وطلعت وشافت ابوها جاي ومعاه اوراق
بومحمد دخل على مشاري وعطاه اوراق عمليته .. وتحاليله وحوسته كلها وسلم عليه ومشى
طلعوا وقعد بروحه وتذكر كل اللي صارله اليوم .. وتذكر يوم ساقت السياره وشلون ضغطت على رجلها بقوة ..
" يوه نسيت اسألها شلون رجلها بعد الجنوووون اللي سوته عشاني ؟
جنون ؟ ليش اسميه جنون وانا اذا كنت مكانها يمكن راح اسوي اعبر من اللي سوته !! "
من هذاك اليوم تبين لانوار انها فعلا متعلقه فيه مو عارفه ليش بكل المواقف اللي تجمعهم مع بعض تكون الغلبه له .. وبالاخير اهو اللي يكسبها ؟ ليش حتى بمواقف ضعفه ومرضه انكسبت لصالحه وتعاطفت انوار معاه لاقصى درجه .. واكتشفت مشاعر جديده ماكانت اهي تدري عنها .. !
اكتشاف هالشعور صدمها بالبدايه .. شلون تتعلق بشخص اهانها وكانت له علاقه بشللها .. وين كبريائها شلون بتغفر له ؟ لكن مع الوقت بدا قلبها يتأقلم مع هالمشاعر .. بالاخير اهي الضحيه الوحيده .. مرات تتزعم مشاعر القسوة الصداره وتتحلف انها تنتقم منها وان كل اللي سوته كان لهدف واحد انها تدمره مثل مادمرها .. وساعات تقول ليش انا اسوي فيه جذي ؟ هالانسان يحبني بصدق ليش ادمره .. عفى الله عما سلف ؟
هالمشاعر المضطربه اقلقتها بأخر شهر من الخمس شهور اللي مروا ..
وخلتها بحاله توتر دائم .. وماكانت تحب تشوف ديمه .. لان ديمه نظرتها تقتل انوار .. وتحسسها انها مذنبه بشي كبير .. وخصوصا ان ديمه عارفه شناويه عليه انوار .. وكل ماشافت ديمه ودها تحتفظ بكبريائها الباقيه وتسوي اللي خطتته من زمان وتستمر فيه .. وتزيد عنـاد .. تبي توريها مو انوار اللي تضعف عند اخر المشوار وبعد ماوصلت لهدفها تتنازل عنه ..!
ديمه هالشهر كان اخر شهر لها مع اهلها .. وكان معظمه بالسوق وتخلص الاشياء الي ناقصتها .. ومره من المرات حنت على امها توديها السوق وامها كانت تعبانه قالت لها اخذي اختج انوار وروحوا لا تتأخرون .. بس امها ماكانت تدري بعلاقتها اخر شهر بأنوار .. انوار كلا تتهرب من نظرات ديمه ومايكون بينهم أي مجال للنقاش كلا انوار عازله روحها وطلعاتها مع ابوها ومع امها .. مهمشه ديمه على الاخر .. فا اضطرت ديمه انها تاخذ اخوها محمد وميشو معاها السوق لانها مضطره اليوم تروح وكل ماقرب موعد العرس تحس انها تتعب اكثر .. قامت اتحاتي كل شي .. وشلون بتفارق اهلها .. وشلون بتكون حياتها الجديده .. هل بتتأقلم او لا دايما هالاسئله تدور براس أي عروس باخر شهر لها مع اهلها .. تفكر بحياتها الجديده .. مع هذا راحت ديمه السوق .. وكان شكلها عملي لاقصى درجه وشكلها حيل مشتطه .. خلت محمد وميشو بالكوفي وطلبت لهم وقعدوا على ما تفتر اهي وتلاقي اللي تبيه ونبهتهم ما يتحركون لين تجي .. رحمتهم من المشي ووالتفرفر بكل الطوابق .. وهي داخل المحل .. كانت ماسكه تنوره قصيره وكانت تشوف قياسها ماتدري هل هي سمول والا ميديم الا تجرّ منها وحده التنوره بهمجيه !!
----- : لوسمحتي هذي لي .. !!
وتلف عيها ديمه بعصبيه
ديمه : شـ ........ دلالالالالال
دلال : ههههههههههه يمى نظرات الحقد كانت تنط من عيونج
ديمه : مالت عليج شحقه ماقلتي لي انج بتتسوقين ؟
دلال : شدراني انج بتطلعين اليوم .. ؟ وبعدين ماقلت لج لاني مو جايه لحالي
ديمه : صج خرعتيني .... قلت شهالوقاحه يجون يجرون مني التنوره واهي بيدي
دلال : هههههههههههههههه قلت اخرعج .. شفتج مندمجه انتِ وحوستج اللي ماتخلص !!
ديمه : اسكتي الله يعين كل ماخلصت شي احس ناقصني شي ثاني ..
دلال : شدعوه ولا بتهاجرين على هالاغراض !
ديمه : ههههههههههه والله تعبت اشوف وعن التردد والتحسف قمت اخذ اللي متردده فيهم وبالبيت اوريهم امي ..
دلال : ليش ماخليتي انوار تجي معاج ؟
ديمه : مادري شعندها ! تبين الصراحه منقهره منها ..
دلال : أي بخصوص سالفه مشاري ؟
ديمه : أي حيل قامت تتفلسف وافكارها ماقامت تعجبني ..
دلال : انزين ليكون جايه لحالج ؟
ديمه : لا مع حمود وميشو تحت بالكوفي
دلال : يحليلهم ميشوووووو ياني مشتاقتلها هالعوبه يلا خلصي بسرعه بننزل لهم
ديمه : اوكي بس بحاسب وبنزل
ونطرتها دلال ونزلت معاها وهم يسولفون ..
وشافت ديمه الطاوله اللي كانت حاطه فيها ميشو وحمود لقتها فاضيه .. ! وحاست الكوفي كله مالقتهم .. !
ديمه : دلال اخواني وينهم ؟
دلال : اخاف راحوا يتمشون شوي ؟
ديمه : وين يتمشون هالمجمع مافيه العاب !
ويقطع عليهم التفكير صوت تلفون دلال
دلال : الو ؟
مشعل : لفي وراج
دلال لفت وشافت مشعل ومتعلقه عليه ميشو ومعاهم حمود بالكوفي الثاني اللي صاير على الزوايه منخش شوي ..
دلال : اييييي زين الله يبشرك بالخير .. واحنا خفنا عليهم
وديمه ماكانت معاها ولاسمعت المكالمه كانت تحاتي خوانها وتتلفت بخوف تدور بالمحلات ..ماخافت على ميشو لان معاها حمود لكن خافت عليهم وين راحوا !
دلال تنادي ديمه
دلال : تعالي لقيتهم
ديمه بفرحه : وين ؟
دلال تأشر على الكوفي
ديمه من شافت ميشو ووحست بثلج على قلبها ... وتجيها ميشو تركض وتتلوى عليها .. راحت دلال عند اخوها وكان قاعد عالطاوله حمود معاهم
ديمه وميشو واقفين بعيد .. ديمه ماستوعبت شي لالحين .. مادرت اهم وين كانوا .. بس المهم انها لقتهم ..
ديمه : ميشوو انا قلتلكم لا تتحركون وين رحتي انتِ وحمود ؟
ميشو : انا مااا قلت لج ؟ انا شفت مشـــأل حبيبي
ديمه : عن الخرابيط انتِ بعد وين حمود ؟
ميشو : ليش تزفيني ؟ ماحبج ماحبج وتهدها وتروح تركض لمشعل ويرفعها على الطاوله
ديمه شافت مشعل وانحرجت من روحها .. شكلها واهي مبهذله واقفه بعيد والكل قاعد على الطاوله كان محرج وشكلها غلط تشوفهم واهي بعيد ومكانها بوسط الطريج شلون واقفه مو حلو ! فا شافت نداءات من حمود ودلال ينادونها .. اهي مو قادره تتحرك " شفيهم هذول استخفوا ان شاء الله يبوني اقعد معاهم !! أي هين !! "
مشعل كان يدري انها مستحيه .. وكان مستمتع بمنظرها واهي تدور بخوف .. كان منتظر يشوف موقفها اذا درت انهم عنده .. فا الحين يوم شافها تصنمت جدام الناس من شافته .. وخطوط ماروكو على جبهتها واضحه .. فا خاف انه يحرجها اكثر .. ماتوقع انه بيشوفها قبل العرس وين بالسوق بعد !!
وقال لميشو خلاص روحي لاختج .. بس ميشو تنحت
ميشو : اهي ماتحبني كلا تزفنيييييي
وتشبثت بمشعل
حمود : خلصي شكلها خلصت وتبي ترد البيت
ميشو : لا مابي انا برد مع مشأل حبيبي
حمود : اففففف ميشوووووو احمدي ربج جابتنا وخلتنا نغير جو
ميشو : انت روح معاها انا مابي
مشعل : انتِ روحي الحين انا بعدين باخذها وبأدبها لكم.. وكل يوم بجيكم .. لين اخليها تحبج
ميشو : والله يعني تطقها عدل
مشعل : لا حرام نعورها بعدين !
ميشو : أي احسن عشان ماتزفني
ولفوا على ديمه مالقوها لقوا غبرتها من القهر ماقدرت تصبر اكثر صارت فرجه وركبت السياره تنطرهم ..
خذاهم مشعل لي السياره .. وفج الباب وركب ميشو وقال لديمه
مشعل : ترى كلا والا ميشو مارضى عليها
ديمه عيونها على السكان ماقامت تشوف شي من الاحراج .. لوتدري ان هالموقف السخييف بيصير لها ماجابتهم معاها ..
صكت الباب .. وداست بقمه سرعتها بتنحاش من الموقف .. وراحت البيت
مشعل بالسياره : اناهالبنت بتجيب لي الجلطه والله
دلال : بسم الله عليك ليش؟
مشعل : شايفه سرعتها ؟
دلال : لا تلومها احرجوها اخوانها
مشعل : بعد الزواج ان استمرت على هالسرعه بتصرف معاها الصراحه اهم مالي حياتها
دلال : ايوا ايوا
مشعل طالعها وضحك
مشعل : بنشوف باجر زوجج وتقعدين تمدحين فيه لي ثاني يوم
دلال : لا ياحبيبي .. انا مو من هالنوع
مشعل : نشوف نشوف واذكرج .. ها شريتي نفنوف ؟
دلال : لا اول محل دخلته كانت اهي فيه والتهيت معاها بالسوالف وطلعنا
مشعل : ولاخليتيها تشتري صح !
دلال : لا ماشاء الله شاريه اغراض واجد
مشعل : وانتِ ان شاء الله متى تشترين .. ترى ذليتينا روحي اشتري النفنوف بروحج الا ذوقي يعني ؟
دلال : مو من زين ذوقك بس عن حلفتي قلتك ماالبس بعرسك الا نفنوف من ذوقك ..
مشعل : انزين ترى العرس مابقى عليه شي اسبوعين بالكثير
دلال : اناقلت لك بفصل ؟ قلت جاهز يعني لاتحنّ على راسي
مشعل ابتسم : انزين لحد يطقني بس ! أي مطعم تبين ؟
دلال : اهو في مجال اختار طبعا حضرتك تبي لازانيا
مشعل : اتصدقين اليوم اشتهيت اللازانيا من شفتها تذكرت لازانيا مالت باريس اوف عجيبه ..
دلال : خوش ليش تعيشتوا بمطعم بعد ؟
مشعل : مو اهي كانت عندي تبيني اخليها على لحم بطنها لي ثاني يوم ؟
دلال : والله اخوي يعرف الاصول
ويطقها بالسويج
مشعل : هذا وانا قايل بعشيج بمطعم مو كفو البيت البيت
دلال تحايله واهي تضحك
دلال : لا تكفىى لاعت جبدي من اكل البيت
مشعل : اسحبيها
دلال: خلاص سحبتها
مشعل : أي عبالي ..
-------------