مها العصر كانت قاعده بالغرفه وتقص لها برتقال وتاكل وكان محسن يقرى جريده ومندمج ..
مها : تخيل اليوم شاي الضحى عند ام حمد وكنا نسولف الا يطرون سالفه الزواج ومسكتني ام حمد تقول ليش ماتزوجين ولدج ؟ باجر ان وصل عمره 25 والا 28 بيكبر راسه وبيقول لا تخطبين لي !
محسن : وانتِ تسمعين كلامهم ؟ ولدج توه 22 وين بتزوجينه بعد !
مها : لا انا قلتلها ولدي توه صغير وتوه بدا يشتغل مع ابوه قالوا فلوس ابوه واجد مايحتاج يكون نفسه ومن هالسوالف اللي طايحين فيها الشباب
محسن : اعوووووذ بالله حاسديني على تعبي !!!
مها : شدراني ؟
محسن : يبا هالشاي الضحى يفرّ روس هالحريم جم مره اقولج لا تروحين لها
مها غيرت السالفه : المهم شخبار اخوك منصور ؟
محسن : خلاص سوينا شراكه يعني ثلاث شركات بإدارة وحده انا وياه وبومشعل
مها : وليش اتدخله بينا ؟
محسن : اخوي بعد
مها : وانت شماخذ من اخوك غير الفقر وعمات العين !
محسن : يلا عاد الا اخوي امسكي لسانج احسن لج
مها : أي مو قلتلك مسوين لك العمل من زمان !
محسن : لو صج مسوين لي العمل جان انا مجابل وجهج ؟
مها : بس الله انتقم منها وبرد حرتي فيها .. جازاها على قد نيتها وبلاها ببنت معوقه ومتشوهه
محسن : استغفري ربج ترى ربي يبيلج ..! الا الشمـاته الواحد ما يتشمت
مها : انا مو قاعده اتشمت هذا الحق .. على كثر ما جننتني وقهرتني ربي جازاها ... ربي مايطق بعصى
محسن : تدرين ان المجلس معاج ينمل ويجيب الهم والاكتئاب النفسي ؟ انام بالدوانيه ابرك لي
مها : أي وتقول مومسويه العمل ؟ اجل شاللي خلاك تنرفز مني وتطلع من الغرفه ؟ بعد قص علي وقول مو عمل ؟
محسن ضحك عليها باستهزاء : أي هذا حدج هذا مستوى تفكيرج سحر عمل سوت لي وتشمت وهالسوالف لا يبا هالمجلس انا ماحبه
مها : قول امين جعل اللي كرهك بمجلسي يكرهه هدومه
محسن : انــــــــــــــــت ِ اللي كرهتيني فييييييه راجعي نفسج راجعي نفسج اول قبل لا تبلين على الناس
طالعته بصدمه وخلاها وصفق الباب وراه !!
------------

بومحمد يوم شاف ان انوار معندة ومو راضيه تتكلم .. قرر يسوي اللي فبـاله .. وكان اليوم موعدها عند الدكتور حق رجلها وسوت الجلسه وبعد ماخلصت خذاها ابوها عند دكتور ثاني يبي يعرف لي متى بيستمر هالسكوت ؟ وهل فعلا فيها خلل عضوي يمنعها من الكلام !!
وعلى المغرب خذاها وراحوا موعد العلاج الطبيعي وكانت باديه تتحسن .. وبنهايه الموعد طلعوا بومحمد وانوار من عيادة الدكتور وخذاها لدكتور ثاني !
وظلت علامه التعجب ملازمه وجهها مو عارفه ابوها وين رايح !
ودخلوا على الدكتور وكلمه عن حالتها واهي تطالع ابوها معصبه ليش يوديها لدكتور اهي ماشكت له الحال !
الدكتور : آآها اوكي ماقدر احدد الحاله بالضبط الا لين تجيبون لي الاشعه
بومحمد : ننزل نسوي الاشعه !
الدكتور : أي سوها واذا طلعت جيبها لي عشان اشوفها
بومحمد : اوكي ياغالي والطلب رخيص ..
وطلع مع انوار وسوولها اشعه وبعد مارجعوا للدكتور
الدكتور : ماشاء الله بنتك مافيها شي ..
بومحمد : شلون دكتور ؟
الدكتور : الاشارات اللي بين اللسان والمخ اللي تعطي اوامر بالكلام شغاله ومافيها أي خلل
بومحمد :بس دكتور لها اسبوع ماتتكلم
الدكتور : ماعليك تلقاها تتدلع
بومحمد : السالفه مو سالفه دلع دكتور !
الدكتور : يعني تبي تتأكد من كلامي ؟
بومحمد : يكون احسن
الدكتور راح ورى انوار على بو انه يطلع لكن بنظرة خاطفه طقها على ظهرها
انوار بألم: آآي
الدكتور : هههههههههههه ماتتكلم ها ؟
بومحمد استانس وعصب بنفس الوقت استانس لانها فعلا مافيها أي خلل عضوي وطبي بجسمها يرغمها على السكوت وبنفس الوقت معصب منها ليش عيشته بقلق وليش لي طلب منها تتكلم ما تتكلم ؟
بومحمد : انوار كل هذا دلع ؟
انوار نزلت راسها باحراج وطالعت الارض ..
الدكتور : خلها ماعليك يمكن تتغلى
بومحمد : أي تتغلى الله يهداك ؟؟خرعتني عليها
على العموم ارتاح بومحمد عرف ان السالفه سالفه وقت مثل ماحكرت روحها شهر يمكن هالمره تبي تجرب سالفه الصمت ! يمكن كل شي جايز اهو حط جذي باله بس ارتاح ان ماكو شي فعلا يعيق عمليه التحدث والكلام عندها ..
واهو يّركب انوار السياره دق تلفونه والتلفون كان على كرسي السايق وبومحمد كان ورى بالدبه يركب الويل جير .. وبعد ماركب السياره سمع صوت تلفونه لا لحين يرّن
بومحمد : هذا ابوي جان رديتي عليه ؟
نزلت انوار عيونها بعدين لفت الجهه الثانيه صوب الدريشه .. وردّ بومحمد على التلفون
بومحسن : السلام عليكم
بومحمد : وعليكم السلام والرحمه الله حيهم
بومحسن : الله يبقيك شلونك ؟
بومحمد : ابد بخير الله يسلمك شلونك انت عساك بخير ؟
بومحمد : ابشرك بخير وينك فيه
بومحمد : توني طالع من الدكتور موعد علاجها الطبيعي وقالوا لي في تحسن وبعدين رحت للدكتور اللي وصيتني وابشرك قال سليمه بس دلع بنات
بومحسن : لا والله ! زيين اشوووى .. وينها هي عطني اياها
بومحمد : ماراح ترد عليك شانه حرب عالمي علىالكل مادري شمسوين لها !
بومحسن : اقولك مرني مرني وانا اعلمها تشن الحروب على منو ؟
بومحمد : ههههههههههههههه
ويلفّ على انوار
بومحمد : ابوي متحلف فيج ياويلج !
انوار ابتسمت برضى وسكتت !
بومحسن : يلا تعال تراني ناطرك بالدوانيه
---------