بالعشر الاواخر كانت الدنيا كلها تعج بالروحانيات والخطب والاحاديث والمواعظ .. واللي ختم القران مرتين .. واللي ختمه مره .. وحسوا ان هالشهر من اكثر الشهور الي تمر بلمح البصر .. لانه احلى واغلى شهر بقلوب المسلمين اجمعين .. في 25 رمضان قبل اذان المغرب بربع ساعه
ميشو ماسكه الشوربه بتوديها الصاله
حمود : هااااتيها عنج نسيتي امس الشوربه اللي كبيتيها
ميشو : لا خلني انا اعرف اشيل
حمود : ميشو والله ثقيل عليج هاتي عنج
ميشو : انت شفيك ماتفهم انا بشيل عشان يشوفني ابوي اشتغل ويعطيني فلوس عشان نسوي انا وياك عزيمه ونشتري من الجمعيه
حمود : هههههههههههههههههه الحمدلله والشكر هذا تفكيرج !
ميشو : أي كيفي اضحك زين
حمود : جم تبين انتِ ؟
ميشو : ابي دينارين
حمود : خلاص باخذ خمسه لي ولج
ميشو : والله !
حمود : أي بس عطيني خليني اشيل
ميشو : يووه ليش
حمود : يالخبله اذا شافني ابوي اشيل واساعد امي بيعطيني فلوس وانا اكبر منج بيعطيني خمسه واذا عطاني بوديج معاي الجمعيه
ميشو استانست على الفكره .. صج جهال هذا اكبر شي يفكرون فيه !
ويوم حطوا الاكل .. وقعدوا كلهم ماعدا ابوهم ينطرون الاذان
ام محمد : حمود يما روح ناد ابوك
..

حمود : يمااااا اليوم انا صاااااااايم
ام محمد : نفسي مره أأمرك وتفز وتقول حاضر من هالعين قبل هالعين ! قومي ميشو نادي ابوج
حمود : لا خلاص خلج ميشو انا بروح ومو من هالعين الا من هالخشم
ام محمد : أي مو عشاني بس ماتبي تتعب حبيبه قلبك ميشو ..
حمود : ههههههههههههه شسوي اهي الوحيده اللي معاي عالخط نفس الافكار ..
ام محمد : روح بس الله يصلحك ويهديك
راح حمود وطول اليوم البنات يقرقون .. ام محمد عورها راااااااسها صايمه ومن اليوم بالمطبخ ماتتحمل ازعاج اكثر
ام محمد : انتوا هيه خلاص اسكتوا راسي مصدع
ديمه : يما السوقه كلها خلت من بدي تركواز !!
ام محمد : شنو !
ديمه : يما العيد مابقى عليه شي ومابقى لي الا هالبدي فريت السوقه مالقيت
ام محمد : اذا تبين ساده شكثرهم بالسوق
ديمه: لا ياليت ساده ابيه مشجر بأبيض
ام محمد : اما انتوا طلبات غريبه ..!! خلاص يبا ان شفتي لج بدله كامله اخذيها اما سوالف التلقط ماحبها
ديمه : يما الله يهداج وين الحين تلقين لج بدله كامله ! اذا لقيتها صج بتلقينها أي شي موذاك الزود ..
ام محمد : يرحم ايام قبل ابوي يدخلنا محل واحد ونشتري منه ونخلص بس شنو كان محل على مستوى
انوار : ههههههههههههههههههه محل واحد !
ام محمد : أي واحد وكان فيه كل شي بدله وجوتيها وجنطتها وتعالي شوفي وحده مثلج ! ماتلقين ..
انوار : والله يما ؟
ام محمد : أي على ايامنا ماندخل الا المحلات النار تصلخ بس اهم شي ابوي يرتاح يبي يفتك بيوم واحد ..
ديمه : الله ونااااااسه .. كنتوا مرتاحين
ام محمد : امي كانت تزهق منا كنا نفرفر فيها كل مكان وقطتنا على ابوي الله يرحمه ومن نركب السياره يقول تبون أي محل ؟ المهم انه واحد ومافي غيره نقوله ونطلع واحنا خالصين وراضين بعد ..
ديمه : ياحلو القناعه انا ان ما فريت سوقه الكويت كلها ما ارتاح .. اخاف اشتري بدله والقى احلى منها بعدين واتحسف !
حمود نزل : ابوي وراي اسكتوا ولا كلمه ترى واصله معاه
ديمه : ليش شفيه ؟
حمود : مادري بس اسكتوا وخلوه ياكل حبوب السكر ويتفطر بعدين تكلموا ..
ديمه: اوكي
واذن المغرب .. وتفطروا .. وصلوا .. وقعدوا مره ثانيه شاي وقهوه وحلا ابوهم شوي تعدلت نفسيته وبدا يسولف معاهم .. خصوصا ان اكل حبه السكر وريحته .. انوار لقت ان هذي الفرصه المناسبه وابوها مرتاح ومستانس انها تقوله الخبر ..
انوار: يبا متى ترى باجر موعدي بالمستشفى
بومحمد : أي ذكريني اوديج متى العصر ؟
انوار : أي
بومحمد : اوكي ذكريني اخاف انام ويطوفج الموعد
انوار : لان يبا ابيلك تاخذلي موعد عشان اسوي عمليه
بومحمد : شـ عمليته ؟
انوار : عمليه تجميليه للجرح ..
بومحمد : زييييين الحمدلله واخيرا وافقتي ؟؟
ديمه : توو الناس توج تصحين ؟
انوار: بسم الله شوي شوي علي .. كيفي طقت مزاجي بسوي
بومحمد : ديمه خليها هذي الله يستر من مزاجها
انوار : والله يبا اتكلم جد ابي اسوي العمليه
بومحمد : ليش؟
انوار : يعني ماتبون ؟؟؟؟
بومحمد : الا نبي بس شالسبب اللي خلاج الحين توافقين طول المده واحنا نحايل فيج مو راضيه شمعنى الحين ؟
انوار : امممم اسباب شخصيه !!
بومحمد : خلصيني ليش ؟
انوار : اعتبرني زهقت من شكلي ..
بومحمد : زين باجر بكلم لج الدكتور ياخذ لنا موعد ..
انوار : اوكي ..
ديمه : يعني بتعيدين بستايل جديد ؟
انوار : أي محدا احسن من حداااااا
ديمه : هههههههه انا لو القى البدي التركواز جان انا بخير
ام محمد: كلن على همه سرى وانا على همي سريت!!
راحوا بومحمد وبنته المستشفى وبغوا ياخذون موعد لكن قالهم الدكتور ان في برفسور الماني لجراحه التجميل بجي بعد اسبوعين ومن الحين الناس تحجز مواعيد عنده .. وحجز لها بومحمد عنده .. واتكلوا على الله ..
----
مرت خمس شهور .. بهدوء صارت فيها بعض التغيرات .. انوار سوت العمليه ونجحت ! وتغيرت .. والكل انصدم من شكلها الجديد .. الجرح اختفى بقدرة قادر لكن اذا قربتوا حيل منه راح تلاحظون غرز خفيفه ما تنشاف الا عن قرب .. اول ما سوت العمليه غيرت لون شعرها وقصته تبي تموه الناس ان الشكل كله تغير مو بس وجهها !! عشان تشتت الانظار عن وجهها .. خلال هالخمس شهور .. تتصيد انوار كل فرصه مع مشاري وتكسبه لصالحها .. لين صار متيم فيها بحق وحقيقيه .. اوهمته بشكل غريب بحبها له ولو ان هالوهم اوهمته اياه ماصدر عن اعتراف صدر عن براعتها بتشكيل المواقف اللي تصير جدامه .. وحاولت لاقصى درجه تلين قلبه .. لكنها انصدمت بشكل فظيع ..!! اعتقدت ان تقربها منه راح يخضعه لها كليا عشان بالاخير تصدمه الصدمه القاضيه لكنها لا اراديا بدت اهي اللي تميل وتنحاز له .. وبدا شي بداخلها ينازعها وبدا قلبها يعورها على اللي قاعده تسويه بولد عمها ..!
لكن من جهه اخرى كبرايائها المجروحه تصارع وتجهاد انها تنقتم من هالانسان اللي تسبب بيوم من الايام بخسارات معنويه وماديه بالنسبه لها ..!!

شنو بيصير؟؟
بتستمر أنوار في الأنتقام وإلا لا؟؟؟
بتعرفون في الجزء الثالث والعشرون..

أختكم في الله