اللهم صل على محمد وآل محمد وعجل فرجهم وفرجنا بهم ياكريم وألعن من آذى فاطمة ..
صباحكِ رحمة ...
مرحباً عفاف ...! كيف قلبك أخية !!
عسى أن تكوني بخير..!
محتواكِ حساس ــ خالج عواطفي ...
~خذي مروري السريع واعذريه ..!!
بنظري ،،هذي كلها مسألة مشاعر !
وقرب روحي قبل لايكون قرب نسب...!
فالفترة راح تكون متفاوتة بحسب القرب من جهة ..وبحسب عواطف الفاقد من جهة أخرى ...
فـ قدرات التحمل تختلف من شخص لآخر..
بعيد البلا عنا وعنكم والمؤمنين ..ممكن تلاقي ناس تقدر تأقلم نفسها وترجع طبيعية بعد فترة لاتناهز شيئ يذكر ..(هؤلاء يمسح الله على قلوبهم بالصبر) البعض لا..،، مااقدر أنفي عنه الصبر..!
بس عواطفه الفاقدة تتغلب على كل شيئ داخله !
ـــ حاجة ثانية
البعض يتأزم إذا الزواج تأجل أكثر من مرة ...ومثل مالكل عارف هالزمن كيف الشباب توه يأهل نفسه وبعدها يجي يكنسل الحجوزات عشان يحدد موعد جديد ويحجز ويدفع عربونات جديدة أيضاً...! مو الكل عنده استطاعة !
والبعض تلاقيه يتشائم من التأجيل ...ويسوي الزواج بسيط بس تهنئة خفيفة بالبيت ..>>حتى لو مر فترة طويلة جداً على الفقد !
ونفس الحكاية بالنسبة للبس السواد (ساعد الله قلوب الفاقدين وعلى رأسهم مولاتنا الزهراء وابنتها الحوراء وأم البنين صلوات ربي عليهم)
ناس ماتقدر تلبس الأسود كثير...نفسيتها تسوء أكثر منه..!
البعض حتى في محرم وصفر مايبقوا بالأسود واجد !
مايقدروا ! >>ومثل ماتعرفوا مافي أعظم من مصيبة عزيز الزهراء..!
وممكن وحدة تكون متزوجة وزوجها يستاء من الأسود ! فتضطر تغيره وبقلبها جمرة على فقيدها بس تغيره عشان لاتنكد على رجلها !
أو بمعنى أصح من باب إرضاء الزوج
يعني حلول طرف آخر ممكن يكون بتر أو احتمال يكون تسكين لبعض أحزان !
~
سمعت عن ناس من أحد البلاد (الله يستر عليهم ..)
متوفي لهم فقيد ربي يرحمه ، متوفي من زمن طويل..
وكلما راحوا لهم ناس يعزموهم ..
أهل الفقيد يقومو يطردوا هالزوار ويرفضوا العزومة بطريقة مااقدر اسميها غير (فظة)
ماأحد يعلم بقلوب الفاقدين غير الله..وكلنا فاقدين ـــ
وأني مااقدر ألومهم ..
بس في طرق أفضل ممكن نتعامل فيها ويا البشر...!
عشان لانجرح عواطفهم
ومثل ماقلوبنا مجروحة على فقيد ..
هم قلوبهم فرحانة عشان معاريسهم !
فإذا مو حابين نشارك الغير فرحتهم
ع الأقل نكتفي برفع دعاء..
واعتذار من الحضور للمحفل...!!
وببساطة !!!
عفاف
محتواكِ لامس وجداني
بل وكل شعور احتواني !
لاأفجع الله فؤادك بفقد حبيب..
ورحم الله موتانا وموتاكم والمؤمنين ..
وحفظ الله احبتكم أجمعين..
جعل أيامكم بهم عيداً ، وزاد بهم أفراحكم ..وأزال بهم أتراحكم..
بحق الميامين..
ربما أعود !
موفقة عفاف..
شكراً كثيراً غالية
بعين المولى الجليل
رد مع اقتباس
المفضلات