انتهى العرس .. وطلعوا المعاريس وراحوا بيتهم ..
بالبيت ..
انوار : يما ترى اليوم بنام فوق بغرفه ديمه ..
ام محمد : مسرع ما استحليتي اغراضها بسم الله !!
انوار : بس يما صعبه جذي تخلينا مره وحده؟
ام محمد : ادعيلها بالتوفيق .. حتى انتِ بتخليني وبتروحين لبيت رجلج !!
انوار : عادي اصلا انتوا تبون الفكـه مني .. اما ديمه لا خوش بنت طيبه وهاديه كلنا نحبها
ام محمد : عن الدلـع .. وروحي غسلي مكيـاجج ..
ام محمد بعد ماصعدت غرفه ديمه .. صكت عليها الدار وقعدت شوي مسكت صورتها اللي على كبت الكمبيوتر .. ونزلت دمعتهـا .. فراقها صعب .. بس هذي حيـاتها ومستقبلها.. ودعت من كـل قلبها ان الله يهنيها ويوفقها .. يمكنها كابرت جدام انوار لكن بينها وبين نفسها فقدت جزء منهـا .. فقدت حسها بالبيت ... وهذي مشكله الزواج الاهل يربون ويتعبون كل هالسنين والزوج ياخذها عالبارد المستريح ..! بس هذي سنـه الحيـاه ..
-------
بالطريج كان مشعل يتكلم ويتكلم لديمه لكن ديمه ماكانت تشوفه وعيونه بالارض .. كـان وده يسمع صوتها لكن سكوتها مافسـره الا انه حيا .. قدّر لها الموقف ويووم وصلوا .. بالغرفه ..
مشعـل : جهزي لج جنطه بعد ساعه رحلتنا ..!
رفعت عينها لا ارادي له .. وبصدمه تكلمت !!
ديمه : وين ؟؟
مشعل : واخيراااااا سمعت صوووووتج !!
ديمه لالحين تحت تأثير الصدمه : وين بنروح ؟
مشعل : بنسـافر النمسـا ..
ديمه : بس !!
بعدين سكتت ..
مايبيها تخرب عليه مخططاته ..قالها
مشعل : انا بطلع جنطتي وبركبها السياره وجهزي اغراضج لج نص ساعه بالكثير انطرج تحت عشان تاخذين راحتج..
ديمه حركه راسها ببلاهه !! بتســافر الحين ..! والنمســا !!
" يالله مو جهزه لي بدلات !! اصلا وين ملابسي ؟ "
وبعد ماطلع مشعل دخلت غرفه التبديل .. وتفج اول كبت شافت فيه اغراض مشعل وتصكه بسرعه و تفتح اللي وراه وتشوف ملابسها معلقه والباقي بجناط مسكره ..
ديمه حاطه ايدها على حلجها : امبيه الحين شلون بفج هالجناط !! آه ياربي تعبانه ابي انام ..!!
خذت لها بدله مناسبه للسفر تسبحت ولبستها وقعدت الحين العلّه الجنطه شلون تفتحها وتطلع لها ملابس ..! الدوخه وقلّ الاكل والنعاس ملعوزها .. ودها تقوله مابي اسافر أجلها جم يوم لين ارتب اغراضي ..! بس اصلا مستحيه تشوف وجهه !!
وتفج اول جنطه ..وتحوس تحوس فيها ماتدري امها وين حطت البدلات !!
" يا الله !! "
طلعت لها جنطه صغيره وحطت فيها جم بدله اللي قدرت عليهم .. وحطت لها جم شيله و اغراضها وصكتها بعد ماصكتها حست براحه وحطت راسها على الجنطه .. ماحست بعمرها ونامت !!
انطق الباب كذا مره محد يرد دخل مشعل .. ما لقاها وطق باب غرفه التبديل ولا في حس بعد مافتح الباب شافها حاطه راسها على جنطتها ونايمه وشعرها كله ماي دمر الجنطه !! هالمنظــر ماقدر يمسك نفسه من الضحك وطلع من غرفه التبديل وقعد يضحك برى يوم هدى وتذكر شكلها كسرت خاطره !! ودخل مره ثانيه .. وعلى حطتها جان يقرب منها ويحرك كتوفها بخفه
مشعل : ديمه ديمه ..! قومي يلا ورانا سفره !!
عمك اصمخ في سبـــــــاتٍ عميق ..!
مشعل : ديمه يلالا مانبي نتأخر
تحركت ديمه بازعاج .. واول مافتحت عيونها على الجنـاط وشهقت !! تذكرت السفر !! وقامت بسرعه من مكانها
مشعل : واخيرا قمتي !! كسرتي خاطري بغيت اخليج نايمه واكنسل الرحله !!