يوم الملجه .. الصبح الساعه 11 .. قامت انوار وعلى غرفة اختها ..
انوار : ديييييييمه قووووومي ..
ديمه : بناااااام شتبين انتِ ؟ ناسيه اني انا وياج امس سهرانين لي الفجر !
انوار : الحمدلله والشكر اليوم حفلتج قومي لا تنتفخ عيونج .. وتريقي .. خلينا نشوف شصاير بالبيت .. ونعدل شغلنا ونروح الصالون ..
ديمه : تو الناس الساعه 11
انوار : عليج برود خييييالي .....
ديمه : انزين بقوم .. بقوم والله ماشبعت نوم
انوار : شوفي بخليج ربع ساعه بس .. بخليهم يحطون لج الريوق على ما بدل .. وبتفزين تقومين غصبن عنج .. ترى امي موفاضيه لوتشوفين حوستها تحت ..
ديمه : ادري والله .. الحين بقوم بس عطيني وقت اتسبح واصلي .. واطلع هدومي عشان اروح معاج
انوار : يلا اشوف همتج ..
نزلت انوار تحت تقول للخدامه تسوي ريوق ديمه .. وشافت امها .. وحبتها على راسها
انوار : الله يعطيج العافيه ..
ام محمد : الله يعافيج .. قومتيها ؟
انوار : أي لا تشيلين همها ديمه علي انا ..
ام محمد : كفوو ..
انوار كانت متردده : يما بيت عمي محسن بيحضرون ؟
ام محمد : والله مادري ابوج عزمهم .. والبيت بيتهم .. على العموم احنا حاسبين حسابهم ..
انوار : يوه مالي خلق ديوم تنغث اذا شافتهم ..
ام محمد : بعد اهم بنات عمها بالاخير .. لازم يفرحون لها ..
انوار : والله سيرتهم تجيب الهم ..
ام محمد : لاتشغلين نفسج فيهم ..
بنفس اليوم .. المغرب ..
مشعل راكب السياره واخر كشخه وريحه دهن العود والعطر غطى الفريج كله .. وعبدالرحمن راكب ورى .. ومشعل اهو اللي يسوق وينطرون دلال وامهم وابوهم .. ركبت دلال مع امها ورى .. وابوهم تأخر ..
مشعل : ياااااااربي الساعه ست ونصصص تأخرررررررررناااااااا
عبدالرحمن : ياخي انطر شوراك .. العروس فبيتها ماراح تطير ..
مشعل : حمنيييييييييي مو فاضيلك والله ..
دلال : هدوا اعصابكم .. ابوي شفته يقفل غرفته شوي وبيجي
مشعل يطق هرنات .. شوي الا ركب ابوه
بومشعل : انتوا من صجكم مخلينه يسوق فيكم ؟ تبونه يعدمنا !!
عبدالرحمن : أي والله شكله بيطير فيناااااااااا الله يستر
مشعل : اقول اركبواا بس .. حاصلكم مشعل يوصلكم !
دلال : تكفى مشعل لا تسرع ..
مشعل : ههههههههههههه لعيون الحبايب بدوس على 160
بومشعل يطالعه : ترى ان سويتها بدق عليهم يكنسلون كل شي ..
مشعل طالع ابوه متخررررع : لالالالا افا عليكم امشي اربعين ولا يهمكم تبون عشرين عادي عندي ..
الكل : ههههههههههههههههههههههههههه
بعد ما وصلوا .. صادفوا محسن وعياله .. ويوسف وبومحسن .. وبومحمد ومحمد .. والدوانيه كانت عامره .. وملجوا .. والكل بارك له .. دعوا له بالتوفيق .. و سلم بومحسن على بومشعل .. وتدخل بينهم بومحسن .. وصالحهم .. وتمت القعده كلها ضحك .. وامور اجتماعيه سياسيه اقتصاديه كأي مجلس رجالي ..
اما مشعل .. كان قلبه واصل اخر العداد .. خايف ومرتبك .. لانه بأي لحظه بيدخل وبيشوفها .. خلاص ديمه زوجته على كتاب الله وسنته .. وكان يبدد هالتوتر .. بتحريكه لغترته .. شوي بدشداشته .. وشوي يفرك مسباحه ..
اما ديمه .. كانت بغرفتها خالصه .. بس قالت لها امها بعد ساعه بتنزلين .. فا قعدت مع انوار ورفضت أي احد يدخل عليها .. غيرها ..
انوار : الف الف مبرووووووك يا مدام
ديمه بخجل :الله يباارك فيج
انوار : شدعوه عاد قولي وعقبالج
ديمه : هههههههه عقبالج ان شاء الله
وسكتوا شوي .. وديمه سرحت .. ورجعت لها احزانها ..
ديمه : انوار .. الكل باركلي الا عمي ..
انوار : أي عم ؟
ديمه بحزن: مبارك ..
انوار عورها قلبها : لالالا بليز لا تفكرين فيه الحين .. اليوم فرحتج .. المفروض ماتخلين لمثل هالذكريات تخرب عليج هاليوم ..
ديمه : كنت اتمنى اهو يبارك لي اهو اللي يقعد معاي الحين .. محتاجته فوق ماتتصورين .. الانسان يبي يشوف اللي يحبهم معاه بحزنه وفرحه .. اهو وقف معاي بحزني .. ابيه يوقف معاي بفرحتي .. محتااااااجته حيييييييييل ..
وخانتها الدمعه .. انوار انصدمت ..
" لالا دموع بيوم فرحتها ..!! "
انوار مسحت دمعت اختها بسرعه ..
انوار : صدقيني ماراح اسمح لاي دمعه تنزل اليوم .. ديوم مفروض تفرحين .. عمي ماوقف معاج طول هالسنين الا يبيج تنسين هالدمعه وتبدلينها بالفرح .. ويوم جاتج الفرحه ترجعين للدموع والحزن !!
ديمه : بس غصبن عني .. ابيه محتاجته الحين ..
انوار : هذا كله من التوتر والله .. انتِ بس هدي اعصابج .. ولا تخربين مكياجج شوي وبتنزلين .. وبتشوفينه وبتنسين كل شي ..
ديمه مسحت دموعها .. وبدلتهم بالابتسامه وشافت شكلها .. وكل شوي تعدل شي
انوار : ترى انتِ جذي بتخربين التسرريحه من كثر حركتج ..
ديمه : الناس واجد تحت ؟
انوار :لالا تحاتين كلهم تعرفينهم .. وشوي ..
ديمه : اشووى ..
انوار : انتِ ماتتصورين الربكه .. كل شوي ابوي داق علي دخلو الشاي دخلوا القهوه .. ومادري شنو .. عيشني برعب ههههههه
ديمه : يوه الله يعينج .. اجل محمد وينه ؟
انوار : محمد حقير قاعد يسولف مع جراح ومطنش ابوي عالاخرر ..
ديمه : يحليله جراح رجع
انوار : أي بعد الدراسه صارلها اسبوعين !
ديمه : انوار حبيبتي جيبي ماي .. عطشانه
انوار : لالا بجيب لج عصير .. احسن
ديمه : حتى بهذي تتحكمين !
انوار : هههههههههه خليني اعيش الدور ...
وبعد ماشربت العصير ..
ديمه : افففففف بنزل وخلاص
انوار : شفيج ههههههههه
ديمه : تعبت من التوتر .. خلاص علي وعلى اعدائي بنزل واللي فيها فيها
انوار : ههههههههههههه مو اقولج لا تتوترين جذي .. الحين انا ليش قاعده معاج .. عشان اضيع عليج السالفه .. لانج من تنزلين ماراح تشوفين رقعه وجهي الا الفجر ااذا راحوا الناس ..
ديمه كانت قمه بالنعومه والبراءه .. كل شي فيها ناعم وبسيط .. الفستان كان لونه ذهبي .. وتسريحتها رافعه شعرها .. بطريقه حلوه .. ومكياجها كان مضبوط .. لانها كانت خايفه مايكون يعجبها .. بس اللي سوتلها استانست على بشرتها .. صافيه ولافيها حبوب وتساعد على المكياج .. اما انوار .. كانت لابسه بدلتها السودا اللي من باريس .. وكانت بسيطه .. رغم ان اللون الاسود دائما يوحي بالرقي .. واللي طلعها مكياجها الناعم .. وسوت تسريحه تليق لها .. ككل انوار كانت متغيره .. فيها شي يلفت الانتباه .. واللي يحير انه ماينعرف شنو! ..
بعد نص ساعه نزلت ديمه على انغام اغنيه هاديه .. والكل كان يصلي على النبي ويجبب لين قعدت على الكرسي .. واذتها المصوره بالتصوير .. اول ماقعدت .. نادت انوار ..
ديمه بهمس : المصوره اقلعيها من وجهي
انوار : مايصير لازم
ديمه : انزين نبهي عليها بلا حركات ماصخه
انوار : انزين
وهي قاعده كان الكل الحاضرين شوي شوي يتوافدون عليها واللي يسلم واللي يبارك من بعيد .. واللي يقط تعليق طالعه قمر .. واللي يصور معاها .. واللي يرقص جدامها .. واهي بقمة توترها شابكه ايدينها الثنتين على بعض وضاغطه عليهم .. ومتكفيه بالابتسامه .. عشان تخفي هالكم الهائل من التوتر و القلق.. هذا الحال ابد مو بعيد على مشعل اللي كان عايشه بالضبط لكن بمكان ثاني بالدوانيه .. وبعد ما سمحوله يدخل .. حس باضطرابات بمعدته ؟ او صدره قلبه موعارف يحدد وين مكانها .. بس سبحان الله نزلت عليه السكينه .. وشق الابتسامه الوسييييييعه على وجهها .. واستسلم للفرح .. دخل على الاغنيه .. وكانت خطواته كالعادة سريعه ومتباعده .. اول مادخل تغطوا الحريم الحريم الموجودين .. ودخل سلم على امه .. ومشى صوب الكراسي المخصصه لهم .. اللي كانت قاعده على احدهم ديمه .. الكوشه .. وقعد على الكرسي .. شوي الا جايته امه .. وشكلها معصبه .. وشاورته وضحك .. كانت موصيته اول مايدخل يحب ديمه على جبينها .. لكنه من التوتر نسى كل شي من شافها نسى توصيات امه .. مشعل مرتبك .. حاس انه بمسرحيه كل الناس تشوفه !
"