في بيت سيف..
امينه وهي تطبخ الغداء ... حست قلبها مقبوض .. حطت ايدها عليه وخذت نفس:
ــ اللهم صل على محمد وآل محمد..اعوذ بالله منك يا ابليس..
الا بدخلة باسم عليها المطبخ:
ــ اماااه وين راح بشيروه.؟
امينه :
ــ تلاقيه اذا مو في غرفته.. في الحمام..
ــ لاهو بالحمام ولا بغرفته..
ــ هاا.. يمكن في المنجره مع ابوك.. تدري به من البيت للمنجره ومن المنجره للبيت
ــ انا توي جاي بالمنجره ادور عليه ابوي يبغاه في شغله
ــ يؤ .. ياساتر .. ويييين راح ؟؟
..
على ساحل البحر .. كان جالس .. ومع صوت الأمواج دموعه كانت تتناثر...
منكمش وضام راسه بين ركبه... يسمع في اذونه صدى صوت اخته حليمه... في ديك الليله وهي تستنجد:
ــ الحقوووني... داخله عليك بالله ...لااااااااااااا ...
كان بشير في ديك الليله منحاش من البيت بدون ما احد يدري ... بيروح مزرعه يتجمعو فيها اصحابه يعزموه كذا مره يجي ويجلس وياهم وهو يتحجج بألف حجه مستحي يقول ليهم ابوي و امي مايرضوا ... وفي ايده سكين.. على شان أي كلب يصادفه من احد النخيل يقدر يخوفه ويدافع فيه عن نفسه...
في طريقة للمزرعه لازم يمر على بيت اخته ... ومر هذيك الليله........... وسمع الصريخ...
يتذكر هالأحداث اللي كانت ماتفارقه حتى بالحلم... و يتأمل البحر عالمدى البعيد .. بنظره حزينه ووجه يحمل من ملامح الحزن شيء لا يوصف ..
الا بجية محمد ولد حسن... صديقه صار معاه في الأبتدائيه والمتوسطه.. الا ان بشير ماكان يحب الدراسه فما كمل الثانويه وصار يشتغل مع ابوه في المنجره.. اضافه الى انه مالاقى تشجيع في بيتهم من احد الا حليمه اخته اللي كانت تحده عالمذاكره ومايلقى غير الرسوب وتهزيأ ابوه له...
محمد يمسح على ظهر بشير:
ــ ويش فيك ياخوك قاعد هنا.. جاني باسم يدور عليك وتوقعت انك تكون بهالمكان...
التفت بشير لمحمد بأبتسامه حزينه..
محمد:
ــ لمتى وهذا حالك يالخوي.. ما تفضفض اللي في قلبك وترتاح .. وتريح اللي حواليك... قريب تصك السنه وحنا ماسمعنا لك حس...
بشير يحط ايده عالرمال ويتحسسها ... الا محمد بأنفعال .. يشيل حجر ويقوم صوب الساحل ...
وبشير يتأمله ... لقاه يرمي الحجر بالقوه على قبقب كان فوق سلحفاه صغيره يبغى ياكلها...
ويمسكه وهو منفشخ في ايد ويرفع السلحفاه في ايده الثانيه ..ويضحك:
ــ هالملعون المفترس بياكلها مسكينه هالضعيفه.. الا بطيئه وصغيره.. روووح..
ويرمي القبقب في البحر وتاخذه الأمواج بعيد.. وينزل السلحفاه في البحر تسبح..
ولا يلتفت لبشير الا يلقاه يتنفس بالقوه ويزيد التنفس يصير مشاهق ويرتجف وعيونه شابحه ووجه صار اصفر ..
ركض له:
ــ ويش فيك.. ويش صار ؟؟ خفت يوم اقتل القبقب يعني... ؟؟ بشير ..بشير..؟
وارتفع صوت بشير بالصراخ والنياح... ينوح مثل الفاقدات .. ينوح من الم عظيم صايبنه ..
محمد مو عارف ويشي سوي وياه.. لمه بين ذراعينه::
ــ بشير حبيبي ويش فيك... من ويش هالحاله...؟؟؟!!
خلاص محمد مو عارف ويش يسوي .. الا بجية باسم من بعيد يركض ....
وقف عندهم وانفاسه تتقطع:
ــ بشيروه .... انت هنا وابوي يدورك...!!
وانتبه له يتنافض وحالته حاله..
ــ ويش فيه؟؟
محمد مرتعب:
ــ مادري .. فجأه صار كذا..
مسكوه وشالوه وصاير ثقيل مره .. اطرافه متنمله .. يحس نفسه تكسح مايقدر يتحرك..
وسحبوه للبيت..
و في بيت ام علوي...
ام علوي بين ما هي تسف بالخوص ( تعمل اشغال بخوص النخل . مهفه وسفره وقفه وما الى ذلك.... تسترزق من وراهم وتساعد ولد اختها عيسى اضافة لكونها معلمة قرآن وصلاه لأطفال)
سمعت صوت طقطقه.. وكل شوي تزيد...
ــ عيسى.. امي عيسى.. ويش تطقطق...
عيسى وهو مقهور:
ــ نااااايبه تنيب دا نعال... دقيت فيه مسمار بحجره و لزق .. ابغى الحين اعوج المسمار على داخل مو راضي ...
طاااخ طاااخ.. آآح .. أي أي..
جت لعيسى ضربه بالغلط .. بالحجر وتورم صبعه.. صار يفرفر فر في الحوش بهدووء وهو كاتم الآلم ...
ام علوي حست.. تركت الخوص:
ــ أٌمي .. عيسى.. ويش بك...؟؟ دقيت روحك؟؟ تآآآذيت..!!
عيسى يرفع راسه للسما ياخذ نفس عميق وعيونه خلاص احمرت يحس بتدمع من الألم المكبوت..
ــ ههههه.. لالا.. بس شكله هالمسمارالملعون مو راضي يطاوعني...
ــ صوتك.. صوتك يقول لي تآآآذيت .. فوينا تآذيت.. غربال يغربل المسامير والنعول..
عيسى وهو يضغط على صبعه... :
ــ ماصار فيني شي اماه .. صدقيني..
ــ احلف ...
سكت عيسى ...
ام علوي تركت الخوص ومدت ايدها:
ــ تعال .. تعال عطني اياديك ..
عيسى يضغط ..:
ــ مافيني شي اماه.. لا تحاتي عاد..
ــ ماتطاوعني يعني؟؟؟
ــ لا ..خلاص ...
وتقرب من ام علوي وعطاها ايده اللي ما انضربت... مسكتها وصارت تتلمسها ..
ومدت ايدها الثانيه.. ابتسم.. وفي باله ::: ــ هذي ام علوي ماينلعب عليها...
وعطاها ايده الثانيه...
صارت تتلمسهم .. لين وصل للصبع حسته منتفخ اكثر من غيره ضغطت عليه .. حست بعيسى تحرك شوي من الألم ...
صارت تدلكه مسكت طرف مشمرها.. في مكان تدري به مثقوب.. ودخلت اصابعها وشقت من المشمر شوي بللته بماي في مغطس جنبها فيه خوص منقوع ... ولفت فيها صبع عيسى بالقوه على شان ينزل الورم...
وصارت تتلمس ايد عيسى بدفء وحنان وتتنهد:
ــ يا خلف امي هالـﭽفوف الكبيره.. يا بعد ابوي هالـﭽفوف الخشنه... يلعن ابوه نعال اللي يسوي فيك هالسواه...ماتاخذ لك غيره ياولدي..؟
ارتبك عيسى.. ويش يقول ليها..؟؟
هالشهر ماعنده امكانيه يحط قرش لنعال جديد.... يقول ليها ان ماعنده يكفي حتى لتصليحه والأفضل يصرفها على خبز لو لبن ليهم.. ؟؟
يقول ليها انه مابيقدر ياخذ له الا زنوبة هنود ..!
سكت ... مافي باله جواب..
ام علوي فهمت عليه... وماحبت تحرجه وتسأله عن الفلوس ...
تلمست ملفعها بأيد في حين مازالت ايدها الثانيه ماسكه كف عيسى...
وطلعت من ربطه فيه 20 ريال.. وهو يطالع فيها.. من شافها سحب كف ايده وبأنفعال..:
ــ اماه ويش تسووي؟؟
ــ داخله عليك بالله.. تاخذهم وتشتري لك نعال عدل.. اذا انك تحبني.. اذا انك تعزني.. وتبغى تطلع من البيت واني راضيه عليك.. تاخذهم..
عيسى بألم .. وحزن.. :
ــ اماه .. حق ويه انتين كذا.؟؟ لويه تمسكيني من ايدي اللي تعورني... خليهم تحتاجي ليهم...
ام علوي تبوس ايدها وجه وقفا:
ــ احتاج لويه ياحسره.. ياولدي الخير موجود والحمدلله...اهل الفريق مو مقصرين آخر الشهر اللي يجيب لي خبز و اللي يجيب خضره وبيض واللي يجيب ثياب .. واللي يجيب فلوس .. كلهم كروة تعلوم ولادهم ... ويش ابحتاج اني ؟؟؟ خذهم ياولدي اني خاشتنهم ديلا وخاشه غيرهم بعد .. خذهم ياعيني خذهم...
اخذ عيسى الفلوس وباس راس خالته.. وطلع بنعال الحمام ( وانتون بكرامه ) ليشتري له نعال جديد.. و يشوف كان يلاقي له شغله بهالنهار.. وبعد ماشرى النعال .. مامداه يرمي الطبقة الثانيه بيلبسها... الا يسمع وراه صوت يعرفه حق المعرفه ,, صوت ما يحب يسمعه ويحس بالألم كلما سمعه... :
ــ حي الله عوووويس .. وين هالغيبه.. من زمان ماشفناك..؟؟ !
الى الملتقى
المفضلات