..:: الجزء الثامن :: ..
بعد ما وصل المترو العاصمه الايطالية روما .. بدى يمشي ويوقف كل خمس دقايق عشان ينقل الركاب للمناطق اللي يبونها .. مشعل كان مسجل اسم منطقة اهل ديمه .. بس قبل ما يوصلون المحطة الثانية سأل عنها بس ما كانت مثل الاسم المسجل .. فا لقى احسن شي انه يروح يسـأل الخدمة اللي بالمترو شاف ديمه قاعده وحاطه راسها على الدريشه ومغمضه عيونها ماحب يزعجها بيروح شوي وبيجي .. دقايق ووصلوا المحطه الثانيه قامت العجوز وسلمت على ديمه تودعها وشكرتها ديمة على وقفتها معاها واسألتها ان كانت هذي المحطه الثانيه ؟ قالتلها اي .. وراحت العجوز وانززلت ووقف المترو خمس دقايق ينزل ركاب ويحمل ركاب وديمه كانت بهالفتره مرتبكه وتدور على مشعل
" وين راح ؟ هو قالي بالمحطه الثانيه .. هذي المحطه الثانيه معقوله نزل ؟ شلون !!؟ انا المفروض ما اقعد اكثر يمكن نّزل الجناط قبلي ياربي المترو شوي وبيحرك لازم انزل اخاف يمشي فيني بروحي .. يارررررربي اففففففف شهالحـاله .. خلاص مالي دخل اهو قالي المحطه الثانيه يعني المحطة الثانيه .. شلون خلاني لحـالي خلاص بنزل وامري لله "
على نزلت ديمة من المترو وصل مشعل لمقعدهم القديم وشافه فاضي قعد قال يمكن راحت الحمام او راحت تجيبلها ماي والا شي شوي والتفت على اللي توهم نازلين من المترو واصدر المترو صوت انه الحين بيحرك ووالتفت على يساره وشاف قفص فوفو على مقعد الانتظار برى المترو وجنطتها الصغيره .. وانصدم يوم درى انها انزلت بس مالقاها عند الجنطة والقفص كانت واقفه عند الباب اللي ينزلون منه الركاب وعلامات توتر على وجهها فزّ مشعل من مكانه بسرعه والمترو حرك وهو يمشي بسرعه ويدوس على رجله اليسرى وهو مايحس فيها كان يمشي عكس المترو يبي ينزلهاااا اقل شي يكلمها بس للأسف هو شافها بس هي ما شافته .. لان المسافه كانت بعيده على ما يوصل الباب .. والمترو حرك وشافها تحط ايدها على وجهها واللي خلاه تأكد انها قاعده تبجي من القهر اللي فيه طق ايده بكل قوته على عامود الحديد ماحس بالالم فيها كثر ماحس بالالم اللي بقلبه " آه ليش نزلتي من المترو تتوقعين بنزل وبخليج !؟؟؟ "
ديمه بعد ما ادركت ان المترو خلاص مشى ومشعل اكيد راح معاه لانه مانزل .. مانزل ماشافت له اثر اكيد انه داخل ..
خلاص حست بقلبها طاح ببطنها من الخوف مو معقوله اللي يصير معاها المترو حرك خلاص وراح وراح مشعل معاه
" مشعل اللي كان بيوصلني لأهلي آآآه ليش يصير معاي جذي؟ الحين انا ضعت خلاص ؟ الحين مشعل مايدري ويني ولا انا ادري وينه بالضبط اكيد مع هالمترو اللي حرك انزين ليش يخليني ويروح حرام عليه جم مره اقوله انا اخاف متى بيستوعب؟؟؟"
وقعدت تلتفت وتطالع المكان كان موحش الطوف رماديه والسكك الحديدة سوداااا والساعه تقريبا على 2 ونص العصر .. راحوا الناس اللي نزلوا من المترو وجو ناس ينتظرون المترو يجي بعد خمس دقايق .. وهي قاعده بمكانها بيأس وتطالع الناس بجمود رجولها متسمره على الارض مو قادره تشيلهم وين بتروح ؟ يوم ضاعت بباريس الله سخر لها واحد يساعدها اما الحين منو بيساعدها ؟ تذكرت جنطتها الصغيره وقعدت تنبش فيها يمكن فيها رقم تلفون الفندق بباريس عشان تاخذ رقم الفندق حق روما وللأسف مالقت ولا رقم ولا شي مالقت الا كرت صغير بس حست بإحباط يوم قرته كان حق اول فندق سكنوه " فندق الكوبوي!" تذكرت ان ابوها بعد مو بفندقهم فرع روما خلاص راح فندق جديد و محد يعرفه الا مشعل انقهرت شنو يعني الحين شمصيرها ؟ تقعد هني لين يجي الليل ؟ المكان موحش مرت نص ساعه كامله ومشعل مو مبين قعدت تفكر اللحين "مشعل شعرفه اني بكون هني ؟ هو ماشافني يارب يجي لو بالحاسه السادسه بس المهم اوصل لأهلييييي حرام اللي يصير معاي شوي ويوقف قلبي ...مشعل الله يهداه جان قالي اسم المنطقة على الاقل او الفندق يمكن ادبر نفسي واروح لأهلي بس طول ماهو بالمترو ساكت هذا اللي خلاني اسكت ولا اتكلم خصوصا بعد هوشه امس !!" طلعها من تفكيرها صوت المترو اللي وصل قبل شوي وقاموا الركاب اللي يصعد واللي ينزل .. وديمه كانت واقفه بس بتشوف اذا مشعل نزل معاهم والا لا ؟ بعد مانزلوا كلهم حرك المترو اللي خلاها خلاص تفقد الامل ... "وينه مانزل ؟ انا كنت متأكده انه بينزل .. ليش مانزلت ليش تخليني عرضه للرايح والراد .." بلعت العبره اللي فيها وسكتت شافت ان قعدتها مالها أي فايدة .. كذا محطه وقفت بس مشعل ماكان معاهم .. شلت اغراضها جنطة صغيره مع فوفو .. وصعدت الدرج وشافت الشوارع والرايح والراد .. خذت نفس عميق وللي خلاها تنسى اللي صارلها المباني اللي شافتهم كان كل شي بروما يدل على حضارتها العريقه كان الهواء فيها طبيعي الورود مفتحه والزرع اخضر فاقع .. والسيارات مجكنمه على قد السايق .. والاعلاانات اللي ماليه الشوارع .. والتكاسي .. استانست على روما شكلها توّنس .. تذكرت كلام ابوها " روما ماتقل روعه من باريس "
" يبى وينك والله ماحسيت بروعه باريس ولا روما بدونكم .. الواحد بدون اهله مايسوى والله "
ديمه شافت اول كوفي بعد ماطلعت من المترو وقعدت فيه كانت القعدات برى
-----
مشعل من الجهه الثانيه كان مو قادر يقعد على الكرسي من الضيقه كانت جنطة ديمة الرياضيه معاه واول ما وصل المحطه الثالثه نزل فيها بس بهالمحطة طول فيها تقريبا نص ساعه كان يبي يرجع ودلوه انه لازم يصعد من الجهه الثانيه اتجاه عكسي وصعد ونطرّ لين وصل المترو وركب وقعد طبعا خمس دقايق يحمل ركاب .. واهو وده الساعه تركض ويوصل المحطه الثانيه .. " يارب اتكون بمكانها " لانها بتكون طامه كبرى ان مالقاها وين يودي وجهه من ابوها !!وهو اللي طاق الصدر ومتكفل فيها بغيابه
بعد ماوصل المترو .. صعد هو للجهه الثانيه .. وراح للمكان اللي نزلت منه هي بالضبط والكرسي اللي كان فيه فووفو .. بس ولخيبة الامل مالقاها اللي حس فيه حزتها ان وده يقعد بس مايقدر يوقف اكثر .. طول المترو وهو واقف على رجوله وخاصه ان رجله اليسرى اهملها وقعد يدوس عليها بعنف وهو يمشي بسرعه كان خايف عليها .. ديمه امانه عنده ولازم يوصلها لأهلها شلون تضيع منه ؟؟ قعد على الكرسي نفسه اللي كانت ديمه طول اليوم تنطره فيه وقعد هو اللحين ينطرها فيه .. حس انه توه بدى يحس باللألم اللي برجله اليسرى .. طول اليوم كان متجاهله كليـاً .. بس الألم اللي بقلبه اكبر .. شلون اللحين بيروح لأبوها ويقوله والله بنتك ضاعت روح دور عليها .. ومشعل ماعنده وقت اليوم المفروض يوصلها لأهلها ويرجع باريس اليوم اخر يوم لأجازته .. حس ان الدنيا قامت تصك بوجهه .. مافي شي اهم من ديمة بالنسبة له المهم انها تكون بخير .. لانه اخر مره شافها كانت حاطه ايدها على وجهها وتبجي .. " انا شفتها هني بهالمحطه وين بتكون راحت ؟ معقوله ؟؟ بتكون ركبت مع اول مترو وصل وكملت طريجها ؟؟ لالا شلون اصلا هي ماتدل .. اكيد بتنطرني عشان اوصلها .. لا اكيد انها اطلعت من المترو .. خلني اطلع واشوف يمكن القاها .. "
طلع مشعل من المترو .. وانصدم هو الثاني بروما .. وجمالها .. وقعد يمشي ناوي يفتش كل محل موجود يمكن بتكون فيه .. تمسك بأخر امل انها بتكون موجوده بهالشارع .. تذكر انها اكبر خوافه يعني لو شافت جلب هني او شي يخوفها شبتسوي ؟؟ وخصوصا مامعاها احد .. والله تموت من الخوف اعرفها انا ..
وهو يمشي الا جاه صوت صرخه صوت يعرفه وهالصوت بذات كان مشتاق يسمعه والتفت شافها ديمه قاعده بطاولة في الكوفي من برى ..
ديمه : مشعـــــــــل
مشعل بعد ماالتفت لها حس ان شي بقلبه طاح من مكانه ماصدق انه لقاها بهالسرعه
مشعـل : ديمه انتِ بخيرررر؟؟؟؟
ديـمه قعدت تبجي : حرام عليك تخليني وتروح اذا انت معصب علي لا تكلمني بس مو تروح وتخليني لحـالي مشعــ ـ ـ ل انا كنت بمــ ـ ـ وت من الخــ ـ ـووف
وحطت ايدها على وجهها وقعدت تبجي بحرارة
وين لقلب مثل مشعل يشوف اغلى انسانه ملكت قلبه تبجي قدامه بهالضعف ومو قادر يسوي شي ولا حتى يطبطب عليها المفروض هو الي يحسسها بالامان وهي اللحين ماقامت تحس بالامان قاعدة تبجي قدامة ويطالعها بنظرات تأنيب ضمير على اللي صارلها
مشعل: اناا انساج عشاني معصب عليج!! .............. اللحين هذا اللي فهمتيه كله ؟
ديمه : اجل ليش ليش خليتني ؟ وقلت لي احنا بالمحطه الثانيه وقصيت علي ورحت !!؟
مشعـل : ما قصيت عليج ديمه انا سألت قالوا لي اسم المنطقه مو بالمحطه الثانيه بالمحطه الخامسه وقبل لا اروح اسأل عشان اتأكد شفتج مغمضه عيونج خفت ازعجج قلت بروح شوي اسأل وارد رحت ورديت ماشفتج عبالي بتروحين شوي واتردين بس يوم شفتج واقفه عند باب الركاب وقعدت اركض ما تصورت انج تنزلين لان محد قالج انزلي ..
ديمه :انت انت قلت لاتنكر
مشعل : ادري بس حتى لو كانت محطتنا الثانيه بتنزلين بدوني ؟؟
ديمه : عبالي انك نّزلت الجناط وبترجع تناديني ..
مشعل : تقومين تنزلين ؟؟ تدرين اني ماروح مكان الا رجلي على رجلج
ديمه : وبعدين حركّ فيك المترو ؟؟
مشعل : حركّ فيني ونزلت المحطه اللي بعدها وبدلت بينهم وركبت الثاني ورديت وجاني احباط عمري ماحسيت فيه يوم ماشفتج على الكرسي ديمة انتِ امانه عندي يعني بتكونين تحت عيني لين اوصلج لأهلج .. يعني بدال هالساعه اللي ضعنا فيها المفروض انتِ عند اهلج وانا راد باريس
ديمه : قدر الله وما شاء فعل .. مستعجل على باريس شكلك تبي الفكه
مشعل طالعها بنظره حزن
مشعل : انا ابي الفكه ؟؟ ديمه ماتدرين انتِ شكثر غاليه علي وو..... بس شقول خيرا تعمل وشرا تلقى امشي امشي
ديمه حست بشعور غريب لمشعل .. خاصه يوم قالها ماتدرين شكثر انتِ غاليه علي ." صج يامشعل هالكلام ليتك تحس باللي بقلبي "انبها ضميرها حيل شافته يحط ايده على رجله المضروبه امس .. حست انه هو بعد تبهذل معاها .. يبي يوصلها لأهلها بأقرب وقت بس الظروف تصير ضدهم حست بنظرته حنان عمره ما حسته .. الا بعين امها وابوها .." ياه لي هالدرجه يخاف علي ؟ ويحاتيني" قطع تفكيرها يوم شافته قعد على الكرسي ويعابل برجله يمين يسار يبي يهدي الالم .. وكان باله مشغول
ديمه : مشعل فيك شي ؟
مشعل : لا مافيني شي
وقعد يطالعها وده يقول شي وبعدين تنهد وتكلم
مشعل : ديمه تعرفين اني امس يوم عصبت مادري انا شقلت فا مابيج تاخذين بخـاطرج ..
ديمه سكتت وطالعت رجوله
مشعل : يعني لالحين ماخذه بخاطرج ؟
ديمه : ولايهمك انسى
مشعل : ديمه عشاني لاتاخذين بخاطرج والله كنت معصب حتى ماتذكر الكلام اللي قلته
ديمه :ادري انك كنت تون من الالم ومع هذا تكابر .. بس انا ماتكلمت الا عشانك والله ومو ماخذه بخاطري ولا توقع اني بشيل على احد بخاطري وخاصه لي كان غالي ..
مشعل رغم الالم اللي يحس فيه برجله بس مع هذا رسم ابتسامه وسيعه على وجهه .. لين بينت غمازاته " آآه ياربي صج اللي سمعته ؟ يارب اكون بعلم" .. بس ماصحاه الا الالم اللي حس فيه
مشعل ماسك رجله : آآه
ديمه : مشعل الله يخليك اسمع كلامي خلنا نروح الطبيب الله يخليك
مشعل ماقدر يرد طلبها .. وخصوصا انه ماقدر يتحمل الالم بس قال
مشعل : لا اول بوديج لأهلج قبل لا تضيعين مره ثانيه
ديمه : والله ما راح اضيع بلصق فيك لين توديني اهلييييييي
مشعل : يعني شنو اللحين ؟
ديمه : مايبيلها كلام مستشفى
ركبوا تاكسي و راحوا لأقرب مستشفى ..
وصلوا المستشفى وديمه نزلت قبله وراحت نادت الممرض يجيب الويل جير .. وراحت صوب مشعل
مشعل : من قالج بركبه ؟
ديمه : لا تحرني تراك طول اليوم تركض برجلك ومعورها ارتا ح دقيقه بس
مشعل : ليش تفاولين علي انا مافيني الا الخير
ديمه : مشعل تدري انك عنيد .. اركب لو سمحت مابي كلام زايد
مشعل بداخله وده يضحك على تصرفاتها الغريبه .. بس ماقدر الا ينفذ اوامرها .. وجنها ثلج على صدره ..
مشعل : كانا ركبنا اوامر ثانيه ؟؟
ديمه اكتفت بابتسامه ولين وصلوا الدكتور حولهم على الاشعه وبعد ماخذوها راحو للدكتور وشاف الاشعه بتمعن .. وشاف انها رضــّه قويـه .. ومشعل اول ما جاته الضربه ما اخذ مهدأ ولا شي .. وكان يدوس عليها بعنف .. عطاه الدكتور مسكنات وطمنه انها مو كسر .. وقاله لازم يريح على الاقل يوم واحد يمدّ رجله .. ويرخيها .. ولايدوس عليها واجد .. ولا يستخدم أي كريمات لها مشعل كان يقول للدكتور أي أي وهو مناك مايبي يسوي اللي قاله عليه .. وراه نادي .. ولعب .. بس من الطفاقه الزايده تدخلت ديمه بالموضوع وقالت للدكتور انه لاعب كرة قدم .. والدكتور طالعه بغضب انه خش عنه امر مثل هذا وعطاه تقرير براحه من اللعب لمده يومين فقط ..
وبعد ماطلعوا من المسشفى
مشعل : كان لازم تقولين له اني لاعب ؟
ديمه : مشعل جاء الوقت اللي تنتبه فيه على صحتك
مشعل : شفتي شقالج رضه يعني انا متعود
ديمه : لالا يعني اذا رديت عندك يومين ماتلعب فيهم .. يعني يا استاذ اجازتك بتتمدد ..
مشعل : ومن قالج ابي اجازه ؟
ديمه : ماعتقد انسان سوي تجيله الاجازة ويرفضها
مشعل : يعني بالله عليج اقعد بالغرفه احكر نفسي بهالاجازة ؟ ليش والله لازم اريح !!
ديمه : يعني انت مفهوم الاجازه عندك هياته لا الناس التعبانه ترتاح
مشعل : ماعلينا المهم اخذيت مسكن للألم .. يلا ماتبين اتردين لأهلج ؟
ديمه : مييته واشوفهم والله اللحين شوقي لهم زاد اكثرمن يوم كنت بباريس
مشعل : يمكن عشانج تدرين انهم بهالديره ..
ديمه طالعت الساعه وشهقت
ديمه : الساعه 4
مشعل : ايي ذكرتيني بكلم ابوج اكيد يحاتينا لاننا تأخرنا
ديمه : اوكي
مشعل : بس بنمر كوفي اول بناكل شي
ديمه : اوكي اللي تشوفه
وهم يمشون بالشارع صوب الكوفي كلم مشعل بومحمد وقاله انهم ضيعوا المحطة وتأخروا شوي وتقريبا ساعه بالكثير وهم واصلين .. ماشاف انها حلوه يقوله ضيعت بنتك وقعدت ادور عليها.. ورحت المستشفى وهالكلام اختصره كله وقاله هالكلمتين ..
يتبع
.
.
تحياتي
رد مع اقتباس
المفضلات