وهذا الجزء الخامس حلووووووووو واااايد


:: .. الجـــــزء الخـــــامس .. ::
تقربت ديمه للدريشه وشـافت ربكـه تحت على البوابه .. وقعدت تطالع السياره شوي الا يجي مشـعل وكأنه مساند رفيجه بيدخله السياره والظـاهر ان رفيجه تعـبان حيل .. ومشـعل بس يصـارخ ويأشر على الموظـفين ديمه ماكانت تدري هو ليش معصب وليش يصـارخ .. بس رجحت ان اللي معاه رفيجه " لا ان شاء الله خير خير !! "
انوار : يمى عمره طويل ..
ديمـه : تتوقعين منو هذا التعـبان ؟
انوار: اتوقع اللي مع مشـعل دايما ..
ديمـه : الله يستـر عليهم الوقت متأخر
انوار : بس ليش ما انطروا الاسعـاف ؟
ديمـه : الظاهر الموظفين يبونه ينطر بس مشعـل مستعجل .. اشوفه يزّف
انوار : امممم يجوز ...... المهم انا بخلص شغلي وبنام
ديمـه : اوكي بس صكي الحاجز اللي بينا لاني انا بشغل الابجوره ..
انوار : ليش ماراح تنامين ؟
ديمـه : ماعتقد بيجيني نوم !
انوار : مالومج باجر السفره .. يلا وقفي على الاطلال وتذكري الاسبوع اللي طاف هههههه
ديمه : أي اخر يوم اخر يوم ..
راحت انوار تعدل ملابسهـا .. ومحمد وميشوو نايمين من زمـان وبعد شوي بتنضم لهم انوار .. بس تفتك من هم الملابس وتضبط شغلها عشان تقوم وهي مرتـاحه ..
اما ديمـه .. صحيح ماجاها نوم مو عشـان اخر يوم .. لالا .. بس كـانت بتطمن على مشـعل مو عشان شي بس عشان اللي تعبان معاه .. بتنطره لين يردّ .. اعتبرته نوع من انواع الجـنون .. بس هي اللحين ماقامت تتحكم بمشاعرها .. ابد .. مرات تنفر منه ومرات تحنّ له.. نقدر نقول شعور متضارب نوعـاً ما ! بعد مرور ساعتين ونص تقريبا نامت انوار .. وزهقت ديمه وراحت لفوفو المحطوط على طاوله المطبخ .. وشكـله ساكن وهادي .. ودها تحرك القفص وتقومه .. مالها احد يحس فيها غيره لازم تقومه وتشكي له الحـال .. بس ماطاوعها قلبهـا وتشوفه مثل الملاك نايم ومستعد ليوم سفر طويل ومتعب .. بس اللي قدرت عليه ديمه انها شالته وحطته على الدريشه .. وقعدت تتأمل بلـونه اللي ماتزهق منه ابـد .. يوم شافت هالطير ماكانت متوقعه انها بتتعلق فيه بهالطريقه الجنونيه .. وحست ديمه ان في حركه مو طبيعيه عند الدريشه وبعد ماشافت الا مشـعل جـاي بروحه مو مع رفيجه .. وشكـله تعـبان هو الثـاني .. ودّهـا تروح وتسأله .. و تستفسر عن صاحبه وتخفف عنه بس هالشي لا يمكن يصير الا مع عمهـا مبارك عمها وبس وبعد هالصدمه قامت ديمه من حلمها وشافت الواقع المّـر "مشعـل ما يشترك بعمي الا بالحـركات والنظره والابتسامه .. بس الروح لايمكن تتعوض .. الروح انصبت بإنسان واحد عمرها ما راح تنصب بغيره .. وهالانسان راح لدنيا غير دنيانا .. والله يصبر قلوب اللي فقدوه .."
مسحت الدمعه الحـاره اللي نزلت على خدهـا .. ومنعت أي دمعه ثانيه تهدد بالسقوط .. وراحت دفنت عمرها بالمخده عل وعسـى تتهنى بنومها ..
---
على اخـر يوم لهم في العاصمه بـاريس ..
انوار مع امها وابوها وميشوو في احد مقاهي الشانزلزي .. ومحمد الحـارس الشخصي لديمه اللي نايمه فوق بغرفتها .. بس عوضه ابوه بميه يورو .. ختاميه .. ومنها ثمـن النطـره المحترمه اللي بينطرها لديمه لين تقوم من نومهـا ست الحسن والدلال .. بس محمد ماقدر يستحمل نزل اللوبي وهو حاط فباله ماراح يبتعد من الفندق .. بطبيعه الحال ديمه اذا قامت مالقت احد بتنزل واذا انزلت بيشوفها محمد ويوديها لاهلها .. وتنتهي السـالفه لين هني .. صج ان الساعه وصلت 11 الصبح وماشرفت الاخت اللوبي .. بس هو مطنش لانه ملتهي بالقيم بوي .. شوي الا ايد تطبطب عليه وهو كان يلعب .. وكان معصب منها
محمد : واخيـــرا مابغيتي تجين ؟ حشى الاميره النائمه مو ديمه
مشعـل : هههههههههه اللحين انا بشحمي ولحمي صرت الاميره النائمه
محمد التفت : اوووووه حي الله لالالاعبنــا
وقام وسلم عليه .. وبعد ما قعدوا ..
مشـعل : ها شعندك متنقع هني .. وين اهلك ؟
محمد : كلهم رايحين يتريقون .. الا انا مكتوب علي الشقى مع العلـّه اللي فوق
مشـعل ماقدرّ يمسك نفسه شكل محمد حيل متضايق من وضعه
مشعـل : ههههههههههههههههه حرام عليك انت ولد بين ثلاث بنات لازم ابوك بيعتمد عليك
محمد : بس ياخي اللحين طافني ريوق محترم بأخر يوم لنا عشان حضرت الانسه اللي فوق
مشعـل : لا تخليني ازعل منك .. والله لي فقدت اختك ذيك السـاعه بتقول ليتني ما قلت هالكلام ..
محمد : لا تقولي انك فقدت اختك
مشعـل : لا مو جذي بس انا اللحين مسـافر واشتاق لأهلي وخواتي .. وتحسفت على المشاكل اللي كنت افتعلها غصب عشان اثبت رجولتي ..
محمد : ماعلينا .. شخبار المباراه ؟
مشعـل تذكر انه قال لاخت محمد تقوله عن نتيحه المباراه يوم فاز وبعـد عطاهم الكاكاوات لمحمد .. بس الظـاهر محمد ما يدري عن شي .. والكاكاوات ماكانت له .. !!
مشعـل : أي ابشرك فزنا 2/1 وعطاني المدرب اجازه ثلاث ايام من امس ..
محمد : زييييييييين والله الف الف مبروووووووك
مشعـل : الله يبـارك فيك ..
محمد : حـــــسافه هذا اخر يوم لي بباريس والا كـان خليتك تمشيني معـاك
مشعـل : ليش حسـافه باقي وقت امش بريقك معـاي بمطعم خياااااالي ..
محمد : الله وينه
مشعـل : مو بعيد حيل بس نروحله بتاكسي ..
محمد : اوكي ماعندي مانع بس بس العلــــــّه اللي فوق !
مشـعل طق محمد بالقيم بوي : لاتقول عـلّه عن خواتك
محمد : ياربي شفت حرمتني حتى من هالطلعه مادري اذبحها صج انانيه
مشعـل كان بيردّ عليه الا الانصنصير منفتح .. وطـالعه منه ديمـه ومعـاها كاميرة فيديوا ..
محمد كان معطي ظهره الانصنصير .. وكان مشعـل بالوجه .. توه استوعب مشعـل ان ديمه هي نفسـها اللي فـوق واللي كان محمد معصب منها !
اول شي سواه مشعـل مسك جريده فرنسيه وفجها بالنص وحطها على وجهه عشـان ماتنتبه له ..
وقعدت ديمه تمشي .. وانفتح الباب واطلعـت منه .. تقريبا وصلت لي محـل الورود وكعادتها قعدت تتأمل بالورود .. وبعد ما شـلّ الجريده من وجهه ..
مشـعل : هيييه محمد خل منك اللعبه وروح اختك اطلعت
محمد : صج والله اففففف مابغت اسمع انا بوصلها وبرجع لك
مشـعل : خلاص بوقف تاكسي على ما تجي بس عفيه لا تتأخر ..
محمد : انزين ناصر ماراح يجي معانا ؟؟
مشعـل طالعه بحزن : لا ناصر مايقدر يجي
محمد : أي شكله طاقها نومه هههههه اوكي دقايق وراجع لك
مشعـل ابتسم : بحفظ الله ..
" يااااااااه ديمه ديمه ديمه ديمه ديمه ..... حلووووو اسمهـا .. هادي مثلهـا .. اشوى انهـا ما شافتني والا جان انفضحت قدام اخوهـا ..( وبعدين سكت).. ليييييييييييييييش انا شسويت عشان انفضح ....؟ ياربي هالبنت بتجنني .. والله مو ناقص احاتيها والا احاتي هالمقطوط بالمستشفى .. مدري شعلته .. ياربي تهونها علي .. يارب .. معقوله هذي اخر مره اشوف فيها ديمـه !! خلاص بتسافر وماراح اشوفهـا .. ياربي لطفك!! "
ضبط مشعـل التاكسي لهم وقـعد ينطره باللوبي ..
اما بالمقهى ..
انـوار : يبى متى راح نلحقهم ايطاليا ؟
بومحمد : انا وياج بنلحقهم المغـرب
التفتت انوار على الشارع الا ديمه تمشي وراها محمد .. ومحمد واصله معاه على الاخر .. كلمه وينفجر .. جننته ديمه كل شوي مدخلته محل تقوله اصبر بشتري .. وبعد ما قالها انهم تأخروا على اهلهم .. قعدت تمشي معاه بس الشي اللي طلع محمد من حدود صبره .. يوم شافت ديمه الكلب الاسود .. جاتها حاله شبه هستيريه من الصراخ وتلوت على اخوها من الخرعه .. قعد ربع ساعه يهديها يقولها هذا مجرد كلب ماراح يأذيج بس هيهات تسمعه وهي بهحاله .. وبعدين مشت بسرعه تسبقه للمقهى .. وبعد ما سلمها محمد لهم شاور ابوه وقاله انه بيروح يتريق مع مشـعل .. وابوه رخصه بس يردّ مبجر لان وراهم سفره العصـر .. محمد كان يبي يتنفس .. يبي يودع باريس احلى وداااااع .. لانها بالنسبه له مدينه الاحلام ماراح يشوف مثلها .. والحـق ينقال هو بنفسه ما شبـع .. وبعد ما وصل الفندق .. شـافه مشـعل ووراحوا مع بعـض ..
ام محمد : منصور متى بتجينا المترجمه ؟
بومحمد يطالع ساعته شافها 12.30 : اعتقد بعد ساعه لانكم 3 بتمشون ..
ام محمد : اخاف اضيع هناك
بومحمد : لاهذي المترجمه من الفندق يعني بتوصلكم لين الفندق وتقعد معاكم لين الساعه 12 وتروح وتجيكم ثاني يوم اصلا من توصلون انطروا ثلاث او اربع ساعات ا لاانا وانوار عندكم ..
ام محمد : اشوى طمنتني .. الا ما قلتلي محمد وين راح ما شوفه !؟
بومحمد : راح مع مشعـل يتريقون بمطعم
ام محمد : ومن متى يعرفون بعض عشان يطلعون !
بومحمد : ااايه ياام محمد .. مشعـل مع مبـارك من الابتدائي ويوم دخل مبـارك الثانويه شدّينـا بيتنا الجديد .. ماكانوا يتفارقون الا بالنوم .. والله اني من اشوفه اتذكر مبـارك .. الله يرحمه ويغمد روحه الجنـــه ...
ام محمد : الله يرحمه ان شاء الله منصور قصر صوتك لا تسمع ديمـه ماصدقنـا على الله طلعت من حالتها ..
بومحمد : تتوقعين هالسفـره سوت شي !؟
ام محمد : لاتتوقع ان ديمه بتتغير بيوم وليله لا يبيلها فتـره بس انا اتوقع انها من تبدى تدرس وتلتهي بالجامعه اكيد بتنسى ..
بومحمد : اتمنى هالشي .. بس اللي ابيه منج لا تضايقين ديمه ولا تردين لها طلب .. تراها بنت حياويه .. يعني بالموت تطلب شي .. اما انوار يويلج ان عطيتيها شي هذي تاخذ حقها وحق الف بنت معاها
ام محمد : ههههههههههههههه حرام عليك كلهم بناتك
بومحمد : هههههههه ادري بس ظروف ديمه تختلف عن انوار .. حطي هالشي ببالج ..
ام محمد : كلهم بناتي ومافرق بينهم كلهم مثل الغلا ..
بومحمد ابتسم .. وقعـد يطالع ديمـه وانوار وهم بطاوله بروحهم ديمه توها تاكل وانوار قاعده تقرق عليهـا .. من السوالف المعتاده ( شفت ، حطيت ،سويت ، بنروح ، بنجي ... الخ)
محمد ردّ من المطعم ..واللي كـان مطـعم راقي من قلب .. يعني كأنك داخل عالم ثاني .. من الفـخامه يعاملونك كأنك لويس الثامن عشـر .. وطبـعا محمد خلاص تشقق من الوناسه على هالمعامله .. وكانت معظم او اغلبيه سوالفهم عن الكره واللعب محمد استـــــانس على مشـعل .. ماحس ابد بفارق السن بينهم .. ومعـامله مشـعل له كأنه رجـل كبره .. وكـان محمد يطـالع مشعـل شلون ياكل ويسولف .. كان شخصيه تستحق الاحترام .. و طبعـا ديمه بعد ما ردوا اهلها تعبانين .. ويلمون اغراضهم .. قعدت ساعتين تصـور كل شي تشوفـه .. واكتشفت اليوم حديقه ورى فندقهم .. مادرت عنهـا الا قبل ساعه .. وقعدت تصور الجهال شلون يلعبون وشافتهم يلعبون كره قدم .. ووقفت تصورهم الا ينطون كلهم على الكاميرا ويضحكون .. ويسلمون عليها واللي يقولها صورييني .. وكلهم ما تزيد اعمارهم عن 9 سنين .. وشوي الا طلبت منهم انها تكون الحـارس وهم طبعـا الدنيا مو شايلتهم من الفرحه وووافقوا .. واللي كان حارس استلم الكاميرا وقعد يصورها .. بس للاسف اول مابدوا اللعبه الكره جت على وجهها ووانبطت عينها هذي افتتاحيه اللعبه وقامت عيونها تدمع من حرارة الضربه ..
ديمه : مااااااااااااالت عليكم وعلى اللي بيلعب معاكم شهالدفاشه !!!
الفرنسي قط الكاميرا وجاء يتأسف منها لانه هو اكبرهم عمرها 9 .. وهو رئيس الفريق وفشلوه قدامها ..
ديمه : مشكوورين ختامها مسك اسافر وانا عيني مبطوطه !!!
فرنسي مادرى هي شتقول .. بس صك الكاميرا من الفشـله وعطاها اياها و طردوا اللاعب اللي بط عينها بالكوره ..
ديمه : خلاص انا بطلع من حديقتكم ومن فندقكم ومن ديرتكم بعد اوكي !!؟
هي ماتدري شتقول بس عينها حاااره وتدمع .. وطلعت وهي حاطه ايدها على عينـها .. ودخـلت الفنـدق .. وهي تناااااافخ من العـوار ..وكان مشعـل من الفضاوه والزهق قاعد باللوبي على صوب وكان ينطـر الساعه متى تجي 5 عشان يروح يزور نـاصر .. ماتوقع انه بيحس بفراغ من عقبه .. ومن شاف هالديمه وهو مختبص على طول حط الجريده اللي قدامه .. لانها راحت للرسبشن .. تسألهم عن اهلها اوصلوا والا لا .. وبلغوها انهم وصلوا من سـاعه .. وهي ارتبكت وتركض على الانصنصير .. وبعد ما فجت الغرفه الا اهلها لابسين وخالصين ومطلعين الجنـاط برى الغرفه .. ديمه انصدمت توها ما كوتّ ملابسها ولا شحنت الكاميرا ولاطلعت ملابسها اللي كانت بالغسيـل ..
ديمه : يمىىىى لحظه وين وين تو الناس انا بطلع بدلتي من الغسيل وبكويها وويمى لحظه عفيه
ام محمد : ديوووووووم لج خمس دقايق المترجمه متنقعه تحت .. لا تأخرينا ترى احنا على الله وعليها ..
ديمه نفذت كلام امها بدون ماتردّ لان صج الوقت راح وهي كانت لاهيه مع الجهال اللي بالاخير بطوا لها عينها حتى امها من التعب والمحاتاه ماسألت ديمه شفيها عينج !؟
ديمه صارت انسان آلي .. كل شي سوته بظرف دقايق .. وانوار طبعـا شالت كل اغراضها لغرفه ابوها ونامت فيها لين ما يسافرون المغرب على قولتها ما شبعت نوم امس سهرت تسفط ملابس لان غرفه البنات خلاص بتتسلم مفاتيحها للرسبشن .. ديمه شالت كل اللي طاحت عينها عليه .. وكانت تحس في شي ناسيته بس تعتقد كلها اوهام .. بسبب الربكه والسرعه .. وابوهم نزلّ معاهم وسلم المفتاح .. وركبـهم السيـاره .. مع المترجمه وراح فوق غرفته .. وهم بالسيـاره ..
ام محمد : ها ركبتواا ؟
الكل : اييي
ام محمد : دعـاء الركوب ..
ديمه : لا يمى دعاء السفر هالمره ..
ام محمد : اوكي .. حافظينه والا اقوله بصوت عالي ؟
ديمه : يمى انا بقولهم ..
ومشوا كان بالسياره مترجمه وديمه وام محمد ومحمد وميشوو .. طبعا المترجمه كانت تسوق فيهم.. وتوهم محركين الا ديمه تفكر وتعصر مخها تتذكر شناسيه
ديمه : يمى احس اني ناسيه شييييي بس مادري شنو
ام محمد : مو بس انتِ كل الناس لي بغوا يسافرون يحسون انهم ناسين شي
ديمه : لا يمى انا متأكده
ام محمد : تعوذي من ابليس ..
ديمه صررررخت : اييييييييييييييي
ام محمد : هاااا شناااااااسيه ؟
ديمه : ردوا ردوووووووووااااا بسررررررررررررعه
محمد : خرعتينااااااااا انتِ شسالفه ؟
ديمه : يمى عفيه خليها تردّ
المترجمه ردت الفندق اصلا توهم محركين ما ابتعدوا ..
واول ماقربوا ..
ام محمد: ديييمه والله العظيم متأأأأأأأأأأأأأأخرين كفايه نقعنا المترجمه ساعه تنطرنا ..
ديمه : يمى هذاااااااااااا فوفو شلون انساه واروح يمى خلاص انا برّد مع ابوي ... وانوار .. عادي يمى انتوا ثلاثه واحنا ثلاثه .. انتوا روحوا انا بروح اخذ مفتاح الغرفه واطلع فوفو واروح لابوي ..عشان ماتتعطلون متى بيسافرون هم ؟
ام محمد : 5 المغرب
ديمه : بسيطه ساعتين .. بقعد معاهم ..
ام محمد : افففففف انزين انزلي وروحي الغرفه واشريلي عشان اتأكد انج دخلتي .. وبعدين عاد انتِ روحي لابوج اوكي ؟
ديمه : اوووووووووووكي يابعد عمري
وخذت جنطتها وراحت ركض .. طبعا بومحمد بغرفته يسوي اغراضه وانوار نايمه ..
ديمه شرحت للرسبشن حالتها انها سلمت المفتاح وكانت ناسيه شي واذا نزلت مع اهلها بتعطيهم اياه .. وبالاخير وافقوا لان المفتاحين بيتسلمون بنفس الحزه .. لان خلاص الغرفه مدفوعه وهي تفاهمت مع المغربي .. وبعد ما صعدت فوق اشرت لامها من الدريشه انها فوق وحركوا شافت فوفو صادّ صوب الدريشه .. من امس مكانه .. حست انها انانيه طول اليوم ما شافته ولا فكرت فيه هل لانها كانت سهرانه ؟واصلا هي قامت مخترعه ماشافت احد وانزلت بسرعه وما جت الا وعينها مبطوطه وبسرعه لين لمت اغراضها وصلّت فرضها.. وحست بتأنيب ضمير بشكل مو طبيعي " يااااااه معقوله كنت بسافر وخليه !!! كنت صج بمووووت لوخليته ..!!"
وحست من نظرات فوفو لوكان يقدر يتكلم كان عاااااااتبها .. عن اهمالها له اليوم .. شافت ساعتها بقى تقريبا ساعه ونص على ماتجي 5 المغرب .. بالوقت اللي كانت توها داخله الغرفه ..
بومحمد : يلالالا يا انوار قومي بنطلع الحين
انوار : يبى تو الناس انت قلت خمس ..
بومحمد : ادري اللحين ثلاث ونص بس قلتلج وراي شغلاات خمس بكون بالميترو ..
انوار : اوكي يبى بروح اغسل وجهي واصلي ..
صك بومحمد جنطته ونطرّ انوار لين خلصت وطلع من الغرفه ونزّل اللوبي كانت الفرنسيه بهالوقت هي اللي على الرسبشن .. وطبعـا هالحزه ديمه كانت بسبات عميق بغرفه البنات .. وكانت موقته ساعتة الفندق على الخمس .. وطبعـا سلم بومحمد المفتـاح وطلع .. على انه غرفه البنات مدفوعه وخالصه .. ووشاف بوجهه مشعـل عند باب الفندق اللي كان توه جاي من ربعه ..
مشعـــل : اشوى اني لحقت عليكم
بومحمـد يضحك : بتفتك من ازعاجنا بنروح وبنخلي لك باريس ..
مشعــل وكلامه طالع من قلبه : والله انهـا ماتسوى شي بدونكم
بومحمد : دامك بإجازه حياك معانا ..
مشعـل : لا والله صاحبي تعبان وبزوره .. بس بعطيك رقمي عشان تطمني عليكم لي وصلتوا ..
بومحمد : مايشوف شر ان شاء الله اوكي عطني ياه..
وبعد ما سجل الرقم .. وشاف التاكسي حضر ..
بومحمد : يلا فمـان الله وانتبه على نفسـك
مشعـل : فمـان الكريم ولا تنسى تطمني عليكم ..توصلون بالسلامه ان شاء الله
مشعـل صج كان يحاتيهم لانهم مو رايحين مع بعض متقسمين .. وتمنى انهم يوصلون سالمين ..بس للأسف ماقدر يودع ديمـه حتى لو بالنظـر من بعيد .. قعـد باللوبي ينطـر السـاعه متى تجي 5 عشـان يروح المستشفى لان باب الزياره يفتح 5وماله نفس يطلع او يتمشى او يروح مكان دام ناصر مومعاه .. وده يتطمن عليه دق عليه الصبح بس كان نايم ولا ردّ على تلفونه .. حس الدنيـا فررررراغ لا ناصر ولاديمه .. "سبحـان الله هذول ماعرفتهم الا من هني .. من باريس مدينه الاحلام .. صج انها مدينه الاحلام .. لانهم الاثنينه مثل الحلم مصيرهم يختفون من حياتي .. يااااااه ليش افكر جذي !! خلني اكلم اهلي .. ابرك لي من التفكير اللي بيذبحني قاصر عمر "
ديمه قامت على صوت المنبه .. الا والساعه 5 بالضبط .. ومسكت فووفو وجنطتها ونزلت تحت متوقعه انهم تحت ينطرونها .. بس انصدمت مالقت احد .. وقالت اسئل الرسبشن يمكن لالحين ما انزلوا ! .. وبعد ما سألت وتقصت نزل عليها الخبر مثل الصاعقه قسمتها نصين ..
ديمه : راحووووووووووا ؟؟؟؟؟؟؟؟
المغربي : أي نعم الساعه الثالثه والنصف ..
ديمـه : شلون خلوني !؟
المغربي : انتِ قلتي انك نسيتي حاجه وكان ثمن الغرفه مدفوع .. والظـاهر ان والدك لاعلم له بوجودك والا فبالطبع سأل .. !
ديمه توها بهاللحظه استوعبت كميه الغبـاء المحشوه بمخها .. " انا ماقلت لابوي اني موجوده هو عباله اني مع اميييي لالالالالالالالالالالالالالالالالا مستحيل سافروا وخلوووووووووني !!!!!!!!!! "
ديمه تبجي : الله يخليك ما يصير تدقّ عليهم ؟
المغربي : هم الان بالميتروو .. عليهم ان يصلوا روما لكي اخبرهم من الفندق ..

شنو بيصير لديمة؟؟؟

بتعرفون في الجزء الجاي

تحياتي