منعاً للاحراج....!!

[دمعة على السطور]

بسم الله الرحمن الرحيم

اللهم صل على محمد وآل محمد وعجل فرجهم وفرجنا بهم ياكريم وألعن من آذى فاطمة

السلام عليكم ورحمة الله وبركاته

صباحكم مساءكم طاعة ثم رضا

صباحك حنيني يانقاش > ادري قديمة بقوة . مشتاقة للنقاش من زمان
وان شاء الله نعووضه بجزء من نشاطنا فيه..

الموضوع عبارة عن مواقف .... من خيالي الخاص ... لابد أن يكون لها جذر واقع من هذه الحياة.

تجنّب كثرة السؤال..منعاً للاحراج.

الموقف الأول..

علي شاب يحب يشارك في المنتديات...

ويكتب خواطر.ويعبر عن شعوره بأي شكل من الأشكال.....ممكن هالخواطر من وحيه أو ممكن من واقع يعيشه ..على اي حال

علي عضويته معروفة بالنسبة للشباب اصحابه..

وفي واحد من الشباب كلما شافه وقدام الجماعة كلهم ...

هااا أبو الشباب .. البارحة اشوف لك مشاركة كذا وكذا ....وأول بارحة مشاركتك حزييينة مرررة شا ويش صاااير..واللي قبلها كلها شوووق وحب وهيام..

شاااا تحب... ويغمز له..اعترف من هي....!!>>

اي اي ولاحظت بعد ان في استلطاف بينك وبين العضووووة الفلانية!! ليكووون هي.!! لالا لاتقووول >> وهو اصلاً مافي شي من هالقبيل....

و و و و و ..والاسألة ماتنتهي بل تزيد من جميع الحضووور.....وكأنهم مخلينه مُستهدف ولا مسويين حضرتهم تحقيق....!!

ولا يترركوا له مجال الاجابة .....كلما جى بيتكلم قام واحد ونسج قصة خياليه على اساس مزح ولاينتبهوا ان الشخص مُحرج ..

علي يخلص نفسه ويكتفي بضحكة وبس .!!! >>له حق مسكين ماعرف ويش يقووول خبصووه خبااااص

الموقف الثاني

زينب تعاني من حساسية في جلدها....!!

تظهر في مناطق معينة في جسمها.....وتكون ظاهرة للناظر....

فاطمة وحدة من البنات وياها ...تنتبه لها وهم وسط مجموعة بنات ..

فاطمة : ياعلييييييييي زينبووو وش فييييش ..!! وتأشر على مكان الببقع في صاحبتها...

زينب ومبين عليها الاحراج .وبعد ابتسامة مصحوبة بالخجل : حساسية ...

فاطمة: ياعليييييييي يادافع البلى صاير كنه حرررق ..

زينب زاد الاحراج شوي وتصيح...

فاطمة : ومن متى عندش..

زينب متغبنة كونها وسط البنات : من زمااان بس تخف وترجع..

فاطمة : ليش ماتتعالجي عنها.!!

زينب : الا ارووح المستوصف ويعطوني مراهم...وأدوية

فاطمة ومن تعاطفها وتفاعلها وضيقتها على صاحبتها بس مالاحظت ان كثرة الاسألة وسط هالناس ممكن تحرجها :

المستوصف عااااااااد وش بيسوووا وويش هالمراااهم اللي يعطوووش وياهااا ...

روحي مستشفى خاااص على الأقل يعطوش شي معتبر..ويشوفوا لش وشووو هذا ...

يمكن مو حساسية

الموقف الثالث

هند ..شابة متزوجة من سنتين

لم يرزقها الله بذرية .تعيش مع زوجها بسعادة ...لايعرقل صفوا هذه السعادة سوى كلام الناس..وكثرة سؤالهم ...!!

وإن كانا يتوقان لسماع صوت طفل يُحرك عواطف الأبوة بدواخلهما....بس هم مرتاحين وحامدين الرب على نعمته..ومتأملين خير..... بس الناس ماترحم ....

ومن أحد المواقف..هند في عزومة مع صديقات حماتها...اللي اجتمعت معهم ولأول مرة

بدأت السوالف سالفة تجر سالفة ...

حد ماسألوها...!!

وحدة تقول ..: من متى متزوجة انتين!!

هند : من سنتين

والثانية تتبعها..! وين اولادش..

هند : للحين ماالله رزقناا..

تكمل الثالثة .:ومنش ولا منه

هند بابتسامة : مافينا شي بس ماالله كتب......

الرابعة تتدارك الموقف شوووي..اي الله يرزقكم ان شاء الله..

الموقف الرابع..

زهرة ..فتاة توها مخطوبة

راحت زواج والتقت ببعض معارفها

ودروا عن خطوبتها

قاموا يصلوا على محمد وآل محمد وهذا من مظاهر الفرح عندنا ..هي انبسطت انهم فرحوا لها اكيد..

قامت وحدة تسأل ..

من الديرة ..!... ود من !! ويش يشتغل....!! كم راتبه...إذا رحنا لش نبغى نشوووف صورته>وش دخلهم بصورة الرجااال وهم مو من الأهل ولا الصديقات ..
شريتوا الشبكة والدبلة ..!!

واذا طلعت شرتها..يسألوها بكم !!! الحين مرة الذهب غالييييييييي ....

زهرة ماتتحمل كثرة الاسألة ..طالعتها باستغراب وغاورت >>غاورت ماادري تعرفوها ولا لا.....بمعنى سوت نفسها ماسمعت سمعت البعض يقول غوملت ..>عن الهدرة

يعني في اسألة معقولة وفي اسألة

هذي قطرة من المواقف المؤذية لقلوب البشر....اي مؤذية ..

حتى لو النية حسنة بس كثرة الاسألة مي زينة ...وممكن تتسبب في احراج الناس وانت مو داري...

خصوصاً لو كانت وسط جماعة ...!! حتى بكتاب الله مكتوب عن تجنب كثرة السؤال بغض النظر عن تفسير الآية الكريمة وتأويلها

(لاتسألوا عن أشياء إن تُبدَ لكم تسؤكم)

مو القصد إن المفروض الواحد مايسأل...الا عادي مافيها شي...بس لاأكثر الاسألة ...ولازم اختار السؤال المناسب....والطريقة المناسبة لطرحه..

ولابد اراعي انه مايكون قدام مجموعة كبيرة لأن الاحراج راح يكون مُضاعف...

وفرضاً هالفئة من الناس ماشكلت لها الاسألة احراج كبير..وأخذوا كل شي ببساطة وبرحابة صدر..لازم نحط باعتبارنا ان البشر مو بطبيعة وحدة ناس تتأثر ويظهر عليها ناس تخبي مشاعرها وألمها وناس وناس وناس...

وممكن تلاقي ناس إذا احرجتهم حتى لو مو قاصد..لازم يردوها لك وهذي ردة فعل طبيعية بالنسبة لهم بحسب شخصيتهم..

أو ممكن تسمع لك كلمة تخليك تسد حلقك سنة من الفشلة .....مثلاً يقولوا لك وش دخلك...!! شي مايخصك...عن اللقافة الزايدة هذا أقل شي بالنسبة لهم >>

وفي ناس العكس حتى لوما بتجاوب ..بس ترد بطريقة لبقة .......وانت وحظك يالفضولي...

وإذا لاحظتوا في كل موقف تقريباً .حاولت تكون ردة الفعل مختلفة عن الثاني

تكلمت واااجد موو..!! اترك لكم المجال الحين .!!

انتوا وش رايكم.!!! .كيف الواحد يتصرف في مثل هالمواقف..وكيف يتداركها!!

وهل مرّت عليكم مواقف محرجة..وهل عانيتوا من كثرة الاسألة !!

اتمنى أكون وفقت في فكرة الطرح وأسلوبه
دعائي لكل من يفتح لمتصفحي أبواب

بقلم دمعة على السطور