مشعل مستانس على الاخر حس انه استقر واخيرا .. وريح قلبه .. حس ان امس كله كان حلم بالنسبه له .. وكان مو مصدق متى يجي الخميس الجاي عشان يشوفها .. الحين خلاص اهي زوجته .. اهله طول اليوم مخلينه على راحته .. لانه مو صاحي فاج الحلج والابتسامه شاقته .. كانوا يقارنون بينه وبين عبدالرحمن اخوه يوم ملج ماسوى جذي ؟
ام مشعل : ذبانه بحللللللجك !!
مشعل اختبص وراح تمضمض .. وامه تضحك عليه
ام مشعل : وانت تصدق أي شي !
مشعل : خرعتيني ؟ بعد اخاف ابلعها وانا مادري مو ولدج متنح ع الاخر !
ام مشعل : بشر شلون الاوضاع امس ؟
مشعل : مرتااااااااااااااااااح .. اهم شي اخذت اللي ابيها
ام مشعل : عساك دوم مرتاح .. تكلمتوا تفاهمتوا ؟
مشعل : ايييييي صج قلتلها ترى العرس بالصيف
ام مشعل : اعترضت ؟
مشعل : سكتت
ام مشعل : اخاف ماتبيه بالصيف وانحرجت اتقولك ؟
مشعل : يعني متى تبيه فرضا ؟
ام مشعل : ماتدري انت البنت يمكن مرتبه نفسها على شي ثاني
مشعل : يما انا زوجها شنو اللي اهم مني ؟
ام مشعل : يا يما الزواج مو لعبه لازم اتكون البنت متهيأه لبيت وعيال ومسؤوليه .. يمكن ماتبي الدراسه تعيقها
مشعل : لالا ماعتقد يما .. ديمه اكيد تبي الزواج هذا يتم بالصيف ..
ام مشعل : شاللي مخليك متأكد ؟
مشعل تذكر يوم صرح لها انه اكتشف حبها له شلون انحرجت لولا ربكتها من درت انه قرى خواطرها ماكان تأكد ..
مشعل : على العموم انا الخميس بزورها وبسألها
ام مشعل متفاجأه: بتزورها ؟
مشعل : أي شفيج يما ؟
ام مشعل : بس يا يما انت ماتدري عن عايلتها يمكن مايرضون !
مشعل : ليش شمسوي انا ؟ بس بشوفها ها مو زوجتي !
ام مشعل : كل كلمه والثانيه قاضبها علينا زوجتي وزوجتي درينا والله بس اهم عايله حيل محافظه ماعندهم هالشكليات .. تملج وتشوفها بالعرس ..
مشعل انصدم : لالا والله ؟؟؟؟
ام مشعل : أي والله .. وليش مستعجل خلاص اصبر بالصيف بنسوي عرسك
مشعل : اقعد لي الصيف ماعرف عنها شي ؟
ام مشعل : أي عادي حالك حال الباقي
مشعل : يووووه
ام مشعل : كاهو اخوك عبدالرحمن ترى من ملج ما درى عنها .. والبنت مو فاضيتله تجابله كل مازارهم .. وراها جهاز وعرس ..
مشعل : بس يما انا ربعي اذا ملجوا عادي يزورون زوجاتهم واللي يكلمها بالتلفون ليش مكبرين المسأله ترى عادي حلال
ام مشعل : احنا ماختلفنا .. بس كل عايله غير عن الثانيه .. وكل شخص يمشي على اللي يريحه ..
مشعل : انزين خلاص تنازلت عن الزياره بكلمها بالتلفون
ام مشعل : انت الظاهر ماتفهم الكلام يدخل مني ويطلع مني
مشعل : يمااااا ثمان شهور وااااااجد
ام مشعل : لا كل شي يطير بغمضه عين
مشعل : انزين انا قلتلها بجيكم الخميس .. البنت مستعده اكيد
ام مشعل : انا ادري اكيد انها انصدمت وبعدين بلعتها
مشعل قعد يتذكر : أي والله اشوفها سكتت ! ههههههههههههههههههههههه
ام مشعل : مره ثانيه لا تسوي شي قبل لا تقولي ..
مشعل مفتشل: ان شاء لله ..
على يوم الثلاثاء
انوار : انزين عادي بعد زوجج اكيد بيزورج
ديمه : لا مابي اشوفه قبل العرس .. ابي اخش الفشلات والاحراجات حق بعد العرس خليني ارتاح نفسيا شوي .. قلق اذا كل خميس بيزورني
انوار : هذا وانتِ تحبينه !!
ديمه : انا ماتكلم عن الحب .. لو ودي كل يوم يزورني .. بس انا اعرف نفسي بصير مومياء .. ولا راح انطق بحرف
انوار : انزين على الاقل تتعودون على بعض ....
ديمه : هالمسأله هذي بتنحل بعد الزواج اكيد .. الحين شلون بكلم امي بقولها تقوله لا يجي
انوار : لحووووول .. صج انج ترفسين النعمه
ديمه : لازم اقول لامي ..
انوار : ترى امي بالصاله
راحت ديمه لامها .. وماتدري شلون تفتح معاها الموضوع ..
ام محمد : هلا ديوم .. شفيج واقفه
ديمه انحرجت بعدين تكلمت: يما مشعل يوم الملجه قالي انه بيزورني الخميس هذا ..
ام محمد : اييي خلاص امه دقت علي وقالت لي .. ان مشعل تسرع بهالشغله وخلاص ماراح تشوفينه الا بالعرس
ديمه ارتاااحت : اووف اشووى
ام محمد : ههههههههه اشوف ماتبينه !
ديمه : ها لا بس يما انتِ تعرفين مابي اتوتر واقعد على اعصابي طول الاسبوع عشان اليوم اللي بيزورني فيه
ام محمد : ماعليج كل اهلنا اللي نعرفهم يملجون ويقعد معاها بالملجه وبعدها ما يشوفها الا بالعرس ..
ديمه : بس يما عندي رفيجاتي لا عادي نصهم يطلعون
ام محمد : يما كل عايله غير عن الثانيه .. والكل له نظرته بهالموضوع ..
ديمه : تدرين وجهة نظرنا احلى وجه نظر ههههههههههه
ام محمد : أي لانج انتِ اللي بترتاحين ..
ديمه : يما يوم كلمتج خالتي ام مشعل .. ماقالت لج متى حددوا العرس ؟
ام محمد : اهي تقول يبونه بأول الصيف
ديمه : اممممم
ام محمد : جنه مو عاجبج !
ديمه : مادري ..
ام محمد : بالعكس الصيف حلو تكونين مفتكه من الدراسه وخالصه .. وبعدين فرصه عشان تسافرون وتغيرون جو ..
ديمه : مو مشكله اللي تشوفينه ..
ام محمد : واذا على الدراسه ترى ماباجي لج اذا تزوجتي الا سنه وكورس
ديمه : اوكي مو مشكله ..
ام محمد : وين انوار اختج ؟
ديمه : بغرفتي فوق الظاهر عالنت
ام محمد : مادري شتحبون بهالجهاز ؟
ديمه : يمى احنا مو ذاك الطلعات ولا الجيات ماعندنا الا النت نتسلى فيه ونشوف اللي انعرفهم
ام محمد : بس اضراره اكثر من فوايده .. ماخلالكم نظر مابينكم وبين الشاشه خمس اشبار ؟ امحق وناسه
ديمه : عادي يما احنا مرتاحين .. وبعدين تراني خلاص صرت مطيحه عند مواقع المصممين والمكياج والخلطات والعطوارت ..
ام محمد : ايييي استفيدي منه دامج مجابلته ...
ديمه : كاااهي انوار انزلت
انوار : ياربي اتحشون فيني اكيييييد
ام محمد : وين كنتي ؟
انوار : اتكلم تلفون
ام محمد : اختج تقول عالنت ؟
انوار : أي مالقيت احد اون لاين فصلت ودقيت على مرايم ..
ام محمد : ايي شصار على عرس خالد ماسألتي خالتج ؟
انوار : لا نفس ماهو اخر هالشهر ..
ديمه : اللي يسمعج اخر الشهر يقول وين يبيله مدددة ماجنه الاسبوع الجاي ..!
انوار : على العموم انتِ خالصه من مجامعيوا ..
ديمه : وانتِ ؟
انوار : بس يبيلي بدله
ديمه : اممممم خلاص متى ما فضت امي تودينا ..
انوار : ماعنديييييييييش مانع
-------------