تابع:


بهالوقت برومـا ام محمد ومحمد وميشوو .. كانوا واصلين من ثلاث ساعات .. والمترجمه راحت منهم وهي معصبه لانها نطرت بومحمد 10 ماوصل وطلعت ولاقالت لهم شي .. وام محمد كان خايفه تحاتيهم .. وبعد ما رنّ جرس الغرفه ؟ ميشووو ركضت فجّت الـباب ..
ميشوو : ماما باباااااااا جااااء
واتعلق ميشوو برقبه ابوها ..
وام محمد ارتاحت اول ما شافتهم
ام محمد : ما بغيتوا تجووون قعدت احاتيكم
بومحمد : ليش شصاير؟
ام محمد : مادري عنها المترجمه معصبه كانت تبيك
بومحمد :جان صبرت شوي
ام محمد : اقولك قامت ترطن فرنسي ماعرفت لها وطلعت بدون لا تكلمنا ..
بومحمد : بشوفها بعدين .. الا ماقلتوا لي شلون روما ؟
ام محمد : والله روعه
بومحمد : وين ديمه بشوفها مستانسه ؟
ام محمد تلتفت : جايه معاك اسألها
بومحمد : معاي؟؟
ام محمد : ديمه مو معاك ؟
بومحمد : انا مركبكم السياره كلكم مع بعض شلون تقولين ديمه معاي؟
ام محمد : لالالالالالا منصور مو وقت الضحك انت من صجك اتكلم ؟
بومحمد وقف بعصبيه : وين البنت ؟؟؟؟؟
ام محمد: خرعتني قالت لي نست طيرها بالغرفه وقالت خلاص برجع مع ابوي نطرتها لين وصلت الغرفه وتأكدت انها وصلت قلتلها قولي لابوج انج بتردين معاه .. قالت لي ان شاء الله وبس !
بومحمد : يعني ديمه اللحين بباريس ؟؟؟؟
انوار : ياربي شلون صار جذي !!
ام محمد بدت تبجي : يااااااويلي على بنتي
بومحمد وقف بتوتر : انا مركبكم السياره ومحركين قدامي ليش ترجعوووووون !!!!!
ام محمد : خل منك الكلام اللحين روح شوف بنتي ضايعه بباريس
محمد: دقوا على الفندق يمكن هي هناك
بومحمد : خلص حجزنا بالفندق يعني تلقاها طلعت
انوار: مالت عليها جان قالت لي اقعد معاها
بومحمد طالع انوار بنظره "مو وقت ضحك ! "
ميشوو : ديووووم ضاعت هيييييييييييييه
وقعدت تنط على القنفات باستعباط بومحمد فوّل خلاص اعصابه مشدوده ونزل تحت اللوبي والا يلحقه محمد
محمد : يبى لك مكالمه من فندقنا اللي بباريس
ويركض بومحمد تحت على الرسبشن ويكلم على وعسى تكون ديمه ..
------
مشعل كان نازل الرسبشن ولقى المغربي .. وقاله يتصل على الفندق فرعهم بروما ويطلب بومحمد .. وبعد خمس دقايق المغربي نادى مشعل وقالها بومحمد على الخط
مشعل : هلالالا والله بومحمد ها بشر شلون روما ؟
بومحمد : أي روما الله يهداك ديمه عندكم بالفندق ؟
مشعل : تطمن ديمه معاي
بومحمد : اشوووووى الحمدلله الله يطمنك بالخير .. توني واصل قبل ربع ساعه وانصدمت يوم مالقيت ديمه معاهم !! هي ليش ماقالت لي انها بتردّ معاي ؟
وقعد مشعل يفهمه تفاصيل الموقف لين خفف من توتر بومحمد وخوفه على بنته
بومحمد : انزين يا مشعل الفندق كله فلّ وين بتنام البنت !!
مشعل : لالا ياعمي ماعليك دبرنالها غرفه كلها يوم واحد
بومحمد : زين والله لا وصيك عليها باجر بكون عندها ان شاء الله العصر او المغرب
مشعل : لاتحاتيها ياعمي ماراح اخليها اصلا انا عندي اجازه
بومحمد : تسلم والله هذا العشم فيك .. هي وينها اللحين ؟
مشعل : هي فوق بالغرفه نايمه
بومحمد : خلاص ياولدي انا بروح ارتاح اللحين لا وصيك عليها
مشعل : ابشر لاتوصي حريص
بومحمد يعدّ مشعل مثل مبارك اخوه لانهم صج متربين مع بعض يعني لو مشعل مو موجود بباريس اللحين جان الله واعلم ديمه وين كانت !!
مشعل ماحب يقول لأبو محمد انه عطى ديمه غرفته وهو خذا غرفه رفيجه بس عطاه من الاخر انهم لقوا غرفه وخلاص .. لانه يدري انه احسن حل مطروح ومافي غيره
صعد غرفته الحاليه (غرفه ناصر) وطبعا شاف الغرفه كلها مرتبه لان ناصر موموجود مانام فيها.. ويوم بغى ينام استوعب ان بجامته بغرفته و راح غرفته وطق الباب وكان مفتشل بس رن رنه وحده بالجرس الا ينفتح الباب
ديمه : هلا مشعل شفيك
مشعل : ابي اخذ اغراضي
ديمه : ليش وين بتروح ؟
مشعل : ماراح اروح مكان بس بنام باخذ بجامه
ديمه : اهاا اوكي
دخل مشعل شاف الغرفه تلمع ونظييييييييفه ومرتبه وكل شي بمكان وكأنه اول مره يدخل الغرفه .. والتلفزيون ردّ مكانه القديم .. وكانت اللمبات مطفيه بس3 ابجورات كبار مفتوحه منوره المكان كله ..
مشعل : اوف اوف هذي غرفتي ؟
ديمه : هههههههههه ليش اول مره تدشها ؟
مشعل : لا بس صايره تهبل وذربه قبل ما اشتهي اقعد فيها دقيقه كله باللوبي
ديمه : ههههههههههه
مشعل : اييييي صج كلمت ابوج
ديمه : احلللللللللف
مشعل : والله العظيم ويقول توه واصل وطمنته انج بخير ومعاي وقال باجر العصر او المغرب بيجي
ديمه : زييييييييين الحمدلله
بعد ماشاف الفرحه على وجهها " معقوله ماراح اشوفها خلاص يااااه يااني بشتاق لها!! "
راح فج الكبت وخذاله بجامه بنطلون وبلوزه وسيعه بيضاء مقلمه بأزرق وقبل لا يطلع
مشعل : لاتفجين الباب لأي احد اول شي اسألي شوفي من على الباب
ديمه : افا عليك لاتوصي
مشعل ابتسم وساند راسه على الباب : ها ديمه تبين شي ؟
ديمه نزلت راسها : لا ابد مادري شلون اشكرك تعبتك معاي .......
ماكملت
مشعل قاطعها : لاتعتقدين كل اللي سويته عشان الواجب اوانج ثقل علي.. لا والله كل اللي سويته انا حاب اسويه وكنت حاب اجرب شعور الانسان بالمسؤوليه
ديمه : ها وشلون الشعور معاك !
مشعـل: والله احلىىىى شعور
ديمه بوزت : حقل تجارب صرتّ!
مشعل : هههههههه لاحشاج .. يلا تصبحين على خير
ديمه : وانت من اهله يبى : )
كان مشعل رايح بس سمع كلمه يبى .. والابتسامه مازالت على وجهه .. من يشوف هالديمه الابتسامه ماتفارق وجهه .. صج انه يدري ان ابتسامته تعور قللب ديمه لانها متعلقه بذكريات مؤلمه لها .. بس مايقدر يقاوم نفسه .. هي ما قالت كلمه " يبى " الا كنوع من المغايضه نوعا ما .. لانه يقول انها حببته بشعور المسؤوليه .. وهي ماتبيه هو بالذات ينظر لها بنظره مسؤوليه .. وانها مهمه وبتخلص .. !
وطلع من الغرفه
استغرب مشعل من هالبنت شلون غيرتله حياته مثل ماغيرتله غرفته عفستها فوق تحت بس للأحسن !!
ديمه حطت فوفو على طاوله الطعام وطلعت من جنطتها بجامتها ولبستهاوحطت راسها ونامت .. اول شي طردت كل افكارها عن اهلها لانها تعبت من التفكير واكيد التفكير فيهم بيطير النوم منها .. وشافت ان النوم اللي كانت محتاجته تخلى عنها بهاللحظات .. وسرقها تفكيرها لمشعل .. وتذكرت موقفها معاه بالمسشتفى وبالمطعم وبالشارع مع الجلب والجاكيت ومع التاكسي كان باين اهتمامه الواضح لها بس هي تبي تبعد تفكيرها عنه لان ان فكرت فيه اكثر بتدخل نفسها بأوهاام وظنـون هي بغنى عنهـا حاليا ..
يمكن يهتم فيها من باب الواجب او بحكم الجيره او اواواو .. كل اللي تعرفه هي انها ارتاحت له وبدت تحس بالأمان بقربه ماتبيه يبعد عنها .. النوم ادركها بهالوقت وطفت الابجورات وشحنت الكاميرا ونامت ..
بهالوقت مشعل قاعد على البلكونه .. مومصدق اللي صار معاه معقوله ديمه اللي يفكر فيها من اول ما شافها واللي كانت محتله تفكيره طول المده اللي طافت .. تكون هي نفسها حاليا تحت مسؤوليته !! اعتبرها احلى واجمل صدفه صارت له بحياته ..