دلال بهالوقت كانت اتدق على ديمه .. لان العصر مرتين تدق عليها ولا ردت !
ديمه : هلا دلال
دلال : شفيج ؟ وينج اليوم
ديمه : سوري كنت مشغوله
دلال : مشغوله بشنو بعد ؟
ديمه : التفكير بيقتلنييييي والله
دلال : بسم الله عليج ليش تقولين جذي شصاير ؟
ديمه قالت لها سالفه مشاري
دلال : من صجج ؟؟؟؟؟ ايحبها !!!!
ديمه : أي والله انا راسي بينبط
دلال: انزين اللي يحب مايسوي جذي بالعكس المفروض يداريها ويبين لها انها مهمه بالنسبه له
ديمه : مادري اهو مو صاحي !
دلال : انزين والحين وينها انوار ؟
ديمه : مو هني رايحه موعدها
دلال : الله يشافيها يارب لالحين ماتكلمت ؟
ديمه : لا ولي باجر اعرفها اتحب العناد
دلال : يا الله .. انتِ بعد خلج عندها وحسسيها بأهميتها اهي بتلاقيها من مشاري والا من شنو ؟
ديمه : ماتتصورين قمت احاتيها يعني صعبه انسان يصك حلجه وما يتكلم اسبوع !
دلال : ماعليج شده وتزول واهي ترى الضغوط النفسيه عليها حيل يعني تو متش
ديمه : مو هذا هو واهو الخبل مو مقدر هالشي يجي ويزيد الطين بله
دلال : ماعليج ترى مصيرها بتزهق وبتتكلم
ديمه : يااااااااليت والله
دلال : انزين قوليلي شخبارج وشلون الجامعه ؟
ديمه : ابد والله تمام .. انتِ شلونج ؟
دلال : عااال العااااااااال وسي عبعال عندي يسلم عليج
ديمه : رديناااااااا لحركاتج البايخه قولي الصج
دلال : ههههههههههه اشوف خفتي لا والله اقص عليج بس حبيت اخرعج
ديمه : اشوى
دلال : لحظه ديمه اسمع صوت هوشه برى !
ديمه : وين
دلال :بالصاله لحظه لاتصكين الخط
ديمه : خرعتيني اوكي يلا روحي
كانت ديمه عالخط وتسمع صوت صراخ كانت اشبه بهوشه شباب !! وفكرت منو في شباب عند دلال ماكو الا مشعل وعبدالرحمن ! وميزت صوت مشعل لان الظاهر دلال يوم طلعت من الغرفه ماصكت الباب وصاير الصوت واضح !
عبدالرحمن بصوت عالي : شفيييييييييييييك ؟ ماتتكلم
مشعل قعد على القنفه وملابسه متروسه دم مطشر !
عبدالرحمن : مشيعللللللل تكلم مسوي حادث ؟
مشعل بصوت اعلى واهو ماسك راسه : لالالا لا تصارخ راسي بينفجررررررر
عبدالرحمن ينادي امه بصوت اعلى
وتنزل امه وتشوف شكل مشعل وقلبها طاح ببطنها ..
ام مشعل : شفييييك ؟ يمى سلالالامات فيك شي متعور ؟
مشعل : اقولكم والله مااااااااافيني شيييييي مو انا اللي مسوي الحاااااااااادث ارحمووووووني خلوني اخذ نفس مليون سؤال ؟
دلال اطلعت لهم من الغرفه
دلال : مشعـــــــــــل شفيييييييييييك ؟؟؟؟؟ من وين هالدم ؟
مشعل انفعل وخذا الفازه المحطوطه على الطاوله وكسرها على الرخاااااااام بأعصاب فالته
مشعل : لي قلتلكم مافيني شي يعني افهموووووووا زييييييييين ؟؟؟
خلاهم وصعد غرفته !
اهو بروح فيه اعصاب واللي صارله مو شويه ! وانغث من اسئلتهم ! حتى ماعطوه فرصه يتنفس !!
ديمه من سمعت كل هاللي صار صكت التلفون واهي ترجف خاااااااافت مشعل اكيد فيه شي اذا اهو مو مسوي الحادث اكيد كان بموقع الحادث وحاشه شي والا شلون دشداشته تنترس دم ؟؟
---------
واول ماوصلوا نزل بومحمد انوار ودخلها الصاله .. ولقى ابتسام وجراح قاعدين يشوفون تلفزيون ..
بومحمد : السلام عليكم
جراح : هلالالا والله حيااااك عمي
بومحمد : الله يحيك ويبقيك انا بروح اجيب ابوي من الدوانيه
وطلع بومحمد وتمت انوار معاهم
وسلموا عليها واهي قابلتهم بالابتسامه وماتكلمت !
جراح : يلا عاد انطر منج احنا ؟
ابتسام : ليش جراح اهي شفيها ؟
جراح : مادري والله بس ممكن تهوينا شوي
ابتسام : ليش ان شاء الله ؟
جراح ويغمز لاخته واخته خبله
جراح : يعني بالعربي فارقينا بعرف شفيها
ابتسام : شنو يعني ليكون اهي مستحيه مني ؟
جراح : اللهم طولك ياروح !
ابتسام : زين بس لا تنافخ اصلا بروح اقوم رهف وراها امتحان!
جراح : لاتقومين احد روحي وفكينا
ابتسام : لاوالله وتبيها ان قامت تسوي لي سالفه ؟
جراح : انزين خلاص روحي فوق
ابتسام وقفت
جراح : لحول شتبين ؟
ابتسام : زين اشوى عرفت روحك
جراح : هالمره شتبين ؟
ابتسام : مفتاح ثلاجتك
جراح ثلاجته شي مقدس بالنسبه له
جراح : لييييش ؟
ابتسام : ابي جلكسي وبيبسي والله مشتهيتهم ..
جراح : اففف اوكي اخذي بس مو تخمين اللي بالثلاجه كله
ابتسام : لا موكله بس ربعه
وتضحك وراحت فوق
وصرخ عليها : تراني حاسبهم واحد واحد يعني اخذي واحد بس
وردّاستلم انوار
جراح : هذي اللي تقولي بالمزرعه انا بتغير وانا مؤمنه بقضاء الله وقدره ومدري شنو وبالاخير تسوين بعمرج جذي ؟ ليش ابي اعرف
تأففت انوار ماتبي تسمع شي عن هالسيره
جراح : السبب منو مشاري ؟
رفعت نظرها من الارض والدمعه تحوس فيها وحركت راسها بمعنى أي مشاري اهو السبب !
جراح : عن سالفه المزرعــ ..
دخل بومحمد وبومحسن قبل لا يتم كلمته وانقهررر على توقيت دخلتهم الغلط .. كان توه ماخذ مع انوار وتوها تتجاوب معاه !
بومحسن : حياااااا الله انواااااار عاااااش من شااااااافج
ابتسمت له انوار وخذاها بحضنه
بومحسن : منصور وجراح روحوا الدوانيه انا ابي اقعد معاها لحالنا
جراح : شدعوه مالنا رب نسمع
بومحسن : اقول قوم واقصر الشر
جراح ضحك وراح مع عمه الدوانيه
واهو قاعد بالدوانيه يفرفر بالمحطات .. آذاه مشاري بالتلفونات
جراح : افففففففففف هذاااااااا شيبي ؟؟؟؟
بومحمد : منو ؟
جراح : اخوي العــــــلّه
بومحمد : تقول عن اخوك علهّ خبل انت؟
جراح : والله ياعمي انه عله العلل كلها
بومحمد : انزين ردّ على التلفون
جراح : عمي والله اعرفه يتأمر روح جيب هذا وحط هذا
بومحمد : مايخالف ردّ
جراح استسلم للأمر الواقع ورد على تلفونه
مشاري : سنّــــــه يالله ترد ؟؟؟
جراح : خير ان شاء الله ؟
مشاري : خلص تراااااااني متفشل فشيله العالمين
جراح : ليش بعد ؟ شصاير ؟
مشاري : عازم واحد ربعي توه جاي من السفر وكل مابي اعزمه تطلع لنا سالفه واليوم اتفقنا وتوني بنزل من السياره بدخل المطعم اكتشفت ان بوكي بالغرفه بدشداشتي الثانيه !!
جراح : وانت دايما عقلك طاير ؟
مشاري : المهم تراني على الدوار روح غرفتي وجيب البوك تلقى الدشداشه معلقه بسرعه لا تتأخر
جراح : اففف اوكي
مشاري : جم مره اقولك لا تتأفف التأفف حق الحريم
جراح : افففف زين امرنا لله
صعد جراح غرفة مشاري ومشاري سفط بالبيت وشاف سياره عمه بومحمد ونزل قال يسلم عليه ويروح
ودخل الدوانيه ولقاه وسلم عليه
مشاري : اجل وين جدي ؟
بومحمد : داخل بالصاله
مشاري : مو من عادته هالحزه يخلي الدوانيه ؟
بومحمد : داخل عشان انوار
مع انوار !!
مشاري انصدم
مشاري : انوار عندنا ؟
بومحمد : أي
طلع مشاري من الدوانيه وسفط سيارته سفطه محترمه ونزل ودخل الصاله
مشـاري : السلام عليكم
التفتوا عليه
بومحسن : جلسة سريه ممكن تطلع ؟
مشـاري : بتطولون ؟
بومحسن : عشر دقايق
مشاري : اجل بروح غرفتي شوي واجي
صعد الدرج ومازال نظره متعلق بأنوار اللي من سلم شافته نظره وحده خاليه من أي تعبير .. وبعد ماصعد قعد تقريبا ربع ساعه وخذا بوكه وشحن تلفونه .. ودق على جراح
مشاري: وينك ؟
جراح : شسوي مالقيت بوكك نزلت الدوانيه
مشاري : لانك مادورت عدل المهم لقيته
جراح بصدمه : دخلت الصاله ؟؟؟
طلع جراح من الدوانيه وقعد يتكلم بالحوش
مشاري :أي
جراح : انوار شافتك ؟
مشاري : أي ليش؟
جراح : ياخي انت لي متى بتتم مجنن البنت ؟ ياخي هي ماتبي تشوفك كافي اللي سويته بالمزرعه ؟ شفت شسويت ؟ انطرمت البنت علينا !
مشاري بقلبه وده يقول لا مو سالفه المزرعه هذي سالفه العن منها ! بس شيقول الشكوى لله !
مشاري : بليز جراح شي انت ماتعرف عنه لا تتكلم فيه
جراح : شنو ماعرف عنه ؟ حرام عليك البنت كانت زينه معانا الحين انقلبت عليك وعلينا .... المهم ليش مارحت لرفيجك ؟
مشاري : خلاص اعتذرت منه وقلتله يأجلها
جراح : ليش؟
مشاري : بس يلا مع السلامه
وصك التلفون
يوم سمع صوت جده طلع راح الدوانيه نزل اهو الصاله واستغرب مالقاها ؟
دورها بالغرف اللي تحت وبالمطبخ مالقاها وبالاخير شافها بالحديقه .. مو عارف شنو سرّ تعلقها بالحدايق ؟
دخل وحست فيه
ماطالعته وقرب من الكرسي وقف وراها ماسك اليدات حقت الويل جير وعارف ان جيته هذي ماراح اتغير شي ..
مشـاري : أنــوار ...!
ردت بصوت مسموع
انوار : نعـــم ؟

==========

شنو بيصير بين أنوار ومشاري؟
وهل أنوار بتنتقم من مشاري؟
واذا كانت بتنتقم شنو طريقة الإنتقام؟
كل هذا وأكثر بتعرفونه في الجزء الجاي..
أختكم في الله