وبهدوء:
ــ ابو جابر خلاص انتهى وقت العقد بيننا .. وما اظن له رجعه .. شكله صدق شافك وخاف يتكلمو عليه الناس.. مع انه بالحلال .. بس هالشايب جبان.. اكتشفت انه جبان... المهم .. لو بغيت شي بيتنا ترى في هالفريق..تبغى ادليك بادليك..
جعفر حس هالمره ان ماي حار انكب عليه من قوة عيونها ... وبنبرة غضب صرخ فيها:
ــ اطلعي برى احسن لش لا الم عليش اهل الفريق كلهم.. سوادة وجه صحيح...
ــ اطلع.. ليش ما اطلع.. بس صدقني بتندم ...
ــ براااااااااااا...
وهي طالعه كانت واقفه على باب المحل البنت اللي شرت قوطي الدهن من قبل وهالمره وياها ياهل صغير ... كان ولد خفيف دم .. يجبر الواحد يبتسم له من يشوفه..
جعفر من شافهم انحرج وخاف على سمعته .. خصوصا انه مبين عليهم من زمان واقفين وسمعوا الهدره من اولها لآخرها .. انتبه للبنت تساسر اخوها قبل لا يدخل البقاله..
دخل الولد وكان عمره تقريبا 5 سنين .. اشترى كيس طحين و بيضتين...
وجعفر يحطهم له بالكيس صار يسولف وياه يبغى يداري عاللي صار ويهدأ اعصابه :
ــ هاا بتسوو كيكه..؟
الولد بفرح :
ــ ايه...
ــ ياسلااااام احب الكيك انا..
الياهل فرحان: ــ زيي .. احبه وااااايد
ــ ههههه عليك بالعافيه.. وهذا باقي الفلوس...تفضل يابطل..
وقبل لا يطلع الولد من البقاله... راح لجعفر اللي كان قاعد على كرسيه مقابل طاولته... واشر له ينزل اذونه..
ابتسم جعفر له :
ــ هاا.. بتقول لي سر يعني..
هز الولد راسه...
نزل جعفر راسه وهو يضحك بيسمعه ويش يقول... الا يقول له:
ــ تقول لك عمتي نوريه .الناس يقولو هذي المرأه مو زينه.. لا تتورط وياها بالمشاكل.. كل تتبلى على الصبيان .. و اخوانها مجرمين و ما يخلو احد بحاله ..
فتح جعفر عيونه... وصار يضحك ضحكة قلق .. :
ــ ايه.. زين .. ماعليه.. هههه ويش اسمك يابطل...
ــ سيد هاشم..
ــ والنعم ياحي الله السيد...
ــ الله يحييك...
وطلع الياهل لعمته وصار جعفر يراقبهم ... وهو يفكر.. :
ــ لهالدرجه شر هالناس على شان يحذروني منهم....ههههههههه ظريف هالجاهل.. قال ويه عمتي نوريه.. يعني اسمها نوريه.. فضيحه خخخخخخخخ..
دخلت البنت مع اخوها الصغير البيت...
نوريه : ــ ويش قلت للريال؟
سيد هاشم : ــ قلت له تقول لك عمتي نوريه ...
هو ماكمل كلامه.. الا تصفع على راسها:
ــ غربال يغربل بليسك .. وافضيحتاه.. اني قلت لك تقول له الناس تقول.. حق ويه تبدي كلامك بتقول لك عمتي نوريه.. غرباااااااال على غرباااااااال.. الحين ويش بقول الريال عني.. ما افرق عن اللي حذرناه منها بشي ... لكن الشرهه علي اللي بسوي خير...
سيد هاشم تبشع وشوي بصيح..
نوريه تمسح على راسه:
ــ لا تبرطم عاد.. قهرتني الله يسلمك..
ولا تسمع الا صوت طالع ليها من المطبخ وماسك كاس ماي يشرب فيه:
ــ قهرش لويه ...
نوريه بفرح:
ــ هلا .. هلا بالغالي هلا...الحمدلله عالسلامه اسفرت وانورت ..
ــ هههه الله يسلمش... ماقصر فينا هالبحر .. دي 4 شهور وحنا نطامس... ومع ذلك كل عطاشى .. لعنة الله على من حرم عليكم ياسادتي الماي ..
هاشم ابتسم ابتسامه عريضه وركض :
ــ يبببه...
ويحمله سيد رضا.. :
ــ هلا بولدي هلا... هااا ويش سويت لعمتك وقهرتها.. ومين الريال اللي تتكلمو عنه..
نوريه مفتشله:
ــ ويش اسوي في ولدك فضيحه.. حرمت اسوي خير.. هذا اللي يبيع ببقالة حجي ابو حسنين .. بت وحيد الـ.. طالعه من عنده بعد ماسوت له هدره وشكلها بتوديه المسكين بداهيه..
ــ ايوااا.. عيل راح ملح وسكر.. ولا هونت هالبنيه عن فعايلها يادافع البلا..يقولو تابت مو كفايه تطلقت 3 مرات .. ؟؟
نوريه منحرجه من اخوها:
ــ الله يهديها.. ايه عن الحرام عفر تابت من زمان .. بس .. مؤقت الحين...
ــ اهاا.. متعه يعني..
نوريه استحت وارتبكت و ماهي عارفه ويش تقول ..... :
ــ ايه ... من طرف الشيخ محسن عاد قلنا بتتوب يوم تدخلو شيوخ في سالفتها بس شكلها مخليه الشرع واحكامه غطى لفعايلها..
ــ وانتين ويشد دراش ياخيه...؟
ــ من النسوان اذا يَوْ يخيطو عندي اسمع سوالفهم...و عاد الله يسلمه ولدك ساسرته يقول له يحذره منها لا ياخذ ويعطي وياها لا تبلشه... من باب الخير... راح وفضحنا.. وقال له تقول لك عمتي نوريه ..
سيد رضا ومبين عليه انقهر وقلب على نوريه:
ــ ها.. وانتين ويش لش وويش لقفش بتسوي خير .. الحين ويش بقول عنش..؟؟
نوريه برطمت وشوي تصيح:
ــ ماحبيت يتورط وياها... خصوصا ان حنا نعرفها وهو مو من هالديره ..وبعدين لو صارت بلوه الكلام بيعم على ديرتنا كلها وبسبتها...
ــ وويش دراش انه مو من هالديره..
نوريه حست ان اخوها يللا ببدي استجواب...قالت والكلام يتقطع تقطيع وهي تمسح دموعها اللي نزلت بلا شعور من الربكه والحيا والخوف :
ــ من لهجته لما سمعته يتجادل معاها...
سيد رضا ابتسم ... وبهدوء:
ــ ادري بش ياخيه مو قصدش شي.. وقصدش تمنعي المكروه ... اعرفش مستوره وخيره .. بس الرياييل بهالزمن ماليهم امان... مو بعيده يفهمش غلط ويأملش متعمده تخلي هاشم يقول له على شان يعرف اسمش..
ضربت نوريه صدرها وصارت تصيح:
ــ والله مو هذا قصدي.. عساني مصيبه .. وحق يِدِي رسول الله مو قصدي
ــ ادري ادري ياخيه.. هدي بالش ..
وصار سيد رضا يطبطب عليها ويهديها...
سيد رضا .. غواص.. عمره 37 سنه.. ارمل من 5 سنين وماعنده الا ولد واحد سيد هاشم... ربته عمته نوريه واللي كانت الأخت الوحيده لسيد رضا .. يتيمه وعمرها 17 سنه تشتغل خياطه..
في بيت ام علوي..
ام علوي داخل الغرفه على بابها قاعده تسف وتسولف مع معتوق وعيسى وكانوا يتغدو:
ــ امي معتوق كم عندك من ولاد..؟
ــ عندي 4 بنات الله يسلمش..
ــ الله يخليهم ويبلغك فيهم...من صوتك حسيتك صغير ما شالله تبارك الله..
معتوق يبتسم.. وعيسى يضحك:
ــ اماه.. صغير هو.. ترى اكبر مني بـ 8 سنين بس عفر...
ــ يووو.. ويش بيدي عليك ياولدي ..
عيسى وهو يضحك يغمز لمعتوق ويساسره:
ــ الحين بتقول لو انت معرس عندك زيه...
ام علوي:
ــ اييييه.. لو انت معرس ياولدي اجل مو بعيده يكون عندك ولدين..
معتوق جت له الضحكه وحس روحه بيشرق في الأكل وعلى طول مد عليه عيسى كاس الماي... ويضحك ويهمس له:
ــ مو قايل لك.. سوت تخفيضات اكي بعد...
ام علوي :
ــ كني اسمع مساسر وضحك, علي هااا..
معتوق:
ــ لا شدعوه يا ام علوي... شرقت من حلاوة الأكل بسرعه قمت اكل..
ــ عليك بالعافيه.. ايييه.. فديت هالعيسى .. كل شي معتمد فيه على روحه.. اجل اني اللي ماسويت له شي بحياتي.. يخيط لروحه ويطبخ وينظف.. منى عيني اشوفه معرس على ديك المريه اللي تشيله في عيونها وتخفف عنه تعبه...
معتوق:
ــ الله يبلغش فيه ان شالله ويفرح قلبش..
في بيت حسن وحسين..
وفي الليل .. والجميع نيام...
طلع محمد بهدوء من البيت.. وراح لباسم.. وتوجهو لمزرعة هيثم... وفي بالهم خطه انهم يخلو هيثم يسكر و يمثل باسم انه مو في وعيه ويستغل محمد الفرصه ويبوق الشنطه ... وصلو ,, و دخل باسم وتفاجأ بوجود شباب مايعرفوهم مو من ديرتهم قاعدين وياه والجلسه حلوه..
باسم:
ــ وين الشنطه.؟
هيثم:
ــ ويش تبغى فيها.. جبت فلوس اول؟ جبت مقابل ليها على شان تسأل عنها...
باسم يحس نفسه ما استفاد من هالجيه غير عوار الراس والمشاكل..
قام بيطلع قبل لا يورطوه بشي غصب عنه...
الا بهجوم رجال شرطه مقتحمين الصندقه اللي هم فيها وماسكين محمد اللي كان عند نافذتها يتصوخهم...
ــ تفتيش.. يا رجال ... شيلوهم..
ويلمو كل اللي بالصندقه للسيارات.... ومحمد وباسم وياهم...
الى الملتقى..
المفضلات