في بيت سيف...
وبين ما كان سيف في الحوش يهف على روحه بالمهفه الا بدخلة امينه راجعه البيت..
هي مادخلت الحوش الا المهفه طايره ليها وصرخه من سيف:
ــ هااااااا.. اغيب يومين ارجع الاقي الحاله قايمه وين طايره .. ؟؟
ويقوم ليها :
ــ وويش هالجاهل دا ولد مين ... ؟
بشير دخل وعلى طول يركض غرفتهم ويسكر الباب وراه..
سيف بقهر:
ــ قليل الآداب ولا يسلم الحيوان... مين هالجاهل؟
امينه ترتجف وماهي عارفه ويش تقول له:
ــ بببنننت.. بنننت
ــ يعني تعلميني الحين انها مو صبي .. بنيه.. بنت مين دي .. انا خبري قالو رحتي المستشفى ويا العله .. ترجعي لي بجاهله..؟ بقتيها من هناك؟؟؟ مين دي..؟؟
ــ بنت .. نذير ..
ــ هاااا... ويش تقولي انتين؟؟ ويش تهلوسي؟؟؟
سيف سكت شوي وصار يطالعها بأستغراب..
ــ يعني .. بنت حليمه؟ رحتي السجن لحلموووه...؟؟؟
امينه بخوف تهز راسها الا تعاجلها صرخه قويه نشفت دمها ...
ورحمه من قوة الصرخه صارت تصيح.. وامينه ماهي عارفه تهدأها...
سيف بهدوء غاضب ومخيف يمسك امينه من عباتها صوب الكتف :
ــ بتقنعيني.. ان هذي بنت نذير وحليمه.. لاااا.. هذي بت حليمه لحالها.. شوفيها من خياسة فعلتها واتهامها لولدي بالبطاله وقتله قالت ويه دفاع عن شرف.. هذي بنتها هي مو بنت ولدي خلي شرفها اللي دافعت عنه ينفعها ..
ويشد امينه من كتفها ويدفها ويهدد فيها:
ــ وبسرعه ترجعيها ليها ولا ابغى اشوف خلقتها.. لا انتين وياها برى...
امينه بقهر وعصبيه ودموعه تسيل وبصريخ :
ــ حدك.. بس يللا عاد.. كل شي ولا تتهم بتي بشرفها.. هذي بنت ولدك ماهي بنت احد ثاني .. وولدك ماقتلته بتي .. قتله ولدنا..وانت سامع بأذونك... و لا تقعد تفسر الأمور على هواك.. وماني طالعه بهالبنيه...
عباس عصب وصار يضرب في امينه اللي كانت حاضنه رحمه وتصيح هي وياها.... الا يسمع صوت بشير طالع من الغرفه يصرخ فيه:
ــ لا تضررررب اميييي ....
ويعاجله بصفرية فوق راسه حد ماعنده... خلته يدوخ ويطيح مغمى عليه..
في داك الوقت و رحمه مازالت تصارخ بلا وعي بشير اخذها من ايد امينه وطلع بها يركض ..
امينه خلاص حست نفسها شوي وبتستجن.. قامت وراه وطلعت... وتركو سيف مرمي بالحوش ...
وبين ما بشير يركض صادف في وجهه حسين اللي كان راجع من عمله بالسياره .. ضرب بريك حسين ووقف وهو منصرع بس سم واحد ويصفق بشير اللي وقف قدام السياره وهو حامل رحمه في داك الشارع الضيق بهالفريق ..
بشير من شاف حسين ركب السياره وهو يرتجف ..
امينه لحقت عليهم وفتحت باب السياره:
ــ بشير .. حول من السيااااره حووول .. ولا تزيدني هم على همي..
الناس بالفريق تجمعو على السياره بيشوفو ويش صاير وويش هالصريخ..
حسين منصرع مو عارف ويش السالفه.. دار على بشير :
ــ بشير .. ويش فيك؟؟ ومين دي الجاهله؟؟؟ ...
بشير وملامحه ماتتفسر من شدة الرعب والخوف و التشتت:
ــ هذي بنت اختي .. ابوي مايبغاها.. ابوي بيضربها..
امينه قعدت على ركبها على الأرض قدام باب السياره الخلفي المفتوح وحاضنه بشير اللي بحضنه رحمه.. وتصيح صياح يفطر القلب وتتشكى بلا شعور:
ــ تعبت اني.. تعبت من هالعيشه ويا هالسيف.. بنت ولده وبنت بنتي دي ..حارمني ازورها دي 9 شهور حتى مادريت بها خلال هالفتره انها حامل.. ويوم شفتها وجبت هالبنيه يقول لي مو بنت ولده .. وصلت فيه يطعن بشرف بتي .. مايكفي انها مسجونه ظليمه وقهر... وين نولي على عمرنا حنا.. وين نرووح...
صار حسين يحاول يهدي في امينه و يترجاها تركب السياره وتروح وياهم البيت.. ويطلب من اهل الفريق يتوزعو كل واحد يروح لحاله..
ركبت امينه وماهي داريه والأفكار تاخذها وتوديها.. ويش بتسوي..؟؟
وفي بالها انها خلاص طفحت من هالسيف وتبغى تتركه بأي طريقه...لو تتطلق وترجع تتشتت زي حياتها لول.. ولا هالعيشه القشره وياه..
وصلوا البيت ودخلهم حسين.. وكان محمد بالحوش..
ودرى حسين ان عمته ومرته لسا في بيت ابو بدر...
محمد اخذ بشير اللي كان مبين عليه التعب .. وياه غرفتهم في حين امينه قعدت بغرفة الجلوس مع رحمه تنتظر رجعة ام عبدالله وفاطمه..
رحمه كانت تصيح بالقوه... لدرجة نزلت مريم مستغربه .. شافت حسين بالحوش وسألته:
ــ ويش فيها بشرى لهالدرجه تصيح..؟ ولويه صياحها صاير غير..
ــ دي مي بشرى .. دي بنت جيرانا..
ــ ها .. أي جيران.؟
ودخلت مريم الغرفه على امينه.. وانصرعت من شكلها..
امينه اللي من دخلت مريم فكرتها رجال وعاجلت ترفع ايدها بتنزل غطاها.. ويوم انتبهت انها مريم وقفت وصارت تطالع فيها وفي ايدها رحمه ..
وجه امينه مليان ضربات و عبايتها مدحنه بغبره.. وحالتها حاله ..
مريم بخوف:
ــ ويش صاير .؟؟ فيش ؟؟
صارت امينه تحكي لمريم السالفه وهي تصيح... الا بجية ام عبدالله وفاطمه ويخبرهم حسين بالحوش باللي صار..
وتركض فاطمه لأمينه..
امينه من شافت فاطمه حضنو بعض ... وكل وحده منهم حامله طفله بيدها... رحمه تصيح وبشرى تطالع في رحمه بعيون مستغربه ومتألمه وشوي تصيح وياها....
امينه وهي ضامه فاطمه:
ــ يابعد امي يابتي .تسلم عليش حليمه سلام كفير. ويش بيدي على حليمه اني.. وهذي بتها.. بتنحرم منها..
وفاطمه ماهي قادره تصيح...
مريم تطالع فيهم ومفهيه... جت بتطلع الا ام عبدالله الأخرى على الباب مفهيه وشوي تصيح وياهم...
وفي بيت ام علوي.. الرجال وكان اسمه معتوق ويصير ولد عم ابو عيسى...
وعيسى وام علوي متغطيه بملفعها بعد ما اصر معتوق انها تكون موجوده..وتسمع الكلام اللي بينهم
معتوق بأستغراب:
ــ انت يعني متأكد ان علي حسين آل .... مات من زمان؟
عيسى :
ــ أي والله وانا ولده؟
ــ ما تدخل مخي هالسالفه كلش . . شلون تقول انه مات من 27 سنه وانا من 22 سنه بالضبط شايفينه انا و ابويي ..!
ام علوي :
ــ الله يهديك ياولدي نقول لك ابو عيسى توفى من عمر عيسى مالحق حتى يشوف ولده..
عيسى يحس نفسه في متاهه.. وكأنه فهم اشياء ماوده يفهمها ولا يصدقها:
ــ كمل .. وقول لي اوراق ويش ؟
ــ اولا على أي اساس اكمل لك...؟ متأكد انك انت عيسى علي حسين الـ.....؟؟
ام علوي رفعت ايدها وصارت تدعي:
ــ حسبي الله على من ظلمك ياولدي... ماعنده اثبات .. شهادة ميلاده و مايندرى هي موجوده عند عمه والا ماسوو له اصلا.. ياولدي ظلموه ظليمه لدرجة كنت خايفه يروح وياكم البحرين بعد فاتحة امه المرحومه ..
عيسى منصعق دي سالفه جديده يسمعها...
ام علوي صارت تصيح.:
ــ ياولدي مادري مين اللي كان جاي وقتها لعزا اختي المرحومه.. من اهلكم بالبحرين.. حتى كنت خايفه ياخذو عيسى وياهم خصوصا انه صار يتيم لا ابو ولا ام .. الا مني اني خالته ومن عمه فريد ابوه... وكنت مستغربه جيتهم للفاتحة وهم اللي ماجو فاتحة ولدهم من 5 سنين قبل ... كيف ما دروا به وليش ماجو مادريت...
عيسى منصدم.. يفكر ام علوي على طول من توفت امه خذته هي... و لا بهالسالفة دي كلها..
معتوق صار يفكر في كلام ام علوي وفاجأهم برده:
ــ لكن يوم العزا على السيده .. كان ابوك موجود ؟؟؟..!
ام علوي تضرب على فخذها:
ــ موجووود ويه ياولدي.. اقول لك ابوه مات من سنين مات قبلها.. تقول لي عايش؟؟ مات بالغوص... حتى ما احد عزاه الا اهل الفريق .. مادروا اهله بالبحرين ماحد وصل ليهم خبر.. ...
عيسى بشحوب واستنكار يسأل الرجال:
ــ ويش دراك انت بهالكلام.؟
ــ انا بكبري جيت للعزا مع ابويي...
ــ ليش كم كان عمرك..؟؟
ــ كان 10 سنين .. يعني افهم واتذكر.. حتى اذكر شكل ولد عمي اللي استقبلنا عدل...
عيسى صارت الأفكار توديه وتجيبه... وبهدوء:
ــ تقدر توصفه لي؟
ــ انتونا بتجننوني.. تبغاني اوصف لك ابوك... شلون بعد ؟..
ــ اقول لك مو ابوووي والله مو ابوووي القضيه انكم ماتواصلتو ابدا طول عمركم ولا شفتو بعض الا ديك الحزه.. وقولك هذا مايدخل المخ ابوي مات قبل لا انولد...!
معتوق بهت ومو مستوعب ...
ــ يعني اللي شفناه مين؟؟؟
ــ هذانا اقول لك اوصفه...
ــ حنطي .. ومربوع.. عيونه ضيقه وحواجبه كثيفه.. خشمه طويل... ايه وكان فيه شامه كبيره في ايده ماذكر يمين لو يسار .. بس انتبهت ليها وانا جاهل حسيتها بقعه ..وسألته عنها احرجته اذكر
عيسى فتح عيونه:
ــ هذا... هذا... عمي سلمان...
ام علوي بهتت وماهي مستوعبه الموضوع..
معتوق مو فاهم ويش فيهم:
ــ أي سلمان... عرفنا على نفسه وكان وياه كذا رجال كلهم قالو انه علي حسين
ام علوي صفقت صدرها... واستوعبت السالفه....
في حين عيسى اللي مبين عليه انه فهم الموضوع واللي يتمتم بهدوء:
ــ علي حسين... يعني طلع اسم ابو عمي حسين... بعد !
ام علوي في بالها :
ــ على شان كذا جدته صارت تنادي عمه سلمان... لكن اني مادري ان اسم ابوه حسين توي ادري..ياربي ويشه اليوم وويش هالنوايب اللي جايتنا... يالله تستر..
عيسى بهدوووء يتمالك غضبه واستنكاره الشديد:
ــ قالو ليكم علي حسين وبس .. بدون اللقب .. يعني عمي سوى حاله حزتها ابوي ..!! بس شلون وعلى أي اساس ..اخذ حتى اللقب وويش اثباته.؟ . ؟؟؟
معتوق :
ــ مادري انا..ماذكر قالو اللقب لو لا.. دورتوا راسي بهالسالفه .. انا جاي لشي .. واكتشف الحين اشياء...!!
عيسى :
ــ اسمح لينا ياخوي بس والله الكلام اللي تقوله ما يدش المخ وشان منت مصدقني اني عيسى علي حسين ال.... ،، اطلع وياي لأي واحد من الفريق واسأله..
معتوق بهدوء:
ــ انا ما اندليت بيتكم الا بعد ما سألت عن الأسم ودلوني عليه
ــ ايوااا.. صح دي كيفا فاتتنا.. وهذا انت قلتها ..
ــ بس والله سالفتكم تحط المخ بالكف... المهم ياخوي انا كنت جاي اجيب لك نصيبك من ورث جدك المرحوم..
ــ ها.. ويش دا بعد؟
ــ هذا الله يسلمك ابو جدك له املاك في البحرين والسعوديه قسمهم على ابوي و جدك.. الله يرحمه ,, فعطى ابويي مصنع في البحرين يشتغل عليه ويديره ويرسل ارباحه كل فتره لجدك بالسعوديه ،،، واما جدك عطاه ارض زراعه هنا اذا قرر يبيعها لو يستثمرها...يصير لأبويي سهم من ارباحها .. توفى جدك وورث المرزعه لأبوك اللي على حد علمنا الى الآن ماباعها ولا استثمرها... بس من قبل 20 سنه تقريبا اشترى نصيب ابويي من الأرض وطرش لنا البيزات....اما المصنع حق ابويي ظل يشتغل و صارت الأرباح تنرسل لأبوك للعام اللي طاف نوصلها له مع كل لنج يطلع من البحرين لهنا ....و الحين المصنع قرر ابويي يبيعه ولازم توقيع اوراق انك استلمت نصيبك كامل من البيعه فجيت انا بنفسي ...
عيسى حاط ايده على خده وشابح بعيونه يفكر بكلام معتوق وفي باله:
ــ يعني طول هالمده كان عمي بعد يستلم ارباح نصيب ابوي من المصنع البحريني .. فوق انه مسوي روحه هو...!!
معتوق يقطع حبل تفكير عيسى:
ــ بس بعد هالسالفه لازم يجي ابويي المره الجايه ويايي ونشوف ويش هالحاله وندور علي حسين اللي املناه ابوك ...
عيسى بأستغراب:
ــ لكن كيف تقول ابوك وابوي ولاد عم.. كيف ما عرفه وهم كل سنه ينزلو البحرين 3 شهور يصيفو هناك.. معقوله ما خالطه ولا عاشره.؟؟
معتوق:
ــ مادري والله ..!!
ام علوي بهدوء:
ــ عيسى ياولدي لا تنسى جدك توفى ويتم ابوك من لما كانوا صغار فأنقطعت علاقتهم بالبحرين وظلت جدتك ترعاهم..
ــ ومعقووووله ماصار وصل كل هالفتره ؟؟؟
معتوق:
ــ هالسؤال تسأله ابوي اذا جى..!!
>>>>>>>>>
المفضلات