شفت الدنيا حلوة .. بشوفتها !!

بسم الله الرحمن الرحيم
اللهم صلي على محمد وآل محمد وعجل فرجهم ياكريم
اممم بصراحه اليوم حابه اعرض قصتي عندكمو اتمنى تعجبكم بس راح اتخر في كتابتها لقروب المدارس
فا يعني ايام الدراسه ماراح اقدر اسردها انا بخلي احد غيري اذا قدرة
ومابي اطول عليكم ابي اعرفكم على اصحاب القصه
وطبعا قصتي لاخلو من الاخطأ واتمنى هالاخطأ تتصلح من الاخت اميره المرح :rolleyes: لان ما شاء الله عليها قصصها في قمت الروعه وان شاء الله تساعدني في قصتي

( عوائل هم من 3 بيوت وهم اخوه )
بيت ابو محمد :
الاب : يوسف
الام : معصومه
الاولاد : محمد اكبرهم وعمره 24 سنه وعقيل عمره 20 سنه وباسم عمره 18 سنه
البنات : فاطمة اكبر وحده في البنات طبعا وعمرها 22 سنه وحوراء عمرها 17 سنه

بيت ابو فاضل :
الاب : حسين
الام : غفران
الاولاد : فاضل اكبرهم وعمره 26 سنه وميثم عمره 18 سنه واصغرهم احمد عمره 13 سنه
البنات : مريم عمرها 24 سنه وبشاير عمرها 15 سنه ومرام تصير زوجة فاضل وعندها بنت اسمها فاطمة وعمرها 3 سنوات
بيت ابو فارس :
الاب : علي
الام : حميدة
الاولاد : فارس وحيدهم واهو المدلل في البيت اكثر شي على الرغم وجود اخت اصغر منه وعمره 19 سنه
البنات : ليلى وعمرها 24 سنه وريما عمرها 15 في عمر بشاير بنت عمها ابو فاضل وهم صديقات وقريبين من حوراء بعد يعني يعتبرو نفسهم خواات

ــــــــــــــــــــــــــــــــــــــــــــــــــ ـــــــــــــــــ
وطبعا قصتنا تتكلم عن شخصيتين اهم فارس وحوراء واحب اقول لكم ان ريما تحب باسم ولد عمها
وبشاير ابد مالقت من يستحق قلبها الحنون وطيبتها
فا نجي الى طيوور الحب اهو فارس وحوراء
:: ::
هذي نبذه عن اصحاااب القصه
وتحياتي
الشمعة

الجزاء الاول :

بعد الدراسه والتعب والهلاك في المذاكره ونجاح الكل من افراد العوائل الكريمه وطبعا اهم كلهم اولاد عم
فكرو الاباء والامهات في رحله لاولادهم وهذي الرحله لنجاحهم في الدراسه وكانت لتصفية النفوس شوي ذاك اليوم الي كانت فيه حوراء وقاعده في الصاله وتشاهد تلفزيون وكان تحتها الجوال من الزهق نزلته وياها
جلست تقلب بالقنواات مالقت شي وكان ذاك الوقت اهلها بعدهم نايمين ماقعدوم من النوم بس كان واحد منهم قاعد الهو باسمووه جالس تووه ياصباح الخير الناس يقولو ( اصبحنا واصبح الملك لله ) واهو داخل على المسكينه بصراخ
وشبااق الحمد لله والشكر على العقل
باسم :هي حويره قومي سويلي بيض وإذا سمحتي بعد حطي جبن وشغلات << الاخ مصلحجي
حوراء : اوهو انت ماتعرف تسويلك فطور يعني <<< محمقه من حركته البايخه
باسم : اقول وراش ماتفكيني وتقومي تسوي فطور
حوراء : اووووه اني طفشت زين الحين باقوم اسويلك فطور طايح الحظ
باسم : عفيا على اختي حووور <<< اسم الدلع خخخخ
حوراء وهي في المطبخ : اووووف اني زهقت من القعده في البيت لو اخليه يطلعني مو احسن لي ماوراه شي وقاعده تسوي البيض في دقايق خلصته
حوراء : اهو يوود عسى ولعلى تحمد ربك
باسم :افااا .. مشكوره ماقصرتي <<< مصلحه
حوراء : اقول باسموووه عندك شغل اليوم ؟
باسم : تقريبا ... ليش تسألي ؟ انتين هالسؤال مو من لله وراش شي قولي خلصيني
حوراء : اتصدق باسموووه عااد اني حاسه بزهق وطفش ويش رايك تفرفر ابي شوي انروح عند البحر لو شي ترى خلاص طقت جبدي <<< وعليه مسكينه
باسم : اقول انطقي مكانش مافي طلعه
حوراء : ايه ماعليه الحين اني اسويلك الفطور لكن خلك مرره ثانيه تقولي سوي فطور ماباسوي ايلك لو تدحن ان شاء الله
باسم : هي هي عن الدلع زين <<< محمق
وبعد كم ساعه قعدو من نومهم
معصومه ( ام محمد ) : ويش فيكم انتون كله شبااق يادافع البلا
يوسف ( ابو محمد ) : خلاص يولادي هدو ان شاء الله كل شي خير
حوراء : ابويي ترى اني زهقت من العقده في البيت
فاطمة : اي صدق ابويي زهقنا خلصنا من المدرسه والامتحانات وماطلعنا <<< احم احم مشاركه اختها في الراي
محمد وعقيل : يعني احنا وش نسوي ليكم اهدكو بنت عمكم ابو فارس قريب منكم ليش ماتروحو ليهم والله حاله
حوراء وفاطمة : اوووف خلاص انتو ماينقال ليكم شي بنكلم وبنقول ليهم انه احنا بنمر عليهم وبنقعد وياهم
حوراء وهي عندي التلفون وتدق على بيت عمها
حوراء : الووو السلام عليكم
فارس : وعليكم السلام والرحمه << مؤادب الاخ << ويقول في باله ياااااي وش هادا الصوت وش حلاته ياربي يعذب
حوراء : موجوده ريما ؟
فارس : اي دقيقه بنادي عليها
ومن الطرف الثاني واهو ينادي على اخته فارس : ريووووم قومي التلوفن ايلش
ريما : انزين داني باجي
ريما : الووو << فارس كان قاعد جنبها يبغى يعرف منهي دي البنيه
حوراء : هلا والله ريومة حبيبتي
ريما : هلا والله بحوور بنت عمي <<< فارس وه دي الحين بنت عمي حوراء ياربي صوتها حليو يجنن
حوراء : اقول ريوماا
ريما : نعم قولي احنا للغاليين
حوراء : انتين اليوم فاضيه ؟
ريما : على حدي فاضيه ما وراي شي
حوراء : اجل جهزي نفسش وقولي حق اختش ليلو ان اني واختي فطووم بنجي ايليكم بعد نص ساعه... اوكي
ريما : صدق والله بتيي البيت وبتقعدي ويانا ..؟
حوراء : اي والله لان اخواني الكرام مو راضيين يطلعونه
ريما طايره من الونااااسه : اوكي الحين باقول حق اختي ليلو
حوراء : اوكي يلا باااي
ريما : اوكي باااي
سكرة ريما التلفون وعلى طول طياره راحت وقالت حق اختها
ريما : ليلوووووه تعالي بسررررررررررعه
ليلى : ويش فيه ويش صاااااير ؟
ريما : بعد نص ساعه بيجو بيت عمو محمد بتجي حوراء وفاطمة
وفي الطرف الثاااني وااحد يسمع ليهم واهو سرحاااان الهو فاارس ويقول في باله : ياربي حبيتها هدا بس سمعت صوتها اجل لو اشوفها وش يصير فيني
ليلى : حللللفي انهم بيجو اجل خليني ازبط ( اعدل ) المكان اني بصراحه اباهم يقعدو في الصاله ماباهم يقعدو في المجلس ليلى وبصراااخ لانها حاسه ان اخوها سرحااان : فارسووووه قوم انقلع فووق واذا بغيت تطلع لو شي قول احم لو يالله مو تصير لا احم ولا دستور
مرررة نص سااااعه وجو بنات العم << وفارس فيه حرره يبغى يشوفها قام وعااند مسوي نفسه بيطلع
نزل من الدرج بدون احو ويالله وعاد كانت حوراء وفاطمة شايلين عباياتهم وكل شي بس حوراء ماكانت في الصاله كانت في الحووش ويا ريما وفاطمة مع ليلى في الصاله .......

إلى اللقاء في حلقه جديده .......


اختكم : الشمعة

هلااا والله بالمفاجأت الحلوه

شكلها القصه رايقه ومروقه تسلمي حبابه
ولا زيي بعد فيها تعاليق وبنفس اللون :rolleyes:

الله يعطيش الف عافيه
حاولي انش تخلي شخصيتش تبرز بالقصه.. عن طريق كتاتبش
وعيشي دور كل بطل ...
واسجل نفسي من المتابعين لش

وبالتوفيق

ههههههههه عجبني هالفارس حشا من الصوت بالتلفون.. عجبته.. ذكرتيني بيوسف وفطوم بطل قصتي الأوليه..

للأمام
دمتي بحفظ الرحمن

تسلمي غلاتي اموووره في انتظار انتقاداتج على هالقصه
وهي اول بداياتي في تأليف القصص واكيد لا تخلو من الاخطأ
واتمنى ان تعجب الجميع بحق محمد وآل محمد
وان شاء الله الجزء الجديد اذا جفت ردود اكثر واكثر والتشجيع منكم
تحياتي
الشمعة

هاا ماشووف الردود شلون يعني ماكمل القصه
اذا ماشفت ردود ماراح اكمل القصه

تحياتي
الشمعة

كملي خيه
الأعضاء في البدايه كذا بعدين يصير التفاعل
والله الله بالدراسه
وموفقه
دمتي بحفظ الرحمن

يعطيك ربي العافيه اختي

وراح اكون ثاني المتابعين انشاء الله

بالتوفيق

مشكورين مشكورين على التفاااعل والاخص اميره الحبوبه
وترقبو بعد قليل او الليل الاجزاء الجديده
تحياتي
الشمعة

الجزء الثاني :

اما ريما : قالت ليش مانقول لحق بشاير تجي تقعد ويانا
حوراء : واله فكره منها نستانس
ريما : اووووه نسيت جوالي داخل وزهقانه ادخل اجيبه
حوراء : ولا يهمش جوالي عندش يفداش
ريما : اوه صدق تسمحيلي ادق عليها واقول ليها اجي تقعد ويانا
حوراء : اكــــــــيد تقدري يلا دقي عليها وخليها اجي تفرفش ويانا
ريما : يلا خليني ادق عليها
حوراء : يلا بسرعـــه دقي عليها
والاخ فااارس كان طالع وكانت ريما وحرواء يتمشوو لكن تعبو وجلسو على كرسي مثل المرجحانه قعدو عليه وكانت ريما تكلم وحوراء شاقه بوزها مستانسه ان بشاير بجي وبعدها سكرة الجوال وفجأه يطلع الاخ فاارس وهم جالسين وطالع على جنب ويلاقيهم قاعدين لكن عيونه طاحه على حوراء وهي كانت مرره حليوه تجنن وتقووم ريما تصرخ عليه
ريما : هيييييييي فارسووووه وش طلعك وليش قاعد تبصبص في بنت عمي << امبيى محمقه شاابه حريقه عليه
والاخ رااايح فيها سرحااان ومن شااف الملاك على قولته
فارس : هاا وش قلتي ؟
ريما : قلت وش طلعك انت وجهك ؟
فارس : اقول يالدبا احترمي نفسش انا اخوش الي اكبر منش << كلهم كذا يقولو كباار وهم خرطي ماينفعو في شي
ريما : انزين وليش ماتسكر بوزك وتطلع بره
فارس : زين اختي حبيبتي ماتبغي شي انتين وبنت عمي << ااي ماعليه يبي يسمع صوت حوراء بررله حجه اذا يبغو شي يطفشو الواحد صدق من قاال للزقه
حوراء مسكينه منصدمه من هم وبعد فطسااانه ضحك على حركاتهم
ريما ماصدقة خبر وعلى طول : اني بصراحه ودي في آي سكريم بس حوراء مادري عنها وش تبغى
ريما : حوراء تبغي شي من البقاله ؟ فارسووه بيجيب لينا
حوراء مستحيه : اممم الي تشوفيه انتين
ريما : خلاص باخليه يجيب لينا من شركة جلكسي الي تحبيه << مسكينه فضحتها
حوراء : أي صح تعالي مو تنسي بشاير الجين بجي
ريما : اوووه نسيت ذكرتيني الله يذكرش بالشهاده ياااااارب
فااارس يهلوس في باله ياااارب ياربي وشحلاة صوتها تكلمي بعد سمعيني هالصووت الحليو
ريما : فارسووووه تعرف آي سكريم الي من شركة جلكسي ؟
فارس : أي اعرفه الي كل يوم باطه راسي فيه على اجيب لش منه
ريما : أي هذا هو عليك نوورر
فارس : لا عليي فانووس << يطنز عليها
وحوراء من الطرف الثاني تكركر تضحك عليهم
وراح فارس البقاله وشترى الآي سكريم وهو يهلوس ياربي وشحلوتها ياربي اتمنى الحين اشوفها مرره ثانيه
ورجع البيت : ريمووووه تعالي بسرعه اخدي الآي سكريم
ريما : زين هداني باجي ...
ريما وصلت لين هو واقف : هاا جبت لي نبغاا ولا لا ؟؟
فارس : ايه جبته <<< والاخ مسويله حجه بالآي كريم
هيي ريموووه تعالي وين راحه طياااره لاحقه عليه بتاكلين
ريما : نعم ويش تبغا ؟؟
فارس : ابغا اخذ اسكريمي يعني ويش ابغا انتين بوجهش المنخفس
ريما : وجهك المنخفس مو وجهي ،، زين يالله فكنا روح
والاخ فااارس سرحاااان بحبيبت القلب الي اخذة عقله يحاول في نفسه يبين لها انه يحبها قااال مافي غير اختي ريمووه
طبعا جت بشاير وجلست وياهم واكلو الآي سكريم وستانسوو وجاء وقت رجعته لبيوتهم طبعا بشااير اول وحده طلعت لان بيتهم بعيد لكن حوراء واختها طلعو متأخر شووي وطبعا تعرفو وشو وصو بعضهم انهم مايقطعو الزيارات الحليوه ابدا
صااارو ليلى وريما يتكلمووو في هالزيااره الي اسرتهم من قلب وستانسو بجيت بيت عمهم


ادري ان الجزء قليل بس انتظرو ....

الى اللقااء في حلقاات جديده وليس في حلقه ....

اختكم : الشمعة

الجزء الثالث :

فاجأه يدخل عليهم المصقوع فارس
فارس : هلا والله بخواتي الحليوين : ويش قاعدين تسوو ؟
ريما وليلى فاحين عواينهم على اخر حد مستغربين من شكله وهو يكلهم بعدها
ريما وليلى بصوت واحد : اهلين
ريما : عسى ماشر يالمجنون ؟؟؟
فارس : انا مجنون يالمجنونه يالمصرقعه <<< امحق تصرقع بيت المصرقعين خخخخ
ليلى : اقول اني باقوم انام
ريما : واني بعد باقوم ارتاح شوي
فارس : اقول ريوم ابغااش شوي ممكن ؟؟
ريما : اوكي قول ويش وراي غير طلباتك الي ماتخلص ..!
فارس واهو مستحي : ريوم حبيبتي <<< قلنا لكم مصلحجي ماينشره
ريما : نعم ويش طلبت بسرعه ؟؟
فارس : بصراحه انا ادري انش المقربه الى بنت عمي حوراء فاحبيت اقولش سر بس اتمنى ماحد يعرفه
ريما حست ان في شي خطير : اقول بسرعه ويش عندك شوقتني ؟؟
فارس : امممممم بس توعديني ماتقولينه حق احد !!
ريما : قول سرررررك في بير ماينوصل له
فارس : انا بصراحه حبيت حوراء ووودي اخطبها
ريما : بل مسرع حبيتها ودك تخطبها لعبه هي البنيه .. زين الحين شنو المطلوب مني ؟؟
فارس : ابيش تفهمينها اني حبيتها وودي اخطبها يعني اتقدم لها بس على شان ماطير مني واحد ثاني ياخذها
ريما : اوكي .. من اصبح افلح خليني انام الحين وبعدين اتفاهم في هالموضوع
فاارس : يابعد عمري اختي الله يخلي لي <<< بس صدق يحب اخته واهي الوحيده الي فاهمه له
ريما : اقول عن المجامل ويالله تصبح على خير
فارس : وانتي من اهل الخير ،، بس مو تنسين
ريما : انزين مابنسى ،، خلاص اعتبر كل شي صاار
فارس طلع واهو مستانس بالمرره واخيرا بيتحقق حلمه خخخ خوش حلم كل شي بسرعه صاار ،، ودقت في باله ليش مايدق على باسموه
وميثموه يطلعوا يستانسو شوي
قام فارس ودق على ميثم لانه اقرب واحد له ،،
فارس : هلا والله ..
ميثم : هلا والله بأبو الشباب
فارس : اقول ويش عندك الحين ؟؟
ميثم : ولا شي قااعد ماعندي شي ،، ليش ويش صاير ؟؟
فارس : خير لاتخااف اقول ويش رايك تمر علي نطلع نستانس انا وانت ولد عمي باسمووه ؟؟؟
ميثم : والله وناسه يلا دق عليه وقول له
فارس : اوكي بااي
ميثم : بااي
ودق فاارس على باسم : الووو السلام عليكم << مؤدب خخ
باسم : هلا والله بولد عمو
فارس : اقول انا مابغا اطول عليك بس بسألك !
باسم : قول خوفتني ..
فارس : لاتخااف بس جيت اسألك عندك شي الحين ؟؟
باسم : لا ماعندي شي قاعد في البيت ويا الخنافس
فارس : بفففف ههههههه خنافس ؟؟
باسم : أي ويااا خواتي
فارس : اوكي اجل بنمر عليك وبنطلع نتمشى اشوي
باسم : اوكي يلا انتظركم ..
فارس : اوكي يلا بااي
باسم : باااي
قعد باسم يحر خواته بيطلع ويمكن يسهرو الى الفجر
باسم : حوروه فطمووه ويلي كسرتو خااطري اتصدقوو ماستانستو ويا بيت عمي ياعلي مره ثانيه ان شاء الله خخخ
حوراء معصبه عليه مسخرته فيهم : شنو قالوا لك احنا مثلك هياته طول الوقت مانقعد دقيقه حده في البيت وبعدين احنا نحس في الاخرين وما لازم نثقل عليهم حتى لو كانو بيت عمي
باسم : بل بل بل اكلتيني يالفيلسوفه ،، اقول ليش ماتسكتي احسن !
حوراء : أي اكيد كلمة الحق تزعل ..
باسم : اقول يالله فكينه مع ألف سلامه
حوراء : الله لا يسلمك ولا يخلي فيك عظه صاحيه
باسم : حسبي اله على بليسش ،،، فاجأه يدق تلفون بااسم
باسم : هلاا
ميثم : اهلين ،، ويش جهزة حق الطلعه ولا بعدك ؟؟
باسم : أي يالله صااار لي ساعه انتظركم << كذاب امتى جت ساعه واهم توهم داقين عليه من 10 دقايق
طلعو الشباب وسهرو الى الفجر مثل متوقعوو ان جلستهم يمكن طول وبعدها كل واحد رجع على بيته
طبعا فاارس عارفين حاله مسكين صاار يفكر شلون يشوف حوراء او يكلمها انه خلاص موقادر ينتظر دقيقه وحده على الرغم ان توه
حبها بس الظاهر انجذب لها بسرعه ،، وبعد كل هالتفكير كله رااح في ابو سابع نوومه يعني لما نام تقريبا الساعه 6 الصبح
وماقعد اله العصر << حماار نووم
ويطلع من غرفته يروح سيده الى الحمام على شاان يتوضى حق يصلي لانه تأخر وبعد ماخلص كل شي سبح سبوحه على الطااير
وتكشخ تقولون معرس مو وااحد عزابي وطلع وعااد انتو عاارفين من في الاستقبال <<< الفهيمه الاخت الكريمه ريما في الاستقبال

:rolleyes: بدايات جدا موفقه.. ومحاولات جدا رائعه
حبابه الشمعه .. اهنيش على الإستمرار..

جزأين حلوين.. خفيفين..
يعطيش الف عافيه
وللأمام وموفقه...
دمتي بحفظ الرحمن

الجزء الرابع :

ريما : حشا فويرس وين رايح بكل هالكشخه والجمال ناوي على البنات تلف حولك ؟؟
فارس : اعوذ بالله من عيونش وبعدين الناس يقولو ( هلا او السلام عليكم ) مو على طول قمتي تحسديني ،، وبعدين ادري اني حليو
ريما : لاجد فويرس وين باطير ؟؟؟
فارس : والله انتين قليها باطير افتك من رقعة وجهش
ريما : افاا فويرس ،، زين ابغا منك حاجه !!
فارس : لاحوول ياكثر ماتطلبين ،، ويش تبغين ؟؟
ريما : ابغاك توديني حق حوراء ...
فارس اول ما سمع اسمها ذاااب وقلبه صار طبوووول خخخ وسررح في عالم الخيال خخ
ريما : هاا ويش بتوديني ؟؟
فارس انتبه حق اخته وكلمها : هداويش انتين ماتفهمي لاتصارخي ترى انا قريب منش مو بعيد صمختي اذوني
ريما : انزين الحين بتوديني ولا لا ؟؟
فارس والفرصه يايتن ليش يرفسها بريوله احم احم : يلا روحي لبسي عباتش وتعالي انا في السيارة استناش بس مو تتأخري ..!
ريما طبعا ماصدقت خبر لانها كانت مستأذنه من امها قبل فا على طول طيراان على الغرفه تلبس عباتها وتاخذ عفستها وراحت ركيض الى السياره
دخلت السياره وهي تناخ من الركض
فارس واهو ميت ضحك : ههههههههههههههه هداويش ويش فيش في احد لاحقنش بعصا ههههههههه
ريما : انت بوجهك خفت تنحاش عني قمت اركض زي المهبوله
فارس : هههههه عااد الى هالدرجه زين بس ماطحتي من فووق الدرج بالي لابستنه تقلي مسمار مو انعاال خخخ
ريما : والله كنت باطيح بس الله ستر وبعدين انت ويش ايدخلك مسمار لو مطرقه بكيفي البس الي البسه اني حرره
فارس : رموه شوفي انا دلتش واايد اذا بتقعدي تنفخي عليي صدقيني ارجعش البيت الحين ولا افلتش من السياره
ريما مبرطمه زي الياهال : خلاص هاا بسكت ( وحطت ايدها على بوزها ) وصلو بيت ابو محمد الهو بيت عمهم
طبعا ريما دخلت لانها دقت على حوراء وقالت ليها انها برا >>> اما فاارس فا كاان في عالم ثاااني غير الي اهو عايش فيه
اما داخل غرفة حوراء كانت وياها ريما تعرفو لازم سواليف من موضوع الى موضوع بعدها اتصل ريما على اخوها لانها تأخرت
وااايد وجاء ليها وطبعا سلمت على حوراء وعمها ومرت عمها
طلعت ايله برا وراحت الى السياره وفتحت الباب وكفخته بأقوى ماعندها والاخ كااان سرحاان وقطع عليه سرحاانه كفخت الباب فاا تروع
وطالع في اخته شافها مبتسمه في وجهه
فارس : وصاقعه كسرتي باب السياره كم مرره قلت لش سكريه بشويش الي يشوفش يقول ثور هائج ( واهو فيه الضحكه على اخته وشكلها
الي نقلب الى قهر من كلمته )
ريما واهي معصبه : اني ثور هائج يالدب ماعليه اوريك اذا مافتنت عليك عند امي وابوي <<< خخخ اغلب البنات يقولو كذا
فارس : ياجاهله روحي فتني عند امي وابوي خوفتيني سيارتي وانا حر فيها ولا بعد ماتبغيني اخاف عليها ؟؟؟
ريما : انت اصلا ماتنعطى وجه <<< مصلحه لروح والحين سبايب في اخوها
فارس : اقول ريمووووه ترى اذا ماتسكتي الحين صدقيني افلتش من السياره وامشي عنش ترى اسويها
ريما سكتت ماعرفت تقول شي لان اخوها يسويها فا اكتفت بكلمه : ان شاء الله
فارس : اعرفش انا ماتمشي الا باليون الحمراء ...
ريما : زين والله خلاص تووبه
فارس : ااي زين
دقايق وصلو البيت دخلت ريما وبعدها فارس طبعا فارس اول مكاان دخل له المطبخ على شاان يعبي الدبه فتح كل الثلاجات ماشاف شي
طلع من المطبخ وركب غرفته لانه ماله خلق يفرفر بالسياره ،، اول مافتح باب الغرفه دق جواله شاف المتصل لقاه بااسم ولد عمه
فارس : الوووووو هلا بسووووم ...
باسم : هلا وغلا ،، بفروسي
فارس : الله يغربل بليسك ويش هالاسم ؟؟
باسم : احمد ربك بعد قاعد ادلعك تحصلك واحد يدلعك انت ؟؟ اقول انا متصل على شاان اعاتبك مو على شان اسولف وياك
فارس : اكيد لا مابحصل لي احد يدلعني ،، تعاتبني على ويش ؟؟
باسم : بعد يقول على ويش ياحلاتك بريئ ماسويت شي اتصدق ،، اتجي البيت وجيب اختك ولات قول لي حتى تعطيني خبر على الاقل
فارس : والله انا اصلا ماكنت بمر هناك بس اختي قالت تبغا تروح وديتها ،، وانا صلا ما كان لي خلق اسولف وبعدين واايد عطيناك وجهه يعني انفتك من وجهك شوي ؟
باسم : طالع ويش قاعد يقول اللعن شكل بليسك قاعد امزح وايااك اكلتني بقشوري صاقعه
فارس : ههههههه اللعن شر بليسك وانت على طول صدقت انا بعد قاعد امزح وياك
باسم : انزين ،، انت الحين ويش عندك ؟؟
فارس : سلامتك ماعندي شي وني وصاصل البيت ومالي خلق اطلع
باسم : اهااا .. اجلباجيلك الحين بقعد ويااك شوي حدي زهقااان
فارس : وكي طبعا مالي خلق اظل تحت خلينا نقعد في الغرفه ... اوكي

وإلى الملتقى ان شاء الله ...
اختكم : الشمعة

تسلمي اختِ اموررره على المتابعه ولاتحرميني من تواجدكِ في هذه الصفحه
المواضعه لنلتمس منكِ الابدااع اكثر فا اكثر
تحياتي
الشمعة

أختي الشمعة القصة روعه وللأسف ماشوف متابعين لها واجدد

بس صبري وجي الفرج

بس بجد حلووه

ننتظر البقيه ها يالله عجلي

اللله مررررره حلوة
ماشاء الله عليش
صار عندنا مبدعين
الله يوفقش
تابعي خيه
واسجل نفسي من المتابعين لقصتش >>> بل مدرسة هي
يضحك فارسووه ههههههه
يسلمووو خيتي
تحياااااتي

وااااجد عجبتني القصه
:
أنتظر الجزء الخامس
:
(على أحر من الجمر)
:
~*:الشمعه:*~
تسلم أناملك على
كتابةهالقصه

مشكوووووووووووووووووووووورة
خيتو على القصة