باجر العرس !!
مشعل في حاله استنفار غريبه عجيبه ومتوتر اخر توتر .. ومحد كان يحاسبه على تصرفاته .. لانه فقد السيطره على توتره .. ما ينلام باجر راح تبتدي حياته الجديده .. راح يقترن اسمه باسمها واسمها باسمه على طول بحكم رابط الزواج .. راح تكون ديمه تحت رعايته وحبه وشوره وتحت سقف واحد بيجمعهم بالموده والالفه .. وراح يتكلل الحب اللي انزرع بقلبه بالزواج .. بأطهر رابطه تربط بين حواء وآدم .. رابطه أقرها الله في كتابه ورسوله في سنته ..
في هاليوم فبيت مشعل ..
عبدالرحمن : انت هيه ندري ان عرسك باجر بس مو بالصاله تجي توزع ابتسامات ندري انك مستانس بس اتكن شوي ..
مشعل : بس ودي اعرف انت شقاهرك ؟ كل هذا عشاني تزوجت قبلك ياخي ولا يهمك انا اكلم مدامتك واخليها تقدم العرس ..
عبدالرحمن : مالك دخل بمدامتي وعابل بعمرك انت وحرمك المصون ..
مشعل : انا ليش مجابلك بروح اشوف شقتي جهزوها ؟
وصعد مشعل فوق وشاف السويت مبخر ومعطر ..
ولقى امه والخدامه و دلال داخل ..
مشعل : يما خلي البخور والعطورات باجر مو الحين ..
امه : لا عشان تثبت الريحه وباجر ان شاء الله ببخرها لا تحاتي ..
مشعل : يعطيج العافيه ..
دلال : مشعل ترى ملابس ديمه اللي جابتهم بعلاليقهم علقتهم بكبتها عشان ماتتعفس .. اما الباقي بالجنطه مافتحتهم اهي اذا جات ترتبهم
مشعل : اوكي تمام .. بعد شناقصكم ؟
دلال : أي يما مال حلو القهوه .. دق علي وقال نعتمد الصحون ؟ والا لا ؟ يعني تبين الفضيات والا البلاستيك ؟
امها : فضيات اكيد .. وانا اخترتها
دلال : أي اشوى لاني قلتله جذي وبعدين قال خلاص باجر الساعه خمس العاملات بالصاله ..
امها : اشوى ..
مشعل بوادي واهم يسولفون بوادي .. اهم يفكرون بشكليات العرس واهو يفكر بأبعاد هالعرس
" هل بترتاح معاي ديمه ؟ هل راح اكون نعم الزوج لها ؟ حياتي بعدين شلون شكلها ؟ اقدر اسعدها ؟ "
دلال : مشعل شفيها زوجتك ادق عليها مااااااااترد!!
مشعل : ليش تدقيييييين ؟ البنت مشغوله وعندها الف شغله الحين !!
دلال : بقولها تجهز لها جنطه حق السفر .. حرام تنصدم بنفس اليوم !!
مشعل : لا تقولين لها بخليها مفاجأه ..!
دلال : هيه انت هالامور مافيها سخافه ومفاجأت .. ترى مو زين تنصدم !! على الاقل تأقلم روحها وتجهز ملابس تليق للمكان اللي بتروحون له ..
مشعل : اهي زوجتي والا زوجتج ؟ مالج دخل قلتلج يويلج ان قلتيلها ... وبس
دلال انقهرت : يووووه شفتي يما ..!!
ام مشعل : خليج من اخوج .. وتعالي رتبي معاي الصاله ..
دلال : عايله استبداديه !!!
ضحك عليها مشعل واهو يفكر بالمفاجأه اللي مجهزها لديمه باجر !!
----
ديمه كانت متوتره اكثر من مشعل .. لكن الفرق انها اهي تشغل نفسها بمليون شغله .. ورفيجاتها يزورونها .. هالثلاث ايام الاخيره .. كانت مسويه زحمه على ديمه .. اخر يوم وبالليل فضت عمرها لشغله ماغابت عن ذهنها .. صلت ركعتين وفجت القران وقرت لين هدى قلبها وطلبت من ربها التوفيق خصوصا انها على وجه حيـاة جديدة.. كانت الساعه تقريبا على الوحده وبعد ماتأكدت ان البيت كله نايم .. قفلت غرفتها وفجت كبتها اللي فوق حق ملابس الشتويه ..! كانت خاشه شي من زمـــان .. ماقدرت تطوله حطت كرسي الكمبيوتر وباليالله وصلت ايدها وبعدين قعدت تطيح الاغراض يمكن يطيح معاها الشي اللي خاشته ..! بالاخير انصدمت طاح جيس ملفوف ومقطوط من زمـان .. بس الغريب ان اسم الجيس من برى فرنسي ..! يعني هالشغله اهي شاريتها من فرنسا وقاطتها الخدامه بالكبت واهي ماانتبهت !!

فتحت الجيس وشافت البلايز اللي فيه وشهقت تذكرت محل الهدايا اللي شاريه منه من باريس .. ما فقدتهم لانها نستهم مع الوقت .. وقامت تشوف البدّيات وتقيسهم لين وصلت عند بدّي شهقت يوم شافته !! لانه غريب عليها مو اهي اللي مختارته !! بس الكلام المكتوب فيه خلا صدمتها تتحول الى ابتسامه وسيعـــــــــه .. ووقامت من مكانها بفرحه احلى هديه لها ..!! لانها من مشعـل !! وقررت تخشه وتلبسه بالوقت المناسب !!
شالكلام المكتوب فيه ..؟
بعد فتره وادركت اهي ليش فاجه الكبت تذكرت الشي اللي خاشته .. وراحت دورت ولقته .. ورجعت الملابس مكانها
فتحت البوم كان يتضمن صورها من كان عمرها بالشهور الى السنه اللي طافت .. بس كان خاص بصورها .. قعدت تطالعه وتضحك اللي يشوفها عمرها 10 سنين مايقول اهي ديمه !! وشافت صورها يوم كان عمرها 3 سنين .. لان كان يوم ميلادها .. ومحطوط على الكيكه رقم ثلاثه .. وامها شايلتها .. كانت تهبل خدود حمر وعيون غاطسه بالرموش!! ملامح اغلب الاطفال بهالسن !! .. ضحكت على شكلها وقررت انها تحتفظ فيه وتشيله معاها فبيتها ..! طاح ايدها على الالبوم اللي متعنيه وفاجه الكبت عشانه .. البوم صورها مع عمها !!
كل الفرحه اللي حصلت عليها من شافت الهديه والبوم صورها اختفت بعد ما طاحت عينها على اول صوره لعمها ..!
كانت بغباء تمسك الصوره وكأنها بتمسك عمها !! وبتحس بوجوده ..! عبرة تلتها دمعه ..
ديمه : شدعوة عاد وينك ؟ ادري انك مسافر بس تعال باجر عرسي !! شلون تبيني احتفل بغيابك !! اتصدق امس تحلمت فيك .. كنت تقولي مبروك ابتسمت لي ومشيت !! يعني مالك عذر انت تدري بزواجي ليش ماتحضر وتفرحّني !!
طاحت دمعتها على صورته .. مسحتها بأصابعها بكل ألم .. خاصه يوم عرسها تبي تشوف اعز الناس بقلبها .. تبي تحس بوجودهم ومدى اهميتهم بحياتها ..
تنهدت من قلب مو كل شي نبيه بنحصله !! وتجري الرياح بما لا تشتهي السفن !!
تنبهت على عمرها الساعه وصلت الثنتين واهي باجر وراها قومه من الصبح وراها صالون وعرس وطقطقه !! ردت الالبوم مكانه .. ونامت ..ووفرت كل توترها لباجر.. وكأن شي بقلبها مطمنها ان مشعل اكيد بيعوضها عن كل هالفراغ اللي تركه عمها بعده ..!
على ثاني يوم الساعه 10الصبح ..
ام محمد دخلت غرفه ديمه ..
ام محمد : انا بروح الحين الفنار ميشو انقطع صندلها حق بدلتها بروح اشتريلها ماراح اطول ..
ديمه : بروح معاج منو بيوديني الصالون ؟
ام محمد : بتروحين معاي الفنار ؟
ديمه : أي شفيها واذا خلصنا الصالون قريب منه
ام محمد : اوكي اجل جهزي اغراضج ..!
ديمه : ان شاء الله ..
بعد مانزلت ديمه مع اغراضها الصاله شافتها انوار
انوار: وين على الله وين رايحه ؟
ديمه : مع امي تروحين معانا ؟
انوار : وين ؟
ديمه : الفنار !!
انوار : وناسه خوش عروس تتمشى بيوم عرسها !!
ديمه : امي بتدور صندل لميشو وانا وياج بنقعد نتريق واذا خلصنا على الصالون
انوار : ايواااااا يالرااااايقين
ديمه : ههههههههه
راحوا مع بعض السوق وقعدت انوار وديمه بكوفي يتريقون ..
انوار : اللي يشوفنا مايقول ورانا عرس و طقطقه وخبّه !!
ديمه : يالله عليج كلا تذكريني خليني استانس بالحريه قبل لا ادخل القفص على قولتهم !!
انوار : دامكم تحبون بعض ماراح يكون قفص بيكون جنّه عليكم ان شاء الله
ديمه : اوكي بس هذي حياه كامله .. قبل ابوي اهو المسؤول عني الحين لا اهو المسؤول ..!
انوار : أي بعد زوجج
ديمه : أي مو اقولج حياة جديده بقراطيسها بدخل فيها .. وعلى الله اتوفق ان شاء الله ..
انوار : لا تحاتين مشعل خوش واحد واهله طيبين ودلال بعد بتقوم مقامي .. ودامج جربتي ستايل حياتنا روحي جربي ستايلهم ..!
ديمه : هههههههههههه أي مو اثاث اهو !!
انوار : والله ما احاتي الا المكيـاج انا عيني مو أي شي يضبط عليها !!
ديمه : اللي يقعد جنبج يتنرفز .. كلا تحاتين !! الحين خليتيني احاتي بعد تسريحتي ومكياجي
!!

انوار: ههههههههههههههههههههه والله انج نكته !!
يرّن تلفون انوار واستغربت !!
ديمه : شفيج تتمقلين بالتلفون ؟ ردي ؟
انوار : جراح داق !
ديمه : يحليييييله رددددي عليه
انوار : قلبي نقزني اخاف فيهم شي ؟
ديمه مسكت المنيو وهفتها على راسها
ديمه : متى بتوبين من المحاتاه تنرفزيييييييين الواحد !!
ردت انوار على جراح وسدت اذنها من صراخه !! اللي بط اذونها
جراح : الوو سااااااااعه على ماتردين !!
انوار : بطييييت اذني لا تزفّ!!
جراح : انزين شلونج شخبارج ؟
انوار : الحمدلله تمام
جراح : وشلون عروستنا ؟
انوار : بخير وتسلم عليكم
جراح :الله يسلمها من الشر .. امممم انوار تعذريلي منها لان لا انا ولا خواتي بنحضر العرس!
انوار طاح قلبها
انوار : ليشششش؟
جراح تنهد : مانقدر وينها عندج عطيني اياها استسمح منها وابارك لها
انوار : ماراح اعطيييك اياااااهااا الا تقولي شحقه ماراح تجوووون ؟
جراح بضيق : عطيني انوار بسرعه بليز والله مو فااضي
انوار : اقولك ماراح اعطييييييك اياها تفهممم ؟
ديمه : شســالفه ؟
بغت تقوم انوار من المكان عشان تتكلم وتشوف شسالفته بدون لاتسمع ديمه لكن شافت عكازتها على الكرسي الثاني وتكيسلت !!
انوار : قووووووول والله ماراح اعطيك اياهاااااا
سكت شوي وقعد يتناقش مع مشاري بعدين خذا مشاري التلفون من جراح !
مشاري : قوه انوار شلونج ؟
انوار بخوف سمعت بصوته نبره مختلفه !
انوار : زينه انت شفيك ؟
مشاري : وين ديمه عطيني اياها ؟
انوار : ليش ماراح تحضرون العرس ؟ انتوا مو عيال عمها ؟ مو لازم تتشرف فيكم ؟ ليكون بعد امك حرشتكم !! لا عاد مشاري ترى قويه ان سويتوها وماجيتوا !! على الاقل تقديرا لعمكم
مشاري : انتِ شقاعد تخربطين ؟ انوار امي تطلقت !! البنات ماراح يحضرون وجراح بيقعد بعد ماله نفس شي ..!
انوار شهقت ّ! : من صجككك ؟ ليش شصاااااار ؟؟؟؟؟ شحقه بعد هالعمر !!
مشاري : ترى والله متضايق البيت بكبره معتفس ..! عطيني ديمه خليني ابارك لها
انوار : حتى انت ماراح تجي ؟
مشاري تنهد : بجي ان شاء الله ببارك وبطلع ..
انوار : انزين مشاري شالسبب ؟
مشاري : ابوي ساكت ماقالنا شي صايره هوشه بس ماعرفها !
حفظاً لماء الوجه يستر على امه !!
انوار ضاع الكلام بلسانها !! عمرها ماتعاملت مع هالموقف انسان امه تطلقت شتقوله !!
انوار : الله يكون بعونك بس انت لا تضايق عمرك هذا قضاء وقدر ! مو انت اللي علمتني هالشي ؟
مشاري : والنعم بالله عطيني ديمه ببارك لها لاني ماراح ادخل الصاله بسلم على الرجاجيل واطلع ..!
انوار : اوكي اخذها
ديمه : هلا مشاري .. الله يبارك فيك عقبال ما نفرح فيك ان شاء لله .. معذور لا عادي راعي واجب ماتقصر والله .. لا تسلم على الرجاجيل بس ادخل الصاله يمكن تعجب فيك بنت حلوه والا شي بعد تضبط عمرك ! .. ههههههه أي في عيون حمراء جدامي ياساتر .. لاتوصي .. اجمعين يارب ..اوكي مع السلامه ..
انوار تطقها بالمنيو : لا ادخل الصاله يمكن تعجب فيك بنت حلوه هاااااااااااه !!