ماعرفتوني .. كثر .. ما عرفني ..

يالله امووووروه لازم تشوقينا كفاريات
مايصير جدي
بس اقول زودي هـ الغيره اللي في رائد
تسلمي حبيبتي
يعطيكِ ربي الف عافيه
تحياتي
ضحكوه البطه

واااو
كل حلقة تزيد حلاوة القصة
مشكوورة امووورة
ع التكمله
وياارب يهدي كمبيوتركم ولا يخترب الحين ولا يخرف
ويحفظه من كل شر وفايروس
ههههههههههه

انتظر التكملهـ..

اي والله لاتتاخري علينا واجد<<<<شوقتني الحلقه
وانشاء الله يصطلح الانترنت عشان تنزلي بقية الحلقات

يسلمووووو جميع ياهلا فيكم... منورين ويا حلو هالتواجد اسعدني..
كان حلم ... الروعه التواجد الجميل تسلم عليه اخوي
اهات عاشقه .. الله يعافيش حبابه ... وتسلمي
ضحووك .. هههههه كنش تقري افكاري يالبطه ... منوره يالغلا
بشوور.. الحلا وجودش حبيبتي لا تحرمينا هالطلات وحلو هالدعوات ..
الحالمه... منوره .. وتسلمي هههه .. ان شالله يسمع منش

تفضلوا الجديد

ونزلته فارس.. ابتسم في وجه عبدالله وشكره.. ودار بيدخل الزرنوق..
الا عبدالله فاتح النافذه اللي جهة رائد " رائد كان قاعد قدام "
ونادى على فارس..
ــ نعم ..
ــ الله ينعم عليك.. الأسبوع الجاي بتبسط؟؟؟
فارس انرسم الحزن على وجهه ..
ــ ما ادري عقب هالهوشه .. ما يندرى ويش ناوي ابو مصيبة من نية..؟؟
ــ ما عليك منه .. كل اسبوع بسط وانا بكون موجود .. يولي .. ليش السوق سوق ابوه وحنا ما ندري..
ــ ههههههه .. شكرا.. تسلم
ــ عفوا.. ما سوينا الا الواجب

رائد ساااكت... ومقهور ويغلي غلي .. خاطره يسكر النافذه على فارس اللي متكي عليها وهو يكلم عبدالله. ويخنقه ...
وده يصررررخ .. هييييييييه ويش عندك .. فارق ..
بس مو عارف لأنه عبدالله هو اللي يكلمه.. و هو اللي في البدايه ناداه..
<<< صاير من القهر مثل صفرية حاميه وفيها ذرة " فوشار" وعروقة من القهر تطق طق ..

ومشا عبدالله عن فارس ... بطريقهم لبيت عبدالله بيمروا على ابوه .. عشان العزومه .. ورائد طول الوقت ساكت.. عبدالله حس عليه انه في شي مضايقنه ..

ـــ كح.. احم .. اا.. في ناس طول الطريق ساكتين .. ما دريتوا ويش فيهم..
رائد تكتف ونظر لعبدالله على جنب .. وما رد ..
عبدالله ما عجبته الحركه ..
ــ بعــــــــــــــــــــــد... عاطني طنااش... عدال يا مطنش.. لويش ... خير ويش فيك..؟؟
رائد ولع .. حمق ... خلاص شبت في قلبه حراايق .. ويلتفت على عبدالله بسرعه ويصرخ..
ــ انا .. انا .. المطنش .. والا انت ؟؟
ــ هاا.. انا ؟؟؟
ــ ايه انت .. اسأل روحك.. من شفت هالفارس .. الله بالخير... ما كني وياك بالدنيا .. مره عاد انا المهتم ..
ــ ؟؟!!|||!!؟؟؟؟؟ <<< نظراات عبدالله تشرح هذا الواقع ...
ــ لا تطالعني كذا ..
ــ ما دامك منت مهتم .. لويش تصارخ الحين .. وتعاتب؟؟
ــ هاا ... <<< انربط لسان رائد... ولا شي .. كذا ابغى اتشابق فيها شي ..
ــ ههههههههه يا حليلك بس... ويش فيك بلا نحاسه .. ..
رائد ساكتت
ــ زعيمووه ... زعيموووه .. لك بطل دلع ولااا...
رائد صمت .. لا تعليق...
عبدالله حمق .. وسكت عنه ... ووصلوا بيت عبدالله.. وطلع ابو عبدالله .. رائد نزل وركب ورا.. عشان ابو عبدالله يركب قدام...

ثواني وصلوا بيت فاضل.. نزلوا... رائد عناااد في عبدالله نزل وما سكر الباب ...
عبدالله جته الضحكه على حركه المجاكر هذي تبع رائد... وفي باله:
ــ بطووول بالي عليك يا سيد رائد باشووف ويش اخرتها معاك...
دخلوا المجلس... وقعدوا شوي زين.. وحطوا الغدا,,, عبدالله توقع رائد يجي يجلس جنبه على السفرة.. بس رائد عناد جلس جنب ابوه..
رائد مره مقهووور وده يصيد فارس ويطيح فيه بدست خرب عليه هالمفاجأه..
عبدالله يضرب فكر..
ــ ويش فيه هذا زعلان... مو معقولة عشان فارس..؟؟
فاضل مستغرب ردة الفعل من رائد.. قال يمكن قدامي عادي ...يسوي حاله مو مهتم بعبدالله... الكل ياكل وحاط في باله احد ويضرب فكر عليه ...مستغرب منه..
لين قطع الصمت سؤال من فاضل لعبدالله:
ــ هاا ابو عابد .. تدرس .. تشتغل .. والا ويش؟؟؟
ــ لا والله متخرج من الثانوية .. والنسبة طايحه ياخووك.. وصار لي 3 سنين اهايت واداور بملفي من محل لمحل...
ــ اهاا.. الله يعينك...
ــ الله المعين..
فاضل .. دخل قلبه هالعبدالله.. وحاب يساعده .. صار يضرب فكر .. وجا على باله خوية رضا.. ليش ما يسأله يمكن يلاقي عنده وظيفه لعبدالله...

خلص رائد غدى بسرعه..
ــ الحمدلله...
ــ وين يا ولدي .. ما اكلت شي...
ــ شبعت الحمدلله..
عبدالله وبإبتسامه..
ــ يسوي رجيم
رائد ما رد على عبدالله .. عطاه طناش كالمعتاد وراح يغسل ايده...
عبدالله لااا وصلت معااه حدها... اول مره احد يسوي له هالحركات ولا يرد عليه ولا يتصرف هو معاه. صارت كلمة _ لويش _ تلعب في راسه :.
لويش. ما عرفت اتصرف .؟؟؟. لويش ما رديت عليه بقساوة يوم يطنشني .؟؟؟.لويش لو احد غير رائد كان لاقى له اقل شي زجره والا خزره مني ... عجيب يا رائد امرك... قاعد تلعب بأعصابي ؟؟

خلصوا غدى .. جلسوا يسولفوا.. عبدالله قعد جنب رائد اللي عاطنه طناااش عنيييف .. شوي قام رائد..
عبدالله :
ــ على وين ؟؟ وين رايح؟؟
رائد ما حب يطنش هالمره ...
ــ بطلع الحووش ... لويش ويش عندك...
ــ لااا.. بس سلامتك..
فاضل مو مستغرب سوالف ولده وطولة لسانه... قام يقول لعبدالله
ــ ههههه طول بالك يا خوي اقشر هالولد ما ادري على مين طالع
ــ ههههه لا عادي انا قيل له يطيح وياي الميانه..
ــ ايه الله لا يحرمكم من بعض ..ويخليكم ..
ــ تسلم,,

طلع رائد الحووش .. يحس وده يصرخ .. يتشااابق ...
ــ اااااااه يلعن يومك يا فاارس خربت علي يومي ...
عبدالله استأذن من فاضل وابوه.. ولحق رائد بدون ما يحس عليه ...
لقاه قاعد على درجه في الحوش .. جنب زراعه ..شجرة ليمون صغيرونه ونخلتين.. وريحان ريحته معبيه المكان... وقاعد رائد يحوس بالرمل بعصايه ويحفر فيه شوي... الا بسم الله.. صرصور صغير طلع. من بعد الحفر والنبش ..

ومفاجأه لعبدالله خلت حواجبة من الدهشه يرتعشوا ويرقصوا ... يوم شاف ردة فعل رائد...
ــ اااااااه .. ويع ويع ..
والصرصور يطير ويقعد على البلاط برى الرمل
وراائد مره .. مرعووب .. ولايعه كبده ...وموخر بعيد..

عبدالله مبتسم ابتسامه جانبيه .. وحواجبه بعدها على حالها .. مستغرررب ...
ــ لاااا.. رائد اللي يخوف بلد .. ونحاسته ما تنوصف .. يخااف .. ومن ويش .. صرصوووور...
لا شعوري كذا مسك عبدالله نعاله وطااااخ .. ويترصع الصرصوور على الأرض وراائد يسوي صوت اكشن خلفيه لعملية الإعدااام
ــ اااااااااااااااااه .. وييييييييع .. وويع .. وع وع وعععععع...
وتصير اجنحة الصرصوور المسكين وقرون استشعاره ترتعش .. بشوي شوي لين قضى نحبة...
ويتبع رائد هاللوعه بضحكه من قلب ... تتقطع فيها جملة ..:
ــ كيف اشتهيت ...كيف قدرت....
عبدالله مهو قادر على شكل رائد المرعوب واللي فجأه قام يهستر ضحك
وقام يضحك ويضحك معاه ... ويوم درى برعب رائد .. حب يزودها شوي .. طلع من مخباه "نشافه""منديل" ومسك الصرصور من قرن استشعاره .. وقربه من رائد.. وهو يخوف فيه ..
ــ وعععع .. اوووووووووه ... احطه على راسك
ــ لاااا.. ويع .. ااه..
ويصير رائد يراكض بالحوش .. وعبدالله وراه بذاك الصرصور المنتهي ..
بالنهاية وقف عبدالله ركيض تعب ,, وصار ينافخ وهو يضحك .. رمى الصرصوور على جنب في الرمل :
ــ هااا .. هدية للنملات ... خووش ذبيحه ... تعال خلاص رميته...
رائد مو قادر .. فيه ضحكه على رعب على مفتشل ... عبدالله اكتشف نقطة ضعفه ..
عبدالله :
ــ صرصووووووووور .. يــــــــــارااااائد .. افا بس افا ...
ــ خخ .. يللا عاد ... ويييع ما احبهم
ــ يعني انا اللي اموت فيهم ... بس رجال ما يخاف من صرصور .. اجل الوزغه ويش تسوي ..
ــ لااا .. الورغه اذبحها .. عادي ...
ــ ههههههههه عجيب .. شمعنى صرصور ...
ــ لااا ما ادري بس اداينه تخوفني ..
ــ اداينه ؟؟!!
ــ ايه .. خخ الخيوط اللي براسه وهم يتحركوا ,,, واذا يطير يخوف بعد ازيد
ــ هههههههههههههههههههه قصدك قرون استشعاره ,,,
ــ ههههههههههه ما ادري اللي مثل رقم سبعه على راسه ..
ـــ ههههههههههههههه رائدوووه خلاص خلاص تكفى متت ضحك... مانى قادر
ــ هههههههه ويش اسوي لك بعد .. لا تتمسخر علي هاا..
ــ هههههههه .. كح كح .. صرصووور ..هههههههههه
ــ لااااا .. مانا مانا ...
ــ خلاص .. هههههه بس ان طنشني والا زعلت علي لوريك .. باجمع شلة صراصير .. للضروره ..
ــ ههههههه ...

وشوي هدئوا... تنهد عبدالله ..
ــ ااه ضحكتني ...
والتفت لرائد اللي شكله مره فيه شي مضايقنه...
ــ رائد .. ويش فيك...؟؟
ــ مافيني شي ...
ــ الا فيك .. من بعد الشبقة بسوق الخميس وانت منت على بعضك..
لايكون بس ايدك عورتك.. والا الجبيرة صابها شي...
ــ لاااا
ــ متأكد ..اشوفك طحت بيدك اليسار شدخ في ابو مصيبة بالمغطس ههههههههه
عسى ما صابتك ضربة بس ...
ــ لاااا
ــ ويش فيك انت .. كله لاااا .. ولاااا.. جاوبني عدل ..
ـــ لااااا
عبدالله ولع ناار ..
ــ راائدووه ووجع ...
رائد عيوونه صارت حمرا و فجر كل اللي بقلبه...
ــ اسأل عمرك .. من شفت هالفارس وانت منت وياي .. ولا كنك تشوفني .. وطول الوقت مهتم فيه .. ومطنشني ... ولا داق لي خبر...كني مو معاكم بالسياره ,,, ايه شفته كبير .. وشكله شاطر..ويسولف سوالف تعجبك...و صرت انا ما اهمك...

عبدالله مو مستوعب الكلام... يبغى يدخله في راسه.. وصار يهلوس في باله :
ــ رائد ابو 9 سنين ... يتكلم كذا ... ولا يغار ما يبغاني اهتم بأحد غيره .. ياترى ويش انا بالنسبة لك يا رائد.. يالله .. لهذي الدرجه...!!!!
وقطع حبل الهلوسه رائد وهو يقول بتعنيف...
ــ اذا كاسر خاطرك مره .. روح بيع وياه بالسوق .. وخله اخوك بدالي ...

عبدالله انقهر من كلام رائد.. بس حب ياخذه على قد عقله رغم فصاحة لسانه..

ــ شوف يا رائد.. الدنيا عندك .. غير عندي... وغير عند فارس... انت عمرك 9 سنوات.. والحمدلله عايش بخير ونعمه يارب تحفظها من الزوال وفي حضن امك وابوك الله يخليك ليهم ويخليهم لك .. انا عمري 22 سنه.. عايش والحمدلله عيشة مستوره بس عطالي بطالي اراكض ورا الرزق... صحيح امي ماتت يوم كنت صغير .. بس الله عوضني بأبوي كان حنون علي وما قصر...
تعال لفارس... عمره 12 سنه... لسا صغير .. ام ما عنده .. ابو مهو حوله ... حالته حالة... شفته ويش يبيع .. خبز تاوة في السوق... الله رحم حالة بجدته... بذمتك يا رائد..؟؟؟. منهو اكثر واحد شقيان .؟؟؟. منهو يستاهل اهتمام من اللي حولة وعطف عليه ..؟؟؟

رائد هدت اعصابه ,,, وانكسر خاطره على فارس مره.. صار كلام عبدالله يتردد في مسامعه ... " منهو اكثر واحد شقيان .. منهو يستاهل اهتمام من اللي حولة وعطف عليه .."

والى الملتقى غدا ..





واعذروني على تقصيري بس صداع ذابحني شوي .. الله يعطيني الصحه واصدعكم من كثر القرايه :bigsmile:

الله يعافيش اميره ويعطيش الصحه والعافيه

مشكوره

تحياتي زهرة القلوب

الله يعطيش الف عافيه يالغاليه

واسم الله عليش من عوار الراس

ولو ودنا بأكثر لان ماشبعنا

لكن الله يعطيش العافيه

والمره الجايه تحطي الينا اكثر

وعلى فكره عجبتني غيرية رائد .. الله يخليه هو وعبد الله لبعض

دمتي يالغاليه

اللهم صلي على محمد وال محمد

والله انه انربط لساني وماني قادره ويش اقول او ويش اكتب

ماني قادره يا الغلا اوصف مشاعري ولو تشوفيني و اني اقراء القصه مره اضحك ومره اصيح من فرحتي بش يابعد عمري مني عارفه ويش اسوي الله يحميش ويبعد عنش اعيون الشياطين يارب

http://i108.photobucket.com/albums/n.../ayatkursi.gif

من حقش ام الحلوووين
وعندش بنووتة زي القمر
مشكووورة اميرووووة
وعطااش الله العافية
سلامتش ماتشوفي شر

ياسلام عليش يا اموره قصه مشوقه كل حلقه احلى من الثانيه
احداثها روعه وغيرة رائد اروع
الله يعطيش الصحه والعافيه خيوه
تحياتي
ضحكوه البطه

امورة قمورة حبيبت قلبنا
والله هلغيرة شي ها
حركتات
والله في حلقه امورة قلت لك وش سويت وقلتي لي ليش ماعلقتي
والحين بعلق
صحت صياح لو تشوفيني قاتلين لي قتيل
رجعتي مواجيعي ئلي صارت من سنة ونص:sad2:
وفاة ابوي الله يرحمه من هلمرض الخبيث يادفع الشر عن اللكل يارب
يسلموو امورة يالغلا
والضاهر امش فرحانه علي تشوف بنتها كاتبه ام الحلوين ماشاء الله بنتك يحليلها شي

يسلمو ووو جميعا .. اخجلتوني والله لا عدمته تواجدكم

اماااه .. تسلمي والله لا يحرمني منش .. من جد شوي وتطيح دمعتي على هالتواجد الجميل الله يخليش لينا يارب...

زهوور يالغلا .. الله يرحم ابوش ويسكنه فسيح جناته واسفه على تقليب المواجع ...
بس هذي الدنيا وهذا حالها , والقدر مو بيدنا نتحكم فيه .. الصبر يالغاليه والدعاء ورحم الله موتى الجميع ...

وجميعا .. تسلمووووووو وتشكرووا ..
وتفضلوااا
الحلقه الجديده ... واسفه على التأخير بس مزحومه عدل

رائد هدت اعصابه ,,, وانكسر خاطره على فارس مره.. صار كلام عبدالله يتردد في مسامعه ... " منهو اكثر واحد شقيان .. منهو يستاهل اهتمام من اللي حولة وعطف عليه .."
عبدالله:
ــ يللا بطلع انا.. توصي على شي...
ــ وين بتروح..
ــ ولا مكان.. با.. اهايت في الشوارع .. ما احب قعدة البيوت.. خصوصا اذا في ناس عزيزين علي عاطيني طناش.. اطلع احسن لي ..
ــ هااا.. اجل بطلع ويااك...
ــ ههههههههههههههه .. لعن ام التطنيش اللي كذا.. يللا مشينا.. بس روح استأذن من ابوك اول..
ــ هههههه .. زين.. مشينا...
استأذن رائد من ابوه .. وطلعوا... وهم بالطريق شافوا علي ولد هادي.. عم رائد.. في سيارته.. ومعاه راكب امينووه... رائد من شاف علي ويا امين... فتح النافذه وطل براسه والسيارة تمشي يبغى يتأكد .. علي هذا.. واللي معاه .. امينوه صدق ...
عبدالله مستغرب من حركة رائد:
ـــ ويش فيك.. ماد راسك برى .. لا يكون بس ترسل سلام للي ما يتسمى..؟؟
ــ مين..؟؟
ــ خخ مين بعد.. اللي لعنت سيارته حضرتك تشمخ..
ــ هههههه .. امينوه.. ايه.. بس لويش ما تقول اسمه..
ــ خذ لك .. وايه بعد.. يعني تعترف ترسل له سلام .. هااا.. اعود انزلك عنده.. يللا حاضرين..
ــ يؤوو .. لاااا.. انت ما فهمتني .. انا اقصد امين صحيح بس اقصد علي اكثر.. مستغرب ويش جمعه وياه.. وبعدين صدق لويش ما تقول اسمه خخ
ــ ما اشتهيه.. ينطرى على لساني.. ومين علي هذا؟؟؟
ــ هذا ولد عمي .. تخرج من الثانويه.. هذي 9 سنين وكل ما يدخل وظيفة طلع لو طردوه.. مو عاجبنه العجب...
ــ بلل .. صدق من شاف بلاوي الناس هانت عليه بلاويه.. من 9 سنين هذا يعني عمره تقريبا 29 ..
ــ خخ ايه...
ــ ولا عرس...؟؟
ــ لااا.. اهله مهم معرسينه لين يقعد بوظيفة ويثبت نفسه فيها ما يبغوا يبلشوا بنت الناس وياه..
ــ خخ لا حول الله.. بس تعال دورت راسي ... مو ابوك اكبر واحد
ــ ايه اكبر من عمي هادي بسنتين بس ..
ــ يؤ.. وشلون .. عرس عمك قبل ؟؟
ــ هههههه ايه عرس قبل.. يقول ابوي كان يحن يبغى بنت عمه خايف لاتطير.. حجزوها له وعمره 15 سنه... وتالي قامت الناس تهدر .. فمن صار عمره 18 عرسووه خخ.. وابوي ما عرس الا وعمره 23 وبعدين ابوي وامي ما جابوني على طول تأخروا 10 سنين كذا.. يعني كان انا المفروض اكبر منك خخ يمكن 25 سنه.. مانى شاطر بالحسابات لا تدوخني
ــ ههههههه الله.. لا اجل الحمدلله .. خلك اصغر مني.. انت هالكبر وانا مو قادر عليك... شلون تصير اكبر ..
رائد يطالع عبدالله على جنب :
ــ ويش قصدك..
عبدالله يضرب راس رائد بعلبة النشاف:
ــ ولاااا شي .. لا تتحسس بس لينا...
ــ ايه فكرت بعد...
ــ خخ لا تفكر...

هدووء .. عبدالله يفرفر بالسيارة مو عارف وين يروح... عبدالله:
ــ الا لويش اختلعت يوم شفت امينوه ويا علي ...
ــ هههههههههههههههههههههههه..
ــ لويش تضحك..
ــ قلت اسمه .. قلت اسمه..
ــ ويشووو,,..؟؟!!
ــ امينووه .. قلت اسمه...
رجع عبدالله كفخ رائد بعلبة النشاف:
ــ ههههههه حسبي الله عليك .. تتصيد علي هاا.. لكن لوريك....
ــ اجل اللي ما يتسمى هااا..
ــ هههههه.. خلاص عاد.. صدق لويش اختلعت..
ــ ما ادري .. مع انه علي يعني رايح فيها .. بس مو زي امينوه .. علي فاشل بس امينوه داشر صايع اغبر...
ــ تدري خخ يمكن علي ما صار فاشل الا من مجالس امين وربعه..
ــ شكله.. ما علي منه... لو هو ولد خالتي وريته شغله..
ــ ههههههههههههه شمعنى..؟؟
ــ لااا .. بس خالتي الكبيره اكثر شي انا مع ولدها.. عكس عموميتي تدري عمي هادي عنده ولد قدي اسمه حمزه .. وخالتي الكبيره ما عندها بعد الا ولد وقدي اسمه حسن.. بس انا مع حسن اكثر .. عمي ما يزورنا وايد ولا نزوره من ماتوا جدي وجدتي.. قبل لا انولد حتى.. وحنا ما نشوفهم بالسنه الا بالأعياد.. غير خالتي الكبيره .. حسن اشوفه وايد .. بس حتى هو .. مو مره معاه ...
سكت رائد شوي وصار يضحك...
عبدالله :
ــ ويش فيك.؟؟؟.
ــ ههههههه.. لا بس عندي خال .. كله وياه صفقه .. اكبر مني .. عمره 11 سنه تقريبا .. لو تشوفه خخ تقول اصغر مني ..
ــ اهاا قد فارس يعني ..
سكتت رائد ... وفي باله <<< يا حنا يا هالفارس ..
عبدالله لاحظ عليه :
ــ هااا .. ويش قلنا ..؟؟
ــ خخ ولا شي .. ايه بس فارس اكبر بسنه ..
ــ هههههه والله .. طيب ليش طشونه؟؟
ــ ايه صغيرون وضعيف .. والدب ما يكش ولا يهش ..
ــ ههههههههه ... حش حش بس فيه ويش وراك
ــ عادي طيب ..
ــ ههههههه .. غربل الله شرك..
ــ ويش رايك نمر عليه اعرفكم على بعض ... اذا ما عندك مانع..
ــ افاا.. انا يصير عندي مانع .. ولا طلب بعد من رائد .. افا علي اذا قلت لا.. مشينا .. احسن لينا من المهايت ... وين بيتهم ..
ودلى رائد عبدالله على بيت جده,, نزل رائد ودخل بيت جده .. لقى خالته في الصاله .. دخل سلم عليها .. :
ــ هلا رائد ...
ما مداه بيركب لحيدر يشوفه .. الا مرت جده تناديه بطريقة عجيبه ..
ــ تعال تعال تعال ... ارجووولك ... عسى ما فيها رمل بس .. توني منظفه هاا...
رائد وقف وما دار ليها .. هذي سوالفها المعتادة يا دافع البلا .. وبملل شديد رد عليها :
ــ لااااا.. علي جوتي مو نعال بعد .. ما تشوفي الشراب .." جوارب " << "دلاغ" على قولة ديرتي ام الحمام...

ــ ولو .. شراب يمكن فيه شي ..
ــ يــــــــــــــااااربي .. فيه مجاري .. بواليع .. دست حافي .. ويع رطوبه .. بملي فرشكم كله .. زين
ــ صدق قليل ادب .. تعــــــــااال .. اطلع واني بانادي لك على حيدر .. يللا ..
رائد دار عليها وهو محمق ونفخ في وجهها..:
ــ افففففففففف .. معقده...
ــ معقد انت .. يا طويل اللسان .. اطلللع ..
رائد سلم امره لله .. ما يبغى مشاكل يدري بها مريضه .. ما مداه يوصل للباب الا ابو كرار دخل ..
ــ هلاااا .. وسهلاااا.. مين عندنا .. رائد .. هلا حبيبي هلا ..
وانحنى له يبوسه ..
ــ هلا يبه .. قواك الله ..
وباس راس جده ..
ــ يقويك .. ويش اخبارك من زمان ما شفتك .. ويش اخبار امك وابوك ..
ــ الحمدلله بخير..
ــ وين بتطلع ..؟؟ وين رايح ..
ــ لا بس كنت جاي بانادي حيدر بطلع وياه مع عبدالله ..
ــ اهاا .. عبدالله ولد محسن ,, اللي ساكنين بأخر الفريق .. هذا هو اللي في سيارته برى ..
ــ ايه .. لويش تعرفه ؟؟
ــ ايه ابوه اعرفه .. والله كبر الولد وصار رجال ... ها ناديت على حيدر
ــ لا ام حيدر قالت لي اطلع برى هي بتنادي ..
ابو كرار رفع حاجبه ..
ــ اهاا ,, ام حيـــــــــــــدر .. قلت لي ...
ام حيدر على جنب تسمعهم لسا ما صعدت لحيدر ..
ابو كرار :
ــ رائد اصعد فوق انت .. ونادي على حيدر ... واي وقت تعال ,, وسوي اللي تبغاه ..
رائد طالع في ام حيدر نظره المنتصر الفرحان ..
ــ ان شالله يبه .. الحين اركب ...
وعناد في ام حيدر سوى حركه حرقت اعصابها .. فصخ شرابه ونفضه .. وقال وهو يطالع في أم حيدر ..
ــ حرر.. بخلي جوتيي هنا برى .. وشرابي باخذه .. امي تغسله .. وبتسلف نعال من عند خالي ..
ابو كرار فهم مغزى ولده الملسون ومات عليه ضحك :
ــ سوي اللي يريحك يا ولدي لو تبغى نعالي اخذه ..
ــ هههههه افا بس مو قدي ..
ــ هههههههه حسبي الله على شرك ..
وركب رائد الدرج وهو يصفر .. وام حيدر محمقه طلع دخانها من القهر ..
ابو كرار دار عليها وهو معصب بس يكلمها بهداوه :
ــ وتاليتها وياش... عقدتينا وعقدتي خلق الله .. قلت لش باوديش المستشفى يشوفوا لش حل .. اهون من هالعذاب اللي عايشتنه ومعيشتنا فيه وياش..
ــ ما فيني الا العافيه .. الواحد اذا يحب النظافه سويتوه هوسي .. اما عليكم كلام مو طبيعي ..
ابو كرار حمق ورفع صوته :
ــ هااا .. ويش اللي مو طبيعي
ام حيدر خافت :
ــ لااا ,, اني .. ولا شي ..
ــ ايه حسبالي بعد..
ــ لااا.. سلامتك ..
وفي بالها .. الا انت يبغى لك تروح الدختور... ياعلي شخاط..

طااااااخ ... << رائد اقتحاااام غرفة حيدر
حيدر كان يحوس .. في يدة اتاري خربانه .. مفتحنها والويرات حاله ...وبراغي وسكاريب ..
من سمع فتحه الباب .. يطير السكروب من ايده ويصفق الجداار :
ــ وصاااقعه ... هدا ويش انت .. خلعتني ..
ــ هههههههههههههه .. اسمع .. هع هع هع .. خلعتك ..
ــ ايه .. وطيرت الفكره من راسي بعد..
ــ الله يالمخترع والمفكر الخبير ... ويش براسك ..
ــ كنت افكر ليش اليدة خربانه .. صرت احوس فيها وفي وايراتها .. وخطرت في بالي فكره التصليح وانت طيرتها مع الخلعه ..
ــ هههههههههه مع وجهك .. قوم بس لا تصدق عمرك ... قوم بطلع ويااك بسيارة .. مع واحد فلته زمانه ..
حيدر يموت على الطلعات بسيارة .. ابو حيدر ما يسوق .. وطلعاته قليله .. عنده بقاله جنب البيت ويقعد فيها بعد ما تقاعد من شغله .. وحيدر يستمل .. الله رحم حاله برائد كل شويات يفاجأه بطلعه .. بس هالمره غير بسياره ..
طاار حيدر من الفرحه ...
ــ من هوو هالفلته ,,
ــ عبدالله ...
ــ أي عبدالله ..؟؟
ــ اللي تشابق ويا امينوه امس ..
ــ الله .. عبدالله ..داك الصبي الطويل الحليو .. مسررررع عرفته
ــ هيييييه . صلي على محمد ... بعدين ويش حليو وما حليو ..ويش تخربط ,, هاا ,, <<< رائد يغار .. خخ
ــ اللهم صلي على محمد وال محمد لا بس شي هالصبي صحيح فلته ..
ــ فلتوك في زباله وما طلعوك
ــ افا .. بتمسكها علي ..
ــ خخ امزح وياك .. يللا خلص اجهز .. وخل عنك القرقر ..من زمان عبدالله واقف برى..
ــ زين ..

وخلص حيدر .. ونزلتهم .. تعمد رائد يحفط برجوله قدام ام حيدر قبل لا يطلع ..
وهي بدورها ما قصرت فيه سبايب ... طبعا في عدم وجود ابو كرار معاها .. لأنها ما تتجرأ وهو موجود ..

ركبوا السياره .. سلم حيدر على عبدالله ..
عبدالله يوم يركبوا كان متكي راسه على الكرسي .. فما انتبه اليهم وهم يطلعوا من الباب .. انتبه يوم يركبوا السياره ,.. وحيدر صار بابه بجهة باب رائد على حسب وقفة عبدالله .. فمع كفخه الأبواب انتبه عبدالله ...
رد السلام .. ودار .. يشوف هالصغيرون ...
مسكين حيدر .. جت لعبدالله ضحكه .. خفاها بإبتسامه .. تبعها بقولة :
ــ اهلااا .. بخال رائد ..

شكل حيدر طشونه على داك الكرسي .. طوله متر و 25 سم .. وضعيف .. وعلية نظاره .. وشعره ناعم مغطي عيونه شوي .. مره صاير حاجه كتكوته صغيره مو صبي ابو 11 سنه ..

ودار عبدالله ورائد يطالع فيه وهو مبتسم .. فهم عليه انه مستغرب من شكل حيدر خخ..
حيدر طول الطريق ساكت .. يسمع سوالف رائد وعبدالله .. اللي ما خلت من المعاند والمجاكر والضحك...
شوي دار رائد على حيدر بيشوفه ويش فيه ساكت .. وما يشاركهم .. لقاه قاعد قعده مهي طبيعيه حاط رجول على رجول وشاد على عمره .. ومعفس حواجبه .. وياكل في شفايفه .. ويطالع في الشارع ,,,. رااائد عرف ويش فيه خاله ..<<< خبز ايده هالخال ...
ضرب رجل حيدر .. وقال له :
ــ هيه .. حيدروه.. ويش فيك... هاا ..
ــ مافيني شي .. << قالها وهو على اعصابه ..
رائد سأل حيدر على الصامت .. بس شفايفه اللي تتحرك ..
وتقول :
ــ حمام ؟؟؟ << خخ الله يكرمكم
حيدر هز راسه بأسى وحزن وفشلة شديده ايمااء يدل على
ــ أيـــــــــــــــــــه...
رائد طلع لسانه من الفشله وياه .. شوي ويطيح بالأرض .. ورجع سأل حيدر على الصامت :
ــ ضروري .. ما تتحمل ..
حيدر رجع هز راسه بمعنى :
ــ لااااء..
عبدالله لاحظ هالحركتات .. ما التفت عليهم وقال :
ــ احم.. اشوف اسرار .. اقول .. ما تعرفوا الحديث اللي يقول : لا يتناجى اثنان دون ثالثهما .. والا ما علموكم اياه في المدرسه ..
رائد عدل جلسته .. وطالع في عبدالله مو عارف ويش يقول له :
ــ ااا..
ــ اااا.. ويش فيك .. شكلكم تحشوا فيني .. قول اعترف ..
ــ لااا.. بس .. ااا ..
ــ بس ويش ...
ــ الصراحه .. نبغى حمام ..
عبدالله جته ضحكه قويه مهي طبيعيه بس كتمها قد ما يقدر .. وصار يكح ..
ــ حمام .. وليش ما قلتوا من اول .. كنت مار من شوي على بيت واحد من اخوياي كان نزلتكم .. اثنينكم والا مين ..
رائد :
ــ لا .. لا ... انا اخذ احتياطي قبل لا اطلع .. حيدروه هذا ..
عبدالله ما حب يحرج حيدر اول طلعه له وياه .. فرد على رائد :
ــ هههه عادي .. لويش الإحراج هو الا حمام << وفي باله .. وين اصرفه الحين ..
شوي الا عبدالله مار على خرابة " ارض فاضيه " خخ الا هو يقول لرائد وحيدر ..
يللا .. انا بنزل بطلع من دبة السياره غرشة ماي .. واللي بغى حمام .. عنده هالأرض يقعد بزاوية...وبنغطي عليه بالسياره وبذمتنا ما بنطالعه..
حيدر انحرج وتقلب الوان .. قناة مسكره صار .. ونزل من السياره .. ويش يسوي مو قادر يتحمل .. وطبق الخطه خخ. وخلص غرشة الماي ياساتر تقولوا سبوحه خخ ... وانتهت العمليه بسلام ..
ومشوا .. وبعد تقريبا شي نص ساعه وهم يفرفروا .. وقفت السياره لحالها ..

نزل عبدالله .. فتح الكبوت .. وطلع الدخان .. حمت السيارة من الحر والمداور .. وما فيها ماي ... راح عبدالله لدبة السياره بيطلع الغرشه ..
فتح الدبه .. ويضرب ايده بجبهته..
ــ اففففف.. ما في ماي ..خخ .. خلصها حيدر ...
رائد فتح النافذه وطلع راسه :
ــ ويش صاير ..؟؟
عبدالله وهو يضحك :
ــ اقووول .. انزلوا بس ...

والى الملتقى غدا ...

هههههههههههه

هذي مرت ابوهم تجيب الحومه

وضحكني موقف الحمام

مرررره

وحيدر طالع على امه خلص غرشه الماي كلها

تسلمي يالغاليه على القصه الي كل يوم تصير احلى واحلى

دمتي يالغاليه

ويافرحة امش بهالجوهرة الغاليه