منعاً للاحراج....!!

[دمعة على السطور]

مرحبا

ياهلا وغلا ومراحب فييك

والله وطرحش دا ياخيه جاي بالصميم

وشان على الناس ولقافتهم.. اللي اغلبهم عن حسن نيه فحدث ولا حرج

مع ان طبع فيني العكس تماما ولاحظت بعض صديقاتي يتضايقو من هالشي .. << ارضاء الناس غاية لا تدرك
يعني مثلا اسمع عن فلانه مريضه..
عافاش الله حدي
ما اسأل ويش مرضها بالضبط
صديقتي عدل عدل من زمان .. ولا دريت عن واحد من اخوتها انه من ذوي الأحتياجات الخاصه الا مؤخرا بالصدفه من صديقه ثانيه ولا سألت و لا ادري ويش نوع الأعاقه..
وحده انخطبت...
الف مبروك... حدي اعرف من عيال من ومن وين... وغالبا اذا ماقالت هي ما اسأل الا اذا مقربه مني عدل....
يووو اشيائات وايد كل احس نفسي مالي شغل و لا هو ضروري بالحياه اتلقف واعرف...

ياعلي ذكرتيني بموقف ...على اساس اني مااحب اسأل واجد...وموضوع الخطوبة ..

هذي وحدة من الأهل لما انخطبت بس درينا انها انخطبت حدنا باركنا لها وفرحناااااااا من قلببببب..بس رجعنا البيت قلنا لأمي..إلا أمي تفاجئت وهي مستانسة تقول انخطبت لمن.....قلنا ماندري اماه

تقول يووو هذي من اهلكم وقريبة لكم بقووة ولاتسألوا لا..!! قلنا اللي بيقول دحنا نسمعه ولا مانسأل

مع ان المفروض الموضوع عادي لو سألنا على الأقل من باب اظهار الاهتمام بالشخص ..وكونها مُقربة جداً فما راح يسبب احراج ...
بس ماادري كيف.... طبيعة يمكن..!! >> مو معنى هذا ان احنا نسوي نفسنا مثاليين ومانتليقف يعني..نتليقف بس بحدود بعد.........


وعلى النقيض..
انذبح بالأسئله
ولا عاد فترة اللي انفصلت فيها من الكليه على شان المعدل... من سنتين
واللي رجعت اعيشها حاليا ...p:
الى يومش هذا والسائل يسأل
عاد قريب مني لو بعيد
يوووو
لويه عاد
ويش مسويه

واذا شافو شي عجبهم مني
ويش دراستش
ثانويه عامه بس
يوووو
والله حرام
كيف ونسبتش عاليه
ووووو

عاد هالكلام يجي بشكل مواساه منهم..
بس في الواقع غالبا يألمني من الداخل

أكيد راح يأثر حتى لو ماأظهرتي ألمك ...ويمكن البعض يشوف ملامحك طبيعية فيفتكر إن ماأثر بقلبك الكلام ..ويقوم يزيد ويزيد ويطينها بعد...والقلب مايدري به غير رب العالمين...

وموقفي ساعتها
ابتسامه
والله عالظالم
ويغير الحال ...!!



الله يسلمش موقف من المواقف اللي ما انساها ..
مره كنت اقدم دورة فتوشوب لمجموعة بنات
من بينهم كانت وحده كبيره متزوجه وعندها احفاد ما شالله عليها
وكنت احترمها و اقدر عمرها
مع انها كانت سليطة لسان وهداره وغالبا تقطع الشرح في سوالف ماليها داعي
:) اني فيني شي في قدمي تحديدا في احد الأصابع..مرتفع شوي عن اخوانه... فيصير اذا لبست صندل يبين عدل
ما اعتبره عاهه ابدا .. الله سبحانه اختارني له
وما احاول اخفيه ابدا.. احسه شي مميز اذا قعدت اتأمل فيه..
بس اسلوب هالمرأه لما قطعت الشرح و بصوت عالي قدام البنات
يوووووو ...... لويش كذا .. ويش فيه صبعش .... وصارت تضحك

قوية ...تضحك بعد..!!

والبنات كلهم تركو الدرس والتفتو لرجولي
حسيت بأحراج مو طبيعي
ابتسمت وكعادتي اطلقت نكته من باب مداراة الأحراج:::
ويش اسوي ياخيه.. طالع يتنفس ..


عاد بدت سيل الأسئله..
طايح عليه شي؟
من لما كنتي صغيره؟
وراثه؟
مايضايقش اذا جيتي تشتري نعال ؟
ووو

اني عاد اكتفيت بأجابه وحده
:) وراثه ولا اعتراض على كتبة الله...


جميل إن الانسان يقدر يتحكم بأحاسيسه ويداريها ...


وردة فعلك كانت جداً سلسة ....

بس مشكلة الناس تشوف الظاهر وتزيد الطين بلّة ..!!

ومشكلتنا إن مو في كل الأوقات نفسيتنا تستقبل هالكم من الاسألة هذي كلها...

يعني لو ظلينا سنين نداركها لازم يجي يوم يفيض بنا ...!!

اني صراحة كنت اتضايق ويبان علي... بس الحين تأقلمت ويمكن حاولت اغير من نفسي ..
وماقمت أظهر ضيقة من كثرة الاسألة بس بداخلي أُحرج
ويمكن انجرح بعد وهم ولاداريين




تسلمي خيه عالطرح
الفضفضاوي

افا عليش مصيبه اذا اميروه ماتعرف يعني ويه كلمة مغاور p:


زين أجل >>

دمتي بخير
وبحفظ الرحمن

أميرة ياغناتي انتي...

ماتدري قد ويش انبسطت من وجودك بهالصفحة ومشاركتك لي ...


شكري لاتحده الكلمات..


ودعائي يوازي السُحب .........ليصل إلى السماء..


موفقة مقضية حوائجكِ مُيسرة مطالبكِ بحق نور الأنوار وآله الزواكي..

دمتِ بعين المولى الجليل