حسينه الخطابه في بيت كريمه مرت عبدالحميد تشرب وياها قهوه ...
ــ ايه يا ام جاسم.. والله و اصير ادور ادور على ديك البنيه اللي بهالمواصفات ماني شايفه .. لازم تنقص حاجه.. ياتصير قصيره.يا سمرا .. يا خشمها افطس .. يا عيونها صغار .. يا شعرها ليفه .. يا منتفخه مره تقولي ماكله خميرة الفريق... يا منتحله مره تقولي مجوعه.. لازم حاجه من هالمواصفات تنقص لا واللي باط شبدي آآآه اللي باط شبدي....
وتصير حسينه تفرك تفرك صوب شبدها بأيدها..
ــ اللي بااااطنها وحارق مرارتي .ومدوبنها دوبه...... هالطلب العجيب ..اللي مادري من أي نايبه جايبنه..!!
كريمه ماهي قادره على حركات حسينه وميته ضحك :
ــ ويش هو بعد ازيد من كذا ليش بقى شي؟؟
حسينه تصفق وهي تعوج بوزها يمين وشمال:
ــ قولي ويش مابقى .. حبة خال
وتأشر على خدها اليمين وهي تعوج بوزها..
ــ هؤ .. حبة خال يبغوها منيه... بالله من وينا دي نجيبها.. نخترعها ليهم..
ــ بسيطه حصليها انتين بكل المواصفات.. وخل اهلها يدقو خدها وشم...
ــ ههههههه ضحكتيني واني مقهوره... خلني احصلها اني اول .. لا اني اللي با اندق دق ..
ــ زين تنازلي منتين مجبوره تدوري ليهم..!!
حسينه تتنهد من قلب : ــ اييه.. مو استلمت عربون اني .. وهطططططط ..شفطته مابقى منه ولا ريال.. فمجبوره ادور..
ــ ليش كم اخذتي عربون من صاقعه؟
ــ 50 ريال... وقالو الـ 50 الفانيه بيعطوني اياها بس احصلها.. ضامنين ياخيه ضامنين...
ــ علي ياعلي ووين طيرتي الـ 50...
حسينه تمسك راسها:
ــ وينا بعد...؟؟
وتحط ابهامها في بوزها :
ــ على .. هفففففف هفففففف..
كريمه ماتت ضحك:
ــ غربال يغربل القداوه اللي تسوي فيش هالسواة...تسوى عليش الحين تقنيده هالراس؟
ــ حاشى علي ماتسوى.. مادريت اني مابحصل هالمواصفات دي كلها مادري هالصبي ويش سالفته.. عجب عجاب.. تفصيل يبغى لينا نفصلها له...طالع لينا من وينا من خناقه تخنق عدوي..؟ مامر علي مفلات هالنمونه موووليه..!!!
لكن مو منه.. من امه ضبعة اللايقه... اللي مخلتنه على هواه.. بعد مو حاله حال الأوادم يخليها على هواها تختار له ديك البنيه الحليوه الزينه.. الا يبغى يتلقف ويتشرط!
ــ وحيدها بتدلعه وبتخليه على هواه..
ــ الا فجعة هالتلفزيون الأغبر .. يشوفو فيه ديلاك المفصخين ويتشرطو.. ويلي ويلي ديك النوبه ياخيه الله لا يراويش فلم مصري قعدت اتابعه الا تجيش الممفله وي وي... استحي اقول والله... بس باقول... شفتها بعيوني جعلني اموت اذا كنت شدابه... عالبحر قاعده مفصخه ... مادري ويش رنقه هالفلم والله .... وي وي عجل يافرج الله..اللي طالع اكفر من اللي متستر .. حق ويه بعد هالنايبه .. لو كشتها المنشوره تقولي فاقعه فيها الكهربا ...تراكض على ديك الرمله وتقول... : وحيد ياحبيبي .. وحيييد.... جعل يتوحدو فيها زبانية جهنم بدست.... وتبغي الصبيان مايشوفو ويتشيرطو.. قلل الله حياهم... اني المرأه واستحيت اطالع هالمناظر ..
ــ ههههههههه اما مفاصيخ.. ضحكتيني والله..
سكتت كريمه شوي وانتبهت وبمكر:
ــ وبعدين يا حسينه .. سلمش الله ... من وينا لش تطلع قناه تجيب هاللون ؟ ماعندنا غير السعوديه .. ركبتي لش انتل من متى؟
حسينه مختلعه وبأنكار مبين عليها:
ــ لا انتل.. اعوووذ بالله..
ــ هاااا... حسييينه.. تشلخي على مين ..؟؟؟ بدون انتل حدش السعوديه ويالله تطلع... ومافيها افلام زي ماقلتي.. من وينا المصري هااا.. من وينااا... غير القناه المصريه ...؟؟ >>> لمن يحب مراجعة اليوتيوب لمواكبة ذاك الزمن ومن مسلسلاته على القناه السعوديه الأولى ( كلمات متقاطعه 1395 ) ( الوهم 1395)
حسينه انتبهت لروحها انها مصيوده ومايحتاج صواريخ اكثر:
ــ اهوو .. يا ام جسوم انتين بعد مسكتيها علي .. ويش اسوي فقيرة مسكينه اني مالي حدا اسلي روحي بهالتلفزيون..
ــ هههههههه بلاوي .. يا حسينه بلاوي...
الا بدخلة جاسم عليهم يركض ركيض .. ويقعد وهو ميت ويلهث الا يشوف تبسي فيه خضره وماي حاطتنه امه لحسينه..
على طول اخذ الماي وصار يشرب بسرعه ..
حسينه:
ــ يؤيؤ . ويش فيك كأن لاحقنك شلب؟
كريمه: ــ ويش مسوووي بعد من صاقعه وجاي منحاش؟؟
ــ بدروه.. بدروه الخايس .. باق فلوسي .. ولاحقني يبغى يطقني..
حسينه ضربت صدرها:
ــ ويه... بدر ولد زينب .. لالالا.. ماتتصدق دي .. وبيبوق فلوسك بيلحقك يدقك لويه.. ؟ فايده بعد..؟
كريمه تعرف ولدها بس ماتبغى تتفشل قدام حسينه وحسينه ام لسان بتروح الحين ومابتخلي احد في الفريق الا بتقول له ولدها شداب والسالفه عكس اللي قاله..
كريمه بغضب:
ــ لويه يعني.. ولدي شداب لا سمح الله؟
ــ لا محشووومين.. بس يعني هالبدر مافيه منه .. مؤدب و حباب و ..
تقاطعها كريمه بغضب :
ــ يعني ولادنا الكخه؟ ماتدري انتين بهالبدر ويش يسوي في ولدي .. توه من فتره فالعنه بحجره..
ــ انا لله يا كرووم .. ويش فيش شبيتي فيني.. المهم اني باروح الحين و اذا رحتي لخواتش اساليهم شان يعرفو وحده بهالمواصفات من دِير ازواجهم .. خلني استريح وافتك..وهذا بقايا عيش من غدياتي جمعته لدجاجاتكم..
ــ حياش الله... مشكوره..
وتدور كريمه لولدها بعد ماطلعت حسينه وتمسك اذونه وتمصعها له..
ــ اني تعبت منك .. ابوك يرجع ويتصرف وياك..
وتنادي على بنتها جنه :
ــ جنه امي تعالي اخذي العيش اللي جابته حسينه و انفريه في صندقة الدجاج..
جت جنه وكانت ما شاء الله تبارك الله طفلة في غاية اللطافه والجمال والبراءه.. عمرها 7 سنوات بعمر بدور بنت شهاب وزينب .. وصديقتها تروح معاها للمعلمه ام علوي..
( بذاك الزمان كانت روحة المدارس للبنات قليله واذا بيروحو يروحو وهم اكبر من هالعمر .. يعني 9 سنوات وفوق ... اما بداية التأسيس ففي المعلمه.. وكذلك بعض الأولاد )
جاسم يتعيلف في اخته لما راحت امه المطبخ شايله التبسي ..
ــ وانتين بعدش مخاويه السودا.؟
جنه ببراءه مع غلطه في حرف س و ص تقلب ث ... و حرف ز يقلب ذ :
ــ أي ثودا..
ــ بدوروه اخت بدروه الأهبل.؟؟
ــ ماهي ثودا.. وويش عليك انت؟هي ثديقتي من ذمان..
ــ حراميه ديلا ترى.. .. بواقين ..
ــ ماباقت من عندي ثي ... شداب انت
يضرب جاسم ظهر اخته بقهر:
ــ انا شداب يا بقره..
جنه تصارخ:
ــ امااااااااااه ثوفي جاثموووه يطقني ويقول عني بقره
كريمه بقهر تكفخ المواعين في المطبخ:
ــ يجي ابوه الحين من المدرسه ويتصرف وياه ابو الفشايل دا...
الا بدخلة عبدالحميد...
ــ يـــــــالله.. ويش صاير؟؟؟ صريخكم اول مادشيت تلقاني..؟
كريمه ..: ــ شوف ولدك وسواياه... خله يقول لك ويش مسوي..
جاسم بخوف: ــ انا ماسويت شي ...
جنه: ــ يقول عن الناث ثودان..
عبدالحميد يضحك على هالقول وعلى حرف الثاء :
ــ ههههههه ومين هالناث؟
ــ ثديقتي بدور ..
ــ أي بدور؟
ــ اللي تروح وياي للمعلمه..
ــ لا.. عرفت الحين انا... !!
كريمه طلعت من المطبخ:
ــ اخت بدر.. بيت شهاب راعي الخضره..
عبدالحميد:
ــ آآآه يالمعلنه اللي فلعك داك اليوم من قهره؟ ومن طولة لسانك..؟ ويش مسوي هالنوبه بعد؟؟؟
جاسم يرفع صبعه وبخوف :
ــ ماسويت شي .. والله والله والله..
ــ لا تحلف لا اساطر بك.. تعال تعال..
وشال عبدالحميد العقال من على راسه.. وأشر على جاسم يدخل الغرفه..
دخلو وبدى الأستجواب اللي كان واضح فيه كذب جاسم خصوصا ان عبدالحميد يعرف ولده مستواه مو عالي ويدري بأستاذهم الرياضيات هذي عطاياه للطلاب ... فهالكذبه ابدا مو لصالحه و ابوه مدرس بنفس المدرسه...
10 دقايق استجواب,... والا يسمعو كريمه وجنه وهم برى ...صوت ضرب العقال و جاسم يصرخ ويصيح...
ــ والله ما اعيدها !...
وعبدالحميد يصرخ فيه:
ــ مو كفايه مفشلني في المدرسه بين الأساتذه الأجانب واقول يللا اجانب .... كسلان وانت ولد استاد.. قاص وجهي.. بتفشلني قدام اهل الفريق بعد يا طايح الحظ., يالهيس الأربد !
عيسى وهو يشيل اكياس اسمنت لبناء عماره .. يفكر باللي شافه.. وفي باله:
ــ اروح .. لو اسأل خالتي اول ... اخاف اسألها وتقول لي لا تروح...
الحيره ذابحتنه... ويتذكر كلام الرجال:
ــ ايه يا عويس .. تدري البيت قديم على حطته من عمري... والوالده الله يسلمها تبغى تعدل فيه ...فويش رايك تشتغل مع العمال ... منها نشوفك كل يوم ومنها تنتفع بكم قرش..تظل اولى من الغريب ..
كان هذا سلمان . 24 سنه ..ابن عم عيسى و اصغر منه بـ 3 سنوات.
ابو عيسى وابو سلمان اخوان من الأم ...فلكل واحد منهم لقب عائله تبعا لأبوه ... و سلمان هذا مايدري بالماضي ..
الماضي اللي حكته ام علوي لعيسى بعد سنين طويله من وفاة امه ... واللي وضحت فيه وين حقه وكيف انظلموا...؟؟؟
كل كيس اسمنت يشيله يذكر كلام خالته ام علوي...كيف كانو يعيشو جميع في ذاك البيت بيت ابوه المرحوم ورثه من جده بعد ما توفى وترك جدته ارمله للمره الثانيه ...
اول مره ترملت كان عندها ابو سلمان من زوج على باب الله ماورثهم في الحياه أي شيء غير الديون ...
وتزوجت بعدها جد عيسى صاحب الأملاك و المزارع وكان مطلق بس بدون اولاد بعد ما تزوج مرتين وظن في كل مره ان عيب عدم الأنجاب من طليقتيه .... فما له الا يتزوج الأرمله ام الولد يكفل ولدها ويسدد ديونهم.. و ان شالله يبارك له وينجب منها ذريه وفعلا اخذ على قد نيته..و جابت منه ابو عيسى ....
وقطع تفكير عيسى وتقليبه لأحداث الماضي نداء من رئيس العمال... ليقرر عيسى في باله:
عيسى في شرود:
ــ وان كنا اعداء... لازم اروح .. فرصه جت لعندي شلونا طيرها... ؟؟ بكره اروح.. خلاص ..
بدر في البقاله... محتار ويش يشتري ...
عباس راعي البقاله:
ــ ياحي الله سبع ولد السبع...
بدر مستغرب : ــ انا بدرشهاب ..... مو سبع السبع...
ــ ههههههههه حلاوتك.. ادري ..ما اقصد اسمك... هاااا شكلك ماتعرف يعني ويش السبع.؟ يعني اسد ولد اسد..
بدر تشقق من هالوصف :
ــ عمي .. امبى بهلوان ابو البقر.. وشقليطه الكور .. و غرشة بيبسي .. و ربيان بفكي .. و اربعه جبن ضاحكه
( =) اتوقع هالأشياء الغالبيه مرت عليهم من لما كانو صغار.. وغالبهم موجودين بس مو مثل حلاة اول.. بالنسبه لأربعة جبن الضاحكه تنوخذ بالحبه في ذاك الوقت يعني 4 مثلثات.... المثلث الواحد بنص ريال ... )
ــ ما شالله عليك يابطل .. هالخمسه من عند استاذ محسن اجل..
بدر بفرح :
ــ ايييه..
عباس :
ــ وهذي كوره لك زياده تلعب فيها ... هديه لأنك شاطر..
ــ مشكووور عمي...
ــ حياك الله .. ربي ييسر لك..
طلع بدر من البقاله وكانت في اول الفريق وبيتهم اخر الفريق كان للبيت بابين ابوه مخلي المجلس ببابه محل للخضار..
وبين ماهو يتمشى يلوح بكيسه فرحان.. و في باله البهلوان والشقليطه والربيان له ولبدور يحبوهم و البيبسي لأبوه والجبن لأمه تحبه... الا يشوف الناس تتراكض قريب بيتهم والصراخ يصرخ وصياح و ناس تجيب ماي و دخان وايد يطلع من محل الخضره راح يركض له والناس تباعده ... لقى امه تصارخ برى وجنبها بدور :
ــ ويلي عليك يا ابو بدر... مادري هو داخل المحل لو لااااا.. اجاااويد شوووفوووه..
وهي تزحف ماهي قادره خلاص دخلت شهرها والنسوان اللي بالطريق يحاولو يمسكوها ويهدوها..
طاح الكيس من أي بدر وتنفر .. وصارت الناس تدوس على اللي كان فيه..
وراح يركض للمحل ...
الى الملتقى...
المفضلات