اموت واحيــــا بك... " قصة اماراتيه منقولة "

اول شي بقوله اني انا ماقدر ادخل كل يوم فبحط مليون جزء كل ما ادخل
.
.
.
.
.
وهذي هي الشخصيات..

عايلة حمد الكتبي..
حمد(ابو خالد): الابو .. متقاعد... وهو من العين اصلا.. طبعه ناري..يعني عصبي درجة اولى...
موزة (ام خالد): الام.. ربة منزل طبعا..ومن الشارجة...حارّة بعد وتحب عيالها يمشون سيده..يعني ماعندها خربطان... وتعتبر الوحيده اللي تعرف تتفاهم وتقنع الشايب (ابو خالد)..
خالد: الابن البكر.. 32سنه ..يشتغل ضابط في الشرطة... متزوج من بنت عمه محمد.. ميرة.. وعنده ولدين...حمد (11 سنه) .. ومحمد (9 سنين)...وبنت وحده اسمها شما وعمرها 5 سنين..
ناصر: 29 سنه.. يشتغل مهندس في شركة مقاولات.. متزوج من اخت ربيعة الروح بالروح..حمده..وعنده بنت وحده (لطيفة) وعمرها 9 سنين... وولد اسمه سهيل (7 سنين) ..
عليا: 26 سنه.. متزوجه من ولد خالها فيصل من اربع سنين...وعندها بنت.. سلامة (3 سنين) وهي حامل في الشهر التاسع في الوقت الحالي..يعني موصّل...وساكنه في الشارجة...
عبد الله: 24 سنه..هذا شعلة حماس البيت... والمحبوب من الكل..بس غايب حاليا لانه يدرس طب في امريكا... ومازال يحظر الماجستير...يعني غايب عن البيت حاليا...ومحيّر بنت عمه محمد..عنود..
حصة: اصغر من عبد الله بسنتين يعني 22.. وتدرس بالجامعه على وشك انها تتخرج.. ومازالت غير مرتبطة..
نورة: اصغر من حصة بسنه..عمرها 21 وتدرس بالجامعه بعد..وباقي لها سنه ونص عن التخرج....غير مرتبطه... وهي اخر العنقود...

----

عايلة محمد الكتبي.. وهي النقيض لعايلة حمد... عايلة حمد ناس تقليديين وكل شي عندهم منقوود.. يعني راصّين على عيالهم رصّة..اما عايلة محمد..صح انهم حشام بس شوي فاجين لعيالهم روسهم...يعني فريي...

محمد (بو سلطان): الاخو الاصغر لحمد... وهو انسان هادئ ويحب سوالف الشباب...صاحب شركة مقاولات..بس موكل ولده البكر سلطان عليها...
عزة (ام سلطان) : انسانة تحب الكلام والسوالف..مثل ريلها.. وماتقطع ربايعها واهلها ابد دايما تسيّر عليهم ويسيرون عليها من كثر ما سوالفها حلوه..
سلطان: الابن البكر... مهندس ومسؤول عن شركة مقاولات ابوه.. وعمرة 29 مثل ناصر.. ويشتغلون مع بعض.. وهو متزوج من بنت خالته مريم...وعنده ثلاث اولاد .
حميد: 27 سنه.. متزوج من وحده من معارفهم اسمها منى ..ويايب منها بنت وحده ويشتغل في الدفاع ..
خليفة: 24 سنه.. عازب.. ويدرس مع عبد الله ولد عمه حمد في امريكا..بس هو تخصصه كمبيوتر ...
عنود: 22 سنه.. محيرة لولد عمها عبد الله... فرفوشية وحلوه .. وتدرس في الجامعة مع حصة ونورة ... وبتتخرج قريب...
حمدان: 20 سنه.. يدرس في التقنية..وباقي له سنتين .. وهو خقاق بسبب وسامته... بس طيب وراعي سوالف..


عايلة هلال السويدي.. (الشارجة) ... عايلة متروسة بنات... وماعندهم غير ولدين..
هلال ( بو فيصل): انسان هادي..يشتغل في المحكمة.. ومتدين وايد...
شيخة (ام فيصل): حرمة طيبة وعلى نياتها... وتحب عيالها حب غريب... وماتقصر فيهم...
فيصل: ريال شخصية وله كلمة 28 سنه... متزوج عليا بنت عمته موزة.. وماخذ منصب في الجمارك..
آمنة: 26 سنه.. متزوجه ولد عمها مايد.. وساكنه عدال بيت اهلها...
شيخة: 24 سنه.. تشتغل مستشفى ... وغير متزوجه...شخصيتها هادية جدا..
سعيد: 23 سنه.. متخرج من التقنية ويشتغل في الاتصالات...وهو خلوق ومتدين والله عاطنه جمال وملاحة.. مرح وايد وشخصيته حلوه..
فاطمة: 17 سنه ..ثانوية عامة ... هالانسانة مينونه..يعطيها الواحد عمر اكبر من عمرها الحالي... اكّييلة كتب..بس تحصل وقت دايما تغلس على الكل واطفربهم... بس مع ذلك محبوبة جدا وماتصير القعدة بدونها..
التوام منى ومنال: 15 سنه...يدرسن في الجامعة.. بس كل وحده شخصيتها مختلفة عن الثانية...منى حشيم وطيبة..بس منال مكاارة وشيطانة...


==================
بعد التفصيل نبدا بالقصة...
بسم الله ..

الجزء الاول
---------------------
كان حصة ونورة ...الاخوات اللي مايتفارقن.. يالسات في حجرة حصة.. يسولفن عن الجامعة وخرابيطها بما ان محد بنات غيرهن في البيت..والباقي شباب... وامهن لاهية ويا يارتها..وحريم خوانهن لاهيات كل وحده فبيتها..
حصة: افف منه هالدكتور..نوروه والله قاهرني... تصدقين اليوم حسبني غياب بعد؟!
نورة: شو هذا انتي من اول والكورس وانتي غياب..!!!... متى سجلج حظور بالله عليج؟
حصة: خسّه الله هو يسابق البنات... وانا سايرة الا اشتري ماي والمصيبة هو شافني وانا سايرة اشتري..رديت وحصلته مسجلني غياب... بس جي نحاسة فيه مب عند حد....
نورة: ماعليه ..لا تتاخرين انتي يوم تحيدينه يدور الا سبب عليج...
سكتت حصة وهي متظايقة... تخاف تحرمن في مساق على اخر كورس لها.. ويتسبب في انه ياخرها كورس كامل بسبب نحاسة الدكتور.. فجاه قالت نورة
نورة: اخبرج...تراني ميتة يوع.. مايندرابها البشكارة شو مسوية عشا...
حصة: ماعليه اذا ماعيبج بنطرش المطعم...
نورة: لا والله؟ ثرج ناوية تيبين آخرتي..ناسية هزبة ابوية اخر مرة يوم سوتها فيني البشكارة وراحت ترقد وتميت انا اتريا راعي المطعم؟؟
حصة: ههههههههه هي والله .اسميه كسر له السيكل حليله وتم الهندي متخبل مب عارف شو صايرله... زين ما لمج بكففف انتي بعد...
نورة: هههههههههههاي حليلي... والله تميت اصيح.. اصلا حتى لو اتصلت له ماظني ايي بيتنا...ماخذ مقلب وحليلة...
حصة: هههههه مششكلة ابويه والله... على ادناة الدوون يعصب... بس تعرفين شومشتهية؟ مكرونة بالباشاميل..
نورة: سكتي لو يسمعج حمدان بيينا طاير..تحيدينه يموت فيها...
حصة: وانتي ليش حاطه دوبج من دووبه؟!!...دومج ظالمتنه حليله ...والله انه حبوب...
نورة: هي حتى انج داهنه سيرة واتبزينه وتخقينه..عشان جي طيب وياج...هذا حمدانوه ماتعرفينه انتي..
في هاللحظة العنوود اقتحمت عليهن الحجره وهي ادز الباب...
عنود: هووووووووووود ياهل البيت... السلام عليكن بنات عمي...اسميه بيتكم مقبرة ...دومه فاظي ويزيغ..
نورة: وعليج السلام بنت العم..هلا والله....وبعدين هبي هباج الله لا تفاولين على بيتج المستقبلي...
عنود: لا فديتج الا اسوي سوالف..شخباركن؟
حصة: بخيير ربج الا بخير..وشحال عمي وحرمه المصون واخوانج كلهم؟
عنود: والله يشقحون.... ايه نوروه.. ماجني سمعت طاري اخوية فديته علسانج؟ شو عندج تحشين فيه؟
نورة وهي تتصنع البراءة وماسكة ظحكتها....
نورة: لا افا عليج انا بس كنت اقول اني اتمنى ان حمدان موجود لاني ناوية اسوي مكرونه بالباشاميل.. عشان ياكل منها بس...
حصة: يامكرج انتي....ماعليج منها كانت تسب...
عنود: ادريبها والله ماتمر علي حركاتها..احين بقوم ازقرة ترا هو موصلني...
حصة: افاا..عيل ماقرب بيتفاول...فظيحة...
عنود: لا حصووه الا من اهل البيت هو..بعدين هو مستعيل بيسير عند ربعه...وانا الا قلت له فرني بيت عمي..ياختي لاعت جبدي من بيتنا كله شباب وانا وحيده بينهم...غصصصة....
حصة: عادي وحياتج تعالي سكني في قسم عبد الله..
عنود من يابوا طاري عبد الله احمرن خدودها.... بس خبالها مايودرها..
عنود: والله حصوه؟ فديتج ياربي ادري انج تحبيني....
نورة: لا حبيبتي..استريحي فبيتكم... نحن مب مستعدين لاستقبالج بعدنا...
عنود: نوروه حلي عن سماي... ادري انكن تسولفن بس والله حلت لي الفكرة..طبعا مابسكن في قسم عبد الله.. بس في غرفة وحدة منكن...اهلي مابيقولون لا....
نورة: غبية يا ناس...شو تبين العثرة؟ بابا..اللي عندكم واللي متعوده عليه فبيتكم مايمشي عندنا... عيشي حياتج والله فبيتكم لاحقة على الشقا والمنقوود وكلمة لا فبيتنا...
عنود حست بظيجة نورة....لانها اكثر وحده لايعة جبدها من هالوضع فالبيت..فحبت تلطف الجو..
عنود: وايه فديت ريلي..لو يحبسني فحجره ويقولي لا توايقين من الدريشة...والاكل بيدخلونه لج من فتحة في الباب... بقوله حاظرين من العين اليمنى قبل اليسرى...
نورة وحصه فجن حلوجهن...اول مره عنود تتفدى اخوهن بلا مستحى جدامهن..صح انهن نفس الخوات بس عنود دومها كانت تستحي حتى من طاري عبد الله....
عنود يوم شافت ملامحهن نقعت من الظحك .. قالت لهن:
عنود: قومن ننزل تحت اكيد عمي وصل من عزبته وعموه يت من عند يارتها....حصه ونورة لبسن شيل بيضا..
لانهن يعرفن ان حمدان بيمر ياخذ عنود في أي وقت...
وفعلا اول مانزلت حصلن الشايب يالس في الصالة يطالع الاخبار..سلمت عنود على عمها وحبت راسها... طبعا هو ماقصر وياها بالتراحيب..غالية على قلبة..
ابو خالد: يامرحبا والله بمن يانا.... شحالج بنتي وشحال ابوج واهلج كلهم..
عنود: بخير عمي يطولي بعمرك...كلهم بخير وسهاله...يسلموون عليك ..
ابو خالد: الله يسلمهم وياج من الشر..وراج بنتي ماتينا دوم.؟ مانشوفج الا في السنه حسنه..
عنود: فديتك عمي والله الود ودي بس الجامعه والتعب ونحن اخر كورس مابقى شي عن التخرج..وانا اتلاقى ويا البنات في الجامعه...
ابو خالد: هي..ياحيكن عيل...منو يابج؟ لايكون يايه ويا الدريول؟
ملامح بو خالد بدت تبين فيها العصبية...هذي عادته..يعصب من مجرد فكره....
عنود: لا والله عمي يايبني حمدان...
بو خالد: زين عيل...اتصليبه خليه ايي يتعشى عندنا...
عنود: ان شاء الله عمي احين بتصلبه..
نورة في هاللحظة اداركت الموضوع..وصاصرت بنت عمها:
نورة: لا تفكرين اطلعين موبايلج جدام ابويه ...والله بينقد عليج..اتصلي من تيلفون الصالة..
عنود: هي والله زين ذكرتيني...
نشت عنود بتتصل بحمدان...وراحت نورة للمطبخ وهي ناوية تسوي اللي مشتهيتنه اختها حصه..وتمت حصه ويا ابوها تهمز ريولة..
في هاللحظات يتهم ام خالد..طالعه من حجرتها متسبحة.. ويلست عدال شيبتها...وسلمت على العنود...ورحبت بها..
ام خالد: حصة وين اختج؟ لايكون راقده لين الحين؟
حصة: حليلها ياماية تعابل في المطبخ وين ترقد..!..
اام خالد: هي ياحيها عيل يوم مب راقده..
بو خالد: عنود شو قال اخوج؟
عنود: عمي حمدان يسلم عليك ويستسمح منك..يقول هو احين بعيد عن البيت ومتواعد ويا ربعه..بس وصاني نخليلة عشا وبيي عندنا عقب بيتعشا هني...
بو خالد: براية يوم ويا ربعه مسموح... حصة وين العيال عيل؟ ماشفتهم اليوم..ووين الحرمات؟
حصة: ابوية ترا حمده وعيالها عند اهلها..لانه ناصر بيبات فبوظبي...اما ميرة فبيتها ..واظني الا بترقدهم احين عليهم مدارس...وعقب يمكن تينا هني..
اام خالد: ابوج ترا مايصبر بلاهم..والعيال يوم عليهم مدارس مانشوفهم.. ايون متاخر وهبابهم الا يلعبون شوي ويدرسون ويتعشون عقب سبوح ورقاد.. وهاي حالتهم كل يوم...يالله يالله نشوفهم...
عنود: نفس حالتنا والله عموه... حليلهم الله ينجحهم..
ام خالد: هي والله يابنتي... مانلحق عليهم الا الصبح قبل مايسيرون المدارس ...ويدي.!..حصيص.!!!!. وراج ما تقومين تحطين لابوج عشاه؟ تحيدينه عشاه غير عنا... قومي فديتج حطيلة عشاه بيقوم يرقد..
حصه: ان شاء الله امايه... يالله عنود خانوم..قومي عاونيني..

دخلت المطبخ وهن يسولفن وحصلن نورة حالتها حاله قاعدة تتفنن في الباشاميل... حطت حصة عشا ابوها في صينية وراحت توديه.. وقعدت عنود ويا نورة تسولف وياها...
عنود: نوروووه... شخبار عليا...احيدها موصّل..ماربت؟
نورة: والله من يومين ماسمعنا عنها مايندرابها الشينه جان ماسوتها وربّت...
عنود : حليلها ربي يسهل عليها...وراها ماتي تيلس عندكم لين ماتطلع من الاربعين؟
نورة: ودها هي...الا فيصل مايصبر عنها تحيدينه...بعدين خالي وحرمته مب مقصرين وياها الصراحه..مريحينها وايد..
عنود: يعني بتربي هناك..... وانتوا طبعا بتسيرون لها يوم بتربي...!
نورة: طبعا... قولي ان شاء الله تربي الاربعاء عشان نتم عندها خميس وجمعه...
عنود: وليش اقول ان شاء الله....منو عندج هناك؟ والا شايفة لج شوفة؟
تقعد عنود تغومز لنورة وتغلس عليها...ونورة تظحك ..وويهها محمر..
نورة: عندي اختي حبيبتي ويا ويهج المعفن انتي...خوزي عني لا اخرب الباشاميل بعدين شو بيفجني من لسان اخوج...!!!
عنود : ياعيني ياعيني..انتي ماخذه دكتوراه بتغييير المواضيع...بس ماعليه بخليج هالمره... وان شاااء الله يقتنع عمي تقعدين اسبوع عندهم مب الا خميس وجمعه...
نورة بدون ماتقدر تمنع نفسها...
نورة: آآآآآآآآآآآآآآآمين من بؤك لباب السما...
وقعدن يظحكن ويسولفن لين ماخلصت البشاميل.. ..وصوا البشكارة تحط العشا وترتبه وتعزل من كل شي لحمدان... وطلعن للصالة.. وحصلن خالد وحرمته ميرة قاعدين ويا العيوز ام خالد وحصه... ويسولفوون..عنود سارت تسلم عليهم... اما نورة راحت تبدل ثيابها عن ريحة المطبخ... ويوم نزلت تعشوا رباعه. والعيوز راحت ترقد.. وخالد وحرمته بعد ساروا بيتهم... وتمن البنات في الصالة يطالعن التلفزيون.. في هالوقت ياهن حمدان...
حمدان: السلامو عليكوو صبايا....كيفكوووووووووون...؟
عنود وحصه: وعليكم السلام هلا والله...
نورة: وعليك السلام.... اثرن بعقلك لبنانيات المحلات؟؟ اشوفك تحيس لسانك.!!
حمدان: جب انتي يا وجه الشؤم... عنبوج ياي بيتكم قولي مرحبا الساع بولد عمي...ماباخذج ترا عقب..!
نورة: ههههههههههههه ثرني طايحه فجبد اهلية جان بترياك تاخذني... روح روح... بعدين لا تقول عنبووج..والاوالا بوعيلك الشايب بقووله انك تسبه...
حمدان: لالا دخيلج...كله ولا شايبكم من ينش مسك العصا تحت فراشة..
البنات كلهن تناقعن من الظحك لانهن يعرفن بو خالد ماعنده كاني ماني... وشديد بشكل غريب..
حمدان: تظحكن على عمي ماعليكن انزين... حصه..فديت بنت عمي..وين عشاية؟ اكيد مسوتلي عشا سنع...
نورة وهي متغيظة..
نورة: احم احم.... شيختك نورة مسوية الباشاميل اليوم... وما بييبلك منها الا يوم تردلي اعتباري..
حمدان بدا يتمصلح..
حمدان: ياحافظ عالشيخة نورة اللي طبخت اليوم...عيل تعرفين ذاك الفلم اللي بعده مانزل..؟ اللي تصيحين تبينه؟
نورة بطلت عيونها وكلها اهتمام..
نورة: هي ...بلاه..؟
حمدان: تعرفين اني حصلته في المحل اليوم؟ بس دي في دي...
نورة: ليييييييييييش مايبته انزييين بشغلة على اللاب توب ويا هالراس...؟!ّ
حمدان: افا عليج ..وانا انسى بنت عمي..؟ اندوج السويش روحي دوريه في السياره..تراني فريته الا جي ومادري وين طاح...دوريه...
على طوول طيراان نورة خذت السويش وطارت صوب سيارة حمدان وقعدت ادور...
حمدان: حصه ماعليج امر حطيلي العشا بسرعة يوعااااااااااان..
حصة: تامر امر ..ماطلبت...دقيقه..
ويابوله العشا وكل الباشاميل وشبع والآنسة نورة بعدها ماردت.. فوق العشر دقايق وهي ادور الفلم... واخر شي ردت وهي متظايقه... ووقفت على راس حمدان...
نورة: حمدان... وين السي دي.؟ ماحصلته ...وين فارنه...
حمدان باستهبال
حمدان: ماحصلتييه؟؟ اووووووووووه نسيت... ثرني ماشريته لكن قلت بشتريه عقب يوم بتاكد من الاسم...
نورة: شوووووووووووووو؟؟؟
وتموا حمدان وحصه وعنود يتظاحكون على نورة اللي كلت المقلب من حمدان... وهي متظايقة انه انقص عليها... بس كسرت خاطر حمدان في النهاية..
حمدان: ولا يهمج بنت عمي..وراااسج اول ماينزل بخذه لج..
نورة: ماريد منك شي...مشكور..
حمدان: افاااا تزعلين عليه انا عاد؟
نورة: لا والله؟ اصلا اذا مازعلت منك انته من منو بزعل عيل؟؟ انته دومك اطفربي...
حمدان: مابترظين؟ ... ياخي دوريلج دراام زين؟ ...
مسكت نورة المخده وقعدت تظربه بها..وهو ميت من الظحك عليها.... ومرت ساعه عقب ترخصوا هو وعنود وساروا بيتهم...والبنات قفلن الباب وسارن حجرهن يرقدن..

يتبع

الجزء الثاني

كانت نورة تلبس عباتها يوم يوم يتها حصه. الصبح..
حصة: صباح الخير...خلصي... بنتاخر...
نورة: هلا حصيص... ماتشوفيني مخلصه بس بلبس نعالي وبنزل...
خلتها حصة ونزلت عنها عند شوابها..وسلمت عليهم .. وسلمت على اخوها خالد وحرمته.. الصبح الوقت اللي تتيمع فيه عايلة محمد الكتبي... لازم كلهم يكونون موجودين من كبيرهم لين صغيرهم..ويلست حصة عدال امها..
خالد: ها ابويه شو قررت؟ بتسير المزرعة اليوم والا انا اسير عنك؟
بو خالد: سير انته واتصلي من هناك... انا بسير اشوف البوش ...
ام خالد: زين عيل بسير وياك بشوف الحلال...
العيال حمد ومحمد وشما (عيال خالد) ..قاعدين يشربون حليب وعيونهم كل شوي وتسكر وويووههم كئيبة بسبب نشة الصبح ... وقعد الشايب وعيوزه يظحكون عليهم ويسولفون وياهم.. وحصه كل شوي اطالع ساعتها...تخاف تتاخر.... بما انها اخر كورس صار عندها هوس الحرمان والغياب ...ماتتحمل تعيد كورس عشان مساق كامل ويفوتها التخرج...
في هالوقت نزلت نورة متكشخه وريحه عطرها شاله الدنيا.... سلمت على شيّابها وخالد ويلست حذال ميرة حرمت خالد...
خالد: نوروه..!!... شو هذا ريحة عطرج شالة البقعه؟!... متسبحتبه انتي؟ ناسية انج بتركبين ويا دريول؟
انصدمت نورة من هالتهجم الفجائي على الصبح.... وفي خاطرها تقول اصبحنا واصبح الملك لله....
نورة: خالد هو ريحته قوية..والا انا مارشيت غير شوي والله....وبعدين العطر شوي وبيطيير ماعليك من ريحته احين...!
ام خالد: صدقه اخوج... عيب بنتي انتي بتركبين ويا ريال... شلي عطرج في الشنطه وياج وتعطري هناك عند البنات.. ..والحين قومي بدلي عباتج وشيلتج بسرعه ...
نورة التفتت لحصة تستنجد..بس حصه عطتها نظرة كانها تقولها خلصينا لا تماطلين اكثر وقومي بدلي..
نورة: ان شاء الله امايا...
وركبت فوق لغرفتها وهي تتحرطم... بدلت عباتها وشيلتها بسرعه ونزلت... واول مانزلت قالت لحصه ..
نورة: يالله حصه.. جان ماتبين تتاخرين...روحناااا...
بو خالد: وين تبين ماتريقتي...
نورة: ماريد ابويه بتاخر عالمحاظرة..
خالد: اونها زعلت من رمستي...
خالد انسان طيب وحبوب بس مثل ابووه..حاار ومايرضى بالغلط...
نورة: لا خالد مازعلت... بس والله بنتاخر وبتريق عقب في الجامعه... فمان الله..
حصة: امايا ترانا بنرد الساعه 3..لا تشغلون الدريول.. فمان الله..
الكل: الله يحفظكن...
راحن حصة ونورة مع الدريول والبشكارة للجامعة.. وكل وحده راحت كلاساتها على اساس يتلاقن في الرسبشن الساعة 3 .. وفي البيت بعد ماراحوا كلهم وتموا الشواب...يرن تيلفون الصالة..وتروح له ام خالد وترد عليه..
ام خالد: السلام عليكم مرحبا...
فيصل: مرحبااا الساع عمتي وعليج السلام..شحالج فديتج؟
ام خالد: يامرحبا والله بفيصل..شحالك ولدي؟ وشحال عليا واهلك كلهم؟
فيصل: بخير يسرج حالهم.انتوا شو احوالكم؟
ام خالد: مانشكي باس ياولدي...الا مشتاقين لشوفتكم... مابتيب علاية تربي عندنا؟
فيصل: ههههههههه اول شي انا ماصبر عنها الصراحه ..ثاني شي خلاص طاف الوقت احين...عمووه انا متصلج عشان اقولج ترا علايه ربت اليوم الصبح...تستحقين سلامتها..
ام خالد: ويدي؟ متى ربت وجي ماتقولي بفزعلها.؟!...وشحالها احين وشو يابت؟
فيصل: والله ياعموه مابغيت اروعج عليها... بتعزرين على الشايب يمسك خط الفجر وانا مابغيت لكم العثرة... قلت يوم بتربي ببشركم بتونا بالراحات...ويسرج حالها علايه يابت ولد وسميناه هلال على ابويه...
ام خالد: يازيين هالبشااره ياولدي يتربى فعزك ان شاء الله..وتستحق سلامتها انته بعد...
فيصل: الله يسلمج ويسلم غاليج ان شاء الله... بخليج عموه وسلمي على عمي وبشريه..ونتريا وصولكم قريب..
ام خالد: افا عليك..هذي بنتي حشاشة يوفي احين بقوله يوديني صوبكم..
فيصل: حياكم الله عموه وهاا عن السرعه...
ام خالد: ياولدي انا اروحي اتروع من السرعه...خلاص اول مانوصل دبي بنتصلك وبنتخبر عن مكانكم..
فيصل: على خير ان شاء الله .. تامرينا بشي؟
ام خالد: لا فديتك سلامتك وسلملي على علايه وابوك وامك واهلك كلهم..
فيصل: تامرين امر انتي...فمان الله..
ام خالد: الله وياك ابويه...
راحت ام خالد صوب شيبتها وخبرته بالسالفه... فاتصل الشايب بخالد وخبره انه مابيسير العزبه بيسير صوب الشارجه بيلوفون عليا.. وعلى جي عزموا الشواب يروحون ويخونون في البنات...اللي مايدرن عن اختهم شي...
اول ماوصلوا الشواب مستشفى قاسم استقبلهم فيصل وسلم عليه ووصلهم لين الغرفه..
بو خالد وهو يدخل الغرفه
بو خالد وام خالد: السسسلام عليكم ورحمه الله وبركاته...
ام فيصل: يامرحبا الساع وعليكم السلام والرحمه..قرربوووا...
راحت ام خالد تسلم على ام فيصل..وعليا اللي كانت نايمه نشت يوم سمعت صوت ابوها... ويا بو خالد لوا على بنته وحبها على راسها... صحيح هو عصبي وحار لكن كله ولا بناته...يغليهن اكثر من الشباب...
بو خالد: شحالج يابنتي؟ الحمد لله عالسلامه ومبروك ماياااج...
عليا: الله يسلمك يابووويه شحالكم انتوا وشو حال اهل البيت كلهم؟
بو خالد: بخير وعافيه انتي لاتحاتين حد...
ام خالد بعد مالوت على بنتها وسلمت عليها..
ام خالد: ها بنتي شو هباتج؟ تعبانه؟
عليا: لا انا بخير الغاليه لا تحاتيني... ارتحت بشوفتكم والله...
ام فيصل.: ويدي يلسوا تفاولوا بلاكم واقفين..قرب بو خالد ...ام خالد تعالي ذوقي هالهريسة الغاوية...
وقعدت ام فيصل تعزم من كل شي وتقرب .... وفيصل يالس عدال حرمته ويسولف وياها...
وكانت الساعه تقريبا تسع ونص يوم سمعوا دق عالباب.. وطلع فيصل وبعد شوي رد دخل يقول لعليا...
فيصل: سعيد ياي علايه يبا يسلم عليج..
لبست عليا شيلتها البيضا ... ودخل عليهم ريال طول وعرض ووسامه مب عند حد...واحلى مافيه عيونه العسلية الناعسة...
سعيد: السسلام عليكم... اوه اوه.. عمتي وشيبتها عندنا؟؟ يامرحبا والله باهل العين...
ويروح يسلم عليهم ويحب كل واحد على راسه .. ابو خالد اللي مايداني حد يقوله شيبه...
ابو خالد: شاب راسك ولد هلال جان انا شيبه...
تم سعيد ميت عليه من الظحك...لانه يدريبه يمزح ويسولف وياه..صد صوب عليا
سعيد: ها عليا..الحمد لله عالسلامه...طاع ويهج والله تقولون ساحره بسم الله...
فيصل: احلى من شيفتك يالهرم...
عليا: هههههههههه الله يسلمك ياسعيد.. ولو اني ادريبك تمزح ..بطوفها لك..
سعيد:ههههههههههاي طيبه مستويه .. وانته فيصل بلاك؟ اسولف ويا بنت عمتي حبيبتي..
فيصل متغيظ صدق من هالكلمه...
فيصل: حبتك القراده قول آمين.. قم منيييه اجلب ويهك..
سعيد وهو ميت من الظحك : ههههههههههههاي ياخي عمتي اللي حبيبتي مب حرمتك..عافان الله... عاد شوف... تبا الصدق انا مترخص من دوامي ياي اشوف ولي العهد هلال الثاني... وينه؟
ام خالد: هي والله صدق ماشفته ...
سعيد: ان ماطلع يشبهني يا عليا ياويلج..بروح الحضانه وببدل به ويا ياهل ثاني...
ام فيصل: يشبهك يابوك يشبهك...بلاك كلت الحرمه.. تعال ايلس تفاول ويا بو خالد..صدق ماتستحي...
سعيد: خليني اشوف ولي العهد وارتاح انه يشبهني..بعدين شايبنا له يلسه ثانيه..
تنرفز بو خالد..
بو خالد: ان قلت شايب بهيسك هالعصا هاا تشووفها؟...
سعيد : هههههههههههاي فديتك والله ياعمي افا عليك بس انته اصلا شباب اكثر عني انا.. ولايهمك بس اسوي سوالف عليك...
ام خالد: اسميك ربشة ياسعيد.. ماتقوولون ريال وتشتغل...ماشاء الله عليك...!
سعيد: والله اني فرحان بشوفت هل العين عشان جي مرتبش..وييين فوووق الثلاث شهور ماشفتكم ولا انتوا تون صوبنا..
ام خالد: والله انته اخف عنا..وراك ماتي تسلم علينا؟..
سعيد: والله الود ودي مب الا كل يوم اييكم..الا اسكن عندكم بعد... بس الدوام الله يقطعه..
عليا اللي فاهمه على اللي في خاطر سعيد..تذكرت خواتها وبالاخص نوره.. لانها كانت متاكده من انها هي اللي يفكر بها سعيد ...
عليا: امايه عيل وين البنات؟ ليش مايبتوهن؟
سعيد فز قلبه وبين على ملامحه الاهتمام وعيونه متعلقه بعمته... وهو يقول في خاطره..دخييلج قولي انهن يايات في الطريج...قولي انهن يايات ويا خالد والا ناصر.....
ام خالد: والله يابنتي البنات في الجامعه ولا يدرن اصلاانج ربيتي... وبيردن الساعه 3 الظهر.... وماظني ابوج يخليهن اين بلايه.. وانا تراني خلاص يييتج احين..
زعل سعيد من خاطره...شو يعني؟؟ مابشووف نورة؟؟ ياربي شو هالحظ النحس.. التفت صوب عليا وويهه كئيب كانه يترجاها... عليا قولي شي دخيلج...
عليا: لا امايه حرام انا اروحي ابا اشوفهن...اكيد خالد وناصر بيوونا عقب... خليهن اين وياهم...
ام خالد: والله الشور شور ابوج هذوها يالس شاوريه...
وقعدت عليا وفيصل وام فيصل يقنعون في بو خالد اللي معصلق... بنات بدون امهن يفزعن لين الشارجه لاااااا... وهم يحاولووون وياه بالعقل انهن ويا اخوانهن واهلهم مب حد غريب.. بس سعيد اللي تم قلبه يتابع النقاشات هاي ماادخل في السالفه... اذا شافوه متلهف لييتهن بيقولون لااااااااااا هالولد يبا يشوف بناتها وذيج الساعه صدق بيمنعونهن من السيره نهائيا..على شان جي مادخل وسوا نفسه مب مهتم....لين ماتحقق مراده..واقتنع بو خالد ان البنات ايين صوبهم مع حد من اخوانهن...لانه ماحب يكسر بخاطر بنته عليا...
سعيد بغا يطير من الفرحه بس تصرف بطبيعيه ..ويوم يابوا هلال ولي العهد على قولته ارتبش عليه صدق....كان يشبهه تقريبا ولو انه ملامحه ماتبين عدل...بس ياخذ منه شبه ومبين انه بيطلع عليه... وعقب مايلس شوي وياهم ترخص عنهم ورد لدوامه... وبو خالد وام خالد تغدوا فبيت بو فيصل..وعقب ردوا العين.


يتبع

كأنه القصه في المكان الغلط
مادري
المهم بكمل

الجزء الثالث

كانت نورة تتريا حصة في الرسبشن... وبعد خمس دقايق دخلت حصه وياها عنود بنت عمهن..شالات كتبهن ومبين عليهن التعب...
عنود وحصه: السلام عليج..
نورة: وعليكن السلام ....اتصلتي حصه بالدريول؟
حصة: لا..انا قلت انتي بتتصلين لانج بالعاده توصلين قبلي..
نورة: احين بسير اتصله... وانتي عنود منو بييبج؟
عنود: اذا ماعندج مانع نورة خانوم بسير وياكن...قايله لامي..برد وياكن البيت بشتغل ويا حصه على البروجكت
نورة: افا عليج حرمة الغالي حياج الله ويانا...
عنود فقط ويهها خصوصا ان البنات سمعنها ..وهي اللي ماكانت مخبرة حد انها محيرة اومخطوبة...
عنود: الله يحييج بنت العم... يالله سيري اتصلي عشان مانبطي... انا وحده ميته من اليوع ماتغديت..
حصة: ولا انا والله...
نورة : اكيد مخلين لنا غدا في البيت...برايكن بسير اتصل...

اول ماردن البنات البيت انصدمن بفظاوته....البيت هادي وفااظي ..مب بالعاده..!!...
نورة: بسم الله وين اهل البيت؟!..
عنود: اصلا دوم بيتكم جي فاظي..توج حسيتي عليه؟
حصه: لا صدقها الجو هادي اليوم..وين ساروا..؟
نورة: خليهم الشيبان احيدهم بيسيرون العزبه الصبح اكيد رقدوا...وقوم خالد فبيتهم... بسير ابدل ثيابي انا..
راحت نورة ولحقنها البنات يبدلن ثيابهن.. عنود خذت ثياب من كبت حصه ..ونزلن عقب لغرفة الطعام.. يلسن نورة وعنود يشربن جاهي حمر وراحت حصه تقول للبشكارة تحط الغدا...ويوم ردت كان ويهها معتفس.وتفكر..وبالها مشغول..
عنود: بلاج الحبيبة؟ بشو تفكرين؟
حصه: مادري بهالبشكارة خربطتلي رمسات ولا فهمت منها شي...
نورة: جي شو قالت لج؟
حصه: تخبرتها منو تغدى في البيت قالت ماما وبابا روح من الصبح...وماردوا...وخالد وحرمته وعياله تغدوا بسرعه الساعه 2 وطلعوا هم بعد... ومحد في البيت غيرنا...سالتها وين ساروا قالت مادري..
تمن عنود ونورة يفكرن شوي...وبعد دقايق شهقت نورة...
عنود: تغربلتي بلاج تشاهقين روعتيني؟
نورة: لا ياربي لااااااااااااا... ان شاء الله مايكون اللي افكر فيه استوى..
حصه: بسم الله وشو استوى؟؟ شو بلاج..
نورة وهي شوي وبتصيح..
نورة: حصوووووووووه... وين ساروا يعني من الصبح ولين احين ماردوا؟؟؟ وقوم خالد ماصدق عياله ايون من المدارس وشلهم وهو بعد سار وراهم؟؟.. ونحن اخر من يعلم....عليوووووووه ربّت اظني...
حصه: هي والله صدق...يمكن سوتها وربت...وليش مظايقه انتي المفروض تفرحين...
عنود: متظايقه لانهم ساروا عنها اونج ماتعرفينها؟... من متى تتريا علياتربي عشان تروح..واحين ربت وهم ساروا عنها وهي ماسارت....احين انتن منو بيوديكن صوبها؟ تدريبهم انتي مابيسيرون مرتين...
حصه: ماعليه انزين هي بتينا اكيد عقب اسبوعين ثلاثه...
نورة: ماريدها تينا...انا ابااسير هناك...
حصه: ليش يعني؟ شو عندج؟
نورة: يوووووووووه ماشي... مابا غدا تغدن انتن بالعافية عليكن...
نشت نورة وهي مظايقة وايد وراحت صوب حجرتها وقفلت علىعمرها... لاعت جبدها من تصرفات هالاهل... شويعني هن مالهن رب حد يخبرهن والا يقولهن تبن والا ماتبن؟.. خلوهن بروحهن وساروا عنهن ولا جنه شي مستوي.. وهي من متى تخطط لهالسيرة...الشوق اللي فيها لشوفة سعيد متعبنها... من زماان ماشافته.. وهو الله يسامحه مايي صوبهم يوم يفظى..يتعلث بعبد الله اللي مب موجوود.. على اساس هو ربيعه ويتفاهم وياه اكثر... مع انه يدري ان الكل يحبه فالبيت... سواء كبار وصغار... آآه ياسعيد.. يعني ماشي امل لشوفة عيونك هالاسبوع؟ ياخساااره وانا من زمان احاسب على ربى عليا.. امبوونه هاليوم منحوس من بدايته.....ناصر.. ماعندها امل غير ناصر...ما تعتقد انه سار صوبهم...اكيد بيرد بيشل اهله وبيرووح... خلني اروح اتصل له قبل مايخون فينا هذا بعد...!!.. وفتحت باب غرفتها ونزلت تركض لتيلفون الصالة... واول مارفعت السماعة سمعت صوت الشواب رادين...
بو خالد وام خالد: السلام عليج نورة..
نورة: وعليكم السلام والرحمه هلا والله ....تستاهلون سلامه عليا...انتوا كنتوا عند عليا صح؟
ام خالد: هي يالساحره.. شودراج انتي؟ الله يسلمج يابنتي من الشر وانتي بعد تستحقين سلامتها..يابت ولد وسموه هلال...
نورة: ماشاء الله ..تستاهل والله... اكيد طالع على ابوه...
راح بو خالد ودخل حجرته يرتاح..و ام خالد يلست عالكرسي ..ويلست عدالها نورة وهي ناوية اطلع منها العلوم كلها...
ام خالد: لا وانتي الصادقة..طالع علىعمه..ذبحنا سعيد يهدد علايه يقولها اذا ماطلع شراتي ببادلبه بياهل ثاني...
ظحكت نورة وقلبها يدق بالقوو... ياحظك ياهلال يوم شبهت عمك...وااي فديته وفديت سوالفه كان عندهم يعني الصبح...آآآخ يالقهر...
نورة: اماية شو جي تخونون فينا؟ تحيديني ابااشوف عليا ...احين منو بيودينا نحن؟
ام خالد: يابنتي فيصل اتصلبنا الصبح عقب ماروحتوا وقلت انا مافيني صبر لين ماتوصلن...وبعدين اطمني عليا واهلها احتشروا يبونكن تسيرون عليهم.. وتحاوطوا بابوج لين ماوافق ..
ماتت نورة من الفرحه...
نورة: فديييييييييتج يامايه ... عاد منو بيودينا خالد روّح قبل ماني...الا جان ناصر...
ام خالد: نساك الموت ياولدي نسيييته تصدقين..ولا يدري ان اختج ربت...برايه بنتصل له العصر مابنغثه الحين الظهر.. وين اختج؟
نورة بعد مابالها ارتاح خلاص...وظمنت السيرة...
نورة: اختي تتغدا ويا عنود... يت ويانا عندها شغل ويا حصه..
ام خالد: وانتي ليش ماتغديتي؟
نورة: انا انسدت نفسي يوم دريت انكم سرتوا بدوونا..بس احين انفتحت برد اتغدى وياهن..
ام خالد: زين تغدي بنتي وانا بلحق بالشويبه..لو يدري اني قلت عنه شويبه جان هزبني شرا ماهزب سعيد اليوم..
وراحت الام وهي تضحك وتتذكر سعيد...وتمت نورة مكانها عيونها متعلقه بامها والضحكه تزين ويهها.....فديتك ياسعيد وفديت سوالفك...
اللي يعرف اللي في قلوب نورة وسعيد..يقول ان اللي بينهم شي كبير مب هين...لكن الواقع هوان لا سعيد ولا نوره لمح للثاني انه يحبه لهالدرجه..ويوم يتلاقون ماتتعدى سوالفهم الاشياء البسيطة.. نورة ولانها من عايله محافظة ماكانت اطول القعدات وياه.. وتستحي منه ونادرا اذا بترفع عينها... وسعيد بعد تربى على حشمة الاهل... يحشم يوم يشوفها وينزل راسه..ويتم مرتبك... ومايكثر سوالف وياها... لكن بالرغم من هذا كله كان الشوق فعيونهم واضح ..وهذا في المرات القليلة اللي تتلاقى نظراتهم فيها...يحس كل واحد منهم بشعور الثاني صوبه...وعلى هالحال كانت نورة مقتنعة تقريبا ان سعيد يباها... وسعيد كان يحس بشعور نورة صوبه...وكانوا عايشين قصة حب بالنظرات بس ..بدون كلام ولا اعترافات ولا أي شي...صح كانت الفترات اللي يتلاقون فيها كلها حركات ووقت حلووو ماينسى..لكن بعد في نفس الوقت السكوت كان يعذبهم...
رجعت نورة للبنات وهي تفكر بعلاقتها الخفيّة بسعيد...وعلى ويهها نظرات حالمة..
عنود: طالع كيف الشكل؟!!.. بلاج رديتي مستانسه؟!... توج زعلانه ماتبين غدا..
نورة: مستانسه؟ قولي ميته من الفرحه... تستاهلن سلامة عليا...ربت ويابت ولد اليوم الصبح..
حصه: والله.؟؟؟؟ فدييتها ياربي تستاهل..
عنود: ونااااااااسه والله.. عاد هذا اول حفيد لخالج...اكيد سمووه عليه..
نورة: هي سموه هلال...بس ماطلع على يده..ولا على ابوه...ولا على أي حد من خواله...
نورة تتكلم وتبتسم...وتحس بالخقة غصبن عنها لان الولد طلع يشبه سعيد...
حصه: على منو عيل طلع هالمفعوص..؟
نورة: لا تقوليين مفعووص... هذا شيخ اليهال كلهم... طلع على عمه ...سعيد..
عنود: هذا هو العوق ..ياويل حالي انا عالحب... اشوفج ويهج مثل اللي تحلم....
حصه: انزين يا ليلى...وانتي مستانسه عسب يشبه سعيد؟
نورة: جزئيا... بس مستانسه اكثر لانه ابويه اقتنع يخلينا نسير ويا ناصر يوم بيسير صوبهم...
حصه: والله؟ زيييييييييين عيل ان شاء الله يعزم على خميس وجمعه مب اليوم...
نورة: آآآآآآآآآآآآآآمين يارب العالمين..الله يسمع منج..
وقعدن البنات يتغدن ويسووولفن.. عقب سارت نورة تسبحت وصلت العصر ورقدت لين المغرب..وعنود وحصه صلن بعد و قعدن يشتغلن على البروجكت مالهن عشان يخلصنه ويتفرغن...
بعد صلاة المغرب كانن البنات يالسات في الصالة يطالعن المسلسل.. والعيوز وياهن والشايب صار صوب اخوه يسلم عليه وبالمره يخبره عن عليا... في هالوقت دخل ناصر هو وحرمته وعياله البيت ..كان توه ياي من بوظبي وفي طريجه ياب حرمته والعيال من بيت يدهم..
ناصر وحمده: السلام عليكم...
االكل: وعليكم السلام والرحمه..
سارت حمده وسلمت على عمتها وخذت علومها....وناصر يا صوب امه وحبها على راسها..
نورة: هلا والله باخووويه هلا بالغااااااااااالي ... اقرب عندنا..
ناصر: اوه اوه.. هاتي من الآخر نوروه...
نورة: لاحول ولا قوة..اخويه وارحب بك ماشفتك من يومين...
ناصر: انزين انزين.. ادريبج تبين شي..
نورة: ههههههههاي فديتني والله ...
ام خالد: هالبنت لسانها متبري منها..شحالك ابوويه..؟ عاد انا عندي لك خبر بيفرحك...
يلس ناصر عدال امه وحمده يلست عدال حصه وعنود..يسوولفن رباعه.... اما نورة تلصقت في ناصر اخوها وامها..تبا تسمع كل شي يخص سيرة الشارجه....
ناصر: خير يعلج الخير ياربي..شو الخبر؟
ام خالد: اختك الله عطاها ولد اليوم الصبح.. وانا قلت يوم بشوفك بخبرك
ناصر: لا والله؟.. حليلها عليوووه تستاهل والله.. تستحقين سلامتها امايا..
ام خالد: الله يسلمك ياولدي... ونحن سرنالها اليوم الصبح انا وابووك..وخالد واهله من العصر عندهم... وابوك موصي عاد تشل البنات وياك يوم بتسير صوبهم...
ناصر : ليش خالد ماوداهن؟
نورة: ناصر.. خالد روح عنا قبل مانرد من الجامعه..دخيلك لاتقول لا...
ناصر: وانا اروم اقول لا... دام الشايب قال بتسيرن ويايه غصبن عني بوديكن ويايه..بعدين الصراحه اختكن وعيب يعني ماتروحن تسلمن عليها...
نورة: ها هاهااااااي فديتك يابوويه شخصية يخافون منه.... يعني متى بنسير؟؟

ناصر: نوروه ماقدر هالايام عندي مشاريع...
على طول نورة برطمت....تتسكر من كل صوب ..شو هذا؟ ناصر شافها وظحك عليها..
ناصر: تخيري شو تبين؟..تسيرين شويه وتردين والا تروحين خميس وجمعه ؟؟ لاني مب فاظي الا على الويك ايند...
نورة: فدييييييييييييتك ياخويه يعلني ماخلى منك ياربي... اكييد ابا خميس وجمعه مايسدني يوووووووووم...
ام خالد: قري محلج..وين تسيرن خميس وجمعه..وين بتباتن؟..
نورة: وابوووي؟؟؟ بنبات فبيت خالي شكبره وكله بنات...
ام خالد: وسعيـــد؟؟؟؟
نورة في خاطرها...سعيد...آآآيه فديت سعيد انا وطاري سعيد.... وسكتت وماقالت شي...
ناصر: امايه سعيد ريال ومابيقعد يتلصق في البنيات..بعدين انا هناك وهو مابيخلينا ارووحنا انا وفيصل وخالي..اكيد بيقعد ويانا..وبعدين صدقها البيت متروس بنات بينخشن فوحده من الحجر....
ام خالد: والله ياولدي انا واثقه من بناتي ..مربتنهن اروحي..لكن اخاف ابوك مايطيع...ويسويلنا سالفه..
ناصر: خلي ابويه عليه انا .. ماعليج.. انا الصراحه ماحب اسير شوي وارد..تعب... خلنا نبات عندهم وناخذ علومهم وعقب الغدا بالجمعه بنرد البيت...وهي الا ليلة مابيصير عليهن شي بيت خالهن وانا وياهن...
نورة: فديتك والله اسميك اسم على مسمى..انته اللي تنصرنا دوم على هالاستبداد..
ناصر: ههههههههههههاي..بس خلاص عاد سكري السالفه لا يغيرون رايهم.. وتزهبن بالخميس بعد الغدا بنطلع من هني...
نورة: من عيوووني ماطلبت والله...
ام خالد: يافرحتج...ماحيدج تحبين الشارجه هالكثر..؟!..
نورة بسياااسة..
نورة: يسد ان امي من الشارجه .. كيف ماتبيني احبها؟
ام خالد: يعله ياخذج ريل من الشارجه عشان تبرد دودج... ذبحتيني بالشارجه..
ظحكت نورة وفي خاطرها تقول دعوة الام مستجابه وليت ربي يستجيب هالدعوى يامايا...وام خالد اروحها تظحك في خاطرها على خبال بنتها... مع انها ما تدري شي عن سالفة نورة وسعيد..واللي في خواطرهم...لكن في خاطرها هي كام كانت تتمنى سعيد لوحده من بناتها... ونورة شكلها انسب له من حصه...بس الله يكتب اللي فيه الخير...لانه ريال وماعليه كلام....رغم طيش الشباب والخبال اللي فيه لكنه ولد ريال وطبيعي يطلع مثل اخوه وابوه...
ناصر : عنود ..بتخبرج ماتدرين متى بيرد خليفه من امريكا؟
عنود: اخر مره قال بيرد ويا عبد الله بس ماحدد متى...
ام خالد: ليش ياولدي؟ تحيدهم بيردون الحين؟
ناصر: والله مادري امايا بعبد الله... اللي اذكره انه على اخر الشهر بيخلصون دراسه وتبدا اجازتهم شهرين وبيرد فيها البلاد.. ونحن اخر الشهر.. مادريبه عاد أي تاريخ...
ام خالد: الله يرجعه سالم ياربي ..فديته زين انه ولد عمه مخاونه والا مابيطمن قلبي عليه بروحه في الغربه...
ناصر: لا ماعليج عبد الله وخليفة رياييل ماينخاف عليهم... بس ماريده ايينا على غفلة ..ابا اروحي اسير استقبلهم في المطار..
حصة: برايه بيتصل يوم بيحيد عمره ياي...اكيد بيخبرنا... يحب يسوي لعمره حفله وربشه يوم ايي العين..
حمده: يستاهل والله عبد الله ... بس صدق اكيد بيتصل يوم بيرد..
عنود اللي كان ويهها محمر وقلبها يدق... تذكرت انه قريب بيووصل... وهي باقلها هالشهر وبتتخرج..وقعدت تسال عمرها.. بيفكر يخطب رسمي والا بعده؟ .. خذتها الافكار بعبد الله وهي تتوله عليه اكثر واكثر..تولهت على سوالفه ومقالبه .. وظحكته اللي تملا البيت...صدق ان البيت مب حلو بلاه الصراحه والحق يقال... قطعت افكارها صوت عمها وحمدان اللي ياي وياه عشان يشل عنوود...
بو خالد وحمدان: السلام عليكم ..
الكل قام يسلم على الشايب وحمدان..وبعد ماخلصت السلامات ويلسوا ...
حمدان: ها عموووه..!!..صدق تستحقين سلامة عليا..وصلنا خبرها قبل شوي..
ام خالد: ربي يسلمك ياولدي..شحالهم اهلك؟
حمدان بخير الله يسلمج..يسلمون عليكم.. امايه شكلها بتيج باجر الصبح ... وتوصي قالت قولها لا تظهر بقعه..ههههههه تحجز موعد امايا..
ام خالد: ههههههههه حياها الله ام سلطان من زمان ماخذنا علوومها...
حمدان : الله يحييج.... (ويلتفت حمدان صوب نورة ويفر السويش عليها) نوروه..سيري دوري الفلم في السياره...
نورة: لا والله شو شايفني مقصة كل يوم قلت لي روحي؟ على الاقل دور جذبه ثانيه ...
حمدان: ههههههههه برايج انتي الخسرانه... ومن احين اقولج اذا ماخذتي الفلم من السياره اليوم عمرج مابتشوفينه..على الاقل مب من صوبي...
نورة: احلف انه في السيارة هالمره؟
بو خالد: عيب عليج اجذبين بولد عمج...
نورة: ابوويه تراه امس قاص عليه والله...
حمدان: سيري وخلي عندج ثقة فحمداااااان...
نورة: بسير بس والله ان ماحصلته مابرمسك اسبوع.....وتراني حلفت..
حمدان: انزين عاد دوري عدل...
وسارت نورة ادور الفلم.... وصد حمدان صوب عنود..
حمدان: ها عنود ماتبين تردين البيت انتي؟ كل يوم وناطه هني... لاحقه يابووويه...هانت ماتم شي...
ويظحكون كلهم عليها وهي محمر ويهها من المستحى....
عنود: يايه اشتغل فبروجكت ويا حصه انزين...
حمدان: انزين يالله قومي بنسير...
ام خالد: وين تبا ياولدي..ماشي سيرة قبل العشا..
حمدان: تمام..ماعندي مانع انا....
في هالفترة ردت نورة والظحكه شاقه حلجها..اخيرا حصلت الفلم اللي تباه..وحمدان ماجذب عليها..
نورة: مشكووووووووووور ياولد عمي..نردها لك في الافراح...
حمدان.: العفووو..ولووووووووووو !!...
قعدوا يسولفون شوي كل حد فصوب لين العشا..تعشوا وكل حد راح فصوب.. حمدان شل عنود وردوا بيتهم... حصه راحت ترقد لانها مب راقده من الصبح... نورة راحت حجرتها وشغلت الفلم على اللاب توب ...الشواب راحوا يرقدون... ونفس الشي قوم ناصر...اما خالد واهله ردوا متاخر من الشارجه وعلى طول راحوا بيتهم يرقدون هم بعد...

----------------
يتبع

الجزء الرابع..

اليوم هو الاربعاء.. حصه مسكينه عليها محاظرة من تسع... نورة متشرغة ماعليها دوام..والباقين راحوا اما دوامات واما مدارس..والشايب صار صوب مزرعته...بس ام خالد قعدت في البيت تتريا خويتها ام سلطان بتمر عليها... نورة راقده ومستانسة وكانت مخططة ترقد لين الظهر... بس امها يت توعيها لانهاماتحب البنات يرقدن وايد...لازم اجابل البيت وتتعود على نشة الصبح..
ام خالد: نوروووة...خستي بسج من الرقاد الساعة عشر...
نورة: ............ هااااااااااا...
ام خالد: شو ها بعد هاي...قومي يالله حرمة عمج بتي بعد شوي....
نورة: انزين امايه انتي عندها..مب يايه تخطبني هي وشايفتني من قبل... خليني ارقد امس سهرت لين 3 اتابع الفلم..
ام خالد: ياربي عليها لسان هالبنت..ماتستحين انتي؟ بعدين محد قالج بنت حمد تسهرين لين ثلاث...ماعين خير حمدان يوم يابلج هالفلم...عشر دقايق وابا اشوفج تحت...يالله قومي...
طلعت ام خالد من حجرة نورة..اللي تمت خمس دقايق راقده بعد... لانها متعوده على هالحشره كل اربعاء وخميس وجمعه...عقبها نشت..تسبحت وصلت الظحى ..لبست شيلتها البيظا ونزلت تحت... ومر هاليوم بشكل عادي جدا وكالعاده...
الحفلة استوت باجر الصبح... نورة محتشرة مب عارفه شو تختار من الثياب وشو تشل وياها...وهي اصلا كانت من النوع اللي كل شي يطلع عليها حلو.. طولها وجسمها مرتب ومتناسق... ويهها بيضاوي وابيض مع غمازات خفاف...وملامح ناعمة مثل اليهال...ولها شعر بني يوصل لين الارداف..وماكانت تخليه يطول اكثر من جذي ...دايما تقصه..اما حصه لا فكان شعرها اطول وانعم من شعر نورة... وملامحها بعد غير...حصه جمالها جمال هنود... عيون كبار ووساع خشم متناسق وشفايف .... وكانت بعد اطول من نورة بشوي... يعني كل وحده لها جمال مختلف... بس كلهن حلوات ويلفتن للنظر...
نورة جهزت شنطتها اربع مرات وترجع تفتحها مره ثانيه... كل شوي تغير رايها بخصوص الملابس... من كثر ماهي متحمسه...مب رايمة تقعد ثابته فمكان ربع ساعه بحالها.... حتى الغدا ماشتهته ... ونشت تتلبس وتتجهز قبل الناس... تجحلت وحطت غلوس خفيف على شفايفها.. وايشادو بسيط جدا يناسب اللي لابستنه...وكانت بشكل عام..مرتبة وبريئة...... حصه اكتفت بجحال بس.. ماشاء الله جمالها مايحتاج زياده....
كانت نورة راكبه ورا ناصر... واول مادخلوا دبي...تم بطنها يعورها من التوتر.....ياترى بيكون موجود يوم يوصلون؟... والا بييهم عقب؟؟ يدري اني انا بيي اليوم؟؟ ياترى كان يترياني والا؟؟ مهتم والاعادي عنده؟؟....ياويلي اخافه الا طلع كشته ويا ربعه.......بنتحر...
مسكينه نورة ماتدري ان سعيد مختبص من صباح يومه...وكل شوي يسال امه.. محتاجين شي؟ اييبلكم شي؟ ترا بيوونا هل العين اليوم ماشي ناقصنكم؟ البنات يحبن فيتامين سي..عندكم في الثلاجه؟؟؟ وكل شوي يطلع ياخذ شي من الجمعية اللي عدال بيتهم ويرجع يكدسهن في المطبخ...عليا كانت طلعت من المستشفى الصبح وردت بيتها..بس عاد ماطلعت من قسمها لانها ماتروم...بس كانن البنات وعمتها وخالها وريلها فيصل ساير راد عليها..الا سعيد المسكين كل مايبا يشوف شبيهه يابووه له في صالة القسم يحبه ومايواحي عنده الا وشلوووه مره ثانيه عنه... بس كان شي ثاني شاغلنه..تشريف حبيبة القلب.. آآآآه يا نورة ليتج تدرين شكثر متوله عشووفتج....فديتج متى بتوصلين..؟!!..مافيني صبر...
كان الوقت عصر يوم طلع مره ثانية للجمعية لانه عليا طلبت بامبرز ..وبما ان الولد يشبه عمه قالت له هو يروح اييب لشبيهه..طبعا كانت سوالف بس هو ما مانع...علىالاقل يقضي وقت بدال مايتحرقص جدام الباب يترياهم ايوون... واول ما طلع سعيد بسيارته وصلوا قوم ناصر بيت خالهم...ونزلوا كلهم ونورة مب رايمه حتى تمشي....دخلوا وسلموا على الكل ...خالها هلال ويا فيصل سلموا على ناصر والبنات وبعدين ساروا الميلس.. ونورة مكتئبة..سعيد مب مبين... حمده وحصه سبقنها صوب الحرمات...ام فيصل ترحب وتهلي من بعيد..ووياها بنتها شيخه... سلمن على الحريم ونورة كانت مستانسة بشوفتهم..كانت تحب هالعايلة وايد ومب بسبب حبها لسعيد.. لا لانهم عايله بسيطه وسوالف وكل حد اطيب عن الثاني....ياحظج ياعليا يوم انج استويتي منهم..الله يديم عليج ...منى ومنال ين يسلمن وهن مستحيات... خذت نورة علومهن وعقب سالت شيخة..
نورة: عيل وين سارت فطيم؟ ..
شيخة: تحيدينها انتي رقاده... سهرانة امس وانخمدت...بس قايله وعووني يوم بيون هل العين ومحد وعاها..
ام فيصل: سيري منى فديتج وعي اختج...قوليلها هل العين هني خلها تنزل...
سارت منى توعي فطيم ومنال لصقت في نورة..وشكلها جي ....معجبة...تعرفون عاد حركات هالسن...!!...
فجاه تذكرت نورة انها نست شنطتها الصغيرة من كثر ماهي متلخبطة... وقالت لهم انها بتسير تيبها من السياره ..
راحت صوب الميلس سيده عشان تاخذ السويش من عند ناصر.. ووقفت عند الباب شوي قبل ماتدخل تسمع الاصوات... وانحبطت مره ثانية..صوت الغالي ماينسمع..مب موجود.. فدخلت الميلس وطلبت السويش من ناصر وقالت له انها تبا تيب شنطتها... عطاها السويش ورد يسوووولف... طلعت نورة من الميلس وهي كئيبة...اكيد مب موجوود والا ماحيده يفوت زيارتنا...كانت سرحانه بافكارها يوم فتحت باب الحوش اللي يودي على برا..لان ناصر مادخل سيارته.. ماشي مكان فحوش خالها للسيايير... وكلهم كانوا يوقفون سياييرهم برا... فتحت باب الحوي وهي متحجبه بس....ماتغشت لان هل الشارجه عادي عندهم حجاب بلا غشوه... كانت علىوشك انها تتخطى الباب وبتطلع يوم دعمت في سعيد... رفعت راسها وهي تشهق..كان توه ياي.. وشال البامبرز بيديه... شكله كان يظحك وهو مبطل عيونه يطالع في نورة...مب مصدق هويحلم والا اللي صار صدق... يوم تاكد انه صدق انحرج بشكل...وبين على ويهه....
نورة: اوه..سعييييييييد... سوري ماشفتك....
سعيد: لا عادي الغاليه...(ويظحك).. وانتوا ماحصلتوا تون الا يوم انا طلعت من البيت؟ صدق انه اذا غابت الشياطين حضرت الملائكة....
نورة: هههههههههه لا حرام عليك..لا تقول جي..
وسكتوا شوي..وكل واحد يطالع في الثاني... سعيد فخاطره يقول..ارحميني..كل ماتينا تحلوين زياده؟ بسج...ياربي بتخبل بعد مارضت علي يوم قلت عن عمري شياطين...ياسلاام من قدي...ونورة في خاطرها : كان يتريانا...فديته كان يتريا وصوولنا... يعني مهتم...فديته يظحك وهو شال البامبرز...
نورة مدت ايدها وخذت البامبرز عنه... وانحرج سعيد اكثر من هالحركه..اول مره تسويها نورة..بس الظاهر ما اهون عليها اشل بامبرز يهال...
نورة: هات هالبامبرز عنك....عبلوك من احين بالشبيه؟ ...(وتبتسم),,,,
سعيد: هههههههه هي والله ..دريتي انه طالع علي..... عرف يختار صح.؟
نورة ا نحرجت.... وتقول في خاطرها ...يتعمد يحرجني...مب جني زودتها وياه؟؟؟
نورة: مابيخرب يوم بيشبه عمه...
سعيد في خاطره... فدييييتج ياربي...
سعيد: صح نسيت اسالج...شحالج نورة؟
نورة: ههههههههههههههههههههههههههه توك تفيجت...بخير الحمد لله شحالك انته..؟
سعيد: انا بخير يطولي بعمرج... وين كنتي سايره اشوفج كنتي طالعه برا...
نورة انصدمت انها نست سالفة الشنطة... يافظايحج يا نورة جانج ذبتي اممره من شفتي سعيد ونسيتي عمرج...
نورة: هي والله نسيت شنطتي في السياره وكنت سايره اييبها..
سعيد: لا اطلعين...فروخ وايد برا يلعبون...هاتي السويج انا بييبها لج..
عطته السويج وهي ساكته ومنحرجه....اثرك حتى انته تحاسب ياسعيد....!!...بس فديته حسابه حلوو ورقيق...
بعد شوي رجع سعيد بالشنطه ...
نورة: مشكور سعيد..ماتقصر..
سعيد: افاعليج.. الواجب ...والبامبرز عطيه عليا لو ماعليج امر...
نورة: ان شاء الله... وانته عط السويج ناصر...
سعيد: من عيوني الثنتين ماطلبتي....
طلعت من سعيد قبل مايمسكها...بدون قصد...وبعفوية....انحرجت نورة من هالكلمه...وفي خاطرها تقول ناوي عليه سعيد في هاليومين....بيعوض عن ثلاث شهور....كانت قافطه وهي تقوله..
نورة: يعلهن سالمات ان شاء الله...
وراحت عنه صوب البيت... وهي تتنافض من الاحراج... ياربي مصختها وياه..شو بلاج يا نوروه الظاهر المفاجاه اثرت على عقلج وطيحتي الميانه وياه... ياويلي لو درت امي بهالموقف بتذبحني...وابويه اسميه بيدفني حية.. بس الحمد لله محد شاف شي...دخلت الصالة وويهها محمر...ويوم سالوها عن السبب قالت لهم الرطووووبه...وصدقوووها...بعد شوي نزلت فاطمه...
فاطمة: ياهلا ومرحباا والله باهل العيييييييين...حيالله من ياااانا كلولولوولولييش زين يوم تنزلتوا ويييتووونا...
اول مايت ربشت بنات عمتها وياها...فتظاحكن يوم يوم شافنها تقلد اخوانا المصريين..وسلمن عليها وخذن علوومها...
حصه: الله يحيييج بنت خالي... ماشاء الله ثانوية عامه هااا؟ خلاص عيل بتعرسين...
فاطمة: خليني انجح اول بعدين رمسي عن العرس....بعدين انتي قبلي انزين خلاص ماشي باقلج عن التخريج...
نورة: خلي عنج انتي خريط العرس... لاحقة... بتخبرج شو هالكثر رقاد؟ طالعي عيونج كيف مدفناااات...فيليبينووو وحده....
فاطمه: هههههههههههههه فلبينو انتي.... فديتج عيوني ميفنات من الحساسية الله يبعدها عنج...
نورة: من وين يتج الحساسية...؟
فاطمه : ياختي مادري... جان انحسدت بسبب جمال عيوني الآخااذ..تدرين انتي عاد عيوني ماتحصل..
نورة: ههههههههههههههه مداح نفسه....
اطالعتها شيخه وهي رافعة حواجبها... شيخه يعيبها تغلس باختها فاطمه..
شيخة: والله جان محسودات ترا من كثر مااجابلين عمرج وتتغزلين فعيونج..والا محد حاسدنج...
فاطمة: ودج انتي اصلا بعيووني... يسد انهن مثل عيون سعيد عشان يطلعن حلوات..
شيخة: وانا اقول منو خاقنه..ثرج انتي....
ام فيصل: خلن عنكن عاد..فديته ولدي حلووو ...محد شراته...الله يحفظه من العين ياربي..
فاطمة: آآمين...
نورة: حصه وحمده..اشوفكن يالسات نسيتن علايه فديتها..قومن ما تبن تسلمن عليها؟
حصه: هي والله بنقوم..انا امبوني اترياج بس عقب يتنا فطيم وربشتنا...
فاطمه: فديتني انا انسي الواحد عمره....
نورة: طوفي طوفي انتي جدامي...وديني عند اختاااااااااااه... بشوف ولي العهد اللي تطرونه هذا... بنعطيه البامبرز ماله...

كانن في الممر حمده وحصه ونورة وفاطمه..اما شيخة راحت المطبخ تشوف تجهيزات العشا...
حصه: هي صدق شو هالبامبرز اللي يايبتنه وياج؟
نورة وهي منحرجه..
نورة: تلاقيت ويا سعيد عند الباب ووصاني اعطيه عليا...هي طالبتنه..
حصة: اهااااااااا تلاقيتي ويا سعيد؟.. زين زين..
نورة وهي تصاصر حصه....
نورة: جب لا تفظحينا...
وصلن قسم اختهن وسلمن عليها وتشكرن لها بالسلامه ...نورة اول وحده شلت هلال الصغيرون....وقعدت تبوس راسه واييده كل شوي...وفي خاطرها سوالف....يعلني ماخلى..والله انه يشبهه صدق....شكله بيطلع نسخه... الا ياحظك يا ولد فيصل يوم شبهت عمك...اسميك ماخربت...تمن عند اختهن لين المغرب...وبعدها حصة راحت مع شيخة لانها بتبات في غرفتها.... ونورة راحت مع فاطمه...اما حمده وناصر وعيالهم في غرفة الضيوف... صلن المغرب وعقت نورة شيلتها وعباتها وعلقتهن..وطلعت من شنطتها شيلة بيظا... عشان ترتاح اكثر ..والشيلة البيظا تستر الجسم اكثر....وهن طالعات من غرفة فاطمة.. كان سعيد ياي صوب حجرته اللي عدال حجرة فاطمه..ويوم شاف نورة وقف مكانه... مب كانه شايفنها قبل شوي..ونورة استحت ونزلت راسها ..
فاطمة: ها سعيييييييييد.... سلمت على نورة انته؟؟
فاطمة الخبلة من ربشتها نست ان نورة مخبرتنهن من قبل انها تلاقت وياه عند الباب وعطاها البامبرز....
سعيد: هي نعم سلمت عليها عند الباب...
فاطمة: بلاك خليت الرياييل وراكب فوق؟
سعيد: بتسبح من اصبحت وانا ساير راد... بعدين بنظهر انا وناصر وفيصل..بنتحوط شوي وبنرد عند العشا...
فاطمه: اهااااااااااا ياحيكم والله برايك عيل بروذر...
سعيد وعيونه متعلقه بنورة اللي منزلة عيونها عالارض..
سعيد: اوكي سيستر..شي في خاطركم علينا من براا؟!
فاطمه ونورة: لا سلامتك...
سعيد الله يسلمكن...فمان الله...
وراح صوب حجرته وقلبه يرقص رقص... مرتين اشوفهاخلال ثلاث ساعات نعمة من الله.. فاطمة ونورة سارن للصالة وحصلن بو فيصل وام فيصل يالسه ويا حصه وشيخه والبنات منى ومنال..يلسن وياهن..اما حمده فكانت ماتطلع جدام بو فيصل عشان جي يلست عند عليا داخل القسم..... وعيالها لطيفة وسهيل يالسين يلاعبون بنت عليا سلامه في نفس الغرفه...
يوم يت الساعه 9 سارت شيخة وفاطمة ولحقتهن نورة بالغصب عشان يرتبن المطعم اللي عدال الميلس عشان يتعشون الرياييل.. وكانن يرتبن الاكل ويوزعن الصحون يوم حدر عليهن سعيد... انصدم يوم شاف نورة على باله بس خواته موجودات..بس مابين شي على ويهه..ولو انه كان يقاوم بقوو انه يصد صوب نورة.. خواته موجودات ومافيه يسوي لعمرة سالفه ...لو فاطمة بروحها ماعليه لانه كان يدري انها حاسه فيه واللي في خاطره.. بس شيخة مايروم يسوي حركات جدامها...
سعيد: خلصتن.؟؟ والا بتيبن بعدكن شي؟
شيخة: باقي الماي والعصير بس...يواعا انتوا؟
سعيد : وايد والله...انا ماتغديت اليوم...
فاطمة: انزين خمس دقايق وبنخلص ... بخلي البشكارة تيب العصير والماي..
سعيد: تمام...
وطلع عنهن بدون مايطالع نورة.... يدري انها بتعصب من هالتجاهل ..لكن هالشي لمصلحتها...وفعلا نورة احتارت بحركته هذي... العصر كان الشوق يطلع من عيونه ..والحين حتىولا صد صوبها... برايه يمكن متظايق من شي...
خلصن شغلهن في المطعم وسارن داخل البيت عند باقي الحريم....وبعد ماتعشوا الرياييل رفعت البشكارة الصحون ويابت عشا يديد معزوول للحريم.. وين الحريم وتعشن وربشتهن وسوالفهن واصله اخر الحاره...لدرجة ان حصه عورها راسها...بس بصراحه كانت يلسه ما تتفوت...ردن البنات للصالة وحمده وياهن... اما ام فيصل استسمحت منهن وراحت ترقد..يوم وصلت الساعه 11 راحت حمده بعد بترقد لانه ناصر رد من برا ويا فيصل... وكل واحد منهم سار يرقد ..تمن البنات بس سهرانات في الصالة لين 1...
وسعيد يدري انهن يالسات في الصالة..وتم ارووحه.. ملان..متردد يسير عندهن والا لا؟.. عقب قال لا بسير ارقد احسن لي عن اقعد احرجهن...برايهن على راحتهن... سار صوب حجرته وسكر بابه وانسدح على هالشبرية.. يبا يرقد لكن مب رايم...كيف بيروم يرقد وهو يدري انه نورة عندهم في البيت... مع ذلك مايقدر يقعد عندها..ياربي لازم هالعذاب كل ماتينا؟؟؟...ويوم تروح بعد عذاب...شو هالحاله.؟!..كان وده يخطبها اليوم قبل باجر...بس اختها حصه بعدها ماعرست..وابوهن ماايوز الصغيرة قبل العوده... والاخس انه هو سعيد اكبر من حصه بعد..فاذا يا يخطب بيتحسبونه يبا حصه.. واذا قالهم لا نورة..بيقولون ليش؟ شمعنا نورة؟ وشو بينك وبينها..وسوالف وايده.... عشان جي كان يتصبر ... واول ماتنخطب حصه بيكون اول واحد ايي يخطب نورة ...ووعد نفسه بهالشي قبل ماتغفى عينه..ورقد..
بالباجر..نورة كانت ناشه من الفجر...لانه طبيعتها ماتعرف ترقد فمكان غريب عليها.. ولو رقدت تنش اول الناس وماييها الرقاد عقب... عشان جي قامت وتسبحت وصلت الفجر بدون ماتوعي فاطمه...فاطمة رقادها ثجيل لو سمعت قنبلة مابتنش... نورة كانت لابسة بجامة نوم بس يديها طويله ولبست شيلتها البيظا ونزلت تحت.. كانت بعدها الساعه خمس ونص... ومحد ناش غير البشكارة...مرت عدال غرفة سعيد... وفلحظة طيش لصقت اذنها على باب سعيد تتسمع.... هدووء.. بس ينسمع صوت المكيف ...دومه يحب حجرته ثلاجه يوم يرقد...ابتسمت وكملت طريجها لتحت... راحت صوب المطبخ وحصلت البشكارة توها مخلصه الشاي...صبت لعمرها كوب وراحت للحووش. ويلست عالحشيش...كان الجوو روووووعه.... الشمس بعدها ماطلعت وبرااااد ...دوومها كل ما تي بيت خالها تنش الفجر وتيلس في هالمكان.....وتفكر بسعيد..وتتوقع شو بيصير في هاليوم.... ان شاء الله مايقرر ناصر يرد العين الصبح... كانت سرحانه فما حست ان حد يتقرب منها لين ماشافت حد واقف جدامها..رفعت راسها وشافت سعيد يتبسم..ولابس بجامه نوم هو بعد ... قفطت نورة وتبسمت..اول مره حد يكشفها بقعداتها الفجر...
سعيد: صباح الخير..
نورة: صباح النور والسرور...
سعيد: احين انتي على ذاك السهر امس..وناشه الفجر؟ شو موعنج؟
نورة: نشيت اصلي واصلا شبعت رقاد... ييت ويلست...وانته.؟
سعيد: انا قبل شوي ناش... قلت بستغل الجو وبسير البحر..
بطلت نورة عيونها.....البحر؟؟!!!..ياااااااااااااااااااي..ابا اروووح من زمان ماسرت البحر....
نورة: ليش تغايظ عاده؟ ابا اسير البحر انا...
سعيد: ههههههههههاي... انزين مايخالف..وعي البنات وبوديكن وياي....
نورة: ليتها بهالسهووولة...ناصر مابيطيع....بيعصب اذا درى..
سعيد: ماعليج من ناصر.. البحر الا ورانا.... نص ساعه وبنرد..والحين الساعه 6..ناصر مابينش احين ولا بيدري...
قال هالكلام ويا يقعد جدامها عالحشيش....ونورة قلبها يدق بالقوو ومرتبكه اكثر عن قبل...
نورة: هيه..!!. خربني انزين...خراااب انته.. شقايل اطلع بدون شور اخوووويه؟؟
سعيد: افااااا..خليتيني غريب عنج احين؟
نورة: لا سعيد مب غريب..بس مايصير اطلع بدون مايدري...
سعيد: انتي في خاطرج البحر والا لا؟
نورة: وااااااااااااااااااااايد...
سعيد: خلاص قومي وعي فطيم بس..بنطلع وبنرد ولا حد بيدري.. وعلى ظمانتي... ماريدج تردين العين والبحر يتم في خاطرج...ناصر مابيودييج تعرفينه..
تمت نورة اطالع فيه وتفكر...متردده.... مافيها شي اذا سارت البحر ويا ولد خالها وبنت خالها...تراهم اهلها هذيل بعد..الا اهلي انا بروحهم يصعبووون الامور وكله عندهم عيب... بس لو دروا؟؟ بيمنعوني عن الشارجه عقب صدق....وبيقولون عني رمسات انا في غنى عنها... بس صدقة سعيد.. ماكد شافت حد من اهل البيت ينش هالحزه؟ كلهم ينشون 9 والا 10...
نورة: اوكي..بسير اوعي فاطمه ..
وقامت عشان تسير توعيها ....
سعيد: نورة...اقولج..
نورة: لبيه..!
سعيد: لبيتي حايه...لا تلبسن عبي...تعالن بشيل بيظ...
انصدمت نورة من هالرمسه ....ماكد سوتها ...كيف تسويها احين؟؟
نورة: شوووووووووووو؟؟؟ لا صدق انته ناوي تيب آخرتي...شو شيل بيظ ..؟ وين عايشين؟
سعيد: هههههههههههه ياماما هاي الشارجه..والبحر اللي ورانا ماحد فيه هالحزه انا كل يوم اسير... وبعدين فرضا حد كان واعي على ردتنا... يشوفكن بشيل بيظ مب بعبايا وحاله.. واذا سالوكن قولولهم كنتن تتمشن ورا البيت بس... يعني شكلكن جي ماطلعتن من البيت... فهمتي؟؟
نورة: اهااااااااااااااااااا زين فهمت.... بس اذا شفت حد عالبحر مابنزل من السياره..
سعيد: على ظمانتي..سيري احين وعي فطيم عشان مايتاخر الوقت...
سارت نورة وسعيد تم مستااااااااانس في خاطره انه اقنعها تسير وياه.... ويا فطيم بيتصرف بحرية اكثر...فطيم غير عن خواته كلهن.... صح صغيره لكن عقلها كبير ومكاااره....
بعد عشر دقااايق ..نزلت فطيم ونورة... وفطيم شكلها مستعده ترقد في السياره بعد...بس ناشة عسب خاطر نورة وخاطر اخووها بعد.. وصلوا البحر اللي كان فعلا فاااظيي..نورة كانت مستحية وقافطه من العالم كله لانها بشيلة بيظا..وتحس دوم ان حد يراقبها...الله يهديك يا سعيد خليتني اطلع بهالشيلة... عنبووو سيلانية انا؟؟؟ ...بس بعد شوي نست هالسالفه وقعدت تلعب بالبحر ويا فطيم...وسعيد يلس عدال سيارته بعيد عنهن عشان تاخذ راحتها..بس بعد شوي تعب من اليلسه.. هو ياي عشان يتمشى عالبحر مب عشان يقعد بعيد... وعقب قام وتمشى في الصوب الثاني بعيد عن قوم نورة ... وهو يتمشى حصل صدفة كبييير وملسا..شكلها مثل اللي ينباع في المحلات..وماصدق سعيد بانها طبيعية...شكلها صناعية من حلاتها... وقرر انه يشلها..صراحه ماتتفوت...غسلها بماي البحر ورد للسياره...بعد ما مرت نص ساعه زقرهن من بعيد... وتم يظحك على اشكالهن كل وحده منهن شاله جلابيتها فوق ومخيسات ريولهن بالماي والرمل... بس احلى شي الوناسه اللي على ويوههن...
نورة: سعيد والله ماشبعت...
سعيد: لا بسج نورة اخاف حد ينش ....بعدين الجو بدا يحرر شوي..
نورة: اوكي مب مشكله ..بس صدق مشكووور والله على هالسيرة... صدق كان خاطري بالبحر...
سعيد: العفووو نورة... ويالله روحنا..
يوم شافهن على وشك بيركبن السياره...زاغ على سيارته...بيخيسنها....
سعيد: صبر صبر..وين تبن؟؟؟ غسلن ريولكن اول... طالع كيف لاصق فيها الرمل...
فاطمة: يعني تبانا نرد البحر ونغسل ريولنا وعقب نرد لين هني مشي عشان تخيس ريولنا مره ثانية؟؟ ذكي اخوويه...
سعيد : غصبن عنج ذكي... بتحصلن دبتين ماي ورا... غسلن ريولكن وركبن...
وهم في السياره..فاطمه كانت جدام وانتبهت على الصدفه اللي حاطنها سعيد جدام السكان...
فاطمه: واااااااااااااااو من وين يبتها..روووووووعه .
سعيد: حصلتها في البحر تصدقين...شكلها صناعية....
فاطمه: وين صناعية ..منوهاللي متفيج بيحط صدفة صناعية عالبحر...؟... لالا طبيعية..بس طلعت من حظك سبحان الله...شوفي نورة محلاها...
نورة: هي والله رهيبه...
سعيد: عيبتج نورة؟
نورة: هي ..وايد...بتتكرم وتعطيني اياها..البحر الا وراكم....
سعيد: لا..ههههههههههه...
نورة:ههههههه يالبخيل...

وصلوا البيت ونورة حاسه نفسها طايرة من الفرحه...حست انها في هالسيرة تقربت من سعيد واااايد.. هذا اكثر من اللي كانت تحلم به قبل مايت الشارجه....يوم وصلوا البيت نزلن البنات قبل سعيد..وراحن سيده صوب المطبخ عطشانات...فاطمه كانت مدمنه بيبسي... على طول فجت الثلاجه وطلعت غرشتين حقها وحق نورة...

فاطمه فتحت غرشتها يلست على الطاولة مالت المطبخ تشرب... نورة تساندت على كبت المطبخ وهي تحاول تفتح الغرشه مب رايمه.عصصصصه... بعد شوي لحقهن سعيد لانه هو بعد عطشان ويدور ماي... دخل المطبخ وشاف فاطمه تشرب من هالبيبسي... ونورة ماسكه غرشتها بعد...ياسلام عليج يافطيم اسميج خراب...
سعيد: فطوووم!!...بيبسي عالريييج؟؟؟ ارحمي عمرج...
فاطمه: عطشاااااااانه خلني...
التفت سعيد صوب نورة .... وهو يطالعها ويطالع غرشتها اللي بين ايدها وبعدها مابطلتها... زاغت نورة...
نورة: انا شاربه شاهي قبل والله...
سعيد مارام يمسك عمره... ونقع من الظحك.... وهو في خاطره يقول فديييتها تتروع مني... اسميج مينونه يوم تتروعين من سعيد..... لو تدري بالحب اللي في قلبه لها ما تروعت...
سعيد: هل العين مانقولهم شي... مارمتي تبطلينها...؟
نورة: لا..عصّه...
مد سعيد ايده وخذ غرشة البيبسي من عندها... بس مابطلها...
سعيد: ولو بطلتها ؟...شو لي؟؟؟ (ويتبسم)....
نورة: انته شو تبا؟؟
سعيد من زود فرحته بهاليوم صار متهور بتعامله معاها....
سعيد: بشرب منها...
فاطمه عقدت حياتها.... مصخها سعيد ويا البنت... صح انا فاتحه له مجال بس عاد مب جي...
فاطمه: سعيد وايد بيبسي في الثلاجه....
سعيد سكت عن فطيم ولبسها... وعيونه على نورة.....
سعيد: هااا؟؟ شو قلتي؟..
نورة استوت طماااااااااااطة من زود ماهي منحرجه...شو بلاه علي سعيد... مزودنها شوي..بس حاولت تلطف الموقف... وما تبين احراجها...
نورة: ههههههههههههههاي..وايد مكبر السالفه...بالعافيه عليك اشرب...
ابتسم سعيد ومن زود خباله مااحس باي احراج.....بطل غرشة البيبسي وشرب منها..وعطاها الغرشه...
سعيد: شربي بشوووفج...
بطلت نورة عيونها...تخبل الريال....مب صاحي... فاطمه عصبت و نقزت من الطاولة ويت صوبهم...
فاطمه: سعيد...!!!...شو بلاك عالبنت.؟؟؟...شو هاذا شربي ماشربي...روح روح خلها فحالها...صدق ماصخ...
فاطمه كانت معصبه عليه..... بس هو لبسها كالعاده... وتم يطالع فويه نورة ...ونورة اطالعه مستغربه من تصرفاته....
سعيد: اجزّيني نورة؟؟
نورة: لا مااجزززز......
سعيد: انتي بتشربين منها يعني عقب ماطلع...ليش ماتشربين جدامي...؟
نورة: وشو الفرق انزين...
سعيد: فيه فرق.....شربي...
الكل تم ساكت... وكل حد يطالع في الثاني... نورة حست انها في مقلب... ليش سعيد يسوي جي؟؟...يدري انه عيب هالحركات....بلاه عليه اليوم؟... بس ماحبت تكبر السالفه... وهو صدقه..بتشرب من الغرشه بعد مايروح... وليش ماتشرب جدامه يعني...؟؟؟... خلها تجلب الاحراج عليه هو.... رفعت الغرشه وشربت منها...
نورة: ارتحت؟..
نورة كانت تبتسم.... مينون سعيد ياناس... سعيد تغيرت نظرته من تحدي وغياظ لنظرة حنونه... بروحه هو مب فاهم ليش يسوي هالحركات... مب عادته يتحرش بها جي... وعيب اصلا....بس نورة...فاهمة عليه...وفاهمة اللي في خاطرة... وما بتنقد عليه حركاته....وهو متاكد من هالشي.... ابتسم ونزل عيونه وطلع من المطبخ ساير صوب البيت...

الجزء الخامس..

دخل سعيد البيت وهو حاس نفسه بيموت من الوناسه.. حتى يوم شاف الريوق انفتحت شهيته..ويلس يتريق قبل الناس... خلص وراح حجرته فوق .....عقب تذكر شي ورد طلع ونزل عند سيارته... خذ الصدفة ورد يركب فوق ..ويوم دخل البيت سمع اصواتهن في الصالة وين حاطين الريوق... طاف عنهن وسار فوق وهو يتبسم...ويتذكر غلاسته على نورة.... ياويلج يا نوره ان فهمتيني غلط...سكر على عمرة باب حجرته وسار صوب مكتبه.. طلع ورقه صغيره وقصها على شكل مستطيل رفيييييع.... كتب عليه بالاسود..
. “Just Remember “ ..
وكتب تاريخ اليوم... وطواها وحطها داخل الصدفه.. بس بشكل تكون تنشاف.. ودسها في الكبت مؤقتا لين مايتصرف فيها.... وراح يتسبح...
نورة وفاطمه..وهن يالسات يتريقن...
فاطمه: سوري نورة على هالموقف البايخ...مادري شفيه سعيد اليوم...مب عوايده.. لا تاخذين بخاطرج منه..
نورة: لا عااااادي ادريبه يسوي سوالف الا...
اطالعت فاطمه نورة بنص عين وهي تبتسم...
فاطمه: سوالف.!!!!!.. ادريبها سوالفكم انا...مب عليه هالحركات كل شي مكشوف حبيبتي...
نورة قفطت...
نورة: هههههههههههه غربلات بليسج... شو سوالفه يعني مبينا؟؟... صكي السالفه بس عن حد يطب علينا..
فاطمه: لا والله؟... لاحظتي انتي انه يا وتريق..؟..ولا عالبااااااااااال والله ولا جنه مسوي شي مسود الويه...
نورة: حليله يعني حرمتي عليه العيشه بعد.؟؟... خليه يتريق ماسوا شي هو..غير سوالف... متخبل اليوم..
فاطمه: اليوم؟؟ من سمع بييتكم بيتنا وهو متخبل... والله طفربنا..نحن دوم نقوله اقعد ويانا وسولف وجي ..بس الايام الاخيره قمنا نطلب منه يطلع برا البيت....
تمت نورة تظحك وهي قافطه...لهالدرجه يعني؟؟ فديتك والله اثرة حالي من حاله...كملن ريوقن وسارن فوق.. كانت توها الساعه ثمان ومحد نش بعدهم رقود...دخلن الحجره وسكرن الباب وقعدن يسوولفن رباعه.. وبعد شوي سمعن دق عالباب...
فاطمه: هاااااااااااااااا......
سعيد: فطيم..تعالي حجرتي اباج شوي...
فاطمه: انزين... (صدت صوب نورة).. برد لج...
طلعت فاطمه ولحقت سعيد لحجرته... وهذا دخل وسكر الباب وراهم....
سعيد: يلسي...
سارت فاطمه صوب شبريته ويلست...
فاطمه: يلسنا...هاات شو عندك؟..
سعيد: اول بادي...اللي صار اليوم...ماريد حد يعرف عنه...بينا نحن الثلاث ....
فاطمه: تطري حركاتك البايخه في المطبخ؟؟؟
فاطمه بعدها مقهووورة منه...
سعيد: ههههههههههههاي... هذا وبعد اللي صار قبل...اطري سيرة البحر...ماريد حد يعرف عنها حتى البنات...مب تسيرين تخبرين حد....تسمعين.؟
فاطمه: اسمع...
سعيد: تمام.... (راح وفتح الكبت وطلع الصدفه ..ورد لفاطمه ويلس جدامها عالشبرية)... اندوج هذي..
فاطمه: ياسلااااااااااام هذي جايزة السكوووووت....؟؟..مشكوووور ياخوي...
سعيد: مب حقج يابقرة.... اباج ادسينها فشنطة نورة....
فوّوولت فاطمه عليه...وحطت الصدفه عالشبرية...وكانت ملامحها جاده ...
فاطمه: سعيد...عيب عليك...تراك صدق مصختها ويا البنت اليوم....يسد اللي سويته....
سعيد: فطيم... انا ماسويت شي... انا كنت امزح وياها بس...وبعدين بلا هالشكليات يعني... انتي اكثر وحده تعرف اللي فخاطري صوب نورة...
فاطمه: بالله؟!!...يعني انته ماخليت هالشي واضح وضوووح الشمس للكل؟؟...
سعيد: ههههههههههههه شو اسوي والله خبلت بي هالبنت...
فاطمه: عيب يابابا عيييييييب...هذي بنت عمتك ومن اهلك...
سعيد: وبتستوي حرمه اخوج بعد قريب ان شاء الله...احين انجبي وسمعيني...
فاطمه: شو عندك بعد؟...
سعيد: فطيم ..لا تذليينا... تدرين اني ماروم اطلب من حد غيرج... وانا هالصدفه اباها توصللها...ماروم اعطيها اياها بروحي ولا اريدج تعطينها اياها ايد بايد..اخافها تردها.... اباها يوم توصل العين تشوفها...خشيها في شنطتها باي طريقه...المهم توصل...
فاطمه: انزين انزين... وانا شو لي من هذا كله؟ اتستر عليك واوصل لك سوالف...بدون مقابل؟؟ لا مايستوي...
سعيد: والله لج 500 ان ظمنت ان الصدفه وصلت لها...
مدت فاطمه ايدها وحطت كفها بكف سعيد تسلم عليه....
فاطمه: Deal..... اتفقنا....خل الصدفه عندك احين لانها هي في الغرفه ..يوم بكون بروحي بيي اشلها...
سعيد: فديت ماي سيستر انا...خلاص بحطها في الكبت...
فاطمه: تمام..
طلعت عنه وردت لحجرتها عند نورة...
نورة: شو يباج سعيد....؟!
فاطمه: سالوووفه صغيره بخبرج عنها عقب...
مر الوقت وهن يسولفن ويوم يت الساعه عشر الصبح..بدلت نورة ثيابها ولبست جلابية كاشخه.. وشيلة بيظا ونزلت هي وفاطمه ...وماشاء الله حصلوا العالم كلها واعيه...جنهم متفقين ينشون ساعه وحده...
تخبرت نورة عن حصه وقالولها عند اختها..... وعلى طول راحت عندهن...حرام مايلسن ويا عليا وايد...وتمن عندها هن وبنات خالهن لين الظهر حزة الغدا.... وتغدوا ذاك المشوااي اللي ماشي عقبه... وعقب الغدا على طول قالهم ناصر انهم بيسيروون العين ... ركبن البنات فوق عشان يلبسن عبيهن ويزهبن الشنط... ويوم خلصت نورة وسكرت شنطتها ولبست عباتها..يايه بتشل الشنطه بتنزلها....
فاطمه: لالالالالالالالا والله ماتشلينها حلفت.... نزلي ويا قوم حصه وامرن البشكاره تي تشلها...
نورة: طالع هاي...؟...ماترزاااااا صغييره...بشلها انا والله عادي...
فاطمه: قلت لج لا ..خلاص انا حلفت..سبقني انتن انا بسير الحمام وبلحقكن...ولا تنسين اطرشين البشكاره..
نورة: خلااص على راحتج ...بنترياج تحت...لا تبطين ...
وطلعت نورة مع حصه وشيخه...وبعد شوي طلعت فاطمه تشوف اذا محد في الممر..دخلت حجرة سعيد بسرعه وطلعت الصدفه وردت حجرتها وخشتها في شنطه نورة...وردت رتبت كل شي مثل ماكان... وسكرت الشنطه وحطتها عدال الباب...ونزلت تحت عشان تسلم عليهم...
يوم حملوا كل شي في السيارة... كان الكل واقف في الحوووش... وكلهم رباعه رياييل وحريم...وسعيد يالله يالله اجبر عمره انه مايصد صوب نورة.. مايدري شو بيصير فيه وهو يشوفها بتروح عنهم..... ماشبعت منها ...ياربي ماريدها تروح..... دخيلكم انسوها وروحوا عنها...ياربي احين بتسير ومايندرا متى بشوفها مره ثانيه....عقب شهر؟ والا شهرين.....والا سنه؟؟....الله كريم...والله يعيني على فراقها عقب ماتعلقت بها زياده اكثر عن قبل...عقب السلامات والتوصيات ركبوا قوم ناصر السياره... خالهم هلال وفيصل وسعيد هم اللي طلعوا وياهم لين السياره... والحريم تمن داخل البيت... وراحوا....وراح قلب سعيد وياهم...كان وده يركب سيارته ويلحقهم.... بس رد داخل البيت... ومن زود ماهو مظايق رقد... عشان يشرد من التفكير...
وصلوا قوم ناصر البيت حوالي الساعه خمس العصر... ونورة كانت مظايقه.. ماكانت تبا تفارقهم..كان ودها تسكن عندهم..بس طبعا هالشي مب منطقي..والمفروض ماتفكر فيه اصلا..نزلوا الاغراض وشلت نورة شنطتها ودخلت البيت... حصلت امها يالسها مع ميرة حرمة خالد.. والعيال وياهم ...سلمت عليهم وركبت على طول فوق..توها بس حست بالتعب... ناشة من الفجر وراقده اصلا متاخر...بتروح ترقد لين المغرب بتريح اعصابها شوي... دخلت حجرتها ..وعقت العباة والشيلة ..وحطت الشنطة عدال الكبت... طلعت بجامه من الكبت..وبدلت ثيابها وعلى طول رقدت بدون ماتحس...

في امريكا.... عبد الله وخليفه وربيعهم علي كانوا يالسين كلهم في غرفة خليفة... علي وخليفه يطالعون فلم دي في دي ومتسدحين..... وعبد الله متسدح عالشبرية وهو يفكر باهله.. بشوااابه... وخوانه وخواااته...وعيال عمه...واكثر شي عنوووده... نش ويلس عدال خليفه...
عبد الله: خلوووف.. ماتولهت عالبلاد؟؟...
خليفة: اتخبرني؟؟... والله اني تولهت عليييها واااايد.. ويوم برد ان شاء الله افكر اني مارد هني...ياخي لاعت جبدي...
علي: شو تخبلت انته؟؟..صابر اربع سنين ومابتصبر سنه؟..
عبد الله: هي صدقه..هانت ماباقي الا سنه...
خليفة: الله كريم...الله بيصبرني.. احلى شي انه تام اسبوعين عن الدراسه وبنرد لبلاد...
عبد الله: انا من احين بطني فيه حيسه ..مستانس ياخي...ليته باجر ...
خليفة: عين خير..شو باجر ماتشرينا هدايا بعدنا...
علي: انزين باجر السبت...واجازة.. سيروا وخلصوا عماركم...
عبد الله: هي والله يبالنا....
خليفة: يصير خير... عبود صدق منو بيستقبلنا؟.. اتصلت انته بناصر والااتصل انا بحمدان والا سلطان والا حميد..
عبد الله: لالا..ليش نعبل عليهم ايوونا لين دبي.... سعيد ولد خالي في الشارجه وقريب ..بيستقبلنا وبييبنا العين...
خليفة: وييييين ايييبنا بتفزع الريال لين العين يوصلنا؟...
عبد الله: سعيد مايخالف عليه...يحب يسير العين..واصلا ماقام يسير لاني انا مب في البيت.. بعدين انته لا تخبر حد...خلنا نسوي لهم مفاجأة...
خليفة: هزرك؟...
عبد الله: هي نعم...خلها جي احسن...
خليفة: على راحتك...
علي: خلصتوا نقاشات؟؟... يالله عاد فضّوا هالمؤتمر وخلونا نتابع الفلم...

في العين.. حصه طلعت من حجرتها ملانه.... خلصت شغلها للجامعة وقعدت فاظية ماتعرف شو تسوي... بتسير توعي نوروة ...شو مرقدنها هالكثر؟؟...فتحت حجرة نورة..وحصلتها ثلللللج من المكيف...والليت مبند..صدق حجرة ترقد...
حصة: وااابوويه شو هذااا...نوروووووووه... قومي بسج...قومي صلي المغرب...
نورة: ..................هاااا...انزين انزين...
حصة: شو انزين انزين...قومي... وبعدين شو هذا انتي عايشه فثلاجة..؟..(راحت حصة وبندت المكيف..).. نشت نورة...
نورة: حصوه خليه شغااال ماعرف بلااااه...
حصه: لا برد....بعدين بسج قومي صلي...انا يالسه بروحي..امي وميرة ساروا صوب بيت عمي وانا ارووحي.... ربع ساعه واشوفج تحت...
وطلعت حصة من الحجرة ... نشت نورة وهي تتحرطم...
نورة: اوفف منج..ماخذه طبع العيوووووز

دخلت حمامها تغسلت وتوضت وردت تصلي....لبست شيلتها البيضا وتعطرت ونزلت تونس حصه....
وحصلتها يالسه في الصالة وتشرب جاهي... حصه يوم شافت اختها يت صبت لها كوب... ونورة يت ويلست حذال اختها..
حصة: شياج من ييتي رقدتي..؟؟
نورة: والله تعبت.. تدرين امس رقدنا متاخر ونشيت من وقت...
حصة: احيده عليج امتحان من عشر درجات باجر...ماشوفج درستي شي...
نورة: اووووووووووووه !!..صح والله ذكرتيني...ماعليه بدرس قبل مارقد ..بسيييط....
حصة: الله يوفقج... اووف متى بنتخرج وبنفتك..؟..
نورة: ماشي باقي عاد هانت...اظني الا شهر ونص لاه؟..
حصة: هي..الله يصبرنا على هالشهر ونص...
نورة: تعالي..انتي مافصلتي لين احين فستان تخرج.... بيسووولكم حفله لاااه؟..
حصة: اكيييد..يخططون حقها من احين... بيسوونها قبل الامتحانات النهائية علىاخر الكورس..
نورة: اليوم انا وفطووم نرمس عن حفلج..شفت عندها مجلات مال ازياء ..فيها فساااتين بس شوووووو..جنان والله... عاد انا خذت منها مجلتين عشان تختارين فستان...
حصة: والله زين افتكرتي...انا الا اأجل الموضوووع..وانساااه... انزين قومي هاتيهن بنشووفهن..
نورة: نسير فوق احسن...
حصة: لا مابنخلي البيت فاظي... سيري هاتيهن وبترياج..
نورة: تمام عيل....
سارت نورة حجرتها.. شلت شنطتها اللي فيها الملابس ...اللي مافتحتها بعدها....وحطتها على الشبرية...بطلتها ..بس انتبهت انها بطلتها بالمجلوب..واللي تحت صار فوووق....وانصدمت من اللي شافته...هالصدفه شو يابها عندي؟؟؟...صدفة سعييد فديييته... مدت ايدها وهي مبهوورة من اللي صاير..ومخها مسكر مب عارفه تفكر عدل...شلت الصدفه وقعدت اجلب فيها تتاكد انها هي نفسها... راس الورقة اللي خاشنها سعيد كان طالع..طلعت نورة الورقة وابتسامتها منورة ويهها...وقرتها...
Just Remember… وتاريخ اليوم... ماتت نورة من الفرحه وحظنت الصدفه والورقه ..وااااي فدييييتك ياسعيييد...يعلني ماخلى منك ياربي....اكيد بتذكر هاليوم...مايحتاج توصيني...كل دقيقة وياك اذكرها وحافظتنها فقلبي.....تمت فترة طويلة وهي تفكر فيه وتتخيل كيف دبر الموضوع هذا ...بشو كان يفكر ؟.. يوم طلبتها منه قالها لا... واي فديتك ياللوووتي...
فجاه تذكرت حصة اللي تترياها تحت... دست الصدفة في الكبت وخذت المجلات وطلعت...يوم نزلت تحت حصلت حمده يالسه ويا حصه...وعيالها محد...
نورة: هاا حمده؟... وين لعياااال؟؟
حمده: والله رقدوا....تعبانين من سيرة الشارجه...مايندرابهم جان ماينشوون نص الليل..الله يستر..
حصة: لالا مابينشووون اذا ناصر ابووهم....رقاااااااااااد...
حمده: ههههههههه حرام عليج...لا تقولون شي عن نصووووري..
نورة: ياويل حالي عالحب..صوبنا...
حصة: نوروه عطيني المجلاات...يبتيهن وحطيتيهن بعيد..!!... حمده تعالي اختاري ويانا..
حمده: اللــــه كشخه.. من وين يبتيهن نورة؟.
نورة: يبتهن من عند فطووم ام لعلوووم....
حمده: هذي فاااااطمه... ماشاء الله عليها ماتقولون 17 سنه...صدق انها ام لعلوووم...بعدين ماشاء الله عليها جميييلة وايد... عليها عيون وشفايف..ماشاء الله..
حصة: هي ماشاء الله عليها..جمالها غريب.... تبهرج اول ماتشوفينها بس يوم ادققين تشوفينها ناعمه وايد...
حمده: جان ماقول لامي تخطبها لعمر اخووويه... توه سنه ثانيه في التقنية..
نورة: كشخه...بس اظني انها تبا تكمل دراسه.... سمعتها تقول تبا تكمل في جامعتنا...مايندرا بخالي يطيع والا لا...
حصة: ليش مايطيع؟.. اختها شيخة دارسة قبلها في جامعتنا.... الا امنه الوحيده اللي ماكملت دراسة.. ماظني يمانع...
نورة: مب عن هالشي ارمس انا...ادريبه ما بيمانع بسالفة الدراسه في العين...بس الحبيبة اون تقولي اليوم.. بسكن عندكم...وسووولي حجرة... ماريد اسكن في السكن ويا البنات...
حصة: هههههههههههههههههههاي ظحكتيني.... جنها الا تمزح؟؟...
نورة: لا والله كانت تتكلم جد...
حصة: خبلة هذي..؟؟ لو بعدها ما تعرف ابوووووها كيف يفكر..؟؟
حمده: ليش شو فيها يعني؟ تراكم اهلها..
حصة: حبيبتي ابوها اخو امي.... واكبر منها... مسوي لافكارة استنساخ في راس امي....يعني يفكرون بنفس الطريقة....وانتي تعرفين عاد عمتج كيف تفكر...خذت الماجستير من اخوها...والدكتوراة من عند ابووووويه ههههه.....
حمده: اهاااااااااااااااا.... لالا مابيطيع عيل..
نورة: تخيلي لو طاااااع؟؟؟...يعني ليش مابيطيع؟؟ اخواني كلهم معرسين وبحسبة اخووها فيصل..واذا على عبد الله تراه مب موجوود في البيت يدرس براااا...وهو اصلا خاطب... يعني البنت ماعليها شي عاادي اذا بتقعد عندنا...
حصة: اذا فكر على هالاساس يمكن يطيع...
نورة: ماعليج من فطيم....مب هينه تراها.... اسميها بتيب الموافقة...
حصة: ههههههههههه ان شاء الله...كشخه لو بتسكن عندنا والله...فطيم ربشة...حلوه اليلسة وياها..
نورة: هي والله.... ان شاء الله يوافق...
حصة: هذا الفستااان عجيب....
تمن نورة وحمده يطالعن حصة وهي تغير الموضوع فجاه..وفيهن ظحكة بس ماسكاتنها..... وعقب شوي بروحهن نسن سالفة فاطمه واندمجن في الكاتالوجات...لين مادخلت امهن وميرة عليهن الصالة ...وبعدها بوقت يا الشايب ويا ولده خالد...فحطوا العشا وتعشوا لانه ناصر قايل بيتعشى ويا ربيعه....وبعد العشا كل حد سار حجرته ...
نورة اول ماردت حجرتها قفلت الباب ...وعلى طول طلعت الصدفة...ولوت عليها.... وفكرت بالسالفه عدل... وعرفت ان فطيم اللي خشت الصدفة في شنطتها...لانها اخر وحده كانت في الغرفه بعد ماطلعوا...وطبعا مستحيل سعيد يحطها بنفسه...اكيد هو موصنها...رجعت الصدفة مكانها وطلعت كتبها وقعدت تدرس وتحظر وتحل واجباتها لين يت الساعه 12...وبعدها رقدت عشان ماتتاخر بالنشة باجر الصبح...

في امريكا..بعد اسبوع ونص...عبد الله وخليفة مختبصين..لانهم بعد يومين بيرجعون لبلاد..كان عبد الله فغرفته يوم دخل عليه خليفة وويهه معتفس...
خليفة: عبود ابا شنطه زياده...
عبد الله: شنطتين من لكبااار عندك يالظالم شو ترستهن.؟؟..
خليفة: ياسلااام...تراك بتشل ثلاث شنط...
عبدالله: انا عندي خوات ياخي وحريم اخوان....
خليفة: ولانه عندك خوات وحريم خوان وام فوووقهن..محتاج شنطه ثالثه انا بعد....
عبد الله: يعني..؟؟!
خليفة: اوووف...لازم بالشرح المفصل.... تذكرت اني ماخذت لهن شي.. وفظيحه اييهم خلي..سرت اليوم الصبح وتشرييت حق عموووو وعليا وحصه ونورة..وخذت هدية بسيطة لحرمة ناصر.. اخافها تزعل...
عبدالله: وشحقه انته متشري حق خواتي...؟؟ مايبن عليك شي خلووف...
خليفة: وشمعنى انته متشري حق خواتي..؟؟؟
عبد الله: ياخي ميرة حرمه اخوووويه....وعنوووووده خطيبتي... بتشرالهن على كيفي...
خليفة: وخواتك يستون بنات عمي اذا كنت تذكر...اما حرمة ناصر فــمن باب المجاملة لا غير..
عبدالله: يارقيق المشاعر انته....انزين ماعليه بنسرق شنطه من عند علي...ولا يهمك...
خليفة: حلييييييييييلة هذا ارووحه احتر...منتف راس ماله شنطه امس شايفنها...باجر تروح انته تشتريلي شنطه...لاني مب فاظي عندي امتحان بحضر له..
عبد الله: ولا يهمك ولد عمي...
خليفة: تسلم والله...تعال رحلتنا وتحددت.. ونعرف متى بنوصل...اتصلت انته بسعيد تخبره؟؟
عبد الله: لا والله بعدني...احين بتصله قبل ماانسى...اخافه يرتبط بشي ثاني بعد....
طلع عبد الله تيلفوونه واتصل برقم سعيد.....وفهالوقت سعيد كان راكب سيارته وساير صوب البيت...
سعيد: آآآآلووو...
عبد الله: السلام عليكم...مرحبااا الساااااع بو عسكووور...
سعيد: هلاااااااااااا والله وغلااا وعليك السلاااااااااام.... ياحيالله هالصووت والله شحالك عبد الله.؟
عبد الله: بخييييييييير ونعمه الحمد لله..شحالك انته وشحاال الاهل كلهم..واهل العيين..واختي علااااااااااايه؟؟
سعيد: كلهم بخير ونعمه ...واختك علاية ربت ويابت ولد سمووه هلال ..وابشرك ترا طالع علي يعني انته طااح كرتك خلاااص...
عبد الله: لاوالله؟؟.. تستااااااااااهل فديتها والله اختي... يوووه زين خبرتني بنيب للياهل هدية بعد ويانا..مابنقصر بولي العهد....
سعيد: ناويين على الردة ماشاء الله؟...متىىىى؟؟؟؟
عبد الله: بالخميس الساعه 11 ونص بنكون فمطار دبي باذن الله تعالى.... هاه..؟ بتستقبلنا والا ندورلنا حد ثاني؟..
سعيد: افاا عليك ياريااااااااال والله من عيووووني الثنتين ماطلبت بس...ياحيك والله يوم بترد اشتقنالك..
عبد الله: الله يحييك والله ماتتخيل شكثر تولهت على البلاد واهلي كلهم..بس اخبرك .. لا تخبر حد موليه...نباها مفاجاه اوننّاااا...
سعيد: يعني محد يدري غيري؟؟..ياحظي... بس ترا غداكم عندنا...وبعد الغدا بوديكم انا صوب العين ترا متوله عليها ...وبعدين صراحه ماابا افوّت اشكالهم يوم بيتفاجؤوون فيك..
عبد الله: ههههههههههههاي والله اني اتحلم بهالموقف ليل نهار.... واحاول اخمّن منو اللي بيصيح من الفرحه ومنو بيغمى عليه...احم...
سعيد: منو هاللي خاقنك في امريكا من ورانا....لاحد بيصيح ولا حد بيطيح....الا بيكفخوووونك...ههههههه
عبد الله: هههههههه اذا بيكفخوني من حبهم لي...فديتني والله....خلاص اخبرك تراك خسرتني بسوالفك...بنسوولف يوم بنرد...بس لا تنسى دخيلك الخميس الساعه 11 ونص فمطار دبي...ولا تخبر حد مولية...ابلعها هالسالفه...
سعيد: ولا يهمك... توصلوون بالسلامه ان شاء الله وسلم على خليفه...
عبد الله: يبلغ ان شاء الله...فمان الله حبيبي...
سعيد: الله يحفظك...

سكر سعيد عن عبد الله وهو مستانس...حليلك ياولد عمتي... الله يوفقك بدراستك والا الغربة مب هينه والله.. كان توه واصل البيت..وقف سيارته ودخل .. سمع حسووس عندهم في الصالة..يوم دخل حصل امه يالسه وخواته شيخة وفاطمه ومنى ومنال ..ويالسة بينهن بنت خالته خولة... ماانصدم يوم شافها لانه متعود عليها كل يوم وطابه عليهم البيت... خولة تدرس في جامعة الشارجة وعمرها عشرين سنه... جميللة وجذابه... وهي طيبة ومرحة..بس مشكلتها انها مب ستييير... ماكانت تتحجب او تتغشى..وتحط ميك اب جدام أي حد عااادي... سعيد كان يعرف انها حاطه عينها عليه... بس بعيد عن خشمج يا خولة... ويين انتي ووين نوورة..؟...لاحظ سعيد وهو يسلم على الكل ان خولة شيلتها كانت على كتوفها... طالعته وابتسمت وماكلفت على نفسها تعدل شيلتها.. سعيد غض نظرة عنها...ما يبا ياخذ آثام والسبة هي...
سعيد: شحالج خولة؟؟ وشحال خالتي؟
خولة: هلا سعيد...بخير الله يعافيك...وامي تسلم عليك بخير وعافيه..
سعيد : الله يسلمج وياها من الشر... ردي السلام عليها ...
سار صوب امه ويلس حذالها وهو منتبه لنظرات خولة صووبه.... سعيد كان مستغرب من هالبنت.. كم مره قال لفاطمه او شيخه يكلمنها بخصوص الستر... بس كلهن ماطاعن.. مايبن يزعلنها ..ومافيهن يدخلن بخصوصياتها... وهو معصب على هالسالفه... سعيد كان على باله انه هي ما تتحجب بس جدامه وجدام فيصل اخوه... ولين هالوقت كان هالشي في باله...انه هي ماتكشف شعرها الا لانها تعتبرهم اهلها... يدري انها دلووعه هلها...وانها البكر عند خالته... وماعندها خوااان لهم سلطه عليها...ابووها فاااج وعادي عنده ..وامها مخلتنها على هواها... او بالاصح ان خولة هي اللي امشية امها على هواها.. ومتحكمه فيها...والام ماتبا تقصر في بنتها...شو هالتخلف..؟؟؟... الناس اول شي يطالعون على ستر البنت..وحشمتها.... ومحد يبا بنت كاشفه...بس قرر انه مايدخل في الموضوع هو بعد....سوولف ويا امه شوي.. وعقب طلع من الصالة... وهو يفكر..بانه ليش ياخذ اثم وهو يقعد مع خوله في نفس المكان وهي كاشفه شعرها جدامه؟؟...خله يطلع يرتاح احسن...سار غرفته وهو يتذكر اتصال عبد الله... ياسلاام عليك ياعبود اسميك فنان...دبرت لي سييرة وسبب عشان اسير العين واشوف نظر العين....

سعيد كان واقف في المطار ويتريا قوم عبد الله ... ويوم شافهم اشر لهم باييده ... عبد الله وخليفه الفرحه كانت مبينه على ويوههم برجعتهم للبلاد... وصلوا لين عنده عبد الله لوا سعييد وهو مستانس..
سعيد: الحمد لله عالسلااامه عبوووود...نورتوا دار زايد والله...
عبد الله: الله يسلمك... مشكووور يا سعيد عبلنا عليك تتريانا هني..
سعيد: جب جب...عبلت عليك اون...ماصدقت انا توصلوووون..
خليفة: شخبارك بو عسكور وشخبار الاهل..؟..
سعيد: والله كلهم بخير وسهااله مايشكوون باس... واهل العين يايينا قبل سبوعين يسلمون على عليا..
عبد الله: فديييتهم والله...
خليفة: لاحقين عالسوالف..خلنا نسير نخلص شنطنا ونروح...
راحوا ثلاثتهم خلصوا الشنط واغراظهم وطلعوا برا المطار صوب سيارة سعيد... وروحوا صوب الشارجه..
في السيارة...
عبد الله: لا يكون خبرت حد بس؟؟...
سعيد: لالا ماخبرت حد... بس تصدق امس اسمع عليا ترمس ويا عمتي...وتسالها عنك...حليلها كان خاطري اخبرها والله...
عبد الله: عليووه سويحره.... دومها تحس قبل الناس...شخبار ولي العهد؟.
سعيد: ههههههاي يسرك حاله والله...طار بيتنا من صريخه...ماشاء الله عليه..
خليفة: أي ولي عهد؟؟؟..
عبد الله: ماخبرتك انا؟؟.. عليا اختي ربت ويابت ولد...
خليفة: لا والله ...؟؟. تستااهلون ماياكم عيل.... بس متى حملت اصلا؟ ماشاء الله عليها..
عبد الله: فذمتيه انك مضيّع.... ابويه ارقد ارقد لين مانوصل بيت خالي....
يوم وصلوا بيت بو فيصل..نزلوا الشباب في الميلس..يلسوا وشربوا العصير..وتريقوا..لاان قبل مايطلع سعيد موصي الخدامه تحط فوالة في الميلس لانه بييب شباب... وعقب اتصل بفيصل وقاله اييهم الميلس.. فيصل ماكان عليه دوام في هاليوم..بس ابوهم هلال ماكان موجود في البيت...
دخل فيصل الميلس وانصدم بولد عمته عبد الله.. وخليفة ولد عم عبد الله... رحب بهم وسلم عليهم وكان مستانس بشوفهم...
فيصل: زين يابوك يوم ييت صوبنا اول...بتفكني من حشرة عليا تحاتيك ليل نهار...
عبد الله: حليلها والله ام هلال.... صدق مبروك ماياك..يتربا فعزك ان شاء الله..
فيصل: الله يبارك فيك ويخليك يارب... قم جان تبا تسلم عليها..
عبد الله: جي محد فبيتكم؟... وين خالووه؟
فيصل: امي عند يارتنا.. احين بتي ماعليك... والبنات حد في الصالة وحد راقد... وانته شو عليك منهن...قوم يالله..
عبد الله: يالله...
نش عبد الله ويا فيصل سايرين صوب اخته... وخليفة تم ويا سعيد يسوولفون رباعه... دخل فيصل قسمه وحصل عليا اطالع التلفزيوون وعدالها هلال راقد... وسلامته بنته الصغيرة يالسه عدال اخوها الصغير وتلون في دفترها...
فيصل وقف عند باب القسم وعبد الله كان بعده برااا..
فيصل: علايه...عرب متعنين يايين يسلموون عليج...
عليا تفاجئت...
عليا: منووووو؟؟.
دخل فيصل وهو ماسك ظحكته ويراقب حرمته..مايبا يفوت ردة فعلها...ودخل عبد الله وراه والضحكة شاقة ويهه.... يوم شافته عليا بطلت عيونها وثمها وشهقت.....
عليا: عبوووووووووووود.... واي فديت هالويه انا...
ياها عبد الله وهو يظحك عليها.. من فرحته بشوفتها ماعرف شو يقووولها... لوا عليها وحبها على راسها... عليا وايد تحب اخوها عبد الله...وكانت مثل ام ثانية له... وهي اكبر منه بسنتين...وهو عبد الله وايد يحترمها ويحبها...
علياا: يعلني ماخلى من هالشووووف ياربي... ياحمار متى وصلت..؟؟؟
عبدالله: فدييييتج اختااااااه..والله توني واصل وييت اسلم عليج اول وحده بعد شو تبين؟..
عليا: الحمد لله عالسلامه الغالي..فديتك والله مفاجاة حلللللوه.... هل العين يدروون انك ياي؟.
عبد الله: لا محد يدري ودخيييلج ما تخبرينهم..خليها مفاجاه... هي صح...الحمد لله عالسلامه...ويتربا فعزج ان شاء الله هلال الثاني... ناوليني اياااه بحبه...
عليا: الله يسلمك ياربي... ( شلت هلال وحطته بين ايدين عبد الله)... سلم على خالك... يسدك جان طلعت شراته..
عبد الله: خلي عنج دهان السير هذا... شوفي ويهه بالله عليج.... نسخه سعيد... احين منو اغلى عندج انا والا سعيد؟؟ هاااااااا؟؟
عليا: شو هالسؤااااال؟؟.
سعيد: عيل شحقه ولدج نسخه مصغره من عمه؟؟
فيصل: شو بتقول بعد..!!..دمتنا اقوى عنكم ..ههههههههه...يرّيينا الولد صووبنا...
عبد الله: والله الا ياحظه يوم بيشبه عمه ...الا اسوولف وياكم....بس ترا لا تصدقوون وايد عماركم...الولد الثاني محجووووز.....
عليا: الله كريم...خلنا نربي هالولد اول....عقب الثاني...ان الله راد..
عبدالله: آمين..الله يرزقكم الذرية الصالحه ان شاء الله....اقول علايه هناك خليفه في الميلس...ماتبين تسلمين عليه؟
عليا: بلى بييي اسلم..بس ببدل ثيابي وبلبس الشيلة وبييكم...
عبد الله: تمام عيل انا بشل هلال الثاني وياي الميلس....نفكج من صدعته شوي...
بعد فتره راح عبد الله للسيارة ودور الشنطه اللي حاط فيها هدايا عليا وقوم خاله...كان مقسم الهدايا وموزعنهن في اكياس...طلع ثلاث اكياس ورد سكر الشنطه...
كان خاله هلال راد من الشغل ذيج الساعه ويالس وياهم في الميلس... رد عبد الله الميلس ويلس حذال خاله..
عبد الله: خالي... هذا الكيس حقك انته وحق خاالوو شيخه..
بو فيصل: ياولدي ليش تعبت نفسك..مانبا عليك شي المهم سلامتك...
عبد الله: والله ياخالي مب من قدركم...الا اشياء بسيطه..
بو فيصل: يعلك سالم يا عبد الله..
عبد الله: الله يسلمك خالي... فيصل وهذا الكيس اغراضكم انته وعليا والعيال... وسعيد انته لك كيس كامل صديقي انته...
فيصل وسعيد شكروا ولد عمتهم ولومووه انه تعب نفسه وتشرالهم... وماطولوا في الرمسه الا وزاقرينهم للغدا...
بعد الغدا سلم عبد الله علىاخته وعلى بنات خاله بشكل سريع ورسمي.. واستسمح منهم وروحوا هو وخليفه ويسوقبهم سعيد ..سايرين صوب العين... وكل حد منهم ماخذتنه افكارة الخاصة.....
اول ماوصلوا بيت بو خالد ..تلفت عبد الله صوب الغراجات...
عبد الله: ابويه موجوود....خالد موجوود.... الا ناصر محد...وسيارتي متلحفه حليلها...
نزلوا كلهم من السياره ... سعيد كان قلبه يدق بالقوو...في أي لحظه احين بيشووف حيااااته... بس كيف ومتى؟..
اما خليفه... فكان شعورة عادي.... مستانس..بس وناسته بتكون اكبر لو سار سيدة صوب بيتهم...بس سكت وماقال شي...
كان الوقت عصر... دخل عبد الله البيت وهو يتلفت... الشباب كانوا يبغون يسيرون الميلس بس عبد الله ماطاع..وقالهم انهم مب غرب ..خلهم يدشوون يسلموون هم بعد احسن.. على هالحال دخل هو اول وهم وراه... عبدالله سمع حسوس في الصالة ..فسار صوبها على طووول..يدري انه شوابه يالسين هالحزه... ووقف عند الباب... وسعيد وخليفه يتلفتون... وكلهم يفكرون بان شكلهم غلط داشين وياه...بس شو يسوون بهالمينون؟؟..
عبدالله متردد باي طريقة يفاجاهم فيها..؟؟..بطل الباب شوي شوي وحس ان الاصوات خفت..اكيد يتلفتوون ويتريوون حد يدش الصالة.... دخل راسه وهو مبتسم...
عبد الله: السلام عليكم ماي فاميلي....
اللي كانوا موجودين امه وابوه واخووه خالد... وعيال خالد حمد ومحمد.. كلهم تفاجاوا بشووفت عبد الله وفززووا وقووووف... وهم مب مصدقين اللي يصير...
نشت الام وهي تصيح ... لوت على ولدها وهي تتفدا وتحبب فيه... وهو لاوي عليها شويه وبيصيح...يدري انه وايد غالي عندهم... وغيبته عنهم مب سهلة عليهم مثل ماهي مب سهلة عليه هو بعد.... ..تفجج من ايد امه وحبها على راسها...وسار صوب ابوووه وحبه على راسه هو بعد وسلم عليه... وسلم على خالد...
الشباب اللي برا ماعرفوا ..يدخلون والا يتريوون؟ بس يوم سمعوا من الاصوات ان اللي موجودين هم بس العيوز والشايب وخالد..دخلووا عليهم يسلمون هم بعد...
سعيد كانت السوالف ويا الاهل شاغلتنه...بس هذا مامنعه انه يحس بتوتر...نورة في أي لحظه بتدخل عليهم الصالة.. بس متىىى..؟؟؟؟... خوفه انه يروح الشارجه وهو بعده ماشافها...
خليفة كان يتحرقص يبا يروح بيتهم ويسلم على امه واخته عنوود... وابووه واخوانه... عشان جي طلب من عمه يتصل بحمدان.ويقووله ايي البيت بدون مايقووله ان خليفه رد البلاد...
ووصل حمدان... وكان كالعاده يدخل البيت كانه واحد من اهل البيت ..من كثر ما اييهم تعود على الاجواء....
دخل الصالة وانصدم هو بعد.... سلم على اخوه وباقي الشباب وعمه وحرمة عمه ويلس يسوولف وياهم...وهو مب مصدق اللي قاعد يشوووفه... مفاجاه حلللوه صدق.....
خليفة: حمدان..تراني متولهه عالبيت..قم نسيييير..
حمدان: يالله...وين شنطك؟
سعيد: في سيارتي... اندوك خليفة السويج... (وفر سعيد السويج على خليفة)...
سلم خليفه على عمه وحرمه عمه وباقي الشباب وترخص منهم...وقالهم انه بييهم وقت ثاني... وطلع هو وحمدان ينزلون الشنط مالته ويحطونهن في سيارة حمدان... عقب ماخلصوا.. قفل خليفة سيارة سعيد وعطا السويج حمدان..
خليفة: سير انته رد السويج على حمدان وانا بسير اشرب ماي من المطبخ..عطشت..وعقب بمر على مييرة في بيتهاوبسلم عليها بعد...
حمدان: تمام..انا بلحقك عندها بعد...
دخل حمدان البيت وسار خليفة صوب المطبخ... اول مادخل فججت راسه ريحة الكيك..ياسلااااام ريحه تشهّي والله... المطبخ كان كبير... تلفت خليفه يدور حد وحصل حصه.. شيلتها البيظا راده شوي عن شعرها.. وقصتها طويلة ونازلة وشي منها مردود ورا الاذن.. ابتسم خليفه وهو يشوفها تعابل الكيك وتحط عليها كريما..كان مخلص تقريبا...
خليفة: احم احم....السلام عليج بنت عمي...
بطلت حصه عيونها..وما التفت للصوت.... بس تيبست مكانها.... واول شي سوته عدلت الشيلة وتحجبت عدل ..ويوم التفتت حصلت خليفه يبتسم ويطالعها بفضول... وايدينه فمخااابيه... حصه من صدمتها ماعرفت شو تقووووول....
خليفة: شميت ريحه الكيك من امريكا ويييت عشان مايفووتني....
حصه: هههههههه هلا خليفه...الحمد لله عالسلاااامه... متى واصل؟؟ ومنو يااابك؟؟ وعبد الله وياك والا لا؟...
خليفه: شوي شوي علي...اول شي الله يسلمج..ثاني شي واصلين الضحى وتغدينا فبيت خالج..ثالث شي..يابني سعيد... ورابع شي هي عبد الله وياي ويالس في الصالة ...شحالج حصيص؟..
حصه: الحمد لله بخيير... شو هالمفاجاه ماتخبرووون حد بوصوولكم...
خليفة: هذي فكرة عبقرينووو اخوووج....
حصه: فدييته والله اسميني متولهه عليه...
خليفة: سيري سلمي عليه انزين.....
حصه: وين اسير ماتشوف شكلي؟.. شيلتي خايسه وريحتي مطبخ..بسير ابدل ثيابي عقب ماخلص الكيكه وعقب برووح له...

الفصل السادس

حمدان في الطريج صوب البيت كان يسولف ويخربط على خليفه... وخليفه من زود تعبه مالقط غير نص السوالف... مستانس انه بيسير بيته اخيرا..وبيشوف والدينه واخوانه. ...
خليفة: حمدان شحالهم كلهم في البيت؟؟..
حمدان : كلهم بخير وسهاله مايشكون باس... مثل ما تحيدهم.
خليفة: يعني ماصار شي بغيابي...؟
حمدان: لا الحمد لله ماشي الا كل خير...اسميهم بيستانسون يوم بيشوفونك.. امس امايه ترمس عنك..وتتخبر متى بتي..
خليفة: فديتها.. حتى انا مستانس وايد والله..بس ماتتصور شكثر تعباااان... فوق عشرين ساعه مارقدت تصدق..!!
حمدان: الله يعينك... ماعليه المهم رديت..اول ماتوصل البيت بتسلم عليهم وبتتعشى وعقب بترقد وبترتاح..
وصلوا البيت ودخل حمدان سيارته ووقفها في غراج البيت اللي داخل... نزلوا ودخل خليفه قبل حمدان وهو يتبع اصوات اهله... وعرف انهم يالسين في الصالة الصغييرة.. بطل الباب ودخل ... كانوا كلهم متواجدين... سلطان وحميد يالسين ويا ابووهم يسولفون وياه..والعيوز يالسه عدال شيبتها... اما عنود كانت منسدحه على الكرسي اللي وراهم اطالع التلفزيوون...اول مادش خليفه محد صد صووبه..واستغرب من هالشي..على بالهم انه حمدان طلع ورد...بس يوم دخل حمدان وراه انتبهوا ان اللي داخلين ثنينه مب واحد..يعني حد ويا حمدان... فصدت العيون كلها صوبه... وكل حد يطالعه وعلى ويهه تعبير يظحك اكثر من الثاني...
اول حد استوعب اللي صار عنوود... نقزت من الكرسي ويت تركض صوبه وهي تصارخ....لوت على اخوها وهي مستانسه...
عنود: فديييييت هالويه والله ..الحمد لله عالسلامه خلووووووووووف... متى ييت ومنو يااابك وليش ماقلت.؟؟؟
وماعطته فرصه يرد... باسته على خده وهي مستانسه...وهو ميت من الظحك عليها...
خليفة: لا تبوسيني عنووووده... استحي... شحالج ويا هالويه؟
عنود: بخير والله ولهااانه عليك شحالك انته؟
خليفه: بخير الحمد لله..
التفت خليفه صوب امه وحصلها تمش دموعها.. وهي تصيح من فرحتها... يا صوبها وحبها على راسها ولوا عليها....
ام سلطان: فدييت هالشووف ياربي يعلني ماخلا منك ياولدي... الحمد لله عسلامتك...
خليفة: فديتج يامايا الله يسلمج... لا تصيحين...اونها مفاجاه وانتي تصيحين؟؟
بو سلطان: من فرحتها... ياحيالله خلييفه .. اسميك سويتها فينا ياولدي..
خليفه حب ابووه على راسه ..
خليفة: اسمحلي الغالي تراها مب سوالفي انته تعرفني... شحالك ابووويه؟
بوسلطان: بخير ياولدي الله يعافيك شحالك انته وشحال ولد عمك؟
خليفة: كلنا بخير وعافيه مشتاقين لكم والله...
سلم خليفه على سلطان وحمييد... وعقب يلسوا وين ماكانوا يالسين... ويلس حمدان وخليفه وياهم وعنوود بينهم.. اللي سارت للخدامه شوي وعقب رجعت ويلست وهي لاصقه في اخووها كانه بيطير عنها...
سلطان: عيل دام هالمفاجاة مب فكرتك اكيد فكرة ولد عمك الخريش...!!
خليفة: هههه هي نعم هاي سوالفه...
حميد: عيل يوم محد يدري منو يابكم انتوا من المطار؟
خليفة: والله اتصلنا بسعيد ولد خال عبدالله.. وهو استقبلنا فدبي..وتغدينا عندهم وعقب يينا صوب العين وهو وصلنا...
بوسلطان: هي سعيد ولد هلال السويدي...ريال ماعليه قصور...ياحية يوم وصلكم... مايقصر .
حمدان: شو الدراسه هناك وشو تقاديرك؟ تمام؟؟؟
خليفة: كله تمام التمام... سنه وبتخرج... والله امبوني اقول لعبدالله اني يوم برد البلاد مب راد اامريكا اكمل دراسه.. لانه لاعت جبدي منها... بس ماطاع..
سلطان: صدقه .. شو اييبك؟؟.. كمل دراستك دامها الا سنه..
ام سلطان: فدييته لو مابغا يسير يكمل لا يسير بيشتغل فشركه ابووه...
بو سلطان: لالا... لا يرد ولا عنده خبر...يكمل دراسته ويرد بشهادته عقب يشتغل وين مايبا... خمس سنين غربه مب بلاااااش....
خليفة: لا تسوونها قضية عاد... بكمل دراسه انا..لا تحاتون...
عنوده: فديته اخوويه لا تحشروونه خلووه يرتاح...سويتوله ساالفه... اييبلك عصير خلووف؟.. والا تبا شي ثاني؟؟ آآمر وادلل...
خليفة: هههههههه ماتقصرين بنت محمد .. بنت عمج ماقصرت.. طعمتني كيك وماي...
عنوده: منو بنت عمي؟؟؟
خليفة: حصه...
ابتسمت ام سلطان... وعنوده وياها... وقالت بمكر..
عنود: آآآآهاااااااا....حصصه... زين ياحيها والله...
وخليفه يطالعهن بنص عين بس لابسنهن...ورد يسولف ويا اخوانه ويشرب شاي...لين ماحطوا العشا .. تعشا وياهم وعقب ترخص وسار يرقد ...
اول مادخل حجرته حصل المكيف شغااال والحجرة مدخنه.... وكل شي مرتب... ياحافظ علييج يالعنووود... دخل يتسبح وعقب بعمرة على شبريته ورقد....
في بيت حمد الكتبي...
كان عبد الله سهران ويا خواته حصه ونورة... اما الباقي بعد ماسولفوا وياه لين ماعيزوا ..ساروا يرقدون لانه باجر الجمعه... اما عبدالله من وناسته بالرده كان مكابر التعب ويالس ويا خواته ماشبع من السوالف وياهن... كان يراويهن الهدايا اللي يايبنهن حقهن.. وهن صندل حلوو وساعه لكل وحده..
حصه: ياسلاااااااام على هالساعه.. مشكوور والله عباادي على هالهدايا الحللوه..بس مابغينا عليك شي والله..
عبدالله: ياحيها يوم عيبتج احيد ذوقج صعب...
حصه: يالله عاد انته تيبلي شي من ذوقك ومايعيبني؟؟ مستحيل..
نورة: الصندل بعد فنان... تدري اني كنت ادور هاللون ولا حصلته في العين؟؟...مشكوور والله
عبدالله: العفووو ...طلع قياسج عاد؟
نورة: هي والله اروحي مستغربه منك...
عبدالله: الحمد لله عيل كل شي ظابط... اخبركن... عنووده تيكن البيت؟
حصه: عنوده هي .. دوم هني.. تقريبا يعني تينا بشكل شبه يومي... بس يوم رديت عاد انته اظني بتخفف الزيارات وااااايد...
عبدالله وهو متنرفز..
عبدالله: ليش يعني تخفف؟؟
حصه: البنت تستحي حتى من طاريك...شقايل تباها اجابلك كل يوم؟؟؟
عبدالله استانس من هالرمسه...
عبدالله: انزين اتصلبها باجر خلنها تي... ابا اسلم عليها واعطيها الكيس اللي فيه هديتها...
نورة: ياعيني ياعيني...احين نحن لنا كيس واحد حقنا رباعه...وعنود كيس كامل ارووحها؟؟ شو عليييه...تستاهل والله ههههههه
عبدالله: جب يالغياره.. دام خليفة تعبل ويابلكن هدايا ..اناماتبيني اييب لحرمتي؟؟
نورة: حليله خليفه اسميه تعبل...بعدين عنوده مب حرمتك..
عبدالله: حرمتي..
نورة: مب حرمتك...
عبدالله: اقولج حرمتي..وبملج في هالاجازه بعد شو رايج؟؟ عقب ماتتخرج على طول..
حصه: منو بيخليك تملج احين؟؟ بعدك سنه عن تتخرج انته...
عبدالله: ادري... وبملج...
حصه: عبووود... ملجه تستمر سنه.!!!...وايد الصراحه.. وماظني عمي يرضى..
عبدالله: بيرضى.. خاطري املج انا ماروم اتم جي..
نورة: ليش انزين؟ شوفه وتشوووفها.... والرمسه وترمسها تراك يوم تحصلها...وتعرفها لانها بنت عمك يعني مب انك تبا تتعرف عليها قبل العرس... حق شو الملجه؟
عبدالله: شوووفه واشوفها كولد عمها مب ريلها...متحجبه عني وشوي وبتتغشا بعدها لو تروم... رمسه وارمسها جدامكم كلكم والكل يراقبنا ويتسمعنا..الواحد مايروم يقول شي في خاطره... وبعدين بخصوص المعرفه غلطانه.. انا ماتعمقت بمعرفتها زوود يعني...
حصه: وشو سبب هالقرار المفاجئ؟؟!...
تنهد عبدالله...هالخوات مسويات له تحقيق....
عبدالله: اووففف.... تغير موقفي...تغير شعوووري...ارتحتن؟؟ ابا املج..
نورة: لأ لحظه...اسمحلي اوقف عند هالكلمه.... تغير شعوورك؟؟؟؟ اشرح اكثر الله يخليك مب مستوعبه..
عبدالله: مب لازم تستوعبين..
نورة: وغلااااااااااااااااااااااااااة عنوده....
ظحك عبدالله..
عبدالله:هههههههه ويا ويهج... الله يسلمج قبل..كنت اعتبرها بنت عمي بس.. يوم قالت لي امايه اخطبها ..ماعارضت..شفتها حشيم وحرمه ماعليها زوود..وجمييله..واعرف انها سوالف ومرحه...فوافقت..بس عقب ... تغيرت نظرتي لها... صرت اشوفها بانها اللي بتصير حرمتي.. وطبيعي اني احس صوبها بشي مختلف عن قبل... وابا املج لاني احس اني محروم منها .. وبعدين يوم بسافر مابشووفها..واول مابرد بعرس... اخاف استوي شرا الغريب عليها.... عشان جي بملج عشان ارمسها وانامسافر..وتتعود علي..... اوووفف خليتني ارمس وايد خسكن الله...ارتحتن؟
حصه: ههههههههههههههههههههه..محد قالك فصّل هالكثر...قول احبها وخلص عمرك...
صنّف عبدالله وهويطالع اخته.... وماعرف شو يرد عليها .... الصراحه الصراحه..مايحس انه وصل لمرحله الحب... بس هو مهتم فيها بشكل غير طبيعي....والا طبيعي؟؟؟؟ اكيد طبيعي تراها خطيبته لازم بيحس صوبها بشي غير... وصرف الفكره عن باله وهو محتار بامره...
عبدالله: بسكن من السهر... امايا بعدها تحشركن الصبح في الاجازات...
نورة: متى وقفت عن هالعاده هي اصلا..؟؟
عبدالله: فديتها والله..تباكن تستون حرييم ..وقد المسؤوليه...ماتباكن تصبحن فبيت ريلكن راقدات الصبح...
نورة: الدلع لكم انتوا والرصّه علينا نحن البنات... الله يعينا بس... انا بقوم ارقد ..تصبحون على خير
حصه: كلنا بنقوووم....
نشوا كلهم وسار كل واحد منهم غرفته ورقد...

حوالي الساعه 4 نش خليفه من رقاده وهو مب متذكر وين هو..بس يوم طار النوم من عينه وعرف انه في غرفته وفبيتهم ارتاح..ورد انسدح... اطالع الساعه اللي على الطاولة عداله..ولقاها الساعه 4... وبعده ما اذن.. فقرر انه يتريا الصلاة... قعد يفكر بكل شي مر عليه فيومه هذا... من وصلوا في المطار..وتغدوا فبيت هلال السويدي... وسيرتهم لبيت عمه.... وحصه في المطبخ... ووصووله لبيته واهله... بس كل هذا كان عادي في باله..ماعدا شي شااذ انتبه له بس الحين... حصه في المطبخ..!!!..وتذكر وبشكل مبهم انه سولف وياها بطريقة امتنع عنها من يوم كان عمره 14 سنه....خليفة انسان ديّن ومستقيم... طبعه هادي.. وحازم...ويوم يعصب محد يتجرأ يوقف بويهه... مع انه عصبيته نادره....اختلطت تربيته بين بيت اهله وبيت عمه... فخذ طباع من الاثنين.... الحزم والحراره احيانا من بيت عمه..اما الهدوء والطيبه خذها من بيت اهله.... وهو من النوع اللي مايحب يتواجد فمكان فيه بنات...عشان جي من صار عمره 14 سنه امتنع عن السوالف ويا بنات عمه..مجرد سلامات على الطااير.. بس امس...سولف بشكل عفوي مع حصه... الظاهر ان التعب هو اللي اثر عليه وخلاه يودر التحفظ اللي يلازمه دايما...ابتسم وهو يتذكر شعرها الناعم وهو طايح علىويهها... وعيونها يوم شافته وانصدمت.... ساعتها ما انتبه انها كانت قافطه منه...بس الحين تذكر انا يدها كانت ترتجف.. وملامحها كانت متوتره....تذكر قبل خمس سنين يوم اقترحت عليه امه انه يخطبها...ساعتها رفض.. لانه كان يعتبرها غريبه..مايعرف عنها شي.... صح بنت عمه بس ماكان قريب منها زود...وكانت جدامه دراسه في امريكا وغربه..مايقدر يربط مصير بنت بمصييره وهو مايعرف شي بعده عن وضعه بعد هالدراسه... فشل فكرة الخطه من باله نهائيا لين مايخلص دراسته ويشتغل ويستقر..بعدين يمكن يفكر بالسالفه... والحين على رجعته للبلاد هالمره ..وشوفتها بهالطريقه...خلته يعيد التفكير.... الصراحه هي بنت ماعليها كلام..اصل وفصل وبنت عمه..ودين وطيبه وحشمه... فوق هذا الصراحه جمالها شيوخي في نظر خليفه.. لانه كان

يعيبه هالنوع من الجمال... ولو انه مايعترف بهالشي لاي شخص... ياترى لو خطبتها احين بتوافق عليه؟؟؟ بس شل هالفكره بسرعه من باله.. مايبا يخطب... عقب مايتخرج يصير خير... بس حط فباله فكره انه يبتعد عن تحفظه شوي معاها... وبيشوف وين بيوصل... في النهاية يمكن بنت عمه هي المناسبه له... والبنت قريب بتتخرج... واذا شاف انه من خاطره يباها بيخطبها.. ومايعتقد بترفضه.... بس ترك هالسالفه للايام..هي اللي بتحكم بينهم...
في هاللحظه اذن اذان الفجر...وقام خليفه يتوضى ..وصلى الفجر والسنه..ورد يتلحف ويرقد...ماشبع رقاد.
بالباجر الظهر في بيت بو خالد.. الكل يالس عقب الغدا يشرب شاي احمر... واكثر شي تركزت السوالف على عبدالله طبعا لانه امس واصل لهم...بس عقب مامرت ساعه معظمهم انسحبوا لغرفهم.. الشواب ساروا يرقدون كالعاده..ونفس الشي قوم خالد وناصر...وتم عبدالله ويا البنات...
عبدالله: اتصلتن بعنود؟؟ قلتن لها تينا؟
حصه: لا...
عبدالله: ليييييييييييييش؟؟؟؟
حصه: وين نتصل بالعرب الظهر...العصر يصير خير..
عبدالله: العصر بييني خليفه وبنسير رباعه...
حصه: قول والله بيي العصر؟؟ يووه ماسويت له الكيكه مالته..
عبدالله ونورة يطالعون حصه مستغربين....شو سالفه الكيكه هاي بعد..!!!
عبدالله: والله انج متفيجه انا وين وانتي وين...
نورة: انزين عبدالله مب كانه المفروض انته تسير تسلم عليهم؟؟؟... تبا البنت تيك لين هني عشان حظرتك تسلم عليها؟؟؟...روح لها انته البيت... سولها اعتبار مسكينه
عبدالله: صدقيني بسير البيت جي مب ناسنهم انا..بس هناك مابتكمل وياي دقيقه وحده...بتستحي..بتسلم وبتظهر... وانا بعد استحي ارمسها واهلها متحاوطيبنا....
حصه: اهااااااااا يعني تبانا نهيئ لك الجو هني....
عبدالله: طبعا..عيل على شو خواتي ...عالفاظي؟؟
نورة: انزين ماعليه لاتحشرنا..اول ماياذن العصر بنتصل لها... وبتشوفها يوم بترد البيت..
في هاللحظه دق تيلفون عبدالله وكان اللي متصل خليفه..
عبدالله: الوووو
خليفه: السسلام عليكم... شحالك عبود
عبدالله: هلا والله خلوف شحالك انته..؟؟ واخبار الاهل؟
خليفة: كلهم بخير وسهاااله.... هاا متى تباني امر عليك؟
عبدالله: على راحتك والله البيت بيتك...
خليفة: انا ماعندي شغل احين... جان ماييكم..
عبدالله: حياك الله بس نحن مب متواعدين ويا الربع الظهر... وين تبانا نسير؟..
خليفة: طالع النذل... بيلس عندكم ..والا ماتباني..شكلك الا عفتني من كثر ماجابلتني في امريكا...
عبدالله: ههههههههههه لا والله مب جي السالفه افا عليك..على بالي تبانا نطلع مكان...
خليفة: هي.... لوووت عليه انته... المهم انا ياينكم لا تسير بقعه..
عبدالله: اقووووول...بتي بروحك؟
خليفه: هي نعم...والا مااسد؟؟؟
عبدالله: ماتسد
خليفة: يالهرم.. دام ماسد مب ياينك خير شر...ويالله اجلب ويهك...
عبدالله: ههههههههههه خلوووف بلاك زعال ؟؟ مشكلتك انك قلب حساس ياخي.. ههههههاي... المهم مب هذا القصد... وانته تعرف شو اطري...
خليفة: لا ماعرف..
عبدالله: خلووووف... فديت خشمك انا اللي تقولون سيف... فديت عيوونك الذباااحه... هات عنوده وياك..
خليفة: نعم؟؟ شو تفضلت؟؟
عبدالله: خطيبتي عندكم .. اسمها عنوود... ييبها وياك بسلم عليها وبعطيها هديتها... فديت خشمك..
خليفة: رح رح... روووووووووح.... هاتها وياك اون.... ماشي حبيبي...
سكت عبدالله وهو مظيج وزعلان...ولو انه مايلووم خليفه..لانه لو هو خاطب وحده من خواته وطلب منه انه اييبها وياه مابيطيع عبدالله..وبيعصب بعد... يعني خليفه ماينلام ...وتم عبدالله ساكت...
خليفة: الوووووووووو
عبدالله: وياك...المهم متى بتي احين؟؟
خليفة: الحين ياينك...فمان الله
عبدالله: الله وياك..
سكر خليفه عن عبدالله وهو يظحك.... يستانس يوم يغلس على عبدالله... هو يدري انه ولد عمه متعلق بعنوود في الفترة الاخيره... ويدري انه كان يفكر فيها بشكل كبييير وهم في امريكا... شي طبيعي..من حقه..تراها خطيبته... يدري انه عبدالله زعل عليه...بس والله مايهون... هو بالنسبه له اكثر من اخو... ماعليه بيتساهل وياه هالمره بخصوص العنوود.. طلع من حجرته وسار صوب حجرة العنود..وفتح الباب وحصلها منسدحه عالشبرية..حاطه الهيد فون وتقرا المجله... يوم دخل خليفه عليها رفعت عينها بس... يا خليفه ويلس حذالها عالشبرية... فاعتدلت عنود في يلستها ويلست عدل احتراما لاخوها... خليفه مد ايده وخذ السماعه من اذنها وحطها على اذنه.... ورفع حواجبه بسخرية..
خليفة: عيضة...!!!... انتن البنات احين ماعندكن غير عيضه..؟؟؟
خوزت عنود الهيد فون ..
عنود: شو تبانا نتسمع يعني..؟!!
خليفة: قلّت الاشرطة الدينية ؟؟؟...شحقه ماتسمعينهن...وتستفيدين ..
عنوده: خلووف..فديت خشمك... لا تبدا هالموال...
خليفة: الامر بالمعروف سويتيه موّال...!! الله يسامحج دنيا واخره... المهم قومي تلبسي...طالبينج عرب..
رفعت عنود حواجبها مستغربه..
عنود: منو هاللي متفيج وطالبني الظهر... وششوو حقه اتلبس..مب سايره بقعه الظهر انا..
خليفة: قومي... خطيبج المخضرم يستحي يسلم عليج جدام اهلج... بنسير بيتهم وطلب مني اييبج ويايه..
قفطت عنوود من اللي سمعته..وتم قلبها يدق بقووو...ياسلاام عليك ياعبادي طالبني بعد..؟؟!!!...واي فدييتك انا...
عنود: ياسلام؟؟.. احين انااااا اسير له لين البيت عشان يسلم عليه؟؟؟...خله هو ايي لين بيتنا .. اظني يدل الدرب...
تم خليفه يطالعها بنظرة استخفاف... عنوده اصلا بتموووت وتسير عندهم وهو يعرف هالشي.. من وين يت عزة النفس والتغلي هذا..؟؟؟..مب علينا هالحركات...
خليفة: خلاص..على راحتج يوم ماتبين تسيرين...
فرت عنود المجله ونقزت من الشبرية...
عنود: لالالا بسييير...شو تخبلت؟؟؟ الا امزح وياك انا...
خليفة: ههههههه مالت عليج...يالله بسرعه تجهزي ..انا ببدل كندورتي وبتسفّر وبنزل..ابا احصلج جاهزه..
عنود: دقيقه وبخلص...
طلع خليفه وهو يظحك عليها... ويوم بدل ثيابه وخلص نزل تحت وحصل حمدان يتسفّر هو بعد جدام المرايه اللي عدال الباب الرئيسي...
خليفة: هاا حمدااااان؟؟؟ وين بهاااا؟؟؟
حمدان: بسير عند ربيعي في عزبتهم...وانته وين ساير؟
خليفة: انا بسير صوب عبدالله...
وماكمل كلامه لانه عنود نزلت في هاللحظه وهي متلبسه ومتكشخه بس على خفيف... ووييهها قافط..
حمدان: وين تبا هاااااذي...؟؟؟ كل يوم وناطه بيت عمج يابوي اثقلي شوي..
عنود سكتت وهي مبرطمه تمثيييل....
خليفة: برايها اليوم... سماح... بس غير المره لا...
حمدان: خبرتي امج؟؟
عنود: لا..

حمدان: ياحافظ عليج...من متى تطلعين انتي بلا شوور امج؟؟؟
خليفة: حمدان... اقولك برايها...انا بعدين بتصل بامي وبقولها ان العنود سارت وياي..ومابتقول شي...
حمدان: كيفك...انتوا لين متى بتيلسون هناك؟؟ لانه احتمال امر عليكم..
خليفة: ماندري والله كيف الترتيب... اتصل انته..وبنشوف
حمدان: تمام عيل.... فمان الله..
عنود وخليفة: الله وياك..
عقب ماراح حمدان .. رد خليفه ودخل البيت....
عنود: وين ساااااير؟؟؟
خليفة: صبري نسيت الاكياااس....
بس مارد عليها وركب فوق بسرعه وبعد شوي نزل ويايب وياه اربع اكياس حجمهن متوسط...
حط الاكياس في السياره وركبوا.. تغشت العنود وهي تسال..
عنود: اكياس شو هذيلا؟؟
خليفة: هذيلا الله يسلمج هدايا بيت عمي...كيسه للبنات...وكيسه لعمي وحرمته...ووحده لخالد وميرة.. والاخيره لناصر وحرمته....
عنود: ماشاء الله عليك ياخوويه اسميك تعبلت...
خليفة: ماحب اسيير وايدي فاظيه...
ومشوا في طريجهم لبيت عمهم حمد...
عبدالله كان يالس ويا خواته في الصالة....
عبدالله: اقول..خليفه ياي احين..سيرن لبسن شيلكن ...
نشن نورة وحصه وركبن فوق..نزلت حصه قبل وسارت على طول المطبخ....عشان تسوي لولد عمها الكيكه اللي طالبنها... نورة نزلت عقب وهي لابسه شيلتها البيظا ويلست اطالع التلفزيون ويا عبدالله.... وتتريا خليفه يوصل عشان تسلم عليه وتسير عنهم عقب..لانها ماسلمت عليه من وصل...وماشافته...بعد شوي سمعوا سياره تدخل حوش البيت وعرف عبدالله انه خليفه وصل...عدلت نورة حجابها ويلست مكانها ... نش عبدالله وطلع صوب سياره خليفه...عقبها وقف مكانه وهو منصدم... فديتك ياخلوووف جبرت بخاطري...وابتسم عبدالله وهو قافط.. نزل خليفه من السياره وهو مبتسم... ويطالع عبدالله بنظرة مكر... اجدم عبدالله وسلم على خليفه .. وعنود من شافت كندورة بيظا نزلت عيونها وهي بعدها متغشية... ومستحيه بشكل فظيع... لالا مابنزل...مابعق الغشوه حتى... ياربي اخاف انزل وريلي ماتشلني.... شو بقوووله؟؟ اكيد بنقع في الرمسه وبيظحك عليه...
العنود هدت اعصابها وبطلت الباب... وهي تحاول تتمالك اعصابها.. عقت غشوتها وتحجبت حجاب زين.. ومشت شوي لين ماوصلت جدام السياره وسمعت قوم خليفه...
عبدالله: شحالك؟؟ ياحيالله خلييفه....
خليفة: ياخي بلا غلاسه توك سائل عن حالي فالتيلفووون...
عبدالله: ياخي تستوي نذل...بعطيك بكس على خشمك...
خليفة: حتى انك غيران من خشمي دومك الا حاط عليه...
عبدالله: جب جب...
صد عبدالله صوب عنود... وهو مبتسم...ويتامل في ويهها اللي من زمان ماشافه..
عبدالله: هلا والله عنوووده...شحالج؟؟
عنود: بخير الله يسلمك..شحالك انته عبدالله؟؟ الحمد لله عالسلامه...
يالله يالله طلعت منها الكلمات ....
عبدالله: بخير الله يعافيج....والله يسلمج ويسلم لج غاليج يارب...
خليفة كان واقف في النص.. وشكله جي..رززه...
خليفة: منو داخل الصالة...
عبدالله: نورة بس...
خليفه: والباقي؟
عبدالله: رقوود..ماعدا حصه في المطبخ قاعده تسوي لك الكيكه اللي طالبنها حظرتك.....
انحرج خليفه من عبدالله...
خليفة: ههههههههه حليلها حصه انا كنت الا اسولف وياها خذت السالفه جد...الله يعطيها العافيه... المهم انا بدخل اسلم على نورة....
قال هالكلام بمعنى انه بيخليهم رواحهم شوي... عبدالله شق الحلج وهو مستانس...اطالعه خليفه وقال..
خليفة: دقيقه وحده بس...بحسب لك.... ان مادخلتوا بزوالك...
عبدالله : بخيل..بس ماعليه روح الحين..
سار خليفه عنهم ودخل داخل البيت....
وقف عبدالله مجال عنود... عنود منحرجه وهو منحرج بعد مب عارفهم كيف يرمسها...وشكلهم كان غلط ...
عبدالله: شخبار الدراسه وياج عنود؟
عنود: الحمد لله.. ماتم شي عن التخرج....
عبدالله: الله يوفقج ان شاء الله...
عنود: الجميع يارب...
عبدالله: احمم.... عنود..ابغي ارمسج بسالفه..بس ماينفع احين...
عنود: شو السالفه؟؟
عبدالله: السالفه تخصنا ..بس ماعليه بناجل الكلام عنها احين...بس بغيت اقولج اني..صدق صدق...تولهت عليج وايد وانا في امريكا...
احمرت عنود وازرقت واصفرت.... وخافت ريولها ماتشلها..وقلبها تم يدق بالقووو....اول مره عبدالله يقولها كلمه مثل هاي... وماعرفت شو تقووله..
عنود: تشتاقلك العافيه عبدالله..تسلم...
عبدالله: بس العافيه؟؟؟ وانتي؟
ظحكت العنود وسكتت... وصدت بويهها صوب ثاني ...
عبدالله ذاااب من داخل..بس مسوي نفسه جامد... وفخاطره يتفداها ويتفدا ظحكتها...
عبدالله: صدق عنووووده.... تولهتي علي والا لا؟؟؟؟
ارتبكت عنوود وماعرفت شو تقوله؟؟ الصراحه هي تولهت عليه مووووت..بس كيف بتقووول هالكلمه له ؟؟
عنود: خلصت الدقيقه..خليفه بيحشرنا...
عبدالله: تتهربين من الجواب.... ماعليه فهمت..
عنود: شو فهمت؟؟
عبدالله: انج ماتولهتي علي...لو تولهتي بتقووولين...
عنود: لا والله حرام عليك... تولهت عليك وايد...
.
.
.
.
سكت عبدالله وهو ميت من الفرحه..... وعنود انصدمت من لسانها الخاين...يالفظيحه كيف تقوله تولهت عليك؟؟؟ ووايد بعد؟؟؟.. عضت على شفايفها وركظت داخل البيت .. وعبدالله لحقها بعد شوي وهو ميت من فرحته...

---------------

الفصل السابع

دخل عبدالله الصالة وحصل عنوده تسلم على نورة..وخليفه يالس يجلب قنوات التلفزيوون..ويطالع عبدالله بنص عين... وبنظرة تقوله انه هذي اخر مره ينفرد ويا اخته.... خليفه من النوع اللي يوم يحب شخص معين ويعزه وايد ..يعيبه يطفربه ويغلس عليه.... عشان جي كان مطفر بعبدالله وذالنه على سالفة عنود..
نورة: ياحيالله عنووووده.... مفاجأة..ماخبروونا انج يايه...
عنود: من متى يعني انتوا محتايين حد يخبركم بوصوولي؟؟ تراني دوم اييكم..
نورة: لا عاد اليوم ييتج مختلفه عن كل مره...
سكتت العنود وهي منحرجه ..وقرصت نورة في ايدها عشان ما تغلس عليها جدام عبدالله.... وعبدالله يا ويلس عدال خليفه ..
نورة: نسير بطلع لج شيلة بيظا عشان تعقين العباة والشيلة...
عنود: اوكي..
سارت عنود ويا نورة فوق لغرفة نورة... وعبدالله يتبعهم بعينه... ويوم اختفن..صد صوب خليفه وتقرب وباسه على خده بطريقة تظحك... ابتعد خليفه وهو جااز من عبدالله ووييهه معتفسس..
عبدالله: فديتك انا... مشكووور الغالي جبرت بخاطري...
خليفة: ياخي انته وخطيبتك فيكم طبع خايس.... لا تبووسووون...
خليفه صدق مايداني حد يبوسه ويظايق يوم حد يتلصق فيه....
عبدالله: فديتني انا وخطيبتي والله...
خليفه: ماجنك تفديت اختي؟؟؟؟
عبدالله: ماتفديت اختك....تفديت خطيبتي...وبعدين انته شحقه ماتقولي.؟؟ شوف كيف جابلت البنت ببجامه نوم... زين اني بعد ماكنت بوزار وفانيله.. جان قلت لي ياخي بتكشخ لها...
خليفة: نسينا ماكلينا... احين يا وقت تحاسب على التكشييخ؟؟ ماتحيد يوم كنا نلبس كلنا نلبس برمودا ونتسبح رباعه في الحوش وهم يرشووونا بهالفوز..
عبدالله: هههههههههههه اسكت الله يخسك لا تذكرني.. المهم انا بسير ابدل ثيابي وبتسفر.. وبييب مفاتيحي والبوك..وبنزل.. لاني مافيني ارد اكب فوق مره ثانيه عقب.... وانته ولد عمي ادخل ميلس الرياييل وشغل المكيف والتلفزيوون واقعد هناك لين ماييك... اخاف حرمت ناصر تدخل البيت وتحصلك متفيزر..
خليفة: لا تبطي...مب ياي بيتكم اقعد ارووحي انا...
نش خليفه وسار صوب ميلس الرياييل .. وهو ميلس منفصل عن الفيلا بس عداالها. وعبدالله ركب فوق ودخل حجرته... طلع الكيس اللي فيه هدايا عنود.. وراح صوب المكتب وياب ورقه وكتب عليها شي وحطها داخل علبه من العلب الموجوده في كيس الهدايا.. بدل ثيابه وتسفر.. وخذ اغراضه والكيس وطلع ساير صوب حجره نورة... دق الباب وياه صوت نورة اللعلووع..
نورة: منووووووووو؟؟؟
عبدالله: انا...عمّج..
نورة: لحظه..
شوي وفتحت نورة الباب وطالع بس ويهها ومب مخليه عبدالله يشوف أي شي ثاني داخل الغرفه بما في ذلك عنوود...
عبدالله: فجي الباب يالسيسبااان.. قولي لعنود تي شوي...
نورة: شو تباها؟
عصب عبدالله على نورة..
عبدالله: نوروووه....!!!
نورة: انزين انزين.....
فتحت الباب وخلت عبدالله يدش.. عنود كانت يالسه على كرسي التواليت ..عبدالله اجدم شوي وحط الكيسه على الشبريه..
عبدالله: عنوووده..هالاغراض يايبهم لج انا من امريكا.... واسمحيلنا عالقصووور.
انحرجت عنووود... زين ان نورة بس موجوده لو حد من خوانها صدق بتقفط وبيحترق ويهها..
عنود: ليش تعبت نفسك عبدالله...المهم توصل سالم...
عبدالله: لا تعب ولا شي..والله كان ودي اخم السوق كله بس عاد ماشي بيزااات هههههههه...
عنود: ههههههه مشكوور والله ...تسسسلم..
عبدالله: الله يسلمج..... بس وغلاااااااة الغااااالي عندج... ماتفجين الكيس الا يوم توصلين البيت....
عنود: ليش يعني؟
عبدالله: بس..ادريبهن خواتي ملقوفات..وفيهن فضول يبن يعرفن شو يايبلج... بس انا اباج تشوفين الهدية ارووحج اول بعدين خبريهن اذا بغيتي..
عنود: ان شاء الله ولا يهمك... مشكور مره ثانيه..
عبدالله: العفووو الغاليه... تامرونا بشي انا بنزل عند خليفه وعقب بنطلع...
عنود: سلامتك والله...
عبدالله: الله يسلمج... فمان الله..
طلع عبدالله من الغرفه وسكر الباب وراه ونزل ساير صوب الميلس...
في الوقت اللي كان فيه عبدالله يغير ثيابه وسار عقب عند قوم نورة...حصه في المطبخ سوت العصير عشان توديه صوب ولد عمها... لو كان حمدان مابتسوي هذا كله بس لانه خليفه ما اييهم دايما..وتحس انه مثل الضيف..عشان جي متعبله منه.. شلت العصير وسارت صوب الصالة وماحصلت حد... قالت في خاطرها اكيد في الميلس.. وسارت صوب الميلس واستغربت انها حصلت جدام الباب نعال واحد بس... معقووله خليفه اروحه داخل.. ؟؟.. رجعت تلتفت صوب الحوش وين السيايير واقفه..وماشافت سياره غريبه غير سيارة خليفه بس...معناته محد غريب في البيت... دخلت داخل الميلس وويهها قافط... لو ان البشكارة واعيه هالحزه جان قالت لها هي تودي العصير..بس البشكارة مسكينه ترقد الظهر..وماتنش غير العصر.. دخلت الميلس وحصلت خليفه يالس ويطالع التلفزيوون.... وماد ريوله جدامه على الطاولة...اول ماشافها اعتدل في يلسته وهو بروحه فقط ويهه...وايد ماخذ راحتي والله...
حصة: السلام عليكم..
خليفة: هلا والله حصه...وعليج السلام والرحمه...
ونش يبا يشل عنها الصينية وهو متلوم انها تعبلت منه...بس حصه صدت بالصينية صوب ثاني ..
حصه: لالالا والله ماتشلها خلها عنك...اروومها..
خليفة: يابنت الحلال ..شحقه تعبلتي...؟؟!!..
حطت حصه على الطاولة اللي جدام خليفة...
حصه: افا عليك..لا عباله ولا شي..الظهر ولازم الواحد يبل ريجه..شحالك خليفه وشحال الاهل كلهم؟؟
خليفة: بخيير الله يعافيج كلهم بخير وسهاااله...شحالج انتي وشحال الدراسه وياج..؟!
حصه: عم بندفششش...لا باااس.. انا وعنود بنتخرج رباعه هالكورس...على طاري عنود جان يبتها وياك؟؟؟
خليفة: يبتهاااا..وراني مايبتها..!!.... اكيه فوق عند نورة تلقينها...
حصه: لااااه؟؟ ياحيك يوم يبتها... عيل وين عبدالله عنك؟
خليفة: ساير يبدل ثيابه وبيي احيين...
حصه: اهااااا.. زين عيل انا بسير اسلم على عنود...
خليفه كان خاطره يقولها تقعد...بس هو يعرف ان اخوها لو يا وشافها يالسه بينقد عليها وهو مايبالها المشاكل... ولو انه ودّه انها تيلس ويسولف وياها اكثر...
خليفة: على راحتك ولو اني ماريد ايلس ارووحي...
وابتسم لها...نزلت حصه عيونها مستحيه...
حصه: بزقر لك عبدالله بخليه يستعيل...يالله برااايك..
خلييفة: الله يحفظج..
طلعت حصه وهي مرتبكه... شبلاه خليفه ؟؟ مب عوايده ياخذ ويعطي بالكلام.... الظاهر ان امريكا تغير والله... طلعت من الميلس ولبست نعالها..سايره صوب البيت..وهي قاعده تركب الدري سايره فوق صوب البنات كان عبدالله نازل...وهو شكله مستانس...
حصه: هااااااا بو الشباب...مستانس اشووف..؟!..شفتها هااا؟
عبدالله: شفتها فديت ويهها...بس ماشبعت منها...
حصه: هههههههههه لاحق عليها ..يوم بتملج بتشوفها قد ماتبا...
عبدالله: الله يسمع منج...اقول.. خلي حد اييبلنا عصير ..حلاوه...اي شي..خليهم يودوونه الميلس خليفه يالس هناك ارووحه..
حصه: وديت عصير خلاص....
عبدالله عقّد حياته...
عبدالله: ليش انتي مودتنه؟؟
ارتبكت حصه وخافت اخوها يسويلها سالفه...
حصه: البشكارة راقده منو تبا يوديه يعني؟؟؟
سكت عبدالله وقرر انه يطنش..وكمل طريجه للميلس....بس حصه حست انه ماعيبته السالفه .. اووف متى بيودرون اهلي هالتشدد كله؟؟.. او على الاقل يخففوون منه...عنبو هذا ولد عمي مب غريب يعني.....طنشت الموضوع هي بعد... وركبت فوق عند البنات...
خليفة وعبدالله يلسوا في الميلس لين 4 ونص..وعقبها طلعوا بسياره خليفه سايرين صوب ربعهم...
حوالي الساعه 7 بعد صلاة المغرب دخل حمدان البيت لانه عنود اتصلت له عشان ايي يشلها ويوديها البيت..لانه عليها واجباات وتحظير ليوم السبت... عشان جي اول ماوصل حمدان ركبت السياره وياه وطلعوا صوب بيتهم... واول ماوصلوا البيت كانوا قوم خليفه وعبدالله طالعين منه... لانه عبدالله كان يبا يسلم على عمه وعيال عمه ..عنود كانت متغشيه .. حمدان وخليفه كل حد وقف سيارته عدال الثاني ونزلوا الجامات....
خليفة: هااا حمداااان... اشوفك خطفت عليها عنود ويبتها وياك..
حمدان: ارووحها متصله تبا ترد اون عليها واجبات..وانتوا وين سايرين بعدكم ماشبعتوا من الحواطه؟
خليفة: بوصل عبدالله البيت وبعدين بسير الحلاق وبرد لكم...
حمدان: اجّل الحلاق احين..تعال وياي السينما ..بسير بحظر فلم فنان...
التفت خليفه صوب عبدالله..
خليفة: شوالراي عبدالله؟
عبدالله: انا واحد عايف السينما من امريكا...ابا اسير البيت وصلني البيت عقب سوا اللي تباه..
رد خليفة يلتفت صوب حمدان..
خليفة: خلاص تمام بوصل عبدالله البيت وبرد لك..ترياني هني وبنسير رباعه...
حمدان: تمام....فمان الله..
دخل حمدان البيت وقوم خليفه طلعوا منه.... نزلت عنود من السياره وهي شاله الكيس اللي فييه الهدية..وركظت صوب حجرتها بسرعه... اصلا عنود لا عليها واجبات ولا شي...بس تبا تشوف شو يايب لها عبدالله ...وبما انها لازم تكون بروحها اصرت انها ترجع البيت ...دخلت غرفتها وقفلت الباب... عقت الشيله والعباه وعلقتهم بالكبت...ويلست على الشبرية وهي تفتح الكيس.. اول شي شافته دبدوب بحجم متوسط لونه بني وحلووو وايد.... طلعت الدبدوب وحطته على المخده..بعدها شافت شنطه صغيرة للايد.. ولونها بيج بس كاشخه ومرتبه...وفي الكيس بعد علبتين.. وحده صغيره ووحده وسط..الصغيره فتحتها وحصلت ميداليه صغيره لونها فظي ومكتوب فيها حرف A بحركه حلوه... وهالحرف طبعا يخص عبدالله ويخص عنود بعد لانهم نفس الحرف... والعلبه الاخيره شكلها معروف شوفيها..فتحتها وحصلت قلب مع سلسله وخاتم مناسب..وشكله ناعم ورقيق وايد ومن النوع اللي تقدر تلبسه دايما ....وفي العلبه ورقه.. استغربت عنود من هالرساله اللي حاطنها عبدالله... عشان جي يعني طلب هالسرّية هذي... فتحت الورقه وقرتها..
" السلام عليج...مرحبا عنوده شحالج؟ اكيد انتي مستغربه من الرساله..بس سمحيلي ماشي طريقه ثانيه... اول شي ان شاء الله تعجبج الهدايا.... ثاني شي تذكرين الموضوع اللي خبرتج عنه؟؟ مافي مجال نتكلم فيه الا بالتيلفون لانهم مايخلونا رواحنا... عنوده انا اعرف ان عندج موبايل... يعني ترومين ترمسيني بدون محد يسمعج..وصدقيني هي مره وحده بس ومابطول معاج... هذا اذا كانت عندج ثقة فيني.. هذا رقمي... ******* واتصليلي وقت تكونين فيه فاظيه ومتاكده من ان محد بيسمعج...بتريا اتصالج بفارغ الصبر... واذا ماحبيتي تتصلين وتعرفين الموضوع بتفهم قرارج هذا...
عبدالله "

تمت عنود تقرا الرساله مره ورا الثانيه وهي مب مستوعبه...عبدالله يباها تكلمه في التيلفووون..!!... تخبل هالريال...مب صاحي... ياربي شو بسوي؟؟ مب مينونه انا اتصل فيه.... بس شكله هو عنده موضوع مهم انا طبعا واثقة من عبدالله... شي اكيد انه مايبا يسوي فيني حركه بايخه... والله محتاره... ياربي شو بسوي؟؟؟
رجعت عنود الرساله وطوتها ودستها في الكبت... وقررت تفكر بهالموضوع عدل قبل ما تتهور وتتصرف تصرف تندم عليه عقب...
وصلوا خليفه وعبدالله البيت... نزل عبدالله ونزل خليفه وياه لانه شاف سياره عمه.. وبيسير يسلم عليه... دخل عبدالله قبل خليفه عشان يشوف له درب... بس يوم دخل الصالة حصل الحريم والبنات كلهن يالسات ويا الشايب... مافي مجال خليفه يدش عندهم....
عبدالله: السلام عليكم..
الكل: وعليكم السلام والرحمه
عبدالله: ابويه عبدالله عند الباب يبا يسلم عليك....
نش بو خالد عشان يسلم على ولد اخوه ..ونشت ميرة بعد عشان تسلم على اخوها... وتمن ام خالد ونورة وحمده والعيال يالسين في الصالة..اما حصه اول ماسمعت بطاري خليفه ركظت صوب المطبخ... تعبانه على هالكيكه مابتسمح لنفسها بانها تنساها....وهي بروحها ماتدري ليش كل هالاهتمام...ولا فكرت فيه اصلا...
عقب ماخلصوا سلامات ورد الشايب وميرة داخل البيت...تم عبدالله شوي ويا خليفه عقب دخل هو بعد يوم شاف ولد عمه ركب سيارته وبيروح خلاص... طلعت حصه من المطبخ وهي شاله الكيكه وحاطتنها فعلبه بلاستيك غطاتها شفافه .. واشرت لخليفه انه مايروح ...انتبه لها خليفه وابتسم.... في خاطره يقول حليييييييييلج يابنت عمي اسميني عبلت عليها مسكينه...نزل من سيارته وسار صوبها..ماد ايده عشان ياخذ الكيكه... حصه كانت على وشك انها ترفض مره ثانيه لانها اصلا تخاف ان ايده تلمس ايدها .. عشان جي ماتحب انه يشل عنها شي ..بس خليفه اصرّ..
خليفة: عاد والله ماتقولين لا....هاتيها عنج....اسميني عبلت عليج بنت عمي..
خذ العلبه من ايدها بدون مايستوي أي تصادم ..وارتاحت حصه من هالسالفه..
حصه: لا اتحسب عمك بتستفرد فيها.. لازم عاد تذوقهم شغل ايدي...
خليفة: تحلميين... ثلاجتي فاظيه مافيها غير ماي وعصير.. بحطها في الثلاجه ومحد بيي صووبها...
حصه: يالبخيل...
خليفة: يعني مسوايه لي مخصوص ..وتبيني افرط فيها... لالالالا...بس مشكووره والله يعطيج العافيه وتسلم هالايد..
قفطت حصه...
حصه: الله يسلمك... سلم على الاهل... وعلى عمي خصوصا...
خليفه: يوصل ان شاء الله .. وتصبحين على خير حصه..
وابتسم لها مره ثانيه... وهي في خاطرها تقول لا تبتسم... لانه لاحظت انها تستويلها اضطرابات في المعده يوم يبتسم لها...
حصه: وانته من اهل الخير... ..
خليفة: فمان الله...
حصه: الله يحفظك...
حط خليفة العلبه في السّيت اللي عداله وركب سيارته وروح صوب بيتهم... وردت حصه ويلست عند اهلها ..

عنود..ومن استلمت رسالة عبدالله وهي عقلها مب عندها....دايما تفكر بهالسالفه...مره تقول انها مابتتصل وفظيحه وغيره..ومره تقول انها وايد مبالغه في الموضوع..بتتصل وبتشوف شو عنده وبتسكر وخلاص...بس بعدها ماقررت على شو تستقر....تخاف تتصل وتندم...وتخاف ماتتصل وتكسر بخاطر عبدالله... وبعدين يمكن يباها بشي ظرووري..والسالفه مثل ماقال تخصهم هم الثنينه... يعني لازم تعرفها... فقررت انها تخاطر وتتصل له .. وهي شبه مقتنعه بانها ماتسوي شي غلط... كانت في الجامعه يوم طنشت كلاسها لانها مب قادره تركز علىالمحاظرات... دخلت كلاس فاظي وسكرت الباب وراها وحطت عليه كرسي عشان محد يدش عليها.... طلعت تيلفونها من الشنطه مع الرساله.. ودقت رقم عبدالله وقلبها شوي وبيطلع من حلجها من كثر ماكان يدق بالقووو...
عبدالله في هاللحظه كان بعده راقد...لانها كانت بعدها الساعه 11 الصبح... عشان جي تاخر بالرد ..رقاده ثجيل... بس يوم سمع التيلفوون..ومد ايده عشان يرد...سكر التيلفون... لانه عنود ماصدقت على الله انه مارد عشان مايكون عندها عذر...اذا سالها بتقوله اتصلت بك ولا رديت عليه....وينتهي الموضوع... بس شوي وصاح تيلفونها .. فنقزت من الكرسي وهي مرتبكه..تشوف رقم عبدالله ...ترد والا ماترد؟؟؟ اخر شي ردت..وحطت السماعه على اذنها بدون ماترمس...
عبدالله: آآآآآلوووووو..؟؟
صوته كان ثقيل ويبين عليه انه نايم.. ذابت عنود من سمعت صوته..فديت هالصوت ياربي...ولا رامت ترد ولا تقول شي...
عبدالله: الوووو.. منو وياي؟؟؟
عنود: صـ....صـباح الخير عبدالله...
فز عبدالله من شبريته ويلس وهو مب مصدق هالصوت الناعم اللي وصله..عنوود اتصلت..!!!... حلم والا علم...؟!
عبدالله: صباح النور والسرور...منوووه؟
عنود: انا عنود..
عبدالله: هلاااااا والله وغلاااا...... شحالج عنود؟
عنود: بخير الحمد لله....شحالك انته...؟
عبدالله: انا مستااانس...صبري شوي بتغسل وبييج..لا تسكرين...لحظه
عنود: اوكي..
راح عبدالله ودخل الحمام وغسل ويهه كم مره ورد للتيلفوون...
عبدالله: هلا...عنود وين انتي؟ مارحتي الجامعه؟؟
عنود: بلىى..انا في الجامعه احين...
عبدالله: اهاااا... سمحيلي مارديت عليج اول مره كنت راقد...
عنود: لا عادي..نوم العوافي ان شاء الله..
عبدالله: الله يعافيج يالغاليه... همممم... عيبنج الهدايا؟
عنود: واااايد....رووعه ..مشكوور والله تعبت نفسك..
عبدالله : اهم شي انهن عيبنج....وانتي مشكووره لانج واثقه فيني واتصلتيبي..
عنود: الصراحه ترددت وايد...بس الفضول ذبحني ابا اعرف شو السالفه...وبعدين سالفه الثقه هاذي مايحتاي نرمس فيها اعتقد... انته ولد عمي ومني وفيني..قبل ماتكون...يعني....هممم.... ريلي..
عبدالله بغا يموت يوم قالت عنود هالكلمه...اول مره يحس بان انسانه ملتزمه فيه ومرتبطه به... وحس بحلاة هالالتزام يوم يكون بينهم تفاهم وحب مهما كان بسيط...
عبدالله: تسلمين والله...والسالفه مثل ماقلت لج تخصنا انا وانتي...
عنود: شو هي... خذ راحتك وارمس اسمعك..
عبدالله: اخاف اصدمج... بس ماعليه بخاطر... الله يسلمج يا عنووده.. انتي قربتي تتخرجين ماشي باقي لج... وانا باقي لي سنه..وانتي تدرين انهن الا شهرين وبرد اتغرب مره ثانيه في امريكا الله يقلعها... واول ماتخرج وارجع ...بعرس... وانتي تعرفين هالشي صح؟
انحرجت عنوود.
عنود: هي اعرف ان العرس اول ماترجع البلاد...
عبدالله: تمام....وبما اني بسافر مره ثانيه... فانا ماريد ابتعد كليا عن حياتج نفس السنه اللي طافت... ارمسهم كلهم ماعدا انتي محرمه عليه... وانا هالشي حز في خاطري...وحالي السنه اللي طافت صراحه كان مووول مايسر ولو مب مصدقه سالي اخوج...والله ياعنود اني ماقول هالرمسه الا جي ..لكني صدق صدق تميت الا افكر فيج..واحس ان السنين تركظ عني وانا بعدني ماتعرفت عليج مثل ماابغي...ولا تقربت منج مثل ما المفروض اني اتقرب منج بما انه نحن خلاص بنعرس السنه اليايه...واصلا اول مابرجع مابيكون شي مجال حقنا لانه ترتيبات العرس تاخذلها وقت هي بعد.... انا نطيت عن الموضوع ....بس بقولج احين انه السالفه ومافيها..اني ابا املج عليج في هالاجازه...وابا رايج بهالموضوع قبل ماكلم ابويه وعمي..
انصدمت عنود من هالطلب.... من خطبها عبدالله وهي ابدا مافكرت بالملجه قبل العرس... كانت تحس انها مالها داعي الا قبل العرس باسبوع تقريبا يملجوون... بس كلام عبدالله اللي قبل طلبه هذا.. خلا راسها يدووور... معقووله عبدالله كان يفكر فيها وايد ويتوله عليها ويبا يكلمها..؟؟... اذا كان كلام عبدالله صدق.. فهذا يعني انه يبا هالارتباط بينهم من خاطره ومتحمس له اكثر منها .. وفي خاطرها هي بعد تبا تكون قريبه منه... ماكانت تقدر تتخيل سنه ثانيه تمر بدون ماهو يكون موجوود..
عبدالله: عنود.!!..وياي؟؟
عنود: آآآ هي وياك عبدالله.. سوري كنت افكر..
عبدالله: وشو رايج؟؟..
عنود: انته تبا هالملجه من الخاطر؟؟ وتشوف انها لمصلحتنا يعني؟
عبدالله: يالله يا عنود..!!..والله ما تتصورين شكثر ابا املج... وانا اشوفها لمصلحتنا دامها بتقرب بينا...وانتي تعرفين عدل ان ولد عمج مستحيل يلعب عليج بهالملجه..
عنود: والله ماقصدت جي عبدالله..
عبدالله: ادري ماقصدتي بس حبيت اطمنج اكثر.... المهم شو رايج؟ انا مااضغط عليج بشي... اذا ماتبينها قولي مابا الملجه وصدقيني مابملج احين... اما اذا موافقه برمس ابويه وعمي وبنقنعهم ...
عنود: اللي تشوفه عبدالله...
عبدالله: يعني؟؟
عنود: موافقه..
عبدالله: تسلمين لي والله... خلاص عيل انا برمسهم قريب..وبقنعهم ان الملجه تكون بعد التخرج عشان مانشغلج عن امتحاناتج...
عنود: مب مشكله...بعد التخرج زين ..يكون احسن ..
عبدالله: بس فكري عدل...ترا من عقب الملجه ماشي خلاااص من عبدالله...
ويظحك عليها....
عنود: اونك تسوي فلم رعب..!!..ههههههههه منو قالك اني ابا الخلاص اصلا...
عبدالله: فديتج والله... والله يا عنود انج غاليه على قلبي بشكل..
غاليه..بس ماقال احبج.... مع ذلك فقط ويهها بشكل...
عنود: تسلم..حتى انته انزين....
عبدالله: انا شوو؟؟
عنود: غـــــــااالي...
عبدالله: ههههههههه ادري اني غالي عندج.. غصبن عنج اصلا..
عنود: لا والله... ههههههه واثق وايد..
عبدالله: هههههههه ترا ويهج شفاف بشكل..يبين عليج...
عنود: الله يعيني عيل...
عبدالله: صدقيني احلى مافيج انج على طبيعتج....لا تتغيرين..
عنود: تسلم عبدالله عيونك الحلوه....همممم... اقول انا بسكر احين عنك..بسير الكافتيريا بتريا حصه قايله لها بنتريق رباعه...
عبدالله: ياحظها والله ... برايج الغاليه مابطول عليج
عنود: اووكي... شي في خاطرك؟
عبدالله: ابا سلامتج ...وانتي؟
عنود: سلامت راسك ...
عبدالله: الله يسلمج ياربي
عنود: مع السلامه..
عبدالله: الله يحفظج..
سكر عبدالله عن عنود وهو مرتاح البال ومستااانس... خزن رقمها في تيلفووونه لانه ماقدر يجبر نفسه انه يحذف الرقم.. هو مابيتصللها.. بس بيخليه عشان يتامل فيه ويذكرها... حط التيلفون على الطاوله ودخل حمامه عشان يتسبح..
-----------

الفصل الثامن

بعد ماسكرت عنود عن عبدالله.. مسحت تاريخ ووقت المكالمة.. سبحان الله ماتدري يمكن حد من خوانها يفتش تيلفونها ويشوفها متصله بعبدالله... مع انهم ماكد سووها لانهم واثقين فيها..بس بعد سبحان الله تدق فبالهم ويسووونها..ماشي مستبعد... طلعت من الكلاس ومرت على الحمام تحط شوية روج على شفايفها.. عنود وحصه ونورة من النوع اللي مايحط مكياج في الجامعه الا في البريك وبس يوم يروحن الكافتيريا... اما في الكلاسات..يمشن الروج وكل شي ...المهم طلعت من الحمام وراحت صوب الكافتيريا وين تترياها حصه.. دخلت الكافتيريا ودارت بعيونها عالبنات لين ماحصلت حصه تشتغل على اللاب توب مالها..على الطاولة المعتاده... عنود مشت وهي سايره صوبها وفي طريجها سلمت على كذا بنت... لين ماوصلت اخيرا عند حصه اللي رفعت عينها وهي مظايقه شوي..
عنود: صباح الخييير...فديت هالويه المعصب...سوري حبيبتي..
حصه: صباح النووور... لا تقردنين.. شياج تاخرتي علي..ربع ساعه عنبوو من خلص كلاسج وين كنتي؟؟
فكرت عنود بسرعه بعذر..مستحيل تقولها طبعا انها رمست اخوها مع ان ثقتها فيها كبيرة..
عنود: شفت ميثا ربيعتي في الدرب وزختني بالسوالف...سوري غناتي..
حصه: ماعليه... احين قومي ناخذ ريوق انا يوعانه..وماعندنا غير ساعه..
وصت حصه الشلة اللي عدالهم على لابتوبها عشان ماينسرق ..وسارن يتشرن الريوق ورجعن...
حصه: اخبرج عنووده.. فصلتي شي للتخرج؟
عنود: وييييييييييييه..!!!..ذكرتيني والله تصدقين ناسيه السالفه... وانتي؟
حصه: نورة يايبه كاتلوجات حلوه من الشارجه.. انا عيبني اربع موديلات مادري عاد شو بختار..
عنود: اسميج خاينه شحقه ماراويتيني اياهن يوم كنت عندج؟
حصه: والله نسيت ..ماعليه يوم بتينا مره ثانيه براويج اياهن..
عنود: شو حبيبتي كل يوم بييكم انا؟؟ شحقه انتن ماتن عندنا؟؟ بعدين مابيخلوني اسير يوم عبدالله هناك تدرين انتي...واصلا اصلا..ماشي وقت..ماشي باقي عن التخرج.لين مانشتري القطع ونفصل..
حصه: وين عنوووووود ييتج انتي عندنا اسهل عن سيرتنا عندكم... تدريبهم انتي كيف تفكيرهم....
عنود: مالي خص...حاولي.. عنبوو خاطري توووني فيوم وافرح فيكن ..كله انا اسيرلكم..
حصه: همممممم...ماعليه بحاول وياهم بس ما اوعدج...ما يندرابي جان مااحصل لي طراق من عند ابويه لو رمسته...
عنوود: هههههههههههه ..عاد محلاج وانتي يايه باجر وغزج وارم...ههههه.. لالا عاد مب لهالدرجه عمي طيب ويتفاهم يوم تيبينه باسلوووب ...
حصه: هههههههههه..ماعليه بتشووفين..والله بحصل لي هزبه حتى لو وافقوا بعد بنهزب..
عنود: تحملي في سبيل فستان التخرج...
وكملن ريوقهن وسوالفهن لين مايت الساعه 12 وراحن الكلاس رباعه..
الساعه ثلاث ردن نورة وحصه البيت... حصه اول ماوصلت تسبحت وارتاحت شوي..بعد ماصلت العصر نزلت وحصلت امها يالسه مع حمده وناصر وعبدالله منسدح وحاط راسه على ريول امه..يت حصه ويلست وياهم
ام خالد: ها بنتي.. وين اختج عيل؟
حصه: فوق اظني الا رقدت..
ام خالد: هالبنت دومها راقده..
عبدالله: حرام عليج امايه .. ناشة من فير الله ولين ثلاث وهي في الجامعه..خليها ترتاح شوي لين المغرب..
ام خالد: برايها لكن ماباها تسهر في الليل انا...
حصه: نورة من تحصل الرقاد مابتقول لا....
عبدالله: خلوا نوروه في حالها.. خلها ترقد...انزين حصووووه... ( ودز حصه بريله شوي شوي).. منو شفتي اليوم في الجامعه؟
ويبتسم...وحصه فهمت عليه وظحكت..
حصه: انته منو تباني اشوف في الجامعه..؟؟
عبدالله: هههههههههههه اباج تشوفين كل حد حلوووو..
حصه: والله المزاييين وايد في جامعتنا...
عبدالله: يالله عاد... مثل خطيبتي ماتحصلين....
ام خالد:وابوووي عليك انا...قم عني جان هاي رمستك عن البنات...
حمده:هههههههه حليله ياعمووه خليه يتغزل بخطيبته..ماورا عليه من ثلاث سنين خاطبنها..
ناصر: هي والله انا ماكملت بخطبتي سنه وماصبرت ...
حمده: اذكر.. الله يسامحك بس ماخليتني اتجهز عدل..
حصه: هههههههه المهم عرستي وماصار عليج شي صح والا...
حمده: اخوج اللي طاح فيها... عقب العرس اونه عاد نحن في شهر العسل تميت كل ماسير السوق اتشرا شي..خسرته...
ناصر: فدوه عن راسج ام سهيل تستاهلين ازود والله...
عبدالله: ياعيني ياعيني... سكتوا عني لا عرس في هالاجازه...
ام خالد: عين خير فديتك..ماشي عرس الا يوم تستوي دختور..
عبدالله: اللي يسمعج يا امايه يقول دكتور طب عام وبتعامل ويا المرضى وبعالج الناس...
ام خالد: عيل شووووو؟؟؟
عبدالله: اطّاعوا امايه... ماتدري تراها اني تخصصت اشعه...
حصه: قول والله؟ حتى انا مادري...ليش تخصصت هالتخصص؟؟ جان خذت جراحه والا عظام والا عام أي شي...
عبدالله: والله يا اختاااه انا انسان حساس..والسنوات الاولى من الدراسه يوم درسنا كيف نتعامل مع المرضى وهالخريط كله مارتحت من السالفه.. قلبي يعورني .. فقلت بتخصص اشعه...ابرك لي..بعيد عن المرضى.. اتعامل مع الاجهزه..وادرس الصور ومن هالسوالف... يعني اذا بختلط بمرضى بيكون على الحد الادنى عرفتي.. !...مب يومياا... بس مع ذلك دكتور...
ناصر: احسن لك افتكيت والله...
ام خالد: المهم دختوور..
عبدالله: ههههههههه فديت الخقاقه انا...
ام خالد: عنلاتك ياللي ماتستحي..قم اقوولك عن ريولي....مسود الويه..هذا اوني رافعه راسي بك...
نش عبدالله وهو ميت من الظحك على امه وحبها على راسها..
عبدالله: هههههههههههههههه آسف والله غناتي... خلاص انتي مب خقاقه انتي فخوورة...
ناصر: افااا يا امااايه..يعني نحن مب رافعه راسج بنا؟؟ والا ما نرفع الراس..
ام خالد: فديتك كلكم فيكم الخير وينشد بكم الظهر..واحد ظابط...والثاني مهندس...والثالث دختوور..
عبدالله: امايه ..عاد يوم بتسيرين تخقـّـين ...اوه قصدي يعني..تفتخرين فيني عند الناس...هب تقولين دختور...قولي دكتووور..
ام خالد: الا واحد....
حصه: ونحن ماينرفع بنا الراس؟؟ اشوفج طلعتينا من الحسبه انا وعليا ونورة...
ام خالد: انتن بناتي الله يوفقكن..وتستون حريم بيت والنعم بكن...ذيج الساعه ترفعن الراس..
حصه: حليلنا والله... احين انا ونورة متعبات عمارنا ودارسات ادارة واقتصاد عشان نقعد فبيوتنا؟؟؟ لالا انا بفتح لي شركه..
ام خالد: ان شاء الله بنتي يوم بيبيظ الديج...
عبدالله: هههههههههه احللللى يا تحطيم انتي..... حصه ماعليج انا بفتح لج انتي وعنود ونورة شركه...بشغـلكن فيها....
حصه: فديت اخويه انا.... انزين سمعي امااايه...طالبتنج طلبه..
ام خالد: شو في خاطرج بنتي..؟؟
حصه: امايه ...انا لين احين مافصلت للتخرج...وماشي باقي ترا..
ام خالد: مب مشكله بتفصلين ...
حصه: انزين امايا.....عنود بعد مافصلت..وانا عندي كاتلوجات فيهن موديلات للفساتين..وقالت لي هاتيهن عشان نختار رباعه فساتين للتخرج..وعقب بنشتري القطعه على اساس الموديل...
ام خالد: انزين مب مشكله ..طرشي الموديلات حقها... اخوج بيوديهن يوم بيسير صوب بيت عمه...
حصه: امايا...نحن مانعرف جي...لازم نكون رباعه..ونختار ونتناقش فيهن رباعه...
ام خالد: قولي انتي ابا اسير بيت عمي وخلصي..
حصه: والله يا امايا ان السالفه مب جي.. انا بوديهن في الجامعه وبنيلس هناك ...بس ماعندنا وقت موليه.. ساعه لريوق وساعه لغدا وصلاة.. ومن عقبها البيت....والبنت مابيخلونها تي بيتنا....تدرين عاد انتي عبدالله هني ومختلف الوضع عن قبل يوم كانت تينا...
عبدالله: والله ياحصه انا ماحيدني باكل البنت...
حصه: ادري فديتك...بس فيه شي اسمه مستحى...
ام خالد: لالا صدق...عيب البنت تسير بيت ريال خاطبنها بعدها ماصارت فذمته هي.. حتى لو بنت عمها..الا جان يايه ويا اهلها...
حصه: يعني بتخليني اسير؟؟
ام خالد: لا... والله مب لازم ياحصه تقعدن تختارن رباعه..ربع ساعه يبالكن لين تختارن وعقب كله سوالف...
ناصر: انزين خليها تسير امايه....صاكه عالبنت صكه...برايها الا بيت عمها..واختها بتسير وياها..
ام خالد: لالالالالالالا...انا بناتي مايطلعن بدوني.. هن ماتعودن على هالسنع..اطرشهن بيوت الناس..
عبدالله: امايه هذا بيت عمي اذا ناسيه....مب أي ناس... بعدين عنود دوم كانت تي بيتنا يوم انا محد... حتى حرمة عمي بتزعل بتقول بنتي دوم تسيرلهم وهم مايردون زيارتنا...
حصه: هي والله صدق امايه...
ام خالد: انا دوم اسيرلهم...لا بتنقد ولا شي ...عزّه ماعندها هالحساسيات...
حمده: انزين عموه سيري انتي ويا البنات اذا عسب مايروحن رواحهن...حليلهن مايطلعن مكان الا من البيت للجامعه والعكس...
ام خالد اظايقت وشافت العرب كلهم عليها... فقررت انها تترك الموضوع للي اعلى سلطه منها... وحق اللي محد يروم يناقشه ويقوله لا.... بو خالد..
ام خالد: مايخصني ..شاورن ابوكن..
حصه: امايه...انتي تدرين ان ابويه سار العزبه ومابيرد غير المسا... والمسا مابنسير مكان..هذا شي طبيعي..
عبدالله: اتصليله انزين عتيلفوونه....قوليله بسير صوب ام سلطان وبشل البنات وياي...وانا بوصلكم..
ام خالد: هيييييييييي ثرها جي السالفه..!!!.. قول اروحك تبا تسير صوبهم....
عبدالله: ههههههههه لو ابا اسير مب محتاي عذر عشان اسير...بسير متى مابغي...بيت عمي ..
ام خالد: اووووف..يامن حشرتووووه... انزين ماعليه... بس عقب صلاة المغرب بنرد ..خلصتن والا ماخلصتن مالي خص انا...هب تيسن تحشرني عند العرب ...ترا بحرم اوديكن بقعه
عبدالله: سمعي امج..ترا بتحرم توديكن بقعه...تراكن كل يوم سايرات وياها مكان...ههههه والله انج يا امااياا....!!!
حصه: ولا يهمج... بس على شرط احين نطلع...

ام خالد: سيري ووعي اختج وتزهبن بسرعه لين ماتصل بابووج....طلبات هالبنات ماتخلص..
عبدالله: ركظي قبل ماتغير رايها...
نشت حصه وهي مستانسه.. وييييين من زمااااان ماساروا بيت عمهم... ودقت على نورة وقالت لها انهم بيسيرون صوب بيت عمهم...نشت نورة وهي ماشبعت من رقادها تغسلت وتلبست وهي مب فاهمه حق شوهالسيرة المفاجاة..بس اذا السالفه فيها ظهرة من البيت اكيد مابتناقش بالموضوع...المهم في ظرف ربع ساعه كلهم متلبسين وخالصين.اتصلت حصه بعنود على موبايلها وعبدالله لاصق فيها يتسمع... وقالت لها انهم بيوونهم بعد شوي ويا الوالده...وسكرت عنها..وبعدها..ركبوا كلهم فسيارة عبدالله.. وساروا صوب بيت عمهم..
فبيت محمد الكتبي.. (بوسلطان) .. سكرت عنود تيلفوونها وركظت للطابق الارضي عشان تخبرهم ان قوم عمهم يايين صوبهم... نزلت الصالة وحصلت امها يالسه مع ابوها ووياهم حميد وحرمته منى مع بنتهم عزه.. ومريم حرمه سلطان مع عيالها الثلاثه محمد وحمد ومنصور..يت عنود ووقفت عند باب الصالة..
عنود: امايا... ترا حرمه عمي وبناتها يايين صوبنا...زهبوا فواله جان بتزهبون..انا سمحيلي حجرتي لايثه وحتى الصالة الصغيرة اللي فوق لايثه.. بروح ارتبهن...
ام سلطان: حياهم الله يابنتي.. ياحيهن البنات من زمان ماين صوبنا...منو يايبنهم الدريول؟
عنود: اظني...والله مادري يامايا ماسالت....
ام سلطان: فديتج مري عالميلس شوفيه جان يبالها ترتيب..احيد اخوانج وربعهم سهرانين فيه امس...مايندرا منو بييبهم اخاف حد من الشباب..
عنود: ان شاء الله امايا... حميد حد فيه الميلس؟؟
حميد: مادري يمكن خليفه وحمدان هناك ووياهم حد... صبري بتصلبهم..
وبعد ماتصل حميد بخليفه...عرف انهم في الميلس بس وياهم شباب... فطنشت عنود سالفه الميلس وراحت على طول فوق..بدلت ثيابها وتكشخت لبنات عمها..ورتبت غرفتها ودخنتها وعطرتها..ونفس الشي رتبت الصالة ودخنتها... وخلت المكيفات شغااله...ونزلت تحت تترياهم يوصلون... وكانت امها مجهزه الدلال وحريم اخوانها مسويات من قبل فوالة العصر..لانه بيت ام سلطان معرووف مايخلى من الضيووف فلازم يوميا تكون الفواله محطووطه وكل شي جاهز...وبعد شوي سمعوا سيارة داخله بيتهم ...طلعت ام سلطان تستقبل.. وقالت لعنود لا تطلع لانه يمكن حد من الشباب يايبنهم.. ويوم سارت تشوف فعلا طلع عبدالله اللي يايب البنات وخليفه وحمدان كانوا يستقبلوون رواحهم هذيلاك بعد من سمعوا سياره داخله البيت طلعوا..ونفس الشي حميد اللي دخل يغير كندورته وطلع لهم يوم سمع سيارتهم . عبدالله كان يسلم على عيال عمه ... والبنات متغشيات...ام خالد سلمت على عيال محمد وسارت صوب ام سلطان تسلم عليها... البنات لحقن امهن وحصه شاله الكاتلوجات.. وتنعرف انها حصه لانها اطول من نورة...حميد الوحيد اللي عبرهن..لان الشباب استحوا بوجود اخوهن وامهن...
حميد: السلام عليكن...شحالكن يابنات..؟؟
حصه ونورة: بخير الله يسلمك حميد شحالك انته؟
حميد: بخير وعافيه ..ياحيالله من يانا..
نورة و حصه: الله يحييك
لحقن البنات امهن وسلمن على ام سلطان..ودخلن البيت.. وعبدالله وحميد وخليفه وحمدان ردوا يدخلون الميلس عند باقي الشباب... ام خالد والبنات سلمن على مريم ومنى حريّم العيال واخر شي عنوود.
حصه: انتي بعد تبين سلام...توني مفارقتنج ويا هالويه...
عنود: خسج الله الا ياحظج يوم بتبوسيني...
يلسن شوي البنات تحت وشربن العصير وتعذرن عن الفواله..وسارن على طول فووق...
عنود: وين تبن تيلسن.؟؟ في الصالة الصغيرة والا الحجره؟؟
نورة: احسن لنا الحجره بناخذ راحتنا وبنتسدح...
عنود: على راحتكن...
دخلن البنات حجرة عنود وقعدن يمدحن في ديكور الغرفه وكل شي.. وفتحت الكتالوجات ويلسن يشوفن الموديلات اللي فيها...عنود عيبنها وايد الموديلات بس ماحصلت الي هي حاطتنه في بالها...
عنود: حصوووه كلهن حلوات بس اذا بختار لازم اغير في الحركات شوي.. ماحس انهن على مزاجي...
نورة: صبري... هذيلا ثنينه...وين الثالث...؟؟
حصه: هي والله... وين الثالث؟؟ وانا اقول بعد وين الموديلات اللي مختارتنها...!!!..ماحصلتهن في هالكتلوجات..
عنود: ياحافظ عليج لايكون مايبتييه؟؟؟
حصه: لا ..يايبتنه... اذكر اني عديتهن في السياره...ثلاثه...
نورة: يمكن نسيتيه تحت في الصالة...
حصه: بسير اشووفه... امي مهددتني قالت عقب صلاة المغرب بنرد البيت..
عنود: خليه انا بسير ادوره تحت..
حصه: لا والله ماتسيرين... انا بسير اييبه اكيد نسيته في الصالة..يلسي انتي ويا نورة...
لبست عنود عباتها وشيلتها اللي كانت عاقتنهن..وطلعت من الغرفه ونزلت تحت... رحبن فيها الحريم يوم شافنها نازلها وقالت لهن انها نست كتلوج... بس محد منهن شافه... دورت حصه في المكان اللي هي كانت يالسه فيه ولا حصلت شي... قالت في خاطرها اكييد نسيته في السياره... فتحجبت ويوم يايه بتطلع زقرتها امها
ام خالد: حصه بنتي وين تبين طالعه؟؟؟
حصه: امايه الظاهر نسيت الكاتلوج في سيارة عبدالله..بسير اييبه..
فسكتت الام عن بنتها لانها ظيفه ومابتيس تسويلها سالفه ....لبست حصه نعالها وسارت صوب سيارة عبدالله وهي تدعى انها ماتكون مقفوله...يوم وصلت عند باب السياره وين ماكانت هي قاعده..كان الباب مجابل ميلس الرياييل... وحصه كانت متحجبه بس...بطلت باب السياره وهي تحمد ربها انها مب مقفوله..وحصلت الكاتلوج طايح تحت السيت.. فشلته وردت سكرت باب السياره..ويوم لفت عشان ترد داخل البيت كان واحد من الشباب توه طالع من الميلس.. المسكين رفع عينه من غير قصد وطاحت عينه فعين حصه... وهي لحظه وحده بس حفظ ملامحها وهي حفظت ملامحه.. وعلى طول حصه انحرجت وتغشت وهو مسكين نزل راسه وكمل طريجه لين برا البيت وطلع...ردت حصه البيت تتنافض وعلى طول ركبت فوق ودخلت غرفه البنات ..وكملن تفتيش عن الموديل المناسب بدون ماتيب أي طاري لهالحادث الغير مقصود..
عنود وحصه قررن انهن يسون نفس الفستان.. ونفس القطعه... لانهن دايما كانن يحبن يطقمن مع بعض من كثر ما ربعتهن قوية...
نورة: الصراحه حلوو الفستان الي اخترتنه..وبتطلعن متميزات... بس عاد من وين بتاخذن قطع مناسبه؟؟
عنود: والله هني في العين شي قطع حلللوه بس الصراحه ماشفت لين احين شي مناسب... لازم نسير يابوظبي يا دبي... بس عاد منو اللي بيودينا؟؟
حصه: الا جان اقنع امي نسير خميس وجمعه الشارجه ومن هناك نسير دبي ونتشرا ونرد العين..
نورة: هي فديييتج والله فكره عبقريه .. قوليلها..
عنود: نورووه... صدق لي قال كلن يغني على ليلاااه...نحن في سالفة القطع وانتي همج سيرة الشارجه... بعدين تعالي حبيبتي... انتي وبتسيرين دبي ترومين توصلين لها..وانا منو بيفزعبي ؟؟ لا تنسين انه لازم تكون القطعه وحده لي ولج ...
حصه: همممممممممم والحل؟؟
عنود: شو رايج نعزر عليهم يودوونا بوظبي... والله ذاك اليوم سايره ويا امي شو قطع فنانه عندهم..شي عجب..
حصه: عمري لا تتكلمين في الاحلام... تكلمي بحدود المنطق... نحن منو بيودينا بوظبي؟؟
عنود: رمسن عبدالله..
نورة: اوكي فرضا ودانا عبدالله...وانتي؟؟ مابيخلونج تين ويانا...
عنود: وانا برمس خليفه والا حمدان...
حصه: وتتحسبين بيخلوونا نفج رووسنا ونسير ويا الشباب رواحنا؟؟ هذيلا من نوصل مركز بيخلونا وبيسيرون كافيه وبيخلوونا نحوط رواحنا...
عنود: احلى شي...شو تبين احسن من جذي...
حصه: حبيبتي... قوم خالد وناصر يدرون بهالسوالف..والله يوقفون فحلوجنا مابيخلوونا...
عنود: اوووفففف كيف تصعبن الاموور...والحل؟؟
نورة: انا بقولكن الحل.. حصه تقنع امي نسير الشارجه عشان من هناك تروح دبي وتاخذ لها قطع..ويوم توصل هناك..تاخذ حقها وتاخذ حقج نفس القطعه... وحصه ترا ذوقها حلوو وانتي تدرين..وبس تنتهي المشكله..
عنود قعدت تفكر شوي...وهي حايسه بوزها مظايقه لانها بتفلس من سيرة دبي...
عنود: اوكي مب مشكله...وانا واثقه بذووق حصه..حل مناسب..
حصه: بس مب اذا ماعيبج تذليني طول حياتي....!!
عنود: لا ولا يهمج ذوقج حلوو اعرفه ..بعدين انتي تعرفين بالموديلات والتفصيل اكثر مني..تعرفين شو مناسب ماشاء الله عليج..
حصه: احم احم...ياااي مدحووني...مشكووره والله من ذووقج بس..
وبعد ماخلصن هالاتفاقات كلها اذن عليهن المغرب... وقامن يصلن وعلى طول لبسن شيلهن والعبي ونزلن تحت... ومن عقبها ردوا البيت مع عبدالله...

-------------

انشالله اكمل فيوم ثاني

اف تعبت عمت عيوني اكملها بعدين
بس مشكووور اخوي على القصة

تقبل مروري

العفو
ولاتنسى تكملها

يعطيك العافيه مهرشاد
اني من محبي اللهجه الاماراتيه
وأكيد رح استمتع بقراءتها
بإنتظار الاجزاء الباقيه
موفق دووم

السلاااام عليكم خيي مهرشاد
اشكر لك جهودك المبذوله في هالقسم لا عدمناها يارب
وخوياتي يمدحوا بالقصص الإماراتيه وان شالله تكو اول قصه اتابعها هي هالقصه من تحت ايدك .. فمشكوور..

لي بعض الملاحظات... :amuse:
ما حطيت عنوان القصه اخوي :rolleyes:

عنوانها ... ( اموت واحيا بك .. )
وخيي ما ذكرت انها منقوله.. يعني ميرا واكبر ساحر بالعالم.. عرفناها انها من وحي خيالك وصنع بنات افكارك
ومشكور على ابداعك وجهدك..
بس هذي ضروري تذكر انها منقوله اخوي ..
والا انت اللي كاتبها لتعدد المسميات في المنتديات...
ووقت ما اقرى منها اي جزء لي رجعه بإذن الله

عوافي علينا جهودك المبذوله
ويعطيك الف عافيه عليها
دمت بحفظ الرحمن :bigsmile:

شمعه تحرق مشكوره على المتابعه
اميرة المرح انشالله ماتكون اخر وحده .....وانا ماكتبت عنوانها لاني لمه قريت القصه ماكان مكتوب اسمها والحين بكتبه....وانا قلت اخر شي اكتب منقول بس الحين اعدلها واكتبها بالاول....دقايق وحط اجزاء ومشكورين مره ثانيه.

ماعرف شكله ماتتعدل المشاركه....المهم انا بكمل القصه
.
.
.
.

الجزء التاسع

في الشارجه... سعيد كان توه موقف السياره جدام البيت وبينزل... بس تم يالس في السياره شوي وهو يطلع صورة نورة من البوك.. يوم هي صغيرة عمرها 13 سنه وظحك...طبعا سعيد سارق هالصورة من زمان.و نورة بعدها لين الحين ادور هالصورة... كانوا ذيج الساعه في مهرجان حديقة هيلي.. والبنت متعبله ولابسه طاقية عوده وتاكل اسكريم سايح.. ومصورينها ومستويه مثل الساحره... بس سعيد تعلق بهالصورة بشكل غريب... يذكر وقت ماكانوا يصورون هالصورة كان هو عدالها وحاط القناع على ويهه وناوي يروعها... ورد يظحك... تذكر يوم صرخت وعقب عصبت وفرّته بالاسكريم... وقته كان هو عمره 15 سنه..وتوه كان بادي يتعلق فيها ...انتبه في هاللحظه على سياره وقفت جدام سيارته... ونزلت منها بنت متنقبه.. ووراها خوله بنت خالته.. والقهر..كانت الشيله مردوده عن راسها وقصتها برا.. والحبيبه متكشخه ومتمكيجه مكياج خفيف.. ويوم دقق في البنت المتنقبه عرف انها فاطمه اخته وشاله اكياس وياها.. تم سعيد يحترق وهو يالس في السياره متظيج ومب عارف كيف يتصرف.... قبل مايدخلن البنات البيت بشوي...خطفت سياره متروسه شباب وهرنت للبنات..وطبعا هم ماشافوه يالس في السياره لانه سيارته مغمجه... فاطمه بسرعه دخلت داخل البيت..اما خوله التفتت اول وبعدين تفيجت تدخل البيت... وراحت سيارة الشباب طبعا بعد ماخذوا فكره سيئة عن بيت سعيد والبنات اللي فيه... آخ يالقهر..هذي منو فاكره نفسها تدخل بيتها بهالطريقه..ماعليه انزين...سكتنا وايد بس عقب اللي شفته اليوم ما بسكت واللي يصير يصير....
رد دس صورة نورة في البوك وشل تيلفونه وحطه هو والبوك في مخباه ونزل من سيارته ودش البيت..وهو كل شي يرقع بالبيبان.. دخل بيتهم وعلى طول سار صوب الصالة... حصل فاطمه اخته توها يالسه وتعق نقابها.. وخوله يالسه بالكرسي المجابل..وعدالها شيخه... ومنال ومنى يطالعن التلفزيوون..وكانت الظيجه والقهر مبينه على ويه سعيد ..وعيونه توزع شرارات في كل مكان بشكل يخوف... وقف عند باب الصالة ورقع بالباب وراه... الكد صد صوبه ومستغربين من رده فعله وشو صاير عليه ...فاطمه حست بالمصايب.. وشيخه قالت في خاطرها احسن..شيخه انسانه مدينه وماكانت راضيه اختها تطلع بروحها مع بنت خالتها خوله...وخصوصا ان خوله مب متستره بما يكفي... فقالت خله يهزبهن عشان يتادبن شوي... اما خوله.. فما توقعت ان المصيبه اطيح على راسها... هي تحب سعيد بشكل غريب ومفتوونه فيه.. ومن غرورها كانت تظن ان سعيد مهتم فيها ...عشان جي ماتوقعت ان يطول لسانه عليها او يصيبها شي منه... اما منال ومنى..يوم شافن سعيد ياي معصب وشكله بيدفنهم حيين.. انسحبن بكرامتهن وراحن الصالة الفوقانيه يكملن مسلسلهن بعيد عن الحشره..... سعيد..فكر انه يبدا بخوله ويطلع اللي في خاطره عليها... بس عقب قال لا بهزب فطوم اول عشان ماتقول خوله انه ياي ومتحامل عليها هي اول وماقال شي لاخته... صد صوب فطوم وهو يطالعها بعصبيه
سعيد: ممكن تقولين لي ... وين كنتي.. ومن متى انتي برا البيت...ومنو سمح لج اصلا تطلعين بلا شور؟؟؟
فطوم تم قلبها يدق بقووو...وكانت صدق صدق خايفه... هي من اول ماطلعت ماكانت مرتاحه من السيره لانه محد وياهم حد كبير...بس شو تسوي انجبرت..
فطوم: سعيييد.. كنت في السوق اتشرا شوية اغراض.. شو بلاك؟؟
سعيد: منوو سمح لج انتي تسيرين بدون مايكون حد وياج كبير؟
فطوم: سعيد شوف.. انا مخبره امايه ...وقايلتلها بنسير ويا خوله وخالووه السوق.. قالت دام ويا خالتج برايج.. فيوم سرنا بيت خالووه قالت لنا تعبانه سيرن رواحكن... ووو..
سعيد: ورحتي..؟؟ ماجذبتي خبر...سرتي اروحج بدون رقيب ولا حسيب تصيعين في الاسواق لين الساعه 8؟؟؟؟
فطوم: سعيد...!!!!... شو اصيح في الاسواق هاي بعد؟؟؟ سايره اتشرا اغراض وامك ماتفيجت لي من اسبوع اطلبها... وخالوه تعبت شو تبانا نسوي.؟؟
سعيد: ماترومين تردين البيت وتاجلين السيره؟؟؟ ماترومين ادقيلي وتخبريني.؟؟ انا بوديج شحقه ماطلبتي؟؟
فطوم: سعيد انته لاهي ويا شغلك وربعك واصلا كم مره طلبت منك وتقولي بعدين...
فطوم كانت بتقرب وتصيح... ماتتحمل هزاب خصوصا من سعيد... يمكن غلطت هي بالظهره بروحها مع خوله بس ابد ماسوت شي يسيء لسمعتها واهلها ..بالعكس كانت حاشمه عمرها من طلعت لين ردت...بس سعيد عصبيته ماخلته يقدر يهدا او يتساهل مع اخته... مع انه يحبها اكثر وحده ..بس وعشان هالسبب حزت في خاطره هالحركه اللي مسوتنها...
سعيد: حسابج بعدين عند ابويه مسودة الويه..... (صد سعيد صوب خوله).. وانتي؟؟..
خوله بطلت عيونها..واستغربت ان الهجوم انصب عليها...
خوله: انا شوو؟؟؟
طالعها سعيد باحتقار واضح من فوق لتحت...
سعيد: هذا شكل تطلعيبه الاسواق يابنت الحسب والنسب؟؟
خوله: شوفيه شكلي؟
سعيد: شووفيه شكلج؟؟؟؟ انتي ماتستحين على ويهج؟؟؟ بالله عليج ماحسيتي بشي وانتي تمشين عدال بنت متنقبه..وانتي لابسه الشيله كانج مب لابستنها...الشعر مكشوف..والويه مكشوف.. والمكياج والدنيا.... لابسه هالبدلات ومترصصه والعباة مفتوحه بعد؟؟؟؟...هذا وانتي اكبر من فطوم جي تصرفاتج... تحوطيبها في الاسواق والتيلفون في ايدج وماسدج هذا بعد..ساحبه سياره متروسه شباب ووصلتيهم بيتناااااا؟؟؟؟؟؟؟
فطوم وشيخه حطن ايدهن على قلوبهن.... اول مره يشوفن سعيد بهالعصبيه... وكلهن توقعن ان صفعه محترمه بتوصل خوله اليوم لا محاله....
خوله انصدمت من هالكلام ..وقامت من كرسيها ووقفت..وكالعاده..شيلتها طاحت وماعدلتها... وماعرفت بشو تفكر وكيف تتصرف...كيف سعيد يتهجم عليها بهالطريقه ويتهمها بهالسوالف؟؟....
خوله: سعييد... احترم نفسك ارجوك...
سعيد: جـــــــــب ولا كلمه... ماريد اسمع حسج تسمعين ..!!!...فظحتينا الله يفظحج... شو بيقولون الناس عن بيتنا... شو بيقولون عن البنات اللي فيه..؟؟؟.. مافكرتي انتي بهالشي؟؟ مافكرتي ببنات خالتج ؟.. والرمسه اللي بتلحقهن من ورا راسج..؟؟... بس سمعي ياخولوه... الرمسه توصلج وتتعداج.. واحد من اثنين... يا انج تحشمين عمرج واهلج..وتتسترين..شعره وحده من قصتج ماريد اشوفها حتى جدامي ... ظهرات بروحج ويا الدريول والبشكاره مااافي.... تكشفين ويهج لااااا... تتنقبين.... وتلبسين عباه مسكره... وعطرج اللي شال الدنيا هذا تودرينه.... واذا ماعيبتج الرمسه ...بيتنا لا تدشينه..ولا انتي بنت خالتنا ولا نعرفج... تسمعين والا لااااااا؟؟؟؟؟
الكل تم ساكت ومنصدم وخايف حتى انه يتنفس عن يحصل له هزبه بعد... خوله نفس الشي..بس بعد ماستوعبت..لفت صوب الكرسي خذت شنطتها وركظت برا البيت وهي تصيح..... نشت فاطمه تبا تلحقها وتراظيها... بس وقفها سعيد...
سعيد: يلسي محلج لا اعطيج كفف انتي بعد.... خليها تذلف يعلها ماترد...
فاطمه: سعيد مب لهالدرجه يعني....
سعيد: اووووووص ولا حرف.... والله يا فطيم ان شفتج والا حتى سمعت انج ظاهره وياها مكان حتى بوجوود حد اكبر منج وياج..بزوالج.... فاهمه؟؟..
يلست فاطمه مكانها ..ويت ام فيصل على حشرة الحسوس... ويوم بغت تسال لبسها سعيد وسار فوق..يخاف يغلط على امه بالرمسه وهو معصب جي...

بالباجر.. يوم الاحد وفي العين...حصه ونورة متحاوطات بالشيّاب.. بو خالد وحرمته... مستغلات فرصه انهن رواحهن وياهم...وكان الوقت المغرب...وهن ناويات يشنن حمله اقناع عشان سيرة الشارجه نهاية الاسبوع.. بو خالد كان ماد ريله جدام نورة... ونورة تهمزه ...وحصه يالسه عدال امها...
بو خالد: يالله بنتي بعدج هالريل همزيها وخلاص..ادريبج تعبتي..
نورة: لا ابويه فديتك لو اتم لين باجر مابتعب..المهم انته ترتاح من ويع الريول..
بو خالد: بارك الله فيج بنتي....
ام خالد: امايه حصه..صبي جاهي لابوج...
بو خالد: لالا مب الحين..ويا العشا... وين عشااايه هووو؟؟
ام خالد: تباه الحين؟؟ بعده المغرب....!!
بو خالد: بعد شوي خلهم يحطوونه...يعت..
حصه: احمم..ابووويه...طالبتنك طلبه...
ام خالد: اشوف كثرانه طلباتج بنت حمد هاليومين..!!..
بو خالد: آمري حصه شو بغيتي؟
حصه: ابويه فديت ويهك..تخرجي ماشي باقي عنه.. وابالي قطعه افصلها فستاااان...
بو خالد: مايخالف انزين...بتوديج امج السوق الصبح...
حصه: ابويه الصبح عندي جامعه....وين اسير؟؟ والعصر امي ماداني تطلعبنا السوق لانه ينترس شباب..بعدين العصر مايواحيلك اصلا ساعتين وخلص...
بو خالد: انزين تصبري لين الخميس بتوديج الصبح... وبتفصلين قطعتج..
نورة: ابويه..انته ماتبا لبنتك شي زين ويبيظ الويه..؟
بو خالد: معلوم مابقصر ببنتي...هذا تخرج..مابتتخرج كل يوم هي من الجامعه..!!
نورة: ابويه..ترا في العين ماشي محلات تسرر وايد يعني عشان قطع الفساتين... كل الكشخه في دبي والا بوظبي... وكل البنات يتشرن من هناك...ارخص واحلى من العين بواااااااااااايد...
بو خالد: وهي حصه ماتبا من العين؟؟

حصه: هي ابوويه.. هني في العين بندور لين مانعيز ولا بنحصل شي مناسب...
بو خالد: بنتي انا ماروم اوديكن صوب بوظبي...
نورة: ابوويه مب لازم بوظبي...اخر هالاسبوع خلنانسير الشارجه.. بتسير هي وامايه يتشرن من دبي وبيقضن حايتهن ويخلصن..وبنرد العين بالجمعه... وبعدين امايه تراكم مازرتوا عليا عدل عقب ماربت..ساعتين يلستوا عندها في المستشفى وروحتوا...احين كملت اسبوعين تقريبا.. خلينا نسير نشوفها.. منها تسلمين علىالاهل ومنها تقضي حصه حايتها وتتشرا..
ام خالد: ماتنغلبن في الرمسه بناتي....
بو خالد: خييبه يومين يبالكن تتشرن من السوق؟؟؟
حصه: ابويه والله الوقت يخطف بسرعه...يعني اذا بنسير بنطلع بعد الغدا..بنوصل العصر..لين مانسلم ونيلس اذن المغرب...عقب عاد ماينسااار السوق....الجمعه الصبح بنسير وبناخذ اللي نباه وبنرد عقب الغدا...
بو خالد: برايكن مرخوصات... بس عاد ماباكن تسيرن ويا الدريول بروحكن لين الشارجه.. انا برمس عبدالله يوديكن دامه فاظي...
حصه: فديتك يابويه الله يطول بعمرك...
نشت وحبته على راسه...
ام خالد: ابوج مابتظربه شمس وهو يدوربج في الاسواق...جي انا اللي بفزعبكن..
نورة: يوووووه غارت العيووز هههههههههههه
حصه: هههههههههه فديتج انتي بعد ..الله لا يحرمنا منكم ثنيناتكم...وهاي بووسه على راسج يالغاليه..
وحبت حصه راس امها بعد....وامها تتبسم مستانسه...
بوخالد: قومي عاده هاتيلي العشا ....نورة تهمزني والا بامرها هي ....
نورة: ليش يعني انا.؟؟
ام خالد: صغير القوم خادمهم....
حصه: ههههههههههههه ويييييو...
برطمت نورة وردت تكمل هموووز...
في هاللحظه دخل عليهم عبدالله ياي من براا...سلم عليهم ويلس عدال اخته نورة..لان حصه راحت المطبخ تيب عشا ابوها...
عبدالله: هااااااااا شو امسيتووووا..؟!.
ام خالد: بخير ولدي.... وين كنت انته؟
عبدالله: انا كنت ويا ربعي والله... وينهم عيل عنكم؟؟
نورة: كلن لاهي فبيته ويا عياله والله... خوانك مادريبهم ظاهرين بعد جنهم...
عبدالله: شو عشاكم...؟ يوعان انا...
ام خالد: فديتك احين بييبون عشان ابوك..تعشى وياه..
عبدالله: مااااااااااااريد عشا الشايب انا...تقشفف... خبزه وجبنه ماياكل شي غير... ابا شي راااهي...
نورة: تريا العشاااااا....ماخلصووه بعدهم توه المغرب..
عبدالله: بكفخج اقولج يوعان...ماشي عندكم شي جاهز...
نورة: هممممممم ..الفطاير هو الشي الوحيد اللي جاهز لانها مسوتنه من العصر..وقبل شوي مخلص..
عبدالله: ويالسه اطالعيني؟؟؟...قوووووووومي هاتيلي فصحن بتصبربه لين العشا...
نورة: بسم الله انزيييييييييييين...
نشت نورة وسارت المطبخ تيب لاخوها فطاير..ويوم هي طالعه..حصه كانت داخله ويايبه عشا ابووها فصينية صغيره... بما ان بو خالد ماياكل واايد...وحطته جدامه... ويلست عدال عبدالله..
حصه: توك ياي.؟؟
عبدالله: هي توني..شو فخاطرج..؟
ام خالد صبت لابو خالد شاهي ..والشايب قاعد يتعشى ولابسنهم...
حصه: مارمسك ابويه؟
عبدالله: عـــــن؟؟!
حصه: يباك تودينا الشارجه اخر الاسبوع هذا.... ويا امايه طبعا..
عبدالله: لا والله..؟!... دارس طب وشغلتوني دريول عندكم..!!!!
حصه: يالله عــــــــــــاااد عبدالله... تبانا نسير ويا الدريول يعني؟؟
عبدالله: مب مشكله انزين لاتسويلي مناحه....وحق شو تسيرون انتوا؟
حصه: بسير اتشرا قطعه حقي وحق عنود حق فستان التخرج...
عبدالله: اهاااااااااااااا دام جي لعيوون عنوووده اكيد بوديكن...وكيف اقنعتوهم انتوا؟؟
حصه: هههههههههه قردناااهم وحبينا رووسهم..
عبدالله: هههههههههه مب هينات...يعني يتقردنون الشيّاب اليوم؟؟
حصه: هي هي رايقين اليوم... شو في خاطرك؟
عبدالله: بتعرفين احين...
يت نورة وحطت صحت الفطاير جدامه... ويلست وياهم...عبدالله قعد ياكل من الفطاير.. وتقرب اكثر عدال ابووه...
عبدالله: بـــوو خالــــد,,,,,
نورة وحصه يتظاحكن شوي شوي...عبدالله شكله يظحك وهويحاول يكون سياسي...
بو خالد: لبيــه...
عبدالله: لبيت حااايه...ابا ارمسك فسالفه ...
بو خالد: هااات شو عندك...؟!
عبدالله: ابويه خطبتيه على بنت عمي طولت وايد... 3 سنين وانا محيرنها...
بو خالد: وششووو عليك؟!!..تراك تدرس ماخلصت...تبا تعرسسس؟؟؟
عبدالله: لا ابوويه مابعرس قبل التخرج انا....بس ابا املج عليها...
بو خالد اطالع ولده بنص عين ومعقد حيّاته وشكله بدا يتنرفز..
بو خالد: خل عنك هالخرابيط عبدالله...
عبدالله: ابوويه فديتك هذي مب خرابيط... ومافيها شي لو ملجت.. البنت صايره غريبه عليه لا انا اعرف عنها شي ولا هي تعرف عني شي الا اللي يخبرووونا اياه... شقايل تبانا نعرس؟
بو خالد: وااااابوي عليك انا..حد يتعرف على بنت عمه؟!!!... ولو ماعيبتك يعني بعد ماتتعرف عليها على قولتك شو بتسوي؟؟ بتطلق؟؟؟
عبدالله: لا ابويه فهمتني غلط...لا بطلق ولا شي وهالسوالف ماخطرت فبالي... بس ابويه انا بتغرب بعد شهرين... وانا اروم ارمسكم كلكم واحد واحد ماعدا عنود... واول ماتخرج وارد البلاد بعرس... خلني املج في هالاجازه ..ويكون تيلفون بيني وبينها... لانها بتصير حرمتي مافيها شي يعني... وانتوا مافيكم تسوون لي ملجه وعرس ورا بعض بعد مارجع... خلني املج احين وبنتعارف انا والبنت عدل في هالسنه..ووقت العرس بنكون متفاهمين ويا بعض مب ارد واعرس عليها حالي حال أي غريب خطبها فجاه وعرس...
بو خالد: وانته احين مسولنا هالحشره كلها عشان ترمسها في التيلفوون؟؟؟
عبدالله: هي ابويه...لاني ماروم ارمسها وهي بس خطيبتي...محد بيخليني ولا البنت تحق على نفسهاا صلا... بس يوم بتكون حرمتي محد بيروم يقول شي...
ام خالد: خله يملج بو خالد...مافيها شي... احين الشباب جذي تعلموا يملجون قبل بوقت عشان يتعارفون.... هذاك اول يملجون قبل العرس بيوم والا يومين... والولد بيكون مسافر.. يعني مابيلحق البنت منه شي غير صوته فالتيلفون..لا بيشوفها ولا بيقعد وياها ولا شي...
بو خالد: برااايه انزين... بس غد رياال عاد ولا تخليني اندم اني وافقتك على هالملجه... ملجه سنه كامله..!!!.. اخوانك ماسووها قبلك...
عبدالله: افا عليك يالغاااالي... مب واثق فتربيتك؟؟؟ بعدين عنود بنت عمي وبحطها فعيوووني...
بو خالد: ماعليه... برمس عمك وبنشوف شو يرد علينا....
عبدالله: تسلم لي والله يابوويه...
نش وحب راس ابوه وامه... فظحك بو خالد وهو مستغرب..
بو خالد: عنبووكم عيااال...!!..مايحبون روسنا الا يوم يحصلون اللي يبونه...!
عبدالله: ابويه لا تسب عمرك...
تموا كلهم عقب يظحكون ويسولفون لين حطوا العشا وتعشوا كلهم ماعدا بو خالد اللي سار يرقد عنهم..
يوم الثلاثاء في الشارجه.. سعيد بعد ماتغدى ركب حجرته عشان يرتاح وكان راد من الدوام قبل الغدا وتعبااان.. يت امه ودقت عليه الباب ودخلت وكان هو منسدح على شبريته وجاهز للرقااد...بس يوم شاف امه اعتدل ويلس في شبريته...
ام فيصل: ها الغالي بترقد..؟!!
سعيد: هي امايه تعبان...شو فخاطرج؟
يت ام فيصل ويلست عدال ولدها عالشبرية....
ام فيصل: انا يايه ارمسك فسالفه ابويه..
سعيد: خير ان شاء الله..!
ام فيصل: يعله خير.... خالتك زعلانه عليك..وانا بعد اظايقت من تصريفاتك...
تنهد سعيد بقووو..واظايق من خاطره انهم بيفتحون هالسالفه مره ثانيه..
سعيد: امايه دخيل والديج سدّي السالفه..انا اروحي تعباان وابا ارتاح...
ام فيصل: ياولدي مايصير تتهزب بنت خالتك فبيتنا وتروغها..؟؟ مايصير هالكلام..
سعيد: اولا انا مارغتها من بيتنا...اروحها طلعت... وبعدين يا امايه انتي غلطتي...وخالتي غلطت وكلكم غلطانين... والا ماحيدج انا اطرشين بناتج ويا الناس يصيعن في الاسواق لين 8 في الليل...
ام فيصل: انا مطرشتنها ويا اختي... ومادريت بخدمتها ان خالتك تعبت وسارن رواحهن الا عقب ماخبرووني ... لكن نحن مب في هالسالفه..انته شو ياك على بنت خالتك ؟؟
سعيد: امايه..انتي ماشفتيها كيف داخله بيتنا...كاشفه شعرها وويهاومتمكيجه وعطرها فايح..وتيلفونها في ايدها.. وتابعتنها سياره شباب لاحقينها مادري من وين......
حط ام فيصل ايدها على صدرها منصدمه..
ام فيصل: ياويلي...!!!... خوله تسوي جي؟؟
سعيد: شو اتحسبين عيل انتي..؟؟ خالوه للاسف ماربتها مثل مانتي مربيه بناتج... يامايه انا والله ماهزبتهن الا من ظيجتي من الموقف اللي صار.. ولاني خايف عليهن وانتي تدرين انها بحسبه اختي.. ومصلحتها تهمني.. بس خالوه وريلها الله يسامحهم الصراحه وايد فاجين لها راسها...والبنت ماعندها خوان ينصحونها بعد... انتي اروحج تشوفينها كيف تعق شيلتها جدامي..
ام فيصل: فديتك ياولدي ادريبك محشوم عن الغلط..وانا ادريبك مابتسوي شي الا وله سبب ...وانا ادري انها تكشف نفسها جدامك اتحسبها الا هني فبيتنا تاخذ راحتها حتى انها رابيه وياكم...وتعدّك مثل اخوها.. لكن مادريت بخدمتها برا البيت...
سعيد: احين دريتي..دخيلج لا تصدعيني بهالسالفه مره ثانيه..واذا بغت اتم زعلانه طززز برايها ..اخافها تخرب خواتي انا..
ام فيصل: ياولدي مايصير جذي..خالتك زعلانه عليك وهي ماتدري شو السالفه الاصلية..وانا ماباها تحط فخاطرها عليك وعليه انا بعد...سير استسمح منها وفهمها السالفه الليله...
سعيد: اماايه...لاب ساير ولا شي... انا ماغلطت عشان اسير استسمح من حد.... وهي اروحها المفروض تشوف غلط بنتها...
ام فيصل: عشان خاطري فديتك... استسمح منها اول بادي ورمسها بالرمسه الزينه وفهمها شو صار باسلوب عدل عشان تفهم عليك بدون ماتزعل..وتقولها عن غلط البنت... وانه مايرضيك تشوفها بهالطريقه...انزين... فديتك ماريد حد يزعل عليك ...عشاني..
سعيد: هممممم..ماعليه يامايا...والله عشانج بس مب عشان خولوه مسودة الويه...
ام فيصل: بارك الله فيك ياولدي..وترا هذي ياهل ..وماحصلت حد ينصحها.... برايك ارقد الغالي بوعيك انا عند صلاة العصر...
طلعت ام فيصل وتم سعيد مظيج..لانه مجبور يسير بيت خالته ويرمسهم...بس بعد شوي رقد ولا حس بعمره...

--------------------

الفصل العاشر

في العين الساعه خمس العصر..نزلت حصه وحصلت عبدالله وخليفه وحمدان يالسين في الصالة يسولفون ويا الشايب..اول حد شافها وهي نازله خليفه... على طول حصه تحجبت وكملت طريجها ..
حصه: السلام عليكم..
الكل: وعليكم السلام والرحمه...
تمت حصه قافطه مب عارفه كيف تسلم على عيال عمها جدام ابوها واخوها..بس بعد مايستوي اطنشهم فظييحه..
حصه: شحالكم عيال عمي..؟؟
خليفة وحمدان: بخير وعافيه شحالج انتي؟
حصه: الحمد لله ... وين امايه ؟
عبدالله: دخلت حجرتها تصلي العصر ولين احين ماطلعت..
سارت حصه صوب حجره امها وعين خلييفه تتبعها بدون ماحد يحس فيه... ماقدر يقاوم انه يتامل بحلاة خطواتها وتناسق جسمها.. صح لابسه شيلة بيظا ومغطيه معظم الجسم وفوق هذا جلابيه ... بس بعد واضح للي يشوفها ان جسمها متناسق مع طولها وحلوو... ماشاء الله عليج بنت عمي..تلفتين النظر.. وقعد يفكر للحظه انها بسرعه بطيير بعد تخرجها... بتنخطب بسرعه... وبينه وبين نفسه اظايق من هالفكره..
كملت حصه طريجها ودخلت حجره امها.. وحصلتها تبدل ثيابها وشكلها ناويه تطلع..
حصه: السلام عليج امايا...
ام خالد: هلا بنتي..تعالي سكري لي هالعقد مارمت له..
يت حصه وسكرت العقد لامها..
حصه: امايا وين بتسيرين؟؟
ام خالد: بسير عند حرمه بسلم عليها..يايه من العمره..
حصه: هيي...انزين امايا بغيت اقوولج...
ام خالد: خير بنتي..؟
حصه: الخير فويهج ان شاء الله...امايا خلينا نجدم السيرة للاربعاء بدل الخميس..
ام خالد: ليش؟؟
حصه: امايا نحن بنسير السوق يوم الجمعه الصبح صح؟...معظم المراكز تسكر بالجمعه..وين بندق بروسنا؟ خلينا نسير الاربعاء والخميس الصبح بنسير السوق وبيكون مفتوح.. وبنرد..
ام خالد: هي صدقج...مب مشكله..بشاور ابوج..بس ماظني يمانع...
حصه: تمام..شو بتاخذين للحرمه اللي يايه من العمره؟؟
ام خالد: مريت العزبه الصبح ويبت لها ذبايح...
حصه: هيي..ياحيج والله.. محتايه شي؟ بسير عنج..
ام خالد: سلامتج حصه.. بس سيري شوفي ابوج جان يابوله الجاهي والقهوه والرطب..
حصه: امايا عيال عمي هناك...
ام خالد: هييي صدق... برايج عيل سيري فوق عنهم...
طلعت حصه من حجره امها بس بدال ماتروح فوق..طلعت من باب المطبخ وسارت بيت اخوها خالد.. عند ميرة...
دخلت عليها وحصلتها فارشه كتب عيالها وادرسهم بالصاله...
حصه: احم احممم ..السلام عليج..
ميرة: هلا والله حصه.. قربي..
حصه: قريييب... هااا اشوفج ادرسين العيال..!
ميرة: ياختي رفعولي الضغط...حمد فديته شاطر اروحه يحل ويحظر..الا يوم يصعب عليه شي سالني... ومحمد الانجليزي والرياضيات مخبص فيهن....
حصه: وشميم؟؟
ميرة: شماني مايبالها دراسه ..تدرين رووضه .. مايعطونهم شي يندرس..
حصه: احين انتي قاص عليج محمدووه...؟ هاتيه انا بدرسه..
محمد: وين عموووه انتي ماتعرفين...
حصه: اووص ..مسود الويه بتخرج من الجامعه ادارة واقتصاد ويقولي ماعرف رياضيات وانجليزي..!!! تعال يالله... قاص على امك انته بس..
ميره: خليه عنج..بيلعوزج والله..
حصه : انا اشوفه ملعوزنج انتي..خليني اجرب حظي وياه...
فرت حصه شيلتها وحطتهاعلى االكرسي وراها.. ويلست على الارض وحطت طاولة صغيره جدامها ..وكانت قصتها الطويلة مردوده ورا اذنها... وشعرها ملفوف أي كلام ومشبص ...يا محمد وهو متكاسل شال كتبه وحطهن جدام عمته..وقعدت حصه تشوف واجباته وشو صعب عليه وتشرح له وتفهمه..
ميرة: بخليج شويه شموه في الحمام تتسبح بروح اطلعها والبسها وبرد..
حصه: خذي راحتج اممرره...
دخلت ميرة وتمت حصه ويا محمد..وحمد عدالهم يكتب ويحل بروحه..
في الصالة داخل البيت.. بو خالد ترخص عن الشباب وسار عنهم صوب العزبه.. وتموا هم في الصاله رواحهم..
عبدالله: اخبركم... تراني بسير شمال اخر هالاسبوع..
حمدان: والله؟؟ حتى انا..شو عندك هناك...؟؟
عبدالله: انا بودي الاهل بيت خالي.. حصيص تبا تشتري قطعه فستان اون مادري اشوو...وانته شو عندك؟
حمدان: انا متواعد ويا الشله بنسير البدع وبنلعب بالدراجااات..
عبدالله: آآآخ يالقهر....يا خي خاين انته...
خليفه: عبود خل حد غيرك يوديهن..خلنا نسير وياهم نلعب...
عبدالله: ويييين ياخي مارووم..اوامر عليا من الشايب... الا جان الحقكم انا وسعيد من هناك ونسير صوبكم..
حمدان: فكرره..بس لا ..نحن احتمال نبات..وانته ماتروم تبات ...
عبدالله: اووففف.... ياخي اجل السيره مب زين عليكم...
حمدان: متى تبانا نسير يعني؟..
عبدالله: خلها بالسبت..والا الاحد...
حمدان: اسف جدا.. ورانا دراسه... ماعليه بنرد نسير الاسبوع اللي بعده وبتون ويانا...
خليفه: انا جان ماسير وياكم..ايلس اروحي في العين شو اسوي...؟!
حمدان: تمااام...
عبدالله: هي..خونت انته بعد خلوووف.. ماعليك انزين..!!
خليفه: وين تباني ادق براسي.؟؟ اسير وياكم مثلا الشارجه؟
عبدالله: هي تعال بسيارتك مافيها شي..بنتحوط انا وانته وسعيد هناك في دبي..
خليفه: لالا...انته بتنشغل ويا اهلك هناك وانا مافيني...
حمدان: بس بس.. بتسير الاسبوع اللي عقبه مب مشكله..
عبدالله: صوروا انزين.... بالفيديوو... عشان اشوفه عقب..
حمدان: ماعندي كيمره... عنود عاطتنها بنت خالوه تصور حفله عيد ميلاد ولدها...
عبدالله: انا بعطيك كيمرتي... شارنهايديده من امريكا بس والله ياويلك ان ياها شي...امانه عندك...
حمدان: تمام عيل..هاتها...
عبدالله: تعال فوق بعطيك اياها باغراضها وبعلمك عليها...
خليفه: سيروا انتوا انا بسير اسلم على اختي...
حمدان: تصدق انا ناسي حتى انه ميرة ساكنه في هالبيت...دوم منزربه فبيتها...
عبدالله: هههههههههه حليلها لاهيه ويا عيالها... يالله قم..
نش عبدالله ويا حمدان وساروا غرفه عبدالله فوق.. وخليفه طلع من الصالة ولبس نعوله وسار صوب بيت ميرة ..دخل البيت وهو مطمن طبعا انه محد فيه غير اخته وعيالها...اول مادخل الصاله تيبس مكانه..وعيونه متعلقه على حصه وهي ادرس محمد... بلا شيله.. وشكلها طبيعي وايد...والشعر ماشاء الله ملفوف ويبين انه كبير وطويل... والرقبه طويله ماشاء الله والكتوف...والبياض... قعد خليفه يتامل فيها بدون مايحس بنفسه ويستحي على ويهه...وحصه مب حاسه عليه لانها كانت موطيه راسها للكتب وتشوف محمد كيف قاعد يحل المسائل...خليفه رغم رفضه انه يتاثر بالمظهر والشكل...لكن غصبن عنه حس بضعف فريوله ..وبشي يتحرك في معدته..وقلبه يدق بقوو...يدري انه عيب عليه يتاملها بهالطريقه بدون علمها..لكن ماقدر يمنع نفسه.. غصب نفسه انه يتراجع ويطلع برا شوي... تمالك نفسه ووقف عند الباب..
خليفه: احم احم..هوووووووووود ياهل البيت...
شهقت حصه يوم سمعت صوت خليفه وخافت انه يدش عليها وهي بهالحاله..مدت ايدها للكرسي وراها ولبست شيلتها وتحجبت بسرعه وهي يالسه مكانها...
حصه: هدااا... حياك خليفه اقرب...
خليفه في خاطره يقول محلات اسمي علسانج....ياربي شو بلاني عليها انا اليوم..!!!! ..
دش خليفه وهو شكله متوتر شوي...بس حصه كانت متوتره اكثر عشان جي مانتبهت له..رفعت عينها صوبه تراقبه وهو يسلم على عيال اخته وهم ناشين يوايهووونه...
خليفه: شحالكم شباب...؟!
حمد+محمد: بخير خالي..
خليفه: يالله يالله ..ردوا درسوا مب تاخذون دخلتي حجه عشان تشردون عن الدراسه...
حصه: هي والله... تعال يالدب..كمل المساله اشوووف...
ابتسم خليفه ويا ويلس عدال محمد عالارض..مجابل حصه...
خليفه: ماسكتنه اليوم اشوفج...!!
حصة: اختك مقصّه..قاص عليها ولدها كله يقولها مافهم وماعرف...بس عشان تزهق من تدريسه..
خليفه: وينها هي عيل...؟؟
حصه: احيدها سايره اطلع شما من الحمام..تتسبح المفعوصه..
خليفه: تدرين ان شما تشبهج؟؟...
انحرجت حصه..من متى خليفه يدقق فملامحها عشاان يعرف منو يشبهها ومنو مايشبهها؟؟؟
حصه: هي ادري...
حصه كانت عينها على دفتر محمد ومب قادره ترفع عينها صوب خليفه اللي مجابلنها..وهي تحس ان عيونه مب بس اطالعها..الا داخله داخل مخها بعد...
خليفه: اسميها ماخربت يوم شبهت عمتها...
حصه كان ودها تخش راسها تحت الطاوله ..او تشرد.... بس تماسكت.. وبعدها مب رايمه ترفع عينها..
حصه: ليش يعني؟؟!!!!!..

مد خليفه ايده وخذ قلم رصاص كانت حصه ماسكتنه..وكتب على طرف دفتر محمد.. "حلـــــــوة" ... قرت حصه الكلمه وهي ميته من المستحى..بس مارامت تمسك نفسها انها ماتظحك.... ظحكت بصوت واطي وهي تعظ على شفايفها بظروسها..ويوم حست ان مستحاها كثر عليها غطت ويهها بيديها عشان تصد نظرات خليفه عنها...... سمعت ظحكته وبعدين حست انه قام من مكانه..
خليفه: خذي راحتج...بسير اسلم على ميرة...
قعدت حصه تراقبه وهو ساير وهي بعدها مبتسمه ومحمره...ويوم صدت صوب محمد حصلته يطالعها بهباله وهو مب فاهم شي... ظربته على راسه شوي شوي بمزح..
حصه: ليش فاجلي حلجك؟؟!!..حل يالله حل...
ومسكت المساحه ومسكت كلمه "حلـــوة" من الدفتر عدل..وبعد شوي دخل حمدان يدور اخته هو بعد... وقالت له انها فوق مع خليفه.. وبعد خمس دقايق نزلوا ثنيناتهم..حمدان طلع قبل وهو شال الشنطه اللي فيها كاميرة الفيديو واغراضها .. اما خليفه وقف عند الباب وملامحها حلوه وحنونه...
خليفه: بسير انا...شي في خاطرج حصه؟
حصه: سلامتك خليفه..
خليفه: الله يسلمج...فمان الله وسلمي على نوروه..
حصه: يبلغ ان شاء الله.. الله وياك وسلم عالاهل...
طلع خليفه مع اخوه حمدان وسار عبدالله وياهم... ويلست حصه تكمل تدريس محمد وتسولف مع ميرة...في الصالة كانت نورة توها نازله وشاحنه مخها كله افكار بسعيد... مارامت ترقد والسبب انها كانت تفكر فيه..ماحصلت حد في الصالة فشغلت التلفزيون ويلست بروحها تشرب شاهي.. طلعت لها امها وهي متكشخه...
نورة: االله الله يالعيوووز شو هالكشخه هاي كلها..وين بها؟
ام خالد: بسير عند عرب...وين اختج؟
نورة: مادري انا توني نازله...
ام خالد: امييه اتصلي ببيت خالتج وقوليلهم انه بنيهم بالاربعااا...مب زين نطب عليهم بدون مانعطيهم خبر..
نورة يوم سمعت هالرمسه شرقت بالجاهي وقعدت تساعل...
ام خالد: بسم الله عليج يابنتي بلاج..
وعقب ماخلصت نوبه الشرقه .. صدت نورة صوب امها..
نورة: الاربعااا...؟؟؟ احيدنا بنسير الخمييس..!!
حصه: حصه تقول الجمعه الصبح يسكرن المحلات ..صدقها ..بنسير الاربعاء وبنرد الخميس . يالله انا بسير.. اتصليبهم لا تنسين...
نورة: ان شاء الله امايه.. ولا يهمج...
نورة تمت مستااااااااانسه لانه السيرة اتجدمت يووم... وماجذبت خبر..مسكت التيلفون ودقت بيت خالتها..
في هاللحظات في الشارجه سعيد كان توه ناش من الرقاد ومتنرفز لانه مضطر يسير بيت خالته ويستسمح منها على الموقف..وكان صدره ظايج من الخاطر...يوم وصل الصاله سمع التيلفون يصيح والبيت فاظي... فطوم راقده والبنات منال ومنى يحلن واجباتهن في الصالة الفوقانيه... شيخه في المطبخ وامه طلعت...اما عليا فلاهية مع ولي العهد في قسمها... تافف وسار صوب التيلفون...
سعيد: آآآلووووو...!
نورة من فرحتها وصدمتها تمت ساكته وهي مب رايمه اطلع صوت...
سعيد: هاللي ناقصني انا ترا... آآآآلووووووووووووه..؟
حست نوره من صوته انه ظايج...مابتزيد عليه...
نورة: اسس..اسلام عليكم...
سعيد وقف قلبه... ماصدق اللي قاعد يسمعه...هذا صوت نوره؟؟!!...معقوووله؟... تم سعيد مسكين يتنفس بالقوو ويلس عالكرسي اللي وراه وهو يحس عمره مب رايم يوقف...يالله شكثر متوله عليج....
سعيد: وعليكم السلام هلا.... منو معاي؟
سعيد سال لانه خايف تكون مب هي..وان شوقه هو اللي يخليه يتخيل صوتها.... اما نوره فهمت غلط..وعصبت وتنرفزت...شو هذا..!!..كيف مايعرف صوتي..؟؟...وتمت ساكته وهي مالها خاطر ترد..بعد شوي سمعت سعيد...
سعيد: ...نــووره؟؟!!!..
نورة ابتسمت على طول وودرتها ظيجتها..واستانست... عرفني..ياااااااااي عرف صوتي..
نورة: هي نورة..شحالك سعيد...؟!
ذاب سعيد مكانه...وابتسم ورد راسه على ورا وهو مغمض عيونه وتساند على الكرسي وهو ميت من الوناسه...
سعيد: ياللــــــــــــه يانورة...قسم بالله كان صدري ظايج بشكل ماتتصورين ...بس الحين كل شي تبخر تمت الوناسه بس...
نورة ماصدقت اللي سمعته..وحست كانها في فلم والا انها مطوفه مرحله في حياتها وماتدري عنها..وفي هالمرحله صار سعيد ريلها..والا كيف يكلمها بهالطريقه...؟؟ سعيد صار متهور الفتره الاخيره....بس بالرغم من هذا كله فرحتها كانت ماتنوصف...
نورة: خير سعيد؟ ليش مظايق؟
سعيد: سالفه تافهه...لا تهتمين...
نورة: لا تخلي شي يكدر خاطرك سعيد... ماشي يستاهل...
سعيد: صدقتي.. ماشي غيرج في هالدينا يستاهل...
نورة حست بحبها يزيد ..كانت حاسه بسعيد انه وده يقول شي ..اي شي...بس خافت من الموقف...
نورة: سعيـــــــد...!!
سعيد: نــــــورة...سمعي...
وقاطعته نورة..
نورة: لا سعييد دخيلك... لا تقول شي...
سعيد: ليش عاد.. نورة حرام عليج...
نورة: لا سعيد لا تقول والله اني اخاف جي..
سعيد: نورة من شو تخافين؟؟؟...محد يسمعني غيرج...
نورة: حتى لووو...
سعيد: لين متى نورة؟؟.. لين متى بتم داس فقلبي وساكت ... خليني اطلع اللي فخاطري بس عشان انتي تعرفين عالاقل وارتاح...
نورة: اعـــرف ..اعرف .. بس لا تقول شي..
سعيد: شو تعرفين؟؟؟
نورة: اعرف الي في خاطرك...
سعيد: شو في خاطري؟؟..رمسي...
سكتت نورة شوي...كيف تقوله انها تعرف بانه يحبها ويباها... موقف محرج صدق.. قالت بنبرة عتاب...
نورة: سعيــــــــــــد...
حس سعيد مثل شي حار يمشي داخل صدره..كانه ذاب صدق صدق...قال بدون حاسيه..
سعيد: يارووووووووووح سعيد ...
نورة تمت ساكته... ومايحتاج اشرح بشو حست في هاي اللحظه... اول مره سعيد يقول هالكلمه..اول مره يقول شي يدل على التحبب.. حالتهاكانت ماتنوصف.... بعد شوي رجع سعيد وقال..
سعيد: ماعليه..مب قايل شي...دامج ماتبيني اقوول..
نورة: سعيد...مب اني مااباك تقول... انا اباك تصبر شوي...عشاني... هانت ان شاء الله انه ماتم شي..
سعيد: صابر تراني نوورووه شو تشوفيني عيل..؟؟
نورة: هههههههه نورووه؟؟؟ ايييه سعووود... نسيتني سبب اتصالي ...
سعيد: افااا يبالج سبب عشان تتصليبنا بعد؟؟.. هاتي يالله شو عندج يا ام الاسباب..
نورة: اذا كنت تعتبر هالشي مفرح ..تراها بشاااره...
سعيد: هههههههه خلصينا انتي ..قولي وبعدين بقرر اذا بشاره والا لا...
نورة: احم احم... قول منوو بييكم هالاربعااااء....؟؟؟
وظحكت...
سكت عبدالله وهو مب مصدق... وطبعا عرف هي شو تقصد....
سعيد: حــــــلــــفـــــــــــــــــــي ...!!!!!
نورة: ههههههههههه والله...
سعيد: ههههههه حيااكم الله والله...فرحتيييني ويا هالرااااااس.... بتون بالاربعاء وبتردون الجمعه؟
نورة: لالا..للاسف لين الخميس بس..
سعيد: لاااااااااااااه...يالله ماعليه نعمه... تستاهلين عيل هذي صدق بشاره...
نورة: شو بتعطيني يعني..؟؟
سعيد: ياللــه.. آمري بس ..
نورة: همممممممممممم بفكر لين مانيكم..ويوم بنوصل بخبرك شو ابا...
سعيد: ههههههههه ماعليه تستاهلين والله...
نورة: تسسسلم..خلاص عيل بخليك احينه وسلم عليهم كلهم ولاتنسى تخبرهم بييتنا...
سعيد: من عيوووووني والله ماطلبتي...
نورة: تسلم عيونك ..فمان الله
سعيد: الله يحفظج..مع السلامه..

سكر سعيد عن نورة وهي ميت من الوناسه.. واول ماطلع من البيت سمع الاذان ياذن... على طول راح صوب المسيد وصلى المغرب...وبعد ماخلص صلاته خطف صوب بيت خالته عشان ينتهي من هالمساله اللي تكدر الخاطر...
اول مادش بيت خالته شاف خوله يالسه في الحوش تتكلم في موبايلها مع وحده من ربيعاتها الظاهر... اول ماشافته نشت وتصرفاتها تبا توضح انها زعلانه.. ودخلت داخل المطبخ الخارجي.....طالعها سعيد بنظره مشمئزه ..هاللي قاصر بعد غلطانه وتقول راضوني... لبسها وصار صوب البيت ..
وماواحا يسلم الا ويته بنت خالته الصغيرة موزه...وسلمت عليه..
سعيد: شحالج مويز..؟.. سيري زقري امج..قوليلها اني اباها..
ركظت موزه عشان تزقر امها ويا سعيد ويسل في الصاله... بيت خالته فاظي ومحد فيه غير خوله وموزه واخر عيالها وعمره 11 سنه واسمه عمر...عشان جي كان سعيد ماخذ راحته في البيت... يت خالته بعد شوي ورحبت به...وسلمت عليه..
ام خوله: يامرحباا بمن يانا..هلا والله سعييد..
سعيد: شحالج خاالوووه؟ عساج مرتاحه..؟
ام خوله: بخير ياولدي مانشكي باس..شحالك انته وشحال امك وابوك وخوانك؟
سعيد: كلهم بخير وسهااله الحمد لله...
في هاللحظه دخلت خوله البيت بعد ماسكرت عن ربيعتها ولبستهم وكانت ناويه تروح غرفتها... بس امها زقرتها..
ام خوله: وابووي خوله..؟؟. تعالي سلمي على سعيد...
سعيد في خاطره يقول ..ليتج ماطلبتيها ياخالووه... يت خوله تمشي بدلع ووقفت جدام سعيد..
خوله: شحالك؟
طبعا قالتها من دون خاطر...
سعيد: يسرج حالي ...شحالج انتي..؟

خوله: مايهم...
وصدت وكانت ناويه تروح مره ثانيه..بس امها ماخلتها بعد..
ام خوله: وين سايره؟؟..يلسي يالله صبي لولد خالتج شاهي.. شو هالسنع اللي عليج..؟
سعيد في خاطره يقول.. من متى عندها سنع اصلا..؟؟
سعيد: مايحتاي خالوه خليها على راحتها..
خوله وكانها تغايظ وتبا تثبت انها فبيتها مش في بيتهم..يلست عدال امها وصبت شاي لسعيد وحطته جدامه..وردت تقعد وهي مجتفه يديها واطالعه بنظره تحدي... سعيد طنشها.. ولا صك الشاي.. صد صوب خالته...
سعيد: خالووه..انا ياي ارمسج فسالفه.. وادريبج انج حاطه فخاطرج عليه... وزعلااانه بسبب سالفة امس..
ام خوله: ياولدي والله مب عارفه شو اقولك.... خوله هذي جدامك.... ومافهمت منها شي غير انك نازعتها فبيتكم .. ونا ماحيدك عوف فيها... شو مستوي خبرني؟ غلطت عليك فشي؟
سعيد: ياخالوووه هي ماغلطت عليه انا كثر ماغلطت بحق نفسها.. وانا ادري ان بنتج ماخبرتج بالسالفه الاصليه... وانا قبل مارمس عتبان عليج لانج خليتيهن يظهرن رواحهن.... ولا تنسين انه نحن مطرشين فطوم وياج..على اساس تحت مسؤوليتج..وانتي خليتيهن يروحن رواحهن السوق وهالشي مايرضينا يا خالوه وانتي تدرين...
ام خوله: ياولدي والله تعبت... ورخصتهن يسيرن رواحهن وهن حريم وماعليهن شر..
سعيد: سمحيلي ياخالوه هالشي غلط... هذيلا بنات مايتخلن رواحهن في المراكز... وخوله بنت خالتي ..واغار عليها... ومايرضيني اني اشوفها تطلع بهالطريقه .... خصوصا انها ماكانت متحجبه...وسمحيلي خالوه علىهالرمسه لكن انتي ادرى ببنتج وكيف تطلع من البيت..وانا مستغرب لانج ماتقوليلها شي... ومخلتنها على راحتها... بس انا ماروم اسكت.. لانه اللي يمسها يمسني ...وتهمني مصلحتها وسمعتها... بس اذا انتي تشوفيني غلطت بتصرفاتي السموحه منكم ومابدخل فيها ثاني مره... ولا جني اعرفها...
ام خوله: بارك الله فيك ياولدي... محشوم عن الغلط ولد هلال.... وماصار الا كل خير ان شاء الله... ادريبك تبا مصلحة البنت..
سعيد: يعني مب حاطه فخاطرج؟؟
ام خوله: لا فديتك..الله يرضى عليك ياربي..
سعيد: تسلمين خالوه..بترخص منج عيل انا مواعد ربيعي بسيرله...
ام خوله: مرخووص ياسعيد... خوله قومي وصلي سعيد لين الباب..
نشت خوله ونش سعيد وياها وطلعوا من البيت..في الحوش وقبل مايوصل الباب صد خوله..
سعيد: سمعي ياخوله.. انا ماخبرت خالوه عن سالفه الشباب اللي لاحقينكن لانها ماتهون عليه... بس هذا مب معناته اني متهاون بهالموضوع...
خوله: سعيد...والله العزيز ماعرفت من وين طلعت هالسياره..ولا ادري عنهم شي.. الا يوم وصلت البيت بس..
سعيد: انتي يمكن ماانتبهتي...بس هم اكيد انتبهولج دامج تطلعين الاسواق بهالشكل...
خوله: انا ماشوف فيها شي..ولا حد رمس على شكلي من قبل...احين يايين تقولولي.؟
سعيد: مارمسووج لانهم مستحين منج خوله... والا فيها واايد اصلا...مب الا شي... انتي مب بنت شوارع حسب ماذكر..
خوله: الله يسامحك على هالتسمية...
سعيد: الله يسامحنا جميع ....بس والله ياخوله لا تعتبرين مغازل الشباب لج اعجاب..تراهم الا يعتبرونج من هالبنات الخايسات....والا هم من داخل محتقرينج... صدقيني جمال البنت فحشمتها وسترها... احتفظي بجمالج وفتنج لريلج وبسس...
تمت خوله ساكته تفكر بكلام سعيد...
سعيد:المهم لا اتمين مظايقه... انا مااعتذر..لكني ابرر الموقف... اناعصبت ومحد يلومني... وانتي تستاهلين اللي ياج... وبعدين شو هذا..؟؟ انا ماقايل لج تحجبي حتى جدامي..؟؟ يالله لمي قصتج..
خوله: انزييييييييييييين...
عدلت شيلتها وتحجبت...
سعيد: توج حرمه... يالله ردي البيت لا تظهرين لين خاري... فمان الله..
خوله: الله وياك..
ركب سعيد سيارته وهو يحس بحمل انزاح عنه...اخيرا افتك من هالسالفه... ان شاء الله يطلع بنتايج عدله من عقب هالشي كله عاد..وتصطلح خوله وتتستر... شغل سياره ورجع تفكيره باتصال نوره وكلامه وياها .. وعلى طول احتلت افكاره وطردت أي شخص ثاني برا....
-------------

الجزء الحادي عشر

الاربعاء الساعه 12 ونص الظهر.. دخلت نورة على عبدالله اللي كان بعده راقد...
نورة: عبدالله... قوووووووووووم بسك من الرقاااد..
عبدالله: ....................... (يناخر)....
نورة: يالله يالرقااااد ..عبوووود قوم بسك يالله...
ومسكت جتفه وقامت تهزه عشان ينش....عبدالله يالله يالله بطل عيونه وهو مظايق..
عبدالله: هااااااااا بلاج..؟!..
نورة: قوم صل الظهر... بعدين بنتغدا وبنسير الشارجه وانته بعدك مازهبت اغراضك..
عبدالله: اففف منج..لي يقول عاد بسافر انا..الا كندورتين ووزار وفانيله وفوطه مايبالها...
نورة: المهم قوم صل...
خلته وطلعت عن حجرته ..نورة من اصبحت متنرفزه... ومتوتره... طبعا بسبب سيرة الشارجه.. عبدالله نش وتسبح وصلى الظهر في غرفته..ورد قعد عالشبرية يشوف منو متصل فيه ..وحصل 3 مكالمات وارده كلها من عند خليفه..طنشه وراح للرسائل وكتب رساله للعنود... تردد وايد قبل مايسويها بس عنود في باله من امس...وكتبلها " مرحبا عنودي انا عبدالله ..سوري لاني طرشت لج بس متوله عليج..واحب اقولج اني ساير الشارجه..شي في خاطرج؟"
عنود في هاللحظه كانت توها طالعه من كلاسها ووياها حصه.. وحست بالتلفون يهز في شنطتها... فتحت الشنطه وشافت التيلفون وعرفت ان المسج من عبدالله وارتبكت.. وردت خشت التيلفون في شنطتها..وسكتت..
حصه: مابتشوفين المسج؟!..
عنود: آآآ.. لا الا مالت الاتصالات اعلانات يسوون..حشرونا..
حصه: آآهااا...
كانن سايرات صوب الكافتيريا عشان يشربن شي بارد ويروحن البيت... اول ماوصلن الكافتيريا لفت عنود صوب حصه..
عنود: حصوووه سيري طلبي وانا بدش الحمام شوي اوكيك...؟
حصه: اوكي لاتبطين....
دخلت عنود الحمام وحمدت ربها يوم حصلته فاظي... طلعت تيلفونها وفتحت المسج...قرتها واستانست انه عبادي متوله عليها...على طول ردت عليه بالمسج..
" اشتاقتلك العافيه يارب...ومابغي غير سلامتك عبدالله..دير بالك على نفسك بس."
وطرشت المسج واغلقت التيلفون وردت لحصه...
خلصن شرب العصير وركبن الباص وراحن الرسبشن.. حصه كان الدريول يترياها..اما عنود فكل اربعاء يمر عليها حمدان لانه يكون طالع من الكلية ويمر عليها يشلها...
في الطريج صوب الشارجه...
عبدالله: حصووه حاطه فبالج مكان معين بتسيرين له ؟!..والا بتحوطينا فدبي كلها؟..
حصه: مكان واحد..مركز المنال اكيد بحصل عندهم اشياء حلوه..
عيدالله: مركز بعد؟ الله يعينا...
نورة: برايها الواحد مايتخرج كل يوم...
عبدالله: بسم الله كيف نطت فحلوجنا..ماقلنا شي...لكن بسيرتكن فوتن عليه سيرة البدع ويا الشباب ولعب بالدراجات...
ام خالد: هيييييييي والا هاي خدمتك؟..احسن يوم ظيعنا عليك..ماباك تلعب بالدراجات انا وتتكسرلي.
عبدالله: يالله يامااايا شو اتكسر بعد ياهل انا...
ام خالد: صك الدعنه...لعب بالدراجات ماشي يالله...
حصه ظحكت ونورة اللي كانت قاعده ورا اخووها لصقت في اذنه من الصوب الثاني عشان ماتسمعها امها...
نورة: روح بدون ماتقولها ..والله وناسه اللعب بالدراجات ..
عبدالله: وحياتج الاسبوع الياي بسير العب...وبصورلج بعد..
نورة: توك تعجبني ...يالله سوقبنا عدل ماريد اوصل متكسره الشارجه..
وكملوا درب الشارجه كله سوالف ...نورة كانت كل ماتتقرب من الشارجه اكثر يعورها بطنها اكثر...كيف بتجابل سعيد عقب الرمسه اللي دارت بينهم امس؟..لين الحين قافطه والله...معقوله كان بيعترف لها بحبه وهي قالت له لا يقول؟!!!...لو قالها هالكلمه وهي هناك جدامه شو بتسوي؟؟... الله يستر..سعيد طول عمره متهور...
وصلوا بيت خالهم وكان ماباقي شي عن صلاة العصر.. نزلوا كلهم واول من دخل ام خالد..ووراها حصه ونوره واخر شي عبدالله عشان مايصادف حد من بنات خاله ويقفط منهن...اول حد تلقالهم ام فيصل مع عليا...
ام فيصل: مرحبا مرحباا الساع..ياحيالله ام خالد وعيالها...
ام خالد: السلااام عليج ام فيصل..الله يحييج ياربي..
ام فيصل: وعليج السلام الغاليه ..يامرحبا والله توه نور البيت...
ام خالد: منور بوجودكم يام فيصل ..شحالكم ربكم الا بخير؟
وتوايهن وسلمن على بعض.. وعقب يت عليا وسلمت على امها...
عليا: مرحبااا والله بالغااااليه..فديت امايه انا..شحالج فديتج..؟
ام خالد: هلا حبيبتي..بخير فديتج شحالج انتي امايه؟..وشحال عيالج والصغيروني؟
عليا: بخير وعافيه والله متولهين عليكم ..
ين البنات وسلمن على ام فيصل وعقب عليا...عبدالله كان واقف ورا وقافط...
ام فيصل: مرحبا ولدي اقرب ابوويه...شحالك عبدالله..؟
عبدالله: بخير خالوه شحالج انتي...؟
ام فيصل: بخير ولدي..ياحيالله عبدالله..اقرب في الميلس...
يت عليا ووايهن اخوها...
عليا: فديتك ياربي عبود بعدني ماشبعت منك...شحالك؟
عبدالله: بخير علياا شحالج انتي.؟؟ وتشتاقلج العافيه يارب...
دخل عبدالله الميلس ويلس ..حصل الشاي والقهوه والفواله موطايه..صب لعمره شاهي وقعد يشرب ويطالع التلفزيون...البنات وامهن دخلن الصالة..ويت سلامه بنت عليا الصغيره تربع صوب يدتها..
سلامه: امايه ..امايه ....
ام خالد: هلا والله ببنتي ..فديتج انا
شلتها ام خالد وحبتها ولوت عليها... ويلسوا كلهن في الصالة..
عليا: قومي عن امج سلامه خليها ترتاح شوي....
ام خالد: براايها فديتها انا...
بعد مايلسوا شوي يت شيخه مع منى ومنال وسلموا عليهم ويلسوا وياهم بعد..
ام خالد: عليا عيل وين فيصل؟
عليا: يتسبح امايه..بعد شوي بياذن ...
ام خالد: وهلال راقد اظني مثل ماتعود...!
ام فيصل: هي والله بس بسير اوعيه بعد شوي للصلاة...
صدت نورة صوب منال اللي لاصقه فيها من يت...
نورة: وين فطوم عيل؟
منال: راقده فطوم...كله ترقد هذي..
نورة: اختج هذي ماتستحي..قومي بنسير نوعيها..
ظحكت منال ونشت ويا نورة...
عليا: نورة وين تبين..؟
نورة: بسير اوعي فطيم..قاهرتني كل ماني نحصلها راقده..خاطري مره تستقبل..
ام فيصل: ههههههههه عندج اياها... خليها تنش..
نورة: بطفربها ...
مسكت نورة ايد منال وسارت وياها برا الصالة ..ركبن الدري ووصلن فوق وهن يسولفن.. مرت نورة عدال غرفه سعيد وقلبها يدق.. اكيد انه داخل.. وقفت جدام غرفه فطوم ويوم حاولت تفتح الباب حصلته مقفول..
نورة: اختج مسودة الويه قافله..جنها الا تدريبي اني بييها..
منال: دقي عليها....
تمت نورة ادق الباب... بشكل غلس...دق متواصل وماتوقف عشان صدق فطوم تعصب...بس بعد فتره عيزت ونست انها تتعامل ويا فطوم...مدمنه رقاد...يوم ترقد جنها ميته..
نورة: فطووووووووووووم...فطووووم مسودة الويه...
منال: هههههههه مابتنش ....
نورة: حشى شو حاطه فذنيها ...قطن؟!
سعيد كان في هاللحظه في غرفته... طالع متسبح وتلبس وقعد يتسفر جدام المنظرة اللي عدال باب غرفته من داخل... وسمع صوت نورة... بطل عيونه وهو مب مصدق.. عقب هز راسه وهو على باله انه يتراواله... وكمل تسفيرته...بس بعد شوي رد سمعها..
نورة: فطوووووووووم ان مانشيتي ترا احين برد العين...
هالمره سعيد صدق اذنيه واللي قاعد يسمعه... وفي خاطره يقول : لاااا...وصلوا بهالسرعه..!!!!...
على طول شل تيلفونه وبوكه وحطهن فمخباه وبطل الباب شوي شوي.....وشاف نورة تظحك ويا منال ويعلقن على فطوم اللي بطلت الباب وكشتها طايره وعيونها مغمضه وفوق هذا تبتسم بشكل يظحك.. تم سعيد يراقبها وهو بعده ماطلع من حجرته... وهن ماانتبهن له لانهن كانن مشغولات بفطوم
نورة: عنبو هالكشه لج يالرقاده..صدق شمس الشارقه...!
فطوم: اوووووووووه انتي المزعجه ليش ييتي الحين.؟؟ عنبوا مارمتوا تاخرون لين العصر؟
نورة: مسودة الويه مب يايه عشان سواد عيونج انا..
فطوم: عيل علشان سوا عيون منوو يوم مب عشاني؟
نورة: اولا عيونهم مب سودا... لو تموتين ماتحصلين عيونهم انتي..
فطوم: هي هي انزين درينا..
نورة: ههههههههههههاي خسج الله ..
..وقعد سعيد يتفداها ويبتسم على ظحكتها...نورة وهي تظحك ماانتبهت وطاحت شيلتها على جتفها.. انصدم سعيد وبطل عيونه... من كملت نورة 15 سنه ماشاف شعره من راسها.. استحى سعيد على ويهه ورد داخل غرفته وسكر الباب... أي واحد غيرة يحب وحده وصارت له فرصه انه يشوف شعرها مابيتردد انه يشوف... بس سعيد من زود الحب اللي فقلبه صوبها..كان يحشمها ويحترمها... تم واقف عند بابه لين ماسمع الاصوات اختفت..رد طلع وحصل الممر فاظي... اكيد دخلن حجرة فطوم.. كان سعيد مب في حاله..يتنفس بسرعه وقلبه مب طبيعي... كان يمشي صوب حجرة فطوم بدون مايحس... حد يدينه واسند راسه على الباب..وغمض عيونه... كان وده يدخل داخل ويشوفها ويرمسها... ليتج يانورة خليتيني اقولها امس...هالكلمه اللي خاطره يقولها من سنين ومب متجرأ .. ويوم يته الجرأة منعته...ليش؟؟؟.. ابتعد عن الباب شوي..ماعليه..بشوفها اكيد عقب...سمع الاذان ياذن ..ذكر ربه ونزل عشان يسير المسيد... يوم نزل تحت كانت شيخه طالعه من الصالة ...
شيخه: هاا نشيت؟.. قوم عمووه هني... وعبدالله ترا في الميلس ارووحه..
سعيد: ماعليه بسيرله احين...
راح صوب باب الصالة ودقه..
سعيد: هووووووود...
ام فيصل: هدااا..اقرب ابويه محد غريب..
تحجبت حصه عن سعيد وعدلت عباتها ..دخل سعيد وسلم عليهم وسلم على عمته...
سعيد: شحالج عمووه...حيالله هل العيين...
ام خالد: بخير ابويه شحالج انته...الله يحييك ياربي...
سعيد: بخير الله يعافيج عمووه... (صد صوب حصه) .. حصه شحالج؟
حصه: بخير الله يعافيك سعيد..شحالك انته؟
سعيد: بخير الله يسلمج.... اترخص منكم انا بمر على عبدالله.. وبسير المسيد ..
ام خالد: مسموح فديتك..
طلع سعيد من الصالة وحصل فيصل ويايه معاه عليا..
فيصل: ساير المسيد سعيد؟
سعيد: هي والله ..بمر على عبدالله في الميلس...وعقب بنسير..
فيصل: انا بدش بسلم على عموه وبلحقكم في الميلس...
سعيد: ماعليه...
طلع سعيد ودش فيصل الصالة....سار سعيد صوب الميلس ودخل حصل عبدالله طالع من حمام الميلس وهو متوضي..
سعيد: مرحباا الساع..هلا والله براعي امريكا..
عبدالله: هلا والله سعووود... خشششششمك....
توايهوا وهم يظاحكون...

سعيد: شحالك يارياال... علوووووووومك؟
عبدالله: ياخي جب... ماصدقت توصلنا العين وغبت مره وحده..واونك عاد بييكم بييكم..امحق ولا ييتنا ولا سمعنا عنك...
سعيد: ههههههههه السموحه منك... قسم بالله انشغلت..خلاص خلال الاسبوع الياي بييكم ان شاء الله.والا اخر الاسبوع..
دخل فيصل في هاللحظه وسلم على عبدالله..وطلعوا رباعه سايرين المسيد اللي عدال البيت...بعد ماصلوا ردوا الميلس وقعدوا يسولفون ويتفاولون...وسعيد قلبه داخل البيت... مب قادر يندمج بالسوالف..خاطره يدش ويسلم عليها بس وين..!!...طبعا مايقدر...
نورة ومنال وفطوم صلن العصر ونزلن عند باقي الحريم... وكان خال نورة هلال يالس ويا اخته ويسولف وياها... سلمت عليه نورة ويلست عداله..ومر اليوم بشكل طبيعي وعادي جدا...الشباب في الميلس..والحريم في الصالة يسولفن ويخربطن...يوم يت الساعه 11.. نشت ام خالد واستسمحت منهن وسارت ترقد في غرفة الضيوف... ولحقتها حصه لانها تعبانه بسبب انها كانت مداومه الصبح ولا رقدت.. ام فيصل وشيبتها وعليا بعد كلهم ساروا يرقدون..تموا سعيد وعبدالله في الميلس سهرانين... ونورة ويا شيخه وفطوم ومنال ومنى...في الصالة...
شيخه: انا بسير عنكن..سوالفكن ماتخلص..نورة مابتقومين ترقدين؟
نورة: جانكم بترقدون عني بقوم برقد..مابتم اروحي سويحره في الصالة...!!
فطوم: انا مابرقد احينه..شاريه فلم هندي جان تبين اطالعينه يالله.. بنسير الصالة الفوقانية احسن..
نورة: غايته...يالله..
نشن كلهن وسارن فوق...شيخه دخلت حجرتهاعنهن عشان ترقد..اما الباقي تسدحن في الصالة اللي في الطابق الثاني ويلسن يطالعن الفلم ويشربن بيبسي وياكلن مكسرات...
على الساعه 1 في الليل خلص الفلم ..منى ومنال دخلن حجرتهن على طول رقدن... تمت فطوم ونورة..
نورة: فطوم كم باقي عن اجازتكم قبل الامتحانات؟
فطوم: ياختي ماشي الا اسبوعين وبناجز عقب عشان الامتحانات..
نورة: الله يوفقج ان شاء الله...احين انتي امره قررتي على الجامعه؟
فطوم: ان شاء الله..ياختي ابا ادش الكلية اليديده هذي مالت المعلومات...
نورة: هييي..تمام والله.... رمستي خالي هلال عشان سالفة السكن؟
فطوم: لااااااااااا تو الناااس عن هالرمسه..عقب يوم بتظهر نتيجتي للثانوية برمسه...
نورة: احس انه مابيطيع...
فطوم: ماعليج بقردنه... بقوله يجربني سنه على الاقل اذا شاف مني شي غلط والا انا مارتحت يعني بحول للسكن..مب مشكله...
نورة: ان شاء الله يوافق... قومي يابوج بنرقد..
فطوم: ويا ويهج تعالي رقدي وياي...
نورة: شنطتي تحت..
فطوم: مب مشكله بنيبها لج..
نورة: لالا..انتي سيري طلعيلي فراش وانا بنزل بييب شنطتي وبقول لامايه اني برقد عندج وبييج...
فطوم: تمام عيل..
راحت فطوم حجرتها ونزلت نورة تحت...اول ماوصلت تحت حصلت عبدالله داش البيت بروحه وشال شنطته
عبدالله: بعدج واعيه؟؟..شو تسوين؟
نورة: كنا نطالع فلم انا والبنات..احين بسير اييب شنطتي وبسير ارقد عندها... وانته وين بترقد..
عبدالله: سعيد يقول في حجرته فارشيلي.. بنات خالج واعيات؟ سيري سويلي درب..
نورة: لا محد واعي بس فطوم سارت حجرتها اطلعلي فراش.. سير برايك...
عبدالله: اووكي..
ركب عبدالله الدري وسار فوق ونورة راحت لغرفة الضيوف وين راقدات امها واختها... دخلت الحجرة وحصلتهن راقدات وماحبت تزعجهن... شلت شنطتها الصغيرة وشنطة ثيابها وطلعت .. يوم وصلت عند دري البيت دش سعيد وكان بعده ماشافها..لف صوب باب الصالة وقفله ويوم صد يبا يبند الليت شاف نورة اللي كانت واقفه جدام الدري وهي متيبسه وويهها محمر ومب رايمه تتنفس...كانت عيونها معلقه بعيونه ..وعلى ويوههم نفس التعبير...نورة ماكانت تعرف شو تقول او شو تسوي وكيف تتصرف....بس سعيد كان اقوى منها وسيطر على الموقف..
سعيد: هلا والله نورة... شحالج؟
وكانت على ويهه ابتسامه حلوه خفيفه...لكن تعبير عيونه غطى على كل شي...
نورة: احم..هلا سعييـــد... انا بخير انته شحالك؟
سعيد: الحمد لله... نورة ليش مارقدتي لين احين..؟
قال هالكلام وهويمشي صوبها لين ماوقف جدامها وهو يلعب بالسويج في يديه..
نورة: آآآ,,, احين بسير ارقد...عند فطوم ...امبونا سهرانين نطالع فلم... هممم عبدالله فوق فحجرتك..
سعيد: هيي.. انا قايله يروح فوق لين ماقفل البيبان ...
نزل عيونه وشاف الشنطه في يديها. ابتسم وهو يمد ايده..
سعيد: هاتيها عنج ...
نورة: لالا برااايها والله خفيفه..
سعيد: نوروووه....هاتيها...
تمت نورة قافطه وعطته الشنطه ..
سعيد: توج... صبري ببند الليت ..
بند سعيد الليتات ورد لنورة واشر لها عشان تركب قبله... ركبت نورة وهي قافطه..والله شكلهم شبهه..بس ماتروم تقول لسعيد لا... حتى سعيد حس بنفس الشعور..لو طلع عبدالله من حجرته احين وشاف اخته وياه.؟..شو بيفكر وشو بيسوي..؟ بس بما انه ويا نورة احين ومحد وياهم..ماهتم لشي ....
سعيد: فكرتي بهدية لبشارتج الحلوه.؟؟
نورة: هههههه صدقت انته.. لا مشكوور مابغي شي..
سعيد: خلاص عيل بييبلج على ذوقي..
نورة: سعيد... صدق لا تيب شي..
سعيد: نورة.... جــــــــــــب
نورة: هههههههههه ماعليه انزين
وصلوا الصالة الفوقانية ووقف سعيد يطالع غراش البيبسي والمكسرات والخياس في الصالة... وصد صوب نورة...
سعيد: منو شارب هالبيبسي كله؟
نورة: نحن..البنات..
سعيد: خواتي خبايل...بس نوروه اظن قايلج قبل سنتين لا تشربين بيبسي...
نورة: ماشاء الله حسبتهن بعد قبل سنتين..؟؟!. هههههههه.. والله فطوم تيب واستحي اقولها مابا.. والا انا هناك في البيت ماشرب..
سعيد: بنازعها بعدني فطوم...
نورة: ههههههه لا حليلها..
وقاطعها سعيد وهو يحط صبعه السبابه جدام شفايفه بما معناه " اسكتي"... ويوم سكتت..قال سعيد..
سعيد: اخاف عبدالله يسمعنا..
سكتت نوره وهي اطالعه.. وهو يطالعها...
تم يرمس بصوت واطي...
سعيد: نورة... اخاف باجر ماتصير لي فرصه اشوفج...
سكتت نورة وماقالت شي.. كانت تحس ان سعيد شي في خاطره..والصراحه سعيد في هاللحظه حس بظيج.. لين متى يعني بيتم يشوفها بالسر بهالطريقه وفي السنه حسنه بس...وشعور ثاني مايدري شو هو بالضبط..
سعيد: ساكته...!!.. بس مع ذلك احس انج مابتخليني اقول شي اليوم بعد..
ابتسمت نورة وحست باحراج.. وهزت راسها كانها تقول "لا" ...ويوم تم ساكت حست انه حط بخاطره..
نورة: سعيــــــد.... مافي داعي تقول شي انا اعرفه...
استانس سعيد...
سعيد: شووو عليج.... انتي تعرفين... انا اللي مسكين ماعرف...
ظحكت نورة شوي شوي.. ومدت ايدها تاخذ شنطتها من عنده..
نورة: لو فكرت شوي...بتعرف...تصبح على خير سعيد..
مات سعيد من الفرحه...شو تقصد.؟؟؟... تحبني؟؟... والا شوو بالضبط...!!.. ياربي ماصدق..
سعيد: وانتي من اهل الخير نورة...
دخلت نورة غرفة فطوم وسار سعيد صوب غرفته عند عبدالله...
-----------------

؟؟؟؟ ليش؟؟ شو تعنيله هي عشان يغار عليها ؟ تمالكت نورة اعصابها وحاولت تخلي ملامح ويهها طبيعية... نورة صحيح انها حساسه..بس قوية في مواجهة المواقف الصعبه عليها...
نورة: خوله خبريني السالفه من اول...
خوله: الله يسلمج تواعدنا انا ونورة نسير السوق ويا امايه..ويوم اتجهزنا حصلنا امايه تعبانه وقالت مافييني اسير وسيرن انتن رواحكن...شلينا نحن البشكاره والدريول ورحنا السوق...وانا اصلا ماتعودت اني اتغشى ..فطوم تنقبت بس انا كان ويهي مكشوف...المهم يوم ردينا شافني سعيد اني بلا غشوه..اول شي نازع فطوم..بس النزاع اللي ياها مايسوى شي عند النزاع اللي ياني انا...والله زعلت وسرت بيتنا اصيح...وامبوني حالفه ماطب هالبيت..لكن اول امس يا واستسمح مني وراضاني وقالي انا اغار عليج ووانا وانا ومادري اشوو ومن هالكلام... المهم ردولي اعتباري..وعقب عاده خذ مني وعد اني ماكشف ويهي جدام غريب.. وانا طاوعته ماروم اتم زعلانه عليه وارفض له طلب.... هذا سعييد...غيير...
نورة كان يبل طاح على راسها... حست بالقهر...بالغضب... وبالغيره... كانت تقدر تذبح خوله في هاللحظه...بس خوله ماتهمها هي...اللي يهمها سعيد....كيف سعيد يسوي فيها جي كييف؟؟؟ امس بس واللي قبله كان بيقولها انه يحبها وهي اللي منعته...شو يعني هالكلام؟؟ يلعب عليها؟؟؟... يوم يشوفها يسوي نفسه يحبها ومن تروح يلعب بذييله مع بنت خالته؟؟.... لا ياربي لاااا... شو سويت انا عشان انصدم فاغلى انسان عندي....يارب ارحمني وبين لي ان كل هالخبر جذب ...سعيد مايسويها ..مستحيل يقص عليه انا...
انتبهت خوله ان ملامح نورة تغيرت...
خوله: نوره بلاج؟
تمالكت نورة نفسها...مهما كان اللي صار...مابتخلي نفسها ظعيفه جدام أي شخص...
نورة: هااا.؟؟ لا ماشي بس كنت افكر....يعني سعيد هو اللي كنتي تقصدينه بانه بيي يخطبج قريب؟
خوله: طبعــــــا... منو يعني غير سعيد؟
نورة حست بالموووووت...وفعلا شي في قلبها مات... الامل بان سعيد بيكون لها تبخر... كيف خوله تتكلم بكل هالثقه؟؟..اكيد في شي معطنها كل هالثقه بان سعيد بيخطبها...هو مخبرنها؟ والا كلم حد من اهله بخصوصها؟؟؟ ووصلها الخبر؟؟...
ابتسمت نوره بسخرية على نفسها... صدق اني كنت عايشه فحلم حلوو...بس كل حلم يخلص.. وانا احين اواجه نتيجه اغفالي عن الواقع.... طبعا سعيد يبا بنت خالته... يوميا مطيحه فبيتهم..واقرب له منها هي.. خوله موجوده عدالهم وفي الشارجه نفسها ودايما عندهم بالبيت...اكيد انه تعلق فيها ..اما نوره... تسلية بين فتره وفتره...وانا استاهل اللي ياني لاني صدقت عيونه واللي تقوله لي... حلال عليج ياخوله ان كان سعيد من هالنوع... خذيه ومابااه...نفسي عافته...
نورة: اهااا...بالبركه ان شاء الله... خلينا نسير تحت عندهم..
خوله: اوكي..
لبست خوله شيلة بيظا من شيل فطوم ونزلت مع نورة تحت... نورة كانت ماسكه نفسها طول الوقت.. كانت معصبه لدرجه انها ماقدرت تصيح...ومر عليها الوقت وهي الافكار تدور بها..لين مارجعوا حصه وعبدالله وفطوم وسعيد من السوق...وكان الوقت موعد غدا..حصه وفطوم كانن يالسات في الصالة مع الحريم يراونهن شو تشرن من القطع.. نورة ماقدرت تتحمل الازعاج..شلت عمرها وركبت فوق في غرفه فطوم عشان تريح اعصابها شوي وتفكر بمصابها...مرت ربع ساعه وهي يالسه في غرفه فاطمه ومحد درى عنها..بس بعدين استحت على ويهها وقررت انها تنزل..اكيد بيسالون عنها وبيستغربون الحركه.. يوم طلعت من غرفه فطوم شافت سعيد طالع من غرفته هو بعد.. التفت صوبها ويوم شافها ابتسم كالعاده وظحك... زاد قهر نورة من سعيد...كيف تسوي فيني جي...؟؟ وتطلع بهالبراءة؟؟ .. ماا انلام يوم صدقتك يا سعيد دامك تعرف تمثل ...تمت نورة اطالعه بنظرة قهر وغيظ وماردت له ابتسامته..استغرب سعيد... اول مره نورة اطالعه بهالطريقه ..وعلى طول اختفت ابتسامته...
سعيد: نورة بلاج؟
نزلت نورة عيونها ومشت ناوية تتخطاه وتنزل بدون ماترد... بس يوم قربت منه مسكها سعيد من ايدها وسحبها على ورا... استغربت نورة من هالجرأه... غمضت نورة عيونها وهي ميته من القهر...
نورة: فجني...
سعيد: مابفجج...رمسيني...بلاج؟
نورة: ماشي...فجني...
سعيد: نوووره.... شوفيج؟؟ شو مضايقنج؟
التفتت نورة صوبه وهي اطالع في عيونه بطريقه عتاب...
نورة: اللي مضايقني اني ماكنت اتوقع انك من هالنوع...لكن دام هذي تصرفاتك..مابيني وبينك كلام... مب بس الكلام....مابيني وبينك أي شي....
وسحبت ايدها من ايده بقو ونزلت بسرعه للطابق الارضي ودخلت الصالة قبل مايلحقها...
سعيد انصدم من كلام نورة وتصرفاتها... شو هالنغمة اليديده بالكلام؟؟..شو صار بين امس واليوم؟؟ امس كانت تلمح له انها هي بعد تحبه...واليوم تقطع أي صلة بينها وبينه؟؟..لييييش ..شو صار؟؟ وعلى طول حس بالمرض والتعب...كله ولا نوره مايتحمل منها هالتصرف.. شو سويت انا؟؟... والله اني ماسويت لها شي ولا بسويلها شي بعد... يقدر يجرح كل الناس ماعدا هي...
تعب من تساؤلاته وكان خاطره يرجع يدخل غرفته ومايشوف حد...لكن الواجب اجبره انه ينزل ويتغدى مع ابوه واخوه وولد عمته ويقعد معاهم...
بعد الغدى بساعه كانوا اهل العين واقفين في الحوش مع اهل البيت ..يسلمون عليهم لانهم رادين العين.. الكل يظحك ويسولف ماعدا سعيد ونوره.. كل مارفع عينه عشان يشوفها يمكن يفهم شي من ويهها وعيوونها..كانت تصد وتنزل عيونها..ومات من القهر يوم شافها تطلع اول وحده من بيتهم وهي تتغشى... معقووله يانورة؟؟.. لهالدرجه طفرانه من بيتنا وتبين تردين؟؟... آآخ يالقهر لو ادري بس شو صار فيج وخلاج تتغيرين عليه...
ردوا اهل العين لبيتهم ووصلوا المغرب...واول ماوصلوا البيت ركضت نورة صوب حجرتها وصكت الباب على نفسها... وفتحت لمشاعرها المكبوته حريتها وقعدت تصيح على حب حياتها اللي مات...
-------------------

انشالله اكمل فيوم ثاني

هلا اخوي مهرشاد وتسلم على الجهود المبذوله :bigsmile:
خلاص اني بتكفل لتعديل عنوانها ووضع كلمة منقوله في البدايه
تسلم اخوي
دمت بحفظ الرحمن

مشكوره اختي ....ولحين بكمل
.
.
.
الجزء الثالث عشر

كان الوقت بعد صلاة المغرب يوم نزلت حصه من فوق نازله الصالة حصلت امها يالسه ميرة وحمده.. والعيال.. سلمت عليهم وسارت على طول عند التيلفون..واتصلت بعنود على موبايلها...
عنود: آآلوو,,,
حصه: مرحبااا عنووده..السلام عليج..
عنود: هلااااا والله وغلاا بريحة الحبايب...
حصه:هههههههههه ياويلي عليج انتي يالرايقه..شخبارج؟
عنود: بخير فديتج شحالج انتي؟ وعلومكم؟
حصه: بخير وسهاااله ...
عنود: متى رديتوا من الشارجه؟
حصه: العصر والله... سكتي يا عنوووووده شريت لج ذيج القطعه اللي تسكت..
عنوود: واللــــــــــــــه؟!!.. حصلتي شي مناسب للموديل..
حصه: هي حصلت وايد حلوات لكن هذي دشت مزاجي على طول..
عنود: تمااااااااام عيل..شو لونها؟
حصه: لونها غريب..اخضر على ذهبي..اخضر محرووق..ماتعرفيله..
عنود: اوووش والله كشخه...بكم خذتيها؟
حصه: وانتي شووو لج تسالين عن السعر؟؟..
عنود: لا اتحسبين اني مابدفع عنها...
حصه: جب جب... اعتبريها هدية التخرج...
عنود: ياسلاااااااااام..وانا شو اييبلج هدية تخرج؟
حصه: كيفج بس انا ماارضى باي شي.. ابالي شي عليه القيمه..
عنود: همممممممممممممم....بيوزج اخووويه...
انصدمت حصه وتمت ساكته.... وماتعرف ليش خذت الموضوع بجدية مع انها تعرف ان عنود تمزح...
عنود: هههههههههه سكتت...آآلوووو...
حصه: وياج.وابوي عليج شو هالرمسات بعد..!!
عنود: اسوولف وياج ويا هالويه... ولو عزم اخوويه مابخبرج اصلا...
حصه: ويا ويهج انتي واخوج..المهم متى بتين تشوفين القطعه؟
عنود: ويييييييييين اييي؟؟؟ حليلي والله... خليفه وحمدان محد سايرين البدع يلعبون بالدراجات...
حصه: اسمعه عبدالله يتحظى في الدرب يقول فوتوا عليه سيرة البدع....
عنود: احسن يوم فوتوا عليه..اخافه يتكسر...
حصه: ياويييييلي انا عالحب..
عنود: هي عيل شو على بالج...
حصه: هههههههه الله يكمل عليج ان شاء الله..المهم بخليج بسير ايلس عندهم ..
عنود: برايج الغاليه..ومشكوووره وايد عالقطعه... مردووده هالهدية ان شاء الله..
حصه: لا اتعبلين ولا شي مابينا نحن هالرسميات.. المهم سلمي على اهلج وعمي..
عنود: يبلغ ان شاء الله وانتي ردي السلام عليهم كلهم...
حصه: ان شاء الله..فمان الله..
عنود: مع السلامه..
سكرت حصه التيلفون ويت ويلست عدال حمده.. وميرة وامها..
حمده: وينهانورة ماشفناها من يت؟
حصه: ظني الا رقدت.. اول مايينا من الشارجه على طول سارت حجرتها وصكت على عمرها الباب.. حتى شنطتها لين احين برااا في الممر.. مادخلتها..
ام خالد: حشى شو هالرقاد اللي ياها مره وحده؟..لايكون شي يعورها؟
حصه: والله ماحيدها مريضه امايه...
ام خالد: تيمّـلي بنتي قومي شوفي اختج..اخافها مريضه..
حصه: ان شاء الله..
قامت حصه وسارت فوق ادق على نورة... وبعد فتره فتحت نورة الباب وويهها متنفخ ...
حصه: بسم الله الرحمن الرحيم.. اللهم سكنهم في مساكنهم.... شو بلاج جي غاديه؟؟ّ!!!!!
نورة: شو تبين؟
حصه: يتخبرون عنج تحت...بلاج نورووه؟؟؟
نورة: شو بلاني بعد .. كنت راقده...
حصه: ماحيد ويهج جي يتنفخ يوم ترقدين...
دخلت حصه حجرة نوره وفتحت الليت عشان تشوفها عدل...وهي كانت خايفه على اختها ..اول مره تشوفها بهالحاله...
نورة: يمكن كنت راقده على ويهي...
حطت حصه ايدها على خصرها..وهي متشككه...
حصه: والله انج تجذبين..
نورة: مشكوره اختي..
حصه: نوروووه.... انتي راقده وانتي تصيحين..اعرفج...
نورة: اوووففف..شو بيصيحني يعني حصيص...!!!
حصه: هذا اللي ابا اعرفه.. انتي من كنا في الدرب صوب العين وانتي مويمه.. شو مستوي..
نورة: مب مستوي شي..ولا شي يستاهل اصلا اني اصيح عشانه..احين ممكن ماتفتحيلي تحقيق..وتروحين وتقوليلهم اني برقد لين باجر..؟؟
نورة من النوع اللي يوم يظايق يحب يرقد بشكل غير طبيعي..هي تفكيرها انها تشرد من الهم والتفكير لفتره وترتاح بالرقاد...بطلت حصه عيونها مستغربه من اختها...وهي في خاطرها تقول ابد..هالبنت مب طبيعية اليوم..
حصه: ماتبين عشا؟؟
نورة: لا..
حصه: هممممممممم صليتي العصر؟؟
نورة: استغفر الله.. لا ماصليت...
حصه: والمغرب؟
نورة: بعد...
حصه: همممم...يوم اقولج فيج شي والا ماحيدج تفوتين صلاتج..
نورة: حصوووه... كنت ...راقـ.... ــدة... فهمي..
حصه: خلاص لاترقدين احين تريي لين صلاة العشا صليهن كلهن وتعشي وعقب رقدي اذا تبين..
نورة: ان شاء الله...
خلتها حصه ونزلت وهي قلبه مقبوض..نورة مب طبيعية فيها شي...وشي جايد... يوم وصلت عندهن تحت حصلت ان حمده ردت بيتها عشان تعشي العيال وترقدهم..وان خالد وصل البيت ويالس عدال امه وحرمته ويرمس عياله حمد ومحمد ويالسه في ثبانه شما بنته الصغيره..
يت حصه وسلمت عليه...
حصه: هلاااااااااااا اخويه شحالك؟
خالد: بخيير حصيص الله يسلمج...شحالج انتي..؟
حصه: بخيير والله...وييييييييين من زمان ماشفتك ماتقولون ساكنين فبيت واحد...وتراك من زمان ماوديتنا البرر...
خالد: عزموا انتوا وانا مابقول لا...
حصه: بعد امتحاناتي ان شاء الله...
ام خالد: شفتي اختج؟
حصه: هي امايه..الا راقده ..مافيها شي..
ام خالد: وعيتيها؟
حصه: هي وعيتها..
ميرة: يالله شباب قوموا بتتعشون وبعدها رقااد... وراكم مدارس..يالله شماني..
مدت ايدها وشلت شما ..ووقفت..
حمد: ماماااه مب الحييين بعديين...
خالد: حمد قووم يالله تعشى وارقد..ماشي سهر...
نش حمد وهو متظايق... وتبعوا امهم اللي سارت صوب بيتها تعشي عيالها وترقدهم..واول ماطلعت دش عبدالله ووياه ابووه...
بو خالد + عبدالله: السسلام عليكم..
الكل: وعليكم السلام والرحمه...
نشوا كلهم يسلمون عالشايب... وبعد مايلسوا..
حصه: ابويه اقولهم اييبون عشاك؟
بو خالد: لا صبري بصلي العشا اول بعدين بتعشى..
خالد: هاا ابوويه شو العزبه اليوم..؟
بو خالد: والله مثل كل يوم.. وباجر عندي تفحيم بنشر من الفجر..
خالد: ان شاء الله يسبقن عاد هالمره..
بو خالد : على الله... ( والتفت صوب عبدالله الي كان يشرب شاهي).. ابويه عبدالله تراني شفت عمك اليوم ورمسته عسب سالفة الملجه..
ارتبك عبدالله وحط كوبه في الصينية....
عبدالله: وشو رد عليك؟
بو خالد: يقول هو ماعنده مانع...لكن بيرمس البنت وخوانها الليله وبيردون علينا خبر...
خالد: ليش تبا تملج بو الشباب.؟؟
عبدالله: هي والله خالد...بملج ان شاء الله..
خالد: حق شو الحين تملج؟ باقلك سنه عن التخرج ..يوم بترد املج...
عبدالله: لا ياريال..اول مارد من امريكا بعرس..متى بملج؟؟؟
خالد: كيفك...
عبدالله: ابويه انا ماريد الملجه احين... البنت بتتخرج ويا حصه واحين مشغوله بدراستها ..بعد ماتخلص بنملج ان شاء الله...
بو خالد: على خير ان شاء الله..

في الطريج من البدع للعين.. خليفه كان يالس في الكرسي اللي عدال السايق... وماسك ايده وهو متعور.. وكان يسوقبه ربيعه سيف الشامسي (هو نفسه اللي شاف حصه في بيت قوم خليفه).. سيف ريال طيب وحبوب ربيع خليفه من ايام الثانوي... وهو اكبر منه بسنه.. بعد ماتخرج من جامعة الامارات بتخصص المحاسبة..اشتغل محاسب في وحده من الدوائر الحكومية... سيف كل شوي يطالع خليفه بنظرة قلق...
سيف: هااا بعدها تعورك..؟؟
خليفه: هي والله .. الله يخس محمد اللي خلاني انجلب...
سيف: بسيطه ان شاء الله... هزرك مكسوره؟
خليفه: والله مادريبها بس تعورني.. كم باقلنا عن نوصل العين؟؟
سيف: نص ساعه بالكثير وبنكون هناك...وتراني بوديك المستشفى سيده...
خليفه: لااااااااااااا ...لا توديني ولا عندك خبر...بسير البيت والعيوز بتحط عليها كركم وملح وبتخف..
سيف: جب جب ... كركم وملح اون....يمكن مكسوووره...
خليفه: سواف قسم بالله مافينا نتمرر بعدنا المستشفيات...
سيف: اظن انا اللي اسوق مب انته...
خليفه: الله يهديك...
سيف: يهدي الجميع...اقول خلوف..تذكر ذاك اليوم يوم كنت فبيتكم.. ودخل علينا عبدالله العصر ؟؟ قبل كم يوم بس...
خليفه: همممممممممم ..هي...
سيف: يوم ظهرت شفت عرب فبيتكم...
خليفه عقد حياته...
خليفه: قوم عمي... اهل عبدالله..
سيف: اهااااااااااا...
سكت سيف وبلع لسانه..مايروم يرمس ويقوله والله انا شفت بنت عمك في حوشكم وعيبتني... اقل شي بيسويه بيلمّه ببكس على ويهه...
خليفه: ليش تسال؟؟

سيف: هممممممم ماشي بس فضول...عيبتني السياره اللي واقفه...ثرها سيارة عبدالله؟؟
خليفه: السودااا؟؟.. هي سيارة عبود..
ومرت هالسالفه على خير بدون مايشك خليفه باي شي.. وصلوا العين بعد نص ساعه وعلى طول سيف راح صوب المستشفى... حمدان كان هو اللي بيوصل خليفه العين بس سيف قاله انه هو راد اصلا العين وهو بيودي خليفه وبرايه حمدان يكمل لعبه لين الجمعه...فوافق حمدان ورد عند ربعه...
في المستشفى قالوا لخليفه ان ايده مكسورة من المرفق كسر خفيف..وبيصح خلال اسابيع ...ربطوها له وجبسوها .. وعقب وصله سيف البيت وتعشى عندهم وروح صوب بيتهم..
دخل خليفه الصالة وكانت هناك عنود وامه وابوه .. اما سلطان وحميد تعشوا ويا خليفه وسيف وريال ثاني في الميلس..وبعد ماطلع سيف من عندهم طلع خليفه بعد ساير صوب بيتهم..وتم سلطان وحميد هناك ويا الريال...
عنود اول ماشافت خليفه شهقت...
عنود: خلووووووووووووف شوفيها يديييييييييك؟؟؟
خليفه: دخيلج لا تسوينها مناحه.... ترا العيوز يبالها سبب...
وايهت اخوها وسار عقب وسلم على امه وابوه.... العيوز اول ماشافته حطت ايدها على صدرها...
ام سلطان: وابووويه فديتك ياولدي بلاها يديييك..؟؟
خليفه: ماشي امايه بس طحت من الدراجه وانفجت..
بو سلطان: منفجه ويجبسونها لك..؟؟ والله انهامكسوووره...
خليفه: ابويه كسر بسيط وقالولي بتصح بسرعه..
ام سلطان: وااااعليي عنك فديتك انا..انا قايلتلك لاتلعبون.. لكن هذا حمدان ساس البلا..هو اللي وزك على هاللعبه..
خليفه: لا تردين عليه امايه كلنا بغينا نروح.. واحد من الشباب هذا لف عليه وانجلبت والا انا مابنجلب..
بو سلطان: ومنو يابك انته من هناك؟
خليفه: يايبني سيف ربيعي.. امبونه راد العين ويييت وياه..حمدان بيرد باجر...
ام سلطان: ماشبع من اللعب مسود الويه....
عنود: ههههههههه حليله حمدان اذنيه تعوره احين... المهم سلامااات اخووويه ماتشوف شر..
خليفه: الله يسلمج من كل شر..
صد بو سلطان صوب حرمته...
بو سلطان: ياعزه.... مريت على بو خالد اليوم في العزبه...
ام سلطان: انزيييين..وشو علوووومه ؟؟
بو سلطان: يسرج حااااله.. يقول عبدالله يبا يملج على بنتج وياي يشاورني في السالفه...
صد خليفه صوب عنود وهو يطالعها بنظره مكاره..وعنود على طول قفط ويهها ويايه بتنش وبتسير عنهم...
خليفه: وين سايره..؟؟!!.. يلسي يلسي... السالفه تخصج ونحن مابنرمس من وراج..
ردت عنود ويلست وهي ويهها مثل الطماطه...
ام سلطان: والله يا بو سلطان الشور شورك انته وعيالك وشور عنود...ولو تبا رايي انا ماشوف فيها شي..
بو سلطان: وانا بعد ماعندي مانع .. بس يوم فكرت فيها..شفت انه سنه كامله وايد على ملجه...
خليفه: ابووويه لا تنسى ان عبدالله بييسافر ويايه بعد شهر ونص..يعني في هالسنه اللي تطريها عبدالله مابيكون موجود في البلاد...
بو سلطان: هي صدق.... وانته شو رايك؟
خليفه: تشاورني؟؟؟ والله انا اشوف انكم بتسوون فيهم خير وفيني انا بعد...تراه مأذني عليها في امريكا..
وظحكوا كلهم حتى عنود بس مستحاها زاد... وكانت مب رايمه ترفع راسها..
بو سلطان: هااا بنتي...وانتي شو رايج؟؟
عنود: احمم...والله يابويه الشور شورك وشور خواني... بس من احين اقولكم ملجه قبل امتحاناتي ماشي...لازم اتخرج اول وعقب جان تبون تسوون ملجه..
بو سلطان: وهذا هو شرط عبدالله بعد..بو خالد قالي اليوم اذا وافقنا الملجه بتكون بعد التخرج..
عنود: خلاص اللي تشوفونه..
بو سلطان: على بركة الله..انابعدني بشاور اخوانج الكبار... ولو انه السالفه مايبالها يعني...عبدالله ولدنا ومنّا وفينا.. .. وماظني حد يستاهل عنود شراته هو...ريال ماعليه قصوور...ماشاء الله عليه..
ام سلطان: والله انك صادق يا محمد... لو واحد ثاني غير عبدالله مابوافق على ملجه اتم سنه كامله... بس عبدالله ولدنا وواثقين فيه...

يوم السبت بعد المغرب..نورة الكئيبة كانت قاعده مع حصه في الصالة يسولفن...دخل عليهن عبدالله وسلم..
عبدالله: السلام عليكم..
نورة وحصه: وعليكم السلام...
عبدالله: تحجبن حمدان ويايه...
قال هالكلام ورد طلع.. ونورة وحصه تحجبن .. وسارت نورة تغسل الاكواب .. ويوم يت حصلت حمدان واقف يسلم على حصه ..و عبدالله كان يعابل في الفيديو والتلفزيون ...
حمدان: وشحاااااااااالج ياحصييييييص...وشخباااااااارج؟
حصه: بخير وعافيه ولد عمي..علومك انته..؟ من زمان عنك..!
حمدان: والله هيااااته شو تبينا نقول...
يت نورة وحطت الاكواب في صينية الشاي....
نورة: السلااام عليك حمدان...
حمدان: اهلا اهلا...وعليج السلام يالعووووفه...
نورة: مالت عليك وهذا انا اللي سايره اغسل لك الاكواب عشان تشرب شاي...
حمدان: افا عليج بنت عمي..استريحي بس يايبلج فلم ولا تشوفينه في الاحلام...
نورة: مالي بارض عالافلاام مشكووور...
حمدان: مالت عليج هذا مب اي فلم... هذاتصوير سيرتنا البدع يوم نلعب بالدراجات...يلسي والله بتموتين من الظحك...
نورة: اللـــه كشخه..دام فلم السيره بيلس اشوووف...
عبدالله نش وهو متظايق...
عبدالله: نورووه ماعرفت له هالفيديو... تعالي ركبي الكيمره عليه..
سارت نورة وظبطت الوايرات وشغلت الكاميرا على التلفزيوون...
عبدالله كان متسامح مع يلستهن مع حمدان لانه حمدان اصغر عنهن...فكان يشوف الوضع عادي كانه حمدان واحد من اخوانهن... بس مع خليفه الوضع مختلف...
حصه: اقول حمدان بتتعشى عندنا؟؟
حمدان: هي بنت عمي...
حصه: بسير اقولهم عيل يسوولك اللي تباه...
حمدان: والله انج فنانه انتي...دومج تحسين فيني..
حصه: هههههههههه ويا هالويه...لا تشغلون الفلم الايوم ايي..
سارت حصه وخبرت البشكاره تسويلهم ماكرونه بالباشاميل بعد...ويوم ردت شغلوا الفلم ويلسوا يطالعون الشباب وهم يتسابقون ويقفزون بالدراجات..كلهم كانوا متحمسين عالفلم..لانه صدق كان كشخه... حمدان كل شوي يوقف على لقطه ويراويهم شي ويعلق... في اللقطات اللي يت عقب كان اكثر شي مركز على خليفه.. اللي كان متلثم بسفرته ولابس نظارات شمسية ويخمس بالدراجه وشكله مستمتع... لين يت اللقطه اللي انجلب فيها ..وكلهم شهقوا لانه خليفه طيحته عوفه..وانجلب بعيد عن الدراجه..
عبدالله: خيييييييييييييييبه... منو هالسبال اللي لف على خليفه جي؟؟
حمدان: هذا محمد الله يهدييه...

حصه: طالع خليفه ماسك ايده وتعوره مسكين والشباب كلهم متحاوطيبه.... (التفتت صوب حمدان) بعدها تعوره؟؟
حمدان: انتي وين عن الناس..؟؟؟.... انــكســــــرت...
شهقت حصه ...
حصه: احــــلــــــــف....!!!!
حمدان: والله وجبسووها له...
نورة: حليييييييييييييله خليفه مايستاهل والله....
عبدالله: وينه هوو الحين؟..
حمدان: ساير ويا سيف السينما...
كملوا الفلم وهم يظحكون على سوالف الشباب.. وصدق كان الفلم روعه....وعقب ماخلص سكروا كل شي وردوا الكيمره للشنطه...
حمدان: نوروووه.... ترومين تسجلين لي فلم الكيمره الصغير على واحد عود؟؟؟..ابا اراويه الشباب..
نورة: قول لو سمحتي اول...
حمدان: اقول جلبي ويهج احسن...
نورة: ههههههههه ويا هالراااس..... احترم اللي اكبر منك..
حمدان: انتي اللي ماتشكرين يايبلج فلم شحلاته اطالعينه وظحكتي لين ماقلتي بس ..واخر شي ماتخدمين؟؟؟
نورة: انزييين انزييين..حشاااااااااا...خليتني علووج فحلجك...
حمدان: علوج طعمه خايس...
نورة: خاست ريحتك مسود الويه....
حمدان: قسم بالله توني متسبح ومتعطر... وانتي اروحج اصلا تموتين عليه هالعطر...
نورة: هات هات الفلم....خقاق واحد...
حمدان: ياخي يحقلي...يحـــــقــــــــلــــــي..... في هالفلم كله شفتي واحد احلى مني.؟؟ فذمتج تراااا....
نورة: هههههههههههه لا والله ماشفت....بس اذا سار عبدالله وياكم بيغطي عليك وعلى طوايفك كلها...
عبدالله: احمممممممم.... اسمع وتعلم عن الذووووق... وتراني اسمعه يأذن..قم بنصلي..
حمدان: يالله..
نشوا عبدالله وحمدان يصلون العشا في المسيد... والبنات سارن يصلن فوق...ويوم ردن ينزلن حصوا الكل متيمع في الصاله..الشواب وخالد وناصر وحريمهم...وعبدالله وحمدان.. وتعشوا الريايل وعقب الحريم .. وبعد العشا طلع عبدالله مع حمدان والباقي سهروا شويه لين 11 عقب ساروا يرقدون....

------------------
الجزء الرابع عشر

سيف وخليفه كانوا يالسين فواحد من المطاعم يتعشون بعد ماطلعوا من السينما.... ويرمسون عن سوالف وايده .. سيف ومن عرف ان البنت اللي شافها بنت عم خليفه وهو متخوف... لانه من شاف البنت وهي في خاطره... وكان مصر عليهابشكل خلاه هو نفسه يستغرب...لانه اول مره تعيبه بنت مثل هالبنت..واللي يعرفه ان خليفه مب خاطب... كان خايف انه خليفه يباها والا شي..والا يمكن هي اروحها معرسه والا مخطوبه..بس لا شكلها بنت صغيره يعني..توها في العشرين..وكان يبا يستدرج خليفه بالكلام بدون مايحس عشان يريح باله ويعرف على شو يستقر...
خليفه: صراحه الفلم كان فنان...
سيف: جاكي جاااان لااااازم... تعال عبدالله وين؟
خليفه: مادريبه والله..صبر بدقله..
اتصل خليفه على عبدالله...
عبدالله: مررررررررحباااااا..
خليفه: هلا عبوود شحالك؟ وين انته؟
عبدالله: انا توني ظاهر من بيتنا ويا حمدان..شفنا فلم الدراجات...مصورينك وانته منجلب...
خليفه: شفتوووه عني يالخونه... ؟!
عبدالله: شو نسويبك يوم انته تهوم ويا سواف..!!
خليفه: ماعليك انزين بخليهم يغيرون رايهم بخصوص الملجه..
عبدالله: شووووووووووو.؟؟؟ ليش شو رايهم؟؟؟
خليفه: حليلك يالمعرس ماخبرووك؟؟؟ المفروض يخبرونك امس...
عبدالله: وقفت قلبي شو السالفه...محد خبرني شي..
خليفه: هههههههههههاي..وافقوا عالملجه...اظني عمي يدري..
عبدالله: اللـــــــــــــــــــه يبشرك بالخيير يارب... الحمد لله ..انا قلت يوم بطيتوا بالرد يمكن مب موافقين..
خليفه: لالا من البدايه هم موافقين.. الا تاخروا يتغلون عليكم يمكن..
عبدالله: ههههههههه فديتكم كلكم والله....آآآآآآآآآآآخ ياونااااستي....
خليفه: هههههه الله يكمل عليك..المهم انتو وين سايرين؟
عبدالله: بنسير ميلس قوم الرميثي .. اتصلوا بحمدان اون كلهم متيمعين هناك...
خليفه: والله..؟؟ خلاص نحن بنخلص عشانا وبنلحقكم عيل..
عبدالله: تمام عيل... فمان الله..
خليفه: مع السلامه..
سكر خليفه عن عبدالله وهو يظحك..
سيف: وينه؟
خليفه: ساير ويا حمدان صوب ميلس الرميثي يقول..اذا فاظي بنلحقهم..
سيف: تمااام... وشو سالفه المعرس هذي؟
خليفه: ترا عبود خاطب اختي... واحين محتشر يبا يملج.. ووافقوا الاهل...
سيف: لا والله..؟؟..وبتسووون حفله وهالسوالف؟
خليفه: اكيـــــــــد بيسووون...وبيعزمون العرب والربع كلهم..
سيف: تمااام والله الله يوفقه...وانته ؟؟
خليفه: انا شو بعد؟
سيف: مب ناوي على عرس؟
خليفه: لالالالالا..مب الحين..
سيف: شحقه عاد؟
خليفه: وين اسير اخطب بلا شهادة ولا شغل ... خلني اتخرج وارد واشتغل واستقر بامووري بعدين يمكن اخطب..
سيف: يعني بعد سنه..!!!
خليفه: ان شاء الله..
ارتاح سيف من رمسه خليفه... لو ان خليفه يبا يعرس..او انه حاط البنت في باله .بيخطبها مابيخليها...وبعدين يمكن البنت اصلا مخطوبه والا معرسه... بس المهم انه مابيقطع على ربيعه اي شي دام خليفه اصلا مب ناوي... ولين سنه.. يمكن البنت اطير...لازم يفكر بالموضوع اكثر من جي..ويرتب للسالفه عدل..
خليفه: بلاك سكت؟؟..تفكر تعرس انته بعد؟
سيف: عمري 25 سنه..واشتغل الحمد لله ومستقر...شو ناقصني ماعرس؟
خليفه رفع حواجبه وهو يتبسم...
خليفه: هات من الآآآخر...
سيف: ههههههههه يمكن قريب اذا تيسرت الامور ان شاء الله..
خليفه: الله يوفقك ان شاء الله... حاط فبالك بنت معينه؟
سيف: هي نعم.. انا ماعرس الا على بنت شايفنها واباها...
خليفه: لا يكون بس طحت على بنت وترمسها في التيلفون..؟؟!!!
سيف: مســـــود الويه...!!..تحيدني راعي هالسوالف؟؟؟
خليفه: والله كل شي يتغير تراا...عيل منو هاي اللي شايفنها..تقرب لك؟
سيف: لا ماتقربلي... المهم سد السالفه خلنا نقوم نسير صوب ميلس قوم الرميثي...
خليفه: ياللــه...

بعد يومين في الشارجه.. سعيد كانت حالته ماتسر..كان كله عصبي وينازع ...ومحد يتحمل يقعد وياه ويسولف... ودايما كان يسرح ويشرد بافكاره وويهه حزين... بس يوم طفح به الكيل وماعرف شو سبب زعل نورة عليه...زقر اخته فاطمه لحجرته..ويلس وياها على الشبرية..
سعيد: فطوووم.. الكلام اللي بينا ماريده يطلع..
فاطمه: ان شاء الله..بس شو بلاك؟
سعيد: همممم..فطوم.. مادري بلاها نوره عليه...
فاطمه: شو بلاها؟ ليش شو استوا؟
سعيد: والله انا ماسويت شي... بالعكس كنت احسها تعالمني بشكل حلوو لين الاربعاء في الليل..بس بالخميس انجلبت عليه ..ويوم سالتها قالت لي دام هاي تصرفاتك مابيني وبينك اي شي... انتي شو قايلتلها عني؟؟
بطلت فاطمه عيونها منصدمه...
فاطمه: لا ترد عليه... مارمسنا عنك اصلا...
سعيد: انتي شو حسيتي عليها يوم دخلت الاربعاء في الليل حجرتج وشاله شنطتها؟؟
فكرت فاطمه شوي...
فاطمه: ماكان فيها شي بالعكس كانت مستانسه تظحك وتسولف.. حتى رقدنا متاخر..
سعيد: وبالباجر؟؟
فاطمه: نفس الشي ..ناشه مستانسه...
سعيد: لا..فيها شي..لاني عقب ماردينا من السوق شفتها وكانت اطالعني باحتقار وكره.. وسمعتني هالرمسه الســم... ومن عقبها حتى ماحطت عينها بعيني واول وحده طلعت من بيتنا ..
سكتت فاطمه شوي وهي تفكر...
فاطمه: هي صدق..من عقب ماردينا من السوق وهي شكلها متظايقه..ماكانت تسولف عدل..ولا كانت على طبيعتها...
سعيد: شفتي...!!!.. ليش شو صار ونحن مب موجودين؟
فاطمه: انته شو مسوي بالبنت؟؟؟؟؟
سعيد: بصفعج... قلت لج مب مسوي شي... يعني انا نورة تهون عليه اسويبها شي يزعلها...!!!
فاطمه: والله مادري ياسعيد... حتى لو.. شو بتسمع عنك يعني؟؟؟ انته ماتتصرف تصرفات تسيء لسمعتك.... ولا حد منا بيرمس عنك بشي مب زين.... حتى خوله اللي كانت موجوده يوم نحن محد..واللي انته مشرشحنها ذاك اليوم مابترمس بشي يعيبك..وانته تدري انها تموت فيك..وماتشوف غيرك...
سعيد: خسسسها الله لا تيبين طاريها..... المهم احين شو اسوي؟؟ فطوم انته الوحيده الي تفهميني...قسم بالله قلبي يحترق من اذكر كيف اطالعتني ورمستني ذاك اليوم...ماروم اتحمل...خصوصا اني ماسويت لها شي..
فطوم كسر خاطرها اخوها وحالته... بس هي بعد مابيدها شي تسوييه...وماتقدر تكلم البنت في التيلفون عن هالموضووع..اصلا هذيج مابطيع ترمس وياها عن هالسالفه...

فاطمه: والله ياسعيد مادري شو اقولك...تصبر...كل شي بينكشف ان شاء الله.. وانا ادري انك بالنسبه لنورة غير عن كل الناس ..وتعزك وايد...واكيد انها شافت شي عليك جايد خلاها تاخذ هالموقف منك...
سعيد: قسم بالله مب مسوي شي....شو بكون مسوي يعني؟؟
فاطمه: ادري مب مسوي شي... اكيد البنت فهمت شي غلط...ومصيرها بتفهم السالفه صح..وبترد مثل قبل...
سعيد: الله يسمع منج..
فاطمه: انته بس اصبر.... وكل شي بينحل ان شاء الله...
خلته فاطمه وطلعت وهي قلبها يعورها على اخوها... تدري انه يمووت في شي اسمه نوره من كان توه صغير.. وتدري بعد ان نوره تحس بنفس الشعور تجاه سعيد... واكيد شي سمعت خلاها تاخذ هالموقف... اما سعيد كان فعلا زعلان من خاطره وظايج... المشكله انه مب قادر يحل الموقف... لو عندها تيلفون جان خذ رقمها واتصلبها وفهم منها السالفه كلها... بس المشكله انها بعيد.. ومايروم يسيرلها لين هناك وينفرد فيها ويرمسها...لانه مابتظهرله دام هذا موقفها منه..تم محتار ومب عارف شو يسووي... واكثر اللي مخبلبه انه عارفه نفسه انه ماسوا شي غلط يزعلها منه بهالطريقه....بس ترك هالموضوع غصبن عنه على امل ان الايام بتحل هالمشكله بينهم....

ام خالد من سمعت ان بيت قوم محمد وافقوا على الملجه وهي مختبصه... كل يوم سايره السوق..وتتشرا زهاب حق عنود... وفي خلال اسبوع جهزت خمس شنط ومندوس مترووس عطورات من كل نوع..وماتم عليها غير الشبكة وفستان العروس اللي عنود اصرت انها تفصله برووحها وعلى ذووقها.. على هالحال ماتم عليها غير الشبكة..وعبدالله مصرر انه يختارها بنفسه...وفعلا خصص له يوم وطلع ويا امه من الصبح يتشرون الشبكة..واشتروا الدبله الماس ..وعقد ذهب ابيض مع ساعه... وعقد ثاني ذهب اصفر بعد مع ساعه.. عشان البنت تختار اللي تباه..والصراحه كانن كلهن روعه...وبعد ماخلصت ام خالد تجهيز كل شي ارتاحت..بس راحتها مااستمرت وايد لان نورة وحصه احتشرن.. يبن قطع لفساتينهن ونعول وشيل وعبي وغيره من المستلزمات...
ام خالد: يوووووووووه...مب لازم تحظرن..تعبتني..
حصه: شوووووووو مب لازم هاي بعد..والله يا احضر عنبوو ملجه اخويه ماتبينا نحظر؟؟
عبدالله: امايه.. لازم يحظرن خواتي... وعنود ماترتاح اصلا الا وياهن...
ام خالد: مايخااالف بس هن مايبن يتشرن قطع من العين...وانا مافيني افزعبهن لين الشارجه مره ثانيه...
نوره خافت ان حصه تصر على سيرة الشارجه وهي ماتبا تروح.. فتلاحقت عمرها واقترحت ...
نورة: امايه عنود بعدها ماشترت قطعه لفستانها.. خلونا نسير كلنا بوظبي وهي ويانا ..بنتشرا وبنرد..وعبدالله بيودينا..
عبدالله: عااااااااااشت اختي..خششششششمج...
وايهها وهو يظحك...ومستانس عليها لانها اقترحت هالاقتراح...
ام خالد: لالالالالالا مابيطيعون...
عبدالله: بنسوي نفس سالفة الشارجه..برمس خليفه وبيي ويانا...وانتي مب لازم تسيرين انتي تعبانه ..
ام خالد: والله تبا الحق اني تعبانه من سيرة السوق ومافيني اوديهن...لكن شاور ابوك...
عبدالله: خليه عليه... انا برمس ابويه وبرمس خليفه عشان اييب عنود ونسير رباعه..
ام خالد: هيي..انته هذا اللي تباه... عنبوك بتملج بعد ثلاث اسابيع مافي تصبر؟؟
حصه: حليله يامايه خلييييه... متحمس...هذا اخر عيالج وبيعرس لاتقوليله شي..
ام خالد: فديته انايعلني ماخلى منه ومن شوفته...يعلني اشوف عياله ان شاء الله..
الكل: آآآآآآآآآآآميييييييييييين...
وبعدها بيوم اتفق عبدالله مع خليفه عسب سيرة بوظبي اخر الاسبوع..واهل عنود مامانعوا لانه اخوها وياها.. والبنات بعد وياهم... وخليفه بعد مامانع بس لسبب في نفسه.. وهو انه حصه بتسير.. وبيشوفها وبيسولف وياها..ويتقرب منها اكثر..لانه حس وهو مستغرب بانه فعلا بدا يتعلق ببنت عمه... وهاليش الوحيد اللي خلاة يطيع....
على هالحال اتفقوا كلهم انهم بالخميس الصبح يطلعون من العين صوب بوظبي... مر عبدالله وهو شال البنات على خليفه وعنود...لانهم متفقين يسيرون بسيارة وحده..واصلا خليفه مايروم يسوق بايد مكسورة.... ركب خليفه جدام وركبت عنود ورا اخووها ويا البنات...وكانت مستانسه من هاليلسه لانها تروم تبصبص على عبدالله بدون مايدري...بس عبدالله انقهر ..كان يباها وراه ويحس انها قريبه منه..وعشان بعد يطالعها في المنظرة اللي جدام....بس ماعليه عنده طول اليوم عشان يشوفها ويرمسها..ولو انه خليفه بيصك عليه صكه...بس ماعليه بيقردنه.. كانت حصه يالسه في النص بين عنود ونورة.. خشت راسها بين خليفه وعبدالله ..الحركه اللي خلصت خليفه يتلخبط ويوقف شعر يمبه بسبب قربها الزايد منه... ياحي السياره يوم تخليك قريب من الواحد جي...فكر بهالشي وهو مستانس...
حصه: اخبركم..انتوا تراكم وعيتوني ولا خليتوني اتريق..وانايوعانه ...خطفوا عالمطعم اشترولنا شي..
عبدالله تعايز عن السالفه لانه هو الحبيب تارس بطنه قبل...ومافيه يتوقف..
عبدالله: انتي بس يوعانه؟؟؟
خليفه اطالع عبدالله بنص عين..يدري انها لو طلعت هي الوحيده اللي يوعانه بيصبرها لين ماتوصل بوظبي..
خليفه: حتى انا ماتريقت...خطف عالمطعم..
خليفه اصلا ماكان يوعان لانه مب عادته انه يتريق... بس عشان حصه غصب عبدالله انه يمر..ماتهون عليه تمشي في الاسواق ويدور راسها من قل الاكل...
وقف عبدالله في مطعم كان في الدرب وخذولهم سندويشات وعصير وكملوا الخط..وهم كله سوالف وظحك...ونورة اللي قررت تتناسى اللي ياها من سعيد وتفرح لفرحه اخوها..مب كل يوم بيملج عبدالله ..ولازم تستانس وياهم...واذا كان سعيد مسوي هالحركات فيها معناته مايستاهل حتى انها تفكر فيه...عشان جي طلعته من بالها ولو انه قلبها كان يقولها بان سعيد مظلوم...بس سكتته بالغصب..
اقترحت نورة انهم يسيرون مركز مدينة زايد لانها شايفه هناك محلات فيها قطع فساتين روعه... ووراحوا هالمركز ومرواعلى المحلات كلهن..وفعلا كانن فيه قطع حلواااات وايد .... نورة تعلقت بقطعه كحلية..واصرت انها تشتريها... وكانت ناعمه وحلوه مب من النوع اللي فيها وايد ربشه... وبغت تفك عمرها من الصدعه عشان جي اشترتها وفكت عمرها... عنود ماعيبها شي من المحل اللي هم يالسين فيه.فراحت لواحد من الكراسي وقعدت عدال نورة....اماحصه كانت محتاره بين قطعه سودا وفيها لون ابيض خفيف...وقطعه ثانيه بطيخي مع الوان ثانيه مدموجه معاها... عبدالله ذيج الساعه طلع اييب له ماي لانه عطش من الدواره...فتم خليفه عند البنات.. وشاف حصه محتاره بين القطع... فاستغل الفرصه ويا صوبها ووقف عدالها يطالع اللي هي اطالعه...
خليفه: ما عيبج شي؟؟
انصدمت حصه يوم شافت خليفه عدالها.. وردت اطالع القطع وهي قافطه..
حصه: عيبني هالهنتين ومب عارفه شو اخذ منهن...
طالع خليفه القطعتين ورد يطالعها...
خليفه: بتفجين شعرج في الملجه؟؟
استغربت حصه من سؤاله ...
حصه: ليش تسال؟؟
خليفه: بتفجينه والا لا؟
حصه: هذا اللي انا ناوتنه...بفجه ان شاء الله..
خليفه: اوكي..اذا فجيتيه ولو اني ماباج تفجينه..خذي البطيخية.بهالطريقه بيبين طول شعرج وبيكون واضح لانه تحته لون فاتح.....واذا مابتفجينه خذي السودا... وانا صراحه عايبتني السودا..
كان يتكلم بصوت واطي ماسمعنه نورة وعنود...واصلا هن رواحهن كانن يسولفن مع بعض مشغولات...انحرجت حصه من كلام خليفه...ليش مايباني افج شعري يعني..؟؟.. واصلا مب شكله جي ماله خص ؟؟؟ بس ماقدرت تقووله... وبينها وبين نفسها فرحت لاهتمامه....
حصه: ليش ماتباني افجه؟
خليفه: تبينهم يحسدونه انتي؟
حصه: همممم وشو دراك انه طويل وينحسد اصلا؟؟؟؟؟
انحرج خليفه وارتبك من هالسؤال....مايقدر طبعا يقولها انه شايفنها بلا شيله... وشاف شعرها وهو ملموم انه كبير ماشاء الله....
خليفه: هههههههه يبين انه طويل..ماتشوفينه متكود ورا راسج هالكبر ماشاء الله.... المهم لا تفجينه وخذي السودا...والله احلى عن البطيخية...
حصه: شورك وهداية الله.... خلاص بخذ السودا..
خليفه: ومابتندمين...
خلاها خليفه وطلع برا المحل يشوف عبدالله وين.. وهذا كان ياي صوبهم ويوم وصل...
عبدالله: هااا خلصتوووا؟
نورة: خواتك خلصن..الا حرمتك بعدهاماخلصت..
ظربتها عنود على جتفها وهي منقهره...ومنحرجه..
عبدالله: اوووص ولا كلمه...برايها تختار اللي تباه لين العصر بعد...
طلعوا من المحل ..
خليفه: احممممممم احممم... محد بيييسلك انته وحرمتك لين العصر اوكي... دام الحين الساعه 12..
عبدالله: سيروا انتوا وخلوني انا وياها..بترياها لين ماتختار اللي تباه...
خليفه: لا والله..!!!!... روح روح...
وكملوا دواره على المحلات لين ماحصلت عنود اللي تبغيه..واول ماشافت القطعه انغرمت فيها ... وهي قطعه لونها وردي مع ابيض... وكانت ناعمه ورقييقه وايد بس من الشغل اللي فيها كان يبين عليها انها فخمه...
حصه: اووش اووووش..العرووس غلبتناااا...رهيبه الصراااحه..
عبدالله: شو اتحسبيين عيل...
حصه: اظن مدحت عنود مامدحتك انته...
عبدالله: كله واحد وحياااتج...
ظحكت العنود وهي منحرجه...عبدالله مطيح المياانه اليوم كله يتغزل فيها ويتمدح بها....بعد ما اشترت عنود القطعه اللي تباها ساروا صوب واحد من المطاعم وخذولهم غدا... مسكين خليفه ماكان يقدر ياكل بحرية بسبب ايده المكسووره.. وكل شوي عبدالله يساعده عشان ياكل مرتاح...وهم يظحكون عليه ويمزحون...وبعد ماخلصوا من الغدا..ردوا يحوطون على المحلات لانه باقي نعلان وشيل وعبي... وتمن يحوطن لين 3 ونص وخذت كل اللي يبنه..وبعدها ردوا العين وهم ميتين من التعب...

-----------------------------
الجزء الخامس عشر

قربت امتحانات البنات.. نورة وحصه وعنود وفاطمه اللي امتحاناتها ثانوية عامه.. والكل كان مختبص...بسبب الملجه بعد والتجهيزات... عبد الله كان ميت من الوناسه..وماخلى حد ماعزمه من ربعه... حتى سيف الشامسي عزمه هو واهله..وهذا حصلها فرصه... بيطرش امه تتعرف عليهم وتسال عن البنت..طبعا بعد مايوصفها لامه..
خليفه وحمدان ماخذين الموضوع عادي..صح مستانسين انه بتستوي عندهم ربشه بس انقهروا اكثر لانه اكثر الشغل طاح على روسهم خصوصا خليفه بسبب فظاوته..واللي كانت ايده قربت تصح وعليها ربطه خفيفه بس..
سعيد ونورة على حالتهم...نورة صح تلتهي بالربشه والتجهيزات واكثر شي امتحاناتها اللي تبدا قبل الكل... بس كان قلبها يعورها على الحال اللي وصلت له هي وسعيد ..من بعد ماكانوا عايشين احلى فتره فحياتهم... والنظرات اللي كانوا يتبادلونهاوالكلام البسيط كانت تعنيلهم اكثر من اي شي ثاني....بس كله هذا راح... نورة على بالها انها مخدوعه.. اما سعيد مب عارف بالضبط بشو يفكر وعلى منو يحط اللوم ...ومع الايام قام يفكر بان نورة غيرت رايها بخصوصه.واذا كانت تحبه صدق مابتصدق عليه كلام شين... وحتى لو سمعت المفروض تي وتقوله مب تصدق بكل بساطه وتتهمه باشياء هو ماسواها وتقطع اي صله لها وياه... وبدا الشيطان يوسوسله بانها هي اصلا تبا الفكه منه....وماصدقت تحصل سبب عليه.... وعلى هالحال هو نفسه عصب من هالسالفه وقرر انه يتخطى حب نورة...اذامابغته فيه الف بنت تتمناه... والواضح ان حبها له مب كافي والا ماصدقت عنه اي كلام ينقال...

حصه امتحاناتها النهائية كانت شاغلتنها عن اي شي ثاني... وكانت تحمد ربها ان هالكورس عدا على خير بدون اي حرمان...وكانت مقرره ان نتايجها تكون زينه وايد لانه اخر كورس لها...بس مع ذلك تردد خليفه على بيتهم بسبب تجهيزات الملجه والحركات اللي كانت تصير بينهم... هذا غير النظرات اللي كان خليفه يوتر حصه بهم...كانت تاثر في تركيز حصه للدراسه.. حصه مب مثل نورة وعنود اللي شاغلات نفسهن بامور الحب..!!...كانت غير عن بنات جيلها.. اللي مايهتمن غير بهالسوالف..كانت دراستها اهم شي بالنسبه لها...وطبعا رضى والديها عليها اللي ماتروم تقولهم لا... بس خليفه وبتصرفاته الاخيره كانت تحيرها... هي ملاحظه انه مازال يعامل نورة برسمية مثل ماكان يعاملهن طول عمره.بس من رجعته الاخيره من السفر قام يلعب باعصابها... شو يبا مني؟؟... وليش انا يعني؟؟..توه بس انتبه لي وشافني؟؟ صح النوم ياخليفه... !!... وهي ماتنكر طبعا بانها في اللحظات القلييله جدا اللي كانت تفكر فيهن بالزواج...كانت دايما تتخيل شخص بملامح خليفه....ريال بطباع واخلاق خليفه...لانه وبكل اختصار يناسب ذوقها.. او يمكن لانها هي كبرت وهم يسمعونها انها بتكون لخليفه ولد عمها... لكن لا هو ولا هي اهتموا بهالسوالف الا الحين...ومن صوب خليفه بس...لان الحركات طالعه من صوبه مب من صوبها هي... هي لين الحين ماتدري وين الله حاطنها..واحسن لها تركز في امتحاناتها وتخلص وتفتك عقب بتتفرغ تفكر بكل هالسوالف...هذا اذا ماحصلت لعمرها شي تنشغل فيه مثل الشغل مثلا...هذا اذا خلوووها الاهل...!!
عنود وعبدالله في عالم خيالي....عنود متخوفه ان بسبب كل هالانشغال بالملجه والتفكير بحياتها مع عبدالله بتيب نتايج مب عدله في امتحاناتها... عشان جي خلصت شغلها هي..حجزت عند صالون كنوز لبنان حقها وحق بنات عمها ..والفستان عند المشغل بعده ماخلص.. اما بخصوص اهتمامها الشخصي بنفسها فهي اصلا ماعليها كلام..البشره ماشاء الله صافيه ومنوره والجسم ولا احلى...عشان جي وكلت اهلها بكل الامور الباقيه وهي احسن لها تنتبه لامتحاناتها... لكن كل ماكانت تمسك كتاب كان خيالها يسرح...بعد اسبوعين ويومين بس بتكون بشكل رسمي زوجه عبدالله... اللي طول حياتها وهي تتمناه وماتشوف غيره... ماشي احلى من ان الواحد ياخذ انسان اختاره قلبه قبل مايختاره عقله... وكانت احيانا تتجرا واطرش له مسج على تيلفونه..بس يوم كانت تسوي هالشي كان يرد عليها بعشر مب بمسج وحده بس...وكانت تمسحهن بسبب خوفها ان حد يشوفهن... لكن المسج الوحيده اللي ماقدرت تمسحها كانت تقول:" والله يا عنود اني حبيتج من خاطري... وانتي ماتعرفين ولد عمج يوم يحب... بس مابقول غير اني اوعدج اخليج مستانسه بحياتج وياي ولا اقصر فيج...وتصبحين على الف خير ".
هل الشارجه كانوا عايشين حايتهم طبيعي ماشي تغير عليهم..تاقلموا كلهم مع مزاج سعيد اليديد..ومحد قام يتنقرشبه او يغلس عليه ويمزح وياه لانه ماقام يتحمل السوالف..وصار جدي وايد بتعاملاته مع الناس..واهله...
فطوم كانت ماكله الكتب اكل لانه امتحاناتها خلاص بدت....عندها طبع غريب بانها ماكانت تحب تذاكر في غرفتها او داخل البيت...اييها الرقاد...عشان جي كانت تطلع الحوش وتيلس هناك والا تروح فوق السطح وتقعد مثل الغراب وتدرس...والكل كان مخليها على راحتها ومهيئين لها الجو للدراسه...
شيخة اختهم اختبصت فوق تحت هي بعد... ياينها خطييب... ويصير لها من بعيد من طرف امها... ريال مهيري وحبوب من دبي... ووافقوا عليه..وبجذي صارت شيخه مخطووبه بس بعدهم مااعلنوا الخبر..لين مايستوي كل شي رسمي....
عليا حرمه اخوهم..قررت انها تروح عند اهلها في العين اسبوووع..عشان تساعدهم في الترتيبات .. عاد ملجه الغالي عبدالله مستحيل ماتكون موجووده... ووافق فيصل غصبن عنه ولو انه مايصبر بلاها... وقرروا انهم يسيرون اخر الاسبوع ...
عبدالله واهله قرروا يسوون خيمه برا بيت عمه للرياييل... ويخلون البيت والميالس اللي فيه للحريم.. لانهم وبدون توقع عزموا عرب وايدين...ويخافون انه مايكفيهم المكان... الشباب عبدالله وحمدان وخليفه قرروا بينهم وبين بعض انهم يسوون رزفه ويا ربعهم بعد مايخلص العشا ويروحون نص المعازيم... لانه يوم شاوروا الشواب قالوا حشى هذا عرس مب ملجه ..وماطاعوا... عشان جي خلوها بالسرر... عبدالله بالنسبه له هذا عرسه.. ولازم انه يفرح فيه قبل مايتغرب مره ثانيه لامريكا..ويبا يصور كل شي بالفيديو ويشل الاشرطه وياه...عشان يشوفهن هناك براحه...ويتصبربهن...وانقهر وايد يوم درى انه مابيدش على عنود وبيلبسها الدبله والشبكة في الملجه... العيايز احتشرن وماخلنه.. والكل قاله انه اخوانه ماسووها قبله بيي هو على اخر الزمن وبيدخل على البنت جنه معرس وبيلبسها؟؟ ..مستحـــــــــيـــــــــــــل... وبلع لسانه عبدالله وماقال شي... يخاف يفركشون له السالفه بعد على اخر الاسبوع...
ام خالد كانت توصي بناتها...بان قبل الملجه..عربهم اللي من صوب بو خالد بيتيمعون في بيتهم هني اول وبعدين بيسيرون رباعه وبيشلون الزهاب لبيت عمهن... وعلىهالحال لازم يجابلن الحريم ويقربن ويحربن... وهن يعرفن هالسوالف كلها بس اصرت انها توصيهن زياده.. ولو انها ماتحب بناتها يظهرن جدام الحريم... ماتبا اي حد يقول ان ام خالد مطلعه بناتها تراويهن العرب عشان يخطبونهن... وهذا تفكير عيايز اول ترا..يعني مايبت شي من عندي... المهم...خلصت توصياتها ورتبوا كل شي في بيتهم وراجعوا كل نقطه عشان ماتستوي خربطه وقت الملجه لانه اصلا الكل بيكون مرتبش...
خلصن البنات امتحاناتهن على نهاية هالاسبوعين...عليا كانت في بيت اهلها... والكل كان فرحان بها.. نورة كانت كل ماتشل هلال الصغير تقبضها العبره... هالولد كل مايكبر يشبه عمه اكثر واكثر... ليش ياسعيد خربت اللي بينا بهالطريقه ليش؟...اما سعيد فــ مب عارف يسير الملجه او لا... عبدالله يوم اتصل له اصر عليه بقوو انه ايي... وهو بصراحه متردد..يسير هناك ويمكن تسمح له الفرصه انه يفهم شو فيها نوره..!!..والا ان كرامته ماتسمح له انه يسير ويقعد في بيتهم واتم هي مندسه عنه ماتبا تشوفه ولا حتى تسلم عليه..؟؟؟ ... بس في النهاية قرر انه السيره مب عشان خاطر عيونها هي... ماتبا تشوفه برايها لاتطلع ...هو اصلا ساير عشان ولد عمه وربيعه...وعيــــــــب انه يقصر فيه...في النهاية قرر انه يسير...ونورة ادق راسها بالايدار اذامب عايبنها وجوده...
~(لهالدرجه وصل سعيد من القهر على نورة)~
اليوم كان الاربعاء الصبح تواعدن الحريم كلهن ( عنود وميرة وعليا وحصه ونورة) يسيرن الصالون ويتحنن..وردن الظهر وتغدوا كل حد فبيته..والظهر هو موعد وصول هل الشارجه.... نورة كان بطنها يعورها بسبب وصولهم في اي لحظه.. جهزوا غرفتين الضيوف حقهم.. فيصل بيرقد مع حرمته في غرفتها الجديمه عدال غرفة حصه.... وخالها وحرمته بيرقدون في وحده من غرف الضيوف.. وامنه (الاخت العوده المعرسه ..مايبنا طاريها من قبل) ومنى ومنال بيرقدون في غرفة الضيوف الثانية..شيخة بترقد مع حصه...و فطوم بترقد ويا نورة كالعاده...وسعيد... آآآآخ يا سعيد... بيرقد في غرفة عبدالله.... المجابله لغرفة نورة.....والله يعين ان شاء الله.....
على الساعه 3 الظهر كان بو خالد راقد... وخالد بعد رقد.. ناصر وعبدالله مع خليفه كانوا في الميلس يتريون هل الشارجه يوصلوون... اما في البيت فكانت ام خالد وحصه ونورة وعليا مع عيالها وحمده حرمه ناصر مع عيالها لطيفه وسهيل كلهم يالسين في الصالة...وكلهم يتريوون..
في الدرب ويا هل الشارجه... ام فيصل كانت راكبه ويا بو فيصل ووياهم منى ومنال.. امنه وعيالها الثلاثه وبنتها الصغيره كانوا راكبين ويا فيصل ..وفيصل سيارته مورسيدس ماتضم وايدين... اما شيخه وفاطمه ركبن مع سعيد في سيارته الـ اكس فايف البيضا.. وهو نفسه مع انه كان يكابر..بس كان فعلا متوتر... اذا شافها كيف بيتصرف؟؟ يلبسها؟ والا يمسكها غصب عشان يفهم منها السالفه..؟؟؟... وهو يدري ان المكابر وعزه النفس هذي مابتفيده بس مب قادر يتنازل... وكانت فكره ان نوره لو كانت تحبه صدق وواثقه فيه مابتصدق عنه اي شي سمعته, مسيطرة عليه ومقتنع بها كليا... بس اول مادخل العين ..وفي الطريج صوب بيتهم ..رد له شوقه لها...احبها ياناس ما اقدر انكر هالشي... وهي سباله انها فاهمه شي عني غلط...عنبوا ماتشوف اللي في عيوني يوم تي فعيونها..؟؟ والا عميا ؟؟.. بس ماعليج يانوروه والله دواج عندي... وبخليج تقاسين اللي انا قاسيته بسبب تصرفاتج الطفوليه هاي...
اول ماوصلوا البيت وقفوا سياييرهم في القراجات اللي داخل البيت... بيت بو خالد مرتب ومسوي احتياطاته ... نزلوا كلهم والرياييل ساروا صوب الميالس لانه قوم ناصر وعبدالله وخليفه طلعوا من هناك....وام خالد وعليا وحصه طلعن بعد من البيت عشان يستقبلن الحريم ويسلمن بعد على الريايل..بوفيصل وعياله يوا صوب ام خالد وسلموا عليها ... سلامه بنت فيصل ربعت صوب ابوها وتلصقت فيه... سعيد يا يتبسم صوب عليا وقالها..
سعيد: هاتي ولي العهد... من اسبوع ماشفناه...
وشله وياه وساربه الميلس.... ام فيصل وبناتها سلمن على البنات والحريم ودشن البيت... آمنه الاخت الكبيرة المعرسه عيالها الثلاثه ساروا ويا خوالهم فيصل وسعيد الميلس ..اما البنت فتمت وياها.... داخل البيت يت نوره وحمده اللي ماطاعن يطلعن... وسبب نورة معرووف..سلمن على باقي الحريم ويلسن يسولفن ويخربطن ويتفاولن ...

اما سعيد اللي داخل الميلس منشغل ويا هلال الصغير..قلبه انقبض من اول مايا... حصه طلعت تسلم ..ونوره ماطلعت..شو القصد يعني؟؟ ماتباتشوووفني طبعا... بس مصيرها بتفهم وبتتعذر...
خليفه كان حاله غريب...مب عارف بشوو بالضبط يحس اتجاه سعيد... مات قهر يوم شاف حصه طالعه تسلم عليهم... ولا هوو بعد بقوه عين ساير صوبهم وسولف شوي ويا عليا اللي كانت واقفه عدال حصه... آآخ يالقهر..ليش حصه تطلع له؟؟؟....لايكون حاطه العين عليه هذي بعد..!!!..يعني نورة الخريش ماطلعت..انتي الحشيم طلعتي..؟؟؟؟ . وهو يعرف عدل ان سعيد يقدر يخطب حصه لانه اكبر عنها بسنه.... وحصه جميله وحبوبه وحشيم ومدينه ..وتنحب الصراحه والا ماتعلقت بها انا ارووحي في فتره اسابيع هالكثر...وتمت الافكار تاخذه وتيبه بخصوص علاقة حصه بسعيد.... كل خوفه انه حاط عينه عليها... والله ياويله ...بجلع له عيونه عشان مايتم يشوف اي بنت غير...والا خله يحشم ويحترم نفسه ويعرف انه عندها ولد عم احق بها من الغير.... والا انا غلطان؟؟؟؟؟؟ شو رايكم انتوا؟ منو احق بها انا والا سعيد هذا...!!!
المهم مر هاليوم على خير... بدون مشاكل..ولو ان الكل كان يغني على ليلااااه.... بس كانت اللمه حلوه وسوالفهم كلها بخصوص عبدالله وعنود..والملجه والتجهيزات...والفرحه كانت صايبتهم كلهم... كانهم سكرانين على اي شي بيضحكون... واللي فيه شي مظايقنه تناسى هالشي لفتره وفرح لفرحة باقي الاهل...
حصه وتخرجت وخلصت امتحاناتها وارتاحت...
ونورة افتكت من امتحاناتها ولو انها بتبدا صيفي بعد اسبوعين...
وفطوم شو عليها..ثانوية عامه وتخرجت... وكلنا نعرف عن فرحه اي طالب بعد تخرجه من الثانوي... كلنا مرينا فيها واللي مامر فيها...بيمر ان شاء الله قريب... وبيجرب هالفرحه...
اما شيخه ..فرحتها فرحة كل مخطوبه قريب...تراقب كل تجهيزات الملجه وتعرف انها بتمر بهالشي ارووحها قريب في ملجتها...
يوم يت الساعه 11..الكل رقد...من التعب اللي فيهم... اما فطوم اللي كانت معزمه ترمس نورة في سالفته مع سعيد وتستفسر منها..لين الحين ماحصلت الفرصه..وكل ماكانت تيب طاري سعيد لنوره..تهربت وغيرت السالفه...لكن ماعليه هم يالسين لين الجمعه وان شاء الله بتحصل الفرصه المناسبه عشان تفهم منها كل المشكله...
وسعيد لين الحين ماصارت له فرصه يشوف طرف شيلة نورة حتى... ويعرف ان الوضع فبيت عمته اصعب بوايد من بيتهم في الشارجه.. هني وايد متشددين وحريصين.. ويوم حد بيدش بيتهم مب بس بيسووله درب..الا بيفضوون له البيت كامل وبيخشون بناتهم في الغرف بس عشان محد يشوفهن وهو خاطف... وعلى نص الليل دخل هو وعبدالله البيت ورقدوا...