ديمه : كيفك حطه شوف منو بياكله!!
مشعل : لا تعانديني على حساب صحتج!!
ديمه : ماعاند
وظلّ الاكل مكانه لين جاء المضيف وشاله ..
مشعل حط نفسه نايم .. يبيها تاكل .. لكن عندت ولا كلت .. بالاخير يوم شافته نايم نامت .. يوم حس انها نامت صج قام .. وكان باجي على وصولهم ساعه تقريبا .. وبعد ماوصلوا ..
مشعل : ديمه ديمه قومي وصلنا ..!!
ديمه : احنا وين ؟
مشعل : يلا وصلنا المطار .. بالنمسـا ..
ديمه استوعبت كل شي ..! هذا مشعل زوجها وامس كان عرسها واليوم اهي بالنمسا ..!
ديمه : خلاص انت انزل انا بروح اغسل وجهي وبلحقك ..
مشعل : ماكو احد بالطيـاره الكل نزل وبعدين تعلميني فيج ..! انتِ ام الضيـاع العالمي ..!! اخاف بعد تركبين طياره ثانيه وتردين الديره ..!
ضحكت ديمه بعفويه يوم تذكرت ضيعتها بباريس وبمتروا روما ..!
" ياه هذا لالحين ذاكر ..!! "
بعد مانزلوا والمضيف اللي عند باب الطياره يودعهم والود وده يقطهم من البوابه حشى كل هذا تأخير ..! عطلوهم .. بعد مانزلوا وخذوا جناطهم ..
مشعـل : شوفي تمسكين ايدي وان شفتج رايحه مني والا مناك اروح واخليج ما اتعامل انا ..!
ديمه تطالعه " شفيه هذا !! "
عندت : بس انا كبيره افهم لا تخاف بمشي معاك مو جاهل تمسكها من ايدها ..!
مشعل : اقولج امسكي ايدي انتِ ما اثق فيج من هالنـاحيه ..! مادري شلون تفلتين من ايد الواحد وتضيعين!!
ديمه : اقولك والله ماراح اضيع
مشعل انقهر ..!
مشعل : أي صح انتِ تعلمين الغيب .. اقول هاتي بس ..
ومسك ايدها بقوه ونادى واحد يجرّ معاه الجنـاط ..
ديمه بصوت واطي : ياسلام على أي روضه رايحين !!
مشعل طالعها بطرف عين .. ابتسم بمكـر .. يعني سمعتج
واهي درت انه سمع وخقت جان تأشر على حلجها انها خلاص ماراح تتكلم ..!
طلعوا من المطـار والحين بيدورون لهم تاكسي او شي بيروحون الفندق اللي حاجزينه ..!
والتكـاسي هناك عليها طق عصي خصوصا بالمطـار ..! لسبب او لاخر طنشوه ..! انقهر منهم .. وتهاوش مع اللي ماسك التكاسي ويمشيهم ..!
مشعل : الله يخسهم ..! قعد يقرقر على راسي وسبب مقنع واحد ماخذيت منه ..!
ديمه : بس شوف هالجماعه من اليوم واقفين ولا لحين ما مشوا ..! يعني لا تلومه اكيد شغلهم بالدور ..!
مشعل : لا مو عن جذي اهو حطني براسه ولغى اسمي ..! يعني اشكره ماراح نركبك ..!
ديمه : بليز مشعل لا تتمشكل معاهم ترى ان مسكوك وتعاونوا عليك انا اللي باكلها ..!
مشعل طالعها بلؤم : يعني انا اموت عادي بس خايفه على عمرج ..!
ديمه بعفويه : لالا بسم الله عليك في احد يفاول على عمره ؟؟
مشعل بفرحه : مادري عنج !!
ديمه : بس اقول حط ببالك معاك مره يعني لا تتصرف بطيش ..!
مشعل : لا تحـاتين ترى احاتيج واخاف عليج اكثر ما اخاف على نفسي وروحي ..!
ديمه النظر نزل لين لامس القـاع من السحى تمنت انها ما فتحت أي موضوع نقاشي معاه ..!!
بعدين لقى شي يحوس بباله وقرر ينفذه ..!
مشعل : ماراح نطول على هالوقفه .. ماكو الا نروح بيمترو ..!!
شهقت ديمه : لا مترو لالا
مشعل : ليش شفيه ؟؟
ديمه : شوف انا انطر التاكسي لو اروح الفندق الساعه خمس المغرب .. بس مااركب مترو ..
مشعل : شفيه المترو ؟
ديمه نزلت راسها الارض بضيق : يعني نسيت ؟ ان فيني ضيق تنفس ؟
مشعل : زين انج قلتيلي ..!!!
ديمه حست بذنب : خلاص عطني كرت الفندق وانا الحق بالتاكسي .. انت روح بمترو ..
مشعل : أي ان شاء الله انطريني ..!
وضحك يعني أي هين !!
ديمه : اكلمك صج يعني انا مره كبيره وعقلي براسي ومعاي العنوان ماراح اضيع والله ..!
مشعل : من هالنــــاحيه اقولج انسي .. انتِ من اليوم ورايح اسميج ضيـــــــــّاعه .. يعني اسمحيلي اهلج ضيعتيهم بكبرهم ..!! انا ماتبين تضيعين مني ؟ لا مع العلم انج ضعتي مني ثلاث مرات .. مره بالمستشفى ومره بالشانزليزي يوم نقعتيني تحت المظله ساعه كامله .. ومره بمترو روما ..!!
من سمعت ديمه كلامه ضحكــت لا اراديا ..
" هذا ما نسى شي ....! هههههههههههه "
ديمه : هههههههه ماشاء الله .. عيني عليك بارده ذاكرتك ميه بالميه ..
مشعل : أي جينا عند العيون الحـاره ..!
ديمه : ههههههههه
وقعدوا ينطرون نص ساعه لكن الوضع نفسه ..! مايدرون شلون التكاسي تمر بسرعه ولا كأنهم واقفين بمكـان المخصص للتكاسي ..! بالاخير ..
ديمه : تعبت!!
مشعل : اجيب لج شي تاكلينه ؟ تراج ماكليتي من امس ؟
ديمه : لا مو مشتهيه ...
مشعل : ديوم ترى صج شنو هذا كلش ماكليتي شي ...
ديمه : لا بس الازعـاج وصوت السيارات احس بصداع ..
مشعل : معاج بندول ؟
ديمه : لا
مشعل : تعالي معـاي
ديمه : وين ؟
مشعل : امشي بدون كلام ..
راحت معاه وراحوا سوبر ماركت وشرى منه بندول وعصير برتقال .. وسولف مع صاحب السوبر ماركت .. طبعا طلع من اصل عربي ..! هذا حالنا يالعرب متشتتين بكل مكان ..!
وقاله انت حاجز فندق ؟ قاله مشعل أي جان يقوله خلاص دق عليهم تلفون يجيبون لك السياره لي المطـار ..
وفرح مشعل من درى .. ودق عليهم وقالوله احنـا دازين لك سياره بس الظاهر انه سافط ببوابه غير .. ويوم راحوا لبوابه ثانيه فعلا لقوه وركبوا السياره ..
مشعل : سبحـان الله لولا صداعج ماكان تسهلت امورنا ..!
ديمه ساكته .. بعد ما اجبرها مشعل انها تشرب عصير برتقال قبل الحبه لانها ماكلت شي اليوم شربت شوي وكلت الحبه .. اهي عارفه نوعيه صداعها بس يبيله نوم عميق .. بالطياره نامت يمكن ساعه ونص ..! هذا اللي خلا صداعها يزيد .. !!
وبعد ما دخلوا الفندق .. كـان راقي ومستوى .. على الاقل هالمده راح تكون بفندق شرح .. والشي الحلو بالنمسـا ان عليها طبيعه اللهم ياسـاتر .. الخضار يعور العيـــن شي مفتقدينه ببلادنا ..! خضـّار العشب اقصـد .. فا كانت دريشتهم تطـل على الحديقه العـامه .. بس طلي منها انسي العـالم وراج وقطي همومج ورى ظهرج ..! مشعل من دخل ظـلّ يستكشف .. ديمه ماقدرت تجامل بملابسها قطت عمرها بالسرير وراحت بسابع نومه .. بعد ماخلص مشعل استكشاف دخل الغرفه وشاف شكلها .. ومات من الضحك ..! في احد يقط عمره جذي .. حتى جواتيها عليها ..! بس مع هذا مالامها تعب وقلّ نوم وجوع وصداع ..! بس اللي سواه ريحها من جواتيها وغطاها .. وقف على الدريشه يتأمل الحديقه اللي تردّ الروح .. وقعد يقـلب شريط ذكـرياته ..! ديمه زوجته ..! الحب اللي انزرع بقلبه وكـبر مثل النبته كل طال عودها زاد حب الساقي لها .. تذكر ايامه معاها ومواقفهم .. تذكر خواطرها .. تذكر حزنها وخوفها وآلمها وفراقها وشوقها تذكر مواقفهم بباريس .. موقف ضياعها وتمسكها فيه .. تعلقها بطيف الماضي .. تذكر آلم الفراق ..! تذكر فرحه اكتشاف حبها له ..! ذكريـات كلها لها معزه بقلبه .. تذكر موقف عمها----- وعلاقته المندمره مع ابوه .. وشلون كانت بتهدم كل شي يمت بالسعـاده بحيـاته ..! تذكر خطبته وموافقتها ....! ملجته وقعدتهم مع بعض ..! وبعدها العرس ..! واستنتج ان الله يحبــه ونطق من كل قلبه كلـمه رددها خفوقه وعقله سوا
" الحمـد لله انــا سعيــد ..! "
--------