رحلة العمر ((أجزاء))

[بوفيصل]

يسلمو علي القصة والله يعطيكي العافية

ولا تطولين علينا

مع خالص تحياتي بو فيصل

[أختكم في الله]

الجـــزء الثامن عشــر ::
دخل مشاري الغرفه واهو تعباااان خايف من هالمقابله .. خصوصا من سمع كلام ديمه وكان بالغرفه بو محمد وديمه وميشو ..
بومحمد يكلم انوار : هذا مشاري جبناه .. يلا المهم تخلصينا وتقولين رايج
انوار شافت مشاري بنظرة مشاري بنفسه استنكر منها ..
انوار : استريح ليش واقف !
مشاري مافهم شي من نظرتها الا ان اليوم هذا ماراح يعدي على خير ..!
مشاري : شلونج انوار ان شاء الله الحين احسن ؟
انوار : ليش يهمك يعني ؟
مشاري سكت عرف ان نفسيتها زفت شلون بتتكلم معاه واهو بعد نفسيته تعبانه ؟ يعني بالاخير اكيد بيصير شي لا يحمد عقباه ..!
" الله يستر ..!"
مشاري : بنت عمي ولازم اسأل عنج
ديمه ردت عنها : اهي الحمد لله بخير بس ننطرها تقول رايها بخصوص العمليه والعلاج
مشاري لف على انوار : وانتِ لالحين معارضه ؟
انوار : ممكن اسألك سؤال ؟
مشاري : تفضلي ؟
انوار : انت اللي انقذتني ؟
مشاري : أي نعم
انوار : ممكن اعرف ليش؟
بومحمد التفت عليها معصب
بومحمد : الحين 4 ايام نحايل فيج بالاخير ناديته عشان تسألين هالسؤال ؟ صج ماعندج سالفه .... شي اكييد بيساعددج حتى الهندي لوشافج بيساعدج انوار لا تخيليني اعصب
تدخلت ديمه
ديمه : يباااا شفيك هد اعصابك
بومحمد : اختج ماعندها سالفه ... جزاه الولد منقذها بغت تموت نزفت كل دمها لو الله ثم مساعدته جان البنت الحين ميته
ديمه : انزين يبا الانفعال عمره مايسوي شي .. هد اعصابك
بومحمد قام من مكانه : انوار انا سكت لج ها 4 ايام وقلتي جيبوا مشاري وجبناه .. انتِ راح ترضين راح ترضين ... لان هذي صحتج وما يصير اشوفج تهملينها بهالطريقه واتم ساكت .. لو أي عمليه جان وافقت ولا رديت عليج بس هالعمليه بالذات لازم رايج لانها تخص شكلج الخارجي .. وبالذات انا معطيج الحريه بالاختيار عشان اذا وافقتي وسويتيها وصار شي لا سمح الله ماتقولين انتوا ضغتوا علي ولا شي .. بس العلاج بتبدين فيه ان شاء الله وماراح اخذ رايج فيه ..
انوار طالعت ابوها ببلاده .. خلاص ماعاد يهمها أي كلام .. بومحمد ماقدر يقعد اكثر بيخليها تفكر بالكلام اللي قاله طلع وخذا معاه ميشو اللي كانت خايفه من صراخ ابوها .. ديمه لحقت ابوها لانه كان منفعل ويوم طلعت وكلمته قالها انه زين بس بيروح البيت يرتاح ووصاها على اختها .. وردت مره ثانيه لغرفة انوار ..
الفتره البسيطه اللي طلع فيها بومحمد ولحقته ديمه كانت انوار ساكته وشابكه ايدينها وتحركهم بطريقه دائريه وصابه كل غضبها بهالحركه عشان تشيل منها التوتر .. ونظرها على ايدينها ... اما مشاري كان ساكت ومنصدم من اللي قاعد يصير ... وحاس ان تعبااااان وان انوار اهي اللي زادت عليه هالتعب بتصرفاتها وعنادها
ديمه دخلت : راح البيت
انوار : اهو ليش يعصب ويتنرفز انا اللي ابيه بسويه ..! وهذي صحتي ولا حد يتدخل فيها
ديمه : انزين الولد قاعد مو انتِ مناديته يلا قولي شتبين !
لفت انوار على مشاري اللي كان قاعد على الكرسي وعيونه على الارض يسمع كلامهم ومن تكلمت ديمه رفع نظره
مشاري : أي صح والله اني متخرع قلت شنو هالشي الضروري اللي مناديني عليه ؟
انوار : سألتك سؤال وماجاوبت ؟
0مشاري : اعتقد ابوج جاوبج
انوار : انت بالذات ليش انقذتني مو انت اللي تكرهني ؟ وتتمنى اليوم اللي تشوفني فيه بهالحال واردى ؟تجي تنقذني ؟؟ موانت اللي مديت ايدك علي !! انت اللي اهنتني ببيتك ؟ انت اللي تكرهه شي اسمه انوار منذ الازل .. ومن زمان كنا ننطر منو اللي يحطم الثاني بالاخير ؟ تجي انت اللي تنقذني ؟ اكيد في سبب لاتقولي بنت عمي وبساعدها .. انت كنت تكرهني كره العمى وحتى انا بعد ابشرك اكرهك اكثر .. شالي يخليك تتلقف وتنقذني ؟؟
مشاري : تكرهيني اتحبيني هذي مشكلتج .. بس انا اللي سويته اهو الواجب ..
انوار : انت تدري اذا انقذتني بتم طول عمري بعاهه كنت تبي تتلذ بشوفتي جذي ؟ وتنقتم مني لاني انا الوحيده اللي دريت عن فضيحتك !
مشاري قام من الكرسي وجهه بدا يتجهم من هالكلام !!
مشاري : لي هالدرجه انا منحط بنظرج ؟؟؟ انتِ شتقولين ؟؟ بليز خليني استوعب !
انوار : امبلا هذي هي انوار بنظرك ..... وانت شفتني انزف تدري اني يمكن ما اعيش وانت بنفسك قلت انك انت السبب بإعاقه رجلي ... ليش ماخليتني اموت مكاني وريحتني ؟؟؟ عاجبك منظري جذي ؟؟
مشاري : انتِ تقولين يوم قدرت ليش ما خليتني اموت ؟ انزين يوم قدرتي انج تفضحيني ليش مافضحتيني ؟؟
انوار طالعته منصدمه وقبل لا ترد كمل كلامه
مشاري: وبعدين مو هذي انوار بنظري اللي بنظري وحده طلعتني من الظلام للنور .. وحده كبت علي الماي البارد عشان تقومني من الاحلام اللي كنت عايشها بسذاجتي !! وحده انا مديون لها طول عمري .. ويوم شفتج بالمزرعه كنت جاي مخصوص عشان اقولج اني انا تغيرت وكنت ناوي انهي هالزعل اللي تم من اليوم اللي طقيتج فيه .. بس للأسف ما شفتج الا بأبشع حادث مر علي ... وتتوقعين بشوفج وبسكت ؟؟ محد له قلب يتحمل يشوفج بهالمنظر الا انا وابوج واحنا اللي ساعدناج ..... واي انسان بشوفه بنفس الحادث اكيد بنقذه وبساعده ترا قلبي مو قاسي لي هالدرجه !!
انوار : يعني شفقه ؟؟
مشاري : لاحول ولا قوه الا بالله ..... انوار تراني تعبان .. انتِ ماراح تعدين هاليوم على خير يعني؟؟ انتِ شتبين مني بالضبط ؟؟
انوار : اللي بعرفه انت اللي شتبي مني بالضبط ؟؟
مشاري طالع ديمه بأسف وكأنه يقولها " اختج فاصله علي اليوم ! "
مشاري : مابي منج الا توافقين على العمليه
انوار : يعني انت تبي هالشي ؟؟
مشاري : أي
انوار : اجل خلاص ماراح اسوي العمليه ...
مشاري الغضب اجتاحه وسكن كل خليه من خلاياه وعلى وقفته مسك حديده السرير بيدينه الثنتين
مشاري : السالفه عناد يعني ؟؟
انوار : سمها اللي تبي ....
مشاري : يعني ناويه اتحمليني ذنبج طول العمر ؟
انوار : أي ناويه عندك شي ؟
مشاري : اوكي سوي الي يريحج والله يسامحج
وطلع من الغرفه ومن المستشفى بكبره ..
ديمه : انتِ شسويتيييي؟؟؟؟؟؟؟؟؟
انوار : بليز ديمه اطلعي برى
ديمه : وين تبيني اروح ؟
انوار : روحي البيت
ديمه : ماقدر ابوي بيجي المغرب بعدين برد معاه
انوار : انا متى اطلع من المستشفى ؟
ديمه : يقول ابوي يمكن باجر ..
انوار : فكه ..
ديمه : الحين شلون غرفتج فوق وماعندنا انصنصير شلون بتصعدين ؟
انوار : عادي اخذ غرفة الضيوف اللي تحت لاتعقدين السالفه..
ديمه : حرام عليج زعلتي مشاري شكله هموم الدنيا فيه يوم طلع
انوار : ومن يكون اهو اصلا ؟ بليز يعني لا تجييبين لي سيرته هالانسان اكرهه كره العمى .. احس اهو سبب المصايب كلها ..
ديمه : بس لا تنسين انه اهو اللي كلم عمي عشان تتم خطبتي ..
انوار : خلاص اللي نبيه منه سواه بعد شيبي
ديمه : انتِ لاحين قاطه اللوم كله على مشاري ؟؟ انتِ تدرين شلون صار الحادث ؟ تدرين ان البقي اللي شكبره دعمج وانتِ بقمة سرعتج .. وطيرج ورى الشجر .. وانقلب القاري بكبره عليج ورجولج انشبت بالشجر .. اهو اللي عليه انه طلع رجولج من الشجر وجاب السياره ووداج المستشفى مع ابوي .. سوى شي غلط ؟؟ ليش تحملينه الذنب؟
انوار : ليش تعيدين السالفه انا عارفتها ... انا مستغربه من دخوله فجأه بحياتي ... واللي ابيه منه انه يطلع منها ويفكني ... مالقيت شي زين منه اول مره طقني والثانيه تسبب بإعاقه رجلي ... والمشكله انه يطالعني بنظرات شفقه واول ماشاف وجهي انصدم ..! احسن بتم بهالتشووهه واخلي الكل يكرهني وبنفرهم مني..
ديمه : الله يخلف علينا دام هذا تفكيرج ؟
انوار : كل ماتكلمت بهالموضوع راسي يعورني ... بليز لا تجيبين لي طاري مشاري مره ثانيه وقوليله لا تجي مره ثانيه... خلاص انسى ان عندك بنت عم اسمها انوار ... مو ناقصين نظرات شفقه من ولد مها !
ديمه : ترى مهما كان مارضى عليه هذا جزا المعروف اللي سواه ؟
انوار: تدافعين عنه عشانه اهو اللي كلم عمي وتمم هالخطبه ؟
ديمه : شلووووووون صاير تفكيرج انتِ ؟ انا اشك ان الضربه جات على المخ .....!

[أختكم في الله]

انوار : أي صح على المخ وتراني مو صاحيه بعد
ديمه : انوار ؟
انوار : خليني لحالي مالي خلقكم ولا لي خلق شي بهالدنيا ادعي ربي انه ياخذني تراني محتاجه هالدعاء
ديمه : انا لازم اخليج ترتاحين .. وتقلبين كلام ابوي ببالج .. انا بنزل الكافتيريا اوكي
انوار : أي احسن تسوين خير
طالعتها ديمه باستغراب ونزلت ..
مرت الايام تركض ورى بعض وعدا اول شهر من الحادث .. التزمت انوار البيت ولا طلعت مكان وقفت قيدها هالكورس .. وخصوصا ان نفسيتها انقلبت على الكل زفت بزفت .. فا قاموا يخلونها بروحها .. بناء على طلبها ورغبتها .. بدا اول شهر علاج طبيعي وكل اسبوع تروح مرتين المستشفى وتكون تحت اشراف طبي كامل .. ويعلمونها كذا تمرين تطبقه بالبيت ويختبرونها الاسبوع اللي بعده ويشوفون هل في تقدم بالحاله او لا .. ما سوت العمليه وهالشي اللي مضايق ابوها الى اليوم .. ولكن ما يقدر يقولها شي .. لانها رافضه رفض تام .. وارضخت لرغبه ابوها بالعلاج الطبيعي غصبن عنها .. وصارلها شهر تقريبا ماشافت الشارع .. وكل ما حايلوها بيطلعونها تعصب وتكسر التحف لين يطلعون من غرفتها الجديده بالطابق الارضي .. ويقهرهاا زياده ان ميشو وحمود يلعبون عليها ويجرون الويل جير ويلعبون فيه يودونها يمين يسار يوم زهقت من هالحاله التزمت بالعلاج اول اسبوعين كانت اتسويه بشكل عادي ولا لاحظوا أي تقدم لكن من شافت معامله خوانها الصغار .. دخلت ببالها انها ترد تمشي طبيعيه مره ثانيه .. وخصوصا انها وقفت قيدها فا حبت ماترجع الجامعه الا وهي تمشي مثل قبل دام هالشي يقدر يرجع طبيعي ... والكل مستغرب من نفسيتها .. يعني شي طبيعي اللي صار والعلاج استمرت فيه والعمليه اهي ماتبيها ليش هالنفسيه ماحد يعرف ؟ وطبعا لا مشاري ولا مشعل بينوا خلال هالشهر .. مشعل كان ملتهي بالدوري الوطني وكان ياخذ اخبار ديمه من دلال وبما ان انوار حيل ابتعدت عن ديمه الفتره اللي طافت دلال عوضت ديمه هالنقص وصارت لها الصديقه والاخت .. وخصوصا واهم مرتاحين لبعض .. اما مشاري كان ماخذ موقف من انوار على اللي صار بينهم اخر مره .. وخلال هالشهر ردّ يشتغل مع ابوه .. وتعدلت اوضاعه كلها الا النفسيه ماكان له خلق شي .. وكل مايبي ينام يطري له شيين الشي الاول منظر الطراق اللي عطاه انوار والثاني منظر الحادث ووالاعاقه اللي سببها لها .. وتأنيب الضمير كان ملازمه وحاول يسأل عنها بس اكتشف انها ملازمه غرفتها ولا تطلع منها وتضاييق حيل من هالوضع اللي اهي عايشه فيه .. وخصوصا يوم قالوا له انها وقفت قيدها حزتها زعل من قلب وكان ناوي يكلم عمه لان بنته تسوي تصرفات تطلع الواحد من طوره بس بالاخير حس انه حيل يتدخل بحياتها واهي وحده تكرهه المفروض ما يعطيها أي اهتمام .. بس احساس ان كل اللي قاعده تسويه انوار اهو سببه يحسسه بالذنب القاااااتل .. والشي الجدير بالذكر ان مشاري صارت كل صلواته بالمسجد مع جده مايتركها وصار قبل لا يأذن الفجر لا اراديا يقوم ويكون عنده وقت يقوم جده ويروحون مع بعض.. حس بطعم التغيير اللي قلب حياته .. خصوصا ان المسجد بفريجهم .. وكان دايما يدعي لها الله يشافيها .. وكان يقول لجده لاتنسى انوار بالدعاء .. وكان جدها ميت يشوفها بس عرف انها كارهه العالم وماتبي تشوف احد .. وهالشي بعد ضايقه حيل .. وخلال هالشهر مسكوا راعي البقي الهندي اللي دعم انوار .. وبومحمد كان طالع من المزرعه وماسك الهندي ومركبه السياره وكان زاااااافه لين قال بس ومركبه عشان يشتكي عليه .. ويرفع عليه قضيه على اللي سواه بأنوار .. وخصوصا ان البقيات بالكويت غير مرخصه تجاريا ..
يومها كان مشاري بالمزرعه مع اخوه االلي اصغر منه بخمس سنين جراح ..
جراح : منو هالهندي اللي مركبه عمي بسيارته ؟
مشاري : مادري والله !
جراح : اففف الفضول بيذبحني شفته يزفه وبعدين ركبه انا بروح اسأل
مشاري: وافنا بأخر الانباء جزاك الله خير
جراح ضحك وراح وبعد ما استفسر .. رجع وقال لمشاري
مشاري : الهندي اللي دعم انواررر؟؟؟؟
جراح : أي لقوه منخش من الخرعه من ذاك اليوم
مشاري : الحين اهو بالسياره ؟
جراح : أي ليش
مشاري قام من مكانه وراح لسيارة عمه قبل لا اتحرك
مشاري : عمي شراح تسوي فيه ؟
بومحمد : بشرشحه بالمخفر وبرفع عليه قضيه
مشاري : ليش قضايا ومخافر نزله لي وانا اعلمه الشغل العدل
بومحمد : لا شبتسوي فيه ؟
مشاري : نزله نزله فيني حره لازم اطلعها
بومحمد : خلهم اهم يعرفون يتصرفون معاه
مشاري : حتى لو وديته السجن قاعد له قاعد له فا نزله الحين خلني ابرد حرتي احسن ..
بومحمد : والا اقولك اخذه يستاهل اللي بيجيه .. هالهيس جزاه يسوق وعيونه بالسماء
مشاري استانس ومن نزلوا الهندي استلمه طق وترفس لين الهندي كرهه الدنيا .. وبعدها جاء يرجف عند بومحمد يقول طقوني بس لا تودوني المخفر .. لان مشاري بعد كل هالطق قاله نهايتك بالمخفر عاش الهندي برعب .. بالاخير تركه بومحمد .. لين الهندي من الفرحه حب راسه وتشكره .. خلال الشهر اللي طاف وصلوا محسن ومها وجراح من السفر .. واول ماصلوا قعدوا سبوع وبعدين خذوا بومحسن مشاري العمره وراحوا وتوهم رادين والخميس هذا بتكون العزيمه بيت جدهم على ردتهم بالسلامه ..
يوم الاربعاء .. ادخلت ديمه على انوار واهي قاعده على الويل جير ووجها على الدريشه اللي تطل على الحديقه .. والغريب انها دخلت وصكت الباب ولا حست عليها انوار .. وبعد ماقربت منها شافت دموعها على خدها استغربت .. انوار دايما تبين لهم صورتها القويه ولاتنزل دموعها الا بالشديد القوي عكس ديمه اللي من أي كلمه تبجي .. ! كانت حاسه ديمه ان انوار متغيره من زمان واعذرتها على اللي صارلها .. والنفسيه متغيره اوكي بس انها تبجي ؟؟ شنو اللي يدور بمخها ؟ هالشي اللي ودهم يعرفونه خلال هالشهر كله ولاقدروا ..!
ديمه : احم انوار
توقعت ديمه ان انوار تمسح دموعها وتكابر كالعادة.. لكن ماتحركت ..
ديمه قعدت قبالها : انوار ليش هالدموع ؟
انوار : راس مالي هالدموع مستكثرتهم علي ؟
ديمه : ممكن اعرف ليش اللي تسوينه بعمرج لا ربج ولا رسوله ولا احنا نرضا باللي تسوينه
انوار : انهي النقاش
هالكلمه اذا قالتها انوار يعني المفروض اللي جدامها يطلع ويخليها بروحها .. والا تكسر اللي عندها عشان اتعلمه ان وجوده غير مرغوب فيه ..
ديمه : بليز لحظه انا ماقلت لج ليش انا جايه
انوار : اها جايه عشان سبب مو لله !
ديمه : مو وقته تفهمين على كيفج .. اسمعي جدي وعمي محسن ومها وجراح ومشاري توهم رادين من العمره .. ومسوين لهم باجر عزيمه .. وجدي ملزززززم عليج تجين قال ان ماجاتني تتحمدلي بالسلامه (وضحكت) جروها من كشتها وجيبوها لي انا اسنعها
انوار : روحي قولي له تراك غالي علينا واهي اذا ماتبي تجي مو عشان شي بس ماتبي تخرعك بشكلها .. وبس وصلي له سلامي ..
ديمه : يحليلج ههههههههههههه والله ماقول الا يحليلج .. ترى ماعنده خيري ميري اقولج لزم قال تجيني غصبن عنها ..
انوار : والله عاد كيفه .. ماني طالعه من البيت
ديمه : صج ماتستحين يعني تبينه يجيج البيت فرضا ؟؟
انوار صرخت : بليز ديمه فكيني انتِ تدرين ان هذاك البيت خصوصا مابي اطبه .. وانتِ عارفه ليش
ديمه : شنو يعني عشان مشاري ؟
انوار : أي مابي اشوفه
ديمه : صج ماعندج سالفه اقولج عزيمه يعني بيكون بالدوانيه ماراح يدش داخل ..
انوار : ولو مابي اروح
ديمه : على العموم اذا جاج ابوي يعني اعرفي ان الامر منتهي وانج رايحه رايحه لا محاله ..
انوار : انزين مشكوره اطلعي وصكي الباب
وجاها نفس اليوم ابوها وقالها تجهز روحها حق عزيمه باجر ولاقدرت ترفض لانه كان امر من السلطات العليا (جدها )
بنفس هاليوم ..
محسن : ودي للمره صوغتها
مها : ياخي انت المفروض ماتتحكم فيني .. انت رديت لهم شي راجع لك انا مابي
محسن : انا مارجعت لهم حبا فيهم .. الانسان يدور مصالحه ويروح وراها
مها : انت عندك مصالح معاهم انا ماعندي !
محسن : انا الحمدلله رحت وصفيت بالي وجهزت خطط جديده .. ومشاريع جديده ببالي ..
مها : اشوى انا عبالي لعبوا بمخك .. والا سوولك عمل جديد !
محسن : خلي منج العمل وهالسوالف وروحي انجبي لي غدا
مها : انزين اسمع مشاري واشتغل عندك وكل اللي تبيه صااار
محسن : انزين ؟
مها : ابيك تطلعني ببيت
محسن : ليش؟
مها : بس ابي اطلع من هالمستنقع
محسن : بيت اهلي مستنقع ؟
مها : ياخي بعد هالعمر ابي احس باستقلاليتي
محسن : يعني ماعندج ام رجل عشان تقولين بحس باستقلاليتي ..
مها : انت كل شي عندك لا .. افف منك ومن اهلك ومن هالعيشه اللي تقصر العمر
محسن : لاو الله !
مها : لابعد قول شي !! أي العيشه مع اهلك تقصر العمر
محسن : قولي انج غيرانه من حصه وتبين بيت
مها : أي شفيها اذا قلت ابي بيت ؟ اهي احسن مني ؟
محسن : هههههههههه مشكله الحريم !! صج ناقصات عقل ودين !
مها : لا انتوا الكاملين !
محسن : يلا عاد صكي حلجج
مها : ترى حيل طايحه من عينك المره ؟
محسن : أي اذا مثلج طايحه ونص
مها : حبييبي انا الحين حالي حالك من يعطوني حقوقي كامله بناشبكم بالمجلس

[أختكم في الله]

محسن : الله يستر على ديرتنا اذا بياخذون ارائج !! عز الله بتخرب
مها : مشكله المتخلفين
محسن : خلي مني حقوق المرأه والخرابيط ترى مكانج بيتج وشغلج غيره مالج حاجه فيه .. وانا عارف نوعيتج اذا انهد لسانهم مايسكتون !! فما بالج اذا عطوج المايك وقالوا تكلمي ؟
مها : بسوي اشياء ما تطري على بالك .. بس خلهم يوافقون على هالقرار
محسن : لا تكفين بس واذا وافقوا انتِ شكو ؟
مها : برشح روحي ..
محسن : اهااااااا ياسلام وان شاء الله تسوين لج مقر انتخابي وتخلين جراح ومشاري اهم مفاتيح انتخابيه ؟؟
مها : أي بعد شفيها عيالي اذا مانفعوني بالوقت اللي محتاجتهم فيه متى بينفعوني ؟
محسن : اقووووووول روحي انجبي غداااااااااي بس
مها :اففففف انزين ..!
على ثاني يوم .. على المغرب راحوا كلهم بيت جدهم .. مع انوار لاول مره بعد شهر كامل انقطاع عن المحيط الخارجي الا للمستشفى ..
بالصاله الكل مجتمع وكانوا يسولفون .. وانوار كانت ساكته طول اليوم الا يوم دخل جدها .. جاء وقعد عندها وماقام منها الا وهي تضحك لين تطمن عليها واستسمح منها لان عنده ضيوف والا كان بيقعد معاها اكثر وخصوصا واهو اللي ملّح على جيتها البيت .. ومن بعد ماسمعت مها تسولف عن جزر الكاريبي قاعده وتتفلسف .. حركت كرسيها المتحرك وراح للحديقه الخلفيه .. مثل ما تسوي دايما لا تضايقت ببيتهم .. وبعد فترت نص ساعه جاتها ديمه
ديمه : ليش برى ؟ ماتحسين بالبرد ؟ تراهم راحوا الصاله الكبيره .. تعالي الصاله مافيها احد
انوار اوكي .. ومسكت ديمه الكرسي ببتدزها وهاوشتها انوار
انوار : اعتقد انا عندي ايدين اعرف ادز
خلتها ديمه على راحتها ودخلت .. شوي ولحقتها انوار .. واهم قاعدين .. لحالهم دخل عليهم جراح ومن شاف انوار بسط بالصاله
جراح : يااااحي الله بناااات عمي اللي ماشوفهم كلللللش
ديمه : والله كل ماجينا انت هايت مع ربعك والا مسافر
جراح : امم اذا على السفر معاكم حق
ديمه : بس جاهزين للتشرهه !
جراح : هههههه هاشلونج انوار عساج بخير ؟
انوار : انا بخير الله يسلمج
جراح : ها شكلج حرمتي من المزرعه ؟
انوار ابتسمت : لا بالعكس لا لحين احبها واللي صار قضاء وقدر
جراح : ايوااااا على الكلام الحلوو .. اجل شرايج نكلم جدي يودينا باجر ؟
انوار : ماعندي مانع
ديمه طالعت انوار باستغراب هذي اللي ماطلعت شهر كامل توافق تطلع وو وين ؟ المزرعه !!
ديمه : المزرعه انتوا من صجكم ؟ انا لو اموت ما اطبها بعد ذاك اليوم
انوار : ليش يعني ؟ شفيها اذا رحنا ؟ حرام او عيب !
ديمه : كيفكم اذا بتروحون بس انا نووو وي
انوار : عاد انا طقت مزاجي اروح .. شلون يعني ؟
ديمه : عاد انتِ عنادج على مستوى .. كيفج روحي ..
على كلامهم سمعوا واحد داخل يصارخ من الدوانيه وماسك دله قهوه
مشاري : جراااااحوااااااااا وصمخ وين القهوه الجديده؟؟؟
جراح : يوووووه نسيت اقولهم يسوون !!
مشاري : بس فاضي تسولف مع البنات ؟
جراح : أي عادي بنات عمي
مشاري يوم شاف الكلام ضايع معاه والشرار يطير من عيونه راح نادى الخدامه ومن جات
مشاري : هاج هذي الدله اغسليها وسوي جديد
عطاها وهدّ ايده عباله بتمسكها واهي من الخوف من صوته العالي منزله عينها ايدها تحت وطاحت الدله على رجله
مشاري : آآآآآآآآي ماتشوفيييييييين ؟؟؟؟؟
الخدامه : سوووووري بابا
مشاري : لالحين واقفه روووووحي من وجهي
ولفّ على جراح معصب
مشاري : انت شغلك بعدين
ومن شاف جراح شاف وحده قاعده على كرسي متحرك على يساره .. وشاف ديمه معاهم .. ركز نظره عليها وشاف انوار بس منزله راسها .. وديمه تضحك
ديمه : سلامات ماتشوف شر
مشاري : الشر مايجيج جات سليمه ...... هذي انوار ؟
ديمه : أي
مشاري شافها بنظره: اهاااا .. يلا جراح قوم اخذ القهوه الجديده ودها الدوانيه واقعد هناك على ما اغير دشداشتي مره ثانيه على القهوه اللي انكبت علي واجيك
جراح : اوكي
راح مشاري فوق وراح جراح الدوانيه
ديمه وانوار على وجيهم علامات استفهام ليش ماسلم على انوار ؟؟ هذا واهو ماشافها شهر
ديمه : صج مايستحي
انوار : هامني يعني ؟
ديمه سكتت واهي منقهره من حركته البايخه .. ومستغربه من امر هالاثنين علاقتهم غريبه جدا جدا .. لاهم عيال عم سنعين مثل عيال خلق الله وكل واحد نفسيته بخشمه ..!
انوار : متى نرد البيت ؟؟
ديمه : تو الناس تونا واصلين ليش بتردين ؟
انوار : عاجبج شكلي الرايح والراد يطالعني باشمئزاز !
ديمه : اشمئزاز ؟؟؟ انتِ شتخربطين ؟
انوار : لا والله جنج ما شفتي ولد عمج المصون ؟ حتى السلام متخسره مسكين مالومه مايبي يتخرع شنو يعني ....تقلده( هذي انوار ؟ ) ليش ان شاء الله مايعرفني والا عشاني قاعده على كرسي متحرك الحين ماعرفني ..!
ديمه : انوار حبيبتي مو زين الانفعال .. خلاص انتِ قلتي مو هامني يعني بطقاق ماعليج منه
انوار : انزين انا قلتلج انا اتضايق ولا ابي اشوفه ليش خليتوني اجي ؟
ديمه : انتِ مو جايه عشانه خلاص طنشيه انسي انج شفتيه
انوار : اففففف
حركت انوار كرسيها وراحت الحديقه مره ثانيه .. وديمه راحت للصاله الثانيه الي فيها الجمعه .. صحيح انجرحت من حركته لكن خلاص جرح على جرح ماعاد يفرق عندها .. ولا خصوصا انه من مشاري .. يعني المفروض تطنش كثر ماتقدر .. وبما ان اول زياره لها لبيت جدها من بعد شهر وصار جذي خلاص من ترجع البيت حطت ببالها ان حتى اهلها ماتبي تشوفهم .. ليش كل ماشافت احد لمحت من عيونه نظرت الشفقه ؟؟ هالشي الوحيد اللي يحبط المعاقين اهم مثلنا يحسوون اكثر منا .. وبهاللحظه حست بشعورهم .. واصرت بداخلها انها تستمر بالعلاج لو طول سنين المهم ترجع تمشي على رجولها وتستغني عن النظرات اللي تتحذف عليها من كل صوب .. من ابعد الناس لي اقربهم .. ماحست بالوقت ربع ساعه والا نص ساعه مرت .. ماحست بروحها الا متحركه من مكانه والعجب انها ماحركت الكرسي .. ولفت وراها
جراح : انتِ هنيييي وانا عبالي داخل
انوار ابتسمت يوم شافته حست انه بعيد عن هالعايله حييييل .. عشان جذي ترتاح اذا شافته
انوار : أي هني وين رحت
جراح : شسوي وهقني مشاري بالقهوه مره رايح ومره راد
انوار : أي بعد صرت رجال يعتمد عليك
جراح : احم ايوا المعنويات بتضرب العداد
انوار : هههههههههه
جراح : انوارو تو الحين شاورت جدي يقول عادي بيروح باجر المزرعه يوم قلتله ان انوار بتروح معانا استانس قال بتنور المزرعه
انوار : يااااي وناسه
جراح : المشكله قلت لابوج قال خلوها وقت ثاني انا معزوم
انوار : لا والله وانا شعلي فيه انتوا مروني
جراح : بس مايصير لازم تستأذنين منه
انوار : واللي يعافيك تراني رايحه مع جدي ماراح يقول شي وبعدين اهو دايما يحن يبيني اطلع من البيت
جراح : خلاص دام جذي تمام
انوار : ليش انت قلت له اني انا بروح وعيا ؟
جراح : لا ماقلت له
انوار : اوكي باجر مروني بعد صلاه العصر بكون ناطرتكم
جراح : اوكي
انوار : بس بليز جراح ممكن اطلب طلب
جراح : تفضلي
انوار : مابي احد يجي معانا ... حتى ديمه ماراح اخليها تجي ..
جراح : احد مثل منو ؟
انوار : أي احد
جراح : اهااااااا فهمممت قصدج ......
وابتسم
انوار : شفهمت ؟
جراح : ولايهمج ماراح اخلي خواتي يجون
انوار : لا انا قصدي ولا احد سواءا خواتك والا غيرهم
جراح : اها اوكي
انوار : وعد ؟
جراح : افا عليج وعد
شوي الا سمع صوت مشاري مره ثانيه
جراح : لحووووووووول هذا شيبي اخاف اشتغل عنده واناا مادري ؟
انوار : روح له لا تخليه يجي
جراح : اففففف والله ان هالاخو علـــــّه
انوار : روح ترى صوته قرب لاتخليه يجي هني بليز
جراح قعد يتحلطم : افففف يعني شسوي القهوه ماخلصت مشكله العزايم مايصير نطلب لهم من ستاربكس ويفكونا !
انوار : هههههههههههههههههه والله انك مو صاحي
وعلى صوت ضحكتها ميز مشاري انهم موجودين بالحديقه
مشاري : هلا والله ؟ الاخ مبسط هني ؟ وانا صوتي راح وانا اناديك ؟
انوار مبتسمه: خلاص جراح روح ولاتنسى الوعد
جراح ابتسم : افااااا عليج بس انتِ خلج جاهزه ..
انوار : اكيييييد
مشاري يطالعهم والفضول بيقتله
" وعد ؟ أي وعد وبينهم وعد بعد ؟ لا والضحكه شاقه الحلج يعني ليش هالمعامله لغيري وانا لا انا شسوييييت لج يا انوارررررر حرام عليج ..! اوووكي بس ماكون ولد محسن ان ماعرفت شسالفة!!"
مشاري يطالع اخوه واهو منقهر : روح ود الدلال داخل الدوانيه واقعد هناك انا شوي وبجي
جراح : اوكي أي اوامر ثانيه سيادتك ؟
مشاري : روح بلا تمصخر
جراح : اففف ماتشوفون عزايم الغرب شحلوها .. كل واحد بيده وجبته وخلاص بلا روح صب وروح تعال
مشاري : مشكله اللي متأثرين بالغرب ! انت من تخفف هالسفرات وانت بخير
دخل جراح داخل .. وضل مشاري واقف .. قبل لاتعطيه المجال يتكلم حركت كرسيها ودخلت داخل .. واهو على وقفته .. شنو اللي داخل مشاري ؟ وليش واقف هالوقفه .. ليش ماسلم عليها هالاسئله كلها تدور ببال انوار لدرجه انها رفضت تلقاالها اجوبه من مشاري نفسه فا عشان جذي دخلت ... ماتحملت ينظرلها مره ثانيه بنفس نظره الشفقه ...
على ثاني يوم .. استأذنت انوار من ابوها .. واستانس انها بتطلع من البيت .. وماقال شي دامها بتروح مع جدها .. بس قالها تاخذ ديمه معاها بس انوار مارضت تبي تروح بروحها .. ومع هذا ما اعترض .. ماصدق على الله انها تطلع اذا طلعت امس واليوم بعد هذا تطور كبير بالنسبه لها .. مرها جدها ومعاه جراح .. وراحوا المزرعه .. واهم بالسياره
بومحسن : انوار ليش ماخليتي خواتج يجون معاج ؟
انوار : بس ابي اطلع بروحي
بومحسن : انزين على الاقل حمود عشان يستانس مع جراح
انوار : يبا انا زين مني طلعت فا مابي احد معاي ..
بومحسن : يلا عساج تستانسين اليوم
انوار: ان شاء الله دامني معاك اكيد بستانس
بومحسن : اليوم بنلف على المزرعه كلها وبنشوف شاللي نبت وشاللي عبوه بالصناديق
انوار : وناسه يعني جوله استكشافيه ؟
بومحسن : أي وبوريكم اشياء انتوا ماشفتوها بالمزرعه
جراح : ياعينيييي يعني لنا السبق فاكتشافها
بومحسن : أي بعد شتبون
وهم يسولفون رنّ تلفون جراح
جراح : افففففف هذا فوق المليون مره اليوم داق مادرررررري شيبيي؟؟؟؟
بومحسن : منو ؟
جراح : حفيدك المصون
بومحسن : مشاري ؟
جراح : أي يعني مستلمني من امس ازعاج .. افف مشكله الاخو الكبير
بومحسن : ردّ عليه يمكن يبي شي ضروري
جراح : لا تخاف اعرفه هذا بس يتأمر على راسي .. مو المسكين مو مصدق ان عنده اخو اصغر منه .. يحط حرته فيني
بومحسن : افا هذا الكلام تقوله عن اخوك ؟
جراح : يبا هذا مشاري غ ث ه غثه .. يبط الجبد
انوار : أي والله صاج
بومحسن : لا والله ؟ عطني التلفون انا برد ّ عليه
جراح : لا خله يموت واهو يدق شكله بيموت ويعرف وين رايح .. خله على نار بس ماكو شغل عنده الا جراح ؟
بومحسن : مالت عليك امحق اخو .. انا بدق عليه من تلفوني
جراح : طلبتك لا تقوله اني معاك ابيه ينقهر
بومحسن : انزين
ودق بومحسن على مشاري وبعد السلام
مشاري : يبا جراح معاك ؟
بومحسن شاف جراح وهو يأشرله بمعنى " لاتقول تكفى ! "
بومحسن ماقدر يجذب : أي معاي ليش شبغيت ؟
مشاري : أيا الهيس ليش مايرد على تلفونه ؟
بومحسن : مايبيك تعرف وينه فيه
مشاري : بعد؟ ليش يبا انتوا وينكم ؟

[أختكم في الله]

بومحسن : رايحين المزرعه
مشاري : ياسلام ! وليش الاخ ما يقولي
بومحسن : مادري عنه
مشاري : قوله انا عناد له بجي وبعلمه شلون يرد على تلفونه
بومحسن : مايخالف حياك الله
وبعد ماصك التلفون
جراح : لييشش قلتتت له ؟؟؟؟
انوار : لحوووووووول عاد هذا اللي ما بي اشوف رقعه وجهه
بومحسن : تراه مو ماكل حلال ابوكم شفيكم عليه ؟ خلوه بيجي حياه الله مايبي مايشوف شر
انوار باحباط : يبااااااا احنا جايين نستاااااااانس
جراح : افففففف خربت الطلعه من اولهااااااا !
انوار : مالنا دخل مانبي نشوفه
جراح : لقيتها ماعليج لا انا ولا انتِ نبي نشوفه .. بنخلي جدي يقطنا على المزرعه من ورى صوب المحميات .. هناك نقعد ونبسط ونخلي فاروق يسوي لنا شاي
انوار : أي احسن
جراح : واذا راح الاخ المحترم مشاري دق علينا عشان نرد
بومحسن : كيفكم
اول ما وصلوا .. قطهم جدهم بالمزرعه من ورى وراح للدوانيه .. وقعد نص ساعه الا مشاري جاي .. وقعد معاه
اما عند بالجهه الثانيه من المزرعه ..
كان جراح يقول قصصه بالخارج وهو يدرس عند عايله والمواقف اللي تصيرله وانوار مستانسه وتسمع .. جراح كان تقريبا اصغر منها بسنتين .. فا تاخذ راحتها معاه اكثر من مشاري .. وبعد مافضت روسهم من السوالف
جراح : اف موت برد امشي خلينا نرد .. اكيد مشاري زهق وطلع
انوار : لالا والله ماروح .. اذا انت بردان روح عادي وانا قبل لا تغرب الشمس بدق على جدي بقوله يجي ياخذني ..
جراح : دام جذي لازم اقعد مايصير اخليج بروحج
انوار : جراح قوم احسن ماطلع لك الوجه الثاني .. اركب بسيارة العمال وخلها توصلك الدوانيه وعن سوالف الشهامه اللي تبط الجبد انا ابي اقعد بروحي اصلا
جراح : اها يعني طرده امممممم انزين بس على شرط ماتطولين نص ساعه واجي بسياره العمال اخذج
انوار: لاساعه ولا نص ساعه انا بدق عليكم وبقول مروني
جراح : اوكي يلا تشاو
راح جراح الدوانيه وقعدت انوار لحالها .. وقعدت تحوس بالمحميات .. الجو يومها صج كان بارد بس كان حلووو ..
وعلى غروب الشمس قعدت انوار تفكر باللي صارلها كله .. وشافت انها مديونه لمشاري بحياتها .. لكن كل اللي سوته ردت فعل للحادث اللي صار .. بدا الظلام يعم المكان واهي سرحانه بأفكارها كانت تفكر بأختها ديمه اللي اهملتها طول الشهر اللي طاف .. تفكر بميشو وحمود وامها وابوها اللي ماسألت عنهم طول الشهر اللي طاف .. فقدت رفيجاتها .. اللي ما رفعوا عليها السماعه ولا سألوا عنها .. استغربت من اشياء واجد .. خلال هالفتره .. جزا الله المصائب الف خيرا علمتني عدوي من صديقي .. وبعد ما قعدت تلتفت بالمكان الا الظلام غطى الارجاء .. وخافت .. وقعدت تدور تلفونها .. مالقته .. وبغباء زياده تذكرت انه بسيارة جدها مانزلته ..
" الحين شلون برجع ؟ "
وحاولت تحرك الكرسي وتمشي .. بس كل شوي تصطدم بمحميه .. و شجره .. موعارفه وين طريجها بالضبط .. توهقت .. وبالاخير قررت تقعد لين ما جدها او جراح يدورونها .. مرت نص ساعه ثانيه .. على نفس الحال وانوار قاعده بمكانها وتقرى قران ومغمضه .. لانها ان فتحت وان غمضت مثل النتيجه سواد بسواد ..
بالجهه الثانيه من المزرعه .. كان جراح قاعد مع مشاري
جراح : انا زهقت انت الحين بترد ؟
مشاري : لا انتوا روحوا انا مواعد ربعي يجوني هني بالمزرعه .. كنا بنسهر بالشاليه بس قلتلهم دامني بالمزرعه تعالوا ..
جراح : اجل خلاص برد مع جدي
مشاري : اوكي بحفظ الله
طلع جراح برى ورجع وكرر هالطريقه ثلاث مرات لين زهق مشاري
مشاري : عورت راسي شعندك ؟
جراح : انطر جدي وو قعدت احاتي انوار لالحين مادقت علينا
مشاري : وشكو تدق عليكم ؟
جراح : اهي بالمزرعه خليتها وجيت وقلت اذا تبين تردين الدوانيه دقي علينا يا انا ياجدي نردج وقالت اوكي .. الحين بالضبط صارلها ساعتين وظلمت الدنيا ولا سمعنا لها حس !
مشاري : انت من صجك ؟ مخلي البنت بروحها بالويل جير وبالظلماء وجاي ؟؟؟
جراح : اهي اللي تبي
مشاري : وين مخليها ؟
جراح : قريب من بيت العمال ورى المحميات
مشاري : عند العمال بعد ؟؟ جراح انت من صجك ؟ عادي عندك ؟
جراح : اني وي اهي تلفونها معاها ..
مشاري : لا والله ؟؟ خوش !!
شوي الا جدهم سافط ..
مشاري : يبا شفت الخبل جراح مخلي انوار لحالها عند العمال بعز الظلماء وجاي يقعد ويكركر معانا ! والبنت بالويل جير
جراح : لحول اقولك تلفونها معاها واهي اللي قالت لي ارد .. خلاص متى مابغت ترد بتدق
مشاري : افرض ماكو رصيد ناسيته شي .. ! شلون يعني ؟
جراح : اففف انت بس بتختلق مشاكل
مشاري : اركب سياره روح جيبها
ركب جراح سياره جده وشاف على الكشن الوراني تلفونها .. ونزل مره ثانيه
جراح : ياااااا الوهقه تلفونها بالسياره !
مشاري : والله كنت حاس .. اخلص روح دورها وردوا البيت انا ربعي بعد شوي بيجون
بومحسن : لحظه جراح انا بسوق بناخذها وبنطلع سيدا على البيت
راح بومحسن مع جراح بالسياره يدورنها بنفس المكان مالقوها ..
قعد بومحسن يدورها بالمزرعه كلها والمشكله المزرعه ظلماء يعني كان يمشي خفيف ويدور على ضوء ليتات السيارة .. استمر على هالحاله نص ساعه .. مو عارفين اهي وين بالضبط ! المزرعه داهيه وين بتكون راحت وخصوصا اهي ما تمشي .. طول الوقت اللي فات كانت انوار منخشه بالمحميه كانت خايفه لاتشوف جلب والا قطوة والا شي يخوف .. فا من عدت اول ربع ساعه ادركت ان حتى لو دوروها ماراح يلقونها دامها منخشه بالمحميه .. بالاخير طلعت من المحميه وبصعووبة بالغه قعدت تحرك عجلات الويل جير وتمشي بغير هدا عرفت ان طريق المحميات يوصلها لدوانيه .. واهي تبي توصل الدوانيه لان الدوانيه بالنسبه لها بر الامان .. بس المشكله تشوف ليتات الشارع بعيييده .. ومن الشجر الكثيف ماشافت ليتات الدوانيه .. بس اهي تدري ان هالطريج عاجلا ام اجلا بيوصلها الدوانيه .. وقامت تمشي فيه ..خلال هالنص ساعه وصلوا جم واحد من ربع مشاري وباقي ربعه جايين بالطريج .. وبومحسن من دور صوب المحميات ماشاف شي لان المحميات مصكره .. فا طلع وراح المزرعه من الجهه الثانيه .. واول ما شافت انوار ليتات الدوانيه قريبه ابتسمت بفرحه خلاص وصلت .. وكانت ايدها تعورها من كثر ما تشد على عجله الويل جير .. وايدينها كلها تراب .. وحالتها حاله .. والبرد هشم عظامها بس من وصلت الدوانيه ماشافت الا سيارة مشاري .. عكرت وجهها وتضايقت .. وبعد شوية تفكير قالت بنطر لين يجي جدي .. واهي بمكانها وصلت سياره ماميزتها لان ليتاتها اجهرتها واهي ماصدقت على الله وتحرك الكرسي لين وصلت عند الباب .. الا ينزلون ربع مشاري ويطلع مشاري من الدوانيه يستقبلهم .. وكلهم انصدموا من انوار .. ربع مشاري نزلوا عينهم يعني ماشافوها .. ودخلوا داخل .. اما مشاري عيونه انقلبت حمر ..
مشاري : انتِ شجايبج هني ؟؟
انوار بمزيج من الاحراج والتوتر والتعب : ظلمت الدنيا وضيعت
مشاري نزل درجتين لين وصل لها : ساعه يدورونج وما جيتي الا يوم جوا ربعي؟
انوار : عبالي سياره جدي .. اصلا صارلي عشر دقايق موجوده انطرهم من دريت انك بالدوانيه مادخلت مابي اغثك
مشاري : مشكوره بس شالفايده احرجتيني عند ربعي .. حشى طالعه من قبر على هالتراب !
انوار انجرحت من كلامه : أي طبيعي احرجك على كرسي متحرك ومشوهه !

[أختكم في الله]

سكت مشاري شوي بعدين تكلم
مشاري : الحين شسوي فيج ؟ ربعي داخل !
انوار : روحلهم في احد قالك اقعد ؟
مشاري قعد يفكر باللي صار اليوم والحوسه كلها : والله ابتلشنا فيج !! انتِ لوقاعده فبيتكم ابرك !الحين شلون ماقدر اخلي ربعي ولا اقدر اخليج .. لازم ادق على جراح واقوله اني لقيتج
كلام مشاري كله كان مثل السجاجين بصدرها
" ابتلشوا فيني ؟ "
وحركت كرسيها وقعدت تمشي تبي تطلع من الدوانيه ..
مشاري لحقها: هيه انتِ وين رايحه ؟
انوار : نعم ؟؟ تبي شي ؟
مشاري : تبين تضيعين مره ثانيه ؟ شنو السالفه لعبه اهي ؟ يلا انثبري مكانج وانطريهم يجون
انوار انصدمت وطالعت مشاري .. والمشكله ان كل شي يطلع منه متعمد ..ليش يسوي جذي ؟ شهالاسلوب ؟ انوار ترجف من البرد بس من شافت هالمعامله الزفت شب بجبدها نار ..
الحره دمرت كل شي داخلها .. من يكون عشان يهينها بهالطريقه الاستفزازيه !!!
انوار : اوكي تاااامر امر بس انت روح لربعك
مشاري طالعها فوق تحت .. ورجع لربعه واهو راجع قعدت تلقط صخر على الارض وصج لقت صعوبه لانه بالارض واهي على الكرسي .. بس بالاخير لقطت لها تقريبا سبع .. وقعدت تحذف سيارة مشاري الجاكور .. بالصخر الكبير الضخم لين تكسرت جامته الخلفيه .. اهو من استوعب انها تكسر جامته رجع ركض
مشاري : انتِ مجنووووونه شتسويييين ؟؟؟
واهي مازالت تاخذ الصخر من الارض وتكسر ..
ولف على الدوانيه الا ربعه يطلون من الدرايش لانهم سمعوا صوت شي يتكسر ومن شاف اشكالهم .. شب نار
انوار طالعته بعد ما ارضت غرورها
انوار : يلا طقني ..؟
طالعها مشاري بقهر واهو ساكت ... امسكته من ايده اللي تعوره مايقدر يمد ايده عليها .. وبعدين جاته فكره لازم يبرد حرته فيها .. ومسك الويل جير وبدا يدزها مساااااافه كبيرررررره بسرعه .. واهي تصرخ تقوله هدني .. وبالاخير ماوقف الا بنص الشجر بعز الظلمه وراح عنها
مشاري يصارخ : انا اعلمج شلون تكسرين جام سيارتي
انوار بصوت عالي : نــــــذل بتم طول عمرك نــــــذل
واهو يضحك بصوووووت عالـــــي
مشاري : ماعاش من يحط راسه براسي !
انــــــــوار تصيح بصوت عالي
انوار : يباااااااااااا وينك ؟؟؟؟؟؟؟ جراااااااح وينكمممممم؟؟؟؟؟؟؟؟؟
ومازالت تسمع صوت ضحكاته من بعيد
انوار : حرام عليك ردني ما شوف شي .....
مشاري : ولالالالالا كلمه العقاب بيستمر ساعه ونص ويا انا ويا انتي !
وفعلا خلاها تقريبا ساعه ودق عليه جده وسأله عن انوار وقص عليه مشاري وقال مالقيتها .. ومن خلصت الساعه اللي قضااها مع ربعه رجع ولاسمع صوتها ..
مشاري : انوار ؟
الهدوء قاتل !!
مشاري بصوت اعلى : انوااااار ؟؟
وقرب اكثر من مكانها بحذر وشاف كرسيها و لكن الصدمة كانت ان الكرسي فاضي ..!

وينها أنوار؟؟
وليش مشاري يعاملها جذي؟؟
وشنو بيصير لأنوار؟؟

كل هذا وأكثر في الجزء التاسع عشر..

أختكم في الله

[بوفيصل]

يسلمووووووووووو علي القصة

والله يعطيكي العافية

ولاتطولين علينا أوكي

مع خالص تحياتي بوفيصل

[أختكم في الله]

:: الجزء التــاسع عشــر ::

تلفت مشاري يمين يسار ..
مشاري : هههههههههه ها وينج ؟
ومازال الهدوء يعم الارجاء
مشاري : شوفي ان ماطلعتي وتكلمتي ترى بخليها ساعتين عناد ! اطلعي يلا عن الحركات الماصخه انوارو ؟
والمشكله مايسمع حتى نفس .. مو معقوله ابد انها تكون موجوده
مشاري : اممم شكله ماكو احد ..
وبعد ما تأكد انها مو موجوده طلع وخذا الويل جير معاه .. حط فباله ان اكيد جده جاء وخذاها .. ورجع الدوانيه وكمل سهرته مع ربعه ..
انوار ماقدرت تحرك الويل جير لان مشاري تعمد يحطها بمنطقه وعره نوعا ما .. بين اشجار كثيفه .. وهالشي اهو الي تعبها لان حتى الصوت يمكن مايوصل .. والظلماء اذبحتها من الخوف .. خلاص مالقت جدامها الا انها تقعد مكانها وتنطر الساعه ونص تعدي .. بس المشكله ماقدرت الخوف + صياح + رجفه من البرد كلهم مربكينها .. واهي بمكانها تفكر شبتسوي .. سمعت صوت سياره جايه .. وتقط نفسها من الويل جير .. وتقعد تزحف بصعوبه باااااااالغه لين عدت منطقه الاشجار .. ومن شافت ان الطريج جدامها طويل حيل .. والسياره يمكن تروح وتخليها .. قعدت تدور صخر لين حصلتها جم وحده وقعدت تحذف من بعيد .. وفعلا كانت هذي السياره سياره جدها .. وان طلعت هالسياره من المزرعه خلاص يعني انوار اليوم بتنهي .. لاهي اللي قادره ترد للويل جير ولا هي قادره تكمل ارهقها التعب .... حست ان رجولها تصلبت صارت حديد .. وخذت الصخر وقعدت تحذف مره مرتين ثلاث .. لين شوي شوي خففت السياره ..
داخل السياره كان بومحسن يسوق وجنبه جراح وجراح من النوع مايحب يقعد بالسياره ساكت يا اما يتكلم او اف ام .. وكان صوت الرادو عالي ما سمعوا بالبدايه .. لانها كانت تصيح بصوت اشبه ماله مخنوق
" يباااااا جراح وينكمممم ؟ "
بعد ماسمع بومحسن الصوت صوت الصخر وقصر على الرادو .. ورجع قري .. لين فجوا الدرايش وسمعوا الصوت عن قرب .. كان صوت انوار .. وينزل بومحسن بسرعه البرق والسياره مشغله .. ويروح لها وكان شكلها اقرب ماله وحده طالعه من القبر ... الملابس كلها تراب الايدين متشققه الوجه غرقان بالدموع وشكل الجرح كان واااااضح بشكل منفر ..
بومحسن : انوارررر شاللي جابج هني ؟؟؟؟
انوار تصيح بصوت اعلى : مشاااااااري يباااااااا مشااااااااااري
بومحسن : مشاري !! شسوى فيج ؟؟
عدل جدها من قعدتها و سندها عليه ...
انوار بقهر الدنيا كلها واهي تبجي : عشااااااااااني محروله يجي يخليني لعبه جدام ربعه ؟ يدزني بأسرع ماعنده ويقحص بالكرسي واقوله بس خلني ومااااااااااهدني الا هناااااك ( تأشر على المنطقه الوعره بالنسبه للمزرعه) بعز الظلمااااااء وخلالالالالالاني ابببببببببببجي بصوت عالي واقوله ردني حرام عليك ماقدر امشي اخااااااااااف من الظلمااااااااااء انا تعبااااااااااانه ويقعد يضحك بأعلى صوته ويقول هذا عقابج وخلاني ساعه كامله على حطتييييييي وراح عنددد ربعه يكمللللللل سهرته ......
وقطعت كلامها واهي تصيح
الغضب كله اعتصر بقلب بومحسن .. وانقلبت عيونه حمراااااااااء امنيته الوحيده يكون مشاري بين يدينه الحين عشان ينتفه
بومحسن : لييش يعاقبج شمسويتله ؟
انوار : لاني قعدت نص ساعه برى الدوانيه انطركم تجون لاني شفت سيارته ولا ودي ادخل ونطرت برى يوم شفت سياره جايه من الفرحه قربت صوبها لين طلع مشاري وسلم عليهم طلعوا ربعه .... وزفنيييي وهاوشني وقعد يحقر فيني .... ابتلشنا فيج وانتي ليش جايه ومن هالكلام ؟ ليش يعني ؟ عشاني معاقه ما اطلع من البيت ؟؟؟؟؟؟ عشاني معاقه يجي يمصخرني جدام ربعه يدزني وجني جاهل بالكرسي وبقمه سرعته ؟ هذا كله لان من القهر اللي فيني خذيت جم صخره وكسرت جامته الورانيه ..... ماقدرت اسويله اكثر من جذي ...... عشاني ضعيفه يستقوي علي ؟؟؟
بومحسن ....... : يعني عشان كسرتي جامته يجي يقطج بعز الظلماء جذي واحنا ندورج من اليوم وادق عليه يقولي مالقيتها ؟؟ واحنا اللي ماخلينا مكان ما دورناج لدرجه كنا الحين بنروح الشارع الرئيسي ندورج خفنا انج طلعتي من الباب الخلفي وانتِ ماتدرين !! يجي يقص علينا وو يسوي فيج جذي ؟ يروح يكمــــل سهرته مع ربعه !!!!!!!!!!
انوار : يبااااا انا من اليوم ادوركم شوف ايدي
توري جدها ايدها المتشققه
انوار : من اليوم وانا ادز بعجلات الكرسي ويا كثر الشوك والقزاز اللي دخل ايدي .. وغير التراب .. وبعد ما صدقت اني وصلت يجي يمصخرني هالمصخره ؟؟ واضطريت اني اجي ازحف لين اطلع من الشجر ...... يباااااااا حرام عليكم ليش جبتوني ؟؟؟ انتوا تبون تكرهوني بالمزرعه ؟؟ تبون تكرهوني بنفسي .... انا جايه استااااااانس حرام عليكم ....... والله حرررررررام
بومحسن الشرار كان يتطاير من عيونه مو عارف شبيسوي بالضبط اذا شاف مشاري ....... يبي يذبحه ...... لان مشاري حيل قلل من شانه ليش يقص عليه ؟؟ ليش يسوي هالسواه ببنت عمه ؟؟؟ وفوق هذا كله يكمل سهرته وكأن الوضع طبيعي .... و الساعه الكامله اللي خلاها ما فكر يتصل مره ثانيه على جده ويقوله .... ومنظر انوار واهي طايحه الحين بين ايده .... عور قلبه .. وخصوصا انها انسانه مو سليمه عشان يسوي جذي .. ماقدّر انها طالعه من صومعتها اللي دامت شهر كامل .. انها محتاجه لمعامله ثانيه اسلوب خاص .. وعلى انين صوت انوار .. قام بومحسن
بومحسن : جراااااااح قوم فج الباب الي جدام ..
ويفج جراح الباب اللي جنب السايق .. ويشيل بومحسن انوار بيدينه وعلى كبر سنه لكنه يتمتع بقوام قوي .. وحطها على الكرسي .. وصك الباب وساندت راسها على الباب ..
انوار بتعب : يبا رجلي تعورني .... احس جنها صخر
بومحسن يطالعها بحسره : انتِ ارهقتيها اليوم زياده عن اللزوم
انوار والعبره خنقت نص كلامها : واهو بكيفي ارهقتها؟؟
بومحسن : حسبي الله على من كان السببب ....... جراااااااااااااااااح
جراح : يباااااا شوي شوي كاني وراك بطيت اذني الله يهداك
بومحسن : اخوووووووك الهيس وينه ؟؟؟
جراح : بالدوانيه ..
بومحسن : انا اوريه الهييييس ولاجنه مسوي شييييييي ؟؟؟؟؟؟
كانت انوار تصيح بصوت منخفض اشبه بالانين المستمر ...... والارهاق مدمرها ..
بقمه سرعته بومحسن يرجع لدوانيه .. ويسفط جنب سياره مشاري وكانت سياره مشاري على اليمين ..وسمع صوت ربع مشاري ومشاري كلهم يضحكون وصوت التلفزيون عالي .. وكانوا يلبعون كوت بوسته .. وكانت ضحكاتهم عاليه لان الدرايش حقت الدوانيه كلها مفتوحه وكانت كبيره يعني اللي برى يشوفون كل الدوانيه من داخل ... وهذي ميزة معظم الفلل اللي داخل المزارع ..
ويلتفت على انوار .. اللي كان حالها ما يسر عدو ولا صديق ..
بومحسن : باخذلج حقج منه ...... ولاتبجين ... اللي يهين بنتي انواررررر انا اعرف شلون اهينه
جراح التفت على يساره وشاف الويل جير حق انوار موجود ....!
جراح : يباااااا كاهو كرسيها .....!!
بومحسن استوعب: يعني راح مره ثانيه وومالقاهاا ورد يككمل سهرته ؟؟؟؟ وصوت الضحك باط اذني ؟
جراح : تلوموني فيه ؟؟ قلتلكم هذا الله يعيني عليه
بومحسن خلاص وصل حده : يصير خير
ينزل بومحسن من السياره .. ويفج باب الدوانيه بقوه .. ويدخل على مشاري واهو جدام ربعه ويعطيه كف لف وجهه ... مشاري طالع جده بصدمه مابعدها صدمه ....!
بومحسن : أي النذل يالهيييييييس الاربد .... هذي سواة تسويهاااااااا؟؟
ربع مشاري استغربوا والكل قط اللي بيده .. كلهم طلعوا من الدوانيه تداركا للوضع الا ثنين من ربع مشاري .. حاولوا يفرقون بينهم ..
مشاري والصدمه على وجهه تتكلم ...
" انا شسويت ! "
بومحسن : ساعه ادق عليك واسألك عن البنت وتجذب علي ؟ وبالاخير قاطها بين الشجر ومخليها ؟؟؟؟ انت شنو ؟ ماعندك دم منت رجال ؟
ويزره على الطوفه .. ومشاري يطالع حوله الا ربعه كلهم طلعوا ...... حس ان هذا كله جذب حلم أي شي .. بس جده يجي ويهينه جدام ربعه كلهم!!! ماكانت ابد على الحسبان
بعد ماوعى من الصدمه
مشاري: ليش يبا شصار فيها ؟؟
بومحسن : فيييييك الخير والله ؟ تعرف تسأل الحين .. لكن انك تقطها هناك اكثر من ساعه عاااااااااااادي عندك ولا يهمك ! وتخليها تزحف على رجولها واهي محروله عاااادي عندك ...
مشاري بانفعال: يباااااا اهي تستااااااهل اللي جاهااااااا
بومحسن : شنو؟؟؟؟
مشاري : يباااااا شفت جام سيارتيييي ؟ كسرته هذي مجنونه مو صاحيه ...
بومحسن : محد مجنون غيرك عشان جامه يامشاري ؟ بدال ماتحط بنت عمك بعيونك وتقص لسان اللي يتجرأ ويهينها تجي انت يامشاري ؟؟؟.. تجي تسويها فيها جذي ..!! ماقول الا ياخساره تربيتك ......... اطلللللع برىىىىى ولاعاد توريني رقعه وجهك .... برىىىىى
مشاري لف وجهه ونزل عيونه للأرض ..... حسسسس بالاهانه شلون قاسيه .....
" جداااااام ربعي يا يبااااااا ؟ حرام عليك ليش تهيني جدااااااامهم ؟؟ وهذا وانا اللي عازمهم على المزرعه ؟؟؟ وعشان منو كل هذا ؟؟ عشان انوار !! "
خلاص حس بالذل اللي مابعده ذله طلع من الدوانيه وقبل لا يركب سيارته لف عليها واستمرت لغه العيون اهو يطالعها باستحقار واهي تطالعه بنشوه الانتصــار .. لين لفت انوار الجهه الثانيه قبل لا تنزل دمعتها واهو ا كل للي سواه ركب سيارته وهو يتنهــــد بغضب ناري .... !!
من لفت ونزلت دمعتها شافها جراح ..
جراح : امسحيهاااااا انواروا تبجين على هالخسيس .. خليه يولي ..
انوار اللي شافته اكبر من توصفه دموعها .. شافته ينهان جدامها .. صج حست بأنها خذت حقها .. لكن على حساب شنو !! انهان جدام ربعه كلهم ...! حست بنظرت الاحتقار اللي شافها فيها تحرقها .. اهي السبب باللي صارله ..
شوي الا حرك مشاري سيارته ونظره كله على انوار وده انها تشوفه عشان يطلع حرته ... لكن كانت لافه الجهه الثانيه كانت تكلم جراح هالشي اللي خلا جبده تغلي من القهر .. على كل الخلافات اللي بينهم علاقتها مع جراح اخوه ولا احلى منها ....!!
" ليش شمعنى كل المصايب تصير معاي واهو احلى معامله له ؟؟؟ "
تعمد مشاري يحرك السياره جدام وياخذ فوق حدر على سياره جده .. عشان تشوف انوار اللي سوته بسيارته .. يبي يوريها ان اللي سويتيه يقهر مو شويه !
جراح : اوووبس صج انج قويه كسرتيها جذي!
انوار : من الحره ما شفت شي ماشفت الا صخر بيدي واحذف !
سكت جراح ... بعد ماشاف مشاري شلون غبر عليهم وطلع من المزرعه بقمه سرعته !
انوار بخوف: ما ...ما كنت متوقعه جدي يطقه جدام ربعه !!
جراح : يستاهل جزاه واقل من جزاه ... عبالج الي سواه شويه انتِ ماشفتي شلون جدي اختض وتخرع وارتفع عليه السكر خاف عليج قعدنا ندورج ساعتين ...... والعجب انج مختفيه ؟؟ وبالاخير نكتشف انه اهو اللي خاشجج بين الشجر ورايح ومخليج وقاص علينا !
انوار : انا ليش جيت اليوم ؟؟ احس هالسالفه ماراح تعدي على خيررر .. مو معقوله مشاري بيسكت !
جراح : يسكت يصرخ يسوي اللي يبيه ... المهم بردنا حرتنا ..
انوار رجعت راسها على الكشن .. وحست بعظامها تطقطق وآلالام برقبتها .. وجروح ايدها تحرقها ونقزات بقلبها لان نشوة الانتصار مع تأنيب الضمير اجتمعت عندها مع بعض واربكتها .. شوي شوي نامت ..!
اما بالدوانيه ..
بومحسن : اسمحولي ياعيالي .. والله اني كنت معصب ولا شفت شي .. استسمحولي من ربعكم .. وان شاء الله تعوضونها مره ثانيه
واحد من ربع مشاري : ولا يهمك عمي .. بس المهم انك ما تتعب نفسك ... ومشاري حاله حال الشباب ساعات مايعرف شلون يتصرف .. اسمحلي عمي انا بروح الحقه بشوف وين راح
بومحسن : حياك الله ..
ركب بومحسن السياره .. لكنه شاف انوار نايمه ..
بومحسن بصوت واطي : جرااح انزل دخل الويل جير
جراح ركب الويل جير الدبه .. ورجع مكانه
جراح : ماقلت لك لاتنادي مشاري .. ماوراه الاالاذيه ..
بومحسن : والله ولا يوط وط المزرعه مره ثانيه .. لين يتأدب ويصير رجال
جراح : احسسن فكه
بومحسن يطالع انوار واهي نايمه
بومحسن : اخاف رجلها صار فيها شي ؟
جراح : لا ان شاء الله ..
بومحسن : لازم اوديها المستشفى ابي اتطمن
جراح : لالا تكبر الموضوع .. اهي اوردي راح تروح باجر عشان العلاج .. وهناك اهم يشوفونها ..
بومحسن تنهد : الله يعين ..
--------

[أختكم في الله]

مشاري من طلع من المزرعه والدنيا سودا بنظره .. ضربه جده له و اهانته جدام ربعه كانت تحرق قلب مشاري ... مشكله كل مايبي يرجع لسبب تطلع له انوار ... وينقهر اكثر .. طلع مشاري من المزرعه والعبره خانقته .... كان يدوس 160 سرعه جنونه وماكان عارف وين يروح .. بس بالاخير .. قرر انه مايرد البيت الا بعد ماتهدى الاوضاع .. ويريح جده من وجهه جم يوم .. وراح الشاليه .. كانت عنده كبت ملابس بسيط للويك اند .. وطلع من خط المزارع وقضب خط الشاليهات .. وكانت الساعه تقريبا 9 بالليل .. افكاره كانت تجيبه وتوديه .. وخصوصا واهو يشوف جامته الخلفيه متهشمه .. و يززيد انفعاله ويدوس بنزين اكثر .. لين كسر يمين بأقصى ماعنده .. بعد ما شاف جدامه سياره سبورت بتاخذ فوق تحت واهو كان بيدش فيها .. ماشافها وكانت بتنهي حياته لكنه باللحظه الاخير لف يمين .. وتدارك الوضع بسرعه .. بعد ما خذا يمين سفط على صوب ووقف سيارته .. والخرعه كانت متحكمه بضربات قلبه .. ربع ايدينه الثنتين على السكان ودفن راسه بينهم ....
" ليييييييش جذي ؟ بغيت اودر عمري طاير على شنو ؟ عشان انوار ؟؟ من تكون انوار عشان احرم عمري من الحياه عشانها ؟؟ ليش يا انوار تسوين فيني جذي؟ مو كافي شهر كامل مخليتني على اعصابي .. واتنطر اخبارج ؟ مو كافي اني فكيتج من وجهي شهر كامل .. عشان مايكون بينا أي تتش يمكن يأثر علينا .. ليش يعني عشان تغيرت نظرتي لج تجازيني بهالطريقه ؟ اللي تبينه سويته .. حااااااولت هاليومين كثر ما اقدر اتجاهلج .. لكن ماقدرت ... صورتج بوجهي بكل مكان .. القدر مصّر انه يخليج بطريقي وين ماروح ..؟ حااااااااااولت انفّرج مني بأسلوبي لكن للأسف مافاد زاد الطين بله ... مو انا مشاري اللي قطج بين الشجر بعز الظلماء وخلاج .. هذاك مشاري ثاني مشاري منقهر منج مو عشان سيارته عشانج انتِ ... انتِ اللي متغيره عليه ؟ يبي يبرد حرته من تصرفاتج البليد طول الفتره اللي طافت ... يبي يشفي غليله على عنادج اللي مامنه فايده ... واهو بكل الحالتين فاقد صوابه ... ليييييييييش انا مهتم فيها ؟؟ على اللي سوته اليوم المفروض .. الغيها كليا من حياااااااااتي ... مو اخليها تتسب بوفااااااااتي !! "
قطع تفكيره صوت الدريشه احد يطق عليه ..
فج مشاري الدريشه : هلا ؟
---: عسى ما شر صار فيك شي ؟ اشوفك من سفطت ماتحركت !
مشاري : لا اخوي جات سليمه
---- : انتبه على نفسك ترى الدنيا ليل انتبه لسواقتك
مشاري : ان شاء الله والسموحه منك شوي تعبان
---- : أي واضح بس ليكون بتسافر وانت جذي ؟
مشاري : لالا بروح الشاليهات
----: أي زين اشوى ما بقى عليها شي .. بس عشان ماتسرح بطل الدرايش خل الهواء يدش عليك وبطل المسجل .. وماتشوف شر فمان الله
مشاري : بحفظ الله ..
خلاص ماقدر يشغل السياره مره ثانيه ... فا بطل الدرايش .. ورد الكشن حقه ورى وانسدح .. حط ايدينه ورى راسه .. وسرح سرح الى مالا نهايه .. لين بالاخير فز من قعدته وكأنه الحين يستوعب شي خطير !

" انا شسويت فيها بالضبط؟؟ ليش جدي طقني ؟؟ اكيد صارلها شي جايد .. والسبه انا ؟ والا ما يعصب جدي بهالطريقه !! يا الله مو ناقص احاااااتي !"

[أختكم في الله]

" جــراح !! "
"جراااح المنقــذ !! "
ويدور تلفونه لكنه حمد ربه انه لقاه بمخباته وشاف جم مكالمه من ربعه بس طنشهم .. واتصل على جراح.. بعد رنه رنتين ثلاث ردّ عليه
جراح : هلا ؟
مشاري : وينك ؟
جراح : رادين البيت شتبي ؟
مشاري : معاك انوار ؟
جراح : صج عين قويه وتسأل بعد ؟
مشاري : رد علي مو فاضي لك
جراح : مو فاضيلي ليش داق ؟
مشاري بعصبيه : انوار معاااك ؟
جراح : تونا قاطينها بيتهم
مشاري : شصار فيها ؟
جراح : تعبانه شوي
مشاري : انتوا شلون لقيتوها ؟
جراح : لقيناها جايه تزحف من مكان الشجر وحذفت علينا صخر لين وقفنا .. ورجولها الحين تعورهاتقول احس جنهم حدايد ! وجدي ايده على قلبه خايف لان فيها فتور بأعصاب الرجل الحين شكلها الاعصاب تقطعت على كل هالزحف !
بعد سكوت
مشاري : تستاهل
جراح : ؟؟؟
مشاري: شفيك ساكت ؟
جراح : اسمحلي ماعندي كلام معاك مع السلامه
ويصك بوجهه ..
انقهر زياده .. ليش كل الناس قلبت ضده ؟ اهو اصلا ليش قلب على عمره ؟ الحين طول اليوم متحسف على اللي سواه يجي ويقول انوار تستاهل ! ؟ بهاللحظه صج كرهه عمره .. حس ان بقلبه شي وبلسانه شي ثاني .. اهو طبعه يطلع عكس ما يبطن .. يعني اذا حب احد يترجم حبه بطريقه عكسيه ... لدرجه يحس بنشوه وسعاده اذا شاف اللي يحبه يصرخ ويتعذب ..! تقدرون تسمونها حالات نادره لكنها للأسف موجوده وهذا حال صاحبنا مشاري ... يوم كانت انوار تصيح من الخوف كان يضحك بأعلى صوته ! يوم حس بسعادة يوم شافها بالمزرعه .. قام وطفرها بأسلوبه لين خلاها تكسر جام سيارته ..! لكن بالاخير تحسف على كل اللي سواه ... انوار بالاخير بنت ضعيفه ماتستاهل ... وكل ما يتذكر شلون تسولف انوار مع جراح .. يحس بالغيره .. ليش معاملتها عال العال مع اخوه واهو كل سبه وكل طقه وكل مصيبه فيه ؟ بلحظه استسلام اخيره ... تمنى انه يرد العلاقات صافيه ..... وانه يتخلى عن اسلوبه السلبي .... ويصير انسان طبيعي حاله حال جراح ...... لكن هيهات تعتقدون فات الاوان والا في امل؟؟
بالاخير حرك سيارته وراح الشاليهات ... وكمل سهرته على الشاطئ وقعد يتكلم كالعاده وقت ما يرفضه الكل.. يقعد ويتكلم يتكلم بروحه .. لين يحس انه ارتاح .. ولو ان محد يسمعه .. لكن بحضور البحر والرمل والنجوم والامواج والهواء.. كلهم يسمعون شكواه .. ويحسون فيه .. ولويقدرون جان ردوا عليه .. بس المهم ان اللي مخفي بقلبه ما يطلع لأحد ولو حتى المعنيين نفسهم .. !
--------
اما انوار فا من ردت البيت كانت مصدعه وماكانت فاضيه تناقش احد .. دخلت غرفتها وصلت العشى ودعت من كل قلبها ان ربي يقومها بالسلامه ويردها مثل الاول حست بنعمه المشي .. محد يقدر يلعب عليها ويحطها بهالمواقف .. ضحكت على نفسها يوم قالت ما ابي اتعالج .. لا اصعب شي على المعاق اذا صارله حادث واهو كان طبيعي وانصاب .. هذي تكون اصعب من اللي من انخلق واهو مايمشي .. فا مدام ان في امل للمشي مره ثانيه عاشت عليه .. وتدعي ربها ليل نهار عشان ترجع مثل الاول .. لانها والى الان ماتأقلمت لكنها راضيه باللي صارلها خصوصا انه من ربي ... وكل شي من ربي ما ينرد ... ولازم نرضى فيه اذا كنا حابينه كان بها واذا شي مو حابينه ينكتب لنا عليه اجر وتخفيف ذنوب مافي اكبر من رحمه الله على عباده .. بعد ما حست انها صج تعبانه حطت راسها ونامت... على ثاني يوم قامت الصبح على الساعه عشر .. وطلعت الصاله .. شافت ديمه تتريق
ديمه : اهلييييييييين صباح الانوار والله وينج امس ؟
انوار : هلا صباح الخيرات .. ابد رديت من المزرعه وحطيت راسي
ديمه : ها بشري استانستي ؟؟
انوار اضطرت تجذب: أي الحمدلله
ديمه : واستخسرتي هالوناسه فيني ؟
انوار : ههههههههه شدعوه بس رايحه اغير جو مابي اشوف وجيه مكرره معاي بالبيت
ديمه : يامعودة ما صدقنا على الله انج طلعتي واستانستي ..
انوار : لي هالدرجه كنتوا تعانون ؟
ديمه : واكثر والله يعني صج كنت شايله همج .. انوار انتِ اقرب لي من الناس كلها .. شي اكيد اثر بنفسي انعزالج عنا
انوار : واللي يقولج خلاص من اليوم ورايح ما راح اشوف غرفتي الا وقت النوم ؟
ديمه : صصصصصج ؟ يعني خلاص ماراح تحكرين روحج ؟
انوار : أي
ديمه : شلون متى هالكلام ؟ ليكون من طلعه امس ؟
انوار : ههههههههههههه أي من طلعه امس .. شوي رتبت افكاري وشفت ان اللي اسويه غلط .. خلاص مابي اضيق خلق الناس معاي ...
ديمه : أي جذي هذذذي انواررررر
انوار : افا عليج تربيتج
ديمه شافت ساعتها وشهقت واهي تشرب العصير
ديمه : 10 وربع !!
انوار : أي شفيج ؟
ديمه : محاااااااااضرتيييي 11
انوار : تو الناس
ديمه : انتِ ماشفتي الشوارع ؟؟ حشى بمصر مو الكويت على هالزحمه
انوار : اجل شعندج مجابلتني روحي دوامج
ديمه سكتت شوي وكأنها تقلب فكره ببالها
ديمه : شرايج تروحين معاي ؟
انوار : نعم ؟
ديمه : أي مافيها شييي ؟
انوار : لالا مابي
ديمه : يلا عاد انوار مو تقولين تغيرتي ؟؟ يلا ترى كلها محاضره وحده .. انطريني بالكافتيريا ومنها تشوفين رفيجاتج
انوار باستهزاء: رفيجاتي ؟
ديمه : أي
انوار : اسمحيلي .. هذول رفيجات مصلحه بس عشان المذكرات والحضور والغياب والا الصداقه ماعرفوها
ديمه : من صجج محد دق عليج ولا افتقدج ؟
انوار : لا ولاحد سأل الا وحده بس مرتين حاولت وبعدين طنشت ....
ديمه : انزين مو مشكله رفيجات بدالهم رفيجات بس المهم يلا روحي البسي عشان خاطري ولا ترديني بليز
انوار فكرت بديمه قبل لا تفكر بنفسها وشافت انها اكيد بتستانس لي راحت معاها ويردون سوالف بدايه هالكورس اللي وقفته بسبب اللي صارلها وماشافت فيها شي .. ووافقت مع انها صج تعبانه من امس ومازالت ايدينها تحتفظ بتشققات وجروح طفيفه ..
انوار : عاد تنطريني على ما البس ؟
ديمه : عااااااااادي افا عليج لو اطنش المحاضره ماهمني المهم تروحين معاي
انوار : دام جذي كملي عصيرج وانطريني بالسياره ..
وديمه من الوناسه ماتدري شتسوي .. اول شي دقت على دلال
ديمه : قوووووه دلال شلونج ؟
دلال : هلالا والله بخير الله يسلمج شفيج شكلج مستانسه ؟
ديمه : الا قولي ميته من الوناسه خلاص انوار طلعت من قوقعتها .. ومادري شاللي تغير من طلعتها من المزرعه !
دلال : زييييين ااشوووى ربج كريم
ديمه : اسكتي الحين بتروح معاي الجامعه
دلال منصدمه : احلفيييييي
ديمه : والله العظيم ماتشوفيني مستانسه
دلال : عفيييييييه متى تخلص محاضرتج بجيكم
ديمه : وين بالجامعه ؟
دلال : ايي بمركم
ديمه : مايخالف انتِ عندج محاضره وحده بس ؟
دلال : انا الحين توني طالعه من محاضره الساعه 10 الساعه 2 عندي محاضره وارد
ديمه : زييين اشوى يعني عندج بريك طويل
دلال :أي افا عليج انا جايتكم اليوم جايتكم مع ان سيارتي خربانه وجايه اليوم مع اخوي بس بدبرها اجي بباص بباخره بجتسكي المهم اجي ... دام تقولين انوار معاج .. بروح اشوفها يختي هالبنت بيض الصعو نسمع عنها ولانشوفها ..

[أختكم في الله]

ديمه : افا عليج بتشوفينها وبتستانسين لان نفسيتها اليوم متغيره اموت واعرف شاللي مغيرها ..!
دلال : منو اللي راح معاها المزرعه امس ؟
ديمه : مادري بس اللي مرونا امس جراح وجدي
دلال : اجل يمكن هذول اثروا عليها او شي ماتدرين !
ديمه : الله اعلم بس بليز لا تجيبين لها طاري مشاري جدامها بأي حال من الاحوال ولا تبينين لها انج عرفتي سالفته.. اخاف تعتفس نفسيتها .. اوكي ؟
دلال : لا تحاتين ولايهمج ..
صكت ديمه واهي مرتاحه حست الروح رجعت لها من جديد .... انوار تطورت حالتها وصارت تطلع !
وبعد ما طلعت انوار ..
ديمه : ترى احترمتج حدج طولتي
انوار : هههههههههه شسوي البس
ديمه : انزين يماما مابقى الا ثلث ساعه مايندرى نوصل بالوقت والا لا مو خلاص الدكاتره مايعترفون بالتأخير يموتون ع الغياب
انوار : وانتِ لالحين على هالمأساه ؟
ديمه : ههههههههه انزين يلا اركبي
انوار انحرجت : ممكن تساعديني ؟
ديمه : من عيوني الاربع هذول ..
قالت اربع لانها لابسه نظاره شسميه
انوار : انا بقعد روحي بس انتِ اخذي الويل جير وحطيه بالدبه
ديمه : اوكي ..
ومشوا وقعدوا يسولفون طول الطريج عن سوالف متفرقه حاولت ديمه تبعد قدر المستطاع من طلعه المزرعه هذي ! مع ان الفضول قاتلها تبي تعرف شصاااااااااار ؟؟ شاللي تطور شاللي غيرهاااااااا من يوم وليله !؟ بس خافت ماتدري ليش تبي تستمتع بنفسيه انوار المتغيره .. ماتبي شي يضايقها ..
انوار : وقفيييييي
ديمه : شفيج؟
انوار : الاشاره برتقاليه شعندج شاخطه ؟
ديمه : اقولج وراي محاااااضره
انوار : ونموت عادي ؟
ديمه : عادي الحين من صجج في احد يوقف بالاشاره البرتقاليه ؟
انوار : شدخلنا فيهم تبينا نروح بستين داهيه ؟
ديمه : واللي يعافيج من اشوف البرتقاليه شابه اجيج دايسه بلحق عليها ..
انوار : عم انفال رفيجتي دش بسياره عشان هالسبه .. مسرع واللي جدامه وقفوا على هالاشاره ..
ديمه : الله يكافينا شر هالحوادث .. ماعليج انا منتبهه
انوار : مبييييييين ذابحه قلبج السوالف ماصارت دلال هذي ذبحتيني فيها .. متى عاد بتزورج ؟
ديمه : اهي بتجيج بيوم من الايام بس بتسويها سبرايز ..
انوار : اهااااا والله شوقتيني اشوفها .. عاد على الله ماتطلع مثل اخوها عملاقه
ديمه : هههههههههههههههه لا حرام عليج حيل كيوت البنت .. انتِ ماشفتيها ؟
انوار : حدي ما دققت فيها يمكن نسيت ملامحها ..
ديمه : ماشفتيها بالملجه؟
انوار : تكفييييييييين عاد الملجه لاتحسبين اني يعني اختج ومستانسه لا كرفوني كراف جني وحده من هالخدم ماشفت الناس ولا رقصت الا رقصه وحده وبالغصب بعد كانوا يتعشون
ديمه : ههههههههههههههههه ياحرررررام كل هذا بقلبج ؟
انوار : شسوي بعد
وقعدوا ساكتين ومشغلين الرادو ودق تلفون ديمه !
ديمه من شافت الرقم استغربت !!
انوار : ردي ؟
ديمه : معقوله ؟
انوار : منوو ؟
ديمه : ابتسام !
انوار : منو ابتسام ؟
ديمه : بنت عمي محسن
انوار فجت حلجها منصدمه : شعندها؟
ديمه : مادري امبي خفت اخاف ابوي فيه شي ؟
انوار : لا من صجج اصلا اهم شدراهم عنه .. يعني عمرها مادقت عليج ؟
ديمه : امبلا يعني مرات اذا بتعزمني على حفله شي مسج تسألني عن كريم شغله .. بس
انوار : انزين ردي ترى هذي ثاني مره تدق .. اكيد تبي شي ضروري والا مادقت هالحزة
ديمه : الله يستر ..
وردت
ابتسام : قووه
ديمه : هلا والله الله يقويج من وين طالعه الشمس داقه علي!
ابتسام : ههههههههه مو وقت تشرهه بسألج مشاري مركم امس ؟
ديمه : لا
ابتسام : كلش؟
ديمه شكت : لحظه بسأل انوار
وحطت سبيكر
ديمه : انوار مشاري مركم امس مع جدي وجراح ؟
انوار الغريب ماتغير شي فيها .. وحاولت قدر الامكان تبين عاديه
انوار : لا ما مرنا بس شفناه بالمزرعه
ابتسام : يعني نايم بالمزرعه ؟؟؟
انوار : شدراني .... امم لالا ماظني
ابتسام : بليز انوار تأكدي ابوي اليوم سوالنا قصه فلم .. يهدد ويتوعد يوم شاف غرفته فاضيه وسيارته برى البيت ! وخصوصا ان عليه دوام المفروض يروح مع ابوي ولا بين لي الحين ! تخيلي الحين بتصك 11 لاحس ولاخبر
ديمه : امبي وين اختفى ؟ صج شهالغباء دقوا عليه
ابتسام : لا تكفين على الذكاء اكيدددد اول شي سويناه دقينا لين قلنا بس مغلق اهو ناوي يذبح امي وابوي بحركاته السخيفه
ديمه : والله ماشفناه ولا ندري عنه
ابتسام : الله يعين يلا خلاص ما اطول عليج ..
ديمه : بس بليز طمنينا عليه لا نقعد نحاتي
ابتسام : ان شاء الله لا توصين
وصكت التلفون ..
كل اللي قدرت تلاحظه ديمه ان انوار سرحت شوي .. بس ماحاولت تبين فا تداركت الوضع وطولت على الرادو ووغيرت الموضوع .. لين وصلوا .. ونزلوا .. وديمه راحت على محاضرتها وانوار راحت الكفتيريا .. شوي الا تصادف رفيجتها انفال ..
انفال بصدمه : انوار ؟
انوار : أي انوار بعد ليكون ماعرفتيني ؟
انفـال : شفيج ؟ شصار لج ؟؟
انوار : حادث بسيط
انفال : أي بسيط ؟؟؟؟؟ متى هالكلام ؟ ليش ماتقولين !
انوار : من تقريبا شهر وليش اقول ليش انتِ ما تسألين ماتعرفين تفقدين رفيجتج ؟
انفال : والله العظيم اني شخلتج تلفونات ويعطيني مغلق وادق على بيتكم يقولون نايمه طالعه دااااااايما يصرفوني ..
انوار تذكرت انها من اول اسبوع لها بغرفتها اغلقت جهازها وقطته بالدرج ..
انوار ابتسمت : ولا يهمج معذوره ..
انفال : قوليلي شصاررررر شسالفه ؟
قالت لها انوار السالفه باختصار وتأثرت حيل انفال ..
انفال: كللل هذا يصيرلج وانا اخر من يعلم !!
انوار : صدقيني اعتزلت الناس كلهم .. احس كلهم بيشمئزون من شكلي وكنت حيل متهربه من نظرات الشفقه ..
انفال : صج انج خبله اهلج ورفيجاتج بيشفقون عليج ليش؟
انوار : ادري بس كنت متصوره ان الناس كلها تطالعني بنظره وحده ..
انفال : ياعمري والكورس هذا بعد وقفتيه ؟
انوار : أي بعد شسوي
انفال : شنو شتسوين .. شفيها ان داومتي بكرسيج ؟ شوفي الجامعه فيها معاقين وماخذين حقوقهم على اكمل وجه وحالهم حالنا
انوار : صعبه حيل انتِ ماتحسين بشعوري كنتِ شي وصرتي شي ..
انفال : قضاء الله وقدره ... بعد لاتقولين لي بتعترضين !
انوار : لا اللهم لا اعتراض .. ماعليج كل شي بينحل ان شاء الله
انفال : العمليه هذي بتسوينها وانتِ ماتشوفين الطريج
انوار : عاد اتصدقين هالعمليه عادي كنت بسويها بس ماسويتها عناد لولد عمي
انفال : ليش ان شاء الله من يكون عشان تعرقلين عمليتج عشانه ؟
انوار : لانه اهو يبيني اسويها وانا حبيت اقهره .. وماسويتها
انفال : والللله انج جاااااااهل حبيبتي هالامور مافيها عناد وسوالف جهال ... ليش انتِ جذي ؟
انوار : يالله الله يعين ...
انفال : اسمعي محاضرتي باديه من ربع ساعه كنت جايه اشتري ماي .. مادريت اني بشوفج .. بحضرها وبجيج اوكي ؟
انوار : اوكي انا قاعده
انفال راحت ومن بعيد : فجي تلفونج
انوار تهز راسها بايجاب ..
بهالفتره قعدت انوار بروحها وتفكر باللي قاعد يصير .. شمعنى تعاند مشاري ؟ شكو اصلا تعانده على قرارت مصيريه تخصها ! ليش اعطته اكبر من حجمه واهو اللي وضح لها امس انه مايستاهل .. تصرفاته صبيانيه .. الحركه اللي سواها قويه وعمرها ماراح تنساها .. بس ماتنكر ان قلبها عورها يوم شافت جدها يطقه طراق .. حست ان الزمن رجع وربي خذا حقها منه .. مثل الطراق اللي عطاها انرد له وبهانه اكبر جدام ربعه كلهم ! .. ما انكرت انها حست بنشوة الانتصار والفرحه العارمه .. لكن بعد حست بخوف ...لان مشاري انسان مو سهل مو هين اذا حط الشخص بباله يعني الله يعينه ... وعمرها ماراح تنسى نظره الحقد اللي شافتها منه اول ماطلع من الدوانيه ...
وبغمره تفكيرها بمشاري واللي صار .. قعدت تفكر فيه الحين ..
" ياترى وينه ؟ ليش يخلي اهله يحاتونه ؟ يعني لازم يختفي ويحملني سبب غيبته ! افف انا ناقصه احاتي ؟؟ امبييي اخاااااااف بيرجع لربعه القداما .. وللسمرات وهالخرابيط .. مااستبعد يسويها شكله عنادا فيني بيرجع .. ماكو الا جراح اهو اللي بيطمني ! " بس اجلت المكالمه لان الولد الحين بالمدرسه ... اذا رجعت تدق تتطمن ..
شوي الا رجعت ديمه .. ومعاها وحده وجهها مو غريب على انوار ..
ديمه : ماشاء الله على حطتج ماغيرتي مكانج ؟
انوار: بعد شسوي جاتني انفال وقعدت اسولف معاها
ديمه : صجج ؟ زين والله امممم انوار هذي دلال
انوار : دلال اخت مشعل ؟
دلال : أي اخته
انوار: صج ؟؟؟ ياهلا والله عاش من شافج
دلال : عاشت ايامج مابغينا نشوفج !
انوار : والله شنسوي ظروف
دلال : انتِ اقوى منها وبتعدين هالفتره على خير
انوار: تسلمين والله
ديمه : ها انوار شرايج بالمفاجأه؟
انوار: عجيببببه والله
دلال : بتقعدون جذي ؟ لا بليز انا عازمتكم على غدا محترم
ديمه : ولا قلتي لي
دلال : يعني انتِ عبالج انا جايه جذي لله ! لا حبيبتي دام انوار موجوده بنعزمها وبنقعد معاها من زمان عنها
ديمه : هييي انتوا خلاص ترى اغيرررر
انوار: هههههههههههههه ليش تغيرين انا ماصدقت لقيت احد يحبني
ديمه : عطوني وجه يعني
دلال : لا انتِ مو تخصصنا تخصص واحد الله يذكره بالخير ..
وغمزت لها
ديمه وجهها قلب احمر : هيييي بس عاد ناقصين احراج ! يلا امشوا
دلال + انوار : ههههههههههههههههه
وبالسياره
ديمه : الا صج دلال انتِ منو جابج ؟
دلال : ليش تسألين ؟
ديمه : لانج قلتيلي سيارتج خربانه !
دلال : أي صج خربانه ورفيجاتي مو نفس بريكي .. فا دقيت على المنقذ مشعل وجابني
ديمه : مشعل قطج ! هني
دلال :أي
ديمه : اهاااا
دلال وبابتسامه خبيثه : وقالي سلمي عليها .... طبعا يوم قلتله ابي احد يوصلني قال مو فاضي بس يوم قالي ليش قلت بشوف ديمه عشر دقايق الله وكيلج الا اهو بالباركنج قلت له يعني عشان ديمه مو لي قال وانا من متى رديت لج طلب ؟ شفتوا العياره !!
انوار : هههههههههههههههههههههههههه ومن الحب ماقتل
ديمه خلاص قلبت طماطه
ديمه : ليش ماعنده دوام ؟
دلال : والله عاد اخوي عاهه يعني اللي براسه بيسويه فا لاتعتقدين في شي بيقيده
ديمه : لاتقولين عن اخوج عاهه
دلال : يووه غلطنا على الحبيب اسفين
ديمه : انتِ شغلج بعديييييين
دلال +انوار قعدوا يضحكون ..
ووصلوا المطعم .. وتغدوا وسوالف وضحك وناسه .. انوار قلبت نفسيتها من قلب صارت انوار قبل الحادث فرفوشيه و تونس وراعيه سوالف ..... وهالشي ماخلاهم يطلعون الا وكل وحده منهم مستانسه من هالطلعه .. منها تقربت انوار من دلال وتعرفت عليها عن قرب .. ودلال تعرفت على انوار ودخلت معاها بالخط .. و ديمه كانت مستانسه ان اختها تغيرت ورجعت مثل قبل ولو ان السالفه فيها غموض يكتنفها الا ان النتيجه اهي الاهم من الاسباب في بعض الاحيان !
بعد ماطلعوا
ديمه : تبينا نردج الكليه ؟
دلال : لا وين تقطوني وتردون البيت اصلا مشعل هني مو بعيد
انوار : اوكي
دلال : قاعد ادق عليه اشوى رد هدوء
مشعل : يلا اطلعي
دلال : وينك انت ؟
مشعل : بالباركنج يعني وين ؟
دلال : اقصد وين بالجامعه ؟
مشعل : أي .. وهذا سؤال ؟
دلال : مشعلللل لا تستعبط انا قلتلك مو بالكليه انا عازمه البنات بمطعم
مشعل : لحووووول وانا اللي متنقع هني ؟ وين أي مطعم ؟ هذي حزت هياتتكم مع الوجه !
دلال قالت له اسم المطعم وقالها تحسب ربع ساعه واهو جاي
انوار : انزين خـ ندش داخل ..
ديمه : اوكي ..
وقعدوا داخل ينطرون اخوها يجي عشان ياخذها ..
ديمه : انوار خلينا نمشي الحين مابي اتواجه معاه
دلال : لا والله وتخلوني لحالي !!
ديمه : انزين شسوي فيج انتِ جايه مع اخوج !
انوار : خلاص مومشكله اذا تأكدنا انهم راحوا طلعنا
ديمه : اسمعي دلووول امانه اذا طلعتوا من المطعم بكبره دقي عشان احرك
دلال :هههههههههههههه كل هذا خوف خلاص ولا يهمج بس على فكره بعطيج رنه لان ماكو رصيد
ديمه : انزين يا ام رصيد ..
بعد ما وصل مشعل خذا دلال وراحوا بعد ماطلعوا من المطعم عطتها رنّه وهم الثانين حركوا هذا كله عشان بس ديمه ما تتواجه مع مشعل .. لان بس ذكر اسمه يسبب لها احراج !
اما مشعل من ركبت دلال واسئله واستفسارات.. اللي زهقت من كثر ماترد عليها .. بس شتسوي فيه الحين اهي زوجته لازم تذكرها جدامه .. ماتقدر تسكته .. وحبت تذله شوي قالت ماراح اقولك الا اذا مريت بقاله بعبي رصيدي .. واهو سمعاً وطاعه وراح وعبالها .. البنات مايخلون هالمواقف لازم يستغلونها
بالاشاره ديمه وانوار يسولفون .. عن دلال شلون تاخذ القلب بسرعه ..
انوار : انسانه وجهها يوحي بالراحه
ديمه : انتِ اليوم ولا شي ماسمعتي سوالفها تفطسين من الضحك ..
انوار : اتصدقين كسرت خاطري يوم قالت ماعندي خوات .. !
ديمه : بس انا قلتلها اعتبرينا خواتج .. وغير هذا دايما اتقولي مشعل مو مقصر صايرلي الاخو والاخت
انوار : يحليل مشعل انسان طيب الله يوفقه
ديمه : امييين يارب
انوار: حشى قرن هالاشاره
ديمه : أي هذي عاد عله تطول
وساندت ديمه راسها على الكشن الا تشوف بالمنظره السياره اللي وراها وشهقت
انوار : شفيج ؟
ديمه : مشعل ورانا !!!!!!!
انوار : واذا شفيج اختبصتي
ديمه بارتباك : اقولج مشعل وراناااااااا
انوار طالعت من منظرتها السياره اللي ورى بس لاحظت ان مشعل موقاعد يطالعهم ومنمدج بالسوالف مع اخته ودلال مدنقه راسها وجنها تتعبث بشي الواضح انه تلفون !
انوار : يلا عاد لاتختبين مايدري انج ديمه وقاعد يقرق واهي ما شافتنا
ديمه : شدراج اكيد يعرف سيارتي
انوار : ليش شمسويه انتِ ؟ واذا درى انج ديمه

ديمه : انتِ شتقولين ! الحين انا منحاشه منه مابي اشوفه بالمطعم تبيني اشوفه بالاشاره !

[أختكم في الله]

انوار : هههههههههههه والله انج رقله
وشبت الاشاره خضرا وديمه على ارتباكها ولا تحركت وطبعا مشعل ماعرف منو السياره اللي جدامه بس انتبه ان السياره ماتحركت ! وطق هرن لين استوعبت ديمه وتحركت .. ومشعل عصب لان الشارع بروحه زحمه ومن شاف ان اللي تسوق بالسياره اللي قباله بنت انقهر .. !
مشعل : البنااااااااات خوااااااااره بالسواقه
دلال انتبهت كانت طول اليوم مدنقه وتعبي رصيدها بعدين تدز مسجات وطالعت الشارع
دلال : شفيك ؟
مشعل : تخيلي شبت خضراء ولالحين البنت واقفه ..
دلال : خلاص مشت
مشعل : قهرتني طقيت لها هرنات ثلاث مرات يالله صحت من نومها
دلال : أي سياره ؟
مشعل : اللي جدامنا صبر بخرعها
ويقرب من سيارتها ويطق هرنات ويأشر لها بعصبيه يعني ماتشوفين الاشاره ؟ نايمه نايمه ؟
ديمه من شافته يزف .. حطت ايدها على وجهها بخوف وداااااااااست بنزين .. وقامت تعدي بين السيارات من الخوف تبي تنحاش
دلال : هذييييي ديمممممممه
مشعل : شنو ؟
دلال : والله ديمه حتى انوار جنبها
مشعل : ام السياره السماويه ؟
دلال : اييييي اللي زفيتها
مشعل : من صجج ! وليش ماتقولين من اليوم ؟
دلال : شدراني ما انتبهت الا يوم تزفها !
مشعل : امبيييييي شكلها اختبصت .. يعني معقوله شافتني من المنظره وتخرعت !
دلال : اييييييييي اجل ليش وقفت والاشاره خضراء مايبيلها ذكاء امبييييييي حده شخطت !
مشعل بخوف : دقيييييييي عليهاااااااا هذي ناويه تدش بشبه ؟
دلال : أي صبر بدق
حاولت مره مرتين ماردت
دلال : مااااااترد !!
مشعل : انزين ليش اهي مخترعه مني شنو وحش ! شفتيها شلون حطت ايدها على وجهها !
دلال : انت اسكت قالت لي اذا طلعتوا من المطعم عطيني رنه عشان اركب سيارتي ماتبي تواجهك بحال من الاحوال .. خوافه تراها
مشعل : أي ادري انها خوافه بس مني عاد ؟
دلال : خلني ادق مره ثانيه
مشعل : لا وزفيتها بعد !! ياسلالالالالام عااااااااد اهي تكرهني اذا عصبت
دلال : هلالالالالا انوار
انوار : هلا والله دلال
دلال : انتوا شفيكم طرتوا ؟ خففوا
انوار: مادري عنها والله العداد صك 140 مااااااادري شفيها !
دلال : عطيني اياهااااااااااا
ومن خذت السماعه ديمه
دلال: ديوووووم
جر مشعل السماعه
مشعل : ديييييمه بليز لا تتهورين ترى والله اكلم ابوج يسحب السياره امشي على 100
واهي ساكته
مشعل : ديمه ردي
ديمه بقمه الارتباك: هلا
مشعل : انتِ ناويه تذبحين عمرج ؟ سوري ان صرخت وزفيتج واذيتج بالهرنات بس ترى ماعرفتج
ديمه : لا عادي
مشعل : أي عادي ؟؟ وانتِ دشيتي بكل السيارات !
ديمه : خلاص انا خففت
مشعل هدا: انزين ديربالج على عمرج .. هاج دلال
ديمه طبعا سكتت ..
ودلال ميته من الضحك .. وبعدها وصلوا البنات البيت .. ودخلت انوار غرفتها .. وديمه اصعدت غرفتها .. وكل وحده تحاتي شي .. انوار بتدق على جراح بتعرف شصار على مشاري وديمه تفكر باللي صارلها اليوم !
وبعد ما صلت الظهر وريحت .. دقت على بيت جدها
سونارمي خدامت بيت جدهم حاطه سبيكر وتنظف: الووو
انوار : هلا سونارمي شلونج ؟
سونارمي : زين بس شغل واجد
انوار : الله يعينج ليش صوتج بعيد ؟
سونارمي : انا حط سبيكر انا سوي شغل ويتكلم
انوار : اووه الاخت مو فاضيه المهم عندج احد ؟
سونارمي : لا ماكو انتِ شنو يبي ؟
بهاللحظه دخل مشاري بس من سمع صوت التلفون .. انخش ورى الدرج خاف يكون ابوه بس من سمع الصوت ثبتها هذي انوار !
انوار : جراح وينه ؟
انقهر زياده ....
" مازالت تسال عن جراح ! "
سونارمي : في مدرسه يطلع بعد نوص ساعه
انوار : انزين اسمعي مشاري ماجاء البيت ؟
سونارمي : مافي شوف من امس بابا يسوي جنجال هذا مشاري مافي دوام اليوم .. اصلا مافي نوم بالبيت !
انوار : معقوله وين راح ؟
سونارمي : انا مايعرف ؟
انوار : انزين سونارمي حبيبتي اذا جاء مشاري دقي علي مابي احاتي اكثر من جذي بس مو تقولين لأحد ؟
قرب مشاري من التلفون اكثر وأشر لسونارمي ماتتكلم
ومشاري الفرحه شقت الابتسامه بوجهه
" انوار تسأل عني !!! وتحاتي وتوصي بعد من متى ؟؟ "
مشاري : لا تحاتين سرج فـ بير ماراح اقول لأحد !!!!

انتظروا الجزء العشرين..

أختكم في الله

[بوفيصل]

يسلمووووووووووو علي القصة

ولا تطولين علينا أوكي

مع خالص تحياتي بوفيصل

[بوفيصل]

ليش كذا قاعد أستني القصة الله يرحم والديكي
كمليها بسرعه ما عندي وقت

مع خالص تحياتي بوفيصل

[أختكم في الله]

سوري لأن الحين مدارس بس أحاول احط لكم أجزاء..

=========================================

:: الجــزء العشـرين ::

انوار : انزين سونارمي حبيبتي اذا جاء مشاري دقي علي مابي احاتي اكثر من جذي بس مو تقولين لأحد ؟
قرب مشاري من التلفون اكثر وأشر لسونارمي ماتتكلم
ومشاري الفرحه شقت الابتسامه بوجهه
" انوار تسأل عني !!! وتحاتي وتوصي بعد من متى ؟؟ "
مشاري : لا تحاتين سرج فـ بير ماراح اقول لأحد !!!!
الصدمه ألجمت لسان انوار دقات قلبها تسبق الوحده منهم الثانيه ...
أخر شخص توقعت تسمع صوته بهالمكـالمه !!
انوار : مشاري ؟؟؟؟؟؟
مشـاري بمكر اكثر : داقه تسألين ؟ والا تتشمتين على اللي صار امس ؟
انوار بتوتر: لا لا اصلا مو داقه اسأل عنك
مشـاري يقلدّ صوتها واهي تكلم سونارمي: انزين سونارمي حبيبتي اذا جاء مشاري دقي علي مابي احاتي اكثر من جذي بس مو تقولين لأحد ؟ وهذا شتسمينه؟
انوار : اسأل عنك مو عشان سواد عيونك عشان جدي لا يرتفع عليه السكر ويتعب علينا ! والسبه حركاتك الصبيانيه اللي مادري متى بتعقل منها ؟
مـشارّي : اعتقد اللي سويته هذا اقل شي ممكن اسويه فيج .. احمدي ربج ما صنيتج كف على وجهج
انوار : هيه انت شهالكلام ؟
مـشاري : نعم خير اختي ؟
انوار : اقول عطني جراح اهو والله اللي ابرك من وجهك بستين مره
مشاري بدا خطته: بالله عليج عاجبج وجهج جذي ؟ صرتي عاهه مستانسه اذا شفتي روحج بالمنظره ؟ لا يعني صج صج سؤال وجيه والا عاجبج منظرج بالكرسي ؟
انوار سكتت
مشاري: تدرين يوم وديتج بين الشجر كنت بخشج لا يشوفونج ربعي ويتخرعون اخاف يحلفون مايطبون هالمزرعه ؟ خرعتييييهم يختي شوفي لج صرفه بوجهج ! خافي الله فينا !!
ومازالت ساكته
مشاري : شفيج صخيتي ؟؟ تكلمي ؟؟ والا اللسان اللي شطوله راح ؟
طوط طوط طوط
انقطعت المكالمه ..
عاد الرقم اللي دقت منه انوار والظاهر رقمها النقال ولاردت بالاخير .. خاف لانه عرف شفيها .. ودق على البيت وترد ميشو
ميشو : الوو
مشاري : هلالا منو انتِ ؟
ميشو : انا ميشووو
مشاري : هلا ميشوو وين ديمه ؟
ميشو : مادري يمكن داخل يمكن برى يمكن فوق يمكن تحت مادري ؟
مشاري : شقاعد تخربطين ؟؟؟ افففففف والله بلشه مخلين الجهال يردون على التلفونات !!
ميشو : انت ليش اتزفني ؟ انا دقيله (صغيره)
مشاري : واللي يرحم والديج ناديلي ديمه روحي دوريها فري البيت كله بسرعه
ميشو : امممممم انزين اتعد لما جم ؟
مشاري قاعد على اعصابه : لين الخمسه
ميشو : يلا قول واحد
مشاري: ميشووووووووووو خلصينييييييي
شوي الا ديمه داخله الصاله ودايما تحذر ميشو انه ماترد على التلفون لكن شتقولون عن اللقافه !؟
ديمه : الوو
مشاري : اففففف مابغيتي تردين ؟
ديمه : سوري كنت بالمطبخ
مشاري : انوار وينها ؟
ديمه : بغرفتها ليش ؟
مشاري : اسمعي انوار الحين بغرفتها وتبجي .. ولا تستبعدين انها تكسر الغرفه خلوها تطلع حرتها وصكوا الباب لحد يقعد يهديها خلوها تطلع كل اللي بقلبها .. بس بطلب منج طلب واحد
ديمه بخوف : آمر ؟
مشاري : كل شوي تطلين عليها ولاتخلينها تسوي شي بروحها .. وتسمعين بالضبط شتقول وتعلميني
ديمه : شلون يعني ؟
مشاري : اهي الحين بتطلع كل اللي بقلبها وهالشي هذا مكبوت صارله شهر كامل .. انا عطيتها جم كلمه تسم البدن الحين تلقينها منهاره اكيد راح تطلع اللي بقلبها وتبجي وتتكلم بصوت عالي عفيه اسمعي شنو اللي خاشته عنا طول هالمده ؟ انا صج عطيتها من الحامي لكن والله الشاهد على كلامي اني ناوي منه نيه ثانيه ..

ديمه بخوف : بلييييييز مشاري انت شقلت لها حرام عليك اهي اليوم شحلوها مافي احلى من نفسيتها وطلعت وتمشت وتغدت بمطعم لييييييييش تسوي جذي ؟؟
مشاري : اليوم طلعت ؟؟؟؟
ديمه : ااي ووعدتني ماتحكر روحها .. ليش تخرب كل شييييييي حراااااااااااااااااااااام عليك
مشاري قلبه عوره : لا ديمه والله ماخربت شي بالعكس يمكن انها تطلع معاج وترد وتضحك بس بقلبها في شي لالحين موجود ومو قادر يطلع .. فا مافي غير هالطريقه عشان نطلعه .. خليها تقول اللي تبيه تسب تلعن عادي المهم يطلع هالكلالالالالام ترى مو زين الكبت البنت مو ناقصه امراااااض
ديمه : خلاص انا بروحلها
مشاري : بليز انا اليوم بالليل بدق على البيت وابيج تطمنيني وديربالج عليها لاتخليني احاااااااتي
ديمه : ان شاء الله
صكت التلفون وركضت ديمه لغرفه اختها ..
وقبل لا تفتح الغرفه سمت بالرحمن لانها ماسمعت صوت فا توقعت خلاص ان اختها طاحت .. اول مافجت الباب الا انوار قاعده على السرير وحاطه ايدها على خدها وسرحانه .. فقط لا غير ..
انصدمت ديمه من المنظر لأنها توقعت العكس ..
لا دموع ولا صراخ ولا طيحه ولا شي ؟
استمر وضع انوار على هالحـاله كانت تنظر للأرض نظره ثابته على امتداد واحد .. وحاطه ايدها على خدها بحزن ..
بالبدايه ارتاحت ديمه لان كلام مشاري ما أثر بأختها ولا خلاها تنفعل مثل ماهو متصور .. فا فرحت لهالشي مادرت انها بتكون بدايه لشي جديد غامض !
ديمه : انوار حبيبتي شفيج ؟
انوار ساكته وعلى حطتها
ديمه قربت منها وهزتها من جتوفها ..
ديمه : انوار كل هذا سرحـان ؟ طالعيني
ورفعت انوار نظرها وطالعت اختها ببلادة اكثر والعجب انها ماتكلمت .. استمرت بصمتها ..
ديمه : شنو ماعندج لسان ليش ماتتكلمين ؟
انوار اشرت لها على راسها وفهمت ديمه انها تعبانه لين دعست روحها بالفراش ونامت ..
اول ماطلعت ديمه من الغرفه وتنزل الصاله وتكلم بيت جدها ردت عليها سونارمي
ديمه : هلا سونارمي وين مشاري ؟
سونارمي : مايعرف انا
ديمه : خلصيني بلا كلك زايد انتِ ماتعرفين ؟ اخاف صج تراج تعرفين حواء وعروقها
سونارمي : شنو هذا كلام ؟
ديمه : ناااااااااااااااااادي مشاري بسرعه
سونارمي : اففففففف زين
نادت مشاري وكان بغرفته
مشاري كان توه داخل غرفته وبدل ملابسه ولبس بجامته وصلى الظهر الا تدخل عليه سونارمي
سونارمي : بابا تلفون ديمه بنت بابا منصور
استغرب مشاري بس درى ان السالفه ضروريه لانه قالها بيدق يتطمن العشى
مشاري : حولي لي على غرفتي
سونارمي تفكر: جم رقم انت غرفه ؟
مشاري : سوناااااااااااارمي عن الاستهبااااااااااااااااااال بسرعه انزلي حولي الخط على غرفتي
وركضت سونارمي وحولت التلفون
مشاري : هلالالا ديمه خير شصار ؟
ديمه : لا طاحت ولا كسرت شي ولا صرخت ولا بجت ولا تكلمت !
مشاري : شنو ؟؟؟؟
ديمه : اللي سمعت
مشاري باستغراب: شلون يعني ؟ شلون شفتيها ؟
ديمه : شفتها ساكته وحاطه ايدها على خدها وسرحانه حتى الدمعه ماشفتها بعينها !!
مشاري بقهرررررر : وبعدييييييين مع هالبنت لي متى بتكتم ؟؟؟؟؟ والله ان هالكلام لو أي احد قاله لي بطنب بالصيااااااااح من شنو قلبها هالمخلوقه ليييييييش ماترحمني معاها شايل همهااااا والله ؟؟
ديمه : آآآآآآه الحين بتزيد همومها وبتسكت كالعاده بتنفجر والله اخاف يجي اليوم اللي تنفجر فيه ويصير فيها شي !
مشاري: الحين وينها ؟
ديمه : نامت
مشاري : نامت ! بكل برود ؟ لا والله مانامت بس تبيج تطلعين من الغرفه ... انا الكلام اللي قلته اخاف صج بتنام وبتنساه
ديمه : انا داقه عليك بعرف شاللي قلته ؟؟
مشاري : استخفيت بمنظرها وبشكلها وقلتلها عاجبج شكلج ؟ وجهج مشوه وبكرسي متحرك! وكلام يسم البدن صج
ديمه انصدمت : انت حقيرررررررر ماتستحي ليش تقولها هالكلام ؟ انت مافيك دم ماعندك خوات تجي تتطنز عليها ماتدري ان ربي بيعاقبك وبتشوفه بأعز الناس لك واقربهم .. في احد يتطنز على قضاء الله وقدره ؟ انت صاحي صاحي والا مجنون ؟ هذا كلام تقوله لها واهي توها طالعه تشوف الحياه من جديد ؟؟ مشااااري انت من صجك ؟
مشاري : شفتي هالخبه اللي سويتيها لي كنت منتظرها من انوار لكن للأسف ما سمعتها كنت ابيها تطلع كل اللي بقلبها بس صدمتيني يوم قلتي انها ساكته !؟ يعني كتمت تدرين هالشي شراح يسوي فيها ؟ بيذبحهــا !! والله بيذبحهـا
ديمه : والحــــل والله ان صار فيها شي ماراح اسامحك توها اليوم شحلوها وطلعنا وتمشينا وشافت رفيجاتها وضحكت واستانست والله ان صار شي ماراح اسامحك
مشاري : انتِ ماراح تسامحيني ؟ الا قولي انا اللي ماراح اسامح روحي .... امانه ديربالج عليها كل مابي اكحلها عميتها ! يلا مع السلامه اسمع ابوي وصل الله يعينا على الزف اللي بيجينا تامرين على شي ؟
ديمه : لا مشكور مع السلامه
صكت التلفون وقعدت تفكر بأنوار .. خلاص هالبنت ماترقعت ! لكن كل اللي سوته ديمه انها خلت انوار اليوم بسلام ولا دخلت عليها الغرفه تبي الوضع يهدي شوي .. على ثاني يوم راحت ديمه الكليه وردت على الساعه 2 العصر .. ودخلت على انوار الغرفه ولا لقتها واستغربت وانزلت الصاله ولا لقتها وراحت دورت امها ولا لقتها .. بالاخير قالتلها ميشو انهم بالحديقه ويوم راحت لهم استغربت من منظر امها
ديمه : يما شفيج ؟
ام محمد : تسأليني ؟ أسألي اختج ؟ اكلمها طول اليوم ماترد علي !
ديمه : ليش عاد ؟
ام محمد : مادري شفيها ؟ في احد قالها شي والا زعلها ؟
ديمه ارتبكت ماتقدر تقول مشاري السبب فا سكتت
ديمه : مادري
وانوار سرحانه وتطالع الزرع وتفكيرها ابعد مايكون من هالزرع !
ديمه قربت من اختها
ديمه : انوار حبيبتي شفيج ساكته ؟
انوار تطالعها بنفس النظره البليدة ووترجع نظرها مره ثانيه للزرع !
ديمه : لا هالوضع ما ينسكت عنه ! يما وين ابوي ؟ يمكن اذا كلمها بتنطق
ام محمد : كلمته قال من ارد من الدوام بقعد معاها ولالحين مارد بيرد بعد شوي
ديمه : انزين اسمعي اول مايجي خليه يغير ملابسه ويصلي ويتغدى واذا خلص خليه يقعد معاها ويكلمها
ام محمد : اهو خله يوصل اول
راحت ام محمد الصاله تنطر زوجها وبعد ماقعدوا البنات على انفراد
ديمه : انا ادري شسالفتج متهاوشه مع مشاري وقط عليج جم كلمه تسم البدن صح ؟
رفعت انوار نظرها من الزرع وحطته بعينين ينتظرون الاجابه بشغف لكن ردتهم خائبين اكتفت بشبح ابتسامه استهزاء ! وردت نظرها مره ثانيه للزرع ! وكأن على الزرع شيئ ٌ يـُقرأ ..!
ديمه : تكلميييي لا تقهريني قولي شفيج ؟ هزي راسج زين السبب مشاري ؟؟؟؟
لفت انوار راسها بتأفف وحركت كرسيها وراحت غرفتها وكأنها شمئزت من الاسم !
خلال نص ساعه دخل عليها ابوها غرفتها .. حاول يجر منها الكلام .. وطلع خايب مثل اللي سبقوه ..!

مر يوم ثاني .. وحاله انوار مبهمه على العايله الا على ديمه .. ومشاري كل مايدق ترد عليه الخدامه وتصرفه شسر تصريف الخدامات لخلق الله لا لحين مادري !!