الفصل العاشر........
طلعوا كلهم.. يشوفوا ويش فيه بدر .. لقوه واقف على باب الحمام .. وعاطنهم ظهره .. وانتبهوا تحته ماي... سواها على نفسه قبل لا يدخل الحمام..
ام عبدالله جابت فوطه ورمتها تغطي فيها اللي شافوه لا ينحرج بدر اكثر .. وبدر لسا واقف يتنفس بأختناق والدموع في عيونه محتقنه.. ويطالع في الأرض...
شوي انتبهت كريمه لبنتها جنه.. اللي كانت تطالع في بدر بعيون حزينه وتصيح ...
الا تسمعها تشاهق شهقات متتابعه ودموعها اربع اربع :
ــ كل مني اني... اني اللي كنت داخل الحمام وماطلعت بثرعه...
مسكت كريمه ايد بنتها وصارت تفرك فيها ...:
ــ ماعليه امي ماعليه...
وفي بالها:
ــ الله يكون بعونك وعون اهلك...
زينب راحت لولدها ومسكته من كتوفه وصارت تمسح عليه وتنكت له :
ــ عادي بدر عادي ياغناتي .. والله كلنا سويناها يوم حنا صغار .. و مو عيب ..
حسينه :
ــ أي والله .. ياما وياما سويتها اني ههههههه.. وحرمت احصر روحي على طول صرت اروح الحمام
ماسمعوا الا بدر بهمس مقهور ومخنوق وهو لسا مو راضي يتحرك من مكانه :
ــ ماحصرتها انا...
كريمه تبغى تهدي الموقف :
ــ ايه ماعليه جنه غناتي تقول لأنها كانت بالحمام.. اسمحوا لينا ..
بدور بعفويه:
ــ لكن جنه من طلعت بدر كان توه واصل الحمام و بال
زينب التفتت لبدور وصرخت عليها:
ــ وانتيييين احد سألش..؟؟؟
بدور خافت .. تبشعت وشوي تصيح..
خذتها ام عبدالله هي وجنه اللي لازالت تصيح :
ــ امشوا نشوف الدادو.. يمكن قعد....
حسينه وكريمه دخلوا وياهم الغرفه...
فاطمه :
ــ ام بدر روحي استريحي اني بتصرف ...
ام عبدالله طلعت من الغرفه:
ــ لا روحو اني بتصرف ..
فاطمه: ــ ماعليـﭻ يمه... خليــﭻ داخل معاهم.. واذا قعدت بشرى ناديني...
زينب حاسه ان ولدها مستحي ماتبغى تكلف على فاطمه ولا تبغى تحرج ولدها اكثر..
ــ ماعليه ياخيه خليني اني اتصرف وياه.. روحي استريحي..
وصارت تمسح بالفوطه اللي على الأرض اول وتصب ماي وفاطمه ماهي عارفه تروح وتخليها ولا هي قادره تسوي شي وزينب مو مخلتنها...
دخل بدر يسبح ..
وشوي يسمعو صوت صلاح يصيح وينادو زينب تجي له ترضعه خصوصا ان ام عبدالله شالته ولا سكت ...
فاطمه مسكت ايد زينب وخذت منها الماي :
ــ روحي رضعي ولدﭺ وسكتيه اني بتصرف ..
وقامت زينب لولدها وصارت فاطمه تطهر المكان بالماي شوي الا تسمع داخل الحمام صوت شي معدن طاح عالأرض...
فاطمه وقفت على باب الحمام:
ــ بدر .. بدر شفيك ؟
بدر داخل الحمام كان قاعد على كرسي ويصب على نفسه ماي من مغطس ... ومن شده حرارة الحروق انفلتت طاسة المعدن اللي يشيل بها الماي من ايده على الأرض... وكان قايم يحاول يشيلها وبين ماهو قايم وبصعوبه زلق وطاح وصفقت جبهته على الأرض..
صوت الطيحه وصوت تأوه بدر المختنق اجبر فاطمه تفتح الباب عليه وتدخل .. دخلت وهي خايفه عليه بلا شعور .. و غطته بالفوطه بسرعه وهو دايخ من الضربه ومو في وعيه...
كانت فاطمه مندهشه من شكل حروقه وشكل رجوله .. حست نفسها مخنوقه وشوي تصيح عليه... وفوق هذا ضربة بجبهته تورمت..
حملته وصارت تسحبه لين باب الحمام الا بطلعة ام عبدالله بتقول ليها بشرى قعدت وشافتهم على هالحاله وفاطمه تأشر ليها ان لا يدرو اللي داخل ...
جت ليها ام عبدالله تركض وصارت تساعدها... ودخلو بدر الغرفه ...في داك الوقت اوتعى بدر على عمره وانتبه لوضعه فقعد على منامه وهو مستحي ووجهه مولع حده.. حست عليه فاطمه ابتسمت له:
ــ انت حسبة ولدي .. لو جبت بشرى قبل الحين كان هي اكبر منك حتى.بـ 10 سنين... . لا تستحي امي .. لا تستحي...
وعطته ثيابه يلبسهم.. وطلعت عنه...
صار بدر يلبس كل كقطعه من ثيابه وهو يشاهق شهقات متقطعه ودموعه لا شعوريا تنزل... مستحي من اللي صار ومتألم من وضعه .. ويتذكر انهم كلهم شافوه بهالحاله .. صار يطالع في رجوله بعد مالبس ويحركها بقهر .. الا ردت فاطمه طقت الباب عليه:
ــ خلصت لبس؟
وتدخل وهي حامله بشرى في ايد و في ايدها الثانيه طاسه فيها ثلج ملوت في خلقه...
سدحت بشرى على جنب على بطنها سدحتها المفضله وكان عمرها 4 شهور.. وبشرى مع هالسدحه تحاول قد ماتقدر ترفع راسها وتتأمل حواليها...
وجلست فاطمه جنب بدر وهو ساكت وماينسمع له حس غير دموعه اللي تنزل وتشرح وضعه وحالته ...
مسحت له دموعه و حطت الخلقه على جبهته.. وصارت تضغط عليها وتحركها بحركة دائرية لينزل الورم.. ومافي بالها أي شي تقوله ماهي عارفه ويش تقول اصلا.. !!
كل تفكيرها كان برجوله وكيف وضعه .. عرفت ان بدر ما سواها على نفسه الا لأنه تأخر على ماوصل للحمام بسبب رجوله و من حرارة الألم اللي يحسه فيها...
وقطع جو الصمت هذا بشرى :
ــ غغغغغغغغ آآآآآ...
فاطمه استغلت هالحركه من بشرى لتلطف الجو مع بدر :
ــ بدت تقرى ملايتنا...
وبشرى :
ــ آآآآآآآآآ اغغغغغغغ ووه
وفاطمه تعيد كلام بشرى وبشرى مستانسه و تزيد وتتبسم...
بدر ابتسم .. فاطمه :
ــ ابشوف قول لها انت بعد بتعيد وراك .. لو بس اني؟
بدر مستحي .. وفاطمه تجبره :
ــ اتحداك .. هالنتفه هذي تسمع كلامي بس ... ماتحب الصبيان هي ما تسوي ﭽـذيه لأبوها >> كانت هذي كذبه من فاطمه على شان بدر يتحمس..
بدر صبي وطبع الصبيان يحبوا التحدي ومافيه شي مايقدرو عليه...
التفت عفويا لبشرى وصار يقول زيها .. بملامح جاده جدا.. :
ــ اغغغغغغغغغغ
بشرى ساكته ما ابدت أي رد فعل تتأمل فيه مستغربه..
بدر يرجع ويعيد مره ومرتين بجديه وبشرى حدها تطالع فيه بدون أي ردة فعل ...
شوي صار بدر يستهبل وتحول الوجه الجاد الى وجه مضحك اجبر بشرى تضحك ولأول مره بصوت عالي..
ضحكتها خلت بدر يغير تعابيره ويضحك .. في نفس الوقت فاطمه مستغربه وتضحك :
ــ ترى اول مره بنتي تضحك ﭽـذيه .. اول واحد تضحك له انت ..
بدر من هالكلام استانس حده وصار يضحكها زياده وكل حركه يسويها تزيد هي ضحك...
شوي الا بجية بدور ليهم طلعو الضيوف وهي مستغربه وفرحانه من ضحك بشرى ..
فاطمه خذت بشرى في حضنها وقعدوا قبالها .. بدر وبدور..
بدور صارت تستهبل .. وبشرى تكتفي تطالع فيها و تبتسم.. على عكس بدر اللي من يسوي ليها حركه فقعت بشرى ضحكتها..
بدور بغيره:
ــ مااااني شمعنى انت تضحك لك واني لا .. اني بنية زيش اضحكييي تااااه.. وااااه
وابدا لا مجيب .. وبدر بس يسوي ليها حركه ترجع وتضحك وفاطمه ماهي قادره عليهم وتضحك هي وياهم...
وجت ام عبدالله : ــ ويش صاير على ويه هالضحك؟؟ههههههه يابعد ابوي ابوش ويا بعد امي امش.. ياعيوووني هالضحكه...
... زينب تسمع ضحكهم وهي في الغرفه .. ابتسمت وتنهدت من قلب :
ــ عسى الله لا يحرمني طيبكم وعطفكم... يا اهلي ...
في السجن... حليمه منسدحه على السرير دموعها ماهي راضيه تجف .. ماهي مصدقه اللي صار.. ولا شوفة امها بعد هالمده.. تتحسس مكان بطنها اللي كان منتفخ.. وتتنهد :
ــ ايييه ... الله يعينيش يا ام بشير .. واني اللي حملتش حمل فوق حملش.. .. والله يصبرني على هالحال....
وفي بيت استاذ عبدالحميد... وفي حوشهم ..
حسينه ماتقدر تروح بيتها على طول اذا طلعت.. لازم تقعد في كذا محطه ..
ــ وييي .. عور افادي هالبدر... الظاهر رجوله ماخلته يوصل الحمام بسرعه
كريمه بعصبيه على حسينه:
ــ وانتييين الله يسلمش الشرهه على اللي يقول لش شي.. على طول صرتي تبربري قدامهم.. ماتشوفيها مسكينه شكلها ماتدري ماقال ليها رجلها.. وانتين رجول وما رجول واعرج ومدري ويه .. زين ماشلت التبسي وصفقتش به
حسينه غطت نص وجهها ببوشيتها:
ــ يمه يمه..سمت على عمري الزهرا ام الحسنين... تسويها ياكروم.. ويش دراني ماشفت لساني الا يتكلم لحاله..
ــ لسانش يتكلم لحاله ها.. امسكيه واذا ما انمسك قصيه لو سمحتي.. لكن درس يعلم الواحد مايقول لش شي نوبه فانيه..
ــ انا لله.. يللا عاد خلاص ياكريمه ولا تزعلي .. اقصه مره فانيه.. ماقلتي لي .. شفتي لي مواصفات للعله اللي ابتلشت بها.؟
كريمه بعدها منقهره من حسينه اللي حطتها في موقف محرج:
ــ لا شفت.. ولا باشوف.. خله يدعي ربه ليل ونهار ينزل له حورية من الجنه.. طاح حظه ..على حظ ام جابته..
حسينه حطت اياديها على راسها:
ــ علي .. علي .. علي .. يااااعلي... استغفرررر الله... اهو اني اقوم بيتنا احسن لي لا يحوشني شي ... نااايبه من نوااايب الزمان كريمه اذا عصبت.. اووووه... ناااايبه من نوايب الزمان.!!
كريمه وبنبرة غضب قويه:
ــ الله وياش..
ــ بل .. يمااااه.. هيبة الله عليش... مع السلامه..
وطلعت حسينه تركض ...
جنه بعدها متكدره ومتأزمه على شان اللي صار..
كريمه تواسيها:
ــ امي لا تحطي اللوم عليش .. هو مريض بعد الله يشافيه.. مو منش اللي صار.. وانسي اللي شفتيه.. ادعي له الله يشفيه..
ولا يسمعوا وراهم الا واحد قايم من تحت شرشف :
ــ ويش فيه... شيه ويش صاير
كريمه:
ــ بسم الله الرحمن الرحيم... من متى انت هنا ماشفناك..
جاسم يضحك بعباطه:
ــ من زمان من اول ماجيتو..
ــ وساكت يالنحيس تتصوخ هاااا.. ماتتوب من التصوخ..
ــ لالالا.. كنت نايم وقعدتوني..
كريمه تسخر عليه:
ــ ايه.. عيونك مبين عليها النوم.. وتشدب بعد.. انقلع مالي خلقك..
جاسم مسك جنه:
ــ لا .. صدق صدق.. ويش اللي صار؟
ــ ما ثار شي ومالك شغل..
جاسم يدف راس جنه بقهر ويعيد كلامها بنفس الغلطات وبأسلوب مستفز...
جنه من دون شي تحس نفسها فيها الصيحه بعدها ويجي جاسم ويزيدها .. انفجرت صياح:
ــ اماااه شوفي جاثموه...
شان تشيل كريمه شحاطة وتلوحها بسرعه على جاسم اللي كان يركض منحاش للباب و مامداه بيفتحه الا ابوه داخل راجع البيت .. هو من شاف ابوه من الخلعه شهقه شهقه ووقف على اطراف اصابعه ورجع على ورى مترين... وغير اتجاه نحشته من الشارع الى غرفته يركض....
عبدالحميد:
ــ ويش فيه هالأهبل كنه شايف جني..
كريمه : ــ ماعليك منه اهبل
ــ وويش فيها جنه تصيح.. اكيد ضاربنها هالهيس..
ــ لا تونا راجعين من بيت ابو بدر ...
وصارت تقص على عبدالحميد اللي صار.. وجاسم طبعا خلف باب غرفته يتصوخ الكلام اللي يدور بينهم في الحوش ..
في بيت ام علوي....
و ام علوي تخيط قفة خلصت سفها.. وعيسى قاعد معاها..
ام علوي :
ــ غريبه ياولدي للحين ماطلعت .. ادت العصريه الحين وانت من صباحة الله مقابلني... بالعاده ياعساني ما افقدك تصبح من فجر الله وتطلع ماترجع الا الضحى العود تعاوني على الغدا و تتغدى وتنام لك سويعتين وتعود تطلع.. اليوم مادري ويش فيك..؟؟ ولا انت جاي تقول لي..؟؟ مريض؟؟ تعبان؟؟ ويش فيك؟؟؟
عيسى ماسك جريده يقلب فيها:
ــ قايل لش اماه اليوم اجازه... وزهقان اطلع ادور شغله فانيه.. ماتبغيني وياش .. غافنش عفر .. شبعتي مني وزهقتي..؟؟
ــ يؤ بسم الله عليك .. انت تغفني .. لو ازهق منك.؟ انت ضوا هالبيت و زادي ومايي بهالدنيا.. ما اشبع منك اني .. اليوم اني ماني مصدقه .. !
ــ من الفرحه يعني.. اجل مانى مشتغل وبقعد وياش 24 ساعه..
ــ هههههههههه يابعد ابوي.. عاد مو 24 ساعه.. سوي لك يومين الخميس والجمعه حالك حال هالأوادم.... وويش تقلب صار لي ساعه اسمع صوت قراطيس
ــ ههههههه جريده البارحه رئيسي في العمل خلص قرايتها ورماها..
ام علوي تنهدت:
ــ ايييه ويش بيدي عليك ياولدي عالقرايه... حسبي الله على اللي كان السبب ...
ــ وويش فيها مدرسة امي ام علوي .. ويش حلاوتها.. حفظت من القرآن واعرف الحروف و اعرف اقرى على قدي .. و الأرقام والحساب علمني اياهم حسن جارنا مع ولده علي .. وهذاني عال العال .. لازم مدرسه يعني..؟؟
وبين ماعيسى يقلب في الجريده.. شاف خبر عن البحرين... وبهدوء :
ــ اماه..
ــ امي ..
ــ عمي ابو سلمان ويش اسمه الكامل ..؟؟؟..
ــ اسمه علي الـ.... هذا اللي اعرفه ياولدي وله اسم فاني سلمان .. ولأن ابوك الله يرحمه سماه جدك علي بعد .. كانت امك تنادي عمك بأسم سلمان على شان تفرق بينهم .. لويه تسأل ؟
ــ ايواا.. على شان كذا سمى ولده سلمان الحين... لا بس .. واحد اعرفه يقول كان يعرف ابوي و يعرف عمي بس بأسم سلمان و كان يعرفهم كأخوان ليهم نفس اللقب وثنينهم بحريينين.. و الحين يعرف عمي سلمان ..
ــ يعني ويه مافهمت ؟
ــ مو انا داير راسي ...عمي ويش سوى بالضبط على شان قدر ياخذ هذا كله مانى داري.. وويش سالفة هالأسامي المخربطه.. !!
ام علوي بهدوء:
ــ ماودك تروح البحرين ياولدي.؟
عيسى بأستغراب :
ــ هااا..
ام علوي تكمل خياطه القفه بأبتسامه مبين عليها الحزن:
ــ روح وشوف اهلك هناك.. لا تفكر فيني الله وياي..اهلك مايعرفوك ماشفناهم بحياتنا جو الا بفاتحة المرحومه امك واستغربنا جيتهم وهم اللي ماجو فاتحة ابوك... ظنيناهم يوم مايجو انهم قطعوا العلاقات من توفى جدك المرحوم..
مسك عيسى ايد خالته رفعها وباسها :
ــ اماه... انتين كل اهلي .. وويش باسوي فيهم اهلي اللي في البحرين بعد كل هالسنين ووين بلقاهم.. حقي بيرجع لي بدون روحة بحرين...
وفي باله:
ــ كيف اروح واخليش وانتين بهالحاله مالش احد بهالدنيا غيري... وانتين اللي افضالش ما تنعد علي.. اطلع اكبر اناني.. وما يندرى بهالروحه ويش الله يكتب لي هل ارجع سالم لو ما ارجع .. وهل احصل مرادي لو لا .. ايييه حقي بيطلع في يوم ياعساه بآخر الدنيا.. والله وياي ...
شوي الا بابهم يطق ...
ام علوي:
ــ يؤ مايندرى مين اللي جاينا بهالحزه..
فتح عيسى الباب لقى رجال غريب ما يعرفه... وسأله :
ــ وين علي حسين آل ...؟؟؟
>>>>>>>>>>>>>
المفضلات