شلوووون بس قولو لي شلووون.. ؟؟؟؟

سلام عليكم اعزائي النواصر.. :bigsmile:
كيفكم عساكم بخير ...
والله غبار ومن زمان ما قرقرت هنا… :wink:
واليوم جايه ليكم بهدره جديده
فاقد الشيء لا يعطيه.:noworry:. جمله نسمعها وايد بحياتنا.. فهل صحيحه تحسوها…
والله اني قاسيه.. لأني ما لقيت الطيب ...:evil:
اني جافه لأني ما لقيت الحنيه..:huh:
اني ظالمه لأني ما لقيت العدل ..:worried:
اني كل شر وقهر لأني ما لقيت كل عدل وراحه… :no:..!!!!!

شلوووون بس قولو لي شلووون.. ارحم واني ما لقيت اللي يرحمني ؟؟؟
هااا… شلون اراعي واحترم واني ما لقيت اللي يحترمني..؟؟؟
شلون اسمع راي احد واتقبله واني ما احد يسمع رايي ولا يتقبله؟؟؟؟
شلون وشلون.. وهالشلون سلسلة حديد معلقه برقبتنا..
وياكثر ما نقول شلون وكيفا.. تبغاني اسوي مع فلان كذا وهو كذا..

الدنيا صحيح قاسيه وما ترحم.. والله مشيبه الصغير قبل الكبير.:closedeyes:. وما الوم اجدادنا وابائنا اذا قالوا وبحسره..
رحمك الله يا زمان اول..

العلاقات هالأيام تتوقعوها مثل لول..؟؟
علاقة الوالدين بولادهم والعكس..
علاقة الواحد بأخوانه وخواته..
علاقته بأهله وجيرانه..
تحسها تكليف اكثر من كونها عطاء.. هذا اذا التزم بالتكليف كاملا بعد..

نقطع وما نوصل.. اللسان مخاوي الأذون من طوله..
توصل بنا العصبيه الى حد عدم مراعاة شعور الأخرين,, واحيانا عدم احترامهم.. مافي مجال للنقاش ولا الحوار.. الصريخ سلاح فعال لهدم كل الطرق الموصله للقلب…:suspicious:

وبعدين اذا اختلينا مع نفسنا وهدينا.. نقول.. ليتنا ما سوينا وليتنا ما قلنا… وشوي يجي بليسووه اللعين :silal: وجمله وحده يزرعها في قلبنا…. والله فاقد الشي لا يعطيه… ليش انت طيب مع ناس نحيسه.. ليش تتناسى غلط ناس حقوده.. امسك عطائك وخليك جاف قد ما تقدر...

ممكن تكون هالجمله صحيحه بنسبة 100% عند ناس .. بس من رايي.. نسبة صحتها في مساحة قلبي 30% << لا احد يسألني لويش يعنو...:bleh: ..
بس الصراحه.. احس فاقد الشي يعطيه وبكثره.. كتعويض للحرمان اللي عاشه و سد للنقص اللي بداخله.. بالعطاء..
ببساطه دائما فبالي.. لأني احب كذا فأبغى يعاملوني كذا.. لأني بعطي كذا.. وكذا وكذا... ... الخ..

اخيرا جاوبوا اميروه ,, وبصراحه..

عطائكم وامساككم للعطاء هل سببه الحرمان؟؟؟

ان كنت تشوف ان فاقد الشي لايعطيه يعنو برايك الاحساس مثل بير الماي يجف بأي وقت وما عاد ينبع فشلون يرجع ينبع..؟

هل انت حاليا وبكل صراحه تعطي والا تمسك بسبب الحرمان ؟؟؟
ما نسبة صحة هالجمله .. فاقد الشي لا يعطيه في مساحة قلبك..؟؟

ودمتم بحفظ الرحمن :amuse:

اللهم صلي وسلم وزد وبارك على محمد وال محمد

امممم ما ادري عفر نسبتها عندي يمكن20 % اقل منش يعني :bigsmile:

بنسبة الي هاذي المقولة مو صحيحة 100 % :huh:

يمكن تكون صحيحة مع ناس

وغير صحيحة بالمرة مع اخرين

يعني


في ناس تحصلهم ما لقو في صغرهم الاهتمام والرعاية وابائهم كانو مضيقين عليهم وبخله وقاسين شافو الويل في حياتهم

لكن ما ان يتزوجو وينجبو اولاد الحنية كلها تطلع

اشوفهم يعوضون الكل افتقدوه في صغرهم في اولادهم ويحاولون قدر المستطاع انهم يتجنبون الي صار لهم في صغرهم وفي حياتهم

وتعاملهم مع الناس شحلاته

يعني يعطيهم دافع اقوى للعطاء اكثر

وفي ناس يا دافع البلا حصلو كل شي في صغرهم وفي حياتهم كاكل لكن تشوفهم مع الناس ومع اولادهم من اخس ما يكون

لا اخلاق لا طيب لا حنية لا شي :evil:

ذكرتيني بواحد من اهلنا
عاش عيشة قاسية اشوي
تعرفين عيشة الاول فقر وابائهم يقسون عليهم لاعتقادهم ان القسوة راح اطلع رجال

والحين تزوج وانجب اولاد

و حاله الحمد لله واجد تمام

بس طبعه مثل مال اول

ما يعبر عن مشاعره دائما قاسي مع زوجته واولاده

ونادرا ما تشوفه يحظنهم او يبوسهم

مو نادر ولا مرة شفناه

وزوجته دائما تردد هالمقوله فاقد الشي لا يعطيه

بس مو صحيح هذا الشي لوكانت صحيحة هالمقولة كان اخوانه بعد بيصيرون مثله

اخوانه ما شاء الله عليهم غير عنه

هو انعزالي ما يحب الاختلاط وياحبه للمواجهه مع اي واحد يختلف معاه في رأي وعصبي

واخوانه اجتماعيين ومزوحين واخلاقهم واجد تمام مع الناس عكسه تماما

هم عاشو في نفس البيئة الي عاشها

وتعرضو لنفس الي تعرض له

وما حصلوا على شي زيادة على الي حصل عليه هو

الزبدة وهذا رأيي

هذا كله ينبع من ايمان واخلاق الشخص نفسه

المؤمن بالله والمتمسك بالدين وبتعاليمه والموكل امره الى الله ما يكون بهصورة

وبيكون دائم العطاء ومن غير ما ينتظر الاجر والشكر من احد

ودمتي بحفظ الرحمن

هدرت واجد غلبتش في الهدرة :toung:

مراحب أميره
قديكون الكثيرون يمشوا على المثل هذا طول حياتهم لكن
بالنسبه ليي نسبتها يمكن 35% لأن زي ماقلتي المحروم يعوض حرمانه في العطاء أكثر
عطائكم وامساككم للعطاء هل سببه الحرمان؟؟؟
لا موسببه الحرمان يمكن يكون سببه التفاعل مع العطاء كيف يكون؟
ومشكوره على إعادة النظر في المثل بطريقه صحيحه

مشكورة امير المرح على الموضوع الرااااااااائع
واتفق معاش في الكلام

مشكوره اختي ويعطيك الف عافيه

ننتظر جديدك الله لا يحرمنا منك

عزيزتي ام محمد
هلااا باللي تغلبني بالهدره :wink: اتحداش خخ يمكن طالعه علي << هدرتها بس بالنت بالواقع طرمه :weird: ياا ساتر ههههههه..
عجبني كلامش وبالمره جبتي واقع صاير عند ناس وايد .. اشكرش يالغلا .. وحلوه نسبتش جعلها ربي في تناقص مستمر

****************************************

سيناريو . :bigsmile:. هلا حبابه تسلمي على التواجد لا عدمته واووه زدتي علي ب 5% يالله عساها تتناقص ل 0%
منوره ...

اقتباس:

---

لا موسببه الحرمان يمكن يكون سببه التفاعل مع العطاء كيف يكون؟

---

مممممم صرت اتأمل جوابش.. حسيته مقنع والله.. بس الأغلب يعطي بسبب الحرمان.. في هذا الزمان :bigsmile:

******************************************
العفووووو اخوي الفاقدات ياهلا بك وشكرا على التواجد
لاعدمناه

********************************************

دمتم بحفظ الرحمن

عاشق الأفراح..
العفو.اخوي.. وياهلا بك..

دمت بحفظ الرحمن

وعليكم السلام ورحمة الله وبركاته هلا اميرة وهدرتك الرائعة...

عموما ان كان الناس يعملون على هذه القاعدة .. فاقد الشيء لايعطيه..

فبحسب رايي انه ليس الكل..

فمن المفروض ان لا تتخذ هذه كقاعدة يسير عليها في معاملة الناس وبالاخلاق..

هذه القاعدة تؤخذ مثلا لمن يريد ان يعلم الناس شيء هو لايتقيد به او ماشابه اما بالاخلاق

ومعاملة الناس فهي طريقة خاطئة....لما لا يكون كما قالت الاخت العزيزة اميرة...

عامل الناس كما تحب ان تعامل..

فهذه هي القاعدة الصحيحة للتحلي بالخلق الجيد والشخصي الجميلة فانا ابتسم دائما

لكي لا يعبس بوجهي احد اعامل الناس بما احب لكي القى نفس المعاملة..

ولا افكر بما اصابني من غيري من مسيئة او حظي السيء واجعله حجة لسوء الخلق..

هل يجوز ان احاسب الناس بشيء لم يقترفوه مثلا انا قد عاملني من حولي بسوء

هل اذهب لاناس آخرين واعاقبهم بما فعل بي من حولي لا فهذا ليس من اصل العدل ايضا

لنعلم ان الكل محاسب على عمله والحساب يوم الحساب ليس بالدنيا....

يعني هل بمجرد ان كانت الحياة التي اعيشها قاسية علي بعض الشيء سأقسا على الاخرين..

باي دين هذا ... ان اصل ديننا الاخلاق والاحسان لمن يسئ اليك موجود فكيف لمن لم يمسسك بشيء

يجب الحذر في التعامل مع الاخرين فانت محاسب كحسابك على صلاتك وصيامك..

اما على سؤالك خيتي اميرة..

بصراحة انا لا اتخذ لهذ القاعدة اساس في قلبي ولا اايدها ابدا...

واسمحو لي على الهدرة الزائدة...

اخوك ياسر

اخوي ياسر
لا تعليق مني على كلامك... لأنك فيت ووفيت.. وتسلم على هالهدره...
يعطيك مليون عافيه
وياليت الناس تطبق هالكلام كان عشنا بسلام
بس هذا الحال وهذا الوضع ومافي مفر منه
اطباع تختلف وتتفاوت..

ردك وضع نقاط على بعض حروفي المبتوره تسلم ...
دمت بحفظ الرحمن

لا اويد هذه المقوله ابد (فاقد الشيء لايعطيه)
اوقاات انسان فاقد الحنان والحب والعطف في الصغر
يعوضه مع زوجته واولاده ..
وانسان في صغره عنده الحنان والعطف وكل ما يتمناه
وفي كبره معاملة مع اولاده وزوجته بجفاف اولاده والعياذ بالله
عامل الناس كما تحب ان يعاملوك
اكيد كل انسان يحب ان يعامل بطريقه حلووه ومهذبه
بس فيه اشخاص يعاملون الناس ع حسب مزاجهم
او ع حسب طبقاتهم يقول لك مثلا اناانزل من مستواي مع هذا الفقير
ما تعرفون انا منهوو بجد واعرف اناس يعاملون البعض ع هذا الاساس
عامل الناس كما تحب ان يعاملوك ...
مثل ما انت تستاء وتتكدر اذا تعاملت من احد بجفاء اكيد غيرك نفس الشيء
اوووه الظاهر انا نسيت نفسي كأني ع الريحه اريد الهدره خخخخ
مشكووره حبيبتي امـــــــيره
ع الطرح الحلوو اكتير
يعطيك العاافيه
دمت برعاية المولى وحفظه
تحياااتي فـــــــرح

فرووح هدره ولا اروع

منوره حبابه ويعطيش الف عافيه... :bigsmile:

اتفقنا للحين جميع من ردوا علي.. ان هالمقوله غير صحيحه :amuse:
يللا مين يعطينا الصراحه اللي بقلبه ويقول انها عنده صحيحه :rolleyes:

دمتم بحفظ الرحمن

بالنسبة لي أنا أن هذه المقولة تتفق مع أناس دون ناس مثل عبارة ( كل يرى الناس بعين طبعة ) ممكن تنطبق على ناس وناس

فاقد الشيء لا يعطيه
فاقد الشيء لا يعطيه
فاقد الشيء لا يعطيه
................. :huuh::huuh::huuh:
والله هالمقوله تذكرني بشي ............ما علينا ..هههههههه

عموماً هذي المقوله تنطبق في رأيي فقط على الأمور الماديه
يعني اللي ماعنده فلوس كيف يقدر يعطي الناس فلوس .......
............الخ:toung:

أما في أمور الحياة الأخرى

فأعتقد انها ليس لها مكان >>>ما فيه كراسي فاضيه :toung:

والناس اسعملوها في غير موضعها أساساً

فليس كل مقوله أومثل ينطبق في كل الأمور

فللأمور المعنويه مقولاتها
وللأمور المالديه والمحسوسه مقولاتها الخاصه


خيتي اميرووووووه تحياتي على الموضوع المميز

اللؤلؤ المكنون
احسنتي خيه بضرب مثل مشابه
وفقش الله لكل خير وجبتيها صح
منوره ويا هلا


خيي واحد فاضي..
والله خوش امثال ضربتها تسلم وما تقصر

دمتم بحفظ الرحمن

خيتو أميرة المرح موضوع رائع ويستحق المناقشة
انا بصراحة مع هذه المقولة 100% لأني تعرضت
لمواقف تؤيد كلامي بأن فاقد الشئ لايعطيه...
مادري ليش بس احسها معاي انا بالذات صحيحة
يسلمو خيتو...

فاقد الشي لايعطيه
هالجمله ذكرتني بـ ايام الجامعه كنت دائمأ نتهادر اني مع صديقتي عليها
هي تقول مايعطيه واني اقول يعطيه

يعني لقيت الش وحده يا اميرة المرح تأيد هالجمله

بسم الله الرحمن الرحيم
انا بصراحه مو مع هالمثل
فمثلا اللي فاقد حنان يعطي حنان
هذا ابسط مثاااااااااااااال
ففاقد الشي يمكن يعطي ويمك لا وكل على حسب
يسلموووو غناتي
تحياتي
ريوووووووووووش

فاقد الشيئ لا يعطي

مقولة ليس لها وجود في قاموس حياتي
فكثير من هم من حولي عاشو تحت ضغوط الوالدين
ولكن في المقابل يعطون الحنان والمومه والأبوه الرائعه الأبنائهم
هم المثل العرق دساس
كل ما شافو احد وخاصه متزوج اربع ويجي ولدة يتقدم لوحدة قالو لها ترى العرق دساس
وهو للحين ما شفت احد ابوه متزوج هو بعد تزوج
وهم اعرف ابو متزوج ثلاث نساء احداهم قريبتي
حتى اسماء اولادة لايحفظهم حتى مره من المرات الولد شاف ابوه راح يسلم عليه برى اليت قاله الابو انت منهو قال الولد المسكين ( بعد ما تخطط وصار كأنه موروكو .... ابويي انا ولدك

بس اولادة وبناته كلهم حنونين على اولادهم


وطبعاً نسبتي بصراحه ما ادري يمكن 30%100 او اقل
وعلى فكره اني عكس وبو زين
حتى فاقد المال يعطي

اذكر خال ابوي الله يرحمه كان انسان فقير ولازالو اهله فقراء ومحرومين
كان كريم كرم لدرجة مره جاي البيت وكان عمري 7 سنوات او اقل
بس قلت له كل عام وانت بخير طلع من جيبه 500 ريال وعطاني اياها كانت ولازالت اهم عيديه نلتها من شخص
مو عشان قيمتها الماديه
بل لانها الحظة الوحيدة الى تذكرني به
وتخليني اسعى على البذل من اجل الاخرين
ما شفت ولا راح اشوف اكرم منه رغم عوزه وحاجته يسعى لبسمه طفله

الله يرحمه ويحشره في زمره اهل البيت بحق باب الحوائج موسى ابن جعفر صاحب هذه الليله

عفر هدرت واجد



دمتــــ بود

أولا مشكوره خيتو على طرح الموضوع القيم الهدره الزينه
هههههههههه
وأني في رأي أن هذا المثل ينطبق على الي يحصر نفسه في مثل الأشياء التي تعود عليها ومايحيب يبدل نفسه للأفضل
بس بصراحه في ناس تحاول تغير هذي العاده او اشيء الى الأفضل الا وهو
مثل يعني لو واحد أنحرم من حنان وعطف ابوه او امه
فلم يكبر ويتزوج ويكون عند أولاد يعوضعهم ويكون دافع اله
وأنا أرى ان المقوله فيها نوع من الصحه ولا كان لاأيدها
مشكوره حبيبتي وأسفه بربرت واجد
تحياتي لكِ

دنيا الأحلام.. هلا خيتي
وشكرا على صراحتش.. واكيد لكلٍ ظروفه ووضعه...
تسلمي حبابه وياهلا

:bigsmile: هلا خيتي كادي.. هذي ثاني وحده مع اختي دنيا.. يللا الله يغير الحال لأحسن حال
تسلمي حبابه على التواجد..


ريووش.. صدقتي بقولتش على حسب.. فما الوم من قال انها صحيحه.. لأنها بوجهة نظره صحيحه.. وعلى حسب المواقف والظروف اللي خلته
يحسها صحيحيه.. ياهلا فيش حبابه وتسلمي


سحوور.. ههههه استغفر الله القصه اللي ذكرتيها صرت اضحك عليها.. صدقوا يوم قالا شر البلية ما يضحك
عاد هالمقوله صحيحه 100% :wink: منوره حبابه وتسلمي .. والله يهدي الجميع بس ويغير الحال


مووني .. حبابه ..

اقتباس:

---

وأني في رأي أن هذا المثل ينطبق على الي يحصر نفسه في مثل الأشياء التي تعود عليها ومايحيب يبدل نفسه للأفضل

---

عجبتيني وجبتيها صح .. ولا بربره ولا شي تسلمي على التواجد المميز


دمتم بحفظ الرحمن :bigsmile: