تسميها وقاحه لو كيف قولي شنو تسوي لو حصل لك هالموقف ....

السلام عليكم ورحمة الله وبركاته

بنذخل في الموضوع طوالي

الزبده وما فيها لو يصير لك هالموقف وتكون مكاني ويش بتسوي

بكل وقاحه وبكل جراء وبدون خجل قولوا يستحي لا مافيه ابد

هذا الحيا مفصوخ منه فصاااخ وحارقنه بعد لا والرماد تبخر واختفى

..*..

ليلة الثلاثاء رحت الحفل حق السويشه انا وصاحبي عماد علي

جلسنا بالخلف كان البدايه قران كريم خلص القران الكريم وجا وقت الشعر عن الامام علي عليه السلام

وقدامنا واحد الله بخير اللهم اني صائم

اول مره
قام الشخص يناطر فيني تقريباً عشر دقايق وانا من ذاخلي مستغرب شفيه ذا يطلع طمنت نفسي وقلت يمكن مشبه عليي باحد

ثاني مره
طلع تقريباً ربع ساعه حطيت عيونه بعيوني وطالعت وغاورت طلعت في عماد الا عماد ميت من الضحك
ماهو قادر يمسك نفسه وانا النار ذاخلي ووجهي احمر واحس ادوني كاني في فرن يمكن لو تقيس حرارتي لو تحط بيضه على وجهي استوت
وضليت اطلع فيه مافاد
غاورت نزلت راسي طلع في ايدي طلعت ورا يمكن يطلع في احد ما في احد الرجال انكسرت رقبته وهو يطلع فيي

وانا خلاص النار ذاخلي شفيه ذا غاور

انا انقهرت وعماد الله بالخير ميت من الضحك قلت لعماد ان طلع بتكلم ليه

المره الثالثه

الرجال ظل ايطلع وتارك الي قدام ويناطرني بستحقار ونظرات حقد ونظرات غريبه جداً شفيه هالرجال

الضغط وصل مليون قلت له خير اخوك

بكل برود ووقاجه شنو قال

ما كلمتك انا قلت له نعم يقول ماكلمتك انا ودار وجهه قدام وظلت العيون تراقبني من جنب

لين طقت الشبد وقمنا

سؤالي هنا لو صادفت شخص بهالطريقه وهالاسلوب رايح تسمع ويجيك واحد طوال الوقت يناظرك

شنو راح تسوي معاه شنو تتصرف ولو كنت مكاني ويش راح تسوي

ابو باسم ما قصر قوم الضحك والحفله عليي

ابي رايكم انتو شنو بتسووا

وراح تتكلموا ليه او لا

لو راح تسكتوا عنه

يالله اخواني

بانتظار رايكم

تحياتي
أمير العاشقين

ههههههههههههههههههههههههههه
عن جد وقح هالإنسان مع إحترامي لكم
تبي الصراحة عاد أني من النوع العصبي ..
فما بستحمل وبقوم أطلع لأني ما امبا اسوي مشاكل ..
ولا ليه اطلع ابادلها بنفس النظرات ..
بس عجبتني يوم قلت لو تجيبوا بيضه استوت ههههههههه
بس احسن شي تبادله بنفس النظرات وصدقني راح يفوح ...
هذا رايي وكل واحد ورايه
.. تحياتي ..
.. تحياتي ..

السلام عليكم ورحمة الله وبركاته
عزيزي امير العاشقين بصراحه الموقف حصل لي بس احسه شئ عادي جدا عاد طلع باستحقار او بخفة دم
بس انا عادة لما احد يطلع فيي كذا انا اناظره اشويات ابتسم واغور عنه ولا ادق له اي اهميه لانه نظراته ماهتم لها ابدا كلها نظرات لاراحت ولاجت
واذا كل واحد طلع في الثاني وعصب هذي مابقت حاله الدنيا بتقوم وتقعد على المشاكل والسبه النظرات
مثل واحد طلع في واحد صارت شبقه كبيره بالسشششن هذي صارت طبعا في البلد
عالعموم عزيزي خلك ريلكس مع اي احد يناظرك باي نظرات لاتدق اي اهميه لانها ماراح تفيدك ولاتفيده بشئ سوى ترفع ضغطك وتعصب وفي النهايه بتطلع ولا بشئ لابتكلمه ولا بيكلمك واذا كلمته وش بتقول له ؟ ليش تطلع فيي ؟
بقولك حلوة دي اغمض ماطلع خخخ
يعطيك الله العافيه عزيزي امير العاشقين
اشتقنا لاطروحاتك
واصل معنا عزيزي
تحياتي للجميع بالتوفيق

يسلموا خيتووو اسرار

وين ابادله النظرات

كان ودي اقوم اسفقه كف على عيونه والله

تسلمي على التواجد

عساكي على القوة يارب

والله موقف غريب
بس لو حصل لي
ممكن اقول لها خير ايش صاير ؟؟؟؟
وطبعا بنظرات كلها قرف
ويمكن اقعد اضحك واستهبل عليها
والله واجد خيارات عندي
بس صج الله يعينك على هالمواقف

تسلم قلبووووووه

بس اخوك شوي الواحد يزهق ويش نسوي بعد

تسلم لي على المرور حبيبي

عساك على القوة يارب

أخوك
أمير العاشقين

هههههههههه

يازين الخجل :wink:

انا عن نفسي تحصل لي كثير هالحركات

وإذا كنت رايقه اصير عاااااادي ولا مهتمه وفي النهايه هم يجو يتكلمو :noworry:

وفي حال كنت معصبه اناظرهم بنفس نظراتهم والعن بعد

بعدين مثل ما قالت اختي أسرار الليل مساكين بيموتو من الغيض :amuse:


تحياتي

تسلمي خيتوو نوارة الدنيا على هذا الحضور

وفعلاً هذا الي صار

قلنا ليه خير اخووك

دار قدام وقعد يطالع على جنب

بطة شبد ياخيه خليه على الله

تسلمي على المرور

عساكي على القوة يارب

ههه ويش نسوي خيتوو غرام العاشقين

هذا حال الدنيا حلووه عجبتني والعن

تسلمي على المرور خيتوو

ويعطيش ربي الف مليون عافيه

عساكي على القوة يارب

السلام عليكم ورحمة الله وبركااته
اشتقنا لطروحاتك المنمقه
أخي أمير العااشقين
فعلنــ موقف لاتحسد عليه
في هالزمنــ
" الا ختشوا مااتوا "
قل الحيااء وبكل عيون قويه وجرئ شفت شنو قال لك
اخي كان استعدت بالله وجلست تقراء الاذكار على نفسك وباادلت مطرحك
وجعلك الله من صيامه وقيامه بالطاعه
جزاك الله كل خير
وبالتوفيق
اختك .. سوبر ستار العشق
:. أم شووقــ .:

اني من النوع الخجول اشوي وما اناظر كثير
يمكن في البدية راح ادور عنهم مرتين ثلاث بعدين بتصير اعيوني بعيونهم

راح اكون متوترة بس امسك نفسي عن المشاكل واذا طفح الكيل مرة

يمكن اسأل وش صاير ليش تناظريني مشبهه ولا شي

وتسلم اخوي والله يعينك تحصل هالمواقف اكثير

لو كنت بنت راح اقولك بيخطبوك ها ها

خيتوو سوبر أم شوق

تسلمي والله على التواجد

قرينا الحمد وايمانا بالله قوي

وصحيح الي اختشو ماتوا

تسلمي على هالتواجد

عساكي على القوة يارب

ههه خيتو عفاف ضحكتيني يخطبوا يطلعوا كذا هههه

حشا حشا

تسلمي خيتو على هالتواجد

وعساكي على القوة يارب

هههههه
عادي اتصير واجد
بس مامرة صارت لي بهذي القوة
ساعات بنات يطالعون بس لكن
نيتهم طيبة اتجاهي يعني معرروفة
هالنظرات المسالمة بس ساعات بعضهم
يطالعون بنظرات غريبة كأنها احتقار
او شيء ثاني اني في هالحاله
اسكت مره لكن ادا رد حسيت النظرات
متعمدة اظل اطالعهم ولا تنكسر عيني ههه
لحد ماتشيل عينها وخلص تنتهي السالفة

تحيتي
حزن العمر

كان سلمت عليه وأخذت وياه مقابله شخصيه خخخ
والله أني بعد من النوع اللي مايقدر على النظرات واشوف بعد واحد يراقبني
يمكن النظرات العاااادي تمشي عااادي
بس نظرات غير شكل استحقار وكانك نمله قدامه والله اشعلل نااااااار على ويه شايف نفسه هذا
يمكن تكون ردة فعلي ضحكه مصطنعه في وجهه ههه
امير العاشقين الله يعطيك ألف عافيه
وإن شا الله دوم التواصل ولايحرمنا منك

بسم الله الرحمن الريحم
اللهم صلى على محمد وآل محمد وعجل فرجهم

تسلم يا أمير العاشقين على هذه الموضوع الرهيب

لو انا صادني موقف مثل إلي صادك أنجان باجي اتكلم مع هذه الشخص من أوةل مرة
بقول السلام عليكم و يش أخبارك أخوي من وين أنت بحاول أتعرف عليه وبحاول
بكل برود أعرف شنو السبب إلي خلاة ينظر ليي ربما مشتبه فيني موب يقلون
يخلق من الشبه أربعين ربما مشتبه فيني في شخص عزيز على قلبه مثلي انا
يعني سبحان الله شفت فتى من جدى ماشاء الله يشبه ولد أختي ولد أختي عمره تقريباً
20 فان ناظرة بنظرات أستغارب يمكن هذه الشخص مشتبه فيك في شخص عزيز على قلبه
فبتفكير و الابتسامه تستطيع كسب الشخص في هذه الموقف واول ما تريد تكلمه موب تقول اليه
خير سلم عليه قول اليه السلام على من أتبع الهدى ...

أبين طولت عليكم . . .

عموماً تسلم يمناك علىهذه الطرح

و بنتظار الجديد . . .

و نسالكم الدعاء

:) مرحبا امير العاشقين
عجبني الي عصبك بصراحة لو انا معاك مو بس ضحكت الا ودحنت بعد اعذر صراحتي
يمكن معجب بس مستحي يقول وشافك منطش بالبدية وعصب عليك كل شيء يصير

بس الحمد لله ما عمره صار الي هالموقف وانشاء الله مايصير
وما اعرف ايش راح يكون تصرفي كل يوم بمزاج الاخت الله يعطيك العافية اخوي امير

من طول الغيبااات جااب الغنايم
هاا اخووي العزيز امير العاشقين
الحمد لله ع السلامه ولو انها متأخره
مولذي الدرجه انك تكوون معصب يمكن الاخ معجب بيك ويبي يخطبك :wink:ههههههه
المهم اخوووي بما اني من النووع العصبي :embarrest: يعتمد اذا كنت مرووقه
كلما طالعت والقيت النظرات موجهه لي ابتسم واغير الاتجاااه
واذا مره طاالت النظرات اتوجه اليها بالسؤااال .يمكن الاخت مشهبه علي
وفيه عدة مرااات تكون معاااي هيك ..
بس اذا كنت معصبه وطبعا انا من النووع الا يحب لعناااد وما يحلى لي
الا وقت العصبيه بالذات تجي لطيووور وتوقف ع راااسي ههههه
ابادلها بنظرااات بلمثل ...
يمكن اني اقوول ليكون الاخت حابه تخطبي
بس للأسف خيه تراك غلطانه انا مزووجه
للاسف ما حالفك الحظ معاااي:wink:...
طبعا هذا الكلام اذا كنت اعرفها لكن يختلف
اذا كانت غريبه اكيد بكون معصبه بس ما بتكلم
اغير المكان الا انا فيه لو اطلع نهائي ...
يعطيك العااافيه خيووو
بنتظااار جديدك داااائما
موفق

اني اذا حسيت ان في احد يطلع فيني ولا يشيل عينه عني


سواء كانت بنت او صبي

طبعا ما اطيق اني هالحركه


فاشسوي اقوم اطلع فيهـــ ا

عشان تنكسر عيونهـــ ا

وبالفعل تنكسر عينه

بس ماحصل لي موقف ان في احد يطلعني وطلعته ولارفع عينه عني

هههههههههههههههه
لو انت بنية غير قلت يمكن ناوي يخطبك؟ههههههه
بس صحيح ما اكتشفت للحين ويش سر هالنظرات؟؟


بالنسبة ليي اني الحمد لله ماصار ليي هالموقف ابدا
بس لو صار ليي يمكن احط اصابعي في عواينه

هههههههههههههههههههههههههه

لو كنت مكانك أخوي أمير بستلم الي معي طنازه عليه وضحك ؛؛ جد راايق هذا لو يمكن شاارب شي

خخخخ استغفر الله ؛؛؛

ابتساامه سااخره تكفي لمثل هؤلاء الأشخااص

تقبلـــــــ مروريـــــ وتحيــــــــــاااتيــــــــ

وين هالغيبة اخوووووي امير العاشقين ؟؟؟

اني بالصرااااحة لو في احد يطلع في كداااا بقول اليه خير انشالله تبغى صورة ؟
وبكتفي بهالكلمة لانهااا بتحرق دمه

السلام عليكم
شخبارك اميرنا ؟
يو وش يبي منك هاي
في واجد ناس جذي
اني مرة كنت رايحة عرس خالي
و تجي ليش ذيج و تطالع
لا و تحرك راسها فوق و تحت
في واجد ناس نفس ذيلين
متمللين يقعدون يتسيخفون
اقول اذا مرة ثانية احد سوا لك جذي
سو له حركة الحواجب
وحدة فوق و الثانية تحت
بس انا خسارة ما اعرف اسوي
****************

بصراحة ما أذكر إن صادني موقف كذا
بس أعتقد بسوي روحي ماأشوف
حتى وأني ميته من القهر أبغي أعرف ليه هي اتسوي كذا
علشان أقهرها أكثر بتجاهلي ليها

بس تدري أخوي إن أنا صادني موقف أعظم من ذا.....
العام الماضي في محرم وبالتحديد ليلة سابع محرم كنا في الماتم أنا وبنتي وزوجة أخوي
كان قدامي طفل ما يتعدى السنة والنصف أو السنتين بالكثير
ما شال عيونه من علي وأنا مرتبكة منه ما عارفه حتى أنتبه للمحاضرة
حتى لما بدأ الشيخ في المصرع كلنا غطينا وجوهنا
وهو بعده حتى ما خلاني أتفاعل ذيك الليلة
للحين ما أدري هو ليش يطالعني
وكنت أبتسم وياه وهو بس يطالعني باستغراب!!!! بدون ما يبتسم

بس عن جد رغم انه طفل بس أربكني

هلا وغلا بأخونا أمير العاشقين

هههههههههههههههههههه بصراحه الموقف يضحك
بس بصراحه يجيب العيد ههههههههه

أنا بكل برود صار لي تقريباً نفس الموقف
بس بصراحه انقلب عليه اللي يطالع فيني

كل ما دار يطالع .....>>أسلم عليه :wink:

وظليت أسلم عليه لمن هو اللي عصب
واللي معاي ميت من الضحك
بس ما خليته ...حتى يوم قمنا
مريت عليه وسلمت عليه

وقلت اله بعد يسلم على محمد ؟؟؟؟منهو محمد ...ما أدري ههه

بس بجد عصب ولو يحطوا على أذاينه بيضه استوت ههههههه

-صحيح يا خوك موقف يعصب بصراحه
وعن جد فيه ناس عليهم حركات بااااااااااصقه مررررررره

تقبل تحياتي

مممم صارت وايد.. وعاد على حسب النظره.. وخصوصا نظرة التفحص اكرهها دي .. كني بضاعه هيهي تفصيل
عاد اني شهره بالنظرات هههههههه على قولة خوياتي انتين ما يحتاج تشابقي نظره تكفي تأكل اللي يقهرش تبن..
اما اذا كانت نظرة اعجاب :embarrest: اطالع اني بعد.. واغاور اذا زادت.. وممكن اسوي حركه.. ارفع حاجبي وابتسم... وممكن اطلع لساني ,, هههههههههه :toung:

يعطيك العافيه خيي
وحلاة البيض اللي بتسويه هيهيهي :wink:

دمت بحفظ الرحمن

طبعا اني بيصير لي مثل ماصار لك تماما ..

يعني مااقدر احد يحط عيونه عليي بدون سبب وصادفني الموقف كذا مره ..

بس مااتكلم لهم اخليهم براحتهم هم بيتعبوا في النهاية ..

والله يعينك على ماابتلاك وبعد فيه احد يضحك عليك مشكله هذي ..

هاي
يؤؤؤؤؤؤؤؤؤؤؤؤؤؤؤؤؤؤؤؤؤؤؤؤ
الله يعينك خيو أمير
تدري انت موبأول واحد يصير اله الموقف
يامه ناس بطو جبدي
بنظرات ولا تدري ويش يبغو
ويذا سألت تطله انت الغلطان
والله حاله
عادي تعيش وتأكل غيرها لاتزعل
وخلى يولي
ههههههه
بايو

اي والله يادنيا تراويك العجب

تسلموا أخواني على هذا التواجد الرائع والجميل

والله يعطيكم الف مليون الف عافيه

عساكم على القوة يارب

ومأجورين بهالليله

خالص تحياتي
امير العاشقين