حقوق ... ‏باللهجه الحجازيه !!!

[موالية حيدر]

بسم الله الرحمن الرحيم

حقــــــــــــــــــــــــــــــوق المرأه


الدكتورة :ليلى صالح

‏باللهجه الحجازيه الجميلة

ما يرفع ضغطي شَي زَي كلمة حقوق المرأة .. وبالذات في السعودية .وهدي المشكلة طلعت متى؟

بعد 11 سبتمبر .... سبحان الله .. يعني كانوا من ألف وأربعمية سنه نايمين .. وفجأة كده صحيوا

وقالوا: وه ياندامة .. إيش هدا؟ أتْـرِنُّو إحنا لنا حقوق؟! مادام كده ...

الانتخابات البلدية ليه مانشارك فيها ؟ وليه ما نروح هناك ونرقع بالصوت؟

يا أختي حلال عليكم البلدية كلها .. يعني إيش تبغوا تسووا؟

تحطوا ضوابط إصدار الرخص لمحلات الحلاقة مثلا؟

والا تناقشوا سفلتة الشارع اللي يودي على بيت أم إبتسام؟

والا ليه الشارع الفلاني ما فيه كوفيرة مغربية وكل اللي فيه مصريات؟

يا أختي ريِّحي راسك . اذا كثير من الرجال ما سوُّوا حاجه ... بالله عليكِ حتسيبي بيتك وعيالك وشغلك ... عشان تناقشي مشروع انتخابي؟ هدا من تمام الفضاوة..

طيب قولوا الوحْدَه زواج أختها الليلة: بلاش تروحي للكوفيره اليوم يا مدام وتعالي نناقش حقوق المرأة أو نحضر المجلس البلدي و نتخذ قرارات مهمة .. وأترك لكم جوابها .. إيش يكون

أما عن حقوق المرأة في السعودية .. فيا سيدي الست هنا لها
حقوق وواجبات ما تتنازل عنها.

مثلا: في بلدان كثيرة عربية وأوروبية تلاقي شحط طويل عريض جالس في الباص ...وقدامه وحده في الشهر التاسع واقفه على رجولها وشايله طفل تاني على كتفها .... إن الشحط يتحرك؟ .. أبدا...

إن الثور يحس؟ .....لايمكن.

لكن هل يمكن يحصل هدا في السعودية ؟ أبدا ..

واللي يبغى يجرب.... الطريق قدامو .... يا عمي العملية كلها دلع حريم في دلع حريم ... رايح أعطيكم بعض الأمثلة وقولوا لي مين اللي آخِد حقُّوقه بالكامل وزياده؟

وهل عندنا المرأة متساوية مع الرجل .. والا هي أحسن مِنُّو؟

قال حقوق المرأة .. قال.

منظرعام

رجال محترمين زي الورد واقفين أمام صراف في بنك .. وتِجي أختنا في الله

(اللي يقولوا إنها مهضومة الحقوق)

تتقدم للصراف (ِatm)مباشرة ولا على بالها من الطراطير اللي واقفين
من ساعات ..

وبعضهم مستأذنين من عملهم. طيب ليه ما توقِّف تِمسك سِرا ورا عشرين بنغالي... وثلاثين باكستاني ... وخمسين سعودي... واثنين معاقبين معاهم شوية فواتير مقاس إكس لارج

.. وإذا أحد كلمها وقال لها اتفضلي يا أختي ترد عليه وتقول: لا، معليش. المرأة زَيّ الرجال

.... خليني في الطابور .... زَيِّي زيكم؟! .... ليش ما تقول كده؟! ... والا هي تماحيك وبَس !

ونفس المنظرفي الجوازات .... والأحوال ... والتأمينات .. ويقدرأحد... يقول إنه من ظهر أبوه .... يفتح فمُّه؟ ... على طول يسمع العبارة الشهيرة ... ( عيب عليك .... إنت ماتستحي؟ .. هذه حرمة...إنت ماعندك أهل ... )!ويضطرالراجل إنُّه ينكتم ويسكت .. بل إن المرأة تشفع للراجل جوزها عشان يتقدم على الرجال الباقين. في المطار .. مثلا .. ما تشوفهم يطلِّعوا العوايل أوَّل .. وبعدين بقية الركاب؟

قال حقوق المرأة ... هههه!

اقتصاديا

شوف الراجل.. السبع... الغضنفر.. المفتري...له ثوبين أوثلاثة في السنة .. يروح بها العمل، ويحضر بها عزايم وزواجات، ويقابل بها كبار المسؤولين، الخ، الخ ،الخ...

والمرأة بسلامتها .. بقيمة أدوات مكياجها فقط ...

تقدر تفتح محل خياطة رجالي محترم . ويا ريت تحط من مكياجها
في البيت.. لأ.

دا بَس للخروج ... وقيمة صباع روج وإلاعلبة بودرة تساوي قيمة جوال جوزها

.. وكمان ازيدك من الشعر قصر .. مو بيت .. من حقوقها فستان لكل فرح.
و مكياج. وكوفيرة..وجزمة..وشنطه. وكمان خُدواهدي .. سابع بنت عمي. ملكة أخت جارتنا . ولازم هدية. واللطخ يدفع .مو مهم الفلوس جات من فين .. المهم يدفع .. والدنيا ممكن تنقلب على الراجل واللي خَلَّفوه
علشان موضوع (مهم وحيوي زي كده )

قال إيه ! حقوق المرأة.

نفسيا

الزوج مطالب يكون أربعة وعشرين ساعة رومنسي ومبتسم ، ولايبقى جلف وإبن ستين في سبعين..

ويعني إيه عنده مشاكل في العمل ؟! والا أقساط متأخره؟! والافواتير؟! والامقاضي مايعرف كيف يجيبها ؟!

مو مهم ..واجب عليه إنه يرجع من العمل للبيت مروِّق ومبسوط وبَس ... كإنه كان في شرم الشيخ مصيف مع نانسي عجرم ..
((مجرد مثل .. تف .. بره وبعيد))....

والست بسلامتها من ساعة ما يرجع من عملو .. وقبل ما يفصخ حوايجو: شوف بزورتك (لاحظوا .. بزورتك) طفَّشوني .. إيش رأيك نغير غرفة النوم؟ التلفون ما فيه حراره ...

جاتني رساله على الجوال يقولوا الفاتوره طلعت .. أالحق سّدِّدو قبل ما يوقفوه عن الخدمه ... ... .. ... ومع هدا كُّلو ..لازم يبقى رومانسي.

بينما هي وبكل سهولة تصحى بسلامتها في الظُهر...وتجد الكارثة الكبرى....يوه ... ما عندنا صلصه ...وبكل رقة تتصل...ألو ألو ...أبو خالد موجود؟ ممكن أكلمه لو سمحت؟ ألو .. إيوه... أنا ..

حتكون مين يعني؟... المهم ... جيب معاك غدا ... ماهو إنت يا فالح نسيت تجيب صلصه معاك أمس.

ولأنه مو فاضي.. و قرفان من العمل.. يصدق المسكين إنه هو إللي نسي ويقول بكل شجاعة ..... طيب.

وفي رمضان : تعبت ....أوف .....إنت داري عن حاجه ؟
أنا أبغى خدامة... أنا خلااااااااص .. ومن ثالث يوم رمضان ....مقاضي العيدمن جده ...أختي جابت ملابس لها ولعيالها .. إيش أقولَّك بس ... وخُد مشاوير لليييييييييييل ... والراجل المسكين لما ينزل السوق مع مرته ما يقدر يشتري ولااااا شَي لنفسو، لأنوطول الوقت ماشي وراها من دكان لدكان،

وشايل زنابيل إلين ما كتفو يتخلع.
وهي تطالع فيه وهو يتطوَّح من ثقل الزنابيل .. ولا تقول لُو فزعه .. حتى لوبالكِدِب. وآخرتها بعد ما يرجع البيت تقول لو إنها لِسَّه ما اشترت ملابس العيد !!!!!! وإذا فكَّر ينزل السوق لحالو عشان يشتري شي لنفسو ... على طول يكون مشبوه .. إيش ينزلك لوحدك وسط الحريم؟ .. طيب إنت مو كنت معايا في السوق .. أحد قال لك لا تشتري؟

قال إيه؟ ... حقوق المرأة.

شرعا

المرأة لها حظ من أبوها .... وحظ من زوجها . هدا غيرأمها .. وأخوانها ... وأبناءها .. والراجل مطالب إنو هواللي يصرف عليها مهما كان عندها فلوس.

وثانيا : الرجال لازم يروحوا للمسجد خمس مرات في اليوم .. جمع وجماعات . حر وبرد .. ليل وصبح .. لازم يروحوا ... بينما الست تصلي تحت المكيف ... في غرفتها... وأجرها زي الرجال تماما .... ياعيني .. ياعيني ..والله الإسلام أعطاكم كتير .... وياريتو يِبان فيكم ***









من اختياري بريديا **

[موالية حيدر]

بسم الله الرحمن الرحيم


حقوق وحقوق ..
وتضيع الواجبات ...


معذرة أحبتي
ولا سيما طاقم الإشراف هنا
واخص دمعتي الغالية
وجدته مكررا ..
ولكن بعد فوات الأوان ...

http://www.alnassrah.com/threads/137...وق-المرأة..قال





قلت في نفسي ألحق أعتذر
قبل ما {{ دمعة }}
تنقله للمكرر ...

أرجو قبول اعتذاري
{{{ والعذر عند كرام الناس مقبول }}}

[دمعة على السطور]

أنا من تعتذر ياغالية ..

اعتذر اعتذر بقوة من قلبكِ المعطاء..

انتظر حرفكِ الأزهري..وشوقي يقودني..

موفقة غالية
دمتِ بعين الاله