مشعل كان متضايق عشانه ماراح يشوفها الا يوم العرس .. بس صبر نفسه دامه صبر كل هالوقت .. واهو بغرفته دخلت عليه اخته دلال .. ومعاها مجله ..
دلال : مساء الخير
مشعل : قاعدين بشركه احنا ؟
دلال : هههههههههههههه مو كفو ذرابه انت شعندك قاعد لحالك
مشعل : اتأمل بملكوت خلق الله
دلال : ياشينك اذا استملغت
مشعل : بعد قاعد بغرفتي .. واندب حظي الخايس
دلال : افااا المعرس يندب حظه ليييش ان شاء الله ؟
مشعل : تخيلي ماراح اشوفها الا يوم العرس !!
دلال : أي عادي
مشعل : انتِ معاهم بعد !!
دلال : شي معروف ليش متضايق ؟
مشعل : الحين شسوي ؟
دلال : تنطر الصيف الجاي بعد شتسوي !!
مشعل : افف انزين .. تعالي انت قعدتي معاها بالملجه ؟
دلال : لا
مشعل : لييييييييييش عاد ؟
دلال : يعني ماكو مجال اقعد معاها بس باركت لها واهي بروحها مرتبكه وماطولت الا انت جيت وقعدتوا مع بعض بعدين رحتوا فوق .. وين اقعد معاها واتعرف عليها ؟
مشعل : يااااا الحظ الخايس
دلال : ههههههههههههههه
مشعل : عاد اهي كبرج تدرين ؟ مادري بعد اذا كانت بكليتج ؟
دلال : لالا مو بكليتي ..
مشعل : متأكده
دلال : أي سألت اختها
مشعل : انزين قعدتي مع اختها ؟
دلال : اممم بصراحه لا
مشعل : انتِ حاضره الملجه ؟
دلال :يقولون هههههههههههههههههه
مشعل : تقهرررررررررررين
دلال : ليش منقهر خلاص مصيره يجي اليوم اللي بتعرف عليها عن قرب وبتصير اقرب الناس مني .. مو اهي مرت اخوي ؟
مشعل شق ذيج الابتسامه : أي صح .. لالا اصلا من قالكم اني بقعدها معاكم .. بطلع بيت لحالنا ..
دلال : اعوذ بالله اخوي خبيث
مشعل : ههههههههههههههه كيفي زوجتي
دلال : ترى اقدر ازورهم ....... وبجذي اتعرف عليها اكثر واكثر
مشعل طالعها متفاجأ : صج ؟
دلال : أي عادي .. اصلا انا كنت ناويه .. بس مو اللحين بعد اسبوع جذي
مشعل : اياااا الخياااااانه وماتقولين ؟
دلال : وانت شكوووو تعرف ؟
مشعل : زووووووووجتي هذي
دلال : لحووووووووول
زهقت منه دلال وقامت بتطلع
مشعل : تعااااااالي اتغشمر معاج ..
دلال : ياخي درينا انها زوجتك حرام نتعرف عليها بعد ؟
مشعل يضحك : اتغشمر هاه شفيج قلبتي علينا
دلال : انزين بطلع
مشعل : وين بتروحين ؟
دلال : بكمل قرايه المجله
مشعل : افا تتنازلين عن قعدة اخوج عشان تقرين مجله ؟
دلال : انزين اخوي شيبي ؟
مشعل : ابيج اذا رحتي لها تتعرفين عليها اكثر .. وتعرفين انطباعها عني
دلال : أي اكيد
مشعل : واذا بتروحين لها قوليلي انا اوديج
دلال : عن الحركات الماصخه .. امي بتوديني
مشعل : افا شفيها قامت عليناااااا
دلال : هههههههه مافيني شي بس انت شوف تصرفاتك ..
مشعل تفشل : خلاص اطلعي اقري مجلتج
دلال : أي صج اليوم بتروح مكان ؟
مشعل : أي
دلال :وين ؟
مشعل : الدوانيه
دلال : افف مادري شتحبون بالدواويين .. كلا حش وقرض بخلق الله !
مشعل : الحين الدوااويين اهي الحش ؟ اجل شاي الضحى شنو ؟ تتكلمون عن السياسه والاقتصاد ؟؟
دلال : ههههههههههه بس والله شلك بالدواويين الحين كلها انقلبت سوالف حريم !!
مشعل : وانتِ شدراج ؟
دلال : بعد معروفه ..
مشعل : المهم ليش تسألين وين بتروحين ؟
دلال : كنت ابيك تمشيني اليوم .. ضايق خلقي ..
مشعل : امي ليش ماتطلعج ..؟
دلال : كل ماجيتها القاها ماسكه كشوفات الطلبه مادري شتسوي واتقولي اذا ماعندج شغله تعالي رتبيهم معاي
مشعل : امممم كسرتي خاطري والا اقولج قلعتج ماني موديج
دلال : مشكور مابي اطلع اصلا
وطلعت من الغرفه بهدوء..
استغرب منها مشعل ..!! قرر يطنشها لكنها بالاخير ماهانت عليه .. هذي دلال اخته الوحيده لحقها غرفتها اول ماطق الباب محد رد عليه وبعدين فتح الا شاف المجله طايحه على الارض .. وقعد يدورها مالقاها .. ويناديها .. الا تطلع له من غرفه التبديل ..
دلال : خير شتبي ؟
مشعل بتأنيب ضمير : انتِ زعلتي ؟
دلال : لا
مشعل : امبلا شوفي وجهج
دلال : الحين انت شتبي ؟
مشعل : مايهون علي ازعلج
دلال : يهون مايهون ترى كله واحد .. ماتفرق معاي
مشعل : صايره غريبه مو قادر افهمج ؟
دلال : انا الغريبه اللحين ؟
مشعل : أي انتِ
دلال : الغريب اهو مشعل اللي من رد من السفر واهو انسان ثاني لا هو اللي يسأل عن اخته ولا هو اللي يطلع ويمشيها ولا هو اللي يونسها ويقعد يسولف معاها .. تغيرت مشعل اللي سافر غير عن مشعل اللي رجع ليش ؟؟ عبالك ماتأثرت بتغيرك هذا ؟ انا ماعندي خوات وانت كنت اقرب لي من عبدالرحمن .. وين مشعل اللي من نفسه اذا فقدني يروح يدور علي بالبيت كله.. مشعل اللي يقولي كل شي ومن نفسه مشعل انا مريت بظروف يوم انت مسافر وتحملت قلت باجر بيجي مشعل وتنتهي الازمه بس للأسف ماشفت مشعل اللي كنت انتظره شهر كامل .. بس خلاص دام هالوضع مريحك على راحتك ..
مشعل سكت ونزل راسه من سمع كلامها .. فعلا فعلا كلامها كله صح .. ماقدر يطالع بعيونها .. اخته بقمه الحاجه له واهو ماوقف معاها ويوم رجع فكره وقلبه وعقله ماكان ملكه .. حس بالذنب ..
مشعل : شاللي مريتي فيه بغيابي ؟
دلال : ماله داعي اقول شي ..
مشعل : انا بقولج كل اسبابي لان كل شي ماكان بيدي .. بس قبل ما اقول ابيج تقوليلي شصار ؟
دلال : خلاص مشعل مابي اسمع منك شي روح لربعك ولدوانيتك .. انا بكمل مجلتي
وقعدت بسريرها .. واهو واقف .. منصدم
"دلال متغيره .... معقوله انا السبب بتغيرها ؟ مشكله ان طبيعتها حساسه .. "
مشعل : ماراح اطلع مكان اليوم ..
دلال : اوكي خلاص اطلع وصك الباب
وفتحت المجله وقعدت تقرى ومشعل يدري انه اول مايطلع بتحضن مخدتها وتبجي .. بس قعدت ومارضى انه يطلع الا ينهي هالسالفه .. ويدري انها ماسكه المجله ومضمونها اخر شي تفكر فيه اخته .. ماسكتها تبي تقتل الوقت الفاضي اللي مالي عليها حياتها ..
مشعل قعد على السرير واخذ منها المجله وفتح الدريشه وقط المجله منها ..
رجع مره ثانيه وكانت اعصابه بدت تولع .. واهو حاول يسيطر عليها .. وقعد على السرير مره ثانيه .. واهي تطالعه باستغراب
مشعل : الحين نقدر نتفاهم ..!
دلال : خير ان شاء الله
مشعل : ممكن تعلميني يوم سافررت شصار معاج ؟
دلال : سؤالك جاء متأخر .. تسأل بعد 3 اسابيع من رديت من السفر ؟
مشعل : دلال لا تصعبين السالفه علي قلتلج بقولج كل اسبابي
دلال : اوكي .. ببدايه الصيف سافرنا لبنان اسبوعين وردينا .. جيت كل رفيجاتي مسافرين ماكو احد .. ماقعدنا اسبوع الا انت مسافر ورحت فرنسا عشان الدوري .. قامت الايام تروح وتجي كلها نفس الرتم بطيئه بايخه مالها معنى .. امي ان طلعتني مره بالاسبوع .. وباقي الايام بالبيت .. زهقت عبدالرحمن من مع العالم مع ربعه وطلعاته .. انزين ابي احد اقعد معاه اسولف ... ماعندي خوات مشعل انا ماعندي خوات .. شسوي ؟ تدري يوم من الايام جبت سونتا خدامتنا وقعدتها وخليتها تسولف لي عن اهلها وديرتها .. لين خلاص طيحت الاخت الميانه معاي الحين اتحداك ان طلبتها شي قالت حاضر .. انا اعتبر نفسي وحيده .. ماعندي بنات عم كبري .. كلهم كبر عبدالرحمن وكبرك .. وبنات خالتي جهال .. شسوي يعني ؟ والله جاتني كئاااابه .. شريت لي كمبيوتر قعدت عالنت نفس المشكله .. احس بفراغ .. كذا مره حاولت اقعد مع عبدالرحمن بس مايعبرني اصلا .. واذا حسيت انه خلاص بدا يسولف وانا مستانسه يدق تلفونه واحد من ربعه يقطع السالفه بكبرها ويطلع .. كل هذا وانت مسافر .. (قعدت تبجي ) ابي خوااااااااات مايبعون خوات اشتريهم ؟؟
مشعل قلبه تقطع على اخته .. مايدري انها حساسه لي هالدرجه .. معقوله كانت تعاني واهو مو موجود .. كانت تبي عنصر انثوي بالبيت يمليه عليها .. صح مشعل الوحيد اللي كان مغطي دور الاخت والاخو .. بنفس الوقت ..
مشعل : بس لاتبجين .. والله قطعتي قلبي
دلال مسحت دموعها غطت روحها بالبطانيه
مشعل : عبالج انتهى كلامنا .. انا سمعتج بي انتِ ما سمعتيني ..!
دلال : خلاص انت عرفت شفيني .. مابي اعرف شفيك لان حتى لو عرفت ماعاد يهمني ..
مشعل : افاااا انا ماهمج الحين ؟
دلال : خلاص اطلع
مشعل : ماراح اطلع .. لازم ابررلج كل اللي صار
دلال طالعته وسكتت ودها تعرف شفيه اخوها بس كبريائها منعها وضلت ساكته
مشعل : انا يوم رحت التهيت بسالفه التدريبات وجذي .. بعدين لاحظت وجود عايله كويتيه معانا بنفس الفندق .. ولاحظت ان بنتهم كل ماطالعتني تشوفني بنظرات غريبه .. كأنها شايفتني من زمان .. اذا شافتني تقط كل اللي بيدها وتنحاش .. تختفي .. استغربت وقعدت افكر فيها ليل نهار .. احس وراها سر .. وفعلا بديت اتعلق فيها .. بعد اسبوع راحوا اهلها ونسوها بالفندق .. الام عبالها انها مع ابوها والابو عباله انها مع امها .. لين قعدت .. وانا اللي تكفلت فيها .. واضطريت اسكنها غرفتي .. ورفيجي كان متنوم وقعدت بغرفته .. وكنت بردها ثاني يوم بس ابوها متمشكل مع فندقهم بروما ولا رضى اني اجيبها .. وقعدت معاي يوم ثاني .. وتعلقي فيها يزيد .. قالت لي سر نظراتها لي .. وخوفها مني .. وسويت اللي اقدر عليه عشان انسيها احزانها .. هذا غير المواقف اللي صارت تعلقني فيها اكثر واكثر ردينا روما عند اهلها وكنت متعور وحلف ابوها اني اقعد يومين معاهم لين اصير زين .. وكل الايام اللي كانت بقربي كنت حاس بسعادة ما تنوصف .. وكنت متضايق لاني فعلا بديت احبها او بالاحرى حبيتها لكن ماعرف شعورها تجاهي .. يوم رديت باريس ودخلت غرفتي لقيت خواطرها على ورقه واكتشفت انها تحبني .. من يومها وانا انسان ثاني صج .. حاولت اكمل حياتي عاديه وانساها لكن ماقدرت ابد .. ومن جيت كلمت اهلي وخطبوها لي ..
دلال: ديمه !
مشعل :أي
دلال : يعني تزوجتها عن حب
مشعل : أي
دلال : ليش ماتقول ؟
مشعل : ماكنت في حاله تسمحلي اقول .. مادري ماتشوفيني دايما سرحان وتعبان
دلال : شفت ان الفتره اللي طافت كانت مأساويه عليك وعلي .. ابتعدنا عن بعض حيل ..
مشعل : بس هالشي ما يرضيني .. انتِ اختي الوحيده .. وبعدين مو انتِ تبين اخت ؟
دلال بفرحه : أي
مشعل : لقيتها
دلال : صج قاموا يأجرون ؟؟
مشعل : ههههههههههههههههههههههه شنو سيارة اهي ؟
دلال : قوووووولي تكفى أي ابي اخت
مشعل : ديمه اذا خذيتها راح تكون مرت اخوج الغاااااالي احم احم واختج ..
دلال : صج ؟
مشعل : أي
دلال : وانا شلون ما فكرت فيها ؟
مشعل : عاد شفتي شلون انا اشطر منج ..
دلال : خلاص بعد اسبوع بزورها .. وبتقرب منها اكثر وبعرف مرت اخوي عن قرب
مشعل : ها صافي يا لبن ؟
دلال ضحكت : حليب يا اشطه
ومسكها من شعرها ويجر اذونها.. بضحك
مشعل : مره ثانيه كل شي تقولين لي اياه فااااااهمه
دلال :اااااي أي فااااهمه
مشعل : ناس ماتجي الا بالعين الحمرااااااااء
دلال : ههههههههههههههه
مشعل : يلا بدلي بطلعج
دلال ابتسمت
--------------