ديمه ضلت على حيرتها بسالفه مشعل وخايفه تدق مره ثانيه وتسمع خبر مزعج ! متعلق بمشعل فا من كثر الحيره مالقت نفسها االا ماسكه تلفونها ودازه لدلال مسج " دقي علي متى ماخلصتي ضروري ! "
اما دلال من كسر مشعل الفازه وصعد واهي استلمت عبدالرحمن ..
دلال : شفيه ؟
عبدالرحمن : المشكله ان سيارته مافيها أي معلم من معالم الحادث ! ولا شلخ بسيط ! هذا اللي قاهرني !
دلال : ماقدر اصبر بروحله افهم منه السالفه
عبدالرحمن : ترى ان دشيتي عليه الحين بتردين لنا انسانه معوقه ! ديربالج
دلال : شنو يعني بيطقني بيذبحني عادي بس ماقعد جذي على اعصابي
عبدالرحمن : كيفج اللهم اني بلغت ! انا بكلمه بس طبعا مو الحين اذا رديت بالليل ..
اما ام مشعل كل اللي سوته انها قالت لهم متى ماهدى مشعل خلوه يجيني بغرفتي
دلال الوحيده اللي غامرت وجازفت بحياتها ودخلت غرفته واهو بهالحاله !!
طقت الباب مره مرتين لكن محد يرد والطقه الثالثه قالت ترى بدخل ودخلت ! ماشافته وسمعت صوت الماي داخل الحمام ...! استنتاج بسيط يتسبح .. ومشعل خلاص عرف عمره بهالحاله ان قعد بغرفته بيكسرها ! فا الحل المناسب انه يتسبح ويخفف عنه هالتوتر .. قعدت تنطره وبعد ماخلص طلع وكان ينشف راسه
دلال : نعيما
مشعل طالعها باستغراب وقعد على السرير وردت له الذاكره قبل جم ساعه وزاد التقلص بمعالم وجهه !!
دلال : ممكن اعرف شفيك ؟
مشعل : انتوا لازم اهد لكم البيت عشان ترتاحون !
دلال : شوف مشعل بتكسر الغرفه وبتطق بتسوي أي شي عادي عاذرتك بس المهم تقولي شصار ! ترى قلبي والله مايتحمل خرعه
مشعل : واعتقد اللي بقوله انتِ ماراح تتحملينه !
دلال : انت قووووول على الاقل
مشعل نزل راسه: شقول بس !!
دلال : شسر الدم اللي على ملابسك ؟ وانت سيارتك مافي انظف منها وولا مبين عليها اثار حادث ولا شي !!
مشعل : يعني مصره اتعرفين !
دلال : اكــيـ
ماكملت كلمتها ويرن تلفونها
وشافت المتصل وحطت سايلنت
دلال : كمـل بليز
مشعل : ليش ماتردين ؟
قطت التلفون جدامها عالسرير
دلال : موفاضيه اكلم احد ابي اعرف سالفتك
مشعل قدّر خوفها عليه وتكلم ولو انه ماوده يتكلم !
مشعل : كنت انا مار واحد من الربع وبنطلع وبالطريج كان على يميننا سياره سبورت ويسارنا سياره سبورت ويتسابقون ! ويستعرضون ! بالاخير صاحب السياره السبورت اللي على اليمين ماقدر يتحكم بالسكان وافترت فيه السياره يمكن عشر فرات ودش بسياره واحد شايب !! وهذا كلا جدامنا
دلال : اشوووى ربي ستر عليكم
مشعل : ماخلصت لي هني السالفه
دلال : اوكي كمل
ويشوف مشعل تلفونها مره ثانيه يرن وبالشاشه مكتوب ديمه يتصل بك
مشعل : هذي ديمه اللي تدق من اليوم ؟
دلال : أي
مشعل : وليش مارديتي عليها ؟
دلال : شلون ارد عليها ؟ اهي اكيد اسمعت صراخكم تحت وخافت تبي تعرف شصار ! خلاص اذا عرفت السالفه كلها منك بدق عليها وبطمنها
مشعل : الحين تدقين عليها حرام عليج شابه من اليوم!
دلال : انزين بس بلييييز كمل السالفه
مشعل : ماراح اكمل الا تدقين عليها وتطمنينها قوليلها مافيه شي
وتدق دلال عليها
ديمه : مابغيتي تردين ؟
دلال : شسوي بشوف اخونا بالله شفيه
ديمه : سمعت كل اللي صار بس ليش كل هدومه دم ؟ شصار عليه ؟
دلال : لا كاهو جدامي مافيه الا العافيه بس الحين قاعده اجر منه الكلام
ديمه : عندج !
دلال : أي
ديمه : خلاص مع السلامه
وتصك التلفون
مشعل : شفيها ؟
دلال : مادري يلا كمل
مشعل : كلا هذا خوف عشاني عندج !!
دلال : ماتعرفها من نطريها اسم مشعل تختبص !
مشعل ابتسم يوم تذكرها بالرغم من الحاله اللي اهو فيها
دلال : كاني كلمتها يلا كمل
سرح مشعل
دلال : وين وصلنا ؟
مشعل : أي المهم يوم دعموا الشايب خلوه وراحوا
دلال : انحاشوا ؟
مشعل :أي
دلال : شلون مو تقول ان واحد افترت فيه السياره ودش بالشايب ؟
مشعل : هذا اللي دش بالشايب طلع من سيارته وكان دايخ مو متزن وخذاه صاحبه وانحاش
دلال : صج حقاره !
مشعل : اهم خليهم يولون احنا سفطنا ورحنا للشايب وكان شكله يكسر الخاطر .. وكنت اشوف الموت بعيونه وسويت كل اللي علي وخليت رفيجي يسوق سيارة الشايب وحطينا الشايب ورى .. لاننا ندري مايقدر يتحمل نقل لسياره ثانيه .. وسيارته كانت تقدر تمشي .. واحنا بطريجنا للمستشفى .. خلاص كان يشهق شهقات الموت .. ولفيت وجهه للقبله وقلتله ياعمي تشهد وقعدت القنه الشهـاده ويطالعني ببرود !
دلال : شلون ؟
مشعل يحط ايده ورى راسه بتعب وهو يتذكر
مشعل : كنت القنه الشهاده ياعمي قول اشهد ان لا اله الا الله واشهد ان محمدا عبده ورسوله .. قول قول .. بالاخير طالعني وقال ياولدي تحسب اني ماعرف اقولها ؟ اعرف بس انا الحين ماقدر اقولها اهي على لساني اثقل من الجبل !
دلال : يا الله قشعر شعر جسمي !! مو قادر ينطق الشهاده واهو يحتضر ؟
مشعل : ورفيجي يسوق ويكبرّ وكلنا اصواتنا بدت تعلى ونهلل ونكبر .. درينا انه خلاص الشايب شاف ملك الموت وكان يطالع على مد الشوف بنظره وحده بالاخير شهق جم شهقه وبعدها ارتخت عضلاته وعرفنا ان روحه انسحبت وردت الامانه لصاحبها !.. كان موقف ما انساه بحياتي ..
دلال : لا اله الا الله .. هذا وهو شايب !
مشعل : ماوصلنا المستشفى الا مدخلينه الثلاجه وكاتبين شهاده وفاته بعد ما اتصلوا بأهله ! وكان رفيجي بيطلع بس قلتله اقعد لازم اشوف اهله ..!
دلال: ليش؟
مشعل : جذي ماقدرت اطلع ..
دلال: انزين ؟
مشعل : قعدت انطرهم بالاخير ما حضر الا ولده الصغير مع امه
دلال : بس!
مشعل : أي وبعد ماخلصوا اجراءات شهادة الوفاه ودخلوه الثلاجه .. مسكت زوجته وقلتلها عن اللي صار
وقالت بأسف بعيد عن ربه طول عمره تبيه بنهايته ينطق الشهادة ؟
دلال : لا حول ولا قوه الا بالله ..
مشعل : سألتها عن عيالها .. قالت كلن لاهي بدنياه .. وقلتلها بلغتيهم قالت بلغتهم قالوا انتِ خلصي اجراءات شهادة الوفاة واحنا بنجي باجر نصلي عليه .. !
دلال : قلوب قاسيه !!
مشعل : بس اللي عرفته ان ابوهم شتتهم وكرههم ببعض .. وكان مزواج ويحب الفلوس .. يعني قلب حياتهم جحيم ! وكان ابعد شي يعرفه المسجد ! ماكان يركعها وكان ملتهي بجمع الفلوس ! راح ولا خذا منها شي !! الله يغفر له
دلال : اعوذ بالله ! شلون جذي ؟
مشعل : مانقول الا اللهم اجعل صالح اعمالنا خواتيمها ..
دلال: ياربي والله خفت ..
مشعل : اللي معقدني شلون رجال كبير بالسن وعنده عيال واحفاد مايصلي اجل مربينهم على شنو !!
دلال : كثر التفكير باللي صار اليوم بيتعبك قوم صل لك ركعتين .. واستغفر ربك وروح لامي تراها تبيك
مشعل : ادري تبيني اقولها السالفه انتِ قوليلها السالفه انا مصدع كل ما تذكر منظرة يموت بيديني اصدع زياده باكل لي حبتين بندول وبنام ..
دلال : راح لربه هذا يومه لاتفكر زياده يلا تصبح على خير ..
مشعل : وانتِ من اهله .. لاتنسين اذا طمنتي امي طمني ديمه
دلال ابتسمت : ان شاء الله ..
--------