بيركبون السياره بومحسن و محسن ومنصور ومشاري .. بيروحون المزرعه .. بناء على رغبة ابوهم .. وتوهم طالعين من البيت ..
محسن : يوووووه مشاري سيارتك سادة علي .. !
مشاري : مو مشكله بطلعها
محسن : لا خلاص نركب سيارتك ..
مشاري : اوكي وين المشكله
محسن : عطني سويجك
وعطا ابوه السويج وربكوا السياره جدام بومحسن ومحسن يسوق ورى منصور ومشاري ..
وحركوا ..
بومحسن : هالسيارة ماتصلح للبر .. لورايحين بسيارتك ابرك ..
محسن : عادي يبا احنا بنروح المزرعه والطريج كله قار ..
وبنص الطريج .. سكتوا وخلصت سوالفهم .. ومشاري .. ااقترح اقتراح بغى يندم عليه ..
مشاري : شفيكم سكتوا ..
بومحسن : محنا مكايين نتكلم
مشاري: انزين يبا شغل الرادو
محسن : اوكي
وشغل الرادو كان في برنامج سخيف .. ماعجبهم .. وصكه
مشاري : يبااااااا انزين شغل الاشرطه
محسن : وين اشرطتك ؟
مشاري : بالدرج اللي مساند ايدك عليه
محسن بطل الدرج وشاف عشر اشرطه تقريبا ..
وخذا شريط عشوائيا وشغله .. والطامه الكبرى اللي نشفت ريج مشاري شريطه !! عويشق ؟؟
وقعدوا يسمعون وساد الصمت .. مشاري الود وده يفتح الباب ويقط نفسه من الشارع .. ولايحط روحه بهالموقف .. ابوه وعمه وجده يكتشفون انه مغني !!
ابدا ابدا ابدا ماتوقع مشاري ان بيجي اليوم اللي ابوه بيسمع له ..!
الغريب ان ولا احد منهم علق .. كل واحد منهم تفكيره ماخذه بصوب .. والظاهر ماميزوا الصوت .. او ماسمعوا الشريط اصلا .. !!
بعد خمس دقايق ومشاري وجهه محتقن لونه ازرق .. كان عينه على ابوه .. وده ابوه جده عمه يطقونه يتكلمون يصارخون بس انهم يسكتون ماكان متوقع !
شوي وتأفف ابوه ..
محسن : شهالخياااااس ؟ سمرات وخرابيط انت متى بتعقل ؟
مشاري متصنم ..
بومحسن : مشاري يبا ماعندك اشرطه قران ؟
مشاري صوته بالكاد ينسمع : هاا لا يبا
محسن : مشاري تحذف كل هالاشرطه الخياس من سيارتك .. انت ماتدري انهم العن ماخلق ربي .. !
مشاري يبلع ريجه :أي ولايهمك بقطهم كلهم من اول مانوصل ..
بومحسن : بارك الله فيك ..
هالمرة ربي ستر عليه .. لان اول ماشغلوا الشريط كان دويتو بين عويشق ومطرب معروف .. فا ماسمعوا صوته .. ووهذا اللي خفف عليه التوتر شوي .. لوكملوا الشريط جان اهو اللحين بخبر كان ..
" يا الله .. الحين هالمطربين بنظر ابوي العن ماخلق ربي ؟ يعني انا منهم ؟؟ يعني هذي نظرة الكل لي ؟ شلون كنت خادع نفسي من زمان ؟ يالله مشكوووووورة يا انوارر صحيتيني من سبااااااااااتي العميــــــــــــق جميلج برقبتي والله ما انساه .. وانا جازيتها بطراق ؟ صج صج صج كنت عميااااااااااااان"
مشاري كان منتظر يوم الخميس بأحر من الجمر .. بيشوف انوار .. وبيقولها عن اخر التطورات .. ويعتذر لها مره ثانيه .. يبي يوريها ولد عمها بحله جديده .. انسان بعيد عن دنايا الدنيا وسخافاتها .. بنفس اليوم اللي رد فيه من المزرعه قطع علاقاته مع المنتجين والفنانين وسحب البومه قبل لا ينزل .. وقط كل اشرطه الاغاني من سيارته ومن غرفته ومن حياته كلها .. وبدلها باشرطه موعظه .. وقران .. حس بالفرق الشااااااسع بين هالشريطين .. شريط اغاني وشريط قران ؟.. الاغاني كلها حزن وفراق والم ومادري شنو تزيد هم الواحد وهو مو ناقص .. بدلها بكلام الله .. بالكتاب المحفوظ من الاف السنين .. ولقى سهوله عجيبه بهالشي لانه يدري انه هالشي صح .. ماحس انه واجه مشاكل .. وغير رقم تلفونه من المعجبات .. والفنانين .. و صار انسان ثاني .. انسان بأبسط وصف له خالي من عقد الدنيا .. انسان صافي ..
على يوم الجمعه العصر
انوار : هلا والله انفال شلونج ؟
انفال : مو زيييييينه تعبانه نفسيا
انوار : افا شفيج ؟
انفال : امسس سمرت عويشق
انوار : جذاااااااابه !!
انفال : كل المطربين كالعادة حضروا الا اهو ..
انوار ارتاااااحت : ليش ؟
انفال : قالوا انه خلاص اعتزل
انوار تظاهرت بالاسى : صج والله
انفال : ترى والله احس اني بموت
انوار: يلا عاد عن المصاخه تموتين عشان فنان ؟؟
انفال : ماتحسين فيني انتِ اااااه بس شقول والله متعلقه فييييييه احسه انسان حساااااااس مرهف المشااااااااعر شاعري رومااااااانسي
انوار تضحك من داخلها " هذا كله بمشاااااااااري !! اول مره ادري ؟؟ اخااااااااف صج بس !! "
انوار : انفالواااااا خلينا بالواقع تبجين وتموتين عشان فنان من صجج انتِ ؟ ترى هذول حثاااااااله المجتمع .. ماتوقعتج جذي ..
انفال : انا حسااااااسه انتِ ماتعرفيني يعني ؟
انوار : دامج صج حساسه فري على قنوات الاخبار وشوفي اللي يتذبحون كل يوم ماشوفج ذرفتي دمعه عليهم ؟ ولا متي عشانهم ؟ بس هذا اللي ذابحج الفن وهالخرابيط ؟؟
انفال :افففف صايره معقده تراج
انوار : أي اوكي كيفي معقده هذا كله عشاني تبجبجت معاج وقفت على الاطلال وابجي على رحيل عويييييييشق محبوب الجماهير ؟
انفال : صج ماعندج قلب !
انوار : بالعكس انتِ اللحين المفروض تستانسين .. الرجال تاب .. وعسى الله يغفر له .. تجين تبجين عشانه اعتزل ؟ صج ضاربه فيوزاتج !
انفال : انزين انوار امي تبيني اكلمج بعدين
انوار : اوكي
صكت انوار التلفون وكانت قاعده معاها ديمه
انوار: بتتهرب من الموضوع تعذرت وصكته
ديمه : يعني صج عويشق اعتزل ؟
انوار : قصدج ولد عمج المحترم ؟
ديمه : أي كلهم واحد
انوار : يقولون ماحضر سمرته امس !!
ديمه : انزين وليش مارحتي امس مع ابوي بيت عماني ؟
انوار : اففف مالي خلق شي ..
ديمه : اما غريب امرج ..!
انوار : ودي اروح المزرعه
ديمه : والله حتى انا .. خلينا نقول لابوي
انوار : سمعت ابوي بيروح اليوم .. مع جدي .. خلينا نروح معاهم
ديمه : ماعندي مانع قوليله
وراحت انوار ضبطت الروحه وطلعوا اهي وديمه وميشوو محمد مع ابوهم ووصلوا المزرعه ..
ديمه اول ماشافت جدها ركضت وتلوت عليه صارلها اسبوعين ماشافته .. وقعدوا سوالف مع جدهم وابوهم ..
ديمه : يلالا نبي نروح نلعب ..
انوار : يبا بعد عمري طلبتك طلب قول تمممممممممم
بومحمد : امممم اوكي تم
انوار : بعد جبددددددي والله
تقوم اتحب راس جدها
بومحمد : الحين انا اقول تم تحبين راس ابوي ؟
انوار : عادي اهو اقرب منك وبعدين كلكم واحد
بومحمد : أي رقعي المهم شبغيتي ؟
انوار : نبي نلعب بالقواري ..
بومحمد : بس ؟
انوار : أي
بومحمد : ياغالي والطلب رخيص
انوار : هالمره طلبيه للحبايب ..
تقوم وتحب راس ابوها ..
بومحمد : ههههههههه اوكي كسرتي راسي تبوس .. يلا روحوا واخذوا معاكم محمد
محمد : يبا ترى ماراح اخليهم يطلعون من المزرعه
بومحمد : أي اصلا مزرعتهم كبيره ماشاء الله شيطلعهم !
انوار تطالع محمد بحقد : اصلا من قالك احنا بنطلع ؟ بس فرض سلطات على الفاضي؟
وطلعوا كلهم وفجوا المخزن وطلعوا قواريهم ..
وركبوها .. وقعدوا يتمشوووون بالحديقه كلها .. وانصدموا يوم شافوا سيارة مشاري سافطه
انوار : هذا شمجيبه ؟
ديمه : لاتخافين شكله موموجود .. واذا موجود اكيد بحمام السباحه
انوار : اهااا يجوز ..
محمد : شرايكم نسوي سباق ؟
ديمه : وااااو وناسه
انوار : اوكي بس ميشو ماتدش معانا
ميشو : لا والله ؟؟ ليش عشان انتوا كباااااااار وانا دقيله ؟
انوار توهقت ورقعتها : لالالالالالا يالخبله عشان انتِ تصيرين الحكم ..
ميشوو : مافهمت
انوار : افففففف حموووووووود حمووووووود وصمخ تعال اشرح لها
وقعد حمود يشرح لها عن الحكم ويفسر لها واحد تشوفه ببايات سبيس تون وبالاخير افهمت
انوار : فهمتيييييييي؟
ميشووووو : ايييي عااااااادي .. يعني انا اقول منو الخسران .؟ ومنو الفايز
انوار : ايييييي الحمدلله وصلت المعلومه
ميشو تغمز لحمود
ديمه: حراكاتكم مكشوفه .. شوفوا .. عشان نكون عادلين هذا الطريج كله تراب .. هذا اللي نقدر نسوي فيه السباق لان كل المزرعه زرع ومحميات .. السور على يمينا .. والشجر على يسارنا .. من اول واحد فينا يعدي البوابه اهو الفايز ..
انوار : البوابه مو جنها بعيده ؟
ديمه : لازم تكون بعيده هذا سباق ..
انوار : اوكي يلا اركبوا ..
استعداد
1
2
3
انطلق
ديمه محمد انوار ..
بالترتيب .. ديمه باليمين محمد بالنص انوار على اليسار .. وكان واضح محمد سابقهم .. وديمه قاعده تسبق انوار ...
سمعوا صوت بقي برى السور .. ماانتبهوا .. انوار بقمت سرعتها واهي تعبر البوابه الا يدخل بقي مسرع ويشيل القاري باللي فيه ويحذفه بين الشجر .. حااااااادث قوي .. كان اللي داخل بالبقي واحد من الهنود .. اللي يشتغلون بالمزرعه الثانيه .. كان جاي مستعجل بيكلم الهندي .. وكان شايف محد عند البوابه ماكان يدري ان في قاري جاي بقمه سرعته !! .. الهندي ماصار فيه شي البقي كان كبير شكله انوار اهي اللي اختفت .. بكبرها مع القاري .. ما سمعوا الا صرختها .. ميشو وديمه ومحمد .. قعدوا يصرخون بقمه راسهم ..
محد منهم تحرك .. الهندي من الصدمه انحاش .. كلهم شافوا الحادث بعيونهم .. محمد طاح على ركبه .. ادرك ان انوار خلاص راحت من ايدهم .. ديمه ساكته .. رجولها مو قادره تساعدها تشوف اختها وين ؟ وشصار عليها .. الوحيده اللي تحركت اهي ميشوو .. راحت ركض لدوانيه .. دخلت
كان منصور وابوه ومشاري قاعدين مع بعض .. مشاري كان توه طالع من حمام السباحه .. وكان مستانس من درى ان عمه والبنات جايين .. لانه منقهر امس ماجت انوار البيت ..
ميشو تبجي : باااااااباااااااااا انوارررررر ماااااااااااتت
ثلاثتهم يطالعون بعض باستغراب او بالاحرى يستوعبون ..!
بومحسن قعد ومسك ميشو وفزوا مشاري وبومحمد ..
مشاري سبق بومحمد ..
وصل مشاري وشاف محمد قاعد على ركبه نفس وضعيته وديمه باخر المزرعه تمشي وحاطه ايدها على وجهها ..
مشاري يصرخ : وييييييييييين انوارررررررررر ؟؟؟؟؟
محمد أشر له
بومحمد يوم شاف ديمه انحاشت بعييييد .. ركض وراها .. ومشاري راح لانوار ..
مشاري دش بين الشجر .. وشاف القاري فوقها .. قلبه قطعه مو قادر يشوف المنظر .. وقوه الهيه ثبتته .. وشال القاري وقطه بعيد بعنااااء رهيب .. وشافها وصرررخ
مشاري : انواااااااااااار
......!

شنو بيصير لأنوار بتقوم بالسلامة لو شنو؟؟

بتعرفون في الجزء السابع عشر..

أختكم في الله